𑁧𑁫. 𑀲𑁄𑀴𑀲𑀓𑀦𑀺𑀧𑀸𑀢𑁄

𑁧. 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀕𑀸𑀣𑀸

𑁬𑁭𑁩. ‘‘𑀏𑀲 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺, 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀫𑀳𑀸𑀭𑀲𑀁;

𑀯𑀺𑀭𑀸𑀕𑁄 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀅𑀦𑀼𑀧𑀸𑀤𑀸𑀬 𑀲𑀩𑁆𑀩𑀲𑁄.

𑁬𑁭𑁪. ‘‘𑀩𑀳𑀽𑀦𑀺 𑀮𑁄𑀓𑁂 𑀘𑀺𑀢𑁆𑀭𑀸𑀦𑀺, 𑀅𑀲𑁆𑀫𑀺𑀁 𑀧𑀣𑀯𑀺𑀫𑀡𑁆𑀟𑀮𑁂;

𑀫𑀣𑁂𑀦𑁆𑀢𑀺 𑀫𑀜𑁆𑀜𑁂 𑀲𑀗𑁆𑀓𑀧𑁆𑀧𑀁, 𑀲𑀼𑀪𑀁 𑀭𑀸𑀕𑀽𑀧𑀲𑀁𑀳𑀺𑀢𑀁.

𑁬𑁭𑁫. ‘‘𑀭𑀚𑀫𑀼𑀳𑀢𑀜𑁆𑀘 𑀯𑀸𑀢𑁂𑀦, 𑀬𑀣𑀸 𑀫𑁂𑀖𑁄𑀧𑀲𑀫𑁆𑀫𑀬𑁂;

𑀏𑀯𑀁 𑀲𑀫𑁆𑀫𑀦𑁆𑀢𑀺 𑀲𑀗𑁆𑀓𑀧𑁆𑀧𑀸, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺.

𑁬𑁭𑁬. [𑀥. 𑀧. 𑁨𑁭𑁭 𑀥𑀫𑁆𑀫𑀧𑀤𑁂] ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸.

𑁬𑁭𑁭. [𑀥. 𑀧. 𑁨𑁭𑁮 𑀥𑀫𑁆𑀫𑀧𑀤𑁂] ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸.

𑁬𑁭𑁮. [𑀥. 𑀧. 𑁨𑁭𑁯 𑀥𑀫𑁆𑀫𑀧𑀤𑁂] ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸.

𑁬𑁭𑁯. ‘‘𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁄 𑀬𑁄 𑀣𑁂𑀭𑁄, 𑀓𑁄𑀡𑁆𑀟𑀜𑁆𑀜𑁄 𑀢𑀺𑀩𑁆𑀩𑀦𑀺𑀓𑁆𑀓𑀫𑁄;

𑀧𑀳𑀻𑀦𑀚𑀸𑀢𑀺𑀫𑀭𑀡𑁄, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑁂𑀯𑀮𑀻.

𑁬𑁮𑁦. ‘‘𑀑𑀖𑀧𑀸𑀲𑁄 𑀤𑀴𑁆𑀳𑀔𑀺𑀮𑁄 [𑀤𑀴𑁆𑀳𑁄 𑀔𑀺𑀮𑁄 (𑀲𑁆𑀬𑀸. 𑀓.)], 𑀧𑀩𑁆𑀩𑀢𑁄 𑀤𑀼𑀧𑁆𑀧𑀤𑀸𑀮𑀬𑁄;

𑀙𑁂𑀢𑁆𑀯𑀸 𑀔𑀺𑀮𑀜𑁆𑀘 𑀧𑀸𑀲𑀜𑁆𑀘, 𑀲𑁂𑀮𑀁 𑀪𑁂𑀢𑁆𑀯𑀸𑀦 [𑀙𑁂𑀢𑁆𑀯𑀸𑀦 (𑀓.)] 𑀤𑀼𑀩𑁆𑀪𑀺𑀤𑀁;

𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀛𑀸𑀬𑀻, 𑀫𑀼𑀢𑁆𑀢𑁄 𑀲𑁄 𑀫𑀸𑀭𑀩𑀦𑁆𑀥𑀦𑀸.

𑁬𑁮𑁧. ‘‘𑀉𑀤𑁆𑀥𑀢𑁄 𑀘𑀧𑀮𑁄 𑀪𑀺𑀓𑁆𑀔𑀼, 𑀫𑀺𑀢𑁆𑀢𑁂 𑀆𑀕𑀫𑁆𑀫 𑀧𑀸𑀧𑀓𑁂;

𑀲𑀁𑀲𑀻𑀤𑀢𑀺 𑀫𑀳𑁄𑀖𑀲𑁆𑀫𑀺𑀁, 𑀊𑀫𑀺𑀬𑀸 𑀧𑀝𑀺𑀓𑀼𑀚𑁆𑀚𑀺𑀢𑁄.

𑁬𑁮𑁨. ‘‘𑀅𑀦𑀼𑀤𑁆𑀥𑀢𑁄 𑀅𑀘𑀧𑀮𑁄, 𑀦𑀺𑀧𑀓𑁄 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄;

𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀫𑁂𑀥𑀸𑀯𑀻, 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀲𑀺𑀬𑀸.

𑁬𑁮𑁩. ‘‘𑀓𑀸𑀮𑀧𑀩𑁆𑀩𑀗𑁆𑀕𑀲𑀗𑁆𑀓𑀸𑀲𑁄, 𑀓𑀺𑀲𑁄 𑀥𑀫𑀦𑀺𑀲𑀦𑁆𑀣𑀢𑁄;

𑀫𑀢𑁆𑀢𑀜𑁆𑀜𑀽 𑀅𑀦𑁆𑀦𑀧𑀸𑀦𑀲𑁆𑀫𑀺𑀁, 𑀅𑀤𑀻𑀦𑀫𑀦𑀲𑁄 𑀦𑀭𑁄.

𑁬𑁮𑁪. ‘‘𑀨𑀼𑀝𑁆𑀞𑁄 𑀟𑀁𑀲𑁂𑀳𑀺 𑀫𑀓𑀲𑁂𑀳𑀺, 𑀅𑀭𑀜𑁆𑀜𑀲𑁆𑀫𑀺𑀁 𑀩𑁆𑀭𑀳𑀸𑀯𑀦𑁂;

𑀦𑀸𑀕𑁄 𑀲𑀗𑁆𑀕𑀸𑀫𑀲𑀻𑀲𑁂𑀯, 𑀲𑀢𑁄 𑀢𑀢𑁆𑀭𑀸𑀥𑀺𑀯𑀸𑀲𑀬𑁂.

𑁬𑁮𑁫. ‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁…𑀧𑁂… 𑀦𑀺𑀩𑁆𑀩𑀺𑀲𑀁 𑀪𑀢𑀓𑁄 𑀬𑀣𑀸.

𑁬𑁮𑁬. ‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁…𑀧𑁂… 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄.

𑁬𑁮𑁭. ‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸…𑀧𑁂… 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

𑁬𑁮𑁮. ‘‘𑀬𑀲𑁆𑀲 𑀘𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑁄, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀺𑀁 𑀫𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀸’’𑀢𑀺.

… 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄 [𑀅𑀜𑁆𑀜𑀸𑀓𑁄𑀡𑁆𑀟𑀜𑁆𑀜𑁄 (𑀲𑀻. 𑀲𑁆𑀬𑀸.)] 𑀣𑁂𑀭𑁄….

𑁨. 𑀉𑀤𑀸𑀬𑀺𑀢𑁆𑀣𑁂𑀭𑀕𑀸𑀣𑀸

𑁬𑁮𑁯. [𑀅. 𑀦𑀺. 𑁬.𑁪𑁩] ‘‘𑀫𑀦𑀼𑀲𑁆𑀲𑀪𑀽𑀢𑀁 𑀲𑀫𑁆𑀩𑀼𑀤𑁆𑀥𑀁, 𑀅𑀢𑁆𑀢𑀤𑀦𑁆𑀢𑀁 𑀲𑀫𑀸𑀳𑀺𑀢𑀁;

𑀇𑀭𑀺𑀬𑀫𑀸𑀦𑀁 𑀩𑁆𑀭𑀳𑁆𑀫𑀧𑀣𑁂, 𑀘𑀺𑀢𑁆𑀢𑀲𑁆𑀲𑀽𑀧𑀲𑀫𑁂 𑀭𑀢𑀁.

𑁬𑁯𑁦. ‘‘𑀬𑀁 𑀫𑀦𑀼𑀲𑁆𑀲𑀸 𑀦𑀫𑀲𑁆𑀲𑀦𑁆𑀢𑀺, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀼𑀁;

𑀤𑁂𑀯𑀸𑀧𑀺 𑀢𑀁 𑀦𑀫𑀲𑁆𑀲𑀦𑁆𑀢𑀺, 𑀇𑀢𑀺 𑀫𑁂 𑀅𑀭𑀳𑀢𑁄 𑀲𑀼𑀢𑀁.

𑁬𑁯𑁧. ‘‘𑀲𑀩𑁆𑀩𑀲𑀁𑀬𑁄𑀚𑀦𑀸𑀢𑀻𑀢𑀁, 𑀯𑀦𑀸 𑀦𑀺𑀩𑁆𑀩𑀦𑀫𑀸𑀕𑀢𑀁;

𑀓𑀸𑀫𑁂𑀳𑀺 𑀦𑁂𑀓𑁆𑀔𑀫𑁆𑀫𑀭𑀢𑀁 [𑀦𑀺𑀓𑁆𑀔𑀫𑁆𑀫𑀭𑀢𑀁 (𑀓.)], 𑀫𑀼𑀢𑁆𑀢𑀁 𑀲𑁂𑀮𑀸𑀯 𑀓𑀜𑁆𑀘𑀦𑀁.

𑁬𑁯𑁨. ‘‘𑀲 𑀯𑁂 𑀅𑀘𑁆𑀘𑀭𑀼𑀘𑀺 𑀦𑀸𑀕𑁄, 𑀳𑀺𑀫𑀯𑀸𑀯𑀜𑁆𑀜𑁂 𑀲𑀺𑀮𑀼𑀘𑁆𑀘𑀬𑁂;

𑀲𑀩𑁆𑀩𑁂𑀲𑀁 𑀦𑀸𑀕𑀦𑀸𑀫𑀸𑀦𑀁, 𑀲𑀘𑁆𑀘𑀦𑀸𑀫𑁄 𑀅𑀦𑀼𑀢𑁆𑀢𑀭𑁄.

𑁬𑁯𑁩. ‘‘𑀦𑀸𑀕𑀁 𑀯𑁄 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀦 𑀳𑀺 𑀆𑀕𑀼𑀁 𑀓𑀭𑁄𑀢𑀺 𑀲𑁄;

𑀲𑁄𑀭𑀘𑁆𑀘𑀁 𑀅𑀯𑀺𑀳𑀺𑀁𑀲𑀸 𑀘, 𑀧𑀸𑀤𑀸 𑀦𑀸𑀕𑀲𑁆𑀲 𑀢𑁂 𑀤𑀼𑀯𑁂.

𑁬𑁯𑁪. ‘‘𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘, 𑀘𑀭𑀡𑀸 𑀦𑀸𑀕𑀲𑁆𑀲 𑀢𑁂𑀧𑀭𑁂;

𑀲𑀤𑁆𑀥𑀸𑀳𑀢𑁆𑀣𑁄 𑀫𑀳𑀸𑀦𑀸𑀕𑁄, 𑀉𑀧𑁂𑀓𑁆𑀔𑀸𑀲𑁂𑀢𑀤𑀦𑁆𑀢𑀯𑀸.

𑁬𑁯𑁫. ‘‘𑀲𑀢𑀺 𑀕𑀻𑀯𑀸 𑀲𑀺𑀭𑁄 𑀧𑀜𑁆𑀜𑀸, 𑀯𑀻𑀫𑀁𑀲𑀸 𑀥𑀫𑁆𑀫𑀘𑀺𑀦𑁆𑀢𑀦𑀸;

𑀥𑀫𑁆𑀫𑀓𑀼𑀘𑁆𑀙𑀺𑀲𑀫𑀸𑀯𑀸𑀲𑁄, 𑀯𑀺𑀯𑁂𑀓𑁄 𑀢𑀲𑁆𑀲 𑀯𑀸𑀮𑀥𑀺.

𑁬𑁯𑁬. ‘‘𑀲𑁄 𑀛𑀸𑀬𑀻 𑀅𑀲𑁆𑀲𑀸𑀲𑀭𑀢𑁄, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑁄;

𑀕𑀘𑁆𑀙𑀁 𑀲𑀫𑀸𑀳𑀺𑀢𑁄 𑀦𑀸𑀕𑁄, 𑀞𑀺𑀢𑁄 𑀦𑀸𑀕𑁄 𑀲𑀫𑀸𑀳𑀺𑀢𑁄.

𑁬𑁯𑁭. ‘‘𑀲𑀬𑀁 𑀲𑀫𑀸𑀳𑀺𑀢𑁄 𑀦𑀸𑀕𑁄, 𑀦𑀺𑀲𑀺𑀦𑁆𑀦𑁄𑀧𑀺 𑀲𑀫𑀸𑀳𑀺𑀢𑁄;

𑀲𑀩𑁆𑀩𑀢𑁆𑀣 𑀲𑀁𑀯𑀼𑀢𑁄 𑀦𑀸𑀕𑁄, 𑀏𑀲𑀸 𑀦𑀸𑀕𑀲𑁆𑀲 𑀲𑀫𑁆𑀧𑀤𑀸.

𑁬𑁯𑁮. ‘‘𑀪𑀼𑀜𑁆𑀚𑀢𑀺 𑀅𑀦𑀯𑀚𑁆𑀚𑀸𑀦𑀺, 𑀲𑀸𑀯𑀚𑁆𑀚𑀸𑀦𑀺 𑀦 𑀪𑀼𑀜𑁆𑀚𑀢𑀺;

𑀖𑀸𑀲𑀫𑀘𑁆𑀙𑀸𑀤𑀦𑀁 𑀮𑀤𑁆𑀥𑀸, 𑀲𑀦𑁆𑀦𑀺𑀥𑀺𑀁 𑀧𑀭𑀺𑀯𑀚𑁆𑀚𑀬𑀁.

𑁬𑁯𑁯. ‘‘𑀲𑀁𑀬𑁄𑀚𑀦𑀁 𑀅𑀡𑀼𑀁 𑀣𑀽𑀮𑀁, 𑀲𑀩𑁆𑀩𑀁 𑀙𑁂𑀢𑁆𑀯𑀸𑀦 𑀩𑀦𑁆𑀥𑀦𑀁;

𑀬𑁂𑀦 𑀬𑁂𑀦𑁂𑀯 𑀕𑀘𑁆𑀙𑀢𑀺, 𑀅𑀦𑀧𑀓𑁆𑀔𑁄𑀯 𑀕𑀘𑁆𑀙𑀢𑀺.

𑁭𑁦𑁦. ‘‘𑀬𑀣𑀸𑀧𑀺 𑀉𑀤𑀓𑁂 𑀚𑀸𑀢𑀁, 𑀧𑀼𑀡𑁆𑀟𑀭𑀻𑀓𑀁 𑀧𑀯𑀟𑁆𑀠𑀢𑀺;

𑀦𑁄𑀧𑀮𑀺𑀧𑁆𑀧𑀢𑀺 𑀢𑁄𑀬𑁂𑀦, 𑀲𑀼𑀘𑀺𑀕𑀦𑁆𑀥𑀁 𑀫𑀦𑁄𑀭𑀫𑀁.

𑁭𑁦𑁧. ‘‘𑀢𑀣𑁂𑀯 𑀘 𑀮𑁄𑀓𑁂 𑀚𑀸𑀢𑁄, 𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀳𑀭𑀢𑀺;

𑀦𑁄𑀧𑀮𑀺𑀧𑁆𑀧𑀢𑀺 𑀮𑁄𑀓𑁂𑀦, 𑀢𑁄𑀬𑁂𑀦 𑀧𑀤𑀼𑀫𑀁 𑀬𑀣𑀸.

𑁭𑁦𑁨. ‘‘𑀫𑀳𑀸𑀕𑀺𑀦𑀺 𑀧𑀚𑁆𑀚𑀮𑀺𑀢𑁄, 𑀅𑀦𑀸𑀳𑀸𑀭𑁄𑀧𑀲𑀫𑁆𑀫𑀢𑀺;

𑀅𑀗𑁆𑀕𑀸𑀭𑁂𑀲𑀼 𑀘 𑀲𑀦𑁆𑀢𑁂𑀲𑀼, 𑀦𑀺𑀩𑁆𑀩𑀼𑀢𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁭𑁦𑁩. ‘‘𑀅𑀢𑁆𑀣𑀲𑁆𑀲𑀸𑀬𑀁 𑀯𑀺𑀜𑁆𑀜𑀸𑀧𑀦𑀻, 𑀉𑀧𑀫𑀸 𑀯𑀺𑀜𑁆𑀜𑀽𑀳𑀺 𑀤𑁂𑀲𑀺𑀢𑀸;

𑀯𑀺𑀜𑁆𑀜𑀺𑀲𑁆𑀲𑀦𑁆𑀢𑀺 𑀫𑀳𑀸𑀦𑀸𑀕𑀸, 𑀦𑀸𑀕𑀁 𑀦𑀸𑀕𑁂𑀦 𑀤𑁂𑀲𑀺𑀢𑀁.

𑁭𑁦𑁪. ‘‘𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄, 𑀯𑀻𑀢𑀫𑁄𑀳𑁄 𑀅𑀦𑀸𑀲𑀯𑁄;

𑀲𑀭𑀻𑀭𑀁 𑀯𑀺𑀚𑀳𑀁 𑀦𑀸𑀕𑁄, 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀢𑁆𑀬𑀦𑀸𑀲𑀯𑁄’’𑀢𑀺.

… 𑀉𑀤𑀸𑀬𑀻 𑀣𑁂𑀭𑁄….

𑀲𑁄𑀴𑀲𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.