𑁧𑁨. 𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑁄

𑁧. 𑀲𑀻𑀮𑀯𑀢𑁆𑀣𑁂𑀭𑀕𑀸𑀣𑀸

𑁬𑁦𑁮. ‘‘𑀲𑀻𑀮𑀫𑁂𑀯𑀺𑀥 𑀲𑀺𑀓𑁆𑀔𑁂𑀣, 𑀅𑀲𑁆𑀫𑀺𑀁 𑀮𑁄𑀓𑁂 𑀲𑀼𑀲𑀺𑀓𑁆𑀔𑀺𑀢𑀁;

𑀲𑀻𑀮𑀁 𑀳𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀁, 𑀉𑀧𑀦𑀸𑀫𑁂𑀢𑀺 𑀲𑁂𑀯𑀺𑀢𑀁.

𑁬𑁦𑁯. ‘‘𑀲𑀻𑀮𑀁 𑀭𑀓𑁆𑀔𑁂𑀬𑁆𑀬 𑀫𑁂𑀥𑀸𑀯𑀻, 𑀧𑀢𑁆𑀣𑀬𑀸𑀦𑁄 𑀢𑀬𑁄 𑀲𑀼𑀔𑁂;

𑀧𑀲𑀁𑀲𑀁 𑀯𑀺𑀢𑁆𑀢𑀺𑀮𑀸𑀪𑀜𑁆𑀘, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀦𑀁 [𑀧𑁂𑀘𑁆𑀘 𑀲𑀕𑁆𑀕𑁂 𑀘 𑀫𑁄𑀤𑀦𑀁 (𑀲𑀻. 𑀧𑀻.)].

𑁬𑁧𑁦. ‘‘𑀲𑀻𑀮𑀯𑀸 𑀳𑀺 𑀩𑀳𑀽 𑀫𑀺𑀢𑁆𑀢𑁂, 𑀲𑀜𑁆𑀜𑀫𑁂𑀦𑀸𑀥𑀺𑀕𑀘𑁆𑀙𑀢𑀺;

𑀤𑀼𑀲𑁆𑀲𑀻𑀮𑁄 𑀧𑀦 𑀫𑀺𑀢𑁆𑀢𑁂𑀳𑀺, 𑀥𑀁𑀲𑀢𑁂 𑀧𑀸𑀧𑀫𑀸𑀘𑀭𑀁.

𑁬𑁧𑁧. ‘‘𑀅𑀯𑀡𑁆𑀡𑀜𑁆𑀘 𑀅𑀓𑀺𑀢𑁆𑀢𑀺𑀜𑁆𑀘, 𑀤𑀼𑀲𑁆𑀲𑀻𑀮𑁄 𑀮𑀪𑀢𑁂 𑀦𑀭𑁄;

𑀯𑀡𑁆𑀡𑀁 𑀓𑀺𑀢𑁆𑀢𑀺𑀁 𑀧𑀲𑀁𑀲𑀜𑁆𑀘, 𑀲𑀤𑀸 𑀮𑀪𑀢𑀺 𑀲𑀻𑀮𑀯𑀸.

𑁬𑁧𑁨. ‘‘𑀆𑀤𑀺 𑀲𑀻𑀮𑀁 𑀧𑀢𑀺𑀝𑁆𑀞𑀸 𑀘, 𑀓𑀮𑁆𑀬𑀸𑀡𑀸𑀦𑀜𑁆𑀘 𑀫𑀸𑀢𑀼𑀓𑀁;

𑀧𑀫𑀼𑀔𑀁 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀢𑀲𑁆𑀫𑀸 𑀲𑀻𑀮𑀁 𑀯𑀺𑀲𑁄𑀥𑀬𑁂.

𑁬𑁧𑁩. ‘‘𑀯𑁂𑀮𑀸 𑀘 𑀲𑀁𑀯𑀭𑀁 𑀲𑀻𑀮𑀁 [𑀲𑀁𑀯𑀭𑁄 𑀲𑀻𑀮𑀁 (𑀲𑀻.), 𑀲𑀁𑀯𑀭𑀲𑀻𑀮𑀁 (𑀲𑀻. 𑀅𑀝𑁆𑀞.)], 𑀘𑀺𑀢𑁆𑀢𑀲𑁆𑀲 𑀅𑀪𑀺𑀳𑀸𑀲𑀦𑀁;

𑀢𑀺𑀢𑁆𑀣𑀜𑁆𑀘 𑀲𑀩𑁆𑀩𑀩𑀼𑀤𑁆𑀥𑀸𑀦𑀁, 𑀢𑀲𑁆𑀫𑀸 𑀲𑀻𑀮𑀁 𑀯𑀺𑀲𑁄𑀥𑀬𑁂.

𑁬𑁧𑁪. ‘‘𑀲𑀻𑀮𑀁 𑀩𑀮𑀁 𑀅𑀧𑁆𑀧𑀝𑀺𑀫𑀁, 𑀲𑀻𑀮𑀁 𑀆𑀯𑀼𑀥𑀫𑀼𑀢𑁆𑀢𑀫𑀁;

𑀲𑀻𑀮𑀫𑀸𑀪𑀭𑀡𑀁 𑀲𑁂𑀝𑁆𑀞𑀁, 𑀲𑀻𑀮𑀁 𑀓𑀯𑀘𑀫𑀩𑁆𑀪𑀼𑀢𑀁.

𑁬𑁧𑁫. ‘‘𑀲𑀻𑀮𑀁 𑀲𑁂𑀢𑀼 𑀫𑀳𑁂𑀲𑀓𑁆𑀔𑁄, 𑀲𑀻𑀮𑀁 𑀕𑀦𑁆𑀥𑁄 𑀅𑀦𑀼𑀢𑁆𑀢𑀭𑁄;

𑀲𑀻𑀮𑀁 𑀯𑀺𑀮𑁂𑀧𑀦𑀁 𑀲𑁂𑀝𑁆𑀞𑀁, 𑀬𑁂𑀦 𑀯𑀸𑀢𑀺 𑀤𑀺𑀲𑁄𑀤𑀺𑀲𑀁.

𑁬𑁧𑁬. ‘‘𑀲𑀻𑀮𑀁 𑀲𑀫𑁆𑀩𑀮𑀫𑁂𑀯𑀕𑁆𑀕𑀁, 𑀲𑀻𑀮𑀁 𑀧𑀸𑀣𑁂𑀬𑁆𑀬𑀫𑀼𑀢𑁆𑀢𑀫𑀁;

𑀲𑀻𑀮𑀁 𑀲𑁂𑀝𑁆𑀞𑁄 𑀅𑀢𑀺𑀯𑀸𑀳𑁄, 𑀬𑁂𑀦 𑀬𑀸𑀢𑀺 𑀤𑀺𑀲𑁄𑀤𑀺𑀲𑀁.

𑁬𑁧𑁭. ‘‘𑀇𑀥𑁂𑀯 𑀦𑀺𑀦𑁆𑀤𑀁 𑀮𑀪𑀢𑀺, 𑀧𑁂𑀘𑁆𑀘𑀸𑀧𑀸𑀬𑁂 𑀘 𑀤𑀼𑀫𑁆𑀫𑀦𑁄;

𑀲𑀩𑁆𑀩𑀢𑁆𑀣 𑀤𑀼𑀫𑁆𑀫𑀦𑁄 𑀩𑀸𑀮𑁄, 𑀲𑀻𑀮𑁂𑀲𑀼 𑀅𑀲𑀫𑀸𑀳𑀺𑀢𑁄.

𑁬𑁧𑁮. ‘‘𑀇𑀥𑁂𑀯 𑀓𑀺𑀢𑁆𑀢𑀺𑀁 𑀮𑀪𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀘 𑀲𑀼𑀫𑁆𑀫𑀦𑁄;

𑀲𑀩𑁆𑀩𑀢𑁆𑀣 𑀲𑀼𑀫𑀦𑁄 𑀥𑀻𑀭𑁄, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑁄.

𑁬𑁧𑁯. ‘‘𑀲𑀻𑀮𑀫𑁂𑀯 𑀇𑀥 𑀅𑀕𑁆𑀕𑀁, 𑀧𑀜𑁆𑀜𑀯𑀸 𑀧𑀦 𑀉𑀢𑁆𑀢𑀫𑁄;

𑀫𑀦𑀼𑀲𑁆𑀲𑁂𑀲𑀼 𑀘 𑀤𑁂𑀯𑁂𑀲𑀼, 𑀲𑀻𑀮𑀧𑀜𑁆𑀜𑀸𑀡𑀢𑁄 𑀚𑀬’’𑀦𑁆𑀢𑀺.

… 𑀲𑀻𑀮𑀯𑁄 𑀣𑁂𑀭𑁄….

𑁨. 𑀲𑀼𑀦𑀻𑀢𑀢𑁆𑀣𑁂𑀭𑀕𑀸𑀣𑀸

𑁬𑁨𑁦. ‘‘𑀦𑀻𑀘𑁂 𑀓𑀼𑀮𑀫𑁆𑀳𑀺 𑀚𑀸𑀢𑁄𑀳𑀁, 𑀤𑀮𑀺𑀤𑁆𑀤𑁄 𑀅𑀧𑁆𑀧𑀪𑁄𑀚𑀦𑁄;

𑀳𑀻𑀦𑀓𑀫𑁆𑀫𑀁 [𑀳𑀻𑀦𑀁 𑀓𑀫𑁆𑀫𑀁 (𑀲𑁆𑀬𑀸.)] 𑀫𑀫𑀁 𑀆𑀲𑀺, 𑀅𑀳𑁄𑀲𑀺𑀁 𑀧𑀼𑀧𑁆𑀨𑀙𑀟𑁆𑀟𑀓𑁄.

𑁬𑁨𑁧. ‘‘𑀚𑀺𑀕𑀼𑀘𑁆𑀙𑀺𑀢𑁄 𑀫𑀦𑀼𑀲𑁆𑀲𑀸𑀦𑀁, 𑀧𑀭𑀺𑀪𑀽𑀢𑁄 𑀘 𑀯𑀫𑁆𑀪𑀺𑀢𑁄;

𑀦𑀻𑀘𑀁 𑀫𑀦𑀁 𑀓𑀭𑀺𑀢𑁆𑀯𑀸𑀦, 𑀯𑀦𑁆𑀤𑀺𑀲𑁆𑀲𑀁 𑀩𑀳𑀼𑀓𑀁 𑀚𑀦𑀁.

𑁬𑁨𑁨. ‘‘𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁;

𑀧𑀯𑀺𑀲𑀦𑁆𑀢𑀁 𑀫𑀳𑀸𑀯𑀻𑀭𑀁, 𑀫𑀕𑀥𑀸𑀦𑀁 𑀧𑀼𑀭𑀼𑀢𑁆𑀢𑀫𑀁.

𑁬𑁨𑁩. ‘‘𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀦 𑀩𑁆𑀬𑀸𑀪𑀗𑁆𑀕𑀺𑀁, 𑀯𑀦𑁆𑀤𑀺𑀢𑀼𑀁 𑀉𑀧𑀲𑀗𑁆𑀓𑀫𑀺𑀁;

𑀫𑀫𑁂𑀯 𑀅𑀦𑀼𑀓𑀫𑁆𑀧𑀸𑀬, 𑀅𑀝𑁆𑀞𑀸𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁬𑁨𑁪. ‘‘𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀢𑀤𑀸;

𑀧𑀩𑁆𑀩𑀚𑁆𑀚𑀁 𑀅𑀳𑀫𑀸𑀬𑀸𑀘𑀺𑀁, 𑀲𑀩𑁆𑀩𑀲𑀢𑁆𑀢𑀸𑀦𑀫𑀼𑀢𑁆𑀢𑀫𑀁.

𑁬𑁨𑁫. ‘‘𑀢𑀢𑁄 𑀓𑀸𑀭𑀼𑀡𑀺𑀓𑁄 𑀲𑀢𑁆𑀣𑀸, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀓𑁄;

‘𑀏𑀳𑀺 𑀪𑀺𑀓𑁆𑀔𑀽’𑀢𑀺 𑀫𑀁 𑀆𑀳, 𑀲𑀸 𑀫𑁂 𑀆𑀲𑀽𑀧𑀲𑀫𑁆𑀧𑀤𑀸.

𑁬𑁨𑁬. ‘‘𑀲𑁄𑀳𑀁 𑀏𑀓𑁄 𑀅𑀭𑀜𑁆𑀜𑀲𑁆𑀫𑀺𑀁, 𑀯𑀺𑀳𑀭𑀦𑁆𑀢𑁄 𑀅𑀢𑀦𑁆𑀤𑀺𑀢𑁄;

𑀅𑀓𑀸𑀲𑀺𑀁 𑀲𑀢𑁆𑀣𑀼𑀯𑀘𑀦𑀁, 𑀬𑀣𑀸 𑀫𑀁 𑀑𑀯𑀤𑀻 𑀚𑀺𑀦𑁄.

𑁬𑁨𑁭. ‘‘𑀭𑀢𑁆𑀢𑀺𑀬𑀸 𑀧𑀞𑀫𑀁 𑀬𑀸𑀫𑀁, 𑀧𑀼𑀩𑁆𑀩𑀚𑀸𑀢𑀺𑀫𑀦𑀼𑀲𑁆𑀲𑀭𑀺𑀁;

𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑀁 𑀬𑀸𑀫𑀁, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑀬𑀺𑀁 [𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁 (𑀓.)];

𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂, 𑀢𑀫𑁄𑀔𑀦𑁆𑀥𑀁 𑀧𑀤𑀸𑀮𑀬𑀺𑀁.

𑁬𑁨𑁮. ‘‘𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂, 𑀲𑀽𑀭𑀺𑀬𑀲𑁆𑀲𑀼𑀕𑁆𑀕𑀫𑀦𑀁 𑀧𑀢𑀺;

𑀇𑀦𑁆𑀤𑁄 𑀩𑁆𑀭𑀳𑁆𑀫𑀸 𑀘 𑀆𑀕𑀦𑁆𑀢𑁆𑀯𑀸, 𑀫𑀁 𑀦𑀫𑀲𑁆𑀲𑀺𑀁𑀲𑀼 𑀧𑀜𑁆𑀚𑀮𑀻.

𑁬𑁨𑁯. ‘‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀬𑀲𑁆𑀲 𑀢𑁂 𑀆𑀲𑀯𑀸 𑀔𑀻𑀡𑀸, 𑀤𑀓𑁆𑀔𑀺𑀡𑁂𑀬𑁆𑀬𑁄𑀲𑀺 𑀫𑀸𑀭𑀺𑀲’.

𑁬𑁩𑁦. ‘‘𑀢𑀢𑁄 𑀤𑀺𑀲𑁆𑀯𑀸𑀦 𑀫𑀁 𑀲𑀢𑁆𑀣𑀸, 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑀁;

𑀲𑀺𑀢𑀁 𑀧𑀸𑀢𑀼𑀓𑀭𑀺𑀢𑁆𑀯𑀸𑀦, 𑀇𑀫𑀫𑀢𑁆𑀣𑀁 𑀅𑀪𑀸𑀲𑀣.

𑁬𑁩𑁧. [𑀲𑀼. 𑀦𑀺. 𑁬𑁬𑁦 𑀲𑀼𑀢𑁆𑀢𑀦𑀺𑀧𑀸𑀢𑁂𑀧𑀺] ‘‘‘𑀢𑀧𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀲𑀁𑀬𑀫𑁂𑀦 𑀤𑀫𑁂𑀦 𑀘;

𑀏𑀢𑁂𑀦 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀏𑀢𑀁 𑀩𑁆𑀭𑀸𑀳𑁆𑀫𑀡𑀫𑀼𑀢𑁆𑀢𑀫’’’𑀦𑁆𑀢𑀺.

… 𑀲𑀼𑀦𑀻𑀢𑁄 𑀣𑁂𑀭𑁄….

𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.