𑁧𑁦. 𑀤𑀲𑀓𑀦𑀺𑀧𑀸𑀢𑁄

𑁧. 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀕𑀸𑀣𑀸

𑁫𑁨𑁭. ‘‘𑀅𑀗𑁆𑀕𑀸𑀭𑀺𑀦𑁄 𑀤𑀸𑀦𑀺 𑀤𑀼𑀫𑀸 𑀪𑀤𑀦𑁆𑀢𑁂, 𑀨𑀮𑁂𑀲𑀺𑀦𑁄 𑀙𑀤𑀦𑀁 𑀯𑀺𑀧𑁆𑀧𑀳𑀸𑀬;

𑀢𑁂 𑀅𑀘𑁆𑀘𑀺𑀫𑀦𑁆𑀢𑁄𑀯 𑀧𑀪𑀸𑀲𑀬𑀦𑁆𑀢𑀺, 𑀲𑀫𑀬𑁄 𑀫𑀳𑀸𑀯𑀻𑀭 𑀪𑀸𑀕𑀻 𑀭𑀲𑀸𑀦𑀁.

𑁫𑁨𑁮. ‘‘𑀤𑀼𑀫𑀸𑀦𑀺 𑀨𑀼𑀮𑁆𑀮𑀸𑀦𑀺 𑀫𑀦𑁄𑀭𑀫𑀸𑀦𑀺, 𑀲𑀫𑀦𑁆𑀢𑀢𑁄 𑀲𑀩𑁆𑀩𑀤𑀺𑀲𑀸 𑀧𑀯𑀦𑁆𑀢𑀺;

𑀧𑀢𑁆𑀢𑀁 𑀧𑀳𑀸𑀬 𑀨𑀮𑀫𑀸𑀲𑀲𑀸𑀦𑀸 [𑀨𑀮𑀫𑀸𑀲𑀫𑀸𑀦𑁄 (𑀓.)], 𑀓𑀸𑀮𑁄 𑀇𑀢𑁄 𑀧𑀓𑁆𑀓𑀫𑀦𑀸𑀬 𑀯𑀻𑀭.

𑁫𑁨𑁯. ‘‘𑀦𑁂𑀯𑀸𑀢𑀺𑀲𑀻𑀢𑀁 𑀦 𑀧𑀦𑀸𑀢𑀺𑀉𑀡𑁆𑀳𑀁, 𑀲𑀼𑀔𑀸 𑀉𑀢𑀼 𑀅𑀤𑁆𑀥𑀦𑀺𑀬𑀸 𑀪𑀤𑀦𑁆𑀢𑁂;

𑀧𑀲𑁆𑀲𑀦𑁆𑀢𑀼 𑀢𑀁 𑀲𑀸𑀓𑀺𑀬𑀸 𑀓𑁄𑀴𑀺𑀬𑀸 𑀘, 𑀧𑀘𑁆𑀙𑀸𑀫𑀼𑀔𑀁 𑀭𑁄𑀳𑀺𑀦𑀺𑀬𑀁 𑀢𑀭𑀦𑁆𑀢𑀁.

𑁫𑁩𑁦. ‘‘𑀆𑀲𑀸𑀬 𑀓𑀲𑀢𑁂 𑀔𑁂𑀢𑁆𑀢𑀁, 𑀩𑀻𑀚𑀁 𑀆𑀲𑀸𑀬 𑀯𑀧𑁆𑀧𑀢𑀺;

𑀆𑀲𑀸𑀬 𑀯𑀸𑀡𑀺𑀚𑀸 𑀬𑀦𑁆𑀢𑀺, 𑀲𑀫𑀼𑀤𑁆𑀤𑀁 𑀥𑀦𑀳𑀸𑀭𑀓𑀸;

𑀬𑀸𑀬 𑀆𑀲𑀸𑀬 𑀢𑀺𑀝𑁆𑀞𑀸𑀫𑀺, 𑀲𑀸 𑀫𑁂 𑀆𑀲𑀸 𑀲𑀫𑀺𑀚𑁆𑀛𑀢𑀼.

𑁫𑁩𑁧. [𑀲𑀁. 𑀦𑀺. 𑁧.𑁧𑁯𑁮] ‘‘𑀧𑀼𑀦𑀧𑁆𑀧𑀼𑀦𑀁 𑀘𑁂𑀯 𑀯𑀧𑀦𑁆𑀢𑀺 𑀩𑀻𑀚𑀁, 𑀧𑀼𑀦𑀧𑁆𑀧𑀼𑀦𑀁 𑀯𑀲𑁆𑀲𑀢𑀺 𑀤𑁂𑀯𑀭𑀸𑀚𑀸;

𑀧𑀼𑀦𑀧𑁆𑀧𑀼𑀦𑀁 𑀔𑁂𑀢𑁆𑀢𑀁 𑀓𑀲𑀦𑁆𑀢𑀺 𑀓𑀲𑁆𑀲𑀓𑀸, 𑀧𑀼𑀦𑀧𑁆𑀧𑀼𑀦𑀁 𑀥𑀜𑁆𑀜𑀫𑀼𑀧𑁂𑀢𑀺 𑀭𑀝𑁆𑀞𑀁.

𑁫𑁩𑁨. [𑀲𑀁. 𑀦𑀺. 𑁧.𑁧𑁯𑁮] ‘‘𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀦𑀓𑀸 𑀘𑀭𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀧𑀢𑀻 𑀤𑀤𑀦𑁆𑀢𑀺;

𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀧𑀢𑀻 𑀤𑀤𑀺𑀢𑁆𑀯𑀸, 𑀧𑀼𑀦𑀧𑁆𑀧𑀼𑀦𑀁 𑀲𑀕𑁆𑀕𑀫𑀼𑀧𑁂𑀦𑁆𑀢𑀺 𑀞𑀸𑀦𑀁.

𑁫𑁩𑁩. ‘‘𑀯𑀻𑀭𑁄 𑀳𑀯𑁂 𑀲𑀢𑁆𑀢𑀬𑀼𑀕𑀁 𑀧𑀼𑀦𑁂𑀢𑀺, 𑀬𑀲𑁆𑀫𑀺𑀁 𑀓𑀼𑀮𑁂 𑀚𑀸𑀬𑀢𑀺 𑀪𑀽𑀭𑀺𑀧𑀜𑁆𑀜𑁄;

𑀫𑀜𑁆𑀜𑀸𑀫𑀳𑀁 𑀲𑀓𑁆𑀓𑀢𑀺 𑀤𑁂𑀯𑀤𑁂𑀯𑁄, 𑀢𑀬𑀸 𑀳𑀺 𑀚𑀸𑀢𑁄 [𑀢𑀬𑀸𑀪𑀺𑀚𑀸𑀢𑁄 (𑀲𑀻.)] 𑀫𑀼𑀦𑀺 𑀲𑀘𑁆𑀘𑀦𑀸𑀫𑁄.

𑁫𑁩𑁪. ‘‘𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀧𑀺𑀢𑀸 𑀫𑀳𑁂𑀲𑀺𑀦𑁄, 𑀩𑀼𑀤𑁆𑀥𑀲𑁆𑀲 𑀫𑀸𑀢𑀸 𑀧𑀦 𑀫𑀸𑀬𑀦𑀸𑀫𑀸;

𑀬𑀸 𑀩𑁄𑀥𑀺𑀲𑀢𑁆𑀢𑀁 𑀧𑀭𑀺𑀳𑀭𑀺𑀬 𑀓𑀼𑀘𑁆𑀙𑀺𑀦𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀢𑀺𑀤𑀺𑀯𑀫𑁆𑀳𑀺 𑀫𑁄𑀤𑀢𑀺.

𑁫𑁩𑁫. ‘‘𑀲𑀸 𑀕𑁄𑀢𑀫𑀻 𑀓𑀸𑀮𑀓𑀢𑀸 𑀇𑀢𑁄 𑀘𑀼𑀢𑀸, 𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑀸;

𑀲𑀸 𑀫𑁄𑀤𑀢𑀺 𑀓𑀸𑀫𑀕𑀼𑀡𑁂𑀳𑀺 𑀧𑀜𑁆𑀘𑀳𑀺, 𑀧𑀭𑀺𑀯𑀸𑀭𑀺𑀢𑀸 𑀤𑁂𑀯𑀕𑀡𑁂𑀳𑀺 𑀢𑁂𑀳𑀺.

𑁫𑁩𑁬. ‘‘𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄𑀫𑁆𑀳𑀺 𑀅𑀲𑀬𑁆𑀳𑀲𑀸𑀳𑀺𑀦𑁄, 𑀅𑀗𑁆𑀕𑀻𑀭𑀲𑀲𑁆𑀲𑀧𑁆𑀧𑀝𑀺𑀫𑀲𑁆𑀲 𑀢𑀸𑀤𑀺𑀦𑁄;

𑀧𑀺𑀢𑀼𑀧𑀺𑀢𑀸 𑀫𑀬𑁆𑀳𑀁 𑀢𑀼𑀯𑀁𑀲𑀺 𑀲𑀓𑁆𑀓, 𑀥𑀫𑁆𑀫𑁂𑀦 𑀫𑁂 𑀕𑁄𑀢𑀫 𑀅𑀬𑁆𑀬𑀓𑁄𑀲𑀻’’𑀢𑀺.

… 𑀓𑀸𑀴𑀼𑀤𑀸𑀬𑀻 𑀣𑁂𑀭𑁄….

𑁨. 𑀏𑀓𑀯𑀺𑀳𑀸𑀭𑀺𑀬𑀢𑁆𑀣𑁂𑀭𑀕𑀸𑀣𑀸

𑁫𑁩𑁭. ‘‘𑀧𑀼𑀭𑀢𑁄 𑀧𑀘𑁆𑀙𑀢𑁄 𑀯𑀸𑀧𑀺, 𑀅𑀧𑀭𑁄 𑀘𑁂 𑀦 𑀯𑀺𑀚𑁆𑀚𑀢𑀺;

𑀅𑀢𑀻𑀯 𑀨𑀸𑀲𑀼 𑀪𑀯𑀢𑀺, 𑀏𑀓𑀲𑁆𑀲 𑀯𑀲𑀢𑁄 𑀯𑀦𑁂.

𑁫𑁩𑁮. ‘‘𑀳𑀦𑁆𑀤 𑀏𑀓𑁄 𑀕𑀫𑀺𑀲𑁆𑀲𑀸𑀫𑀺, 𑀅𑀭𑀜𑁆𑀜𑀁 𑀩𑀼𑀤𑁆𑀥𑀯𑀡𑁆𑀡𑀺𑀢𑀁;

𑀨𑀸𑀲𑀼 [𑀨𑀸𑀲𑀼𑀁 (𑀲𑁆𑀬𑀸. 𑀧𑀻.)] 𑀏𑀓𑀯𑀺𑀳𑀸𑀭𑀺𑀲𑁆𑀲, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁫𑁩𑁯. ‘‘𑀬𑁄𑀕𑀻-𑀧𑀻𑀢𑀺𑀓𑀭𑀁 𑀭𑀫𑁆𑀫𑀁, 𑀫𑀢𑁆𑀢𑀓𑀼𑀜𑁆𑀚𑀭𑀲𑁂𑀯𑀺𑀢𑀁;

𑀏𑀓𑁄 𑀅𑀢𑁆𑀢𑀯𑀲𑀻 𑀔𑀺𑀧𑁆𑀧𑀁, 𑀧𑀯𑀺𑀲𑀺𑀲𑁆𑀲𑀸𑀫𑀺 𑀓𑀸𑀦𑀦𑀁.

𑁫𑁪𑁦. ‘‘𑀲𑀼𑀧𑀼𑀧𑁆𑀨𑀺𑀢𑁂 𑀲𑀻𑀢𑀯𑀦𑁂, 𑀲𑀻𑀢𑀮𑁂 𑀕𑀺𑀭𑀺𑀓𑀦𑁆𑀤𑀭𑁂;

𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸, 𑀘𑀗𑁆𑀓𑀫𑀺𑀲𑁆𑀲𑀸𑀫𑀺 𑀏𑀓𑀓𑁄.

𑁫𑁪𑁧. ‘‘𑀏𑀓𑀸𑀓𑀺𑀬𑁄 𑀅𑀤𑀼𑀢𑀺𑀬𑁄, 𑀭𑀫𑀡𑀻𑀬𑁂 𑀫𑀳𑀸𑀯𑀦𑁂;

𑀓𑀤𑀸𑀳𑀁 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀓𑀢𑀓𑀺𑀘𑁆𑀘𑁄 𑀅𑀦𑀸𑀲𑀯𑁄.

𑁫𑁪𑁨. ‘‘𑀏𑀯𑀁 𑀫𑁂 𑀓𑀢𑁆𑀢𑀼𑀓𑀸𑀫𑀲𑁆𑀲, 𑀅𑀥𑀺𑀧𑁆𑀧𑀸𑀬𑁄 𑀲𑀫𑀺𑀚𑁆𑀛𑀢𑀼;

𑀲𑀸𑀥𑀺𑀬𑀺𑀲𑁆𑀲𑀸𑀫𑀳𑀁𑀬𑁂𑀯, 𑀦𑀸𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄.

𑁫𑁪𑁩. ‘‘𑀏𑀲 𑀩𑀦𑁆𑀥𑀸𑀫𑀺 𑀲𑀦𑁆𑀦𑀸𑀳𑀁, 𑀧𑀯𑀺𑀲𑀺𑀲𑁆𑀲𑀸𑀫𑀺 𑀓𑀸𑀦𑀦𑀁;

𑀦 𑀢𑀢𑁄 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀅𑀧𑁆𑀧𑀢𑁆𑀢𑁄 𑀆𑀲𑀯𑀓𑁆𑀔𑀬𑀁.

𑁫𑁪𑁪. ‘‘𑀫𑀸𑀮𑀼𑀢𑁂 𑀉𑀧𑀯𑀸𑀬𑀦𑁆𑀢𑁂, 𑀲𑀻𑀢𑁂 𑀲𑀼𑀭𑀪𑀺𑀕𑀦𑁆𑀥𑀺𑀓𑁂 [𑀕𑀦𑁆𑀥𑀓𑁂 (𑀲𑁆𑀬𑀸. 𑀧𑀻. 𑀓.)];

𑀅𑀯𑀺𑀚𑁆𑀚𑀁 𑀤𑀸𑀮𑀬𑀺𑀲𑁆𑀲𑀸𑀫𑀺, 𑀦𑀺𑀲𑀺𑀦𑁆𑀦𑁄 𑀦𑀕𑀫𑀼𑀤𑁆𑀥𑀦𑀺.

𑁫𑁪𑁫. ‘‘𑀯𑀦𑁂 𑀓𑀼𑀲𑀼𑀫𑀲𑀜𑁆𑀙𑀦𑁆𑀦𑁂, 𑀧𑀩𑁆𑀪𑀸𑀭𑁂 𑀦𑀽𑀦 𑀲𑀻𑀢𑀮𑁂;

𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 𑀲𑀼𑀔𑀺𑀢𑁄, 𑀭𑀫𑀺𑀲𑁆𑀲𑀸𑀫𑀺 𑀕𑀺𑀭𑀺𑀩𑁆𑀩𑀚𑁂.

𑁫𑁪𑁬. ‘‘𑀲𑁄𑀳𑀁 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄, 𑀘𑀦𑁆𑀤𑁄 𑀧𑀦𑁆𑀦𑀭𑀲𑁄 𑀬𑀣𑀸;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

… 𑀏𑀓𑀯𑀺𑀳𑀸𑀭𑀺𑀬𑁄 𑀣𑁂𑀭𑁄….

𑁩. 𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀕𑀸𑀣𑀸

𑁫𑁪𑁭. ‘‘𑀅𑀦𑀸𑀕𑀢𑀁 𑀬𑁄 𑀧𑀝𑀺𑀓𑀘𑁆𑀘 [𑀧𑀝𑀺𑀕𑀘𑁆𑀘 (𑀲𑀻.)] 𑀧𑀲𑁆𑀲𑀢𑀺, 𑀳𑀺𑀢𑀜𑁆𑀘 𑀅𑀢𑁆𑀣𑀁 𑀅𑀳𑀺𑀢𑀜𑁆𑀘 𑀢𑀁 𑀤𑁆𑀯𑀬𑀁;

𑀯𑀺𑀤𑁆𑀤𑁂𑀲𑀺𑀦𑁄 𑀢𑀲𑁆𑀲 𑀳𑀺𑀢𑁂𑀲𑀺𑀦𑁄 𑀯𑀸, 𑀭𑀦𑁆𑀥𑀁 𑀦 𑀧𑀲𑁆𑀲𑀦𑁆𑀢𑀺 𑀲𑀫𑁂𑀓𑁆𑀔𑀫𑀸𑀦𑀸.

𑁫𑁪𑁮. [𑀧𑀝𑀺. 𑀫. 𑁧.𑁧𑁬𑁦 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂] ‘‘𑀆𑀦𑀸𑀧𑀸𑀦𑀲𑀢𑀻 𑀬𑀲𑁆𑀲, 𑀧𑀭𑀺𑀧𑀼𑀡𑁆𑀡𑀸 𑀲𑀼𑀪𑀸𑀯𑀺𑀢𑀸;

𑀅𑀦𑀼𑀧𑀼𑀩𑁆𑀩𑀁 𑀧𑀭𑀺𑀘𑀺𑀢𑀸, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀸;

𑀲𑁄𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸.

𑁫𑁪𑁯. ‘‘𑀑𑀤𑀸𑀢𑀁 𑀯𑀢 𑀫𑁂 𑀘𑀺𑀢𑁆𑀢𑀁, 𑀅𑀧𑁆𑀧𑀫𑀸𑀡𑀁 𑀲𑀼𑀪𑀸𑀯𑀺𑀢𑀁;

𑀦𑀺𑀩𑁆𑀩𑀺𑀤𑁆𑀥𑀁 𑀧𑀕𑁆𑀕𑀳𑀻𑀢𑀜𑁆𑀘, 𑀲𑀩𑁆𑀩𑀸 𑀑𑀪𑀸𑀲𑀢𑁂 𑀤𑀺𑀲𑀸.

𑁫𑁫𑁦. ‘‘𑀚𑀻𑀯𑀢𑁂 𑀯𑀸𑀧𑀺 𑀲𑀧𑁆𑀧𑀜𑁆𑀜𑁄, 𑀅𑀧𑀺 𑀯𑀺𑀢𑁆𑀢𑀧𑀭𑀺𑀓𑁆𑀔𑀬𑁄;

𑀧𑀜𑁆𑀜𑀸𑀬 𑀘 𑀅𑀮𑀸𑀪𑁂𑀦, 𑀯𑀺𑀢𑁆𑀢𑀯𑀸𑀧𑀺 𑀦 𑀚𑀻𑀯𑀢𑀺.

𑁫𑁫𑁧. ‘‘𑀧𑀜𑁆𑀜𑀸 𑀲𑀼𑀢𑀯𑀺𑀦𑀺𑀘𑁆𑀙𑀺𑀦𑀻, 𑀧𑀜𑁆𑀜𑀸 𑀓𑀺𑀢𑁆𑀢𑀺𑀲𑀺𑀮𑁄𑀓𑀯𑀤𑁆𑀥𑀦𑀻;

𑀧𑀜𑁆𑀜𑀸𑀲𑀳𑀺𑀢𑁄 𑀦𑀭𑁄 𑀇𑀥, 𑀅𑀧𑀺 𑀤𑀼𑀓𑁆𑀔𑁂𑀲𑀼 𑀲𑀼𑀔𑀸𑀦𑀺 𑀯𑀺𑀦𑁆𑀤𑀢𑀺.

𑁫𑁫𑁨. ‘‘𑀦𑀸𑀬𑀁 𑀅𑀚𑁆𑀚𑀢𑀦𑁄 𑀥𑀫𑁆𑀫𑁄, 𑀦𑀘𑁆𑀙𑁂𑀭𑁄 𑀦𑀧𑀺 𑀅𑀩𑁆𑀪𑀼𑀢𑁄;

𑀬𑀢𑁆𑀣 𑀚𑀸𑀬𑁂𑀣 𑀫𑀻𑀬𑁂𑀣, 𑀢𑀢𑁆𑀣 𑀓𑀺𑀁 𑀯𑀺𑀬 𑀅𑀩𑁆𑀪𑀼𑀢𑀁.

𑁫𑁫𑁩. ‘‘𑀅𑀦𑀦𑁆𑀢𑀭𑀁 𑀳𑀺 𑀚𑀸𑀢𑀲𑁆𑀲, 𑀚𑀻𑀯𑀺𑀢𑀸 𑀫𑀭𑀡𑀁 𑀥𑀼𑀯𑀁;

𑀚𑀸𑀢𑀸 𑀚𑀸𑀢𑀸 𑀫𑀭𑀦𑁆𑀢𑀻𑀥, 𑀏𑀯𑀁𑀥𑀫𑁆𑀫𑀸 𑀳𑀺 𑀧𑀸𑀡𑀺𑀦𑁄.

𑁫𑁫𑁪. ‘‘𑀦 𑀳𑁂𑀢𑀤𑀢𑁆𑀣𑀸𑀬 𑀫𑀢𑀲𑁆𑀲 𑀳𑁄𑀢𑀺, 𑀬𑀁 𑀚𑀻𑀯𑀺𑀢𑀢𑁆𑀣𑀁 𑀧𑀭𑀧𑁄𑀭𑀺𑀲𑀸𑀦𑀁;

𑀫𑀢𑀫𑁆𑀳𑀺 𑀭𑀼𑀡𑁆𑀡𑀁 𑀦 𑀬𑀲𑁄 𑀦 𑀮𑁄𑀓𑁆𑀬𑀁, 𑀦 𑀯𑀡𑁆𑀡𑀺𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺.

𑁫𑁫𑁫. ‘‘𑀘𑀓𑁆𑀔𑀼𑀁 𑀲𑀭𑀻𑀭𑀁 𑀉𑀧𑀳𑀦𑁆𑀢𑀺 𑀢𑁂𑀦 [𑀉𑀧𑀳𑀦𑁆𑀢𑀺 𑀭𑀼𑀡𑁆𑀡𑀁 (𑀲𑀻.), 𑀉𑀧𑀳𑀦𑁆𑀢𑀺 𑀭𑁄𑀡𑁆𑀡𑀁 (𑀲𑁆𑀬𑀸. 𑀧𑀻.)], 𑀦𑀺𑀳𑀻𑀬𑀢𑀺 𑀯𑀡𑁆𑀡𑀩𑀮𑀁 𑀫𑀢𑀻 𑀘;

𑀆𑀦𑀦𑁆𑀤𑀺𑀦𑁄 𑀢𑀲𑁆𑀲 𑀤𑀺𑀲𑀸 𑀪𑀯𑀦𑁆𑀢𑀺, 𑀳𑀺𑀢𑁂𑀲𑀺𑀦𑁄 𑀦𑀸𑀲𑁆𑀲 𑀲𑀼𑀔𑀻 𑀪𑀯𑀦𑁆𑀢𑀺.

𑁫𑁫𑁬. ‘‘𑀢𑀲𑁆𑀫𑀸 𑀳𑀺 𑀇𑀘𑁆𑀙𑁂𑀬𑁆𑀬 𑀓𑀼𑀮𑁂 𑀯𑀲𑀦𑁆𑀢𑁂, 𑀫𑁂𑀥𑀸𑀯𑀺𑀦𑁄 𑀘𑁂𑀯 𑀩𑀳𑀼𑀲𑁆𑀲𑀼𑀢𑁂 𑀘;

𑀬𑁂𑀲𑀁 𑀳𑀺 𑀧𑀜𑁆𑀜𑀸𑀯𑀺𑀪𑀯𑁂𑀦 𑀓𑀺𑀘𑁆𑀘𑀁, 𑀢𑀭𑀦𑁆𑀢𑀺 𑀦𑀸𑀯𑀸𑀬 𑀦𑀤𑀺𑀁𑀯 𑀧𑀼𑀡𑁆𑀡’’𑀦𑁆𑀢𑀺.

… 𑀫𑀳𑀸𑀓𑀧𑁆𑀧𑀺𑀦𑁄 𑀣𑁂𑀭𑁄….

𑁪. 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀕𑀸𑀣𑀸

𑁫𑁫𑁭. ‘‘𑀤𑀦𑁆𑀥𑀸 𑀫𑀬𑁆𑀳𑀁 𑀕𑀢𑀻 𑀆𑀲𑀺, 𑀧𑀭𑀺𑀪𑀽𑀢𑁄 𑀧𑀼𑀭𑁂 𑀅𑀳𑀁;

𑀪𑀸𑀢𑀸 𑀘 𑀫𑀁 𑀧𑀡𑀸𑀫𑁂𑀲𑀺, ‘𑀕𑀘𑁆𑀙 𑀤𑀸𑀦𑀺 𑀢𑀼𑀯𑀁 𑀖𑀭𑀁’.

𑁫𑁫𑁮. ‘‘𑀲𑁄𑀳𑀁 𑀧𑀡𑀸𑀫𑀺𑀢𑁄 𑀲𑀦𑁆𑀢𑁄 [𑀪𑀸𑀢𑀸 (𑀅𑀝𑁆𑀞.)], 𑀲𑀗𑁆𑀖𑀸𑀭𑀸𑀫𑀲𑁆𑀲 𑀓𑁄𑀝𑁆𑀞𑀓𑁂;

𑀤𑀼𑀫𑁆𑀫𑀦𑁄 𑀢𑀢𑁆𑀣 𑀅𑀝𑁆𑀞𑀸𑀲𑀺𑀁, 𑀲𑀸𑀲𑀦𑀲𑁆𑀫𑀺𑀁 𑀅𑀧𑁂𑀓𑁆𑀔𑀯𑀸.

𑁫𑁫𑁯. ‘‘𑀪𑀕𑀯𑀸 𑀢𑀢𑁆𑀣 𑀆𑀕𑀘𑁆𑀙𑀺 [𑀆𑀕𑀜𑁆𑀙𑀺 (𑀲𑀻. 𑀧𑀻.)], 𑀲𑀻𑀲𑀁 𑀫𑀬𑁆𑀳𑀁 𑀧𑀭𑀸𑀫𑀲𑀺;

𑀩𑀸𑀳𑀸𑀬 𑀫𑀁 𑀕𑀳𑁂𑀢𑁆𑀯𑀸𑀦, 𑀲𑀗𑁆𑀖𑀸𑀭𑀸𑀫𑀁 𑀧𑀯𑁂𑀲𑀬𑀺.

𑁫𑁬𑁦. ‘‘𑀅𑀦𑀼𑀓𑀫𑁆𑀧𑀸𑀬 𑀫𑁂 𑀲𑀢𑁆𑀣𑀸, 𑀧𑀸𑀤𑀸𑀲𑀺 𑀧𑀸𑀤𑀧𑀼𑀜𑁆𑀙𑀦𑀺𑀁;

‘𑀏𑀢𑀁 𑀲𑀼𑀤𑁆𑀥𑀁 𑀅𑀥𑀺𑀝𑁆𑀞𑁂𑀳𑀺, 𑀏𑀓𑀫𑀦𑁆𑀢𑀁 𑀲𑁆𑀯𑀥𑀺𑀝𑁆𑀞𑀺𑀢𑀁’.

𑁫𑁬𑁧. ‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀯𑀺𑀳𑀸𑀲𑀺𑀁 𑀲𑀸𑀲𑀦𑁂 𑀭𑀢𑁄;

𑀲𑀫𑀸𑀥𑀺𑀁 𑀧𑀝𑀺𑀧𑀸𑀤𑁂𑀲𑀺𑀁, 𑀉𑀢𑁆𑀢𑀫𑀢𑁆𑀣𑀲𑁆𑀲 𑀧𑀢𑁆𑀢𑀺𑀬𑀸.

𑁫𑁬𑁨. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁬𑁩. ‘‘𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑀢𑁆𑀢𑀸𑀦𑀁, 𑀦𑀺𑀫𑁆𑀫𑀺𑀦𑀺𑀢𑁆𑀯𑀸𑀦 𑀧𑀦𑁆𑀣𑀓𑁄;

𑀦𑀺𑀲𑀻𑀤𑀫𑁆𑀩𑀯𑀦𑁂 𑀭𑀫𑁆𑀫𑁂, 𑀬𑀸𑀯 𑀓𑀸𑀮𑀧𑁆𑀧𑀯𑁂𑀤𑀦𑀸.

𑁫𑁬𑁪. ‘‘𑀢𑀢𑁄 𑀫𑁂 𑀲𑀢𑁆𑀣𑀸 𑀧𑀸𑀳𑁂𑀲𑀺, 𑀤𑀽𑀢𑀁 𑀓𑀸𑀮𑀧𑁆𑀧𑀯𑁂𑀤𑀓𑀁;

𑀧𑀯𑁂𑀤𑀺𑀢𑀫𑁆𑀳𑀺 𑀓𑀸𑀮𑀫𑁆𑀳𑀺, 𑀯𑁂𑀳𑀸𑀲𑀸𑀤𑀼𑀧𑀲𑀗𑁆𑀓𑀫𑀺𑀁 [𑀯𑁂𑀳𑀸𑀲𑀸𑀦𑀼𑀧𑀲𑀗𑁆𑀓𑀫𑀺𑀁 (𑀲𑁆𑀬𑀸. 𑀓.)].

𑁫𑁬𑁫. ‘‘𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀳𑀁;

𑀦𑀺𑀲𑀺𑀦𑁆𑀦𑀁 𑀫𑀁 𑀯𑀺𑀤𑀺𑀢𑁆𑀯𑀸𑀦, 𑀅𑀣 𑀲𑀢𑁆𑀣𑀸 𑀧𑀝𑀺𑀕𑁆𑀕𑀳𑀺.

𑁫𑁬𑁬. ‘‘𑀆𑀬𑀸𑀕𑁄 𑀲𑀩𑁆𑀩𑀮𑁄𑀓𑀲𑁆𑀲, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀝𑀺𑀕𑀡𑁆𑀳𑀺𑀢𑁆𑀣 𑀤𑀓𑁆𑀔𑀺𑀡’’𑀦𑁆𑀢𑀺.

… 𑀘𑀽𑀴𑀧𑀦𑁆𑀣𑀓𑁄 𑀣𑁂𑀭𑁄….

𑁫. 𑀓𑀧𑁆𑀧𑀢𑁆𑀣𑁂𑀭𑀕𑀸𑀣𑀸

𑁫𑁬𑁭. ‘‘𑀦𑀸𑀦𑀸𑀓𑀼𑀮𑀫𑀮𑀲𑀫𑁆𑀧𑀼𑀡𑁆𑀡𑁄, 𑀫𑀳𑀸𑀉𑀓𑁆𑀓𑀸𑀭𑀲𑀫𑁆𑀪𑀯𑁄;

𑀘𑀦𑁆𑀤𑀦𑀺𑀓𑀁𑀯 𑀧𑀭𑀺𑀧𑀓𑁆𑀓𑀁, 𑀫𑀳𑀸𑀕𑀡𑁆𑀟𑁄 𑀫𑀳𑀸𑀯𑀡𑁄.

𑁫𑁬𑁮. ‘‘𑀧𑀼𑀩𑁆𑀩𑀭𑀼𑀳𑀺𑀭𑀲𑀫𑁆𑀧𑀼𑀡𑁆𑀡𑁄, 𑀕𑀽𑀣𑀓𑀽𑀧𑁂𑀦 𑀕𑀸𑀴𑁆𑀳𑀺𑀢𑁄 [𑀕𑀽𑀣𑀓𑀽𑀧𑁂 𑀦𑀺𑀕𑀸𑀴𑁆𑀳𑀺𑀢𑁄 (𑀲𑁆𑀬𑀸. 𑀧𑀻. 𑀓.)];

𑀆𑀧𑁄𑀧𑀕𑁆𑀖𑀭𑀡𑁄 𑀓𑀸𑀬𑁄, 𑀲𑀤𑀸 𑀲𑀦𑁆𑀤𑀢𑀺 𑀧𑀽𑀢𑀺𑀓𑀁.

𑁫𑁬𑁯. ‘‘𑀲𑀝𑁆𑀞𑀺𑀓𑀡𑁆𑀟𑀭𑀲𑀫𑁆𑀩𑀦𑁆𑀥𑁄, 𑀫𑀁𑀲𑀮𑁂𑀧𑀦𑀮𑁂𑀧𑀺𑀢𑁄;

𑀘𑀫𑁆𑀫𑀓𑀜𑁆𑀘𑀼𑀓𑀲𑀦𑁆𑀦𑀤𑁆𑀥𑁄, 𑀧𑀽𑀢𑀺𑀓𑀸𑀬𑁄 𑀦𑀺𑀭𑀢𑁆𑀣𑀓𑁄.

𑁫𑁭𑁦. ‘‘𑀅𑀝𑁆𑀞𑀺𑀲𑀗𑁆𑀖𑀸𑀢𑀖𑀝𑀺𑀢𑁄, 𑀦𑁆𑀳𑀸𑀭𑀼𑀲𑀼𑀢𑁆𑀢𑀦𑀺𑀩𑀦𑁆𑀥𑀦𑁄;

𑀦𑁂𑀓𑁂𑀲𑀁 𑀲𑀁𑀕𑀢𑀻𑀪𑀸𑀯𑀸, 𑀓𑀧𑁆𑀧𑁂𑀢𑀺 𑀇𑀭𑀺𑀬𑀸𑀧𑀣𑀁.

𑁫𑁭𑁧. ‘‘𑀥𑀼𑀯𑀧𑁆𑀧𑀬𑀸𑀢𑁄 𑀫𑀭𑀡𑀸𑀬, 𑀫𑀘𑁆𑀘𑀼𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑁂;

𑀇𑀥𑁂𑀯 𑀙𑀟𑁆𑀟𑀬𑀺𑀢𑁆𑀯𑀸𑀦, 𑀬𑁂𑀦𑀓𑀸𑀫𑀗𑁆𑀕𑀫𑁄 𑀦𑀭𑁄.

𑁫𑁭𑁨. ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀓𑀸𑀬𑁄, 𑀘𑀢𑀼𑀕𑀦𑁆𑀣𑁂𑀦 𑀕𑀦𑁆𑀣𑀺𑀢𑁄;

𑀑𑀖𑀲𑀁𑀲𑀻𑀤𑀦𑁄 𑀓𑀸𑀬𑁄, 𑀅𑀦𑀼𑀲𑀬𑀚𑀸𑀮𑀫𑁄𑀢𑁆𑀣𑀢𑁄.

𑁫𑁭𑁩. ‘‘𑀧𑀜𑁆𑀘𑀦𑀻𑀯𑀭𑀡𑁂 𑀬𑀼𑀢𑁆𑀢𑁄, 𑀯𑀺𑀢𑀓𑁆𑀓𑁂𑀦 𑀲𑀫𑀧𑁆𑀧𑀺𑀢𑁄;

𑀢𑀡𑁆𑀳𑀸𑀫𑀽𑀮𑁂𑀦𑀸𑀦𑀼𑀕𑀢𑁄, 𑀫𑁄𑀳𑀘𑁆𑀙𑀸𑀤𑀦𑀙𑀸𑀤𑀺𑀢𑁄.

𑁫𑁭𑁪. ‘‘𑀏𑀯𑀸𑀬𑀁 𑀯𑀢𑁆𑀢𑀢𑁂 𑀓𑀸𑀬𑁄, 𑀓𑀫𑁆𑀫𑀬𑀦𑁆𑀢𑁂𑀦 𑀬𑀦𑁆𑀢𑀺𑀢𑁄;

𑀲𑀫𑁆𑀧𑀢𑁆𑀢𑀺 𑀘 𑀯𑀺𑀧𑀢𑁆𑀬𑀦𑁆𑀢𑀸, 𑀦𑀸𑀦𑀸𑀪𑀸𑀯𑁄 𑀯𑀺𑀧𑀚𑁆𑀚𑀢𑀺.

𑁫𑁭𑁫. ‘‘𑀬𑁂𑀫𑀁 𑀓𑀸𑀬𑀁 𑀫𑀫𑀸𑀬𑀦𑁆𑀢𑀺, 𑀅𑀦𑁆𑀥𑀩𑀸𑀮𑀸 𑀧𑀼𑀣𑀼𑀚𑁆𑀚𑀦𑀸;

𑀯𑀟𑁆𑀠𑁂𑀦𑁆𑀢𑀺 𑀓𑀝𑀲𑀺𑀁 𑀖𑁄𑀭𑀁, 𑀆𑀤𑀺𑀬𑀦𑁆𑀢𑀺 𑀧𑀼𑀦𑀩𑁆𑀪𑀯𑀁.

𑁫𑁭𑁬. ‘‘𑀬𑁂𑀫𑀁 𑀓𑀸𑀬𑀁 𑀯𑀺𑀯𑀚𑁆𑀚𑁂𑀦𑁆𑀢𑀺, 𑀕𑀽𑀣𑀮𑀺𑀢𑁆𑀢𑀁𑀯 𑀧𑀦𑁆𑀦𑀕𑀁;

𑀪𑀯𑀫𑀽𑀮𑀁 𑀯𑀫𑀺𑀢𑁆𑀯𑀸𑀦, 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀦𑁆𑀢𑀺𑀦𑀸𑀲𑀯𑀸’’𑀢𑀺 [𑀧𑀭𑀺𑀦𑀺𑀩𑁆𑀩𑀦𑁆𑀢𑀼𑀦𑀸𑀲𑀯𑀸 (𑀲𑀻.)].

… 𑀓𑀧𑁆𑀧𑁄 𑀣𑁂𑀭𑁄….

𑁬. 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀉𑀧𑀲𑁂𑀦𑀢𑁆𑀣𑁂𑀭𑀕𑀸𑀣𑀸

𑁫𑁭𑁭. ‘‘𑀯𑀺𑀯𑀺𑀢𑁆𑀢𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁, 𑀯𑀸𑀴𑀫𑀺𑀕𑀦𑀺𑀲𑁂𑀯𑀺𑀢𑀁;

𑀲𑁂𑀯𑁂 𑀲𑁂𑀦𑀸𑀲𑀦𑀁 𑀪𑀺𑀓𑁆𑀔𑀼, 𑀧𑀝𑀺𑀲𑀮𑁆𑀮𑀸𑀦𑀓𑀸𑀭𑀡𑀸.

𑁫𑁭𑁮. ‘‘𑀲𑀗𑁆𑀓𑀸𑀭𑀧𑀼𑀜𑁆𑀚𑀸 𑀆𑀳𑀢𑁆𑀯𑀸 [𑀆𑀳𑀺𑀢𑁆𑀯𑀸 (𑀓.)], 𑀲𑀼𑀲𑀸𑀦𑀸 𑀭𑀣𑀺𑀬𑀸𑀳𑀺 𑀘;

𑀢𑀢𑁄 𑀲𑀗𑁆𑀖𑀸𑀝𑀺𑀓𑀁 𑀓𑀢𑁆𑀯𑀸, 𑀮𑀽𑀔𑀁 𑀥𑀸𑀭𑁂𑀬𑁆𑀬 𑀘𑀻𑀯𑀭𑀁.

𑁫𑁭𑁯. ‘‘𑀦𑀻𑀘𑀁 𑀫𑀦𑀁 𑀓𑀭𑀺𑀢𑁆𑀯𑀸𑀦, 𑀲𑀧𑀤𑀸𑀦𑀁 𑀓𑀼𑀮𑀸 𑀓𑀼𑀮𑀁;

𑀧𑀺𑀡𑁆𑀟𑀺𑀓𑀸𑀬 𑀘𑀭𑁂 𑀪𑀺𑀓𑁆𑀔𑀼, 𑀕𑀼𑀢𑁆𑀢𑀤𑁆𑀯𑀸𑀭𑁄 𑀲𑀼𑀲𑀁𑀯𑀼𑀢𑁄.

𑁫𑁮𑁦. ‘‘𑀮𑀽𑀔𑁂𑀦𑀧𑀺 𑀯𑀸 [𑀮𑀽𑀔𑁂𑀦𑀧𑀺 𑀘 (𑀩𑀳𑀽𑀲𑀼)] 𑀲𑀦𑁆𑀢𑀼𑀲𑁆𑀲𑁂, 𑀦𑀸𑀜𑁆𑀜𑀁 𑀧𑀢𑁆𑀣𑁂 𑀭𑀲𑀁 𑀩𑀳𑀼𑀁;

𑀭𑀲𑁂𑀲𑀼 𑀅𑀦𑀼𑀕𑀺𑀤𑁆𑀥𑀲𑁆𑀲, 𑀛𑀸𑀦𑁂 𑀦 𑀭𑀫𑀢𑀻 𑀫𑀦𑁄.

𑁫𑁮𑁧. ‘‘𑀅𑀧𑁆𑀧𑀺𑀘𑁆𑀙𑁄 𑀘𑁂𑀯 𑀲𑀦𑁆𑀢𑀼𑀝𑁆𑀞𑁄, 𑀧𑀯𑀺𑀯𑀺𑀢𑁆𑀢𑁄 𑀯𑀲𑁂 𑀫𑀼𑀦𑀺;

𑀅𑀲𑀁𑀲𑀝𑁆𑀞𑁄 𑀕𑀳𑀝𑁆𑀞𑁂𑀳𑀺, 𑀅𑀦𑀸𑀕𑀸𑀭𑁂𑀳𑀺 𑀘𑀽𑀪𑀬𑀁.

𑁫𑁮𑁨. ‘‘𑀬𑀣𑀸 𑀚𑀴𑁄 𑀯 𑀫𑀽𑀕𑁄 𑀯, 𑀅𑀢𑁆𑀢𑀸𑀦𑀁 𑀤𑀲𑁆𑀲𑀬𑁂 𑀢𑀣𑀸;

𑀦𑀸𑀢𑀺𑀯𑁂𑀮𑀁 𑀲𑀫𑁆𑀪𑀸𑀲𑁂𑀬𑁆𑀬, 𑀲𑀗𑁆𑀖𑀫𑀚𑁆𑀛𑀫𑁆𑀳𑀺 𑀧𑀡𑁆𑀟𑀺𑀢𑁄.

𑁫𑁮𑁩. ‘‘𑀦 𑀲𑁄 𑀉𑀧𑀯𑀤𑁂 𑀓𑀜𑁆𑀘𑀺, 𑀉𑀧𑀖𑀸𑀢𑀁 𑀯𑀺𑀯𑀚𑁆𑀚𑀬𑁂;

𑀲𑀁𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑁆𑀫𑀺𑀁, 𑀫𑀢𑁆𑀢𑀜𑁆𑀜𑀽 𑀘𑀲𑁆𑀲 𑀪𑁄𑀚𑀦𑁂.

𑁫𑁮𑁪. ‘‘𑀲𑀼𑀕𑁆𑀕𑀳𑀻𑀢𑀦𑀺𑀫𑀺𑀢𑁆𑀢𑀲𑁆𑀲, 𑀘𑀺𑀢𑁆𑀢𑀲𑁆𑀲𑀼𑀧𑁆𑀧𑀸𑀤𑀓𑁄𑀯𑀺𑀤𑁄;

𑀲𑀫𑀁 𑀅𑀦𑀼𑀬𑀼𑀜𑁆𑀚𑁂𑀬𑁆𑀬, 𑀓𑀸𑀮𑁂𑀦 𑀘 𑀯𑀺𑀧𑀲𑁆𑀲𑀦𑀁.

𑁫𑁮𑁫. ‘‘𑀯𑀻𑀭𑀺𑀬𑀲𑀸𑀢𑀘𑁆𑀘𑀲𑀫𑁆𑀧𑀦𑁆𑀦𑁄, 𑀬𑀼𑀢𑁆𑀢𑀬𑁄𑀕𑁄 𑀲𑀤𑀸 𑀲𑀺𑀬𑀸;

𑀦 𑀘 𑀅𑀧𑁆𑀧𑀢𑁆𑀯𑀸 𑀤𑀼𑀓𑁆𑀔𑀦𑁆𑀢𑀁, 𑀯𑀺𑀲𑁆𑀲𑀸𑀲𑀁 𑀏𑀬𑁆𑀬 𑀧𑀡𑁆𑀟𑀺𑀢𑁄.

𑁫𑁮𑁬. ‘‘𑀏𑀯𑀁 𑀯𑀺𑀳𑀭𑀫𑀸𑀦𑀲𑁆𑀲, 𑀲𑀼𑀤𑁆𑀥𑀺𑀓𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀔𑀻𑀬𑀦𑁆𑀢𑀺 𑀆𑀲𑀯𑀸 𑀲𑀩𑁆𑀩𑁂, 𑀦𑀺𑀩𑁆𑀩𑀼𑀢𑀺𑀜𑁆𑀘𑀸𑀥𑀺𑀕𑀘𑁆𑀙𑀢𑀻’’𑀢𑀺.

… 𑀉𑀧𑀲𑁂𑀦𑁄 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑁄 𑀣𑁂𑀭𑁄….

𑁭. (𑀅𑀧𑀭)-𑀕𑁄𑀢𑀫𑀢𑁆𑀣𑁂𑀭𑀕𑀸𑀣𑀸

𑁫𑁮𑁭. ‘‘𑀯𑀺𑀚𑀸𑀦𑁂𑀬𑁆𑀬 𑀲𑀓𑀁 𑀅𑀢𑁆𑀣𑀁, 𑀅𑀯𑀮𑁄𑀓𑁂𑀬𑁆𑀬𑀸𑀣 𑀧𑀸𑀯𑀘𑀦𑀁;

𑀬𑀜𑁆𑀘𑁂𑀢𑁆𑀣 𑀅𑀲𑁆𑀲 𑀧𑀢𑀺𑀭𑀽𑀧𑀁, 𑀲𑀸𑀫𑀜𑁆𑀜𑀁 𑀅𑀚𑁆𑀛𑀼𑀧𑀕𑀢𑀲𑁆𑀲.

𑁫𑁮𑁮. ‘‘𑀫𑀺𑀢𑁆𑀢𑀁 𑀇𑀥 𑀘 𑀓𑀮𑁆𑀬𑀸𑀡𑀁, 𑀲𑀺𑀓𑁆𑀔𑀸 𑀯𑀺𑀧𑀼𑀮𑀁 𑀲𑀫𑀸𑀤𑀸𑀦𑀁;

𑀲𑀼𑀲𑁆𑀲𑀽𑀲𑀸 𑀘 𑀕𑀭𑀽𑀦𑀁, 𑀏𑀢𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧𑀁.

𑁫𑁮𑁯. ‘‘𑀩𑀼𑀤𑁆𑀥𑁂𑀲𑀼 𑀲𑀕𑀸𑀭𑀯𑀢𑀸, 𑀥𑀫𑁆𑀫𑁂 𑀅𑀧𑀘𑀺𑀢𑀺 𑀬𑀣𑀸𑀪𑀽𑀢𑀁;

𑀲𑀗𑁆𑀖𑁂 𑀘 𑀘𑀺𑀢𑁆𑀢𑀺𑀓𑀸𑀭𑁄, 𑀏𑀢𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧𑀁.

𑁫𑁯𑁦. ‘‘𑀆𑀘𑀸𑀭𑀕𑁄𑀘𑀭𑁂 𑀬𑀼𑀢𑁆𑀢𑁄, 𑀆𑀚𑀻𑀯𑁄 𑀲𑁄𑀥𑀺𑀢𑁄 𑀅𑀕𑀸𑀭𑀬𑁆𑀳𑁄;

𑀘𑀺𑀢𑁆𑀢𑀲𑁆𑀲 𑀘 𑀲𑀡𑁆𑀞𑀧𑀦𑀁, 𑀏𑀢𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧𑀁.

𑁫𑁯𑁧. ‘‘𑀘𑀸𑀭𑀺𑀢𑁆𑀢𑀁 𑀅𑀣 𑀯𑀸𑀭𑀺𑀢𑁆𑀢𑀁, 𑀇𑀭𑀺𑀬𑀸𑀧𑀣𑀺𑀬𑀁 𑀧𑀲𑀸𑀤𑀦𑀺𑀬𑀁;

𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄, 𑀏𑀢𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧𑀁.

𑁫𑁯𑁨. ‘‘𑀆𑀭𑀜𑁆𑀜𑀓𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀧𑀦𑁆𑀢𑀸𑀦𑀺 𑀅𑀧𑁆𑀧𑀲𑀤𑁆𑀤𑀸𑀦𑀺;

𑀪𑀚𑀺𑀢𑀩𑁆𑀩𑀸𑀦𑀺 𑀫𑀼𑀦𑀺𑀦𑀸, 𑀏𑀢𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧𑀁.

𑁫𑁯𑁩. ‘‘𑀲𑀻𑀮𑀜𑁆𑀘 𑀩𑀸𑀳𑀼𑀲𑀘𑁆𑀘𑀜𑁆𑀘, 𑀥𑀫𑁆𑀫𑀸𑀦𑀁 𑀧𑀯𑀺𑀘𑀬𑁄 𑀬𑀣𑀸𑀪𑀽𑀢𑀁;

𑀲𑀘𑁆𑀘𑀸𑀦𑀁 𑀅𑀪𑀺𑀲𑀫𑀬𑁄, 𑀏𑀢𑀁 𑀲𑀫𑀡𑀲𑁆𑀲 𑀧𑀢𑀺𑀭𑀽𑀧𑀁.