𑁭. 𑀲𑀢𑁆𑀢𑀫𑀯𑀕𑁆𑀕𑁄

𑁬𑁧. ‘‘𑀧𑀲𑁆𑀲𑀢𑀺 𑀧𑀲𑁆𑀲𑁄 𑀧𑀲𑁆𑀲𑀦𑁆𑀢𑀁, 𑀅𑀧𑀲𑁆𑀲𑀦𑁆𑀢𑀜𑁆𑀘 𑀧𑀲𑁆𑀲𑀢𑀺;

𑀅𑀧𑀲𑁆𑀲𑀦𑁆𑀢𑁄 𑀅𑀧𑀲𑁆𑀲𑀦𑁆𑀢𑀁, 𑀧𑀲𑁆𑀲𑀦𑁆𑀢𑀜𑁆𑀘 𑀦 𑀧𑀲𑁆𑀲𑀢𑀻’’𑀢𑀺.

… 𑀯𑀧𑁆𑀧𑁄 𑀣𑁂𑀭𑁄….

𑁬𑁨. ‘‘𑀏𑀓𑀓𑀸 𑀫𑀬𑀁 𑀅𑀭𑀜𑁆𑀜𑁂 𑀯𑀺𑀳𑀭𑀸𑀫, 𑀅𑀧𑀯𑀺𑀤𑁆𑀥𑀁𑀯 𑀯𑀦𑀲𑁆𑀫𑀺𑀁 𑀤𑀸𑀭𑀼𑀓𑀁;

𑀢𑀲𑁆𑀲 𑀫𑁂 𑀩𑀳𑀼𑀓𑀸 𑀧𑀺𑀳𑀬𑀦𑁆𑀢𑀺, 𑀦𑁂𑀭𑀬𑀺𑀓𑀸 𑀯𑀺𑀬 𑀲𑀕𑁆𑀕𑀕𑀸𑀫𑀺𑀦’’𑀦𑁆𑀢𑀺.

… 𑀯𑀚𑁆𑀚𑀺𑀧𑀼𑀢𑁆𑀢𑁄 𑀣𑁂𑀭𑁄….

𑁬𑁩. ‘‘𑀘𑀼𑀢𑀸 𑀧𑀢𑀦𑁆𑀢𑀺 𑀧𑀢𑀺𑀢𑀸, 𑀕𑀺𑀤𑁆𑀥𑀸 𑀘 𑀧𑀼𑀦𑀭𑀸𑀕𑀢𑀸;

𑀓𑀢𑀁 𑀓𑀺𑀘𑁆𑀘𑀁 𑀭𑀢𑀁 𑀭𑀫𑁆𑀫𑀁, 𑀲𑀼𑀔𑁂𑀦𑀦𑁆𑀯𑀸𑀕𑀢𑀁 𑀲𑀼𑀔’’𑀦𑁆𑀢𑀺.

… 𑀧𑀓𑁆𑀔𑁄 𑀣𑁂𑀭𑁄….

𑁬𑁪. ‘‘𑀤𑀼𑀫𑀯𑁆𑀳𑀬𑀸𑀬 𑀉𑀧𑁆𑀧𑀦𑁆𑀦𑁄, 𑀚𑀸𑀢𑁄 𑀧𑀡𑁆𑀟𑀭𑀓𑁂𑀢𑀼𑀦𑀸;

𑀓𑁂𑀢𑀼𑀳𑀸 𑀓𑁂𑀢𑀼𑀦𑀸𑀬𑁂𑀯, 𑀫𑀳𑀸𑀓𑁂𑀢𑀼𑀁 𑀧𑀥𑀁𑀲𑀬𑀻’’𑀢𑀺.

… 𑀯𑀺𑀫𑀮𑀓𑁄𑀡𑁆𑀟𑀜𑁆𑀜𑁄 𑀣𑁂𑀭𑁄….

𑁬𑁫. ‘‘𑀉𑀓𑁆𑀔𑁂𑀧𑀓𑀢𑀯𑀘𑁆𑀙𑀲𑁆𑀲, 𑀲𑀗𑁆𑀓𑀮𑀺𑀢𑀁 𑀩𑀳𑀽𑀳𑀺 𑀯𑀲𑁆𑀲𑁂𑀳𑀺;

𑀢𑀁 𑀪𑀸𑀲𑀢𑀺 𑀕𑀳𑀝𑁆𑀞𑀸𑀦𑀁, 𑀲𑀼𑀦𑀺𑀲𑀺𑀦𑁆𑀦𑁄 𑀉𑀴𑀸𑀭𑀧𑀸𑀫𑁄𑀚𑁆𑀚𑁄’’𑀢𑀺.

… 𑀉𑀓𑁆𑀔𑁂𑀧𑀓𑀢𑀯𑀘𑁆𑀙𑁄 𑀣𑁂𑀭𑁄….

𑁬𑁬. ‘‘𑀅𑀦𑀼𑀲𑀸𑀲𑀺 𑀫𑀳𑀸𑀯𑀻𑀭𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀢𑀲𑁆𑀲𑀸𑀳𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦, 𑀯𑀺𑀳𑀸𑀲𑀺𑀁 𑀲𑀦𑁆𑀢𑀺𑀓𑁂 𑀲𑀢𑁄;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀫𑁂𑀖𑀺𑀬𑁄 𑀣𑁂𑀭𑁄….

𑁬𑁭. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

… 𑀏𑀓𑀥𑀫𑁆𑀫𑀲𑀯𑀦𑀻𑀬𑁄 𑀣𑁂𑀭𑁄….

𑁬𑁮. [𑀉𑀤𑀸. 𑁩𑁭; 𑀧𑀸𑀘𑀺. 𑁧𑁫𑁩] ‘‘𑀅𑀥𑀺𑀘𑁂𑀢𑀲𑁄 𑀅𑀧𑁆𑀧𑀫𑀚𑁆𑀚𑀢𑁄, 𑀫𑀼𑀦𑀺𑀦𑁄 𑀫𑁄𑀦𑀧𑀣𑁂𑀲𑀼 𑀲𑀺𑀓𑁆𑀔𑀢𑁄;

𑀲𑁄𑀓𑀸 𑀦 𑀪𑀯𑀦𑁆𑀢𑀺 𑀢𑀸𑀤𑀺𑀦𑁄, 𑀉𑀧𑀲𑀦𑁆𑀢𑀲𑁆𑀲 𑀲𑀤𑀸 𑀲𑀢𑀻𑀫𑀢𑁄’’𑀢𑀺.

… 𑀏𑀓𑀼𑀤𑀸𑀦𑀺𑀬𑁄 𑀣𑁂𑀭𑁄….

𑁬𑁯. ‘‘𑀲𑀼𑀢𑁆𑀯𑀸𑀦 𑀥𑀫𑁆𑀫𑀁 𑀫𑀳𑀢𑁄 𑀫𑀳𑀸𑀭𑀲𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀯𑀭𑁂𑀦 𑀤𑁂𑀲𑀺𑀢𑀁;

𑀫𑀕𑁆𑀕𑀁 𑀧𑀧𑀚𑁆𑀚𑀺𑀁 [𑀧𑀧𑀚𑁆𑀚𑀁 (𑀓.)] 𑀅𑀫𑀢𑀲𑁆𑀲 𑀧𑀢𑁆𑀢𑀺𑀬𑀸, 𑀲𑁄 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀣𑀲𑁆𑀲 𑀓𑁄𑀯𑀺𑀤𑁄’’𑀢𑀺.

… 𑀙𑀦𑁆𑀦𑁄 𑀣𑁂𑀭𑁄….

𑁭𑁦. ‘‘𑀲𑀻𑀮𑀫𑁂𑀯 𑀇𑀥 𑀅𑀕𑁆𑀕𑀁, 𑀧𑀜𑁆𑀜𑀯𑀸 𑀧𑀦 𑀉𑀢𑁆𑀢𑀫𑁄;

𑀫𑀦𑀼𑀲𑁆𑀲𑁂𑀲𑀼 𑀘 𑀤𑁂𑀯𑁂𑀲𑀼, 𑀲𑀻𑀮𑀧𑀜𑁆𑀜𑀸𑀡𑀢𑁄 𑀚𑀬’’𑀦𑁆𑀢𑀺.

… 𑀧𑀼𑀡𑁆𑀡𑁄 𑀣𑁂𑀭𑁄….

𑀯𑀕𑁆𑀕𑁄 𑀲𑀢𑁆𑀢𑀫𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀯𑀧𑁆𑀧𑁄 𑀘 𑀯𑀚𑁆𑀚𑀺𑀧𑀼𑀢𑁆𑀢𑁄 𑀘, 𑀧𑀓𑁆𑀔𑁄 𑀯𑀺𑀫𑀮𑀓𑁄𑀡𑁆𑀟𑀜𑁆𑀜𑁄;

𑀉𑀓𑁆𑀔𑁂𑀧𑀓𑀢𑀯𑀘𑁆𑀙𑁄 𑀘, 𑀫𑁂𑀖𑀺𑀬𑁄 𑀏𑀓𑀥𑀫𑁆𑀫𑀺𑀓𑁄;

𑀏𑀓𑀼𑀤𑀸𑀦𑀺𑀬𑀙𑀦𑁆𑀦𑀸 𑀘, 𑀧𑀼𑀡𑁆𑀡𑀢𑁆𑀣𑁂𑀭𑁄 𑀫𑀳𑀩𑁆𑀩𑀮𑁄𑀢𑀺.