𑁧𑁨. 𑀤𑁆𑀯𑀸𑀤𑀲𑀫𑀯𑀕𑁆𑀕𑁄

𑁧. 𑀚𑁂𑀦𑁆𑀢𑀢𑁆𑀣𑁂𑀭𑀕𑀸𑀣𑀸

𑁧𑁧𑁧. ‘‘𑀤𑀼𑀧𑁆𑀧𑀩𑁆𑀩𑀚𑁆𑀚𑀁 𑀯𑁂 𑀤𑀼𑀭𑀥𑀺𑀯𑀸𑀲𑀸 𑀕𑁂𑀳𑀸, 𑀥𑀫𑁆𑀫𑁄 𑀕𑀫𑁆𑀪𑀻𑀭𑁄 𑀤𑀼𑀭𑀥𑀺𑀕𑀫𑀸 𑀪𑁄𑀕𑀸;

𑀓𑀺𑀘𑁆𑀙𑀸 𑀯𑀼𑀢𑁆𑀢𑀺 𑀦𑁄 𑀇𑀢𑀭𑀻𑀢𑀭𑁂𑀦𑁂𑀯, 𑀬𑀼𑀢𑁆𑀢𑀁 𑀘𑀺𑀦𑁆𑀢𑁂𑀢𑀼𑀁 𑀲𑀢𑀢𑀫𑀦𑀺𑀘𑁆𑀘𑀢’’𑀦𑁆𑀢𑀺.

… 𑀚𑁂𑀦𑁆𑀢𑁄 𑀣𑁂𑀭𑁄….

𑁨. 𑀯𑀘𑁆𑀙𑀕𑁄𑀢𑁆𑀢𑀢𑁆𑀣𑁂𑀭𑀕𑀸𑀣𑀸

𑁧𑁧𑁨. ‘‘𑀢𑁂𑀯𑀺𑀚𑁆𑀚𑁄𑀳𑀁 𑀫𑀳𑀸𑀛𑀸𑀬𑀻, 𑀘𑁂𑀢𑁄𑀲𑀫𑀣𑀓𑁄𑀯𑀺𑀤𑁄;

𑀲𑀤𑀢𑁆𑀣𑁄 𑀫𑁂 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀯𑀘𑁆𑀙𑀕𑁄𑀢𑁆𑀢𑁄 𑀣𑁂𑀭𑁄….

𑁩. 𑀯𑀦𑀯𑀘𑁆𑀙𑀢𑁆𑀣𑁂𑀭𑀕𑀸𑀣𑀸

𑁧𑁧𑁩. ‘‘𑀅𑀘𑁆𑀙𑁄𑀤𑀺𑀓𑀸 𑀧𑀼𑀣𑀼𑀲𑀺𑀮𑀸,𑀕𑁄𑀦𑀗𑁆𑀕𑀼𑀮𑀫𑀺𑀕𑀸𑀬𑀼𑀢𑀸;

𑀅𑀫𑁆𑀩𑀼𑀲𑁂𑀯𑀸𑀮𑀲𑀜𑁆𑀙𑀦𑁆𑀦𑀸, 𑀢𑁂 𑀲𑁂𑀮𑀸 𑀭𑀫𑀬𑀦𑁆𑀢𑀺 𑀫’’𑀦𑁆𑀢𑀺.

… 𑀯𑀦𑀯𑀘𑁆𑀙𑁄 𑀣𑁂𑀭𑁄….

𑁪. 𑀅𑀥𑀺𑀫𑀼𑀢𑁆𑀢𑀢𑁆𑀣𑁂𑀭𑀕𑀸𑀣𑀸

𑁧𑁧𑁪. ‘‘𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀕𑀭𑀼𑀦𑁄, 𑀳𑀺𑀬𑁆𑀬𑀫𑀸𑀦𑀫𑁆𑀳𑀺 [𑀳𑀻𑀬𑀫𑀸𑀦𑀫𑁆𑀳𑀺 (𑀲𑀻.)] 𑀚𑀻𑀯𑀺𑀢𑁂;

𑀲𑀭𑀻𑀭𑀲𑀼𑀔𑀕𑀺𑀤𑁆𑀥𑀲𑁆𑀲, 𑀓𑀼𑀢𑁄 𑀲𑀫𑀡𑀲𑀸𑀥𑀼𑀢𑀸’’𑀢𑀺.

… 𑀅𑀥𑀺𑀫𑀼𑀢𑁆𑀢𑁄 𑀣𑁂𑀭𑁄….

𑁫. 𑀫𑀳𑀸𑀦𑀸𑀫𑀢𑁆𑀣𑁂𑀭𑀕𑀸𑀣𑀸

𑁧𑁧𑁫. ‘‘𑀏𑀲𑀸𑀯𑀳𑀺𑀬𑁆𑀬𑀲𑁂 𑀧𑀩𑁆𑀩𑀢𑁂𑀦, 𑀩𑀳𑀼𑀓𑀼𑀝𑀚𑀲𑀮𑁆𑀮𑀓𑀺𑀓𑁂𑀦 [𑀲𑀮𑁆𑀮𑀓𑀺𑀢𑁂𑀦 (𑀲𑀻.), 𑀲𑀮𑁆𑀮𑀭𑀺𑀓𑁂𑀦 (𑀲𑁆𑀬𑀸.)];

𑀦𑁂𑀲𑀸𑀤𑀓𑁂𑀦 𑀕𑀺𑀭𑀺𑀦𑀸, 𑀬𑀲𑀲𑁆𑀲𑀺𑀦𑀸 𑀧𑀭𑀺𑀘𑁆𑀙𑀤𑁂𑀦𑀸’’𑀢𑀺.

… 𑀫𑀳𑀸𑀦𑀸𑀫𑁄 𑀣𑁂𑀭𑁄….

𑁬. 𑀧𑀸𑀭𑀸𑀧𑀭𑀺𑀬𑀢𑁆𑀣𑁂𑀭𑀕𑀸𑀣𑀸

𑁧𑁧𑁬. ‘‘𑀙𑀨𑀲𑁆𑀲𑀸𑀬𑀢𑀦𑁂 𑀳𑀺𑀢𑁆𑀯𑀸, 𑀕𑀼𑀢𑁆𑀢𑀤𑁆𑀯𑀸𑀭𑁄 𑀲𑀼𑀲𑀁𑀯𑀼𑀢𑁄;

𑀅𑀖𑀫𑀽𑀮𑀁 𑀯𑀫𑀺𑀢𑁆𑀯𑀸𑀦, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄’’𑀢𑀺.

… 𑀧𑀸𑀭𑀸𑀧𑀭𑀺𑀬𑁄 [𑀧𑀸𑀭𑀸𑀲𑀭𑀺𑀬𑁄 (𑀲𑀻.), 𑀧𑀸𑀭𑀁𑀧𑀭𑀺𑀬𑁄 (𑀓.)] 𑀣𑁂𑀭𑁄 ….

𑁭. 𑀬𑀲𑀢𑁆𑀣𑁂𑀭𑀕𑀸𑀣𑀸

𑁧𑁧𑁭. ‘‘𑀲𑀼𑀯𑀺𑀮𑀺𑀢𑁆𑀢𑁄 𑀲𑀼𑀯𑀲𑀦𑁄,𑀲𑀩𑁆𑀩𑀸𑀪𑀭𑀡𑀪𑀽𑀲𑀺𑀢𑁄;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀚𑁆𑀛𑀕𑀫𑀺𑀁, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀬𑀲𑁄 𑀣𑁂𑀭𑁄….

𑁮. 𑀓𑀺𑀫𑀺𑀮𑀢𑁆𑀣𑁂𑀭𑀕𑀸𑀣𑀸

𑁧𑁧𑁮. ‘‘𑀅𑀪𑀺𑀲𑀢𑁆𑀢𑁄𑀯 𑀦𑀺𑀧𑀢𑀢𑀺, 𑀯𑀬𑁄 𑀭𑀽𑀧𑀁 𑀅𑀜𑁆𑀜𑀫𑀺𑀯 𑀢𑀣𑁂𑀯 𑀲𑀦𑁆𑀢𑀁;

𑀢𑀲𑁆𑀲𑁂𑀯 𑀲𑀢𑁄 𑀅𑀯𑀺𑀧𑁆𑀧𑀯𑀲𑀢𑁄, 𑀅𑀜𑁆𑀜𑀲𑁆𑀲𑁂𑀯 𑀲𑀭𑀸𑀫𑀺 𑀅𑀢𑁆𑀢𑀸𑀦’’𑀦𑁆𑀢𑀺.

… 𑀓𑀺𑀫𑀺𑀮𑁄 [𑀓𑀺𑀫𑁆𑀩𑀺𑀮𑁄 (𑀲𑀻. 𑀲𑁆𑀬𑀸.)] 𑀣𑁂𑀭𑁄….

𑁯. 𑀯𑀚𑁆𑀚𑀺𑀧𑀼𑀢𑁆𑀢𑀢𑁆𑀣𑁂𑀭𑀕𑀸𑀣𑀸

𑁧𑁧𑁯. ‘‘𑀭𑀼𑀓𑁆𑀔𑀫𑀽𑀮𑀕𑀳𑀦𑀁 𑀧𑀲𑀓𑁆𑀓𑀺𑀬, 𑀦𑀺𑀩𑁆𑀩𑀸𑀦𑀁 𑀳𑀤𑀬𑀲𑁆𑀫𑀺𑀁 𑀑𑀧𑀺𑀬;

𑀛𑀸𑀬 𑀕𑁄𑀢𑀫 𑀫𑀸 𑀘 𑀧𑀫𑀸𑀤𑁄, 𑀓𑀺𑀁 𑀢𑁂 𑀩𑀺𑀴𑀺𑀩𑀺𑀴𑀺𑀓𑀸 𑀓𑀭𑀺𑀲𑁆𑀲𑀢𑀻’’𑀢𑀺.

… 𑀯𑀚𑁆𑀚𑀺𑀧𑀼𑀢𑁆𑀢𑁄 𑀣𑁂𑀭𑁄….

𑁧𑁦. 𑀇𑀲𑀺𑀤𑀢𑁆𑀢𑀢𑁆𑀣𑁂𑀭𑀕𑀸𑀣𑀸

𑁧𑁨𑁦. ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸, 𑀢𑀺𑀝𑁆𑀞𑀦𑁆𑀢𑀺 𑀙𑀺𑀦𑁆𑀦𑀫𑀽𑀮𑀓𑀸;

𑀤𑀼𑀓𑁆𑀔𑀓𑁆𑀔𑀬𑁄 𑀅𑀦𑀼𑀧𑁆𑀧𑀢𑁆𑀢𑁄,𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄’’𑀢𑀺.

… 𑀇𑀲𑀺𑀤𑀢𑁆𑀢𑁄 𑀣𑁂𑀭𑁄….

𑀯𑀕𑁆𑀕𑁄 𑀤𑁆𑀯𑀸𑀤𑀲𑀫𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀚𑁂𑀦𑁆𑀢𑁄 𑀘 𑀯𑀘𑁆𑀙𑀕𑁄𑀢𑁆𑀢𑁄 𑀘, 𑀯𑀘𑁆𑀙𑁄 𑀘 𑀯𑀦𑀲𑀯𑁆𑀳𑀬𑁄;

𑀅𑀥𑀺𑀫𑀼𑀢𑁆𑀢𑁄 𑀫𑀳𑀸𑀦𑀸𑀫𑁄, 𑀧𑀸𑀭𑀸𑀧𑀭𑀺𑀬𑁄 𑀬𑀲𑁄𑀧𑀺 𑀘;

𑀓𑀺𑀫𑀺𑀮𑁄 𑀯𑀚𑁆𑀚𑀺𑀧𑀼𑀢𑁆𑀢𑁄 𑀘, 𑀇𑀲𑀺𑀤𑀢𑁆𑀢𑁄 𑀫𑀳𑀸𑀬𑀲𑁄𑀢𑀺.

𑀏𑀓𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.