𑁧𑁬. 𑀧𑀺𑀗𑁆𑀕𑀺𑀬𑀫𑀸𑀡𑀯𑀧𑀼𑀘𑁆𑀙𑀸

𑁧𑁧𑁨𑁬. ‘‘𑀚𑀺𑀡𑁆𑀡𑁄𑀳𑀫𑀲𑁆𑀫𑀺 𑀅𑀩𑀮𑁄 𑀯𑀻𑀢𑀯𑀡𑁆𑀡𑁄, (𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄)

𑀦𑁂𑀢𑁆𑀢𑀸 𑀦 𑀲𑀼𑀤𑁆𑀥𑀸 𑀲𑀯𑀦𑀁 𑀦 𑀨𑀸𑀲𑀼;

𑀫𑀸𑀳𑀁 𑀦𑀲𑁆𑀲𑀁 𑀫𑁄𑀫𑀼𑀳𑁄 𑀅𑀦𑁆𑀢𑀭𑀸𑀯

𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁’’.

𑁧𑁧𑁨𑁭. ‘‘𑀤𑀺𑀲𑁆𑀯𑀸𑀦 𑀭𑀽𑀧𑁂𑀲𑀼 𑀯𑀺𑀳𑀜𑁆𑀜𑀫𑀸𑀦𑁂, (𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸)

𑀭𑀼𑀧𑁆𑀧𑀦𑁆𑀢𑀺 𑀭𑀽𑀧𑁂𑀲𑀼 𑀚𑀦𑀸 𑀧𑀫𑀢𑁆𑀢𑀸;

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄,

𑀚𑀳𑀲𑁆𑀲𑀼 𑀭𑀽𑀧𑀁 𑀅𑀧𑀼𑀦𑀩𑁆𑀪𑀯𑀸𑀬’’.

𑁧𑁧𑁨𑁮. ‘‘𑀤𑀺𑀲𑀸 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸 𑀘𑀢𑀲𑁆𑀲𑁄, 𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸 𑀇𑀫𑀸𑀬𑁄;

𑀦 𑀢𑀼𑀬𑁆𑀳𑀁 𑀅𑀤𑀺𑀝𑁆𑀞𑀁 𑀅𑀲𑀼𑀢𑀁 𑀅𑀫𑀼𑀢𑀁 [𑀅𑀲𑀼𑀢𑀁 𑀅𑀫𑀼𑀢𑀁 𑀯𑀸 (𑀲𑀻.), 𑀅𑀲𑀼𑀢𑀸𑀫𑀼𑀢𑀁 𑀯𑀸 (𑀲𑁆𑀬𑀸.), 𑀅𑀲𑀼𑀢𑀁’𑀫𑀼𑀢𑀁 𑀯𑀸 (𑀧𑀻.)], 𑀅𑀣𑁄 𑀅𑀯𑀺𑀜𑁆𑀜𑀸𑀢𑀁 𑀓𑀺𑀜𑁆𑀘𑀦𑀫𑀢𑁆𑀣𑀺 [𑀓𑀺𑀜𑁆𑀘𑀺 𑀫𑀢𑁆𑀣𑀺 (𑀲𑁆𑀬𑀸.), 𑀓𑀺𑀜𑁆𑀘𑀺 𑀦𑀢𑁆𑀣𑀺 (𑀧𑀻.), 𑀓𑀺𑀜𑁆𑀘𑀺𑀦𑀫𑀢𑁆𑀣𑀺 (𑀓.)] 𑀮𑁄𑀓𑁂;

𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁, 𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁’’.

𑁧𑁧𑁨𑁯. ‘‘𑀢𑀡𑁆𑀳𑀸𑀥𑀺𑀧𑀦𑁆𑀦𑁂 𑀫𑀦𑀼𑀚𑁂 𑀧𑁂𑀓𑁆𑀔𑀫𑀸𑀦𑁄, (𑀧𑀺𑀗𑁆𑀕𑀺𑀬𑀸𑀢𑀺 𑀪𑀕𑀯𑀸)

𑀲𑀦𑁆𑀢𑀸𑀧𑀚𑀸𑀢𑁂 𑀚𑀭𑀲𑀸 𑀧𑀭𑁂𑀢𑁂;

𑀢𑀲𑁆𑀫𑀸 𑀢𑀼𑀯𑀁 𑀧𑀺𑀗𑁆𑀕𑀺𑀬 𑀅𑀧𑁆𑀧𑀫𑀢𑁆𑀢𑁄, 𑀚𑀳𑀲𑁆𑀲𑀼 𑀢𑀡𑁆𑀳𑀁 𑀅𑀧𑀼𑀦𑀩𑁆𑀪𑀯𑀸𑀬𑀸’’𑀢𑀺.

𑀧𑀺𑀗𑁆𑀕𑀺𑀬𑀫𑀸𑀡𑀯𑀧𑀼𑀘𑁆𑀙𑀸 𑀲𑁄𑀴𑀲𑀫𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸

𑀇𑀤𑀫𑀯𑁄𑀘 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀦𑁆𑀢𑁄 𑀧𑀸𑀲𑀸𑀡𑀓𑁂 𑀘𑁂𑀢𑀺𑀬𑁂, 𑀧𑀭𑀺𑀘𑀸𑀭𑀓𑀲𑁄𑀴𑀲𑀸𑀦𑀁 [𑀧𑀭𑀺𑀘𑀸𑀭𑀓𑀲𑁄𑀴𑀲𑀦𑁆𑀦𑀁 (𑀲𑁆𑀬𑀸. 𑀓.)] 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑁆𑀛𑀺𑀝𑁆𑀞𑁄 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀧𑀜𑁆𑀳𑀁 [𑀧𑀜𑁆𑀳𑁂 (𑀲𑀻. 𑀧𑀻.)] 𑀩𑁆𑀬𑀸𑀓𑀸𑀲𑀺. 𑀏𑀓𑀫𑁂𑀓𑀲𑁆𑀲 𑀘𑁂𑀧𑀺 𑀧𑀜𑁆𑀳𑀲𑁆𑀲 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀕𑀘𑁆𑀙𑁂𑀬𑁆𑀬𑁂𑀯 𑀚𑀭𑀸𑀫𑀭𑀡𑀲𑁆𑀲 𑀧𑀸𑀭𑀁. 𑀧𑀸𑀭𑀗𑁆𑀕𑀫𑀦𑀻𑀬𑀸 𑀇𑀫𑁂 𑀥𑀫𑁆𑀫𑀸𑀢𑀺, 𑀢𑀲𑁆𑀫𑀸 𑀇𑀫𑀲𑁆𑀲 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲 𑀧𑀸𑀭𑀸𑀬𑀦𑀦𑁆𑀢𑁂𑀯 [𑀧𑀸𑀭𑀸𑀬𑀡𑀁𑀢𑁆𑀯𑁂𑀯 (𑀲𑀻. 𑀅𑀝𑁆𑀞.)] 𑀅𑀥𑀺𑀯𑀘𑀦𑀁.

𑁧𑁧𑁩𑁦. 𑀅𑀚𑀺𑀢𑁄 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄, 𑀧𑀼𑀡𑁆𑀡𑀓𑁄 𑀅𑀣 𑀫𑁂𑀢𑁆𑀢𑀕𑀽;

𑀥𑁄𑀢𑀓𑁄 𑀉𑀧𑀲𑀻𑀯𑁄 𑀘, 𑀦𑀦𑁆𑀤𑁄 𑀘 𑀅𑀣 𑀳𑁂𑀫𑀓𑁄.

𑁧𑁧𑁩𑁧. 𑀢𑁄𑀤𑁂𑀬𑁆𑀬-𑀓𑀧𑁆𑀧𑀸 𑀤𑀼𑀪𑀬𑁄, 𑀚𑀢𑀼𑀓𑀡𑁆𑀡𑀻 𑀘 𑀧𑀡𑁆𑀟𑀺𑀢𑁄;

𑀪𑀤𑁆𑀭𑀸𑀯𑀼𑀥𑁄 𑀉𑀤𑀬𑁄 𑀘, 𑀧𑁄𑀲𑀸𑀮𑁄 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑁄;

𑀫𑁄𑀖𑀭𑀸𑀚𑀸 𑀘 𑀫𑁂𑀥𑀸𑀯𑀻, 𑀧𑀺𑀗𑁆𑀕𑀺𑀬𑁄 𑀘 𑀫𑀳𑀸𑀇𑀲𑀺.

𑁧𑁧𑁩𑁨. 𑀏𑀢𑁂 𑀩𑀼𑀤𑁆𑀥𑀁 𑀉𑀧𑀸𑀕𑀘𑁆𑀙𑀼𑀁, 𑀲𑀫𑁆𑀧𑀦𑁆𑀦𑀘𑀭𑀡𑀁 𑀇𑀲𑀺𑀁;

𑀧𑀼𑀘𑁆𑀙𑀦𑁆𑀢𑀸 𑀦𑀺𑀧𑀼𑀡𑁂 𑀧𑀜𑁆𑀳𑁂, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀸𑀕𑀫𑀼𑀁.

𑁧𑁧𑁩𑁩. 𑀢𑁂𑀲𑀁 𑀩𑀼𑀤𑁆𑀥𑁄 𑀧𑀩𑁆𑀬𑀸𑀓𑀸𑀲𑀺, 𑀧𑀜𑁆𑀳𑁂 𑀧𑀼𑀝𑁆𑀞𑁄 𑀬𑀣𑀸𑀢𑀣𑀁;

𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦, 𑀢𑁄𑀲𑁂𑀲𑀺 𑀩𑁆𑀭𑀸𑀳𑁆𑀫𑀡𑁂 𑀫𑀼𑀦𑀺.

𑁧𑁧𑁩𑁪. 𑀢𑁂 𑀢𑁄𑀲𑀺𑀢𑀸 𑀘𑀓𑁆𑀔𑀼𑀫𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺𑀁𑀲𑀼, 𑀯𑀭𑀧𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂.

𑁧𑁧𑁩𑁫. 𑀏𑀓𑀫𑁂𑀓𑀲𑁆𑀲 𑀧𑀜𑁆𑀳𑀲𑁆𑀲, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀢𑀣𑀸 𑀬𑁄 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀕𑀘𑁆𑀙𑁂 𑀧𑀸𑀭𑀁 𑀅𑀧𑀸𑀭𑀢𑁄.

𑁧𑁧𑁩𑁬. 𑀅𑀧𑀸𑀭𑀸 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀪𑀸𑀯𑁂𑀦𑁆𑀢𑁄 𑀫𑀕𑁆𑀕𑀫𑀼𑀢𑁆𑀢𑀫𑀁;

𑀫𑀕𑁆𑀕𑁄 𑀲𑁄 𑀧𑀸𑀭𑀁 𑀕𑀫𑀦𑀸𑀬, 𑀢𑀲𑁆𑀫𑀸 𑀧𑀸𑀭𑀸𑀬𑀦𑀁 𑀇𑀢𑀺.

𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸

𑁧𑁧𑁩𑁭. ‘‘𑀧𑀸𑀭𑀸𑀬𑀦𑀫𑀦𑀼𑀕𑀸𑀬𑀺𑀲𑁆𑀲𑀁, (𑀇𑀘𑁆𑀘𑀸𑀬𑀲𑁆𑀫𑀸 𑀧𑀺𑀗𑁆𑀕𑀺𑀬𑁄)

𑀬𑀣𑀸𑀤𑁆𑀤𑀓𑁆𑀔𑀺 𑀢𑀣𑀸𑀓𑁆𑀔𑀸𑀲𑀺, 𑀯𑀺𑀫𑀮𑁄 𑀪𑀽𑀭𑀺𑀫𑁂𑀥𑀲𑁄;

𑀦𑀺𑀓𑁆𑀓𑀸𑀫𑁄 𑀦𑀺𑀩𑁆𑀩𑀦𑁄 [𑀦𑀺𑀩𑁆𑀩𑀼𑀢𑁄 (𑀲𑁆𑀬𑀸.)] 𑀦𑀸𑀕𑁄, 𑀓𑀺𑀲𑁆𑀲 𑀳𑁂𑀢𑀼 𑀫𑀼𑀲𑀸 𑀪𑀡𑁂.

𑁧𑁧𑁩𑁮. ‘‘𑀧𑀳𑀻𑀦𑀫𑀮𑀫𑁄𑀳𑀲𑁆𑀲, 𑀫𑀸𑀦𑀫𑀓𑁆𑀔𑀧𑁆𑀧𑀳𑀸𑀬𑀺𑀦𑁄;

𑀳𑀦𑁆𑀤𑀸𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀕𑀺𑀭𑀁 𑀯𑀡𑁆𑀡𑀽𑀧𑀲𑀜𑁆𑀳𑀺𑀢𑀁.

𑁧𑁧𑁩𑁯. ‘‘𑀢𑀫𑁄𑀦𑀼𑀤𑁄 𑀩𑀼𑀤𑁆𑀥𑁄 𑀲𑀫𑀦𑁆𑀢𑀘𑀓𑁆𑀔𑀼, 𑀮𑁄𑀓𑀦𑁆𑀢𑀕𑀽 𑀲𑀩𑁆𑀩𑀪𑀯𑀸𑀢𑀺𑀯𑀢𑁆𑀢𑁄;

𑀅𑀦𑀸𑀲𑀯𑁄 𑀲𑀩𑁆𑀩𑀤𑀼𑀓𑁆𑀔𑀧𑀳𑀻𑀦𑁄, 𑀲𑀘𑁆𑀘𑀯𑁆𑀳𑀬𑁄 𑀩𑁆𑀭𑀳𑁆𑀫𑁂 𑀉𑀧𑀸𑀲𑀺𑀢𑁄 𑀫𑁂.

𑁧𑁧𑁪𑁦. ‘‘𑀤𑀺𑀚𑁄 𑀬𑀣𑀸 𑀓𑀼𑀩𑁆𑀩𑀦𑀓𑀁 𑀧𑀳𑀸𑀬, 𑀩𑀳𑀼𑀧𑁆𑀨𑀮𑀁 𑀓𑀸𑀦𑀦𑀫𑀸𑀯𑀲𑁂𑀬𑁆𑀬;

𑀏𑀯𑀁 𑀧𑀳𑀁 𑀅𑀧𑁆𑀧𑀤𑀲𑁆𑀲𑁂 𑀧𑀳𑀸𑀬, 𑀫𑀳𑁄𑀤𑀥𑀺𑀁 𑀳𑀁𑀲𑁄𑀭𑀺𑀯 𑀅𑀚𑁆𑀛𑀧𑀢𑁆𑀢𑁄.

𑁧𑁧𑁪𑁧. ‘‘𑀬𑁂𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀼, 𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸;

𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲𑀢𑀺;

𑀲𑀩𑁆𑀩𑀁 𑀢𑀁 𑀇𑀢𑀺𑀳𑀺𑀢𑀺𑀳𑀁, 𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀁.

𑁧𑁧𑁪𑁨. ‘‘𑀏𑀓𑁄 𑀢𑀫𑀦𑀼𑀤𑀸𑀲𑀺𑀦𑁄, 𑀚𑀼𑀢𑀺𑀫𑀸 𑀲𑁄 𑀧𑀪𑀗𑁆𑀓𑀭𑁄;

𑀕𑁄𑀢𑀫𑁄 𑀪𑀽𑀭𑀺𑀧𑀜𑁆𑀜𑀸𑀡𑁄, 𑀕𑁄𑀢𑀫𑁄 𑀪𑀽𑀭𑀺𑀫𑁂𑀥𑀲𑁄.

𑁧𑁧𑁪𑁩. ‘‘𑀬𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁;

𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺’’.

𑁧𑁧𑁪𑁪. ‘‘𑀓𑀺𑀁𑀦𑀼 𑀢𑀫𑁆𑀳𑀸 𑀯𑀺𑀧𑁆𑀧𑀯𑀲𑀲𑀺, 𑀫𑀼𑀳𑀼𑀢𑁆𑀢𑀫𑀧𑀺 𑀧𑀺𑀗𑁆𑀕𑀺𑀬;

𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸, 𑀕𑁄𑀢𑀫𑀸 𑀪𑀽𑀭𑀺𑀫𑁂𑀥𑀲𑀸.

𑁧𑁧𑁪𑁫. ‘‘𑀬𑁄 𑀢𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁;

𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺’’.

𑁧𑁧𑁪𑁬. ‘‘𑀦𑀸𑀳𑀁 𑀢𑀫𑁆𑀳𑀸 𑀯𑀺𑀧𑁆𑀧𑀯𑀲𑀸𑀫𑀺, 𑀫𑀼𑀳𑀼𑀢𑁆𑀢𑀫𑀧𑀺 𑀩𑁆𑀭𑀸𑀳𑁆𑀫𑀡;

𑀕𑁄𑀢𑀫𑀸 𑀪𑀽𑀭𑀺𑀧𑀜𑁆𑀜𑀸𑀡𑀸, 𑀕𑁄𑀢𑀫𑀸 𑀪𑀽𑀭𑀺𑀫𑁂𑀥𑀲𑀸.

𑁧𑁧𑁪𑁭. ‘‘𑀬𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀲𑀦𑁆𑀤𑀺𑀝𑁆𑀞𑀺𑀓𑀫𑀓𑀸𑀮𑀺𑀓𑀁;

𑀢𑀡𑁆𑀳𑀓𑁆𑀔𑀬𑀫𑀦𑀻𑀢𑀺𑀓𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺.

𑁧𑁧𑁪𑁮. ‘‘𑀧𑀲𑁆𑀲𑀸𑀫𑀺 𑀦𑀁 𑀫𑀦𑀲𑀸 𑀘𑀓𑁆𑀔𑀼𑀦𑀸𑀯, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀩𑁆𑀭𑀸𑀳𑁆𑀫𑀡 𑀅𑀧𑁆𑀧𑀫𑀢𑁆𑀢𑁄;

𑀦𑀫𑀲𑁆𑀲𑀫𑀸𑀦𑁄 𑀯𑀺𑀯𑀲𑁂𑀫𑀺 𑀭𑀢𑁆𑀢𑀺𑀁, 𑀢𑁂𑀦𑁂𑀯 𑀫𑀜𑁆𑀜𑀸𑀫𑀺 𑀅𑀯𑀺𑀧𑁆𑀧𑀯𑀸𑀲𑀁.

𑁧𑁧𑁪𑁯. ‘‘𑀲𑀤𑁆𑀥𑀸 𑀘 𑀧𑀻𑀢𑀺 𑀘 𑀫𑀦𑁄 𑀲𑀢𑀺 𑀘, 𑀦𑀸𑀧𑁂𑀦𑁆𑀢𑀺 𑀫𑁂 𑀕𑁄𑀢𑀫𑀲𑀸𑀲𑀦𑀫𑁆𑀳𑀸;

𑀬𑀁 𑀬𑀁 𑀤𑀺𑀲𑀁 𑀯𑀚𑀢𑀺 𑀪𑀽𑀭𑀺𑀧𑀜𑁆𑀜𑁄, 𑀲 𑀢𑁂𑀦 𑀢𑁂𑀦𑁂𑀯 𑀦𑀢𑁄𑀳𑀫𑀲𑁆𑀫𑀺.

𑁧𑁧𑁫𑁦. ‘‘𑀚𑀺𑀡𑁆𑀡𑀲𑁆𑀲 𑀫𑁂 𑀤𑀼𑀩𑁆𑀩𑀮𑀣𑀸𑀫𑀓𑀲𑁆𑀲, 𑀢𑁂𑀦𑁂𑀯 𑀓𑀸𑀬𑁄 𑀦 𑀧𑀮𑁂𑀢𑀺 𑀢𑀢𑁆𑀣;

𑀲𑀁𑀓𑀧𑁆𑀧𑀬𑀦𑁆𑀢𑀸𑀬 [𑀲𑀁𑀓𑀧𑁆𑀧𑀬𑀢𑁆𑀢𑀸𑀬 (𑀲𑀻.)] 𑀯𑀚𑀸𑀫𑀺 𑀦𑀺𑀘𑁆𑀘𑀁, 𑀫𑀦𑁄 𑀳𑀺 𑀫𑁂 𑀩𑁆𑀭𑀸𑀳𑁆𑀫𑀡 𑀢𑁂𑀦 𑀬𑀼𑀢𑁆𑀢𑁄.

𑁧𑁧𑁫𑁧. ‘‘𑀧𑀗𑁆𑀓𑁂 𑀲𑀬𑀸𑀦𑁄 𑀧𑀭𑀺𑀨𑀦𑁆𑀤𑀫𑀸𑀦𑁄, 𑀤𑀻𑀧𑀸 𑀤𑀻𑀧𑀁 𑀉𑀧𑀧𑁆𑀮𑀯𑀺𑀁 [𑀉𑀧𑀮𑁆𑀮𑀯𑀺𑀁 (𑀲𑁆𑀬𑀸. 𑀦𑀺𑀤𑁆𑀤𑁂𑀲)];

𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀑𑀖𑀢𑀺𑀡𑁆𑀡𑀫𑀦𑀸𑀲𑀯𑀁’’.

𑁧𑁧𑁫𑁨. ‘‘𑀬𑀣𑀸 𑀅𑀳𑀽 𑀯𑀓𑁆𑀓𑀮𑀺 𑀫𑀼𑀢𑁆𑀢𑀲𑀤𑁆𑀥𑁄, 𑀪𑀤𑁆𑀭𑀸𑀯𑀼𑀥𑁄 𑀆𑀴𑀯𑀺 𑀕𑁄𑀢𑀫𑁄 𑀘;

𑀏𑀯𑀫𑁂𑀯 𑀢𑁆𑀯𑀫𑁆𑀧𑀺 𑀧𑀫𑀼𑀜𑁆𑀘𑀲𑁆𑀲𑀼 𑀲𑀤𑁆𑀥𑀁,

𑀕𑀫𑀺𑀲𑁆𑀲𑀲𑀺 𑀢𑁆𑀯𑀁 𑀧𑀺𑀗𑁆𑀕𑀺𑀬 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀧𑀸𑀭𑀁’’ [𑀫𑀘𑁆𑀘𑀼𑀥𑁂𑀬𑁆𑀬𑀧𑀸𑀭𑀁 (𑀲𑀻.)].

𑁧𑁧𑁫𑁩. ‘‘𑀏𑀲 𑀪𑀺𑀬𑁆𑀬𑁄 𑀧𑀲𑀻𑀤𑀸𑀫𑀺, 𑀲𑀼𑀢𑁆𑀯𑀸𑀦 𑀫𑀼𑀦𑀺𑀦𑁄 𑀯𑀘𑁄;

𑀯𑀺𑀯𑀝𑁆𑀝𑀘𑁆𑀙𑀤𑁄 𑀲𑀫𑁆𑀩𑀼𑀤𑁆𑀥𑁄, 𑀅𑀔𑀺𑀮𑁄 𑀧𑀝𑀺𑀪𑀸𑀦𑀯𑀸.

𑁧𑁧𑁫𑁪. ‘‘𑀅𑀥𑀺𑀤𑁂𑀯𑁂 𑀅𑀪𑀺𑀜𑁆𑀜𑀸𑀬, 𑀲𑀩𑁆𑀩𑀁 𑀯𑁂𑀤𑀺 𑀯𑀭𑁄𑀯𑀭𑀁 [𑀧𑀭𑁄 𑀯𑀭𑀁 (𑀲𑀻. 𑀲𑁆𑀬𑀸.), 𑀧𑀭𑁄 𑀧𑀭𑀁 (𑀦𑀺𑀤𑁆𑀤𑁂𑀲)];

𑀧𑀜𑁆𑀳𑀸𑀦𑀦𑁆𑀢𑀓𑀭𑁄 𑀲𑀢𑁆𑀣𑀸, 𑀓𑀗𑁆𑀔𑀻𑀦𑀁 𑀧𑀝𑀺𑀚𑀸𑀦𑀢𑀁.

𑁧𑁧𑁫𑁫. ‘‘𑀅𑀲𑀁𑀳𑀻𑀭𑀁 𑀅𑀲𑀗𑁆𑀓𑀼𑀧𑁆𑀧𑀁, 𑀬𑀲𑁆𑀲 𑀦𑀢𑁆𑀣𑀺 𑀉𑀧𑀫𑀸 𑀓𑁆𑀯𑀘𑀺;

𑀅𑀤𑁆𑀥𑀸 𑀕𑀫𑀺𑀲𑁆𑀲𑀸𑀫𑀺 𑀦 𑀫𑁂𑀢𑁆𑀣 𑀓𑀗𑁆𑀔𑀸, 𑀏𑀯𑀁 𑀫𑀁 𑀥𑀸𑀭𑁂𑀳𑀺 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢’’𑀦𑁆𑀢𑀺.

𑀧𑀸𑀭𑀸𑀬𑀦𑀯𑀕𑁆𑀕𑁄 𑀧𑀜𑁆𑀘𑀫𑁄 𑀦𑀺𑀝𑁆𑀞𑀺𑀢𑁄.