𑁫. 𑀲𑀽𑀘𑀺𑀮𑁄𑀫𑀲𑀼𑀢𑁆𑀢𑀁

𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀕𑀬𑀸𑀬𑀁 𑀯𑀺𑀳𑀭𑀢𑀺 𑀝𑀗𑁆𑀓𑀺𑀢𑀫𑀜𑁆𑀘𑁂 𑀲𑀽𑀘𑀺𑀮𑁄𑀫𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀔𑀭𑁄 𑀘 𑀬𑀓𑁆𑀔𑁄 𑀲𑀽𑀘𑀺𑀮𑁄𑀫𑁄 𑀘 𑀬𑀓𑁆𑀔𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀢𑀺𑀓𑁆𑀓𑀫𑀦𑁆𑀢𑀺. 𑀅𑀣 𑀔𑁄 𑀔𑀭𑁄 𑀬𑀓𑁆𑀔𑁄 𑀲𑀽𑀘𑀺𑀮𑁄𑀫𑀁 𑀬𑀓𑁆𑀔𑀁 𑀏𑀢𑀤𑀯𑁄𑀘 𑁋 ‘‘𑀏𑀲𑁄 𑀲𑀫𑀡𑁄’’𑀢𑀺. ‘‘𑀦𑁂𑀲𑁄 𑀲𑀫𑀡𑁄, 𑀲𑀫𑀡𑀓𑁄 𑀏𑀲𑁄. 𑀬𑀸𑀯𑀸𑀳𑀁 𑀚𑀸𑀦𑀸𑀫𑀺 [𑀬𑀸𑀯 𑀚𑀸𑀦𑀸𑀫𑀺 (𑀲𑀻. 𑀧𑀻.)] 𑀬𑀤𑀺 𑀯𑀸 𑀲𑁄 𑀲𑀫𑀡𑁄 [𑀬𑀤𑀺 𑀯𑀸 𑀲𑀫𑀡𑁄 (𑀲𑁆𑀬𑀸.)], 𑀬𑀤𑀺 𑀯𑀸 𑀲𑁄 𑀲𑀫𑀡𑀓𑁄’’𑀢𑀺 [𑀬𑀤𑀺 𑀯𑀸 𑀲𑀫𑀡𑀓𑁄𑀢𑀺 (𑀲𑀻. 𑀲𑁆𑀬𑀸. 𑀧𑀻.)].

𑀅𑀣 𑀔𑁄 𑀲𑀽𑀘𑀺𑀮𑁄𑀫𑁄 𑀬𑀓𑁆𑀔𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀓𑀸𑀬𑀁 𑀉𑀧𑀦𑀸𑀫𑁂𑀲𑀺. 𑀅𑀣 𑀔𑁄 𑀪𑀕𑀯𑀸 𑀓𑀸𑀬𑀁 𑀅𑀧𑀦𑀸𑀫𑁂𑀲𑀺. 𑀅𑀣 𑀔𑁄 𑀲𑀽𑀘𑀺𑀮𑁄𑀫𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀪𑀸𑀬𑀲𑀺 𑀫𑀁, 𑀲𑀫𑀡𑀸’’𑀢𑀺? ‘‘𑀦 𑀔𑁆𑀯𑀸𑀳𑀁 𑀢𑀁, 𑀆𑀯𑀼𑀲𑁄, 𑀪𑀸𑀬𑀸𑀫𑀺; 𑀅𑀧𑀺 𑀘 𑀢𑁂 𑀲𑀧𑁆𑀨𑀲𑁆𑀲𑁄 𑀧𑀸𑀧𑀓𑁄’’𑀢𑀺.

‘‘𑀧𑀜𑁆𑀳𑀁 𑀢𑀁, 𑀲𑀫𑀡, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀲𑀘𑁂 𑀫𑁂 𑀦 𑀩𑁆𑀬𑀸𑀓𑀭𑀺𑀲𑁆𑀲𑀲𑀺, 𑀘𑀺𑀢𑁆𑀢𑀁 𑀯𑀸 𑀢𑁂 𑀔𑀺𑀧𑀺𑀲𑁆𑀲𑀸𑀫𑀺, 𑀳𑀤𑀬𑀁 𑀯𑀸 𑀢𑁂 𑀨𑀸𑀮𑁂𑀲𑁆𑀲𑀸𑀫𑀺, 𑀧𑀸𑀤𑁂𑀲𑀼 𑀯𑀸 𑀕𑀳𑁂𑀢𑁆𑀯𑀸 𑀧𑀸𑀭𑀕𑀗𑁆𑀕𑀸𑀬 𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺.

‘‘𑀦 𑀔𑁆𑀯𑀸𑀳𑀁 𑀢𑀁, 𑀆𑀯𑀼𑀲𑁄, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀬𑁄 𑀫𑁂 𑀘𑀺𑀢𑁆𑀢𑀁 𑀯𑀸 𑀔𑀺𑀧𑁂𑀬𑁆𑀬 𑀳𑀤𑀬𑀁 𑀯𑀸 𑀨𑀸𑀮𑁂𑀬𑁆𑀬 𑀧𑀸𑀤𑁂𑀲𑀼 𑀯𑀸 𑀕𑀳𑁂𑀢𑁆𑀯𑀸 𑀧𑀸𑀭𑀕𑀗𑁆𑀕𑀸𑀬 𑀔𑀺𑀧𑁂𑀬𑁆𑀬. 𑀅𑀧𑀺 𑀘 𑀢𑁆𑀯𑀁, 𑀆𑀯𑀼𑀲𑁄, 𑀧𑀼𑀘𑁆𑀙 𑀬𑀤𑀸𑀓𑀗𑁆𑀔𑀲𑀻’’𑀢𑀺. 𑀅𑀣 𑀔𑁄 𑀲𑀽𑀘𑀺𑀮𑁄𑀫𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

𑁨𑁭𑁩. ‘‘𑀭𑀸𑀕𑁄 𑀘 𑀤𑁄𑀲𑁄 𑀘 𑀓𑀼𑀢𑁄𑀦𑀺𑀤𑀸𑀦𑀸, 𑀅𑀭𑀢𑀻 𑀭𑀢𑀻 𑀮𑁄𑀫𑀳𑀁𑀲𑁄 𑀓𑀼𑀢𑁄𑀚𑀸;

𑀓𑀼𑀢𑁄 𑀲𑀫𑀼𑀝𑁆𑀞𑀸𑀬 𑀫𑀦𑁄𑀯𑀺𑀢𑀓𑁆𑀓𑀸, 𑀓𑀼𑀫𑀸𑀭𑀓𑀸 𑀥𑀗𑁆𑀓𑀫𑀺𑀯𑁄𑀲𑁆𑀲𑀚𑀦𑁆𑀢𑀺’’.

𑁨𑁭𑁪. ‘‘𑀭𑀸𑀕𑁄 𑀘 𑀤𑁄𑀲𑁄 𑀘 𑀇𑀢𑁄𑀦𑀺𑀤𑀸𑀦𑀸, 𑀅𑀭𑀢𑀻 𑀭𑀢𑀻 𑀮𑁄𑀫𑀳𑀁𑀲𑁄 𑀇𑀢𑁄𑀚𑀸;

𑀇𑀢𑁄 𑀲𑀫𑀼𑀝𑁆𑀞𑀸𑀬 𑀫𑀦𑁄𑀯𑀺𑀢𑀓𑁆𑀓𑀸, 𑀓𑀼𑀫𑀸𑀭𑀓𑀸 𑀥𑀗𑁆𑀓𑀫𑀺𑀯𑁄𑀲𑁆𑀲𑀚𑀦𑁆𑀢𑀺.

𑁨𑁭𑁪. ‘‘𑀲𑁆𑀦𑁂𑀳𑀚𑀸 𑀅𑀢𑁆𑀢𑀲𑀫𑁆𑀪𑀽𑀢𑀸, 𑀦𑀺𑀕𑁆𑀭𑁄𑀥𑀲𑁆𑀲𑁂𑀯 𑀔𑀦𑁆𑀥𑀚𑀸;

𑀧𑀼𑀣𑀽 𑀯𑀺𑀲𑀢𑁆𑀢𑀸 𑀓𑀸𑀫𑁂𑀲𑀼, 𑀫𑀸𑀮𑀼𑀯𑀸𑀯 𑀯𑀺𑀢𑀢𑀸𑀯𑀦𑁂.

𑁨𑁭𑁫. ‘‘𑀬𑁂 𑀦𑀁 𑀧𑀚𑀸𑀦𑀦𑁆𑀢𑀺 𑀬𑀢𑁄𑀦𑀺𑀤𑀸𑀦𑀁, 𑀢𑁂 𑀦𑀁 𑀯𑀺𑀦𑁄𑀤𑁂𑀦𑁆𑀢𑀺 𑀲𑀼𑀡𑁄𑀳𑀺 𑀬𑀓𑁆𑀔;

𑀢𑁂 𑀤𑀼𑀢𑁆𑀢𑀭𑀁 𑀑𑀖𑀫𑀺𑀫𑀁 𑀢𑀭𑀦𑁆𑀢𑀺, 𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀅𑀧𑀼𑀦𑀩𑁆𑀪𑀯𑀸𑀬𑀸’’𑀢𑀺.

𑀲𑀽𑀘𑀺𑀮𑁄𑀫𑀲𑀼𑀢𑁆𑀢𑀁 𑀧𑀜𑁆𑀘𑀫𑀁 𑀦𑀺𑀝𑁆𑀞𑀺𑀢𑀁.