𑁨. 𑀆𑀫𑀕𑀦𑁆𑀥𑀲𑀼𑀢𑁆𑀢𑀁

𑁨𑁪𑁨. ‘‘𑀲𑀸𑀫𑀸𑀓𑀘𑀺𑀗𑁆𑀕𑀽𑀮𑀓𑀘𑀻𑀦𑀓𑀸𑀦𑀺 𑀘, 𑀧𑀢𑁆𑀢𑀧𑁆𑀨𑀮𑀁 𑀫𑀽𑀮𑀨𑀮𑀁 𑀕𑀯𑀺𑀧𑁆𑀨𑀮𑀁;

𑀥𑀫𑁆𑀫𑁂𑀦 𑀮𑀤𑁆𑀥𑀁 𑀲𑀢𑀫𑀲𑁆𑀦𑀫𑀸𑀦𑀸 [𑀲𑀢𑀫𑀲𑀫𑀸𑀦𑀸 (𑀲𑀻. 𑀧𑀻.), 𑀲𑀢𑀫𑀲𑁆𑀲𑀫𑀸𑀦𑀸 (𑀲𑁆𑀬𑀸. 𑀓𑀁.)], 𑀦 𑀓𑀸𑀫𑀓𑀸𑀫𑀸 𑀅𑀮𑀺𑀓𑀁 𑀪𑀡𑀦𑁆𑀢𑀺.

𑁨𑁪𑁩. ‘‘𑀬𑀤𑀲𑁆𑀦𑀫𑀸𑀦𑁄 𑀲𑀼𑀓𑀢𑀁 𑀲𑀼𑀦𑀺𑀝𑁆𑀞𑀺𑀢𑀁, 𑀧𑀭𑁂𑀳𑀺 𑀤𑀺𑀦𑁆𑀦𑀁 𑀧𑀬𑀢𑀁 𑀧𑀡𑀻𑀢𑀁;

𑀲𑀸𑀮𑀻𑀦𑀫𑀦𑁆𑀦𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄, 𑀲𑁄 𑀪𑀼𑀜𑁆𑀚𑀲𑀻 𑀓𑀲𑁆𑀲𑀧 𑀆𑀫𑀕𑀦𑁆𑀥𑀁.

𑁨𑁪𑁪. ‘‘𑀦 𑀆𑀫𑀕𑀦𑁆𑀥𑁄 𑀫𑀫 𑀓𑀧𑁆𑀧𑀢𑀻𑀢𑀺, 𑀇𑀘𑁆𑀘𑁂𑀯 𑀢𑁆𑀯𑀁 𑀪𑀸𑀲𑀲𑀺 𑀩𑁆𑀭𑀳𑁆𑀫𑀩𑀦𑁆𑀥𑀼;

𑀲𑀸𑀮𑀻𑀦𑀫𑀦𑁆𑀦𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄, 𑀲𑀓𑀼𑀦𑁆𑀢𑀫𑀁𑀲𑁂𑀳𑀺 𑀲𑀼𑀲𑀗𑁆𑀔𑀢𑁂𑀳𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀓𑀲𑁆𑀲𑀧 𑀏𑀢𑀫𑀢𑁆𑀣𑀁, 𑀓𑀣𑀁 𑀧𑀓𑀸𑀭𑁄 𑀢𑀯 𑀆𑀫𑀕𑀦𑁆𑀥𑁄’’.

𑁨𑁪𑁫. ‘‘𑀧𑀸𑀡𑀸𑀢𑀺𑀧𑀸𑀢𑁄 𑀯𑀥𑀙𑁂𑀤𑀩𑀦𑁆𑀥𑀦𑀁, 𑀣𑁂𑀬𑁆𑀬𑀁 𑀫𑀼𑀲𑀸𑀯𑀸𑀤𑁄 𑀦𑀺𑀓𑀢𑀺𑀯𑀜𑁆𑀘𑀦𑀸𑀦𑀺 𑀘;

𑀅𑀚𑁆𑀛𑁂𑀦𑀓𑀼𑀢𑁆𑀢𑀁 [𑀅𑀚𑁆𑀛𑁂𑀦 𑀓𑀼𑀚𑁆𑀚𑀁 (𑀲𑀻. 𑀧𑀻.)] 𑀧𑀭𑀤𑀸𑀭𑀲𑁂𑀯𑀦𑀸, 𑀏𑀲𑀸𑀫𑀕𑀦𑁆𑀥𑁄 𑀦 𑀳𑀺 𑀫𑀁𑀲𑀪𑁄𑀚𑀦𑀁.

𑁨𑁪𑁬. ‘‘𑀬𑁂 𑀇𑀥 𑀓𑀸𑀫𑁂𑀲𑀼 𑀅𑀲𑀜𑁆𑀜𑀢𑀸 𑀚𑀦𑀸, 𑀭𑀲𑁂𑀲𑀼 𑀕𑀺𑀤𑁆𑀥𑀸 𑀅𑀲𑀼𑀘𑀺𑀪𑀸𑀯𑀫𑀲𑁆𑀲𑀺𑀢𑀸 [𑀅𑀲𑀼𑀘𑀻𑀓𑀫𑀺𑀲𑁆𑀲𑀺𑀢𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)];

𑀦𑀢𑁆𑀣𑀺𑀓𑀤𑀺𑀝𑁆𑀞𑀻 𑀯𑀺𑀲𑀫𑀸 𑀤𑀼𑀭𑀦𑁆𑀦𑀬𑀸, 𑀏𑀲𑀸𑀫𑀕𑀦𑁆𑀥𑁄 𑀦 𑀳𑀺 𑀫𑀁𑀲𑀪𑁄𑀚𑀦𑀁.

𑁨𑁪𑁭. ‘‘𑀬𑁂 𑀮𑀽𑀔𑀲𑀸 𑀤𑀸𑀭𑀼𑀡𑀸 𑀧𑀺𑀝𑁆𑀞𑀺𑀫𑀁𑀲𑀺𑀓𑀸 [𑀬𑁂 𑀮𑀽𑀔𑀭𑀲𑀸 𑀤𑀸𑀭𑀼𑀡𑀸 𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑀸 (𑀓.)], 𑀫𑀺𑀢𑁆𑀢𑀤𑁆𑀤𑀼𑀦𑁄 𑀦𑀺𑀓𑁆𑀓𑀭𑀼𑀡𑀸𑀢𑀺𑀫𑀸𑀦𑀺𑀦𑁄;

𑀅𑀤𑀸𑀦𑀲𑀻𑀮𑀸 𑀦 𑀘 𑀤𑁂𑀦𑁆𑀢𑀺 𑀓𑀲𑁆𑀲𑀘𑀺, 𑀏𑀲𑀸𑀫𑀕𑀦𑁆𑀥𑁄 𑀦 𑀳𑀺 𑀫𑀁𑀲𑀪𑁄𑀚𑀦𑀁.

𑁨𑁪𑁮. ‘‘𑀓𑁄𑀥𑁄 𑀫𑀤𑁄 𑀣𑀫𑁆𑀪𑁄 𑀧𑀘𑁆𑀘𑀼𑀧𑀝𑁆𑀞𑀸𑀧𑀦𑀸 [𑀧𑀘𑁆𑀘𑀼𑀝𑁆𑀞𑀸𑀧𑀦𑀸 𑀘 (𑀲𑀻. 𑀲𑁆𑀬𑀸.), 𑀧𑀘𑁆𑀘𑀼𑀝𑁆𑀞𑀸𑀧𑀦𑀸 (𑀧𑀻.)], 𑀫𑀸𑀬𑀸 𑀉𑀲𑀽𑀬𑀸 𑀪𑀲𑁆𑀲𑀲𑀫𑀼𑀲𑁆𑀲𑀬𑁄 𑀘;

𑀫𑀸𑀦𑀸𑀢𑀺𑀫𑀸𑀦𑁄 𑀘 𑀅𑀲𑀩𑁆𑀪𑀺 𑀲𑀦𑁆𑀣𑀯𑁄, 𑀏𑀲𑀸𑀫𑀕𑀦𑁆𑀥𑁄 𑀦 𑀳𑀺 𑀫𑀁𑀲𑀪𑁄𑀚𑀦𑀁.

𑁨𑁪𑁯. ‘‘𑀬𑁂 𑀧𑀸𑀧𑀲𑀻𑀮𑀸 𑀇𑀡𑀖𑀸𑀢𑀲𑀽𑀘𑀓𑀸, 𑀯𑁄𑀳𑀸𑀭𑀓𑀽𑀝𑀸 𑀇𑀥 𑀧𑀸𑀝𑀺𑀭𑀽𑀧𑀺𑀓𑀸 [𑀧𑀸𑀢𑀺𑀭𑀽𑀧𑀺𑀓𑀸 (?)];

𑀦𑀭𑀸𑀥𑀫𑀸 𑀬𑁂𑀥 𑀓𑀭𑁄𑀦𑁆𑀢𑀺 𑀓𑀺𑀩𑁆𑀩𑀺𑀲𑀁, 𑀏𑀲𑀸𑀫𑀕𑀦𑁆𑀥𑁄 𑀦 𑀳𑀺 𑀫𑀁𑀲𑀪𑁄𑀚𑀦𑀁.

𑁨𑁫𑁦. ‘‘𑀬𑁂 𑀇𑀥 𑀧𑀸𑀡𑁂𑀲𑀼 𑀅𑀲𑀜𑁆𑀜𑀢𑀸 𑀚𑀦𑀸, 𑀧𑀭𑁂𑀲𑀫𑀸𑀤𑀸𑀬 𑀯𑀺𑀳𑁂𑀲𑀫𑀼𑀬𑁆𑀬𑀼𑀢𑀸;

𑀤𑀼𑀲𑁆𑀲𑀻𑀮𑀮𑀼𑀤𑁆𑀤𑀸 𑀨𑀭𑀼𑀲𑀸 𑀅𑀦𑀸𑀤𑀭𑀸, 𑀏𑀲𑀸𑀫𑀕𑀦𑁆𑀥𑁄 𑀦 𑀳𑀺 𑀫𑀁𑀲𑀪𑁄𑀚𑀦𑀁.

𑁨𑁫𑁧. ‘‘𑀏𑀢𑁂𑀲𑀼 𑀕𑀺𑀤𑁆𑀥𑀸 𑀯𑀺𑀭𑀼𑀤𑁆𑀥𑀸𑀢𑀺𑀧𑀸𑀢𑀺𑀦𑁄, 𑀦𑀺𑀘𑁆𑀘𑀼𑀬𑁆𑀬𑀼𑀢𑀸 𑀧𑁂𑀘𑁆𑀘 𑀢𑀫𑀁 𑀯𑀚𑀦𑁆𑀢𑀺 𑀬𑁂;

𑀧𑀢𑀦𑁆𑀢𑀺 𑀲𑀢𑁆𑀢𑀸 𑀦𑀺𑀭𑀬𑀁 𑀅𑀯𑀁𑀲𑀺𑀭𑀸, 𑀏𑀲𑀸𑀫𑀕𑀦𑁆𑀥𑁄 𑀦 𑀳𑀺 𑀫𑀁𑀲𑀪𑁄𑀚𑀦𑀁.

𑁨𑁫𑁨. ‘‘𑀦 𑀫𑀘𑁆𑀙𑀫𑀁𑀲𑀸𑀦𑀫𑀦𑀸𑀲𑀓𑀢𑁆𑀢𑀁 [𑀦 𑀫𑀘𑁆𑀙𑀫𑀁𑀲𑀁 𑀦 𑀅𑀦𑀸𑀲𑀓𑀢𑁆𑀢𑀁 (𑀲𑀻. 𑀅𑀝𑁆𑀞 𑀫𑀽𑀮𑀧𑀸𑀞𑁄), 𑀦 𑀫𑀁𑀘𑁆𑀙𑀫𑀁𑀲𑀸𑀦𑀸𑀦𑀸𑀲𑀓𑀢𑁆𑀢𑀁 (𑀲𑁆𑀬𑀸. 𑀓.)], 𑀦 𑀦𑀕𑁆𑀕𑀺𑀬𑀁 𑀦 𑀫𑀼𑀡𑁆𑀟𑀺𑀬𑀁 𑀚𑀝𑀸𑀚𑀮𑁆𑀮𑀁;

𑀔𑀭𑀸𑀚𑀺𑀦𑀸𑀦𑀺 𑀦𑀸𑀕𑁆𑀕𑀺𑀳𑀼𑀢𑁆𑀢𑀲𑁆𑀲𑀼𑀧𑀲𑁂𑀯𑀦𑀸, 𑀬𑁂 𑀯𑀸𑀧𑀺 𑀮𑁄𑀓𑁂 𑀅𑀫𑀭𑀸 𑀩𑀳𑀽 𑀢𑀧𑀸;

𑀫𑀦𑁆𑀢𑀸𑀳𑀼𑀢𑀻 𑀬𑀜𑁆𑀜𑀫𑀼𑀢𑀽𑀧𑀲𑁂𑀯𑀦𑀸, 𑀲𑁄𑀥𑁂𑀦𑁆𑀢𑀺 𑀫𑀘𑁆𑀘𑀁 𑀅𑀯𑀺𑀢𑀺𑀡𑁆𑀡𑀓𑀗𑁆𑀔𑀁.

𑁨𑁫𑁩. ‘‘𑀬𑁄 𑀢𑁂𑀲𑀼 [𑀲𑁄𑀢𑁂𑀲𑀼 (𑀲𑀻. 𑀧𑀻.)] 𑀕𑀼𑀢𑁆𑀢𑁄 𑀯𑀺𑀤𑀺𑀢𑀺𑀦𑁆𑀤𑁆𑀭𑀺𑀬𑁄 𑀘𑀭𑁂, 𑀥𑀫𑁆𑀫𑁂 𑀞𑀺𑀢𑁄 𑀅𑀚𑁆𑀚𑀯𑀫𑀤𑁆𑀤𑀯𑁂 𑀭𑀢𑁄;

𑀲𑀗𑁆𑀕𑀸𑀢𑀺𑀕𑁄 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀻𑀦𑁄, 𑀦 𑀮𑀺𑀧𑁆𑀧𑀢𑀺 [𑀦 𑀮𑀺𑀫𑁆𑀧𑀢𑀺 (𑀲𑁆𑀬𑀸. 𑀓𑀁 𑀓.)] 𑀤𑀺𑀝𑁆𑀞𑀲𑀼𑀢𑁂𑀲𑀼 𑀥𑀻𑀭𑁄’’.

𑁨𑁫𑁪. 𑀇𑀘𑁆𑀘𑁂𑀢𑀫𑀢𑁆𑀣𑀁 𑀪𑀕𑀯𑀸 𑀧𑀼𑀦𑀧𑁆𑀧𑀼𑀦𑀁, 𑀅𑀓𑁆𑀔𑀸𑀲𑀺 𑀦𑀁 [𑀢𑀁 (𑀲𑀻. 𑀧𑀻.)] 𑀯𑁂𑀤𑀬𑀺 𑀫𑀦𑁆𑀢𑀧𑀸𑀭𑀕𑀽;

𑀘𑀺𑀢𑁆𑀭𑀸𑀳𑀺 𑀕𑀸𑀣𑀸𑀳𑀺 𑀫𑀼𑀦𑀻 𑀧𑀓𑀸𑀲𑀬𑀺, 𑀦𑀺𑀭𑀸𑀫𑀕𑀦𑁆𑀥𑁄 𑀅𑀲𑀺𑀢𑁄 𑀤𑀼𑀭𑀦𑁆𑀦𑀬𑁄.

𑁨𑁫𑁫. 𑀲𑀼𑀢𑁆𑀯𑀸𑀦 𑀩𑀼𑀤𑁆𑀥𑀲𑁆𑀲 𑀲𑀼𑀪𑀸𑀲𑀺𑀢𑀁 𑀧𑀤𑀁, 𑀦𑀺𑀭𑀸𑀫𑀕𑀦𑁆𑀥𑀁 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀦𑀽𑀤𑀦𑀁;

𑀦𑀻𑀘𑀫𑀦𑁄 𑀯𑀦𑁆𑀤𑀺 𑀢𑀣𑀸𑀕𑀢𑀲𑁆𑀲, 𑀢𑀢𑁆𑀣𑁂𑀯 𑀧𑀩𑁆𑀩𑀚𑁆𑀚𑀫𑀭𑁄𑀘𑀬𑀺𑀢𑁆𑀣𑀸𑀢𑀺.

𑀆𑀫𑀕𑀦𑁆𑀥𑀲𑀼𑀢𑁆𑀢𑀁 𑀤𑀼𑀢𑀺𑀬𑀁 𑀦𑀺𑀝𑁆𑀞𑀺𑀢𑀁.