𑁯. 𑀳𑁂𑀫𑀯𑀢𑀲𑀼𑀢𑁆𑀢𑀁

𑁧𑁫𑁩. ‘‘𑀅𑀚𑁆𑀚 𑀧𑀦𑁆𑀦𑀭𑀲𑁄 𑀉𑀧𑁄𑀲𑀣𑁄, (𑀇𑀢𑀺 𑀲𑀸𑀢𑀸𑀕𑀺𑀭𑁄 𑀬𑀓𑁆𑀔𑁄)

𑀤𑀺𑀩𑁆𑀩𑀸 [𑀤𑀺𑀩𑁆𑀬𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀭𑀢𑁆𑀢𑀺 𑀉𑀧𑀝𑁆𑀞𑀺𑀢𑀸;

𑀅𑀦𑁄𑀫𑀦𑀸𑀫𑀁 𑀲𑀢𑁆𑀣𑀸𑀭𑀁, 𑀳𑀦𑁆𑀤 𑀧𑀲𑁆𑀲𑀸𑀫 𑀕𑁄𑀢𑀫𑀁’’.

𑁧𑁫𑁪. ‘‘𑀓𑀘𑁆𑀘𑀺 𑀫𑀦𑁄 𑀲𑀼𑀧𑀡𑀺𑀳𑀺𑀢𑁄, (𑀇𑀢𑀺 𑀳𑁂𑀫𑀯𑀢𑁄 𑀬𑀓𑁆𑀔𑁄)

𑀲𑀩𑁆𑀩𑀪𑀽𑀢𑁂𑀲𑀼 𑀢𑀸𑀤𑀺𑀦𑁄;

𑀓𑀘𑁆𑀘𑀺 𑀇𑀝𑁆𑀞𑁂 𑀅𑀦𑀺𑀝𑁆𑀞𑁂 𑀘, 𑀲𑀗𑁆𑀓𑀧𑁆𑀧𑀲𑁆𑀲 𑀯𑀲𑀻𑀓𑀢𑀸’’.

𑁧𑁫𑁫. ‘‘𑀫𑀦𑁄 𑀘𑀲𑁆𑀲 𑀲𑀼𑀧𑀡𑀺𑀳𑀺𑀢𑁄, (𑀇𑀢𑀺 𑀲𑀸𑀢𑀸𑀕𑀺𑀭𑁄 𑀬𑀓𑁆𑀔𑁄)

𑀲𑀩𑁆𑀩𑀪𑀽𑀢𑁂𑀲𑀼 𑀢𑀸𑀤𑀺𑀦𑁄;

𑀅𑀣𑁄 𑀇𑀝𑁆𑀞𑁂 𑀅𑀦𑀺𑀝𑁆𑀞𑁂 𑀘, 𑀲𑀗𑁆𑀓𑀧𑁆𑀧𑀲𑁆𑀲 𑀯𑀲𑀻𑀓𑀢𑀸’’.

𑁧𑁫𑁬. ‘‘𑀓𑀘𑁆𑀘𑀺 𑀅𑀤𑀺𑀦𑁆𑀦𑀁 𑀦𑀸𑀤𑀺𑀬𑀢𑀺, (𑀇𑀢𑀺 𑀳𑁂𑀫𑀯𑀢𑁄 𑀬𑀓𑁆𑀔𑁄)

𑀓𑀘𑁆𑀘𑀺 𑀧𑀸𑀡𑁂𑀲𑀼 𑀲𑀜𑁆𑀜𑀢𑁄;

𑀓𑀘𑁆𑀘𑀺 𑀆𑀭𑀸 𑀧𑀫𑀸𑀤𑀫𑁆𑀳𑀸, 𑀓𑀘𑁆𑀘𑀺 𑀛𑀸𑀦𑀁 𑀦 𑀭𑀺𑀜𑁆𑀘𑀢𑀺’’.

𑁧𑁫𑁭. ‘‘𑀦 𑀲𑁄 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, (𑀇𑀢𑀺 𑀲𑀸𑀢𑀸𑀕𑀺𑀭𑁄 𑀬𑀓𑁆𑀔𑁄)

𑀅𑀣𑁄 𑀧𑀸𑀡𑁂𑀲𑀼 𑀲𑀜𑁆𑀜𑀢𑁄;

𑀅𑀣𑁄 𑀆𑀭𑀸 𑀧𑀫𑀸𑀤𑀫𑁆𑀳𑀸, 𑀩𑀼𑀤𑁆𑀥𑁄 𑀛𑀸𑀦𑀁 𑀦 𑀭𑀺𑀜𑁆𑀘𑀢𑀺’’.

𑁧𑁫𑁮. ‘‘𑀓𑀘𑁆𑀘𑀺 𑀫𑀼𑀲𑀸 𑀦 𑀪𑀡𑀢𑀺, (𑀇𑀢𑀺 𑀳𑁂𑀫𑀯𑀢𑁄 𑀬𑀓𑁆𑀔𑁄)

𑀓𑀘𑁆𑀘𑀺 𑀦 𑀔𑀻𑀡𑀩𑁆𑀬𑀧𑁆𑀧𑀣𑁄;

𑀓𑀘𑁆𑀘𑀺 𑀯𑁂𑀪𑀽𑀢𑀺𑀬𑀁 𑀦𑀸𑀳, 𑀓𑀘𑁆𑀘𑀺 𑀲𑀫𑁆𑀨𑀁 𑀦 𑀪𑀸𑀲𑀢𑀺’’.

𑁧𑁫𑁯. ‘‘𑀫𑀼𑀲𑀸 𑀘 𑀲𑁄 𑀦 𑀪𑀡𑀢𑀺, (𑀇𑀢𑀺 𑀲𑀸𑀢𑀸𑀕𑀺𑀭𑁄 𑀬𑀓𑁆𑀔𑁄)

𑀅𑀣𑁄 𑀦 𑀔𑀻𑀡𑀩𑁆𑀬𑀧𑁆𑀧𑀣𑁄;

𑀅𑀣𑁄 𑀯𑁂𑀪𑀽𑀢𑀺𑀬𑀁 𑀦𑀸𑀳, 𑀫𑀦𑁆𑀢𑀸 𑀅𑀢𑁆𑀣𑀁 𑀘 [𑀅𑀢𑁆𑀣𑀁 𑀲𑁄 (𑀲𑀻. 𑀧𑀻. 𑀓.)] 𑀪𑀸𑀲𑀢𑀺’’.

𑁧𑁬𑁦. ‘‘𑀓𑀘𑁆𑀘𑀺 𑀦 𑀭𑀚𑁆𑀚𑀢𑀺 𑀓𑀸𑀫𑁂𑀲𑀼, (𑀇𑀢𑀺 𑀳𑁂𑀫𑀯𑀢𑁄 𑀬𑀓𑁆𑀔𑁄)

𑀓𑀘𑁆𑀘𑀺 𑀘𑀺𑀢𑁆𑀢𑀁 𑀅𑀦𑀸𑀯𑀺𑀮𑀁;

𑀓𑀘𑁆𑀘𑀺 𑀫𑁄𑀳𑀁 𑀅𑀢𑀺𑀓𑁆𑀓𑀦𑁆𑀢𑁄, 𑀓𑀘𑁆𑀘𑀺 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸’’.

𑁧𑁬𑁧. ‘‘𑀦 𑀲𑁄 𑀭𑀚𑁆𑀚𑀢𑀺 𑀓𑀸𑀫𑁂𑀲𑀼, (𑀇𑀢𑀺 𑀲𑀸𑀢𑀸𑀕𑀺𑀭𑁄 𑀬𑀓𑁆𑀔𑁄)

𑀅𑀣𑁄 𑀘𑀺𑀢𑁆𑀢𑀁 𑀅𑀦𑀸𑀯𑀺𑀮𑀁;

𑀲𑀩𑁆𑀩𑀫𑁄𑀳𑀁 𑀅𑀢𑀺𑀓𑁆𑀓𑀦𑁆𑀢𑁄, 𑀩𑀼𑀤𑁆𑀥𑁄 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸’’.

𑁧𑁬𑁨. ‘‘𑀓𑀘𑁆𑀘𑀺 𑀯𑀺𑀚𑁆𑀚𑀸𑀬 𑀲𑀫𑁆𑀧𑀦𑁆𑀦𑁄, (𑀇𑀢𑀺 𑀳𑁂𑀫𑀯𑀢𑁄 𑀬𑀓𑁆𑀔𑁄 )

𑀓𑀘𑁆𑀘𑀺 𑀲𑀁𑀲𑀼𑀤𑁆𑀥𑀘𑀸𑀭𑀡𑁄;

𑀓𑀘𑁆𑀘𑀺𑀲𑁆𑀲 𑀆𑀲𑀯𑀸 𑀔𑀻𑀡𑀸, 𑀓𑀘𑁆𑀘𑀺 𑀦𑀢𑁆𑀣𑀺 𑀧𑀼𑀦𑀩𑁆𑀪𑀯𑁄’’.

𑁧𑁬𑁩. ‘‘𑀯𑀺𑀚𑁆𑀚𑀸𑀬 𑀘𑁂𑀯 𑀲𑀫𑁆𑀧𑀦𑁆𑀦𑁄, (𑀇𑀢𑀺 𑀲𑀸𑀢𑀸𑀕𑀺𑀭𑁄 𑀬𑀓𑁆𑀔𑁄)

𑀅𑀣𑁄 𑀲𑀁𑀲𑀼𑀤𑁆𑀥𑀘𑀸𑀭𑀡𑁄;

𑀲𑀩𑁆𑀩𑀲𑁆𑀲 𑀆𑀲𑀯𑀸 𑀔𑀻𑀡𑀸, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄’’.

𑁧𑁬𑁪. ‘‘𑀲𑀫𑁆𑀧𑀦𑁆𑀦𑀁 𑀫𑀼𑀦𑀺𑀦𑁄 𑀘𑀺𑀢𑁆𑀢𑀁, 𑀓𑀫𑁆𑀫𑀼𑀦𑀸 𑀩𑁆𑀬𑀧𑁆𑀧𑀣𑁂𑀦 𑀘;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀁, 𑀥𑀫𑁆𑀫𑀢𑁄 𑀦𑀁 𑀧𑀲𑀁𑀲𑀢𑀺’’.

𑁧𑁬𑁫. ‘‘𑀲𑀫𑁆𑀧𑀦𑁆𑀦𑀁 𑀫𑀼𑀦𑀺𑀦𑁄 𑀘𑀺𑀢𑁆𑀢𑀁, 𑀓𑀫𑁆𑀫𑀼𑀦𑀸 𑀩𑁆𑀬𑀧𑁆𑀧𑀣𑁂𑀦 𑀘;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀁, 𑀥𑀫𑁆𑀫𑀢𑁄 𑀅𑀦𑀼𑀫𑁄𑀤𑀲𑀺’’.

𑁧𑁬𑁬. ‘‘𑀲𑀫𑁆𑀧𑀦𑁆𑀦𑀁 𑀫𑀼𑀦𑀺𑀦𑁄 𑀘𑀺𑀢𑁆𑀢𑀁, 𑀓𑀫𑁆𑀫𑀼𑀦𑀸 𑀩𑁆𑀬𑀧𑁆𑀧𑀣𑁂𑀦 𑀘;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀁, 𑀳𑀦𑁆𑀤 𑀧𑀲𑁆𑀲𑀸𑀫 𑀕𑁄𑀢𑀫𑀁.

𑁧𑁬𑁭. ‘‘𑀏𑀡𑀺𑀚𑀗𑁆𑀖𑀁 𑀓𑀺𑀲𑀁 𑀯𑀻𑀭𑀁 [𑀥𑀻𑀭𑀁 (𑀲𑁆𑀬𑀸.)], 𑀅𑀧𑁆𑀧𑀸𑀳𑀸𑀭𑀁 𑀅𑀮𑁄𑀮𑀼𑀧𑀁;

𑀫𑀼𑀦𑀺𑀁 𑀯𑀦𑀲𑁆𑀫𑀺𑀁 𑀛𑀸𑀬𑀦𑁆𑀢𑀁, 𑀏𑀳𑀺 𑀧𑀲𑁆𑀲𑀸𑀫 𑀕𑁄𑀢𑀫𑀁.

𑁧𑁬𑁮. ‘‘𑀲𑀻𑀳𑀁𑀯𑁂𑀓𑀘𑀭𑀁 𑀦𑀸𑀕𑀁, 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑀁;

𑀉𑀧𑀲𑀗𑁆𑀓𑀫𑁆𑀫 𑀧𑀼𑀘𑁆𑀙𑀸𑀫, 𑀫𑀘𑁆𑀘𑀼𑀧𑀸𑀲𑀧𑁆𑀧𑀫𑁄𑀘𑀦𑀁.

𑁧𑁬𑁯. ‘‘𑀅𑀓𑁆𑀔𑀸𑀢𑀸𑀭𑀁 𑀧𑀯𑀢𑁆𑀢𑀸𑀭𑀁, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀼𑀁;

𑀩𑀼𑀤𑁆𑀥𑀁 𑀯𑁂𑀭𑀪𑀬𑀸𑀢𑀻𑀢𑀁, 𑀫𑀬𑀁 𑀧𑀼𑀘𑁆𑀙𑀸𑀫 𑀕𑁄𑀢𑀫𑀁’’.

𑁧𑁭𑁦. ‘‘𑀓𑀺𑀲𑁆𑀫𑀺𑀁 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄, (𑀇𑀢𑀺 𑀳𑁂𑀫𑀯𑀢𑁄 𑀬𑀓𑁆𑀔𑁄)

𑀓𑀺𑀲𑁆𑀫𑀺𑀁 𑀓𑀼𑀩𑁆𑀩𑀢𑀺 𑀲𑀦𑁆𑀣𑀯𑀁 [𑀲𑀦𑁆𑀥𑀯𑀁 (𑀓.)];

𑀓𑀺𑀲𑁆𑀲 𑀮𑁄𑀓𑁄 𑀉𑀧𑀸𑀤𑀸𑀬, 𑀓𑀺𑀲𑁆𑀫𑀺𑀁 𑀮𑁄𑀓𑁄 𑀯𑀺𑀳𑀜𑁆𑀜𑀢𑀺’’.

𑁧𑁭𑁧. ‘‘𑀙𑀲𑀼 [𑀙𑀲𑁆𑀲𑀼 (𑀲𑀻. 𑀧𑀻.)] 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄, (𑀳𑁂𑀫𑀯𑀢𑀸𑀢𑀺 𑀪𑀕𑀯𑀸)

𑀙𑀲𑀼 𑀓𑀼𑀩𑁆𑀩𑀢𑀺 𑀲𑀦𑁆𑀣𑀯𑀁;

𑀙𑀦𑁆𑀦𑀫𑁂𑀯 𑀉𑀧𑀸𑀤𑀸𑀬, 𑀙𑀲𑀼 𑀮𑁄𑀓𑁄 𑀯𑀺𑀳𑀜𑁆𑀜𑀢𑀺’’.

𑁧𑁭𑁨. ‘‘𑀓𑀢𑀫𑀁 𑀢𑀁 𑀉𑀧𑀸𑀤𑀸𑀦𑀁, 𑀬𑀢𑁆𑀣 𑀮𑁄𑀓𑁄 𑀯𑀺𑀳𑀜𑁆𑀜𑀢𑀺;

𑀦𑀺𑀬𑁆𑀬𑀸𑀦𑀁 𑀧𑀼𑀘𑁆𑀙𑀺𑀢𑁄 𑀩𑁆𑀭𑀽𑀳𑀺, 𑀓𑀣𑀁 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺’’ [𑀧𑀫𑀼𑀜𑁆𑀘𑀢𑀺 (𑀲𑁆𑀬𑀸.)].

𑁧𑁭𑁩. ‘‘𑀧𑀜𑁆𑀘 𑀓𑀸𑀫𑀕𑀼𑀡𑀸 𑀮𑁄𑀓𑁂, 𑀫𑀦𑁄𑀙𑀝𑁆𑀞𑀸 𑀧𑀯𑁂𑀤𑀺𑀢𑀸;

𑀏𑀢𑁆𑀣 𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀏𑀯𑀁 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺.

𑁧𑁭𑁪. ‘‘𑀏𑀢𑀁 𑀮𑁄𑀓𑀲𑁆𑀲 𑀦𑀺𑀬𑁆𑀬𑀸𑀦𑀁, 𑀅𑀓𑁆𑀔𑀸𑀢𑀁 𑀯𑁄 𑀬𑀣𑀸𑀢𑀣𑀁;

𑀏𑀢𑀁 𑀯𑁄 𑀅𑀳𑀫𑀓𑁆𑀔𑀸𑀫𑀺, 𑀏𑀯𑀁 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀺’’.

𑁧𑁭𑁫. ‘‘𑀓𑁄 𑀲𑀽𑀥 𑀢𑀭𑀢𑀺 𑀑𑀖𑀁, 𑀓𑁄𑀥 𑀢𑀭𑀢𑀺 𑀅𑀡𑁆𑀡𑀯𑀁;

𑀅𑀧𑁆𑀧𑀢𑀺𑀝𑁆𑀞𑁂 𑀅𑀦𑀸𑀮𑀫𑁆𑀩𑁂, 𑀓𑁄 𑀕𑀫𑁆𑀪𑀻𑀭𑁂 𑀦 𑀲𑀻𑀤𑀢𑀺’’.

𑁧𑁭𑁬. ‘‘𑀲𑀩𑁆𑀩𑀤𑀸 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀧𑀜𑁆𑀜𑀯𑀸 𑀲𑀼𑀲𑀫𑀸𑀳𑀺𑀢𑁄;

𑀅𑀚𑁆𑀛𑀢𑁆𑀢𑀘𑀺𑀦𑁆𑀢𑀻 [𑀅𑀚𑁆𑀛𑀢𑁆𑀢𑀲𑀜𑁆𑀜𑀻 (𑀲𑁆𑀬𑀸. 𑀓𑀁. 𑀓.)] 𑀲𑀢𑀺𑀫𑀸, 𑀑𑀖𑀁 𑀢𑀭𑀢𑀺 𑀤𑀼𑀢𑁆𑀢𑀭𑀁.

𑁧𑁭𑁭. ‘‘𑀯𑀺𑀭𑀢𑁄 𑀓𑀸𑀫𑀲𑀜𑁆𑀜𑀸𑀬, 𑀲𑀩𑁆𑀩𑀲𑀁𑀬𑁄𑀚𑀦𑀸𑀢𑀺𑀕𑁄;

𑀦𑀦𑁆𑀤𑀻𑀪𑀯𑀧𑀭𑀺𑀓𑁆𑀔𑀻𑀡𑁄, 𑀲𑁄 𑀕𑀫𑁆𑀪𑀻𑀭𑁂 𑀦 𑀲𑀻𑀤𑀢𑀺’’.

𑁧𑁭𑁮. ‘‘𑀕𑀩𑁆𑀪𑀻𑀭𑀧𑀜𑁆𑀜𑀁 𑀦𑀺𑀧𑀼𑀡𑀢𑁆𑀣𑀤𑀲𑁆𑀲𑀺𑀁, 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀁;

𑀢𑀁 𑀧𑀲𑁆𑀲𑀣 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑀁, 𑀤𑀺𑀩𑁆𑀩𑁂 𑀧𑀣𑁂 𑀓𑀫𑀫𑀸𑀦𑀁 𑀫𑀳𑁂𑀲𑀺𑀁.

𑁧𑁭𑁯. ‘‘𑀅𑀦𑁄𑀫𑀦𑀸𑀫𑀁 𑀦𑀺𑀧𑀼𑀡𑀢𑁆𑀣𑀤𑀲𑁆𑀲𑀺𑀁, 𑀧𑀜𑁆𑀜𑀸𑀤𑀤𑀁 𑀓𑀸𑀫𑀸𑀮𑀬𑁂 𑀅𑀲𑀢𑁆𑀢𑀁;

𑀢𑀁 𑀧𑀲𑁆𑀲𑀣 𑀲𑀩𑁆𑀩𑀯𑀺𑀤𑀼𑀁 𑀲𑀼𑀫𑁂𑀥𑀁, 𑀅𑀭𑀺𑀬𑁂 𑀧𑀣𑁂 𑀓𑀫𑀫𑀸𑀦𑀁 𑀫𑀳𑁂𑀲𑀺𑀁.

𑁧𑁮𑁦. ‘‘𑀲𑀼𑀤𑀺𑀝𑁆𑀞𑀁 𑀯𑀢 𑀦𑁄 𑀅𑀚𑁆𑀚, 𑀲𑀼𑀧𑁆𑀧𑀪𑀸𑀢𑀁 𑀲𑀼𑀳𑀼𑀝𑁆𑀞𑀺𑀢𑀁;

𑀬𑀁 𑀅𑀤𑁆𑀤𑀲𑀸𑀫 𑀲𑀫𑁆𑀩𑀼𑀤𑁆𑀥𑀁, 𑀑𑀖𑀢𑀺𑀡𑁆𑀡𑀫𑀦𑀸𑀲𑀯𑀁.

𑁧𑁮𑁧. ‘‘𑀇𑀫𑁂 𑀤𑀲𑀲𑀢𑀸 𑀬𑀓𑁆𑀔𑀸, 𑀇𑀤𑁆𑀥𑀺𑀫𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀲𑀩𑁆𑀩𑁂 𑀢𑀁 𑀲𑀭𑀡𑀁 𑀬𑀦𑁆𑀢𑀺, 𑀢𑁆𑀯𑀁 𑀦𑁄 𑀲𑀢𑁆𑀣𑀸 𑀅𑀦𑀼𑀢𑁆𑀢𑀭𑁄.

𑁧𑁮𑁨. ‘‘𑀢𑁂 𑀫𑀬𑀁 𑀯𑀺𑀘𑀭𑀺𑀲𑁆𑀲𑀸𑀫, 𑀕𑀸𑀫𑀸 𑀕𑀸𑀫𑀁 𑀦𑀕𑀸 𑀦𑀕𑀁;

𑀦𑀫𑀲𑁆𑀲𑀫𑀸𑀦𑀸 𑀲𑀫𑁆𑀩𑀼𑀤𑁆𑀥𑀁, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢’’𑀦𑁆𑀢𑀺.

𑀳𑁂𑀫𑀯𑀢𑀲𑀼𑀢𑁆𑀢𑀁 𑀦𑀯𑀫𑀁 𑀦𑀺𑀝𑁆𑀞𑀺𑀢𑀁.