𑁩. 𑀦𑀦𑁆𑀤𑀓𑀧𑁂𑀢𑀯𑀢𑁆𑀣𑀼

𑁬𑁫𑁮. 𑀭𑀸𑀚𑀸 𑀧𑀺𑀗𑁆𑀕𑀮𑀓𑁄 𑀦𑀸𑀫, 𑀲𑀼𑀭𑀝𑁆𑀞𑀸𑀦𑀁 𑀅𑀥𑀺𑀧𑀢𑀺 𑀅𑀳𑀼;

𑀫𑁄𑀭𑀺𑀬𑀸𑀦𑀁 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸, 𑀲𑀼𑀭𑀝𑁆𑀞𑀁 𑀧𑀼𑀦𑀭𑀸𑀕𑀫𑀸.

𑁬𑁫𑁯. 𑀉𑀡𑁆𑀳𑁂 𑀫𑀚𑁆𑀛𑀦𑁆𑀳𑀺𑀓𑁂 [𑀫𑀚𑁆𑀛𑀦𑁆𑀢𑀺𑀓𑁂 (𑀲𑀩𑁆𑀩𑀢𑁆𑀣)] 𑀓𑀸𑀮𑁂, 𑀭𑀸𑀚𑀸 𑀧𑀗𑁆𑀓𑀁 [𑀯𑀗𑁆𑀓𑀁 (𑀓.)] 𑀉𑀧𑀸𑀕𑀫𑀺;

𑀅𑀤𑁆𑀤𑀲 𑀫𑀕𑁆𑀕𑀁 𑀭𑀫𑀡𑀻𑀬𑀁, 𑀧𑁂𑀢𑀸𑀦𑀁 𑀢𑀁 𑀯𑀡𑁆𑀡𑀼𑀧𑀣𑀁 [𑀯𑀡𑁆𑀡𑀦𑀸𑀧𑀣𑀁 (𑀲𑀻. 𑀲𑁆𑀬𑀸.)].

𑁬𑁬𑁦. 𑀲𑀸𑀭𑀣𑀺𑀁 𑀆𑀫𑀦𑁆𑀢𑀬𑀻 𑀭𑀸𑀚𑀸 𑁋

‘‘𑀅𑀬𑀁 𑀫𑀕𑁆𑀕𑁄 𑀭𑀫𑀡𑀻𑀬𑁄, 𑀔𑁂𑀫𑁄 𑀲𑁄𑀯𑀢𑁆𑀣𑀺𑀓𑁄 𑀲𑀺𑀯𑁄;

𑀇𑀫𑀺𑀦𑀸 𑀲𑀸𑀭𑀣𑀺 𑀬𑀸𑀫, 𑀲𑀼𑀭𑀝𑁆𑀞𑀸𑀦𑀁 𑀲𑀦𑁆𑀢𑀺𑀓𑁂 𑀇𑀢𑁄’’.

𑁬𑁬𑁧. 𑀢𑁂𑀦 𑀧𑀸𑀬𑀸𑀲𑀺 𑀲𑁄𑀭𑀝𑁆𑀞𑁄, 𑀲𑁂𑀦𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸;

𑀉𑀩𑁆𑀩𑀺𑀕𑁆𑀕𑀭𑀽𑀧𑁄 𑀧𑀼𑀭𑀺𑀲𑁄, 𑀲𑁄𑀭𑀝𑁆𑀞𑀁 𑀏𑀢𑀤𑀩𑁆𑀭𑀯𑀺.

𑁬𑁬𑁨. ‘‘𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀫𑁆𑀳𑀸, 𑀪𑀺𑀁𑀲𑀦𑀁 𑀮𑁄𑀫𑀳𑀁𑀲𑀦𑀁;

𑀧𑀼𑀭𑀢𑁄 𑀤𑀺𑀲𑁆𑀲𑀢𑀺 𑀫𑀕𑁆𑀕𑁄, 𑀧𑀘𑁆𑀙𑀢𑁄 𑀘 𑀦 𑀤𑀺𑀲𑁆𑀲𑀢𑀺.

𑁬𑁬𑁩. ‘‘𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀫𑁆𑀳𑀸, 𑀬𑀫𑀧𑀼𑀭𑀺𑀲𑀸𑀦 𑀲𑀦𑁆𑀢𑀺𑀓𑁂;

𑀅𑀫𑀸𑀦𑀼𑀲𑁄 𑀯𑀸𑀬𑀢𑀺 𑀕𑀦𑁆𑀥𑁄, 𑀖𑁄𑀲𑁄 𑀲𑀼𑀬𑁆𑀬𑀢𑀺 [𑀲𑀽𑀬𑀢𑀺 (𑀲𑀻. 𑀲𑁆𑀬𑀸.)] 𑀤𑀸𑀭𑀼𑀡𑁄’’.

𑁬𑁬𑁪. 𑀲𑀁𑀯𑀺𑀕𑁆𑀕𑁄 𑀭𑀸𑀚𑀸 𑀲𑁄𑀭𑀝𑁆𑀞𑁄, 𑀲𑀸𑀭𑀣𑀺𑀁 𑀏𑀢𑀤𑀩𑁆𑀭𑀯𑀺;

‘‘𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀫𑁆𑀳𑀸, 𑀪𑀺𑀁𑀲𑀦𑀁 𑀮𑁄𑀫𑀳𑀁𑀲𑀦𑀁;

𑀧𑀼𑀭𑀢𑁄 𑀤𑀺𑀲𑁆𑀲𑀢𑀺 𑀫𑀕𑁆𑀕𑁄, 𑀧𑀘𑁆𑀙𑀢𑁄 𑀘 𑀦 𑀤𑀺𑀲𑁆𑀲𑀢𑀺.

𑁬𑁬𑁫. ‘‘𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀫𑁆𑀳𑀸, 𑀬𑀫𑀧𑀼𑀭𑀺𑀲𑀸𑀦 𑀲𑀦𑁆𑀢𑀺𑀓𑁂;

𑀅𑀫𑀸𑀦𑀼𑀲𑁄 𑀯𑀸𑀬𑀢𑀺 𑀕𑀦𑁆𑀥𑁄, 𑀖𑁄𑀲𑁄 𑀲𑀼𑀬𑁆𑀬𑀢𑀺 𑀤𑀸𑀭𑀼𑀡𑁄’’.

𑁬𑁬𑁬. 𑀳𑀢𑁆𑀣𑀺𑀓𑁆𑀔𑀦𑁆𑀥𑀁 𑀲𑀫𑀸𑀭𑀼𑀬𑁆𑀳, 𑀑𑀮𑁄𑀓𑁂𑀦𑁆𑀢𑁄 𑀘𑀢𑀼𑀤𑁆𑀤𑀺𑀲𑀁 [𑀘𑀢𑀼𑀤𑁆𑀤𑀺𑀲𑁆𑀲𑀸 (𑀓.)];

𑀅𑀤𑁆𑀤𑀲 𑀦𑀺𑀕𑁆𑀭𑁄𑀥𑀁 𑀭𑀫𑀡𑀻𑀬𑀁 [𑀭𑀼𑀓𑁆𑀔𑀁 𑀦𑀺𑀕𑁆𑀭𑁄𑀥𑀁 (𑀲𑁆𑀬𑀸. 𑀓.)], 𑀧𑀸𑀤𑀧𑀁 𑀙𑀸𑀬𑀸𑀲𑀫𑁆𑀧𑀦𑁆𑀦𑀁;

𑀦𑀻𑀮𑀩𑁆𑀪𑀯𑀡𑁆𑀡𑀲𑀤𑀺𑀲𑀁, 𑀫𑁂𑀖𑀯𑀡𑁆𑀡𑀲𑀺𑀭𑀻𑀦𑀺𑀪𑀁.

𑁬𑁬𑁭. 𑀲𑀸𑀭𑀣𑀺𑀁 𑀆𑀫𑀦𑁆𑀢𑀬𑀻 𑀭𑀸𑀚𑀸, ‘‘𑀓𑀺𑀁 𑀏𑀲𑁄 𑀤𑀺𑀲𑁆𑀲𑀢𑀺 𑀩𑁆𑀭𑀳𑀸;

𑀦𑀻𑀮𑀩𑁆𑀪𑀯𑀡𑁆𑀡𑀲𑀤𑀺𑀲𑁄, 𑀫𑁂𑀖𑀯𑀡𑁆𑀡𑀲𑀺𑀭𑀻𑀦𑀺𑀪𑁄’’.

𑁬𑁬𑁮. ‘‘𑀦𑀺𑀕𑁆𑀭𑁄𑀥𑁄 𑀲𑁄 𑀫𑀳𑀸𑀭𑀸𑀚, 𑀧𑀸𑀤𑀧𑁄 𑀙𑀸𑀬𑀸𑀲𑀫𑁆𑀧𑀦𑁆𑀦𑁄;

𑀦𑀻𑀮𑀩𑁆𑀪𑀯𑀡𑁆𑀡𑀲𑀤𑀺𑀲𑁄, 𑀫𑁂𑀖𑀯𑀡𑁆𑀡𑀲𑀺𑀭𑀻𑀦𑀺𑀪𑁄’’.

𑁬𑁬𑁯. 𑀢𑁂𑀦 𑀧𑀸𑀬𑀸𑀲𑀺 𑀲𑁄𑀭𑀝𑁆𑀞𑁄, 𑀬𑁂𑀦 𑀲𑁄 𑀤𑀺𑀲𑁆𑀲𑀢𑁂 𑀩𑁆𑀭𑀳𑀸;

𑀦𑀻𑀮𑀩𑁆𑀪𑀯𑀡𑁆𑀡𑀲𑀤𑀺𑀲𑁄, 𑀫𑁂𑀖𑀯𑀡𑁆𑀡𑀲𑀺𑀭𑀻𑀦𑀺𑀪𑁄.

𑁬𑁭𑁦. 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀑𑀭𑀼𑀬𑁆𑀳, 𑀭𑀸𑀚𑀸 𑀭𑀼𑀓𑁆𑀔𑀁 𑀉𑀧𑀸𑀕𑀫𑀺;

𑀦𑀺𑀲𑀻𑀤𑀺 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑁆𑀚𑀦𑁄;

𑀧𑀽𑀭𑀁 𑀧𑀸𑀦𑀻𑀬𑀲𑀭𑀓𑀁, 𑀧𑀽𑀯𑁂 𑀯𑀺𑀢𑁆𑀢𑁂 𑀘 𑀅𑀤𑁆𑀤𑀲.

𑁬𑁭𑁧. 𑀧𑀼𑀭𑀺𑀲𑁄 𑀘 𑀤𑁂𑀯𑀯𑀡𑁆𑀡𑀻, 𑀲𑀩𑁆𑀩𑀸𑀪𑀭𑀡𑀪𑀽𑀲𑀺𑀢𑁄;

𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁, 𑀲𑁄𑀭𑀝𑁆𑀞𑀁 𑀏𑀢𑀤𑀩𑁆𑀭𑀯𑀺.

𑁬𑁭𑁨. ‘‘𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚, 𑀅𑀣𑁄 𑀢𑁂 𑀅𑀤𑀼𑀭𑀸𑀕𑀢𑀁;

𑀧𑀺𑀯𑀢𑀼 𑀤𑁂𑀯𑁄 𑀧𑀸𑀦𑀻𑀬𑀁, 𑀧𑀽𑀯𑁂 𑀔𑀸𑀤 𑀅𑀭𑀺𑀦𑁆𑀤𑀫’’.

𑁬𑁭𑁩. 𑀧𑀺𑀯𑀺𑀢𑁆𑀯𑀸 𑀭𑀸𑀚𑀸 𑀧𑀸𑀦𑀻𑀬𑀁, 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑁆𑀚𑀦𑁄;

𑀧𑀽𑀯𑁂 𑀔𑀸𑀤𑀺𑀢𑁆𑀯𑀸 𑀧𑀺𑀢𑁆𑀯𑀸 𑀘, 𑀲𑁄𑀭𑀝𑁆𑀞𑁄 𑀏𑀢𑀤𑀩𑁆𑀭𑀯𑀺.

𑁬𑁭𑁪. ‘‘𑀤𑁂𑀯𑀢𑀸 𑀦𑀼𑀲𑀺 𑀕𑀦𑁆𑀥𑀩𑁆𑀩𑁄, 𑀅𑀤𑀼 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;

𑀅𑀚𑀸𑀦𑀦𑁆𑀢𑀸 𑀢𑀁 𑀧𑀼𑀘𑁆𑀙𑀸𑀫, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.

𑁬𑁭𑁫. ‘‘𑀦𑀸𑀫𑁆𑀳𑀺 𑀤𑁂𑀯𑁄 𑀦 𑀕𑀦𑁆𑀥𑀩𑁆𑀩𑁄, 𑀦𑀸𑀧𑀺 [𑀦𑀫𑁆𑀳𑀺 (𑀓.)] 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;

𑀧𑁂𑀢𑁄 𑀅𑀳𑀁 𑀫𑀳𑀸𑀭𑀸𑀚, 𑀲𑀼𑀭𑀝𑁆𑀞𑀸 𑀇𑀥 𑀫𑀸𑀕𑀢𑁄’’𑀢𑀺.

𑁬𑁭𑁬. ‘‘𑀓𑀺𑀁𑀲𑀻𑀮𑁄 𑀓𑀺𑀁𑀲𑀫𑀸𑀘𑀸𑀭𑁄, 𑀲𑀼𑀭𑀝𑁆𑀞𑀲𑁆𑀫𑀺𑀁 𑀧𑀼𑀭𑁂 𑀢𑀼𑀯𑀁;

𑀓𑁂𑀦 𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀆𑀦𑀼𑀪𑀸𑀯𑁄 𑀅𑀬𑀁 𑀢𑀯𑀸’’𑀢𑀺.

𑁬𑁭𑁭. ‘‘𑀢𑀁 𑀲𑀼𑀡𑁄𑀳𑀺 𑀫𑀳𑀸𑀭𑀸𑀚, 𑀅𑀭𑀺𑀦𑁆𑀤𑀫 𑀭𑀝𑁆𑀞𑀯𑀟𑁆𑀠𑀦;

𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀘, 𑀩𑁆𑀭𑀸𑀳𑁆𑀫𑀡𑁄 𑀘 𑀧𑀼𑀭𑁄𑀳𑀺𑀢𑁄.

𑁬𑁭𑁮. ‘‘𑀲𑀼𑀭𑀝𑁆𑀞𑀲𑁆𑀫𑀺𑀁 𑀅𑀳𑀁 𑀤𑁂𑀯, 𑀧𑀼𑀭𑀺𑀲𑁄 𑀧𑀸𑀧𑀘𑁂𑀢𑀲𑁄;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘 𑀤𑀼𑀲𑁆𑀲𑀻𑀮𑁄, 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄.

𑁬𑁭𑁯. ‘‘‘𑀤𑀤𑀦𑁆𑀢𑀸𑀦𑀁 𑀓𑀭𑁄𑀦𑁆𑀢𑀸𑀦𑀁, 𑀯𑀸𑀭𑀬𑀺𑀲𑁆𑀲𑀁 𑀩𑀳𑀼𑀚𑁆𑀚𑀦𑀁;

𑀅𑀜𑁆𑀜𑁂𑀲𑀁 𑀤𑀤𑀫𑀸𑀦𑀸𑀦𑀁, 𑀅𑀦𑁆𑀢𑀭𑀸𑀬𑀓𑀭𑁄 𑀅𑀳𑀁.

𑁬𑁮𑁦. ‘‘‘𑀯𑀺𑀧𑀸𑀓𑁄 𑀦𑀢𑁆𑀣𑀺 𑀤𑀸𑀦𑀲𑁆𑀲, 𑀲𑀁𑀬𑀫𑀲𑁆𑀲 𑀓𑀼𑀢𑁄 𑀨𑀮𑀁;

𑀦𑀢𑁆𑀣𑀺 𑀆𑀘𑀭𑀺𑀬𑁄 𑀦𑀸𑀫, 𑀅𑀤𑀦𑁆𑀢𑀁 𑀓𑁄 𑀤𑀫𑁂𑀲𑁆𑀲𑀢𑀺.

𑁬𑁮𑁧. ‘‘‘𑀲𑀫𑀢𑀼𑀮𑁆𑀬𑀸𑀦𑀺 𑀪𑀽𑀢𑀸𑀦𑀺, 𑀓𑀼𑀢𑁄 [𑀓𑀼𑀮𑁂 (𑀲𑁆𑀬𑀸. 𑀓.)] 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑁄;

𑀦𑀢𑁆𑀣𑀺 𑀩𑀮𑀁 𑀯𑀻𑀭𑀺𑀬𑀁 𑀯𑀸, 𑀓𑀼𑀢𑁄 𑀉𑀝𑁆𑀞𑀸𑀦𑀧𑁄𑀭𑀺𑀲𑀁.

𑁬𑁮𑁨. ‘‘‘𑀦𑀢𑁆𑀣𑀺 𑀤𑀸𑀦𑀨𑀮𑀁 𑀦𑀸𑀫, 𑀦 𑀯𑀺𑀲𑁄𑀥𑁂𑀢𑀺 𑀯𑁂𑀭𑀺𑀦𑀁;

𑀮𑀤𑁆𑀥𑁂𑀬𑁆𑀬𑀁 𑀮𑀪𑀢𑁂 𑀫𑀘𑁆𑀘𑁄, 𑀦𑀺𑀬𑀢𑀺𑀧𑀭𑀺𑀡𑀸𑀫𑀚𑀁 [𑀧𑀭𑀺𑀡𑀸𑀫𑀚𑀸 (𑀲𑀻. 𑀓.)].

𑁬𑁮𑁩. ‘‘‘𑀦𑀢𑁆𑀣𑀺 𑀫𑀸𑀢𑀸 𑀧𑀺𑀢𑀸 𑀪𑀸𑀢𑀸, 𑀮𑁄𑀓𑁄 𑀦𑀢𑁆𑀣𑀺 𑀇𑀢𑁄 𑀧𑀭𑀁;

𑀦𑀢𑁆𑀣𑀺 𑀤𑀺𑀦𑁆𑀦𑀁 𑀦𑀢𑁆𑀣𑀺 𑀳𑀼𑀢𑀁, 𑀲𑀼𑀦𑀺𑀳𑀺𑀢𑀁 𑀦 𑀯𑀺𑀚𑁆𑀚𑀢𑀺.

𑁬𑁮𑁪. ‘‘‘𑀬𑁄𑀧𑀺 𑀳𑀦𑁂𑀬𑁆𑀬 𑀧𑀼𑀭𑀺𑀲𑀁, 𑀧𑀭𑀲𑁆𑀲 𑀙𑀺𑀦𑁆𑀤𑀢𑁂 [𑀧𑀼𑀭𑀺𑀲𑀲𑁆𑀲 𑀙𑀺𑀦𑁆𑀤𑁂 (𑀲𑁆𑀬𑀸. 𑀓.)] 𑀲𑀺𑀭𑀁;

𑀦 𑀓𑁄𑀘𑀺 𑀓𑀜𑁆𑀘𑀺 𑀳𑀦𑀢𑀺, 𑀲𑀢𑁆𑀢𑀦𑁆𑀦𑀁 𑀯𑀺𑀯𑀭𑀫𑀦𑁆𑀢𑀭𑁂.

𑁬𑁮𑁫. ‘‘‘𑀅𑀘𑁆𑀙𑁂𑀚𑁆𑀚𑀸𑀪𑁂𑀚𑁆𑀚𑁄 𑀳𑀺 [𑀪𑁂𑀚𑁆𑀚𑁄 (𑀲𑀻.), 𑀅𑀪𑁂𑀚𑁆𑀚𑁄 (𑀲𑁆𑀬𑀸.), 𑀪𑁂𑀚𑁆𑀚𑀸𑀲𑀺 (𑀓.)] 𑀚𑀻𑀯𑁄, 𑀅𑀝𑁆𑀞𑀁𑀲𑁄 𑀕𑀼𑀴𑀧𑀭𑀺𑀫𑀡𑁆𑀟𑀮𑁄;

𑀬𑁄𑀚𑀦𑀸𑀦𑀁 𑀲𑀢𑀁 𑀧𑀜𑁆𑀘, 𑀓𑁄 𑀚𑀻𑀯𑀁 𑀙𑁂𑀢𑁆𑀢𑀼𑀫𑀭𑀳𑀢𑀺.

𑁬𑁮𑁬. ‘‘‘𑀬𑀣𑀸 𑀲𑀼𑀢𑁆𑀢𑀕𑀼𑀴𑁂 𑀔𑀺𑀢𑁆𑀢𑁂, 𑀦𑀺𑀩𑁆𑀩𑁂𑀞𑁂𑀦𑁆𑀢𑀁 𑀧𑀮𑀸𑀬𑀢𑀺;

𑀏𑀯𑀫𑁂𑀯 𑀘 𑀲𑁄 𑀚𑀻𑀯𑁄, 𑀦𑀺𑀩𑁆𑀩𑁂𑀞𑁂𑀦𑁆𑀢𑁄 𑀧𑀮𑀸𑀬𑀢𑀺.

𑁬𑁮𑁭. ‘‘‘𑀬𑀣𑀸 𑀕𑀸𑀫𑀢𑁄 𑀦𑀺𑀓𑁆𑀔𑀫𑁆𑀫, 𑀅𑀜𑁆𑀜𑀁 𑀕𑀸𑀫𑀁 𑀧𑀯𑀺𑀲𑀢𑀺;

𑀏𑀯𑀫𑁂𑀯 𑀘 𑀲𑁄 𑀚𑀻𑀯𑁄, 𑀅𑀜𑁆𑀜𑀁 𑀩𑁄𑀦𑁆𑀤𑀺𑀁 𑀧𑀯𑀺𑀲𑀢𑀺.

𑁬𑁮𑁮. ‘‘‘𑀬𑀣𑀸 𑀕𑁂𑀳𑀢𑁄 𑀦𑀺𑀓𑁆𑀔𑀫𑁆𑀫, 𑀅𑀜𑁆𑀜𑀁 𑀕𑁂𑀳𑀁 𑀧𑀯𑀺𑀲𑀢𑀺;

𑀏𑀯𑀫𑁂𑀯 𑀘 𑀲𑁄 𑀚𑀻𑀯𑁄, 𑀅𑀜𑁆𑀜𑀁 𑀩𑁄𑀦𑁆𑀤𑀺𑀁 𑀧𑀯𑀺𑀲𑀢𑀺.

𑁬𑁮𑁯. ‘‘‘𑀘𑀼𑀮𑁆𑀮𑀸𑀲𑀻𑀢𑀺 [𑀘𑀼𑀴𑀸𑀲𑀻𑀢𑀺 (𑀲𑀻. 𑀲𑁆𑀬𑀸. 𑀓.)] 𑀫𑀳𑀸𑀓𑀧𑁆𑀧𑀺𑀦𑁄 [𑀫𑀳𑀸𑀓𑀧𑁆𑀧𑀼𑀦𑁄 (𑀲𑀻.)], 𑀲𑀢𑀲𑀳𑀲𑁆𑀲𑀸𑀦𑀺 𑀳𑀺;

𑀬𑁂 𑀩𑀸𑀮𑀸 𑀬𑁂 𑀘 𑀧𑀡𑁆𑀟𑀺𑀢𑀸, 𑀲𑀁𑀲𑀸𑀭𑀁 𑀔𑁂𑀧𑀬𑀺𑀢𑁆𑀯𑀸𑀦;

𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀭𑁂.

𑁬𑁯𑁦. ‘‘‘𑀫𑀺𑀢𑀸𑀦𑀺 𑀲𑀼𑀔𑀤𑀼𑀓𑁆𑀔𑀸𑀦𑀺, 𑀤𑁄𑀡𑁂𑀳𑀺 𑀧𑀺𑀝𑀓𑁂𑀳𑀺 𑀘;

𑀚𑀺𑀦𑁄 𑀲𑀩𑁆𑀩𑀁 𑀧𑀚𑀸𑀦𑀸𑀢𑀺’, 𑀲𑀫𑁆𑀫𑀽𑀴𑁆𑀳𑀸 𑀇𑀢𑀭𑀸 𑀧𑀚𑀸.

𑁬𑁯𑁧. ‘‘𑀏𑀯𑀁𑀤𑀺𑀝𑁆𑀞𑀺 𑀧𑀼𑀭𑁂 𑀆𑀲𑀺𑀁, 𑀲𑀫𑁆𑀫𑀽𑀴𑁆𑀳𑁄 𑀫𑁄𑀳𑀧𑀸𑀭𑀼𑀢𑁄;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘 𑀤𑀼𑀲𑁆𑀲𑀻𑀮𑁄, 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄.

𑁬𑁯𑁨. ‘‘𑀑𑀭𑀁 𑀫𑁂 𑀙𑀳𑀺 𑀫𑀸𑀲𑁂𑀳𑀺, 𑀓𑀸𑀮𑀗𑁆𑀓𑀺𑀭𑀺𑀬𑀸 𑀪𑀯𑀺𑀲𑁆𑀲𑀢𑀺;

𑀏𑀓𑀦𑁆𑀢𑀓𑀝𑀼𑀓𑀁 𑀖𑁄𑀭𑀁, 𑀦𑀺𑀭𑀬𑀁 𑀧𑀧𑀢𑀺𑀲𑁆𑀲𑀳𑀁.

𑁬𑁯𑁩. [𑀧𑁂. 𑀯. 𑁭𑁦] ‘‘𑀘𑀢𑀼𑀓𑁆𑀓𑀡𑁆𑀡𑀁 𑀘𑀢𑀼𑀤𑁆𑀯𑀸𑀭𑀁, 𑀯𑀺𑀪𑀢𑁆𑀢𑀁 𑀪𑀸𑀕𑀲𑁄 𑀫𑀺𑀢𑀁;

𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑀁, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑀁.

𑁬𑁯𑁪. [𑀧𑁂. 𑀯. 𑁭𑁧] ‘‘𑀢𑀲𑁆𑀲 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸 𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀤𑀸.

𑁬𑁯𑁫. ‘‘𑀯𑀲𑁆𑀲𑀸𑀦𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀖𑁄𑀲𑁄 𑀲𑀼𑀬𑁆𑀬𑀢𑀺 𑀢𑀸𑀯𑀤𑁂;

𑀮𑀓𑁆𑀔𑁄 𑀏𑀲𑁄 𑀫𑀳𑀸𑀭𑀸𑀚, 𑀲𑀢𑀪𑀸𑀕𑀯𑀲𑁆𑀲𑀓𑁄𑀝𑀺𑀬𑁄.

𑁬𑁯𑁬. ‘‘𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺, 𑀦𑀺𑀭𑀬𑁂 𑀧𑀘𑁆𑀘𑀭𑁂 𑀚𑀦𑀸;

𑀫𑀺𑀘𑁆𑀙𑀸𑀤𑀺𑀝𑁆𑀞𑀻 𑀘 𑀤𑀼𑀲𑁆𑀲𑀻𑀮𑀸, 𑀬𑁂 𑀘 𑀅𑀭𑀺𑀬𑀽𑀧𑀯𑀸𑀤𑀺𑀦𑁄.

𑁬𑁯𑁭. ‘‘𑀢𑀢𑁆𑀣𑀸𑀳𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀤𑀼𑀓𑁆𑀔𑀁 𑀯𑁂𑀤𑀺𑀲𑁆𑀲 𑀯𑁂𑀤𑀦𑀁;

𑀨𑀮𑀁 𑀧𑀸𑀧𑀲𑁆𑀲 𑀓𑀫𑁆𑀫𑀲𑁆𑀲, 𑀢𑀲𑁆𑀫𑀸 𑀲𑁄𑀘𑀸𑀫𑀳𑀁 𑀪𑀼𑀲𑀁.

𑁬𑁯𑁮. ‘‘𑀢𑀁 𑀲𑀼𑀡𑁄𑀳𑀺 𑀫𑀳𑀸𑀭𑀸𑀚, 𑀅𑀭𑀺𑀦𑁆𑀤𑀫 𑀭𑀝𑁆𑀞𑀯𑀟𑁆𑀠𑀦;

𑀥𑀻𑀢𑀸 𑀫𑀬𑁆𑀳𑀁 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀸 𑀪𑀤𑁆𑀤𑀫𑀢𑁆𑀣𑀼 𑀢𑁂.

𑁬𑁯𑁯. ‘‘𑀓𑀭𑁄𑀢𑀺 𑀪𑀤𑁆𑀤𑀓𑀁 𑀓𑀫𑁆𑀫𑀁, 𑀲𑀻𑀮𑁂𑀲𑀼𑀧𑁄𑀲𑀣𑁂 𑀭𑀢𑀸;

𑀲𑀜𑁆𑀜𑀢𑀸 𑀲𑀁𑀯𑀺𑀪𑀸𑀕𑀻 𑀘, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑀸.

𑁭𑁦𑁦. ‘‘𑀅𑀔𑀡𑁆𑀟𑀓𑀸𑀭𑀻 𑀲𑀺𑀓𑁆𑀔𑀸𑀬, 𑀲𑀼𑀡𑁆𑀳𑀸 𑀧𑀭𑀓𑀼𑀮𑁂𑀲𑀼 𑀘;

𑀉𑀧𑀸𑀲𑀺𑀓𑀸 𑀲𑀓𑁆𑀬𑀫𑀼𑀦𑀺𑀦𑁄, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄.

𑁭𑁦𑁧. ‘‘𑀪𑀺𑀓𑁆𑀔𑀼 𑀘 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺;

𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀲𑀢𑀺𑀫𑀸, 𑀕𑀼𑀢𑁆𑀢𑀤𑁆𑀯𑀸𑀭𑁄 𑀲𑀼𑀲𑀁𑀯𑀼𑀢𑁄.

𑁭𑁦𑁨. ‘‘𑀲𑀧𑀤𑀸𑀦𑀁 𑀘𑀭𑀫𑀸𑀦𑁄, 𑀅𑀕𑀫𑀸 𑀢𑀁 𑀦𑀺𑀯𑁂𑀲𑀦𑀁;

‘𑀢𑀫𑀤𑁆𑀤𑀲 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀸 𑀪𑀤𑁆𑀤𑀫𑀢𑁆𑀣𑀼 𑀢𑁂’.

𑁭𑁦𑁩. ‘‘𑀧𑀽𑀭𑀁 𑀧𑀸𑀦𑀻𑀬𑀲𑀭𑀓𑀁, 𑀧𑀽𑀯𑁂 𑀯𑀺𑀢𑁆𑀢𑁂 𑀘 𑀲𑀸 𑀅𑀤𑀸;

‘𑀧𑀺𑀢𑀸 𑀫𑁂 𑀓𑀸𑀮𑀗𑁆𑀓𑀢𑁄, 𑀪𑀦𑁆𑀢𑁂 𑀢𑀲𑁆𑀲𑁂𑀢𑀁 𑀉𑀧𑀓𑀧𑁆𑀧𑀢𑀼’.

𑁭𑁦𑁪. ‘‘𑀲𑀫𑀦𑀦𑁆𑀢𑀭𑀸𑀦𑀼𑀤𑁆𑀤𑀺𑀝𑁆𑀞𑁂, 𑀯𑀺𑀧𑀸𑀓𑁄 𑀉𑀤𑀧𑀚𑁆𑀚𑀣;

𑀪𑀼𑀜𑁆𑀚𑀸𑀫𑀺 𑀓𑀸𑀫𑀓𑀸𑀫𑀻𑀳𑀁, 𑀭𑀸𑀚𑀸 𑀯𑁂𑀲𑁆𑀲𑀯𑀡𑁄 𑀬𑀣𑀸.

𑁭𑁦𑁫. ‘‘𑀢𑀁 𑀲𑀼𑀡𑁄𑀳𑀺 𑀫𑀳𑀸𑀭𑀸𑀚, 𑀅𑀭𑀺𑀦𑁆𑀤𑀫 𑀭𑀝𑁆𑀞𑀯𑀟𑁆𑀠𑀦;

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀩𑀼𑀤𑁆𑀥𑁄 𑀅𑀕𑁆𑀕𑁄 𑀧𑀯𑀼𑀘𑁆𑀘𑀢𑀺;

𑀢𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙, 𑀲𑀧𑀼𑀢𑁆𑀢𑀤𑀸𑀭𑁄 𑀅𑀭𑀺𑀦𑁆𑀤𑀫.

𑁭𑁦𑁬. ‘‘𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦, 𑀨𑀼𑀲𑀦𑁆𑀢𑀺 𑀅𑀫𑀢𑀁 𑀧𑀤𑀁;

𑀢𑀁 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙, 𑀲𑀧𑀼𑀢𑁆𑀢𑀤𑀸𑀭𑁄 𑀅𑀭𑀺𑀦𑁆𑀤𑀫.

𑁭𑁦𑁭. ‘‘𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸 [𑀫𑀕𑁆𑀕𑀧𑀝𑀺𑀧𑀦𑁆𑀦𑀸 (𑀲𑀻. 𑀲𑁆𑀬𑀸.)], 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀉𑀚𑀼𑀪𑀽𑀢𑁄, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄;

𑀢𑀁 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙, 𑀲𑀧𑀼𑀢𑁆𑀢𑀤𑀸𑀭𑁄 𑀅𑀭𑀺𑀦𑁆𑀤𑀫.

𑁭𑁦𑁮. ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀲𑁆𑀲𑀼 𑀔𑀺𑀧𑁆𑀧𑀁, 𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀲𑁆𑀲𑀼;

𑀅𑀫𑀚𑁆𑀚𑀧𑁄 𑀫𑀸 𑀘 𑀫𑀼𑀲𑀸 𑀅𑀪𑀸𑀡𑀻, 𑀲𑀓𑁂𑀦 𑀤𑀸𑀭𑁂𑀦 𑀘 𑀳𑁄𑀳𑀺 𑀢𑀼𑀝𑁆𑀞𑁄’’𑀢𑀺.

𑁭𑁦𑁯. ‘‘𑀅𑀢𑁆𑀣𑀓𑀸𑀫𑁄𑀲𑀺 𑀫𑁂 𑀬𑀓𑁆𑀔, 𑀳𑀺𑀢𑀓𑀸𑀫𑁄𑀲𑀺 𑀤𑁂𑀯𑀢𑁂;

𑀓𑀭𑁄𑀫𑀺 𑀢𑀼𑀬𑁆𑀳𑀁 𑀯𑀘𑀦𑀁, 𑀢𑁆𑀯𑀁𑀲𑀺 𑀆𑀘𑀭𑀺𑀬𑁄 𑀫𑀫.

𑁭𑁧𑁦. ‘‘𑀉𑀧𑁂𑀫𑀺 𑀲𑀭𑀡𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀜𑁆𑀘𑀸𑀧𑀺 𑀅𑀦𑀼𑀢𑁆𑀢𑀭𑀁;

𑀲𑀗𑁆𑀖𑀜𑁆𑀘 𑀦𑀭𑀤𑁂𑀯𑀲𑁆𑀲, 𑀕𑀘𑁆𑀙𑀸𑀫𑀺 𑀲𑀭𑀡𑀁 𑀅𑀳𑀁.

𑁭𑁧𑁧. ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀸𑀫𑀺 𑀔𑀺𑀧𑁆𑀧𑀁, 𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀸𑀫𑀺;

𑀅𑀫𑀚𑁆𑀚𑀧𑁄 𑀦𑁄 𑀘 𑀫𑀼𑀲𑀸 𑀪𑀡𑀸𑀫𑀺, 𑀲𑀓𑁂𑀦 𑀤𑀸𑀭𑁂𑀦 𑀘 𑀳𑁄𑀫𑀺 𑀢𑀼𑀝𑁆𑀞𑁄.

𑁭𑁧𑁨. ‘‘𑀑𑀨𑀼𑀡𑀸𑀫𑀺 [𑀑𑀧𑀼𑀡𑀸𑀫𑀺 (𑀲𑀻.), 𑀑𑀨𑀼𑀦𑀸𑀫𑀺 (𑀲𑁆𑀬𑀸. 𑀓.), 𑀑𑀧𑀼𑀦𑀸𑀫𑀺 (?)] 𑀫𑀳𑀸𑀯𑀸𑀢𑁂, 𑀦𑀤𑀺𑀬𑀸 𑀲𑀻𑀖𑀕𑀸𑀫𑀺𑀬𑀸;

𑀯𑀫𑀸𑀫𑀺 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁, 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀭𑀢𑁄’’.

𑁭𑁧𑁩. 𑀇𑀤𑀁 𑀯𑀢𑁆𑀯𑀸𑀦 𑀲𑁄𑀭𑀝𑁆𑀞𑁄, 𑀯𑀺𑀭𑀫𑀺𑀢𑁆𑀯𑀸 𑀧𑀸𑀧𑀤𑀲𑁆𑀲𑀦𑀸 [𑀧𑀸𑀧𑀤𑀲𑁆𑀲𑀦𑀁 (𑀲𑁆𑀬𑀸. 𑀓.)];

𑀦𑀫𑁄 𑀪𑀕𑀯𑀢𑁄 𑀓𑀢𑁆𑀯𑀸, 𑀧𑀸𑀫𑁄𑀓𑁆𑀔𑁄 𑀭𑀣𑀫𑀸𑀭𑀼𑀳𑀻𑀢𑀺.

𑀦𑀦𑁆𑀤𑀓𑀧𑁂𑀢𑀯𑀢𑁆𑀣𑀼 𑀢𑀢𑀺𑀬𑀁.