𑁧𑁨. 𑀅𑀫𑁆𑀩𑀯𑀦𑀧𑁂𑀢𑀯𑀢𑁆𑀣𑀼

𑁭𑁯𑁬. ‘‘𑀅𑀬𑀜𑁆𑀘 𑀢𑁂 𑀧𑁄𑀓𑁆𑀔𑀭𑀡𑀻 𑀲𑀼𑀭𑀫𑁆𑀫𑀸, 𑀲𑀫𑀸 𑀲𑀼𑀢𑀺𑀢𑁆𑀣𑀸 𑀘 𑀫𑀳𑁄𑀤𑀓𑀸 𑀘;

𑀲𑀼𑀧𑀼𑀧𑁆𑀨𑀺𑀢𑀸 𑀪𑀫𑀭𑀕𑀡𑀸𑀦𑀼𑀓𑀺𑀡𑁆𑀡𑀸, 𑀓𑀣𑀁 𑀢𑀬𑀸 𑀮𑀤𑁆𑀥𑀸 𑀅𑀬𑀁 𑀫𑀦𑀼𑀜𑁆𑀜𑀸.

𑁭𑁯𑁭. ‘‘𑀇𑀤𑀜𑁆𑀘 𑀢𑁂 𑀅𑀫𑁆𑀩𑀯𑀦𑀁 𑀲𑀼𑀭𑀫𑁆𑀫𑀁, 𑀲𑀩𑁆𑀩𑁄𑀢𑀼𑀓𑀁 𑀥𑀸𑀭𑀬𑀢𑁂 [𑀥𑀸𑀭𑀬𑀢𑀺 (𑀲𑁆𑀬𑀸. 𑀓.)] 𑀨𑀮𑀸𑀦𑀺;

𑀲𑀼𑀧𑀼𑀧𑁆𑀨𑀺𑀢𑀁 𑀪𑀫𑀭𑀕𑀡𑀸𑀦𑀼𑀓𑀺𑀡𑁆𑀡𑀁, 𑀓𑀣𑀁 𑀢𑀬𑀸 𑀮𑀤𑁆𑀥𑀫𑀺𑀤𑀁 𑀯𑀺𑀫𑀸𑀦𑀁’’.

𑁭𑁯𑁮. ‘‘𑀅𑀫𑁆𑀩𑀧𑀓𑁆𑀓𑀁 𑀤𑀓𑀁 [𑀅𑀫𑁆𑀩𑀧𑀓𑁆𑀓𑁄𑀤𑀓𑀁 (𑀲𑀻. 𑀲𑁆𑀬𑀸. 𑀧𑀻.), 𑀅𑀫𑁆𑀩𑀧𑀓𑁆𑀓𑀽𑀤𑀓𑀁 (𑀓.)] 𑀬𑀸𑀕𑀼, 𑀲𑀻𑀢𑀘𑁆𑀙𑀸𑀬𑀸 𑀫𑀦𑁄𑀭𑀫𑀸;

𑀥𑀻𑀢𑀸𑀬 𑀤𑀺𑀦𑁆𑀦𑀤𑀸𑀦𑁂𑀦, 𑀢𑁂𑀦 𑀫𑁂 𑀇𑀥 𑀮𑀩𑁆𑀪𑀢𑀺’’.

𑁭𑁯𑁯. ‘‘𑀲𑀦𑁆𑀤𑀺𑀝𑁆𑀞𑀺𑀓𑀁 𑀓𑀫𑁆𑀫𑀁 𑀏𑀯𑀁 [𑀲𑀦𑁆𑀤𑀺𑀝𑁆𑀞𑀺𑀓𑀁 𑀏𑀯 (𑀲𑁆𑀬𑀸.)] 𑀧𑀲𑁆𑀲𑀣, 𑀤𑀸𑀦𑀲𑁆𑀲 𑀤𑀫𑀲𑁆𑀲 𑀲𑀁𑀬𑀫𑀲𑁆𑀲 𑀯𑀺𑀧𑀸𑀓𑀁;

𑀤𑀸𑀲𑀻 𑀅𑀳𑀁 𑀅𑀬𑁆𑀬𑀓𑀼𑀮𑁂𑀲𑀼 𑀳𑀼𑀢𑁆𑀯𑀸, 𑀲𑀼𑀡𑀺𑀲𑀸 𑀳𑁄𑀫𑀺 𑀅𑀕𑀸𑀭𑀲𑁆𑀲 𑀇𑀲𑁆𑀲𑀭𑀸’’𑀢𑀺.

𑀅𑀫𑁆𑀩𑀯𑀦𑀧𑁂𑀢𑀯𑀢𑁆𑀣𑀼 𑀤𑁆𑀯𑀸𑀤𑀲𑀫𑀁.