𑁯. 𑀅𑀗𑁆𑀓𑀼𑀭𑀧𑁂𑀢𑀯𑀢𑁆𑀣𑀼

𑁨𑁫𑁭. ‘‘𑀬𑀲𑁆𑀲 𑀅𑀢𑁆𑀣𑀸𑀬 𑀕𑀘𑁆𑀙𑀸𑀫, 𑀓𑀫𑁆𑀩𑁄𑀚𑀁 𑀥𑀦𑀳𑀸𑀭𑀓𑀸;

𑀅𑀬𑀁 𑀓𑀸𑀫𑀤𑀤𑁄 𑀬𑀓𑁆𑀔𑁄, 𑀇𑀫𑀁 𑀬𑀓𑁆𑀔𑀁 𑀦𑀬𑀸𑀫𑀲𑁂.

𑁨𑁫𑁮. ‘‘𑀇𑀫𑀁 𑀬𑀓𑁆𑀔𑀁 𑀕𑀳𑁂𑀢𑁆𑀯𑀸𑀦, 𑀲𑀸𑀥𑀼𑀓𑁂𑀦 𑀧𑀲𑀬𑁆𑀳 𑀯𑀸;

𑀬𑀸𑀦𑀁 𑀆𑀭𑁄𑀧𑀬𑀺𑀢𑁆𑀯𑀸𑀦, 𑀔𑀺𑀧𑁆𑀧𑀁 𑀕𑀘𑁆𑀙𑀸𑀫 𑀤𑁆𑀯𑀸𑀭𑀓’’𑀦𑁆𑀢𑀺.

𑁨𑁫𑁯. [𑀚𑀸. 𑁧.𑁧𑁦.𑁧𑁫𑁧; 𑁧.𑁧𑁪.𑁧𑁯𑁬; 𑁨.𑁧𑁮.𑁧𑁫𑁩; 𑁨.𑁨𑁨.𑁧𑁦] ‘‘𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬, 𑀦𑀺𑀲𑀻𑀤𑁂𑀬𑁆𑀬 𑀲𑀬𑁂𑀬𑁆𑀬 𑀯𑀸;

𑀦 𑀢𑀲𑁆𑀲 𑀲𑀸𑀔𑀁 𑀪𑀜𑁆𑀚𑁂𑀬𑁆𑀬, 𑀫𑀺𑀢𑁆𑀢𑀤𑀼𑀩𑁆𑀪𑁄 𑀳𑀺 𑀧𑀸𑀧𑀓𑁄’’𑀢𑀺.

𑁨𑁬𑁦. ‘‘𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬, 𑀦𑀺𑀲𑀻𑀤𑁂𑀬𑁆𑀬 𑀲𑀬𑁂𑀬𑁆𑀬 𑀯𑀸;

𑀔𑀦𑁆𑀥𑀫𑁆𑀧𑀺 𑀢𑀲𑁆𑀲 𑀙𑀺𑀦𑁆𑀤𑁂𑀬𑁆𑀬, 𑀅𑀢𑁆𑀣𑁄 𑀘𑁂 𑀢𑀸𑀤𑀺𑀲𑁄 𑀲𑀺𑀬𑀸’’𑀢𑀺.

𑁨𑁬𑁧. ‘‘𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬, 𑀦𑀺𑀲𑀻𑀤𑁂𑀬𑁆𑀬 𑀲𑀬𑁂𑀬𑁆𑀬 𑀯𑀸;

𑀦 𑀢𑀲𑁆𑀲 𑀧𑀢𑁆𑀢𑀁 𑀪𑀺𑀦𑁆𑀤𑁂𑀬𑁆𑀬 [𑀳𑀺𑀁𑀲𑁂𑀬𑁆𑀬 (𑀓.)], 𑀫𑀺𑀢𑁆𑀢𑀤𑀼𑀩𑁆𑀪𑁄 𑀳𑀺 𑀧𑀸𑀧𑀓𑁄’’𑀢𑀺.

𑁨𑁬𑁨. ‘‘𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬, 𑀦𑀺𑀲𑀻𑀤𑁂𑀬𑁆𑀬 𑀲𑀬𑁂𑀬𑁆𑀬 𑀯𑀸;

𑀲𑀫𑀽𑀮𑀫𑁆𑀧𑀺 𑀢𑀁 𑀅𑀩𑁆𑀩𑀼𑀳𑁂 [𑀉𑀩𑁆𑀩𑀳𑁂 (?)], 𑀅𑀢𑁆𑀣𑁄 𑀘𑁂 𑀢𑀸𑀤𑀺𑀲𑁄 𑀲𑀺𑀬𑀸’’𑀢𑀺.

𑁨𑁬𑁩. ‘‘𑀬𑀲𑁆𑀲𑁂𑀓𑀭𑀢𑁆𑀢𑀺𑀫𑁆𑀧𑀺 𑀖𑀭𑁂 𑀯𑀲𑁂𑀬𑁆𑀬, 𑀬𑀢𑁆𑀣𑀦𑁆𑀦𑀧𑀸𑀦𑀁 𑀧𑀼𑀭𑀺𑀲𑁄 𑀮𑀪𑁂𑀣;

𑀦 𑀢𑀲𑁆𑀲 𑀧𑀸𑀧𑀁 𑀫𑀦𑀲𑀸𑀧𑀺 𑀘𑀺𑀦𑁆𑀢𑀬𑁂, 𑀓𑀢𑀜𑁆𑀜𑀼𑀢𑀸 𑀲𑀧𑁆𑀧𑀼𑀭𑀺𑀲𑁂𑀳𑀺 𑀯𑀡𑁆𑀡𑀺𑀢𑀸.

𑁨𑁬𑁪. ‘‘𑀬𑀲𑁆𑀲𑁂𑀓𑀭𑀢𑁆𑀢𑀺𑀫𑁆𑀧𑀺 𑀖𑀭𑁂 𑀯𑀲𑁂𑀬𑁆𑀬, 𑀅𑀦𑁆𑀦𑁂𑀦 𑀧𑀸𑀦𑁂𑀦 𑀉𑀧𑀝𑁆𑀞𑀺𑀢𑁄 𑀲𑀺𑀬𑀸;

𑀦 𑀢𑀲𑁆𑀲 𑀧𑀸𑀧𑀁 𑀫𑀦𑀲𑀸𑀧𑀺 𑀘𑀺𑀦𑁆𑀢𑀬𑁂, 𑀅𑀤𑀼𑀩𑁆𑀪𑀧𑀸𑀡𑀻 𑀤𑀳𑀢𑁂 𑀫𑀺𑀢𑁆𑀢𑀤𑀼𑀩𑁆𑀪𑀺𑀁.

𑁨𑁬𑁫. ‘‘𑀬𑁄 𑀧𑀼𑀩𑁆𑀩𑁂 𑀓𑀢𑀓𑀮𑁆𑀬𑀸𑀡𑁄, 𑀧𑀘𑁆𑀙𑀸 𑀧𑀸𑀧𑁂𑀦 𑀳𑀺𑀁𑀲𑀢𑀺;

𑀅𑀮𑁆𑀮𑀧𑀸𑀡𑀺𑀳𑀢𑁄 [𑀅𑀤𑀼𑀩𑁆𑀪𑀺𑀧𑀸𑀡𑀻𑀳𑀢𑁄 (𑀓)] 𑀧𑁄𑀲𑁄, 𑀦 𑀲𑁄 𑀪𑀤𑁆𑀭𑀸𑀦𑀺 𑀧𑀲𑁆𑀲𑀢𑀻’’𑀢𑀺.

𑁨𑁬𑁬. ‘‘𑀦𑀸𑀳𑀁 𑀤𑁂𑀯𑁂𑀦 𑀯𑀸 𑀫𑀦𑀼𑀲𑁆𑀲𑁂𑀦 𑀯𑀸, 𑀇𑀲𑁆𑀲𑀭𑀺𑀬𑁂𑀦 𑀯𑀸𑀳𑀁 𑀲𑀼𑀧𑁆𑀧𑀲𑀬𑁆𑀳𑁄;

𑀬𑀓𑁆𑀔𑁄𑀳𑀫𑀲𑁆𑀫𑀺 𑀧𑀭𑀫𑀺𑀤𑁆𑀥𑀺𑀧𑀢𑁆𑀢𑁄, 𑀤𑀽𑀭𑀗𑁆𑀕𑀫𑁄 𑀯𑀡𑁆𑀡𑀩𑀮𑀽𑀧𑀧𑀦𑁆𑀦𑁄’’𑀢𑀺.

𑁨𑁬𑁭. ‘‘𑀧𑀸𑀡𑀺 𑀢𑁂 𑀲𑀩𑁆𑀩𑀲𑁄 𑀯𑀡𑁆𑀡𑁄, 𑀧𑀜𑁆𑀘𑀥𑀸𑀭𑁄 𑀫𑀥𑀼𑀲𑁆𑀲𑀯𑁄;

𑀦𑀸𑀦𑀸𑀭𑀲𑀸 𑀧𑀕𑁆𑀖𑀭𑀦𑁆𑀢𑀺, 𑀫𑀜𑁆𑀜𑁂𑀳𑀁 𑀢𑀁 𑀧𑀼𑀭𑀺𑀦𑁆𑀤𑀤’’𑀦𑁆𑀢𑀺.

𑁨𑁬𑁮. ‘‘𑀦𑀸𑀫𑁆𑀳𑀺 𑀤𑁂𑀯𑁄 𑀦 𑀕𑀦𑁆𑀥𑀩𑁆𑀩𑁄, 𑀦𑀸𑀧𑀺 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;

𑀧𑁂𑀢𑀁 𑀫𑀁 𑀅𑀗𑁆𑀓𑀼𑀭 𑀚𑀸𑀦𑀸𑀳𑀺, 𑀭𑁄𑀭𑀼𑀯𑀫𑁆𑀳𑀸 [𑀳𑁂𑀭𑀼𑀯𑀫𑁆𑀳𑀸 (𑀲𑀻.)] 𑀇𑀥𑀸𑀕𑀢’’𑀦𑁆𑀢𑀺.

𑁨𑁬𑁯. ‘‘𑀓𑀺𑀁𑀲𑀻𑀮𑁄 𑀓𑀺𑀁𑀲𑀫𑀸𑀘𑀸𑀭𑁄, 𑀭𑁄𑀭𑀼𑀯𑀲𑁆𑀫𑀺𑀁 𑀧𑀼𑀭𑁂 𑀢𑀼𑀯𑀁;

𑀓𑁂𑀦 𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀻’’𑀢𑀺.

𑁨𑁭𑁦. ‘‘𑀢𑀼𑀦𑁆𑀦𑀯𑀸𑀬𑁄 𑀧𑀼𑀭𑁂 𑀆𑀲𑀺𑀁, 𑀭𑁄𑀭𑀼𑀯𑀲𑁆𑀫𑀺𑀁 𑀢𑀤𑀸 𑀅𑀳𑀁;

𑀲𑀼𑀓𑀺𑀘𑁆𑀙𑀯𑀼𑀢𑁆𑀢𑀺 𑀓𑀧𑀡𑁄, 𑀦 𑀫𑁂 𑀯𑀺𑀚𑁆𑀚𑀢𑀺 𑀤𑀸𑀢𑀯𑁂.

𑁨𑁭𑁧. ‘‘𑀦𑀺𑀯𑁂𑀲𑀦𑀜𑁆𑀘 [𑀆𑀯𑁂𑀲𑀦𑀜𑁆𑀘 (𑀲𑀻.)] 𑀫𑁂 𑀆𑀲𑀺, 𑀅𑀲𑀬𑁆𑀳𑀲𑁆𑀲 𑀉𑀧𑀦𑁆𑀢𑀺𑀓𑁂;

𑀲𑀤𑁆𑀥𑀲𑁆𑀲 𑀤𑀸𑀦𑀧𑀢𑀺𑀦𑁄, 𑀓𑀢𑀧𑀼𑀜𑁆𑀜𑀲𑁆𑀲 𑀮𑀚𑁆𑀚𑀺𑀦𑁄.

𑁨𑁭𑁨. ‘‘𑀢𑀢𑁆𑀣 𑀬𑀸𑀘𑀦𑀓𑀸 𑀬𑀦𑁆𑀢𑀺, 𑀦𑀸𑀦𑀸𑀕𑁄𑀢𑁆𑀢𑀸 𑀯𑀦𑀺𑀩𑁆𑀩𑀓𑀸;

𑀢𑁂 𑀘 𑀫𑀁 𑀢𑀢𑁆𑀣 𑀧𑀼𑀘𑁆𑀙𑀦𑁆𑀢𑀺, 𑀅𑀲𑀬𑁆𑀳𑀲𑁆𑀲 𑀦𑀺𑀯𑁂𑀲𑀦𑀁.

𑁨𑁭𑁩. ‘‘𑀓𑀢𑁆𑀣 𑀕𑀘𑁆𑀙𑀸𑀫 𑀪𑀤𑁆𑀤𑀁 𑀯𑁄, 𑀓𑀢𑁆𑀣 𑀤𑀸𑀦𑀁 𑀧𑀤𑀻𑀬𑀢𑀺;

𑀢𑁂𑀲𑀸𑀳𑀁 𑀧𑀼𑀝𑁆𑀞𑁄 𑀅𑀓𑁆𑀔𑀸𑀫𑀺, 𑀅𑀲𑀬𑁆𑀳𑀲𑁆𑀲 𑀦𑀺𑀯𑁂𑀲𑀦𑀁.

𑁨𑁭𑁪. ‘‘𑀧𑀕𑁆𑀕𑀬𑁆𑀳 𑀤𑀓𑁆𑀔𑀺𑀡𑀁 𑀩𑀸𑀳𑀼𑀁, 𑀏𑀢𑁆𑀣 𑀕𑀘𑁆𑀙𑀣 𑀪𑀤𑁆𑀤𑀁 𑀯𑁄;

𑀏𑀢𑁆𑀣 𑀤𑀸𑀦𑀁 𑀧𑀤𑀻𑀬𑀢𑀺, 𑀅𑀲𑀬𑁆𑀳𑀲𑁆𑀲 𑀦𑀺𑀯𑁂𑀲𑀦𑁂.

𑁨𑁭𑁫. ‘‘𑀢𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄, 𑀢𑁂𑀦 𑀧𑀸𑀡𑀺 𑀫𑀥𑀼𑀲𑁆𑀲𑀯𑁄;

𑀢𑁂𑀦 𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀻’’𑀢𑀺.

𑁨𑁭𑁬. ‘‘𑀦 𑀓𑀺𑀭 𑀢𑁆𑀯𑀁 𑀅𑀤𑀸 𑀤𑀸𑀦𑀁, 𑀲𑀓𑀧𑀸𑀡𑀻𑀳𑀺 𑀓𑀲𑁆𑀲𑀘𑀺;

𑀧𑀭𑀲𑁆𑀲 𑀤𑀸𑀦𑀁 𑀅𑀦𑀼𑀫𑁄𑀤𑀫𑀸𑀦𑁄, 𑀧𑀸𑀡𑀺𑀁 𑀧𑀕𑁆𑀕𑀬𑁆𑀳 𑀧𑀸𑀯𑀤𑀺.

𑁨𑁭𑁭. ‘‘𑀢𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄, 𑀢𑁂𑀦 𑀧𑀸𑀡𑀺 𑀫𑀥𑀼𑀲𑁆𑀲𑀯𑁄;

𑀢𑁂𑀦 𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀺.

𑁨𑁭𑁮. ‘‘𑀬𑁄 𑀲𑁄 𑀤𑀸𑀦𑀫𑀤𑀸 𑀪𑀦𑁆𑀢𑁂, 𑀧𑀲𑀦𑁆𑀦𑁄 𑀲𑀓𑀧𑀸𑀡𑀺𑀪𑀺;

𑀲𑁄 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀓𑀺𑀁 𑀦𑀼 𑀲𑁄 𑀤𑀺𑀲𑀢𑀁 𑀕𑀢𑁄’’𑀢𑀺.

𑁨𑁭𑁯. ‘‘𑀦𑀸𑀳𑀁 𑀧𑀚𑀸𑀦𑀸𑀫𑀺 𑀅𑀲𑀬𑁆𑀳𑀲𑀸𑀳𑀺𑀦𑁄, 𑀅𑀗𑁆𑀕𑀻𑀭𑀲𑀲𑁆𑀲 𑀕𑀢𑀺𑀁 𑀆𑀕𑀢𑀺𑀁 𑀯𑀸;

𑀲𑀼𑀢𑀜𑁆𑀘 𑀫𑁂 𑀯𑁂𑀲𑁆𑀲𑀯𑀡𑀲𑁆𑀲 𑀲𑀦𑁆𑀢𑀺𑀓𑁂, 𑀲𑀓𑁆𑀓𑀲𑁆𑀲 𑀲𑀳𑀩𑁆𑀬𑀢𑀁 𑀕𑀢𑁄 𑀅𑀲𑀬𑁆𑀳𑁄’’𑀢𑀺.

𑁨𑁮𑁦. ‘‘𑀅𑀮𑀫𑁂𑀯 𑀓𑀸𑀢𑀼𑀁 𑀓𑀮𑁆𑀬𑀸𑀡𑀁, 𑀤𑀸𑀦𑀁 𑀤𑀸𑀢𑀼𑀁 𑀬𑀣𑀸𑀭𑀳𑀁;

𑀧𑀸𑀡𑀺𑀁 𑀓𑀸𑀫𑀤𑀤𑀁 𑀤𑀺𑀲𑁆𑀯𑀸, 𑀓𑁄 𑀧𑀼𑀜𑁆𑀜𑀁 𑀦 𑀓𑀭𑀺𑀲𑁆𑀲𑀢𑀺.

𑁨𑁮𑁧. ‘‘𑀲𑁄 𑀳𑀺 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀅𑀦𑀼𑀧𑁆𑀧𑀢𑁆𑀯𑀸𑀦 𑀤𑁆𑀯𑀸𑀭𑀓𑀁;

𑀤𑀸𑀦𑀁 𑀧𑀝𑁆𑀞𑀧𑀬𑀺𑀲𑁆𑀲𑀸𑀫𑀺, 𑀬𑀁 𑀫𑀫𑀲𑁆𑀲 𑀲𑀼𑀔𑀸𑀯𑀳𑀁.

𑁨𑁮𑁨. ‘‘𑀤𑀲𑁆𑀲𑀸𑀫𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀧𑀧𑀜𑁆𑀘 𑀉𑀤𑀧𑀸𑀦𑀜𑁆𑀘, 𑀤𑀼𑀕𑁆𑀕𑁂 𑀲𑀗𑁆𑀓𑀫𑀦𑀸𑀦𑀺 𑀘𑀸’’𑀢𑀺.

𑁨𑁮𑁩. ‘‘𑀓𑁂𑀦 𑀢𑁂 𑀅𑀗𑁆𑀕𑀼𑀮𑀻 𑀓𑀼𑀡𑀸 [𑀓𑀼𑀡𑁆𑀞𑀸 (𑀲𑀻. 𑀲𑁆𑀬𑀸.)], 𑀫𑀼𑀔𑀜𑁆𑀘 𑀓𑀼𑀡𑀮𑀻𑀓𑀢𑀁 [𑀓𑀼𑀡𑁆𑀟𑀮𑀻𑀓𑀢𑀁 (𑀲𑀻. 𑀲𑁆𑀬𑀸. 𑀓.)];

𑀅𑀓𑁆𑀔𑀻𑀦𑀺 𑀘 𑀧𑀕𑁆𑀖𑀭𑀦𑁆𑀢𑀺, 𑀓𑀺𑀁 𑀧𑀸𑀧𑀁 𑀧𑀓𑀢𑀁 𑀢𑀬𑀸’’𑀢𑀺.

𑁨𑁮𑁪. ‘‘𑀅𑀗𑁆𑀕𑀻𑀭𑀲𑀲𑁆𑀲 𑀕𑀳𑀧𑀢𑀺𑀦𑁄, 𑀲𑀤𑁆𑀥𑀲𑁆𑀲 𑀖𑀭𑀫𑁂𑀲𑀺𑀦𑁄;

𑀢𑀲𑁆𑀲𑀸𑀳𑀁 𑀤𑀸𑀦𑀯𑀺𑀲𑁆𑀲𑀕𑁆𑀕𑁂, 𑀤𑀸𑀦𑁂 𑀅𑀥𑀺𑀓𑀢𑁄 𑀅𑀳𑀼𑀁.

𑁨𑁮𑁫. ‘‘𑀢𑀢𑁆𑀣 𑀬𑀸𑀘𑀦𑀓𑁂 𑀤𑀺𑀲𑁆𑀯𑀸, 𑀆𑀕𑀢𑁂 𑀪𑁄𑀚𑀦𑀢𑁆𑀣𑀺𑀓𑁂;

𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑁆𑀫, 𑀅𑀓𑀸𑀲𑀺𑀁 𑀓𑀼𑀡𑀮𑀺𑀁 𑀫𑀼𑀔𑀁.

𑁨𑁮𑁬. ‘‘𑀢𑁂𑀦 𑀫𑁂 𑀅𑀗𑁆𑀕𑀼𑀮𑀻 𑀓𑀼𑀡𑀸, 𑀫𑀼𑀔𑀜𑁆𑀘 𑀓𑀼𑀡𑀮𑀻𑀓𑀢𑀁;

𑀅𑀓𑁆𑀔𑀻𑀦𑀺 𑀫𑁂 𑀧𑀕𑁆𑀖𑀭𑀦𑁆𑀢𑀺, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸’’𑀢𑀺.

𑁨𑁮𑁭. ‘‘𑀥𑀫𑁆𑀫𑁂𑀦 𑀢𑁂 𑀓𑀸𑀧𑀼𑀭𑀺𑀲, 𑀫𑀼𑀔𑀜𑁆𑀘 𑀓𑀼𑀡𑀮𑀻𑀓𑀢𑀁;

𑀅𑀓𑁆𑀔𑀻𑀦𑀺 𑀘 𑀧𑀕𑁆𑀖𑀭𑀦𑁆𑀢𑀺, 𑀬𑀁 𑀢𑀁 𑀧𑀭𑀲𑁆𑀲 𑀤𑀸𑀦𑀲𑁆𑀲;

𑀅𑀓𑀸𑀲𑀺 𑀓𑀼𑀡𑀮𑀺𑀁 𑀫𑀼𑀔𑀁.

𑁨𑁮𑁮. ‘‘𑀓𑀣𑀁 𑀳𑀺 𑀤𑀸𑀦𑀁 𑀤𑀤𑀫𑀸𑀦𑁄, 𑀓𑀭𑁂𑀬𑁆𑀬 𑀧𑀭𑀧𑀢𑁆𑀢𑀺𑀬𑀁;

𑀅𑀦𑁆𑀦𑀁 𑀧𑀸𑀦𑀁 𑀔𑀸𑀤𑀦𑀻𑀬𑀁, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘.

𑁨𑁮𑁯. ‘‘𑀲𑁄 𑀳𑀺 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀅𑀦𑀼𑀧𑁆𑀧𑀢𑁆𑀯𑀸𑀦 𑀤𑁆𑀯𑀸𑀭𑀓𑀁;

𑀤𑀸𑀦𑀁 𑀧𑀝𑁆𑀞𑀧𑀬𑀺𑀲𑁆𑀲𑀸𑀫𑀺, 𑀬𑀁 𑀫𑀫𑀲𑁆𑀲 𑀲𑀼𑀔𑀸𑀯𑀳𑀁.

𑁨𑁯𑁦. ‘‘𑀤𑀲𑁆𑀲𑀸𑀫𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀧𑀧𑀜𑁆𑀘 𑀉𑀤𑀧𑀸𑀦𑀜𑁆𑀘, 𑀤𑀼𑀕𑁆𑀕𑁂 𑀲𑀗𑁆𑀓𑀫𑀦𑀸𑀦𑀺 𑀘𑀸’’𑀢𑀺.

𑁨𑁯𑁧. 𑀢𑀢𑁄 𑀳𑀺 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸, 𑀅𑀦𑀼𑀧𑁆𑀧𑀢𑁆𑀯𑀸𑀦 𑀤𑁆𑀯𑀸𑀭𑀓𑀁;

𑀤𑀸𑀦𑀁 𑀧𑀝𑁆𑀞𑀧𑀬𑀺 𑀅𑀗𑁆𑀓𑀼𑀭𑁄, 𑀬𑀁𑀢𑀼𑀫𑀲𑁆𑀲 [𑀬𑀁 𑀢𑀁 𑀅𑀲𑁆𑀲 (𑀲𑁆𑀬𑀸.), 𑀬𑀦𑁆𑀢𑀫𑀲𑁆𑀲 (𑀓.)] 𑀲𑀼𑀔𑀸𑀯𑀳𑀁.

𑁨𑁯𑁨. 𑀅𑀤𑀸 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀧𑀧𑀜𑁆𑀘 𑀉𑀤𑀧𑀸𑀦𑀜𑁆𑀘, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁨𑁯𑁩. ‘‘𑀓𑁄 𑀙𑀸𑀢𑁄 𑀓𑁄 𑀘 𑀢𑀲𑀺𑀢𑁄, 𑀓𑁄 𑀯𑀢𑁆𑀣𑀁 𑀧𑀭𑀺𑀤𑀳𑀺𑀲𑁆𑀲𑀢𑀺;

𑀓𑀲𑁆𑀲 𑀲𑀦𑁆𑀢𑀸𑀦𑀺 𑀬𑁄𑀕𑁆𑀕𑀸𑀦𑀺, 𑀇𑀢𑁄 𑀬𑁄𑀚𑁂𑀦𑁆𑀢𑀼 𑀯𑀸𑀳𑀦𑀁.

𑁨𑁯𑁪. ‘‘𑀓𑁄 𑀙𑀢𑁆𑀢𑀺𑀘𑁆𑀙𑀢𑀺 𑀕𑀦𑁆𑀥𑀜𑁆𑀘, 𑀓𑁄 𑀫𑀸𑀮𑀁 𑀓𑁄 𑀉𑀧𑀸𑀳𑀦𑀁;

𑀇𑀢𑀺𑀲𑁆𑀲𑀼 𑀢𑀢𑁆𑀣 𑀖𑁄𑀲𑁂𑀦𑁆𑀢𑀺, 𑀓𑀧𑁆𑀧𑀓𑀸 𑀲𑀽𑀤𑀫𑀸𑀕𑀥𑀸 [𑀧𑀸𑀝𑀯𑀸 (𑀓.)];

𑀲𑀤𑀸 𑀲𑀸𑀬𑀜𑁆𑀘 𑀧𑀸𑀢𑁄 𑀘, 𑀅𑀗𑁆𑀓𑀼𑀭𑀲𑁆𑀲 𑀦𑀺𑀯𑁂𑀲𑀦𑁂.

𑁨𑁯𑁫. ‘‘‘𑀲𑀼𑀔𑀁 𑀲𑀼𑀧𑀢𑀺 𑀅𑀗𑁆𑀓𑀼𑀭𑁄’, 𑀇𑀢𑀺 𑀚𑀸𑀦𑀸𑀢𑀺 𑀫𑀁 𑀚𑀦𑁄;

𑀤𑀼𑀓𑁆𑀔𑀁 𑀲𑀼𑀧𑀸𑀫𑀺 𑀲𑀺𑀦𑁆𑀥𑀓 [𑀲𑀦𑁆𑀤𑀼𑀓, 𑀲𑀺𑀦𑁆𑀥𑀼𑀓 (𑀓.)], 𑀬𑀁 𑀦 𑀧𑀲𑁆𑀲𑀸𑀫𑀺 𑀬𑀸𑀘𑀓𑁂.

𑁨𑁯𑁬. ‘‘‘𑀲𑀼𑀔𑀁 𑀲𑀼𑀧𑀢𑀺 𑀅𑀗𑁆𑀓𑀼𑀭𑁄’, 𑀇𑀢𑀺 𑀚𑀸𑀦𑀸𑀢𑀺 𑀫𑀁 𑀚𑀦𑁄;

𑀤𑀼𑀓𑁆𑀔𑀁 𑀲𑀺𑀦𑁆𑀥𑀓 𑀲𑀼𑀧𑀸𑀫𑀺, 𑀅𑀧𑁆𑀧𑀓𑁂 𑀲𑀼 𑀯𑀦𑀺𑀩𑁆𑀩𑀓𑁂’’𑀢𑀺.

𑁨𑁯𑁭. ‘‘𑀲𑀓𑁆𑀓𑁄 𑀘𑁂 𑀢𑁂 𑀯𑀭𑀁 𑀤𑀚𑁆𑀚𑀸, 𑀢𑀸𑀯𑀢𑀺𑀁𑀲𑀸𑀦𑀫𑀺𑀲𑁆𑀲𑀭𑁄;

𑀓𑀺𑀲𑁆𑀲 𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲, 𑀯𑀭𑀫𑀸𑀦𑁄 𑀯𑀭𑀁 𑀯𑀭𑁂’’𑀢𑀺.

𑁨𑁯𑁮. ‘‘𑀲𑀓𑁆𑀓𑁄 𑀘𑁂 𑀫𑁂 𑀯𑀭𑀁 𑀤𑀚𑁆𑀚𑀸, 𑀢𑀸𑀯𑀢𑀺𑀁𑀲𑀸𑀦𑀫𑀺𑀲𑁆𑀲𑀭𑁄;

𑀓𑀸𑀮𑀼𑀝𑁆𑀞𑀺𑀢𑀲𑁆𑀲 𑀫𑁂 𑀲𑀢𑁄, 𑀲𑀼𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺;

𑀤𑀺𑀩𑁆𑀩𑀸 𑀪𑀓𑁆𑀔𑀸 𑀧𑀸𑀢𑀼𑀪𑀯𑁂𑀬𑁆𑀬𑀼𑀁, 𑀲𑀻𑀮𑀯𑀦𑁆𑀢𑁄 𑀘 𑀬𑀸𑀘𑀓𑀸.

𑁨𑁯𑁯. ‘‘𑀤𑀤𑀢𑁄 𑀫𑁂 𑀦 𑀔𑀻𑀬𑁂𑀣, 𑀤𑀢𑁆𑀯𑀸 𑀦𑀸𑀦𑀼𑀢𑀧𑁂𑀬𑁆𑀬𑀳𑀁;

𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀬𑁆𑀬𑀁, 𑀏𑀢𑀁 𑀲𑀓𑁆𑀓𑀁 𑀯𑀭𑀁 𑀯𑀭𑁂’’𑀢𑀺.

𑁩𑁦𑁦. ‘‘𑀦 𑀲𑀩𑁆𑀩𑀯𑀺𑀢𑁆𑀢𑀸𑀦𑀺 𑀧𑀭𑁂 𑀧𑀯𑁂𑀘𑁆𑀙𑁂, 𑀤𑀤𑁂𑀬𑁆𑀬 𑀤𑀸𑀦𑀜𑁆𑀘 𑀥𑀦𑀜𑁆𑀘 𑀭𑀓𑁆𑀔𑁂;

𑀢𑀲𑁆𑀫𑀸 𑀳𑀺 𑀤𑀸𑀦𑀸 𑀥𑀦𑀫𑁂𑀯 𑀲𑁂𑀬𑁆𑀬𑁄, 𑀅𑀢𑀺𑀧𑁆𑀧𑀤𑀸𑀦𑁂𑀦 𑀓𑀼𑀮𑀸 𑀦 𑀳𑁄𑀦𑁆𑀢𑀺.

𑁩𑁦𑁧. ‘‘𑀅𑀤𑀸𑀦𑀫𑀢𑀺𑀤𑀸𑀦𑀜𑁆𑀘, 𑀦𑀧𑁆𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀢𑀲𑁆𑀫𑀸 𑀳𑀺 𑀤𑀸𑀦𑀸 𑀥𑀦𑀫𑁂𑀯 𑀲𑁂𑀬𑁆𑀬𑁄, 𑀲𑀫𑁂𑀦 𑀯𑀢𑁆𑀢𑁂𑀬𑁆𑀬 𑀲 𑀥𑀻𑀭𑀥𑀫𑁆𑀫𑁄’’𑀢𑀺.

𑁩𑁦𑁨. ‘‘𑀅𑀳𑁄 𑀯𑀢 𑀭𑁂 𑀅𑀳𑀫𑁂𑀯 𑀤𑀚𑁆𑀚𑀁, 𑀲𑀦𑁆𑀢𑁄 𑀘 𑀫𑀁 𑀲𑀧𑁆𑀧𑀼𑀭𑀺𑀲𑀸 𑀪𑀚𑁂𑀬𑁆𑀬𑀼𑀁;

𑀫𑁂𑀖𑁄𑀯 𑀦𑀺𑀦𑁆𑀦𑀸𑀦𑀺 𑀧𑀭𑀺𑀧𑀽𑀭𑀬𑀦𑁆𑀢𑁄 [𑀪𑀺𑀧𑀽𑀭𑀬𑀦𑁆𑀢𑁄 (𑀲𑀻.), 𑀳𑀺 𑀧𑀽𑀭𑀬𑀦𑁆𑀢𑁄 (𑀲𑁆𑀬𑀸.)], 𑀲𑀦𑁆𑀢𑀧𑁆𑀧𑀬𑁂 𑀲𑀩𑁆𑀩𑀯𑀦𑀺𑀩𑁆𑀩𑀓𑀸𑀦𑀁.

𑁩𑁦𑁩. ‘‘𑀬𑀲𑁆𑀲 𑀬𑀸𑀘𑀦𑀓𑁂 𑀤𑀺𑀲𑁆𑀯𑀸, 𑀫𑀼𑀔𑀯𑀡𑁆𑀡𑁄 𑀧𑀲𑀻𑀤𑀢𑀺;

𑀤𑀢𑁆𑀯𑀸 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀢𑀁 𑀖𑀭𑀁 𑀯𑀲𑀢𑁄 𑀲𑀼𑀔𑀁.

𑁩𑁦𑁪. ‘‘𑀬𑀲𑁆𑀲 𑀬𑀸𑀘𑀦𑀓𑁂 𑀤𑀺𑀲𑁆𑀯𑀸, 𑀫𑀼𑀔𑀯𑀡𑁆𑀡𑁄 𑀧𑀲𑀻𑀤𑀢𑀺;

𑀤𑀢𑁆𑀯𑀸 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀏𑀲𑀸 𑀬𑀜𑁆𑀜𑀲𑁆𑀲 [𑀧𑀼𑀜𑁆𑀜𑀲𑁆𑀲 (𑀲𑀻.)] 𑀲𑀫𑁆𑀧𑀤𑀸.

𑁩𑁦𑁫. [𑀅. 𑀦𑀺. 𑁬.𑁩𑁭] ‘‘𑀧𑀼𑀩𑁆𑀩𑁂𑀯 𑀤𑀸𑀦𑀸 𑀲𑀼𑀫𑀦𑁄, 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑁂;

𑀤𑀢𑁆𑀯𑀸 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀏𑀲𑀸 𑀬𑀜𑁆𑀜𑀲𑁆𑀲 [𑀧𑀼𑀜𑁆𑀜𑀲𑁆𑀲 (𑀲𑀻.)] 𑀲𑀫𑁆𑀧𑀤𑀸’’𑀢𑀺.

𑁩𑁦𑁬. 𑀲𑀝𑁆𑀞𑀺 𑀯𑀸𑀳𑀲𑀳𑀲𑁆𑀲𑀸𑀦𑀺, 𑀅𑀗𑁆𑀓𑀼𑀭𑀲𑁆𑀲 𑀦𑀺𑀯𑁂𑀲𑀦𑁂;

𑀪𑁄𑀚𑀦𑀁 𑀤𑀻𑀬𑀢𑁂 𑀦𑀺𑀘𑁆𑀘𑀁, 𑀧𑀼𑀜𑁆𑀜𑀧𑁂𑀓𑁆𑀔𑀲𑁆𑀲 𑀚𑀦𑁆𑀢𑀼𑀦𑁄.

𑁩𑁦𑁭. 𑀢𑀺𑀲𑀳𑀲𑁆𑀲𑀸𑀦𑀺 𑀲𑀽𑀤𑀸𑀦𑀺 𑀳𑀺 [𑀲𑀽𑀤𑀸𑀦𑀺 (𑀲𑁆𑀬𑀸. 𑀓.)], 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸;

𑀅𑀗𑁆𑀓𑀼𑀭𑀁 𑀉𑀧𑀚𑀻𑀯𑀦𑁆𑀢𑀺, 𑀤𑀸𑀦𑁂 𑀬𑀜𑁆𑀜𑀲𑁆𑀲 𑀯𑀸𑀯𑀝𑀸 [𑀩𑁆𑀬𑀸𑀯𑀝𑀸 (𑀲𑀻.), 𑀧𑀸𑀯𑀝𑀸 (𑀲𑁆𑀬𑀸.)].

𑁩𑁦𑁮. 𑀲𑀝𑁆𑀞𑀺 𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸;

𑀅𑀗𑁆𑀓𑀼𑀭𑀲𑁆𑀲 𑀫𑀳𑀸𑀤𑀸𑀦𑁂, 𑀓𑀝𑁆𑀞𑀁 𑀨𑀸𑀮𑁂𑀦𑁆𑀢𑀺 𑀫𑀸𑀡𑀯𑀸.

𑁩𑁦𑁯. 𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸;

𑀅𑀗𑁆𑀓𑀼𑀭𑀲𑁆𑀲 𑀫𑀳𑀸𑀤𑀸𑀦𑁂, 𑀯𑀺𑀥𑀸 𑀧𑀺𑀡𑁆𑀟𑁂𑀦𑁆𑀢𑀺 𑀦𑀸𑀭𑀺𑀬𑁄.

𑁩𑁧𑁦. 𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸;

𑀅𑀗𑁆𑀓𑀼𑀭𑀲𑁆𑀲 𑀫𑀳𑀸𑀤𑀸𑀦𑁂, 𑀤𑀩𑁆𑀩𑀺𑀕𑀸𑀳𑀸 𑀉𑀧𑀝𑁆𑀞𑀺𑀢𑀸.

𑁩𑁧𑁧. 𑀩𑀳𑀼𑀁 𑀩𑀳𑀽𑀦𑀁 𑀧𑀸𑀤𑀸𑀲𑀺, 𑀘𑀺𑀭𑀁 𑀧𑀸𑀤𑀸𑀲𑀺 𑀔𑀢𑁆𑀢𑀺𑀬𑁄;

𑀲𑀓𑁆𑀓𑀘𑁆𑀘𑀜𑁆𑀘 𑀲𑀳𑀢𑁆𑀣𑀸 𑀘, 𑀘𑀺𑀢𑁆𑀢𑀻𑀓𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁.

𑁩𑁧𑁨. 𑀩𑀳𑀽 𑀫𑀸𑀲𑁂 𑀘 𑀧𑀓𑁆𑀔𑁂 𑀘, 𑀉𑀢𑀼𑀲𑀁𑀯𑀘𑁆𑀙𑀭𑀸𑀦𑀺 𑀘;

𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀅𑀗𑁆𑀓𑀼𑀭𑁄 𑀤𑀻𑀖𑀫𑀦𑁆𑀢𑀭𑀁.

𑁩𑁧𑁩. 𑀏𑀯𑀁 𑀤𑀢𑁆𑀯𑀸 𑀬𑀚𑀺𑀢𑁆𑀯𑀸 𑀘, 𑀅𑀗𑁆𑀓𑀼𑀭𑁄 𑀤𑀻𑀖𑀫𑀦𑁆𑀢𑀭𑀁;

𑀲𑁄 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀽𑀧𑀕𑁄 𑀅𑀳𑀼.

𑁩𑁧𑁪. 𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀢𑁆𑀯𑀸𑀦, 𑀅𑀦𑀼𑀭𑀼𑀤𑁆𑀥𑀲𑁆𑀲 𑀇𑀦𑁆𑀤𑀓𑁄;

𑀲𑁄 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀽𑀧𑀕𑁄 𑀅𑀳𑀼.

𑁩𑁧𑁫. 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀗𑁆𑀓𑀼𑀭𑀁, 𑀇𑀦𑁆𑀤𑀓𑁄 𑀅𑀢𑀺𑀭𑁄𑀘𑀢𑀺;

𑀭𑀽𑀧𑁂 𑀲𑀤𑁆𑀤𑁂 𑀭𑀲𑁂 𑀕𑀦𑁆𑀥𑁂, 𑀨𑁄𑀝𑁆𑀞𑀩𑁆𑀩𑁂 𑀘 𑀫𑀦𑁄𑀭𑀫𑁂.

𑁩𑁧𑁬. 𑀆𑀬𑀼𑀦𑀸 𑀬𑀲𑀲𑀸 𑀘𑁂𑀯, 𑀯𑀡𑁆𑀡𑁂𑀦 𑀘 𑀲𑀼𑀔𑁂𑀦 𑀘;

𑀆𑀥𑀺𑀧𑀘𑁆𑀘𑁂𑀦 𑀅𑀗𑁆𑀓𑀼𑀭𑀁, 𑀇𑀦𑁆𑀤𑀓𑁄 𑀅𑀢𑀺𑀭𑁄𑀘𑀢𑀺.

𑁩𑁧𑁭. 𑀢𑀸𑀯𑀢𑀺𑀁𑀲𑁂 𑀬𑀤𑀸 𑀩𑀼𑀤𑁆𑀥𑁄, 𑀲𑀺𑀮𑀸𑀬𑀁 𑀧𑀡𑁆𑀟𑀼𑀓𑀫𑁆𑀩𑀮𑁂;

𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑀫𑁆𑀳𑀺, 𑀯𑀺𑀳𑀸𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁩𑁧𑁮. 𑀤𑀲𑀲𑀼 𑀮𑁄𑀓𑀥𑀸𑀢𑀽𑀲𑀼, 𑀲𑀦𑁆𑀦𑀺𑀧𑀢𑀺𑀢𑁆𑀯𑀸𑀦 𑀤𑁂𑀯𑀢𑀸;

𑀧𑀬𑀺𑀭𑀼𑀧𑀸𑀲𑀦𑁆𑀢𑀺 𑀲𑀫𑁆𑀩𑀼𑀤𑁆𑀥𑀁, 𑀯𑀲𑀦𑁆𑀢𑀁 𑀦𑀕𑀫𑀼𑀤𑁆𑀥𑀦𑀺.

𑁩𑁧𑁯. 𑀦 𑀓𑁄𑀘𑀺 𑀤𑁂𑀯𑁄 𑀯𑀡𑁆𑀡𑁂𑀦, 𑀲𑀫𑁆𑀩𑀼𑀤𑁆𑀥𑀁 𑀅𑀢𑀺𑀭𑁄𑀘𑀢𑀺;

𑀲𑀩𑁆𑀩𑁂 𑀤𑁂𑀯𑁂 𑀅𑀢𑀺𑀓𑁆𑀓𑀫𑁆𑀫 [𑀅𑀥𑀺𑀕𑀬𑁆𑀳 (𑀲𑀻.), 𑀅𑀢𑀺𑀕𑁆𑀕𑀬𑁆𑀳 (𑀓)], 𑀲𑀫𑁆𑀩𑀼𑀤𑁆𑀥𑁄𑀯 𑀯𑀺𑀭𑁄𑀘𑀢𑀺.

𑁩𑁨𑁦. 𑀬𑁄𑀚𑀦𑀸𑀦𑀺 𑀤𑀲 𑀤𑁆𑀯𑁂 𑀘, 𑀅𑀗𑁆𑀓𑀼𑀭𑁄𑀬𑀁 𑀢𑀤𑀸 𑀅𑀳𑀼;

𑀅𑀯𑀺𑀤𑀽𑀭𑁂𑀯 𑀩𑀼𑀤𑁆𑀥𑀲𑁆𑀲 [𑀅𑀯𑀺𑀤𑀽𑀭𑁂 𑀲𑀫𑁆𑀩𑀼𑀤𑁆𑀥𑀲𑁆𑀲 (𑀓.)], 𑀇𑀦𑁆𑀤𑀓𑁄 𑀅𑀢𑀺𑀭𑁄𑀘𑀢𑀺.

𑁩𑁨𑁧. 𑀑𑀮𑁄𑀓𑁂𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀅𑀗𑁆𑀓𑀼𑀭𑀜𑁆𑀘𑀸𑀧𑀺 𑀇𑀦𑁆𑀤𑀓𑀁;

𑀤𑀓𑁆𑀔𑀺𑀡𑁂𑀬𑁆𑀬𑀁 𑀲𑀫𑁆𑀪𑀸𑀯𑁂𑀦𑁆𑀢𑁄 [𑀧𑀪𑀸𑀯𑁂𑀦𑁆𑀢𑁄 (𑀲𑀻.)], 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁩𑁨𑁨. ‘‘𑀫𑀳𑀸𑀤𑀸𑀦𑀁 𑀢𑀬𑀸 𑀤𑀺𑀦𑁆𑀦𑀁, 𑀅𑀗𑁆𑀓𑀼𑀭 𑀤𑀻𑀖𑀫𑀦𑁆𑀢𑀭𑀁;

𑀅𑀢𑀺𑀤𑀽𑀭𑁂 [𑀲𑀼𑀯𑀺𑀤𑀽𑀭𑁂 (𑀓.)] 𑀦𑀺𑀲𑀺𑀦𑁆𑀦𑁄𑀲𑀺, 𑀆𑀕𑀘𑁆𑀙 𑀫𑀫 𑀲𑀦𑁆𑀢𑀺𑀓𑁂’’𑀢𑀺.

𑁩𑁨𑁩. 𑀘𑁄𑀤𑀺𑀢𑁄 𑀪𑀸𑀯𑀺𑀢𑀢𑁆𑀢𑁂𑀦, 𑀅𑀗𑁆𑀓𑀼𑀭𑁄 𑀇𑀤𑀫𑀩𑁆𑀭𑀯𑀺;

‘‘𑀓𑀺𑀁 𑀫𑀬𑁆𑀳𑀁 𑀢𑁂𑀦 𑀤𑀸𑀦𑁂𑀦, 𑀤𑀓𑁆𑀔𑀺𑀡𑁂𑀬𑁆𑀬𑁂𑀦 𑀲𑀼𑀜𑁆𑀜𑀢𑀁.

𑁩𑁨𑁪. ‘‘𑀅𑀬𑀁 𑀲𑁄 𑀇𑀦𑁆𑀤𑀓𑁄 𑀬𑀓𑁆𑀔𑁄, 𑀤𑀚𑁆𑀚𑀸 𑀤𑀸𑀦𑀁 𑀧𑀭𑀺𑀢𑁆𑀢𑀓𑀁;

𑀅𑀢𑀺𑀭𑁄𑀘𑀢𑀺 𑀅𑀫𑁆𑀳𑁂𑀳𑀺, 𑀘𑀦𑁆𑀤𑁄 𑀢𑀸𑀭𑀕𑀡𑁂 𑀬𑀣𑀸’’𑀢𑀺.

𑁩𑁨𑁫. ‘‘𑀉𑀚𑁆𑀚𑀗𑁆𑀕𑀮𑁂 𑀬𑀣𑀸 𑀔𑁂𑀢𑁆𑀢𑁂, 𑀩𑀻𑀚𑀁 𑀩𑀳𑀼𑀫𑁆𑀧𑀺 𑀭𑁄𑀧𑀺𑀢𑀁;

𑀦 𑀯𑀺𑀧𑀼𑀮𑀨𑀮𑀁 𑀳𑁄𑀢𑀺, 𑀦𑀧𑀺 𑀢𑁄𑀲𑁂𑀢𑀺 𑀓𑀲𑁆𑀲𑀓𑀁.

𑁩𑁨𑁬. ‘‘𑀢𑀣𑁂𑀯 𑀤𑀸𑀦𑀁 𑀩𑀳𑀼𑀓𑀁, 𑀤𑀼𑀲𑁆𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑀁;

𑀦 𑀯𑀺𑀧𑀼𑀮𑀨𑀮𑀁 𑀳𑁄𑀢𑀺, 𑀦𑀧𑀺 𑀢𑁄𑀲𑁂𑀢𑀺 𑀤𑀸𑀬𑀓𑀁.

𑁩𑁨𑁭. ‘‘𑀬𑀣𑀸𑀧𑀺 𑀪𑀤𑁆𑀤𑀓𑁂 𑀔𑁂𑀢𑁆𑀢𑁂, 𑀩𑀻𑀚𑀁 𑀅𑀧𑁆𑀧𑀫𑁆𑀧𑀺 𑀭𑁄𑀧𑀺𑀢𑀁;

𑀲𑀫𑁆𑀫𑀸 𑀥𑀸𑀭𑀁 𑀧𑀯𑁂𑀘𑁆𑀙𑀦𑁆𑀢𑁂, 𑀨𑀮𑀁 𑀢𑁄𑀲𑁂𑀢𑀺 𑀓𑀲𑁆𑀲𑀓𑀁.

𑁩𑁨𑁮. ‘‘𑀢𑀣𑁂𑀯 𑀲𑀻𑀮𑀯𑀦𑁆𑀢𑁂𑀲𑀼, 𑀕𑀼𑀡𑀯𑀦𑁆𑀢𑁂𑀲𑀼 𑀢𑀸𑀤𑀺𑀲𑀼;

𑀅𑀧𑁆𑀧𑀓𑀫𑁆𑀧𑀺 𑀓𑀢𑀁 𑀓𑀸𑀭𑀁, 𑀧𑀼𑀜𑁆𑀜𑀁 𑀳𑁄𑀢𑀺 𑀫𑀳𑀧𑁆𑀨𑀮’’𑀦𑁆𑀢𑀺.

𑁩𑁨𑁯. 𑀯𑀺𑀘𑁂𑀬𑁆𑀬 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁;

𑀯𑀺𑀘𑁂𑀬𑁆𑀬 𑀤𑀸𑀦𑀁 𑀤𑀢𑁆𑀯𑀸𑀦, 𑀲𑀕𑁆𑀕𑀁 𑀕𑀘𑁆𑀙𑀦𑁆𑀢𑀺 𑀤𑀸𑀬𑀓𑀸.