𑁭. 𑀥𑀦𑀧𑀸𑀮𑀲𑁂𑀝𑁆𑀞𑀺𑀧𑁂𑀢𑀯𑀢𑁆𑀣𑀼

𑁨𑁨𑁭. ‘‘𑀦𑀕𑁆𑀕𑁄 𑀤𑀼𑀩𑁆𑀩𑀡𑁆𑀡𑀭𑀽𑀧𑁄𑀲𑀺, 𑀓𑀺𑀲𑁄 𑀥𑀫𑀦𑀺𑀲𑀦𑁆𑀣𑀢𑁄;

𑀉𑀧𑁆𑀨𑀸𑀲𑀼𑀮𑀺𑀓𑁄 𑀓𑀺𑀲𑀺𑀓𑁄, 𑀓𑁄 𑀦𑀼 𑀢𑁆𑀯𑀫𑀲𑀺 𑀫𑀸𑀭𑀺𑀲’’.

𑁨𑁨𑁮. ‘‘𑀅𑀳𑀁 𑀪𑀤𑀦𑁆𑀢𑁂 𑀧𑁂𑀢𑁄𑀫𑁆𑀳𑀺, 𑀤𑀼𑀕𑁆𑀕𑀢𑁄 𑀬𑀫𑀮𑁄𑀓𑀺𑀓𑁄;

𑀧𑀸𑀧𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑁄’’.

𑁨𑁨𑁯. ‘‘𑀓𑀺𑀁 𑀦𑀼 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀤𑀼𑀓𑁆𑀓𑀝𑀁 𑀓𑀢𑀁;

𑀓𑀺𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑁂𑀢𑀮𑁄𑀓𑀁 𑀇𑀢𑁄 𑀕𑀢𑁄’’.

𑁨𑁩𑁦. ‘‘𑀦𑀕𑀭𑀁 𑀅𑀢𑁆𑀣𑀺 𑀧𑀡𑁆𑀡𑀸𑀦𑀁 [𑀤𑀲𑀦𑁆𑀦𑀸𑀦𑀁 (𑀲𑀻. 𑀲𑁆𑀬𑀸. 𑀧𑀻.)], 𑀏𑀭𑀓𑀘𑁆𑀙𑀦𑁆𑀢𑀺 𑀯𑀺𑀲𑁆𑀲𑀼𑀢𑀁;

𑀢𑀢𑁆𑀣 𑀲𑁂𑀝𑁆𑀞𑀺 𑀧𑀼𑀭𑁂 𑀆𑀲𑀺𑀁, 𑀥𑀦𑀧𑀸𑀮𑁄𑀢𑀺 𑀫𑀁 𑀯𑀺𑀤𑀽.

𑁨𑁩𑁧. ‘‘𑀅𑀲𑀻𑀢𑀺 𑀲𑀓𑀝𑀯𑀸𑀳𑀸𑀦𑀁, 𑀳𑀺𑀭𑀜𑁆𑀜𑀲𑁆𑀲 𑀅𑀳𑁄𑀲𑀺 𑀫𑁂;

𑀧𑀳𑀽𑀢𑀁 𑀫𑁂 𑀚𑀸𑀢𑀭𑀽𑀧𑀁, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀩𑀳𑀽.

𑁨𑁩𑁨. ‘‘𑀢𑀸𑀯 𑀫𑀳𑀤𑁆𑀥𑀦𑀲𑁆𑀲𑀸𑀧𑀺, 𑀦 𑀫𑁂 𑀤𑀸𑀢𑀼𑀁 𑀧𑀺𑀬𑀁 𑀅𑀳𑀼;

𑀧𑀺𑀤𑀳𑀺𑀢𑁆𑀯𑀸 𑀤𑁆𑀯𑀸𑀭𑀁 𑀪𑀼𑀜𑁆𑀚𑀺𑀁 [𑀪𑀼𑀜𑁆𑀚𑀸𑀫𑀺 (𑀲𑀻. 𑀲𑁆𑀬𑀸.)], 𑀫𑀸 𑀫𑀁 𑀬𑀸𑀘𑀦𑀓𑀸𑀤𑁆𑀤𑀲𑀼𑀁.

𑁨𑁩𑁩. ‘‘𑀅𑀲𑁆𑀲𑀤𑁆𑀥𑁄 𑀫𑀘𑁆𑀙𑀭𑀻 𑀘𑀸𑀲𑀺𑀁, 𑀓𑀤𑀭𑀺𑀬𑁄 𑀧𑀭𑀺𑀪𑀸𑀲𑀓𑁄;

𑀤𑀤𑀦𑁆𑀢𑀸𑀦𑀁 𑀓𑀭𑁄𑀦𑁆𑀢𑀸𑀦𑀁, 𑀯𑀸𑀭𑀬𑀺𑀲𑁆𑀲𑀁 𑀩𑀳𑀼 𑀚𑀦𑁂 [𑀩𑀳𑀼𑀚𑁆𑀚𑀦𑀁 (𑀲𑀻. 𑀲𑁆𑀬𑀸.)].

𑁨𑁩𑁪. ‘‘𑀯𑀺𑀧𑀸𑀓𑁄 𑀦𑀢𑁆𑀣𑀺 𑀤𑀸𑀦𑀲𑁆𑀲, 𑀲𑀁𑀬𑀫𑀲𑁆𑀲 𑀓𑀼𑀢𑁄 𑀨𑀮𑀁;

𑀧𑁄𑀓𑁆𑀔𑀭𑀜𑁆𑀜𑁄𑀤𑀧𑀸𑀦𑀸𑀦𑀺, 𑀆𑀭𑀸𑀫𑀸𑀦𑀺 𑀘 𑀭𑁄𑀧𑀺𑀢𑁂;

𑀧𑀧𑀸𑀬𑁄 𑀘 𑀯𑀺𑀦𑀸𑀲𑁂𑀲𑀺𑀁, 𑀤𑀼𑀕𑁆𑀕𑁂 𑀲𑀗𑁆𑀓𑀫𑀦𑀸𑀦𑀺 𑀘.

𑁨𑁩𑁫. ‘‘𑀲𑁆𑀯𑀸𑀳𑀁 𑀅𑀓𑀢𑀓𑀮𑁆𑀬𑀸𑀡𑁄, 𑀓𑀢𑀧𑀸𑀧𑁄 𑀢𑀢𑁄 𑀘𑀼𑀢𑁄;

𑀉𑀧𑀧𑀦𑁆𑀦𑁄 𑀧𑁂𑀢𑁆𑀢𑀺𑀯𑀺𑀲𑀬𑀁, 𑀔𑀼𑀧𑁆𑀧𑀺𑀧𑀸𑀲𑀲𑀫𑀧𑁆𑀧𑀺𑀢𑁄.

𑁨𑁩𑁬. ‘‘𑀧𑀜𑁆𑀘𑀧𑀡𑁆𑀡𑀸𑀲𑀯𑀲𑁆𑀲𑀸𑀦𑀺, 𑀬𑀢𑁄 𑀓𑀸𑀮𑀗𑁆𑀓𑀢𑁄 𑀅𑀳𑀁;

𑀦𑀸𑀪𑀺𑀚𑀸𑀦𑀸𑀫𑀺 𑀪𑀼𑀢𑁆𑀢𑀁 𑀯𑀸, 𑀧𑀻𑀢𑀁 𑀯𑀸 𑀧𑀦 𑀧𑀸𑀦𑀺𑀬𑀁.

𑁨𑁩𑁭. ‘‘𑀬𑁄 𑀲𑀁𑀬𑀫𑁄 𑀲𑁄 𑀯𑀺𑀦𑀸𑀲𑁄,𑀬𑁄 𑀯𑀺𑀦𑀸𑀲𑁄 𑀲𑁄 𑀲𑀁𑀬𑀫𑁄;

𑀧𑁂𑀢𑀸 𑀳𑀺 𑀓𑀺𑀭 𑀚𑀸𑀦𑀦𑁆𑀢𑀺, 𑀬𑁄 𑀲𑀁𑀬𑀫𑁄 𑀲𑁄 𑀯𑀺𑀦𑀸𑀲𑁄.

𑁨𑁩𑁮. ‘‘𑀅𑀳𑀁 𑀧𑀼𑀭𑁂 𑀲𑀁𑀬𑀫𑀺𑀲𑁆𑀲𑀁, 𑀦𑀸𑀤𑀸𑀲𑀺𑀁 𑀩𑀳𑀼𑀓𑁂 𑀥𑀦𑁂;

𑀲𑀦𑁆𑀢𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀤𑀻𑀧𑀁 𑀦𑀸𑀓𑀸𑀲𑀺𑀫𑀢𑁆𑀢𑀦𑁄;

𑀲𑁆𑀯𑀸𑀳𑀁 𑀧𑀘𑁆𑀙𑀸𑀦𑀼𑀢𑀧𑁆𑀧𑀸𑀫𑀺, 𑀅𑀢𑁆𑀢𑀓𑀫𑁆𑀫𑀨𑀮𑀽𑀧𑀕𑁄.

𑁨𑁩𑁯. [𑀧𑁂. 𑀯. 𑁬𑁯] ‘‘𑀉𑀤𑁆𑀥𑀁 𑀘𑀢𑀽𑀳𑀺 𑀫𑀸𑀲𑁂𑀳𑀺, 𑀓𑀸𑀮𑀁𑀓𑀺𑀭𑀺𑀬𑀸 𑀪𑀯𑀺𑀲𑁆𑀲𑀢𑀺;

𑀏𑀓𑀦𑁆𑀢𑀓𑀝𑀼𑀓𑀁 𑀖𑁄𑀭𑀁, 𑀦𑀺𑀭𑀬𑀁 𑀧𑀧𑀢𑀺𑀲𑁆𑀲𑀳𑀁.

𑁨𑁪𑁦. [𑀧𑁂. 𑀯. 𑁭𑁦] ‘‘𑀘𑀢𑀼𑀓𑁆𑀓𑀡𑁆𑀡𑀁 𑀘𑀢𑀼𑀤𑁆𑀯𑀸𑀭𑀁, 𑀯𑀺𑀪𑀢𑁆𑀢𑀁 𑀪𑀸𑀕𑀲𑁄 𑀫𑀺𑀢𑀁;

𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑀁, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑀁.

𑁨𑁪𑁧. [𑀧𑁂. 𑀯. 𑁭𑁧] ‘‘𑀢𑀲𑁆𑀲 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸 𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀤𑀸.

𑁨𑁪𑁨. [𑀧𑁂. 𑀯. 𑁭𑁨] ‘‘𑀢𑀢𑁆𑀣𑀸𑀳𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀤𑀼𑀓𑁆𑀔𑀁 𑀯𑁂𑀤𑀺𑀲𑁆𑀲 𑀯𑁂𑀤𑀦𑀁;

𑀨𑀮𑀁 𑀧𑀸𑀧𑀲𑁆𑀲 𑀓𑀫𑁆𑀫𑀲𑁆𑀲, 𑀢𑀲𑁆𑀫𑀸 𑀲𑁄𑀘𑀸𑀫𑀳𑀁 𑀪𑀼𑀲𑀁.

𑁨𑁪𑁩. ‘‘𑀢𑀁 𑀯𑁄 𑀯𑀤𑀸𑀫𑀺 𑀪𑀤𑁆𑀤𑀁 𑀯𑁄, 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀫𑀸𑀓𑀢𑁆𑀣 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄.

𑁨𑁪𑁪. ‘‘𑀲𑀘𑁂 𑀢𑀁 𑀧𑀸𑀧𑀓𑀁 𑀓𑀫𑁆𑀫𑀁, 𑀓𑀭𑀺𑀲𑁆𑀲𑀣 𑀓𑀭𑁄𑀣 𑀯𑀸;

𑀦 𑀯𑁄 𑀤𑀼𑀓𑁆𑀔𑀸 𑀧𑀫𑀼𑀢𑁆𑀬𑀢𑁆𑀣𑀺 [𑀧𑀫𑀼𑀢𑁆𑀢𑀢𑁆𑀣𑀺 (𑀲𑀩𑁆𑀩𑀢𑁆𑀣) 𑀉𑀤𑀸. 𑁪𑁪 𑀧𑀲𑁆𑀲𑀺𑀢𑀩𑁆𑀩𑀁], 𑀉𑀧𑁆𑀧𑀘𑁆𑀘𑀸𑀧𑀺 [𑀉𑀧𑁂𑀘𑁆𑀘𑀸𑀧𑀺 (𑀲𑁆𑀬𑀸. 𑀓.)] 𑀧𑀮𑀸𑀬𑀢𑀁.

𑁨𑁪𑁫. ‘‘𑀫𑀢𑁆𑀢𑁂𑀬𑁆𑀬𑀸 𑀳𑁄𑀣 𑀧𑁂𑀢𑁆𑀢𑁂𑀬𑁆𑀬𑀸, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀸;

𑀲𑀸𑀫𑀜𑁆𑀜𑀸 𑀳𑁄𑀣 𑀩𑁆𑀭𑀳𑁆𑀫𑀜𑁆𑀜𑀸, 𑀏𑀯𑀁 𑀲𑀕𑁆𑀕𑀁 𑀕𑀫𑀺𑀲𑁆𑀲𑀣𑀸’’𑀢𑀺.

𑀥𑀦𑀧𑀸𑀮𑀲𑁂𑀝𑁆𑀞𑀺𑀧𑁂𑀢𑀯𑀢𑁆𑀣𑀼 𑀲𑀢𑁆𑀢𑀫𑀁.