𑁮. 𑀕𑁄𑀡𑀧𑁂𑀢𑀯𑀢𑁆𑀣𑀼

𑁪𑁬. ‘‘𑀓𑀺𑀁 𑀦𑀼 𑀉𑀫𑁆𑀫𑀢𑁆𑀢𑀭𑀽𑀧𑁄𑀯, 𑀮𑀸𑀬𑀺𑀢𑁆𑀯𑀸 𑀳𑀭𑀺𑀢𑀁 𑀢𑀺𑀡𑀁;

𑀔𑀸𑀤 𑀔𑀸𑀤𑀸𑀢𑀺 𑀮𑀧𑀲𑀺, 𑀕𑀢𑀲𑀢𑁆𑀢𑀁 𑀚𑀭𑀕𑁆𑀕𑀯𑀁.

𑁪𑁭. ‘‘𑀦 𑀳𑀺 𑀅𑀦𑁆𑀦𑁂𑀦 𑀧𑀸𑀦𑁂𑀦, 𑀫𑀢𑁄 𑀕𑁄𑀡𑁄 𑀲𑀫𑀼𑀝𑁆𑀞𑀳𑁂;

𑀢𑁆𑀯𑀁𑀲𑀺 𑀩𑀸𑀮𑁄 𑀘 [𑀩𑀸𑀮𑁄𑀯 (𑀓.)] 𑀤𑀼𑀫𑁆𑀫𑁂𑀥𑁄, 𑀬𑀣𑀸 𑀢𑀜𑁆𑀜𑁄𑀯 𑀤𑀼𑀫𑁆𑀫𑀢𑀻’’𑀢𑀺.

𑁪𑁮. ‘‘𑀇𑀫𑁂 𑀧𑀸𑀤𑀸 𑀇𑀤𑀁 𑀲𑀻𑀲𑀁, 𑀅𑀬𑀁 𑀓𑀸𑀬𑁄 𑀲𑀯𑀸𑀮𑀥𑀺;

𑀦𑁂𑀢𑁆𑀢𑀸 𑀢𑀣𑁂𑀯 𑀢𑀺𑀝𑁆𑀞𑀦𑁆𑀢𑀺, 𑀅𑀬𑀁 𑀕𑁄𑀡𑁄 𑀲𑀫𑀼𑀝𑁆𑀞𑀳𑁂.

𑁪𑁯. ‘‘𑀦𑀸𑀬𑁆𑀬𑀓𑀲𑁆𑀲 𑀳𑀢𑁆𑀣𑀧𑀸𑀤𑀸, 𑀓𑀸𑀬𑁄 𑀲𑀻𑀲𑀜𑁆𑀘 𑀤𑀺𑀲𑁆𑀲𑀢𑀺;

𑀭𑀼𑀤𑀁 𑀫𑀢𑁆𑀢𑀺𑀓𑀣𑀽𑀧𑀲𑁆𑀫𑀺𑀁, 𑀦𑀦𑀼 𑀢𑁆𑀯𑀜𑁆𑀜𑁂𑀯 𑀤𑀼𑀫𑁆𑀫𑀢𑀻’’𑀢𑀺.

𑁫𑁦. ‘‘𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁫𑁧. ‘‘𑀅𑀩𑁆𑀩𑀳𑀻 [𑀅𑀩𑁆𑀩𑀽𑀴𑁆𑀳𑀁 (𑀩𑀳𑀽𑀲𑀼)] 𑀯𑀢 𑀫𑁂 𑀲𑀮𑁆𑀮𑀁, 𑀲𑁄𑀓𑀁 𑀳𑀤𑀬𑀦𑀺𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀺𑀢𑀼𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁫𑁨. ‘‘𑀲𑁆𑀯𑀸𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀲𑀻𑀢𑀺𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀫𑀸𑀡𑀯’.

𑁫𑁩. 𑀏𑀯𑀁 𑀓𑀭𑁄𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀬𑁂 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀓𑀸;

𑀯𑀺𑀦𑀺𑀯𑀢𑁆𑀢𑀬𑀦𑁆𑀢𑀺 𑀲𑁄𑀓𑀫𑁆𑀳𑀸, 𑀲𑀼𑀚𑀸𑀢𑁄 𑀧𑀺𑀢𑀭𑀁 𑀬𑀣𑀸𑀢𑀺.

𑀕𑁄𑀡𑀧𑁂𑀢𑀯𑀢𑁆𑀣𑀼 𑀅𑀝𑁆𑀞𑀫𑀁.