𑁨. 𑀦𑀺𑀤𑁆𑀤𑁂𑀲𑁄

𑁨𑁧𑁦. 𑀓𑀢𑀫𑁄 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄? 𑀇𑀥 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀲𑀼𑀜𑁆𑀜𑀫𑀺𑀤𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸’’𑀢𑀺. 𑀲𑁄 𑀢𑀢𑁆𑀣 𑀅𑀪𑀺𑀦𑀺𑀯𑁂𑀲𑀁 𑀦 𑀓𑀭𑁄𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀬𑀁 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄? 𑀇𑀥 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀲𑀼𑀜𑁆𑀜𑀫𑀺𑀤𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸’’𑀢𑀺. 𑀲𑁄 𑀢𑀢𑁆𑀣 𑀦𑀺𑀫𑀺𑀢𑁆𑀢𑀁 𑀦 𑀓𑀭𑁄𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀬𑀁 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄? 𑀇𑀥 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀲𑀼𑀜𑁆𑀜𑀫𑀺𑀤𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸’’𑀢𑀺. 𑀲𑁄 𑀢𑀢𑁆𑀣 𑀧𑀡𑀺𑀥𑀺𑀁 𑀦 𑀓𑀭𑁄𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀬𑀁 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀅𑀚𑁆𑀛𑀢𑁆𑀢𑀯𑀼𑀝𑁆𑀞𑀸𑀦𑁄 𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑁋 𑀅𑀬𑀁 𑀅𑀚𑁆𑀛𑀢𑁆𑀢𑀯𑀼𑀝𑁆𑀞𑀸𑀦𑁄 𑀯𑀺𑀫𑁄𑀓𑁆𑀔𑁄. 𑀓𑀢𑀫𑁄 𑀩𑀳𑀺𑀤𑁆𑀥𑀸𑀯𑀼𑀝𑁆𑀞𑀸𑀦𑁄 𑀯𑀺𑀫𑁄𑀓𑁆𑀔𑁄? 𑀘𑀢𑀲𑁆𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑁋 𑀅𑀬𑀁 𑀩𑀳𑀺𑀤𑁆𑀥𑀸𑀯𑀼𑀝𑁆𑀞𑀸𑀦𑁄 𑀯𑀺𑀫𑁄𑀓𑁆𑀔𑁄. 𑀓𑀢𑀫𑁄 𑀤𑀼𑀪𑀢𑁄 𑀯𑀼𑀝𑁆𑀞𑀸𑀦𑁄 𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑁋 𑀅𑀬𑀁 𑀤𑀼𑀪𑀢𑁄 𑀯𑀼𑀝𑁆𑀞𑀸𑀦𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁂 𑀅𑀚𑁆𑀛𑀢𑁆𑀢𑀯𑀼𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸? 𑀧𑀞𑀫𑀁 𑀛𑀸𑀦𑀁 𑀦𑀻𑀯𑀭𑀡𑁂𑀳𑀺 𑀯𑀼𑀝𑁆𑀞𑀸𑀢𑀺. 𑀤𑀼𑀢𑀺𑀬𑀁 𑀛𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀯𑀼𑀝𑁆𑀞𑀸𑀢𑀺. 𑀢𑀢𑀺𑀬𑀁 𑀛𑀸𑀦𑀁 𑀧𑀻𑀢𑀺𑀬𑀸 𑀯𑀼𑀝𑁆𑀞𑀸𑀢𑀺. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀼𑀔𑀤𑀼𑀓𑁆𑀔𑁂𑀳𑀺 𑀯𑀼𑀝𑁆𑀞𑀸𑀢𑀺. 𑀇𑀫𑁂 𑀅𑀚𑁆𑀛𑀢𑁆𑀢𑀯𑀼𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸.

𑀓𑀢𑀫𑁂 𑀩𑀳𑀺𑀤𑁆𑀥𑀸𑀯𑀼𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸? 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀭𑀽𑀧𑀲𑀜𑁆𑀜𑀸𑀬 𑀧𑀝𑀺𑀖𑀲𑀜𑁆𑀜𑀸𑀬 𑀦𑀸𑀦𑀢𑁆𑀢𑀲𑀜𑁆𑀜𑀸𑀬 𑀯𑀼𑀝𑁆𑀞𑀸𑀢𑀺. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀯𑀼𑀝𑁆𑀞𑀸𑀢𑀺. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀯𑀼𑀝𑁆𑀞𑀸𑀢𑀺. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬 𑀯𑀼𑀝𑁆𑀞𑀸𑀢𑀺. 𑀇𑀫𑁂 𑀩𑀳𑀺𑀤𑁆𑀥𑀸𑀯𑀼𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸.

𑀓𑀢𑀫𑁂 𑀤𑀼𑀪𑀢𑁄 𑀯𑀼𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸 𑀤𑀺𑀝𑁆𑀞𑀸𑀦𑀼𑀲𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸 𑀯𑀼𑀝𑁆𑀞𑀸𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀼𑀝𑁆𑀞𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀼𑀝𑁆𑀞𑀸𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸 𑀯𑀼𑀝𑁆𑀞𑀸𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀼𑀝𑁆𑀞𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀼𑀝𑁆𑀞𑀸𑀢𑀺. 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸 𑀯𑀼𑀝𑁆𑀞𑀸𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀼𑀝𑁆𑀞𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀼𑀝𑁆𑀞𑀸𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀭𑀽𑀧𑀭𑀸𑀕𑀸 𑀅𑀭𑀽𑀧𑀭𑀸𑀕𑀸 𑀫𑀸𑀦𑀸 𑀉𑀤𑁆𑀥𑀘𑁆𑀘𑀸 𑀅𑀯𑀺𑀚𑁆𑀚𑀸𑀬 𑀫𑀸𑀦𑀸𑀦𑀼𑀲𑀬𑀸 𑀪𑀯𑀭𑀸𑀕𑀸𑀦𑀼𑀲𑀬𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑀸 𑀯𑀼𑀝𑁆𑀞𑀸𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀼𑀝𑁆𑀞𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀼𑀝𑁆𑀞𑀸𑀢𑀺. 𑀇𑀫𑁂 𑀤𑀼𑀪𑀢𑁄 𑀯𑀼𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸.

𑁨𑁧𑁧. 𑀓𑀢𑀫𑁂 𑀅𑀚𑁆𑀛𑀢𑁆𑀢𑀯𑀼𑀝𑁆𑀞𑀸𑀦𑀸𑀦𑀁 𑀅𑀦𑀼𑀮𑁄𑀫𑀸 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸? 𑀧𑀞𑀫𑀁 𑀛𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘, 𑀤𑀼𑀢𑀺𑀬𑀁 𑀛𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘 𑁋 𑀇𑀫𑁂 𑀅𑀚𑁆𑀛𑀢𑁆𑀢𑀯𑀼𑀝𑁆𑀞𑀸𑀦𑀸𑀦𑀁 𑀅𑀦𑀼𑀮𑁄𑀫𑀸 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸.

𑀓𑀢𑀫𑁂 𑀩𑀳𑀺𑀤𑁆𑀥𑀸𑀯𑀼𑀝𑁆𑀞𑀸𑀦𑀸𑀦𑀁 𑀅𑀦𑀼𑀮𑁄𑀫𑀸 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸? 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 …𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘 𑁋 𑀇𑀫𑁂 𑀩𑀳𑀺𑀤𑁆𑀥𑀸𑀯𑀼𑀝𑁆𑀞𑀸𑀦𑀸𑀦𑀁 𑀅𑀦𑀼𑀮𑁄𑀫𑀸 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸.

𑀓𑀢𑀫𑁂 𑀤𑀼𑀪𑀢𑁄 𑀯𑀼𑀝𑁆𑀞𑀸𑀦𑀸𑀦𑀁 𑀅𑀦𑀼𑀮𑁄𑀫𑀸 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸,𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸,𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸,𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸,𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑁋 𑀇𑀫𑁂 𑀤𑀼𑀪𑀢𑁄 𑀯𑀼𑀝𑁆𑀞𑀸𑀦𑀸𑀦𑀁 𑀅𑀦𑀼𑀮𑁄𑀫𑀸 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸.

𑀓𑀢𑀫𑁂 𑀅𑀚𑁆𑀛𑀢𑁆𑀢𑀯𑀼𑀝𑁆𑀞𑀸𑀦𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸? 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀮𑀸𑀪𑁄 𑀯𑀸 𑀯𑀺𑀧𑀸𑀓𑁄 𑀯𑀸, 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲…𑀧𑁂… 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲…𑀧𑁂… 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀮𑀸𑀪𑁄 𑀯𑀸 𑀯𑀺𑀧𑀸𑀓𑁄 𑀯𑀸 𑁋 𑀇𑀫𑁂 𑀅𑀚𑁆𑀛𑀢𑁆𑀢𑀯𑀼𑀝𑁆𑀞𑀸𑀦𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸.

𑀓𑀢𑀫𑁂 𑀩𑀳𑀺𑀤𑁆𑀥𑀸𑀯𑀼𑀝𑁆𑀞𑀸𑀦𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸? 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀧𑀝𑀺𑀮𑀸𑀪𑁄 𑀯𑀸 𑀯𑀺𑀧𑀸𑀓𑁄 𑀯𑀸, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀧𑀝𑀺𑀮𑀸𑀪𑁄 𑀯𑀸 𑀯𑀺𑀧𑀸𑀓𑁄 𑀯𑀸 𑁋 𑀇𑀫𑁂 𑀩𑀳𑀺𑀤𑁆𑀥𑀸𑀯𑀼𑀝𑁆𑀞𑀸𑀦𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸.

𑀓𑀢𑀫𑁂 𑀤𑀼𑀪𑀢𑁄 𑀯𑀼𑀝𑁆𑀞𑀸𑀦𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀁, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀲𑀓𑀤𑀸𑀕𑀸𑀫𑀺𑀨𑀮𑀁, 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀅𑀦𑀸𑀕𑀸𑀫𑀺𑀨𑀮𑀁, 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀅𑀭𑀳𑀢𑁆𑀢𑀨𑀮𑀁 𑁋 𑀇𑀫𑁂 𑀤𑀼𑀪𑀢𑁄 𑀯𑀼𑀝𑁆𑀞𑀸𑀦𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻 𑀘𑀢𑁆𑀢𑀸𑀭𑁄 𑀯𑀺𑀫𑁄𑀓𑁆𑀔𑀸.

𑁨𑁧𑁨. 𑀓𑀣𑀁 𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑁋 𑀯𑀺𑀫𑁄𑀓𑁆𑀔𑁄? 𑀇𑀥𑁂𑀓𑀘𑁆𑀘𑁄 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀦𑀻𑀮𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑀺, 𑀦𑀻𑀮𑀲𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀭𑁄𑀢𑀺, 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑀺, 𑀲𑁆𑀯𑀸𑀯𑀢𑁆𑀣𑀺𑀢𑀁 𑀅𑀯𑀢𑁆𑀣𑀸𑀧𑁂𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀲𑀽𑀧𑀥𑀸𑀭𑀺𑀢𑀁 [𑀲𑀼𑀧𑀥𑀸𑀭𑀺𑀢𑀁 (𑀓.)] 𑀉𑀧𑀥𑀸𑀭𑁂𑀢𑁆𑀯𑀸 𑀲𑁆𑀯𑀸𑀯𑀢𑁆𑀣𑀺𑀢𑀁 𑀅𑀯𑀢𑁆𑀣𑀸𑀧𑁂𑀢𑁆𑀯𑀸 𑀩𑀳𑀺𑀤𑁆𑀥𑀸 𑀦𑀻𑀮𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀺, 𑀦𑀻𑀮𑀲𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀭𑁄𑀢𑀺, 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑀺, 𑀲𑁆𑀯𑀸𑀯𑀢𑁆𑀣𑀺𑀢𑀁 𑀅𑀯𑀢𑁆𑀣𑀸𑀧𑁂𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀉𑀧𑀥𑀸𑀭𑁂𑀢𑁆𑀯𑀸 𑀲𑁆𑀯𑀸𑀯𑀢𑁆𑀣𑀺𑀢𑀁 𑀅𑀯𑀢𑁆𑀣𑀸𑀧𑁂𑀢𑁆𑀯𑀸 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘 𑀉𑀪𑀬𑀫𑀺𑀤𑀁 𑀭𑀽𑀧’’𑀦𑁆𑀢𑀺, 𑀭𑀽𑀧𑀲𑀜𑁆𑀜𑀻 𑀳𑁄𑀢𑀺. 𑀇𑀥𑁂𑀓𑀘𑁆𑀘𑁄 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀧𑀻𑀢𑀦𑀺𑀫𑀺𑀢𑁆𑀢𑀁…𑀧𑁂… 𑀮𑁄𑀳𑀺𑀢𑀦𑀺𑀫𑀺𑀢𑁆𑀢𑀁…𑀧𑁂… 𑀑𑀤𑀸𑀢𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑀺, 𑀑𑀤𑀸𑀢𑀲𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀭𑁄𑀢𑀺, 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑀺, 𑀲𑁆𑀯𑀸𑀯𑀢𑁆𑀣𑀺𑀢𑀁 𑀅𑀯𑀢𑁆𑀣𑀸𑀧𑁂𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑁆𑀯𑀸 𑀲𑁆𑀯𑀸𑀯𑀢𑁆𑀣𑀺𑀢𑀁 𑀅𑀯𑀢𑁆𑀣𑀸𑀧𑁂𑀢𑁆𑀯𑀸 𑀩𑀳𑀺𑀤𑁆𑀥𑀸 𑀑𑀤𑀸𑀢𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀺, 𑀑𑀤𑀸𑀢𑀲𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀭𑁄𑀢𑀺, 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑀺, 𑀲𑁆𑀯𑀸𑀯𑀢𑁆𑀣𑀺𑀢𑀁 𑀅𑀯𑀢𑁆𑀣𑀸𑀧𑁂𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑁆𑀯𑀸 𑀲𑁆𑀯𑀸𑀯𑀢𑁆𑀣𑀺𑀢𑀁 𑀅𑀯𑀢𑁆𑀣𑀸𑀧𑁂𑀢𑁆𑀯𑀸 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘 𑀉𑀪𑀬𑀫𑀺𑀤𑀁 𑀭𑀽𑀧’’𑀦𑁆𑀢𑀺, 𑀭𑀽𑀧𑀲𑀜𑁆𑀜𑀻 𑀳𑁄𑀢𑀺. 𑀏𑀯𑀁 𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑁋 𑀯𑀺𑀫𑁄𑀓𑁆𑀔𑁄.

𑀓𑀣𑀁 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑁋 𑀯𑀺𑀫𑁄𑀓𑁆𑀔𑁄? 𑀇𑀥𑁂𑀓𑀘𑁆𑀘𑁄 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀦𑀻𑀮𑀦𑀺𑀫𑀺𑀢𑁆𑀢𑀁 𑀦 𑀫𑀦𑀲𑀺𑀓𑀭𑁄𑀢𑀺, 𑀦𑀻𑀮𑀲𑀜𑁆𑀜𑀁 𑀦 𑀧𑀝𑀺𑀮𑀪𑀢𑀺; 𑀩𑀳𑀺𑀤𑁆𑀥𑀸 𑀦𑀻𑀮𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀺, 𑀦𑀻𑀮𑀲𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀭𑁄𑀢𑀺, 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑀺, 𑀲𑁆𑀯𑀸𑀯𑀢𑁆𑀣𑀺𑀢𑀁 𑀅𑀯𑀢𑁆𑀣𑀸𑀧𑁂𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑁆𑀯𑀸 𑀲𑁆𑀯𑀸𑀯𑀢𑁆𑀣𑀺𑀢𑀁 𑀅𑀯𑀢𑁆𑀣𑀸𑀧𑁂𑀢𑁆𑀯𑀸 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀁, 𑀩𑀳𑀺𑀤𑁆𑀥𑀸 𑀭𑀽𑀧𑀫𑀺𑀤’’𑀦𑁆𑀢𑀺, 𑀭𑀽𑀧𑀲𑀜𑁆𑀜𑀻 𑀳𑁄𑀢𑀺. 𑀇𑀥𑁂𑀓𑀘𑁆𑀘𑁄 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀧𑀻𑀢𑀦𑀺𑀫𑀺𑀢𑁆𑀢𑀁…𑀧𑁂… 𑀮𑁄𑀳𑀺𑀢𑀦𑀺𑀫𑀺𑀢𑁆𑀢𑀁…𑀧𑁂… 𑀑𑀤𑀸𑀢𑀦𑀺𑀫𑀺𑀢𑁆𑀢𑀁 𑀦 𑀫𑀦𑀲𑀺𑀓𑀭𑁄𑀢𑀺, 𑀑𑀤𑀸𑀢𑀲𑀜𑁆𑀜𑀁 𑀦 𑀧𑀝𑀺𑀮𑀪𑀢𑀺; 𑀩𑀳𑀺𑀤𑁆𑀥𑀸 𑀑𑀤𑀸𑀢𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀺, 𑀑𑀤𑀸𑀢𑀲𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀭𑁄𑀢𑀺, 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑀺, 𑀲𑁆𑀯𑀸𑀯𑀢𑁆𑀣𑀺𑀢𑀁 𑀅𑀯𑀢𑁆𑀣𑀸𑀧𑁂𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑁆𑀯𑀸 𑀲𑁆𑀯𑀸𑀯𑀢𑁆𑀣𑀺𑀢𑀁 𑀅𑀯𑀢𑁆𑀣𑀸𑀧𑁂𑀢𑁆𑀯𑀸 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀁 𑀩𑀳𑀺𑀤𑁆𑀥𑀸 𑀭𑀽𑀧𑀫𑀺𑀤’’𑀦𑁆𑀢𑀺, 𑀭𑀽𑀧𑀲𑀜𑁆𑀜𑀻 𑀳𑁄𑀢𑀺. 𑀏𑀯𑀁 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑁋 𑀯𑀺𑀫𑁄𑀓𑁆𑀔𑁄.

𑀓𑀣𑀁 ‘‘𑀲𑀼𑀪’’𑀦𑁆𑀢𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑁋 𑀯𑀺𑀫𑁄𑀓𑁆𑀔𑁄? 𑀇𑀥 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 [𑀅𑀩𑁆𑀬𑀸𑀧𑀚𑁆𑀛𑁂𑀦 (𑀲𑁆𑀬𑀸.)] 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀫𑁂𑀢𑁆𑀢𑀸𑀬 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀓𑀭𑀼𑀡𑀸𑀬 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺. 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀬 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺. 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺…𑀧𑁂… 𑀉𑀧𑁂𑀓𑁆𑀔𑀸𑀬 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺. 𑀏𑀯𑀁 ‘‘𑀲𑀼𑀪𑀁’’ 𑀢𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑁋 𑀯𑀺𑀫𑁄𑀓𑁆𑀔𑁄.

𑁨𑁧𑁩. 𑀓𑀢𑀫𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀯𑀺𑀫𑁄𑀓𑁆𑀔𑁄? 𑀇𑀥 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘‘𑀅𑀦𑀦𑁆𑀢𑁄 𑀆𑀓𑀸𑀲𑁄’’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀯𑀺𑀫𑁄𑀓𑁆𑀔𑁄? 𑀇𑀥 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀯𑀺𑀫𑁄𑀓𑁆𑀔𑁄? 𑀇𑀥 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀯𑀺𑀫𑁄𑀓𑁆𑀔𑁄? 𑀇𑀥 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀯𑀺𑀫𑁄𑀓𑁆𑀔𑁄? 𑀇𑀥 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀲𑀫𑀬𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑀺 𑀘 𑀛𑀸𑀦𑀸𑀦𑀺 𑀘𑀢𑀲𑁆𑀲𑁄 𑀘 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑁋 𑀅𑀬𑀁 𑀲𑀫𑀬𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀅𑀲𑀫𑀬𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘 𑁋 𑀅𑀬𑀁 𑀅𑀲𑀫𑀬𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀲𑀸𑀫𑀬𑀺𑀓𑁄 𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑀺 𑀘 𑀛𑀸𑀦𑀸𑀦𑀺, 𑀘𑀢𑀲𑁆𑀲𑁄 𑀘 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑁋 𑀅𑀬𑀁 𑀲𑀸𑀫𑀬𑀺𑀓𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀅𑀲𑀸𑀫𑀬𑀺𑀓𑁄 𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘 𑁋 𑀅𑀬𑀁 𑀅𑀲𑀸𑀫𑀬𑀺𑀓𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀓𑀼𑀧𑁆𑀧𑁄 𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑀺 𑀘 𑀛𑀸𑀦𑀸𑀦𑀺, 𑀘𑀢𑀲𑁆𑀲𑁄 𑀘 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑁋 𑀅𑀬𑀁 𑀓𑀼𑀧𑁆𑀧𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀅𑀓𑀼𑀧𑁆𑀧𑁄 𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘 𑁋 𑀅𑀬𑀁 𑀅𑀓𑀼𑀧𑁆𑀧𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀮𑁄𑀓𑀺𑀬𑁄 𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑀺 𑀘 𑀛𑀸𑀦𑀸𑀦𑀺, 𑀘𑀢𑀲𑁆𑀲𑁄 𑀘 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑁋 𑀅𑀬𑀁 𑀮𑁄𑀓𑀺𑀬𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀮𑁄𑀓𑀼𑀢𑁆𑀢𑀭𑁄 𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘 𑁋 𑀅𑀬𑀁 𑀮𑁄𑀓𑀼𑀢𑁆𑀢𑀭𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀲𑀸𑀲𑀯𑁄 𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑀺 𑀘 𑀛𑀸𑀦𑀸𑀦𑀺, 𑀘𑀢𑀲𑁆𑀲𑁄 𑀘 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑁋 𑀅𑀬𑀁 𑀲𑀸𑀲𑀯𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀅𑀦𑀸𑀲𑀯𑁄 𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘 𑁋 𑀅𑀬𑀁 𑀅𑀦𑀸𑀲𑀯𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀲𑀸𑀫𑀺𑀲𑁄 𑀯𑀺𑀫𑁄𑀓𑁆𑀔𑁄? 𑀭𑀽𑀧𑀧𑁆𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑁄𑀓𑁆𑀔𑁄 𑁋 𑀅𑀬𑀁 𑀲𑀸𑀫𑀺𑀲𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀦𑀺𑀭𑀸𑀫𑀺𑀲𑁄 𑀯𑀺𑀫𑁄𑀓𑁆𑀔𑁄? 𑀅𑀭𑀽𑀧𑀧𑁆𑀧𑀝𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑁄𑀓𑁆𑀔𑁄 𑁋 𑀅𑀬𑀁 𑀦𑀺𑀭𑀸𑀫𑀺𑀲𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀦𑀺𑀭𑀸𑀫𑀺𑀲𑀸 𑀦𑀺𑀭𑀸𑀫𑀺𑀲𑀢𑀭𑁄 𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘 𑁋 𑀅𑀬𑀁 𑀦𑀺𑀭𑀸𑀫𑀺𑀲𑀸𑀦𑀺𑀭𑀸𑀫𑀺𑀲𑀢𑀭𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑀺 𑀘 𑀛𑀸𑀦𑀸𑀦𑀺, 𑀘𑀢𑀲𑁆𑀲𑁄 𑀘 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑁋 𑀅𑀬𑀁 𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀓𑀢𑀫𑁄 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘 𑁋 𑀅𑀬𑀁 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀧𑀡𑀺𑀳𑀺𑀢𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀯𑀺𑀫𑁄𑀓𑁆𑀔𑁄? 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀮𑀸𑀪𑁄 𑀯𑀸 𑀯𑀺𑀧𑀸𑀓𑁄 𑀯𑀸 …𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀧𑀝𑀺𑀮𑀸𑀪𑁄 𑀯𑀸 𑀯𑀺𑀧𑀸𑀓𑁄 𑀯𑀸 𑁋 𑀅𑀬𑀁 𑀧𑀡𑀺𑀳𑀺𑀢𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑀺 𑀘 𑀛𑀸𑀦𑀸𑀦𑀺, 𑀘𑀢𑀲𑁆𑀲𑁄 𑀘 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑁋 𑀅𑀬𑀁 𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘 𑁋 𑀅𑀬𑀁 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀏𑀓𑀢𑁆𑀢𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘 𑁋 𑀅𑀬𑀁 𑀏𑀓𑀢𑁆𑀢𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀦𑀸𑀦𑀢𑁆𑀢𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑀺 𑀘 𑀛𑀸𑀦𑀸𑀦𑀺, 𑀘𑀢𑀲𑁆𑀲𑁄 𑀘 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑁋 𑀅𑀬𑀁 𑀦𑀸𑀦𑀢𑁆𑀢𑀯𑀺𑀫𑁄𑀓𑁆𑀔𑁄.

𑁨𑁧𑁪. 𑀓𑀢𑀫𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄? 𑀲𑀺𑀬𑀸 𑀏𑀓𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄 𑀤𑀲 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸 𑀏𑀓𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄 𑀳𑁄𑀢𑀺, 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦. 𑀓𑀣𑀜𑁆𑀘 𑀲𑀺𑀬𑀸? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀁 𑀦𑀺𑀘𑁆𑀘𑀢𑁄 𑀲𑀜𑁆𑀜𑀸𑀬 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀁 𑀲𑀼𑀔𑀢𑁄 𑀲𑀜𑁆𑀜𑀸𑀬 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀢𑁆𑀢𑀢𑁄 𑀲𑀜𑁆𑀜𑀸𑀬 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀦𑁆𑀤𑀺𑀬𑀸 𑀲𑀜𑁆𑀜𑀸𑀬 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀭𑀸𑀕𑀢𑁄 𑀲𑀜𑁆𑀜𑀸𑀬 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀫𑀼𑀤𑀬𑀢𑁄 𑀲𑀜𑁆𑀜𑀸𑀬 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀆𑀤𑀸𑀦𑀢𑁄 𑀲𑀜𑁆𑀜𑀸𑀬 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄. 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀫𑀺𑀢𑁆𑀢𑀢𑁄 𑀲𑀜𑁆𑀜𑀸𑀬 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄. 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀧𑀡𑀺𑀥𑀺𑀬𑀸 𑀲𑀜𑁆𑀜𑀸𑀬 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄. 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀲𑀜𑁆𑀜𑀸𑀬 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄. 𑀏𑀯𑀁 𑀲𑀺𑀬𑀸 𑀏𑀓𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄 𑀤𑀲 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸 𑀏𑀓𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦.

𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀲𑀜𑁆𑀜𑀸𑀬 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄…𑀧𑁂… 𑀭𑀽𑀧𑁂 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀲𑀜𑁆𑀜𑀸𑀬 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄. 𑀏𑀯𑀁 𑀲𑀺𑀬𑀸 𑀏𑀓𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄 𑀤𑀲 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸 𑀏𑀓𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦.

𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂… 𑀘𑀓𑁆𑀔𑀼𑀲𑁆𑀫𑀺𑀁…𑀧𑁂… 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀲𑀜𑁆𑀜𑀸𑀬 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄…𑀧𑁂… 𑀚𑀭𑀸𑀫𑀭𑀡𑁂 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀲𑀜𑁆𑀜𑀸𑀬 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄. 𑀏𑀯𑀁 𑀲𑀺𑀬𑀸, 𑀏𑀓𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄 𑀤𑀲 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸 𑀏𑀓𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦 𑁋 𑀅𑀬𑀁 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑁄.

𑁨𑁧𑁫. 𑀓𑀢𑀫𑁄 𑀜𑀸𑀡𑀯𑀺𑀫𑁄𑀓𑁆𑀔𑁄? 𑀲𑀺𑀬𑀸 𑀏𑀓𑁄 𑀜𑀸𑀡𑀯𑀺𑀫𑁄𑀓𑁆𑀔𑁄 𑀤𑀲 𑀜𑀸𑀡𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀜𑀸𑀡𑀯𑀺𑀫𑁄𑀓𑁆𑀔𑀸 𑀏𑀓𑁄 𑀜𑀸𑀡𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦 𑀲𑀺𑀬𑀸𑀢𑀺. 𑀓𑀣𑀜𑁆𑀘 𑀲𑀺𑀬𑀸? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀦𑀺𑀘𑁆𑀘𑀢𑁄 𑀲𑀫𑁆𑀫𑁄𑀳𑀸 𑀅𑀜𑁆𑀜𑀸𑀡𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀜𑀸𑀡𑀯𑀺𑀫𑁄𑀓𑁆𑀔𑁄. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀲𑀼𑀔𑀢𑁄 𑀲𑀫𑁆𑀫𑁄𑀳𑀸 𑀅𑀜𑁆𑀜𑀸𑀡𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀜𑀸𑀡𑀯𑀺𑀫𑁄𑀓𑁆𑀔𑁄. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑁆𑀫𑁄𑀳𑀸 𑀅𑀜𑁆𑀜𑀸𑀡𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀜𑀸𑀡𑀯𑀺𑀫𑁄𑀓𑁆𑀔𑁄. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀦𑀦𑁆𑀤𑀺𑀬𑀸 𑀲𑀫𑁆𑀫𑁄𑀳𑀸 𑀅𑀜𑁆𑀜𑀸𑀡𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀜𑀸𑀡𑀯𑀺𑀫𑁄𑀓𑁆𑀔𑁄. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀭𑀸𑀕𑀢𑁄 𑀲𑀫𑁆𑀫𑁄𑀳𑀸 𑀅𑀜𑁆𑀜𑀸𑀡𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀜𑀸𑀡𑀯𑀺𑀫𑁄𑀓𑁆𑀔𑁄. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀲𑀫𑀼𑀤𑀬𑀢𑁄 𑀲𑀫𑁆𑀫𑁄𑀳𑀸 𑀅𑀜𑁆𑀜𑀸𑀡𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀜𑀸𑀡𑀯𑀺𑀫𑁄𑀓𑁆𑀔𑁄. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀆𑀤𑀸𑀦𑀢𑁄 𑀲𑀫𑁆𑀫𑁄𑀳𑀸 𑀅𑀜𑁆𑀜𑀸𑀡𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀜𑀸𑀡𑀯𑀺𑀫𑁄𑀓𑁆𑀔𑁄. 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀦𑀺𑀫𑀺𑀢𑁆𑀢𑀢𑁄 𑀲𑀫𑁆𑀫𑁄𑀳𑀸 𑀅𑀜𑁆𑀜𑀸𑀡𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀜𑀸𑀡𑀯𑀺𑀫𑁄𑀓𑁆𑀔𑁄. 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸 𑀣𑀸𑀪𑀽𑀢𑀁 𑀜𑀸𑀡𑀁 𑀧𑀡𑀺𑀥𑀺𑀬𑀸 𑀲𑀫𑁆𑀫𑁄𑀳𑀸 𑀅𑀜𑁆𑀜𑀸𑀡𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀜𑀸𑀡𑀯𑀺𑀫𑁄𑀓𑁆𑀔𑁄. 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀲𑀫𑁆𑀫𑁄𑀳𑀸 𑀅𑀜𑁆𑀜𑀸𑀡𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀜𑀸𑀡𑀯𑀺𑀫𑁄𑀓𑁆𑀔𑁄. 𑀏𑀯𑀁 𑀲𑀺𑀬𑀸 𑀏𑀓𑁄 𑀜𑀸𑀡𑀯𑀺𑀫𑁄𑀓𑁆𑀔𑁄 𑀤𑀲 𑀜𑀸𑀡𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀜𑀸𑀡𑀯𑀺𑀫𑁄𑀓𑁆𑀔𑀸 𑀏𑀓𑁄 𑀜𑀸𑀡𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦.

𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀦𑀺𑀘𑁆𑀘𑀢𑁄 𑀲𑀫𑁆𑀫𑁄𑀳𑀸 𑀅𑀜𑁆𑀜𑀸𑀡𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀜𑀸𑀡𑀯𑀺𑀫𑁄𑀓𑁆𑀔𑁄…𑀧𑁂… 𑀭𑀽𑀧𑁂 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀲𑀫𑁆𑀫𑁄𑀳𑀸 𑀅𑀜𑁆𑀜𑀸𑀡𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀜𑀸𑀡𑀯𑀺𑀫𑁄𑀓𑁆𑀔𑁄. 𑀏𑀯𑀁 𑀲𑀺𑀬𑀸 𑀏𑀓𑁄 𑀜𑀸𑀡𑀯𑀺𑀫𑁄𑀓𑁆𑀔𑁄 𑀤𑀲 𑀜𑀸𑀡𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀜𑀸𑀡𑀯𑀺𑀫𑁄𑀓𑁆𑀔𑀸 𑀏𑀓𑁄 𑀜𑀸𑀡𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦.

𑀯𑁂𑀤𑀦𑀸𑀬 …𑀧𑁂… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂… 𑀘𑀓𑁆𑀔𑀼𑀲𑁆𑀫𑀺𑀁…𑀧𑁂… 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀦𑀺𑀘𑁆𑀘𑀢𑁄 𑀲𑀫𑁆𑀫𑁄𑀳𑀸 𑀅𑀜𑁆𑀜𑀸𑀡𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀜𑀸𑀡𑀯𑀺𑀫𑁄𑀓𑁆𑀔𑁄…𑀧𑁂… 𑀚𑀭𑀸𑀫𑀭𑀡𑁂 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀲𑀫𑁆𑀫𑁄𑀳𑀸 𑀅𑀜𑁆𑀜𑀸𑀡𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀜𑀸𑀡𑀯𑀺𑀫𑁄𑀓𑁆𑀔𑁄. 𑀏𑀯𑀁 𑀲𑀺𑀬𑀸 𑀏𑀓𑁄 𑀜𑀸𑀡𑀯𑀺𑀫𑁄𑀓𑁆𑀔𑁄 𑀤𑀲 𑀜𑀸𑀡𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀜𑀸𑀡𑀯𑀺𑀫𑁄𑀓𑁆𑀔𑀸 𑀏𑀓𑁄 𑀜𑀸𑀡𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦 𑁋 𑀅𑀬𑀁 𑀜𑀸𑀡𑀯𑀺𑀫𑁄𑀓𑁆𑀔𑁄.

𑁨𑁧𑁬. 𑀓𑀢𑀫𑁄 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄? 𑀲𑀺𑀬𑀸 𑀏𑀓𑁄 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄 𑀤𑀲 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑀸 𑀏𑀓𑁄 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦 𑀲𑀺𑀬𑀸𑀢𑀺. 𑀓𑀣𑀜𑁆𑀘 𑀲𑀺𑀬𑀸? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀜𑀸𑀡𑀁 𑀦𑀺𑀘𑁆𑀘𑀢𑁄 𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀤𑀭𑀣𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀜𑀸𑀡𑀁 𑀲𑀼𑀔𑀢𑁄 𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀤𑀭𑀣𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀜𑀸𑀡𑀁 𑀅𑀢𑁆𑀢𑀢𑁄 𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀤𑀭𑀣𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀜𑀸𑀡𑀁 𑀦𑀦𑁆𑀤𑀺𑀬𑀸 𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀤𑀭𑀣𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀜𑀸𑀡𑀁 𑀭𑀸𑀕𑀢𑁄 𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀤𑀭𑀣𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀜𑀸𑀡𑀁 𑀲𑀫𑀼𑀤𑀬𑀢𑁄 𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀤𑀭𑀣𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀜𑀸𑀡𑀁 𑀆𑀤𑀸𑀦𑀢𑁄 𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀤𑀭𑀣𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄. 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀜𑀸𑀡𑀁 𑀦𑀺𑀫𑀺𑀢𑁆𑀢𑀢𑁄 𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀤𑀭𑀣𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄. 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀜𑀸𑀡𑀁 𑀧𑀡𑀺𑀥𑀺𑀬𑀸 𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀤𑀭𑀣𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄. 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀤𑀭𑀣𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄. 𑀏𑀯𑀁 𑀲𑀺𑀬𑀸 𑀏𑀓𑁄 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄 𑀤𑀲 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑀸 𑀏𑀓𑁄 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦.

𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀜𑀸𑀡𑀁 𑀦𑀺𑀘𑁆𑀘𑀢𑁄 𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀤𑀭𑀣𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄…𑀧𑁂… 𑀭𑀽𑀧𑁂 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀤𑀭𑀣𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄. 𑀏𑀯𑀁 𑀲𑀺𑀬𑀸 𑀏𑀓𑁄 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄 𑀤𑀲 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑀸 𑀏𑀓𑁄 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦.

𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂… 𑀘𑀓𑁆𑀔𑀼𑀲𑁆𑀫𑀺𑀁…𑀧𑁂… 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀜𑀸𑀡𑀁 𑀦𑀺𑀘𑁆𑀘𑀢𑁄 𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀤𑀭𑀣𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄…𑀧𑁂… 𑀚𑀭𑀸𑀫𑀭𑀡𑁂 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸 𑀅𑀦𑀼𑀢𑁆𑀢𑀭𑀁 𑀲𑀻𑀢𑀺𑀪𑀸𑀯𑀁 𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀤𑀭𑀣𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄. 𑀏𑀯𑀁 𑀲𑀺𑀬𑀸 𑀏𑀓𑁄 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄 𑀤𑀲 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑀸 𑀏𑀓𑁄 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦 𑁋 𑀅𑀬𑀁 𑀲𑀻𑀢𑀺𑀲𑀺𑀬𑀸𑀯𑀺𑀫𑁄𑀓𑁆𑀔𑁄.

𑁨𑁧𑁭. 𑀓𑀢𑀫𑁄 𑀛𑀸𑀦𑀯𑀺𑀫𑁄𑀓𑁆𑀔𑁄? 𑀦𑁂𑀓𑁆𑀔𑀫𑁆𑀫𑀁 𑀛𑀸𑀬𑀢𑀻𑀢𑀺 [𑀚𑀸𑀬𑀢𑀻𑀢𑀺 (𑀲𑁆𑀬𑀸.)] 𑀛𑀸𑀦𑀁. 𑀓𑀸𑀫𑀘𑁆𑀙𑀦𑁆𑀤𑀁 𑀛𑀸𑀧𑁂𑀢𑀻𑀢𑀺 𑁋 𑀛𑀸𑀦𑀁. 𑀛𑀸𑀬𑀦𑁆𑀢𑁄 [𑀚𑀸𑀬𑀦𑁆𑀢𑁄 (𑀲𑁆𑀬𑀸.)] 𑀫𑀼𑀘𑁆𑀘𑀢𑀻𑀢𑀺 𑁋 𑀛𑀸𑀦𑀯𑀺𑀫𑁄𑀓𑁆𑀔𑁄. 𑀛𑀸𑀧𑁂𑀦𑁆𑀢𑁄 𑀫𑀼𑀘𑁆𑀘𑀢𑀻𑀢𑀺 𑁋 𑀛𑀸𑀦𑀯𑀺𑀫𑁄𑀓𑁆𑀔𑁄. 𑀛𑀸𑀬𑀦𑁆𑀢𑀻𑀢𑀺 𑁋 𑀥𑀫𑁆𑀫𑀸. 𑀛𑀸𑀧𑁂𑀢𑀻𑀢𑀺 𑁋 𑀓𑀺𑀮𑁂𑀲𑁂. 𑀛𑀸𑀢𑁂 𑀘 𑀛𑀸𑀧𑁂 𑀘 𑀚𑀸𑀦𑀸𑀢𑀻𑀢𑀺 𑁋 𑀛𑀸𑀦𑀯𑀺𑀫𑁄𑀓𑁆𑀔𑁄. 𑀅𑀩𑁆𑀬𑀸𑀧𑀸𑀤𑁄 𑀛𑀸𑀬𑀢𑀻𑀢𑀺 𑁋 𑀛𑀸𑀦𑀁. 𑀩𑁆𑀬𑀸𑀧𑀸𑀤𑀁 𑀛𑀸𑀧𑁂𑀢𑀻𑀢𑀺 𑁋 𑀛𑀸𑀦𑀁. 𑀛𑀸𑀬𑀦𑁆𑀢𑁄 𑀫𑀼𑀘𑁆𑀘𑀢𑀻𑀢𑀺 𑁋 𑀛𑀸𑀦𑀯𑀺𑀫𑁄𑀓𑁆𑀔𑁄. 𑀛𑀸𑀧𑁂𑀦𑁆𑀢𑁄 𑀫𑀼𑀘𑁆𑀘𑀢𑀻𑀢𑀺 𑁋 𑀛𑀸𑀦𑀯𑀺𑀫𑁄𑀓𑁆𑀔𑁄. 𑀛𑀸𑀬𑀦𑁆𑀢𑀻𑀢𑀺 𑁋 𑀥𑀫𑁆𑀫𑀸. 𑀛𑀸𑀧𑁂𑀢𑀻𑀢𑀺 𑁋 𑀓𑀺𑀮𑁂𑀲𑁂. 𑀛𑀸𑀢𑁂 𑀘 𑀛𑀸𑀧𑁂 𑀘 𑀚𑀸𑀦𑀸𑀢𑀻𑀢𑀺 𑁋 𑀛𑀸𑀦𑀯𑀺𑀫𑁄𑀓𑁆𑀔𑁄. 𑀆𑀮𑁄𑀓𑀲𑀜𑁆𑀜𑀸 𑀛𑀸𑀬𑀢𑀻𑀢𑀺 𑁋 𑀛𑀸𑀦𑀁. 𑀣𑀺𑀦𑀫𑀺𑀤𑁆𑀥𑀁 𑀛𑀸𑀧𑁂𑀢𑀻𑀢𑀺 𑁋 𑀛𑀸𑀦𑀁…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀛𑀸𑀬𑀢𑀻𑀢𑀺 𑁋 𑀛𑀸𑀦𑀁. 𑀉𑀤𑁆𑀥𑀘𑁆𑀘𑀁 𑀛𑀸𑀧𑁂𑀢𑀻𑀢𑀺 𑁋 𑀛𑀸𑀦𑀁. 𑀥𑀫𑁆𑀫𑀯𑀯𑀢𑁆𑀣𑀸𑀦𑀁 𑀛𑀸𑀬𑀢𑀻𑀢𑀺 𑁋 𑀛𑀸𑀦𑀁. 𑀯𑀺𑀘𑀺𑀓𑀺𑀘𑁆𑀙𑀁 𑀛𑀸𑀧𑁂𑀢𑀻𑀢𑀺 𑁋 𑀛𑀸𑀦𑀁. 𑀜𑀸𑀡𑀁 𑀛𑀸𑀬𑀢𑀻𑀢𑀺 𑁋 𑀛𑀸𑀦𑀁. 𑀅𑀯𑀺𑀚𑁆𑀚𑀁 𑀛𑀸𑀧𑁂𑀢𑀻𑀢𑀺 𑁋 𑀛𑀸𑀦𑀁. 𑀧𑀸𑀫𑁄𑀚𑁆𑀚𑀁 𑀛𑀸𑀬𑀢𑀻𑀢𑀺 𑁋 𑀛𑀸𑀦𑀁. 𑀅𑀭𑀢𑀺𑀁 𑀛𑀸𑀧𑁂𑀢𑀻𑀢𑀺 𑁋 𑀛𑀸𑀦𑀁. 𑀧𑀞𑀫𑀁 𑀛𑀸𑀦𑀁 𑀛𑀸𑀬𑀢𑀻𑀢𑀺 𑁋 𑀛𑀸𑀦𑀁. 𑀦𑀻𑀯𑀭𑀡𑁂 𑀛𑀸𑀧𑁂𑀢𑀻𑀢𑀺 𑁋 𑀛𑀸𑀦𑀁…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁄 𑀛𑀸𑀬𑀢𑀻𑀢𑀺 𑁋 𑀛𑀸𑀦𑀁. 𑀲𑀩𑁆𑀩𑀓𑀺𑀮𑁂𑀲𑁂 𑀛𑀸𑀧𑁂𑀢𑀻𑀢𑀺 𑁋 𑀛𑀸𑀦𑀁. 𑀛𑀸𑀬𑀦𑁆𑀢𑁄 𑀫𑀼𑀘𑁆𑀘𑀢𑀻𑀢𑀺 𑁋 𑀛𑀸𑀦𑀯𑀺𑀫𑁄𑀓𑁆𑀔𑁄. 𑀛𑀸𑀧𑁂𑀦𑁆𑀢𑁄 𑀫𑀼𑀘𑁆𑀘𑀢𑀻𑀢𑀺 𑁋 𑀛𑀸𑀦𑀯𑀺𑀫𑁄𑀓𑁆𑀔𑁄. 𑀛𑀸𑀬𑀦𑁆𑀢𑀻𑀢𑀺 𑁋 𑀥𑀫𑁆𑀫𑀸. 𑀛𑀸𑀧𑁂𑀢𑀻𑀢𑀺 𑁋 𑀓𑀺𑀮𑁂𑀲𑁂. 𑀛𑀸𑀢𑁂 𑀘 𑀛𑀸𑀧𑁂 𑀘 𑀚𑀸𑀦𑀸𑀢𑀻𑀢𑀺 𑁋 𑀛𑀸𑀦𑀯𑀺𑀫𑁄𑀓𑁆𑀔𑁄 𑁋 𑀅𑀬𑀁 𑀛𑀸𑀦𑀯𑀺𑀫𑁄𑀓𑁆𑀔𑁄.

𑁨𑁧𑁮. 𑀓𑀢𑀫𑁄 𑀅𑀦𑀼𑀧𑀸𑀤𑀸 𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄? 𑀲𑀺𑀬𑀸 𑀏𑀓𑁄 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄 𑀤𑀲 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑀸 𑀏𑀓𑁄 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦 𑀲𑀺𑀬𑀸𑀢𑀺. 𑀓𑀣𑀜𑁆𑀘 𑀲𑀺𑀬𑀸? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀉𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀼𑀔𑀢𑁄 𑀉𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀢𑁆𑀢𑀢𑁄 𑀉𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀦𑁆𑀤𑀺𑀬𑀸 𑀉𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀭𑀸𑀕𑀢𑁄 𑀉𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀫𑀼𑀤𑀬𑀢𑁄 𑀉𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀆𑀤𑀸𑀦𑀢𑁄 𑀉𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄. 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀫𑀺𑀢𑁆𑀢𑀢𑁄 𑀉𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄. 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀧𑀡𑀺𑀥𑀺𑀬𑀸 𑀉𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄. 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀉𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄. 𑀏𑀯𑀁 𑀲𑀺𑀬𑀸 𑀏𑀓𑁄 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄 𑀤𑀲 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑀸 𑀏𑀓𑁄 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦.

𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀉𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄…𑀧𑁂… 𑀭𑀽𑀧𑁂 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀉𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄. 𑀏𑀯𑀁 𑀲𑀺𑀬𑀸 𑀏𑀓𑁄 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄 𑀤𑀲 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑀸 𑀏𑀓𑁄 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦.

𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂… 𑀘𑀓𑁆𑀔𑀼𑀲𑁆𑀫𑀺𑀁…𑀧𑁂… 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀉𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄…𑀧𑁂… 𑀚𑀭𑀸𑀫𑀭𑀡𑁂 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀉𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄. 𑀏𑀯𑀁 𑀲𑀺𑀬𑀸 𑀏𑀓𑁄 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄 𑀤𑀲 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑀸 𑀳𑁄𑀦𑁆𑀢𑀺, 𑀤𑀲 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑀸 𑀏𑀓𑁄 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦.

𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀓𑀢𑀺𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺? 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀓𑀢𑀺𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺? 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀓𑀢𑀺𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺? 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁…𑀧𑁂… 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁… 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁… 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁… 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁… 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀓𑀢𑀺𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀻𑀢𑀺?

𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀢𑀻𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀏𑀓𑀼𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀺. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀢𑀻𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀏𑀓𑀼𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀺. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀏𑀓𑀼𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀺. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀘𑀢𑀽𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀘𑀢𑀽𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺. 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀢𑀻𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺. 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀏𑀓𑀼𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀺. 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀢𑀻𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺.

𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀓𑀢𑀫𑁂𑀳𑀺 𑀢𑀻𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺? 𑀤𑀺𑀝𑁆𑀞𑀼𑀧𑀸𑀤𑀸𑀦𑀸, 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀸, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀸 𑁋 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀇𑀫𑁂𑀳𑀺 𑀢𑀻𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀓𑀢𑀫𑀸 𑀏𑀓𑀼𑀧𑀸𑀤𑀸𑀦𑀸 [𑀏𑀓𑀽𑀧𑀸𑀤𑀸𑀦𑀸 (𑀲𑀻. 𑀅𑀝𑁆𑀞.)] 𑀫𑀼𑀘𑁆𑀘𑀢𑀺? 𑀓𑀸𑀫𑀼𑀧𑀸𑀤𑀸𑀦𑀸 𑁋 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀇𑀤𑀁 𑀏𑀓𑀼𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀺. [𑀇𑀫𑀸 𑀏𑀓𑀼𑀧𑀸𑀤𑀸𑀦𑀸 (𑀲𑁆𑀬𑀸.)] 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀓𑀢𑀫𑁂𑀳𑀺 𑀢𑀻𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺? 𑀤𑀺𑀝𑁆𑀞𑀼𑀧𑀸𑀤𑀸𑀦𑀸, 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀸, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀸 𑁋 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀇𑀫𑁂𑀳𑀺 𑀢𑀻𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀓𑀢𑀫𑀸 𑀏𑀓𑀼𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀺? 𑀓𑀸𑀫𑀼𑀧𑀸𑀤𑀸𑀦𑀸 𑁋 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀇𑀤𑀁 𑀏𑀓𑀼𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀺. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀓𑀢𑀫𑀸 𑀏𑀓𑀼𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀺? 𑀓𑀸𑀫𑀼𑀧𑀸𑀤𑀸𑀦𑀸 𑁋 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀇𑀤𑀁 𑀏𑀓𑀼𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀺. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀓𑀢𑀫𑁂𑀳𑀺 𑀘𑀢𑀽𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺? 𑀓𑀸𑀫𑀼𑀧𑀸𑀤𑀸𑀦𑀸, 𑀤𑀺𑀝𑁆𑀞𑀼𑀧𑀸𑀤𑀸𑀦𑀸, 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀸, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀸 𑁋 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀇𑀫𑁂𑀳𑀺 𑀘𑀢𑀽𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀓𑀢𑀫𑁂𑀳𑀺 𑀘𑀢𑀽𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺? 𑀓𑀸𑀫𑀼𑀧𑀸𑀤𑀸𑀦𑀸, 𑀤𑀺𑀝𑁆𑀞𑀼𑀧𑀸𑀤𑀸𑀦𑀸, 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀸, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀸 𑁋 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀇𑀫𑁂𑀳𑀺 𑀘𑀢𑀽𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺. 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀓𑀢𑀫𑁂𑀳𑀺 𑀢𑀻𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺? 𑀤𑀺𑀝𑁆𑀞𑀼𑀧𑀸𑀤𑀸𑀦𑀸, 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀸, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀸 𑁋 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀇𑀫𑁂𑀳𑀺 𑀢𑀻𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺. 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀓𑀢𑀫𑀸 𑀏𑀓𑀼𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀺? 𑀓𑀸𑀫𑀼𑀧𑀸𑀤𑀸𑀦𑀸 𑁋 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀇𑀤𑀁 𑀏𑀓𑀼𑀧𑀸𑀤𑀸𑀦𑀸 𑀫𑀼𑀘𑁆𑀘𑀢𑀺. 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀓𑀢𑀫𑁂𑀳𑀺 𑀢𑀻𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺? 𑀤𑀺𑀝𑁆𑀞𑀼𑀧𑀸𑀤𑀸𑀦𑀸, 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀸, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀸 𑁋 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀇𑀫𑁂𑀳𑀺 𑀢𑀻𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀢𑀺.

𑀬𑀜𑁆𑀘 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁, 𑀬𑀜𑁆𑀘 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁, 𑀬𑀜𑁆𑀘 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁, 𑀬𑀜𑁆𑀘 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑁋 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀜𑀸𑀡𑀸𑀦𑀺 𑀢𑀻𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀦𑁆𑀢𑀺 𑁋 𑀤𑀺𑀝𑁆𑀞𑀼𑀧𑀸𑀤𑀸𑀦𑀸, 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀸, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀸. 𑀬𑀜𑁆𑀘 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁, 𑀬𑀁 𑀘 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁, 𑀬𑀜𑁆𑀘 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁, 𑀬𑀜𑁆𑀘 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑁋 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀜𑀸𑀡𑀸𑀦𑀺 𑀏𑀓𑀼𑀧𑀸𑀤𑀸𑀦𑀸 𑀫𑀼𑀘𑁆𑀘𑀦𑁆𑀢𑀺 𑁋 𑀓𑀸𑀫𑀼𑀧𑀸𑀤𑀸𑀦𑀸. 𑀬𑀜𑁆𑀘 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁, 𑀬𑀜𑁆𑀘 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑁋 𑀇𑀫𑀸𑀦𑀺 𑀤𑁆𑀯𑁂 𑀜𑀸𑀡𑀸𑀦𑀺 𑀘𑀢𑀽𑀳𑀼𑀧𑀸𑀤𑀸𑀦𑁂𑀳𑀺 𑀫𑀼𑀘𑁆𑀘𑀦𑁆𑀢𑀺 𑁋 𑀓𑀸𑀫𑀼𑀧𑀸𑀤𑀸𑀦𑀸, 𑀤𑀺𑀝𑁆𑀞𑀼𑀧𑀸𑀤𑀸𑀦𑀸, 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀸, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀸 𑁋 𑀅𑀬𑀁 𑀅𑀦𑀼𑀧𑀸𑀤𑀸𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄.

𑀯𑀺𑀫𑁄𑀓𑁆𑀔𑀓𑀣𑀸𑀬 𑀧𑀞𑀫𑀪𑀸𑀡𑀯𑀸𑀭𑁄.

𑁨𑁧𑁯. 𑀢𑀻𑀡𑀺 𑀔𑁄 𑀧𑀦𑀺𑀫𑀸𑀦𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀮𑁄𑀓𑀦𑀺𑀬𑁆𑀬𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀲𑀩𑁆𑀩𑀲𑀗𑁆𑀔𑀸𑀭𑁂 𑀧𑀭𑀺𑀘𑁆𑀙𑁂𑀤𑀧𑀭𑀺𑀯𑀝𑀼𑀫𑀢𑁄 [𑀧𑀭𑀺𑀘𑁆𑀙𑁂𑀤𑀧𑀭𑀺𑀯𑀝𑁆𑀝𑀼𑀫𑀢𑁄 (𑀲𑁆𑀬𑀸.)] 𑀲𑀫𑀦𑀼𑀧𑀲𑁆𑀲𑀦𑀢𑀸𑀬 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀘𑀺𑀢𑁆𑀢𑀲𑀫𑁆𑀧𑀓𑁆𑀔𑀦𑁆𑀤𑀦𑀢𑀸𑀬, 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀫𑀦𑁄𑀲𑀫𑀼𑀢𑁆𑀢𑁂𑀚𑀦𑀢𑀸𑀬 𑀅𑀧𑁆𑀧𑀡𑀺𑀳𑀺𑀢𑀸𑀬 𑀘 𑀥𑀸𑀢𑀼𑀬𑀸 𑀘𑀺𑀢𑁆𑀢𑀲𑀫𑁆𑀧𑀓𑁆𑀔𑀦𑁆𑀤𑀦𑀢𑀸𑀬, 𑀲𑀩𑁆𑀩𑀥𑀫𑁆𑀫𑁂 𑀧𑀭𑀢𑁄 𑀲𑀫𑀦𑀼𑀧𑀲𑁆𑀲𑀦𑀢𑀸𑀬 𑀲𑀼𑀜𑁆𑀜𑀢𑀸𑀬 𑀘 𑀥𑀸𑀢𑀼𑀬𑀸 𑀘𑀺𑀢𑁆𑀢𑀲𑀫𑁆𑀧𑀓𑁆𑀔𑀦𑁆𑀤𑀦𑀢𑀸𑀬 𑁋 𑀇𑀫𑀸𑀦𑀺 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀮𑁄𑀓𑀦𑀺𑀬𑁆𑀬𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀣𑀁 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀦𑁆𑀢𑀺? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀣𑀁 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀦𑁆𑀢𑀺? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀣𑀁 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀦𑁆𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀔𑀬𑀢𑁄 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀦𑁆𑀢𑀺, 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀪𑀬𑀢𑁄 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀦𑁆𑀢𑀺, 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀼𑀜𑁆𑀜𑀢𑁄 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀦𑁆𑀢𑀺.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀩𑀳𑀼𑀮𑀁 𑀘𑀺𑀢𑁆𑀢𑀁 𑀳𑁄𑀢𑀺? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀩𑀳𑀼𑀮𑀁 𑀘𑀺𑀢𑁆𑀢𑀁 𑀳𑁄𑀢𑀺? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀩𑀳𑀼𑀮𑀁 𑀘𑀺𑀢𑁆𑀢𑀁 𑀳𑁄𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀯𑁂𑀤𑀩𑀳𑀼𑀮𑀁 𑀘𑀺𑀢𑁆𑀢𑀁 𑀳𑁄𑀢𑀺.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑁄 𑀓𑀢𑀫𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀮𑀪𑀢𑀺? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑁄 𑀓𑀢𑀫𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀮𑀪𑀢𑀺? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀯𑁂𑀤𑀩𑀳𑀼𑀮𑁄 𑀓𑀢𑀫𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀮𑀪𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀮𑀪𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀮𑀪𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀯𑁂𑀤𑀩𑀳𑀼𑀮𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀮𑀪𑀢𑀺.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲 𑀓𑀢𑀫𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺, 𑀪𑀸𑀯𑀦𑀸𑀬 𑀓𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 [𑀢𑀤𑀦𑁆𑀯𑀬𑀸𑀦𑀺 (𑀲𑁆𑀬𑀸.)] 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀓𑁂𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀓𑁄 𑀪𑀸𑀯𑁂𑀢𑀺? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑀲𑁆𑀲 𑀓𑀢𑀫𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺, 𑀪𑀸𑀯𑀦𑀸𑀬 𑀓𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀓𑁂𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀓𑁄 𑀪𑀸𑀯𑁂𑀢𑀺? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀯𑁂𑀤𑀩𑀳𑀼𑀮𑀲𑁆𑀲 𑀓𑀢𑀫𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺, 𑀪𑀸𑀯𑀦𑀸𑀬 𑀓𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀓𑁂𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀓𑁄 𑀪𑀸𑀯𑁂𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺. 𑀪𑀸𑀯𑀦𑀸𑀬 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺. 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸. 𑀬𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀲𑁄 𑀪𑀸𑀯𑁂𑀢𑀺; 𑀦𑀢𑁆𑀣𑀺 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀲𑁆𑀲 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑀲𑁆𑀲 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺. 𑀪𑀸𑀯𑀦𑀸𑀬 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺. 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸. 𑀬𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀲𑁄 𑀪𑀸𑀯𑁂𑀢𑀺; 𑀦𑀢𑁆𑀣𑀺 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀲𑁆𑀲 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀯𑁂𑀤𑀩𑀳𑀼𑀮𑀲𑁆𑀲 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺. 𑀪𑀸𑀯𑀦𑀸𑀬 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺. 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸. 𑀬𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀲𑁄 𑀪𑀸𑀯𑁂𑀢𑀺; 𑀦𑀢𑁆𑀣𑀺 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀲𑁆𑀲 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸.

𑁨𑁨𑁦. 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲 𑀓𑀢𑀫𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺? 𑀪𑀸𑀯𑀦𑀸𑀬 𑀓𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺? 𑀧𑀝𑀺𑀯𑁂𑀥𑀓𑀸𑀮𑁂 𑀓𑀢𑀫𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺? 𑀧𑀝𑀺𑀯𑁂𑀥𑀸𑀬 𑀓𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺? 𑀓𑁂𑀦𑀝𑁆𑀞𑁂𑀦 𑀪𑀸𑀯𑀦𑀸? 𑀓𑁂𑀦𑀝𑁆𑀞𑁂𑀦 𑀧𑀝𑀺𑀯𑁂𑀥𑁄? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑀲𑁆𑀲 𑀓𑀢𑀫𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺? 𑀪𑀸𑀯𑀦𑀸𑀬 𑀓𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺? 𑀧𑀝𑀺𑀯𑁂𑀥𑀓𑀸𑀮𑁂 𑀓𑀢𑀫𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺? 𑀧𑀝𑀺𑀯𑁂𑀥𑀸𑀬 𑀓𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺? 𑀓𑁂𑀦𑀝𑁆𑀞𑁂𑀦 𑀪𑀸𑀯𑀦𑀸? 𑀓𑁂𑀦𑀝𑁆𑀞𑁂𑀦 𑀧𑀝𑀺𑀯𑁂𑀥𑁄? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀯𑁂𑀤𑀩𑀳𑀼𑀮𑀲𑁆𑀲 𑀓𑀢𑀫𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺? 𑀪𑀸𑀯𑀦𑀸𑀬 𑀓𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺? 𑀧𑀝𑀺𑀯𑁂𑀥𑀓𑀸𑀮𑁂 𑀓𑀢𑀫𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺? 𑀧𑀝𑀺𑀯𑁂𑀥𑀸𑀬 𑀓𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺? 𑀓𑁂𑀦𑀝𑁆𑀞𑁂𑀦 𑀪𑀸𑀯𑀦𑀸? 𑀓𑁂𑀦𑀝𑁆𑀞𑁂𑀦 𑀧𑀝𑀺𑀯𑁂𑀥𑁄?

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺. 𑀪𑀸𑀯𑀦𑀸𑀬 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀧𑀝𑀺𑀯𑁂𑀥𑀓𑀸𑀮𑁂 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺. 𑀧𑀝𑀺𑀯𑁂𑀥𑀸𑀬 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺. 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸. 𑀤𑀲𑁆𑀲𑀦𑀝𑁆𑀞𑁂𑀦 𑀧𑀝𑀺𑀯𑁂𑀥𑁄. 𑀏𑀯𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀧𑀺 𑀪𑀸𑀯𑁂𑀢𑀺, 𑀪𑀸𑀯𑁂𑀦𑁆𑀢𑁄𑀧𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑀲𑁆𑀲 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺. 𑀪𑀸𑀯𑀦𑀸𑀬 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀧𑀝𑀺𑀯𑁂𑀥𑀓𑀸𑀮𑁂 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺. 𑀧𑀝𑀺𑀯𑁂𑀥𑀸𑀬 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺. 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸. 𑀤𑀲𑁆𑀲𑀦𑀝𑁆𑀞𑁂𑀦 𑀧𑀝𑀺𑀯𑁂𑀥𑁄. 𑀏𑀯𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀧𑀺 𑀪𑀸𑀯𑁂𑀢𑀺, 𑀪𑀸𑀯𑁂𑀦𑁆𑀢𑁄𑀧𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀯𑁂𑀤𑀩𑀳𑀼𑀮𑀲𑁆𑀲 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺. 𑀪𑀸𑀯𑀦𑀸𑀬 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀧𑀝𑀺𑀯𑁂𑀥𑀓𑀸𑀮𑁂𑀧𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀳𑁄𑀢𑀺. 𑀧𑀝𑀺𑀯𑁂𑀥𑀸𑀬 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺. 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸. 𑀤𑀲𑁆𑀲𑀦𑀝𑁆𑀞𑁂𑀦 𑀧𑀝𑀺𑀯𑁂𑀥𑁄. 𑀏𑀯𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀧𑀺 𑀪𑀸𑀯𑁂𑀢𑀺, 𑀪𑀸𑀯𑁂𑀦𑁆𑀢𑁄𑀧𑀺 𑀧𑀝𑀺𑀯𑀺𑀚𑁆𑀛𑀢𑀺.

𑁨𑁨𑁧. 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀢𑀫𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺? 𑀓𑀢𑀫𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 [𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄 (𑀲𑁆𑀬𑀸.)] 𑀳𑁄𑀢𑀺? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀢𑀫𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺? 𑀓𑀢𑀫𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀓𑀸𑀬𑀲𑀓𑁆𑀔𑀻 [𑀓𑀸𑀬𑀲𑀓𑁆𑀔𑀺 (𑀲𑁆𑀬𑀸. 𑀓.) 𑀅𑀪𑀺. 𑀧𑀼. 𑀧. 𑁯𑁫 𑀧𑀲𑁆𑀲𑀺𑀢𑀩𑁆𑀩𑀸] 𑀳𑁄𑀢𑀺? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀢𑀫𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺? 𑀓𑀢𑀫𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀳𑁄𑀢𑀺?

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀓𑀸𑀬𑀲𑀓𑁆𑀔𑀻 𑀳𑁄𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀳𑁄𑀢𑀺.

𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑁋 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀨𑀼𑀝𑁆𑀞𑀢𑁆𑀢𑀸 𑀲𑀘𑁆𑀙𑀺𑀓𑀢𑁄𑀢𑀺 [𑀲𑀘𑁆𑀙𑀺𑀓𑀭𑁄𑀢𑀻𑀢𑀺 (𑀲𑁆𑀬𑀸. 𑀧𑀻.)] 𑁋 𑀓𑀸𑀬𑀲𑀓𑁆𑀔𑀻. 𑀤𑀺𑀝𑁆𑀞𑀢𑁆𑀢𑀸 𑀧𑀢𑁆𑀢𑁄𑀢𑀺 𑁋 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀘𑁆𑀘𑀢𑀻𑀢𑀺 𑁋 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀛𑀸𑀦𑀨𑀲𑁆𑀲𑀁 𑀧𑀞𑀫𑀁 𑀨𑀼𑀲𑀢𑀺, 𑀧𑀘𑁆𑀙𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑁋 𑀓𑀸𑀬𑀲𑀓𑁆𑀔𑀻. ‘‘𑀤𑀼𑀓𑁆𑀔𑀸 𑀲𑀗𑁆𑀔𑀸𑀭𑀸, 𑀲𑀼𑀔𑁄 𑀦𑀺𑀭𑁄𑀥𑁄’’𑀢𑀺 𑀜𑀸𑀢𑀁 𑀳𑁄𑀢𑀺 𑀤𑀺𑀝𑁆𑀞𑀁 𑀯𑀺𑀤𑀺𑀢𑀁 𑀲𑀘𑁆𑀙𑀺𑀓𑀢𑀁 𑀨𑀲𑁆𑀲𑀺𑀢𑀁 𑀧𑀜𑁆𑀜𑀸𑀬𑀸𑀢𑀺 𑁋 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀬𑁄 𑀘𑀸𑀬𑀁 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀬𑁄 𑀘 𑀓𑀸𑀬𑀲𑀓𑁆𑀔𑀻, 𑀬𑁄 𑀘 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄, 𑀲𑀺𑀬𑀸 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸𑀧𑀺 𑀓𑀸𑀬𑀲𑀓𑁆𑀔𑀻𑀧𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸𑀧𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦 𑀲𑀺𑀬𑀸𑀢𑀺. 𑀓𑀣𑀜𑁆𑀘 𑀲𑀺𑀬𑀸? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀏𑀯𑀁 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸.

𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀓𑀸𑀬𑀲𑀓𑁆𑀔𑀻 𑀳𑁄𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀓𑀸𑀬𑀲𑀓𑁆𑀔𑀻 𑀳𑁄𑀢𑀺. 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀓𑀸𑀬𑀲𑀓𑁆𑀔𑀻 𑀳𑁄𑀢𑀺. 𑀏𑀯𑀁 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀓𑀸𑀬𑀲𑀓𑁆𑀔𑀻.

𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀏𑀯𑀁 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸.

𑀬𑁄 𑀘𑀸𑀬𑀁 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀬𑁄 𑀘 𑀓𑀸𑀬𑀲𑀓𑁆𑀔𑀻, 𑀬𑁄 𑀘 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄, 𑀏𑀯𑀁 𑀲𑀺𑀬𑀸 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸𑀧𑀺 𑀓𑀸𑀬𑀲𑀓𑁆𑀔𑀻𑀧𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸𑀧𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦. 𑀬𑁄 𑀘𑀸𑀬𑀁 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀬𑁄 𑀘 𑀓𑀸𑀬𑀲𑀓𑁆𑀔𑀻, 𑀬𑁄 𑀘 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄, 𑀲𑀺𑀬𑀸 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸…𑀧𑁂… 𑀅𑀜𑁆𑀜𑁄𑀬𑁂𑀯 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀅𑀜𑁆𑀜𑁄 𑀓𑀸𑀬𑀲𑀓𑁆𑀔𑀻, 𑀅𑀜𑁆𑀜𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀲𑀺𑀬𑀸𑀢𑀺. 𑀓𑀣𑀜𑁆𑀘 𑀲𑀺𑀬𑀸? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀓𑀸𑀬𑀲𑀓𑁆𑀔𑀻 𑀳𑁄𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀬𑁄 𑀘𑀸𑀬𑀁 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀬𑁄 𑀘 𑀓𑀸𑀬𑀲𑀓𑁆𑀔𑀻, 𑀬𑁄 𑀘 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄, 𑀏𑀯𑀁 𑀲𑀺𑀬𑀸 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸𑀧𑀺 𑀓𑀸𑀬𑀲𑀓𑁆𑀔𑀻𑀧𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸𑀧𑀺 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦. 𑀅𑀜𑁆𑀜𑁄𑀬𑁂𑀯 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀅𑀜𑁆𑀜𑁄 𑀓𑀸𑀬𑀲𑀓𑁆𑀔𑀻, 𑀅𑀜𑁆𑀜𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀪𑀢𑀺; 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀲𑀤𑁆𑀥𑀸𑀦𑀼𑀲𑀸𑀭𑀻’’. 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀪𑀸𑀯𑀦𑀸 𑀳𑁄𑀢𑀺. 𑀬𑁂 𑀳𑀺 𑀓𑁂𑀘𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀪𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑁄.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺; 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄’’. 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀪𑀸𑀯𑀺𑀢𑀸𑀦𑀺. 𑀬𑁂𑀳𑀺 𑀓𑁂𑀘𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀢𑀸, 𑀲𑀩𑁆𑀩𑁂 𑀢𑁂 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀮𑀪𑀢𑀺…𑀧𑁂… 𑀲𑀓𑀤𑀸𑀕𑀸𑀫𑀺𑀨𑀮𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀮𑀪𑀢𑀺… 𑀅𑀦𑀸𑀕𑀸𑀫𑀺𑀨𑀮𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑀁 𑀧𑀝𑀺𑀮𑀪𑀢𑀺… 𑀅𑀭𑀳𑀢𑁆𑀢𑀁 [𑀅𑀭𑀳𑀢𑁆𑀢𑀨𑀮𑀁 (𑀲𑁆𑀬𑀸. 𑀓.) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺; 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄’’. 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀪𑀸𑀯𑀺𑀢𑀸𑀦𑀺. 𑀬𑁂𑀳𑀺 𑀓𑁂𑀘𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑀸, 𑀲𑀩𑁆𑀩𑁂 𑀢𑁂 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸.

𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀪𑀢𑀺; 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀓𑀸𑀬𑀲𑀓𑁆𑀔𑀻’’. 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀪𑀸𑀯𑀦𑀸 𑀳𑁄𑀢𑀺. 𑀬𑁂 𑀳𑀺 𑀓𑁂𑀘𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀪𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀓𑀸𑀬𑀲𑀓𑁆𑀔𑀻.

𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺…𑀧𑁂… 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀮𑀪𑀢𑀺…𑀧𑁂… 𑀲𑀓𑀤𑀸𑀕𑀸𑀫𑀺𑀨𑀮𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀮𑀪𑀢𑀺…𑀧𑁂… 𑀅𑀦𑀸𑀕𑀸𑀫𑀺𑀨𑀮𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑀁 𑀧𑀝𑀺𑀮𑀪𑀢𑀺…𑀧𑁂… 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺; 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀓𑀸𑀬𑀲𑀓𑁆𑀔𑀻’’. 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀪𑀸𑀯𑀺𑀢𑀸𑀦𑀺. 𑀬𑁂𑀳𑀺 𑀓𑁂𑀘𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑀸, 𑀲𑀩𑁆𑀩𑁂 𑀢𑁂 𑀓𑀸𑀬𑀲𑀓𑁆𑀔𑀻.

𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀪𑀢𑀺; 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀥𑀫𑁆𑀫𑀸𑀦𑀼𑀲𑀸𑀭𑀻’’. 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀪𑀸𑀯𑀦𑀸 𑀳𑁄𑀢𑀺. 𑀬𑁂 𑀳𑀺 𑀓𑁂𑀘𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀪𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸𑀦𑀼𑀲𑀸𑀭𑀺𑀦𑁄.

𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺; 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄’’. 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺…𑀧𑁂… 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀪𑀸𑀯𑀺𑀢𑀸𑀦𑀺. 𑀬𑁂𑀳𑀺 𑀓𑁂𑀘𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀢𑀸, 𑀲𑀩𑁆𑀩𑁂 𑀢𑁂 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸.

𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀮𑀪𑀢𑀺…𑀧𑁂… 𑀲𑀓𑀤𑀸𑀕𑀸𑀫𑀺𑀨𑀮𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀮𑀪𑀢𑀺…𑀧𑁂… 𑀅𑀦𑀸𑀕𑀸𑀫𑀺𑀨𑀮𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑀁 𑀧𑀝𑀺𑀮𑀪𑀢𑀺…𑀧𑁂… 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑀁 𑀳𑁄𑀢𑀺; 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄’’. 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀘𑀢𑁆𑀢𑀸𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀪𑀸𑀯𑀺𑀢𑀸𑀦𑀺. 𑀬𑁂𑀳𑀺 𑀓𑁂𑀘𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑀸, 𑀲𑀩𑁆𑀩𑁂 𑀢𑁂 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸.

𑁨𑁨𑁨. 𑀬𑁂 𑀳𑀺 𑀓𑁂𑀘𑀺 𑀦𑁂𑀓𑁆𑀔𑀫𑁆𑀫𑀁 𑀪𑀸𑀯𑀺𑀢𑀸 𑀯𑀸 𑀪𑀸𑀯𑁂𑀦𑁆𑀢𑀺 𑀯𑀸 𑀪𑀸𑀯𑀺𑀲𑁆𑀲𑀦𑁆𑀢𑀺 𑀯𑀸, 𑀅𑀥𑀺𑀕𑀢𑀸 𑀯𑀸 𑀅𑀥𑀺𑀕𑀘𑁆𑀙𑀦𑁆𑀢𑀺 𑀯𑀸 𑀅𑀥𑀺𑀕𑀫𑀺𑀲𑁆𑀲𑀦𑁆𑀢𑀺 𑀯𑀸, 𑀧𑀢𑁆𑀢𑀸 𑀯𑀸 𑀧𑀸𑀧𑀼𑀡𑀦𑁆𑀢𑀺 𑀯𑀸 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 𑀯𑀸, 𑀧𑀝𑀺𑀮𑀤𑁆𑀥𑀸 𑀯𑀸 𑀧𑀝𑀺𑀮𑀪𑀦𑁆𑀢𑀺 𑀯𑀸 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀺 𑀯𑀸, 𑀧𑀝𑀺𑀯𑀺𑀤𑁆𑀥𑀸 𑀯𑀸 𑀧𑀝𑀺𑀯𑀺𑀚𑁆𑀛𑀦𑁆𑀢𑀺 𑀯𑀸 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀦𑁆𑀢𑀺 𑀯𑀸, 𑀲𑀘𑁆𑀙𑀺𑀓𑀢𑀸 𑀯𑀸 𑀲𑀘𑁆𑀙𑀺𑀓𑀭𑁄𑀦𑁆𑀢𑀺 𑀯𑀸 𑀲𑀘𑁆𑀙𑀺𑀓𑀭𑀺𑀲𑁆𑀲𑀦𑁆𑀢𑀺 𑀯𑀸, 𑀨𑀲𑁆𑀲𑀺𑀢𑀸 𑀯𑀸 𑀨𑀲𑁆𑀲𑀦𑁆𑀢𑀺 𑀯𑀸 𑀨𑀲𑁆𑀲𑀺𑀲𑁆𑀲𑀦𑁆𑀢𑀺 𑀯𑀸, 𑀯𑀲𑀺𑀧𑁆𑀧𑀢𑁆𑀢𑀸 𑀯𑀸 𑀧𑀸𑀧𑀼𑀡𑀦𑁆𑀢𑀺 𑀯𑀸 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 𑀯𑀸, 𑀧𑀸𑀭𑀫𑀺𑀧𑁆𑀧𑀢𑁆𑀢𑀸 𑀯𑀸 𑀧𑀸𑀧𑀼𑀡𑀦𑁆𑀢𑀺 𑀯𑀸 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 𑀯𑀸, 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀯𑀸 𑀧𑀸𑀧𑀼𑀡𑀦𑁆𑀢𑀺 𑀯𑀸 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 𑀯𑀸, 𑀲𑀩𑁆𑀩𑁂 𑀢𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀓𑀸𑀬𑀲𑀓𑁆𑀔𑀻, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸.

𑀬𑁂 𑀳𑀺 𑀓𑁂𑀘𑀺 𑀅𑀩𑁆𑀬𑀸𑀧𑀸𑀤𑀁…𑀧𑁂… 𑀆𑀮𑁄𑀓𑀲𑀜𑁆𑀜𑀁… 𑀅𑀯𑀺𑀓𑁆𑀔𑁂𑀧𑀁… 𑀥𑀫𑁆𑀫𑀯𑀯𑀢𑁆𑀣𑀸𑀦𑀁… 𑀜𑀸𑀡𑀁… 𑀧𑀸𑀫𑁄𑀚𑁆𑀚𑀁… 𑀧𑀞𑀫𑀁 𑀛𑀸𑀦𑀁… 𑀤𑀼𑀢𑀺𑀬𑀁 𑀛𑀸𑀦𑀁… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 … 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁… 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀁… 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀁… 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀁… 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀁… 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀁 … 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀁… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀁… 𑀔𑀬𑀸𑀦𑀼𑀧𑀲𑁆𑀲𑀦𑀁… 𑀯𑀬𑀸𑀦𑀼𑀧𑀲𑁆𑀲𑀦𑀁… 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑀁… 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀁… 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀁… 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀁… 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀁… 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁… 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀁… 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀁… 𑀯𑀺𑀯𑀝𑁆𑀝𑀦𑀸𑀦𑀼𑀧𑀲𑁆𑀲𑀦𑀁… 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁… 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁… 𑀅𑀦𑀸𑀕𑀸𑀫𑀺𑀫𑀕𑁆𑀕𑀁… 𑀅𑀭𑀳𑀢𑁆𑀢𑀫𑀕𑁆𑀕𑀁….

𑀬𑁂 𑀳𑀺 𑀓𑁂𑀘𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂… 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂… 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂… 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺… 𑀧𑀜𑁆𑀘 𑀩𑀮𑀸𑀦𑀺… 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂… 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁… 𑀬𑁂 𑀳𑀺 𑀓𑁂𑀘𑀺 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀪𑀸𑀯𑀺𑀢𑀸 𑀯𑀸 𑀪𑀸𑀯𑁂𑀦𑁆𑀢𑀺 𑀯𑀸 𑀪𑀸𑀯𑀺𑀲𑁆𑀲𑀦𑁆𑀢𑀺 𑀯𑀸, 𑀅𑀥𑀺𑀕𑀢𑀸 𑀯𑀸 𑀅𑀥𑀺𑀕𑀘𑁆𑀙𑀦𑁆𑀢𑀺 𑀯𑀸 𑀅𑀥𑀺𑀕𑀫𑀺𑀲𑁆𑀲𑀦𑁆𑀢𑀺 𑀯𑀸, 𑀧𑀢𑁆𑀢𑀸 𑀯𑀸 𑀧𑀸𑀧𑀼𑀡𑀦𑁆𑀢𑀺 𑀯𑀸 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 𑀯𑀸, 𑀧𑀝𑀺𑀮𑀤𑁆𑀥𑀸 𑀯𑀸 𑀧𑀝𑀺𑀮𑀪𑀦𑁆𑀢𑀺 𑀯𑀸 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀺 𑀯𑀸, 𑀧𑀝𑀺𑀯𑀺𑀤𑁆𑀥𑀸 𑀯𑀸 𑀧𑀝𑀺𑀯𑀺𑀚𑁆𑀛𑀦𑁆𑀢𑀺 𑀯𑀸 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀦𑁆𑀢𑀺 𑀯𑀸, 𑀲𑀘𑁆𑀙𑀺𑀓𑀢𑀸 𑀯𑀸 𑀲𑀘𑁆𑀙𑀺𑀓𑀭𑁄𑀦𑁆𑀢𑀺 𑀯𑀸 𑀲𑀘𑁆𑀙𑀺𑀓𑀭𑀺𑀲𑁆𑀲𑀦𑁆𑀢𑀺 𑀯𑀸, 𑀨𑀲𑁆𑀲𑀺𑀢𑀸 𑀯𑀸 𑀨𑀲𑁆𑀲𑀦𑁆𑀢𑀺 𑀯𑀸 𑀨𑀲𑁆𑀲𑀺𑀲𑁆𑀲𑀦𑁆𑀢𑀺 𑀯𑀸, 𑀯𑀲𑀺𑀧𑁆𑀧𑀢𑁆𑀢𑀸 𑀯𑀸 𑀧𑀸𑀧𑀼𑀡𑀦𑁆𑀢𑀺 𑀯𑀸 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 𑀯𑀸 𑀧𑀸𑀭𑀫𑀺𑀧𑁆𑀧𑀢𑁆𑀢𑀸 𑀯𑀸 𑀧𑀸𑀧𑀼𑀡𑀦𑁆𑀢𑀺 𑀯𑀸 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 𑀯𑀸, 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀯𑀸 𑀧𑀸𑀧𑀼𑀡𑀦𑁆𑀢𑀺 𑀯𑀸 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 𑀯𑀸, 𑀲𑀩𑁆𑀩𑁂 𑀢𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀓𑀸𑀬𑀲𑀓𑁆𑀔𑀻, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸.

𑀬𑁂 𑀳𑀺 𑀓𑁂𑀘𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀧𑀢𑁆𑀢𑀸 𑀯𑀸 𑀧𑀸𑀧𑀼𑀡𑀦𑁆𑀢𑀺 𑀯𑀸 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 𑀯𑀸…𑀧𑁂… 𑀲𑀩𑁆𑀩𑁂 𑀢𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀓𑀸𑀬𑀲𑀓𑁆𑀔𑀻, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸.

𑀬𑁂 𑀳𑀺 𑀓𑁂𑀘𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀝𑀺𑀯𑀺𑀤𑁆𑀥𑀸 𑀯𑀸 𑀧𑀝𑀺𑀯𑀺𑀚𑁆𑀛𑀦𑁆𑀢𑀺 𑀯𑀸 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀦𑁆𑀢𑀺 𑀯𑀸…𑀧𑁂… 𑀲𑀩𑁆𑀩𑁂 𑀢𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀓𑀸𑀬𑀲𑀓𑁆𑀔𑀻, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸.

𑀬𑁂 𑀳𑀺 𑀓𑁂𑀘𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀺𑀢𑀸 𑀯𑀸 𑀲𑀺𑀓𑁆𑀔𑀦𑁆𑀢𑀺 𑀯𑀸 𑀲𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀯𑀸, 𑀲𑀘𑁆𑀙𑀺𑀓𑀢𑀸 𑀯𑀸 𑀲𑀘𑁆𑀙𑀺𑀓𑀭𑁄𑀦𑁆𑀢𑀺 𑀯𑀸 𑀲𑀘𑁆𑀙𑀺𑀓𑀭𑀺𑀲𑁆𑀲𑀦𑁆𑀢𑀺 𑀯𑀸, 𑀨𑀲𑁆𑀲𑀺𑀢𑀸 𑀯𑀸 𑀨𑀲𑁆𑀲𑀦𑁆𑀢𑀺 𑀯𑀸 𑀨𑀲𑁆𑀲𑀺𑀲𑁆𑀲𑀦𑁆𑀢𑀺 𑀯𑀸, 𑀯𑀲𑀺𑀧𑁆𑀧𑀢𑁆𑀢𑀸 𑀯𑀸 𑀧𑀸𑀧𑀼𑀡𑀦𑁆𑀢𑀺 𑀯𑀸 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 𑀯𑀸, 𑀧𑀸𑀭𑀫𑀺𑀧𑁆𑀧𑀢𑁆𑀢𑀸 𑀯𑀸 𑀧𑀸𑀧𑀼𑀡𑀦𑁆𑀢𑀺 𑀯𑀸 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 𑀯𑀸, 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀯𑀸 𑀧𑀸𑀧𑀼𑀡𑀦𑁆𑀢𑀺 𑀯𑀸 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 𑀯𑀸, 𑀲𑀩𑁆𑀩𑁂 𑀢𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀓𑀸𑀬𑀲𑀓𑁆𑀔𑀻, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸.

𑀬𑁂 𑀳𑀺 𑀓𑁂𑀘𑀺 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀦𑁆𑀢𑀺 𑀲𑀫𑀼𑀤𑀬𑀁 𑀧𑀚𑀳𑀦𑁆𑀢𑀺 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀺 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀓𑀸𑀬𑀲𑀓𑁆𑀔𑀻, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸.

𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀳𑁄𑀢𑀺? 𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺? 𑀘𑀢𑀽𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀳𑁄𑀢𑀺. 𑀘𑀢𑀽𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑀁 𑀧𑀝𑀺𑀯𑀺𑀚𑁆𑀛𑀢𑀺, 𑀲𑀫𑀼𑀤𑀬𑀲𑀘𑁆𑀘𑀁 𑀧𑀳𑀸𑀦𑀧𑁆𑀧𑀝𑀺𑀯𑁂𑀥𑀁 𑀧𑀝𑀺𑀯𑀺𑀚𑁆𑀛𑀢𑀺, 𑀦𑀺𑀭𑁄𑀥𑀲𑀘𑁆𑀘𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑀁 𑀧𑀝𑀺𑀯𑀺𑀚𑁆𑀛𑀢𑀺, 𑀫𑀕𑁆𑀕𑀲𑀘𑁆𑀘𑀁 𑀪𑀸𑀯𑀦𑀸𑀧𑀝𑀺𑀯𑁂𑀥𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀇𑀫𑁂𑀳𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀳𑁄𑀢𑀺. 𑀇𑀫𑁂𑀳𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀓𑀸𑀬𑀲𑀓𑁆𑀔𑀻, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄.

𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀳𑁄𑀢𑀺? 𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺? 𑀦𑀯𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀳𑁄𑀢𑀺, 𑀦𑀯𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑀁 𑀧𑀝𑀺𑀯𑀺𑀚𑁆𑀛𑀢𑀺, 𑀲𑀫𑀼𑀤𑀬𑀲𑀘𑁆𑀘𑀁 𑀧𑀳𑀸𑀦𑀧𑁆𑀧𑀝𑀺𑀯𑁂𑀥𑀁 𑀧𑀝𑀺𑀯𑀺𑀚𑁆𑀛𑀢𑀺, 𑀦𑀺𑀭𑁄𑀥𑀲𑀘𑁆𑀘𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑀁 𑀧𑀝𑀺𑀯𑀺𑀚𑁆𑀛𑀢𑀺, 𑀫𑀕𑁆𑀕𑀲𑀘𑁆𑀘𑀁 𑀪𑀸𑀯𑀦𑀸𑀧𑀝𑀺𑀯𑁂𑀥𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀅𑀪𑀺𑀜𑁆𑀜𑀸𑀧𑀝𑀺𑀯𑁂𑀥𑁄 𑀘 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁄 𑀘 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁, 𑀧𑀳𑀸𑀦𑀧𑁆𑀧𑀝𑀺𑀯𑁂𑀥𑁄 𑀘 𑀲𑀩𑁆𑀩𑀸𑀓𑀼𑀲𑀮𑀸𑀦𑀁, 𑀪𑀸𑀯𑀦𑀸𑀧𑀝𑀺𑀯𑁂𑀥𑁄 𑀘 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁄 𑀘 𑀦𑀺𑀭𑁄𑀥𑀲𑁆𑀲. 𑀇𑀫𑁂𑀳𑀺 𑀦𑀯𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀳𑁄𑀢𑀺. 𑀇𑀫𑁂𑀳𑀺 𑀦𑀯𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀓𑀸𑀬𑀲𑀓𑁆𑀔𑀻, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄.

𑀤𑀼𑀢𑀺𑀬𑀪𑀸𑀡𑀯𑀸𑀭𑁄.

𑁨𑁨𑁩. 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀣𑀁 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀦𑁆𑀢𑀺? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀣𑀁 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀦𑁆𑀢𑀺? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀣𑀁 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀦𑁆𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀔𑀬𑀢𑁄 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀦𑁆𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀪𑀬𑀢𑁄 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀦𑁆𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀼𑀜𑁆𑀜𑀢𑁄 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀦𑁆𑀢𑀺.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀩𑀳𑀼𑀮𑀁 𑀘𑀺𑀢𑁆𑀢𑀁 𑀳𑁄𑀢𑀺? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀩𑀳𑀼𑀮𑀁 𑀘𑀺𑀢𑁆𑀢𑀁 𑀳𑁄𑀢𑀺? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀩𑀳𑀼𑀮𑀁 𑀘𑀺𑀢𑁆𑀢𑀁 𑀳𑁄𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑀁 𑀘𑀺𑀢𑁆𑀢𑀁 𑀳𑁄𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀯𑁂𑀤𑀩𑀳𑀼𑀮𑀁 𑀘𑀺𑀢𑁆𑀢𑀁 𑀳𑁄𑀢𑀺.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑁄 𑀓𑀢𑀫𑀁 𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑁄 𑀓𑀢𑀫𑀁 𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀯𑁂𑀤𑀩𑀳𑀼𑀮𑁄 𑀓𑀢𑀫𑀁 𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑁄 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑁄 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀯𑁂𑀤𑀩𑀳𑀼𑀮𑁄 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺.

𑁨𑁨𑁪. 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲 𑀓𑀢𑀫𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀪𑀸𑀯𑀦𑀸𑀬 𑀓𑀢𑀺 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀓𑁂𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀓𑁄 𑀪𑀸𑀯𑁂𑀢𑀺? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑀲𑁆𑀲 𑀓𑀢𑀫𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀪𑀸𑀯𑀦𑀸𑀬 𑀓𑀢𑀺 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀓𑁂𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀓𑁄 𑀪𑀸𑀯𑁂𑀢𑀺? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀯𑁂𑀤𑀩𑀳𑀼𑀮𑀲𑁆𑀲 𑀓𑀢𑀫𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀪𑀸𑀯𑀦𑀸𑀬 𑀓𑀢𑀺 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀓𑁂𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀓𑁄 𑀪𑀸𑀯𑁂𑀢𑀺?

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺. 𑀪𑀸𑀯𑀦𑀸𑀬 𑀤𑁆𑀯𑁂 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺. 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸. 𑀬𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀲𑁄 𑀪𑀸𑀯𑁂𑀢𑀺; 𑀦𑀢𑁆𑀣𑀺 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀲𑁆𑀲 𑀯𑀺𑀫𑁄𑀓𑁆𑀔𑀪𑀸𑀯𑀦𑀸. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑀲𑁆𑀲 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺. 𑀪𑀸𑀯𑀦𑀸𑀬 𑀤𑁆𑀯𑁂 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺. 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸. 𑀬𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀲𑁄 𑀪𑀸𑀯𑁂𑀢𑀺; 𑀦𑀢𑁆𑀣𑀺 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀲𑁆𑀲 𑀯𑀺𑀫𑁄𑀓𑁆𑀔𑀪𑀸𑀯𑀦𑀸. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀯𑁂𑀤𑀩𑀳𑀼𑀮𑀲𑁆𑀲 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺. 𑀪𑀸𑀯𑀦𑀸𑀬 𑀤𑁆𑀯𑁂 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺. 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸. 𑀬𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀲𑁄 𑀪𑀸𑀯𑁂𑀢𑀺; 𑀦𑀢𑁆𑀣𑀺 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀲𑁆𑀲 𑀯𑀺𑀫𑁄𑀓𑁆𑀔𑀪𑀸𑀯𑀦𑀸.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲 𑀓𑀢𑀫𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀪𑀸𑀯𑀦𑀸𑀬 𑀓𑀢𑀺 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀧𑀝𑀺𑀯𑁂𑀥𑀓𑀸𑀮𑁂 𑀓𑀢𑀫𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀧𑀝𑀺𑀯𑁂𑀥𑀸𑀬 𑀓𑀢𑀺 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀓𑁂𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀓𑁂𑀦𑀝𑁆𑀞𑁂𑀦 𑀧𑀝𑀺𑀯𑁂𑀥𑁄? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑀲𑁆𑀲 𑀓𑀢𑀫𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀪𑀸𑀯𑀦𑀸𑀬 𑀓𑀢𑀺 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀧𑀝𑀺𑀯𑁂𑀥𑀓𑀸𑀮𑁂 𑀓𑀢𑀫𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀧𑀝𑀺𑀯𑁂𑀥𑀸𑀬 𑀓𑀢𑀺 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀓𑁂𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀓𑁂𑀦𑀝𑁆𑀞𑁂𑀦 𑀧𑀝𑀺𑀯𑁂𑀥𑁄? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀯𑁂𑀤𑀩𑀳𑀼𑀮𑀲𑁆𑀲 𑀓𑀢𑀫𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀪𑀸𑀯𑀦𑀸𑀬 𑀓𑀢𑀺 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀧𑀝𑀺𑀯𑁂𑀥𑀓𑀸𑀮𑁂 𑀓𑀢𑀫𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀧𑀝𑀺𑀯𑁂𑀥𑀸𑀬 𑀓𑀢𑀺𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀓𑁂𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀓𑁂𑀦𑀝𑁆𑀞𑁂𑀦 𑀧𑀝𑀺𑀯𑁂𑀥𑁄?

𑁨𑁨𑁫. 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀪𑀸𑀯𑀦𑀸𑀬 𑀤𑁆𑀯𑁂 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀧𑀝𑀺𑀯𑁂𑀥𑀓𑀸𑀮𑁂𑀧𑀺 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀧𑀝𑀺𑀯𑁂𑀥𑀸𑀬 𑀤𑁆𑀯𑁂 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸, 𑀤𑀲𑁆𑀲𑀦𑀝𑁆𑀞𑁂𑀦 𑀧𑀝𑀺𑀯𑁂𑀥𑁄, 𑀏𑀯𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀧𑀺 𑀪𑀸𑀯𑁂𑀢𑀺, 𑀪𑀸𑀯𑁂𑀦𑁆𑀢𑁄𑀧𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀲𑁆𑀲𑀤𑁆𑀥𑀺𑀩𑀳𑀼𑀮𑀲𑁆𑀲 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀪𑀸𑀯𑀦𑀸𑀬 𑀤𑁆𑀯𑁂 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀧𑀝𑀺𑀯𑁂𑀥𑀓𑀸𑀮𑁂𑀧𑀺 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀧𑀝𑀺𑀯𑁂𑀥𑀸𑀬 𑀤𑁆𑀯𑁂 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸, 𑀤𑀲𑁆𑀲𑀦𑀝𑁆𑀞𑁂𑀦 𑀧𑀝𑀺𑀯𑁂𑀥𑁄, 𑀏𑀯𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀧𑀺 𑀪𑀸𑀯𑁂𑀢𑀺, 𑀪𑀸𑀯𑁂𑀦𑁆𑀢𑁄𑀧𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀯𑁂𑀤𑀩𑀳𑀼𑀮𑀲𑁆𑀲 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀪𑀸𑀯𑀦𑀸𑀬 𑀤𑁆𑀯𑁂 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀧𑀝𑀺𑀯𑁂𑀥𑀓𑀸𑀮𑁂𑀧𑀺 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀧𑀝𑀺𑀯𑁂𑀥𑀸𑀬 𑀤𑁆𑀯𑁂 𑀯𑀺𑀫𑁄𑀓𑁆𑀔𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸, 𑀤𑀲𑁆𑀲𑀦𑀝𑁆𑀞𑁂𑀦 𑀧𑀝𑀺𑀯𑁂𑀥𑁄, 𑀏𑀯𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀧𑀺 𑀪𑀸𑀯𑁂𑀢𑀺, 𑀪𑀸𑀯𑁂𑀦𑁆𑀢𑁄𑀧𑀺 𑀧𑀝𑀺𑀯𑀺𑀚𑁆𑀛𑀢𑀺.

𑁨𑁨𑁬. 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀢𑀫𑁄 𑀯𑀺𑀫𑁄𑀓𑁆𑀔𑁄 𑀅𑀥𑀺𑀫𑀢𑁆𑀢𑁄 𑀳𑁄𑀢𑀺? 𑀓𑀢𑀫𑀯𑀺𑀫𑁄𑀓𑁆𑀔𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀢𑀫𑁄 𑀯𑀺𑀫𑁄𑀓𑁆𑀔𑁄 𑀅𑀥𑀺𑀫𑀢𑁆𑀢𑁄 𑀳𑁄𑀢𑀺? 𑀓𑀢𑀫𑀯𑀺𑀫𑁄𑀓𑁆𑀔𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀓𑀸𑀬𑀲𑀓𑁆𑀔𑀻 𑀳𑁄𑀢𑀺? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀢𑀫𑁄 𑀯𑀺𑀫𑁄𑀓𑁆𑀔𑁄 𑀅𑀥𑀺𑀫𑀢𑁆𑀢𑁄 𑀳𑁄𑀢𑀺? 𑀓𑀢𑀫𑀯𑀺𑀫𑁄𑀓𑁆𑀔𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀳𑁄𑀢𑀺?

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄 𑀅𑀥𑀺𑀫𑀢𑁆𑀢𑁄 𑀳𑁄𑀢𑀺. 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄 𑀅𑀥𑀺𑀫𑀢𑁆𑀢𑁄 𑀳𑁄𑀢𑀺. 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀓𑀸𑀬𑀲𑀓𑁆𑀔𑀻 𑀳𑁄𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄 𑀅𑀥𑀺𑀫𑀢𑁆𑀢𑁄 𑀳𑁄𑀢𑀺. 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀳𑁄𑀢𑀺.

𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑁋 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀨𑀼𑀝𑁆𑀞𑀢𑁆𑀢𑀸 𑀲𑀘𑁆𑀙𑀺𑀓𑀢𑁄𑀢𑀺 𑁋 𑀓𑀸𑀬𑀲𑀓𑁆𑀔𑀻. 𑀤𑀺𑀝𑁆𑀞𑀢𑁆𑀢𑀸 𑀧𑀢𑁆𑀢𑁄𑀢𑀺 𑁋 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀘𑁆𑀘𑀢𑀻𑀢𑀺 𑁋 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀛𑀸𑀦𑀨𑀲𑁆𑀲𑀁 𑀧𑀞𑀫𑀁 𑀨𑀼𑀲𑀢𑀺, 𑀧𑀘𑁆𑀙𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑁋 𑀓𑀸𑀬𑀲𑀓𑁆𑀔𑀻. ‘‘𑀤𑀼𑀓𑁆𑀔𑀸 𑀲𑀗𑁆𑀔𑀸𑀭𑀸, 𑀲𑀼𑀔𑁄 𑀦𑀺𑀭𑁄𑀥𑁄’’𑀢𑀺 𑀯𑀺𑀜𑁆𑀜𑀸𑀢𑀁 𑀳𑁄𑀢𑀺 𑀤𑀺𑀝𑁆𑀞𑀁 𑀯𑀺𑀤𑀺𑀢𑀁 𑀲𑀘𑁆𑀙𑀺𑀓𑀢𑀁 𑀨𑀲𑁆𑀲𑀺𑀢𑀁 𑀧𑀜𑁆𑀜𑀸𑀬𑀸𑀢𑀺 𑁋 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄…𑀧𑁂… 𑀬𑁂 𑀳𑀺 𑀓𑁂𑀘𑀺 𑀦𑁂𑀓𑁆𑀔𑀫𑁆𑀫𑀁 𑀪𑀸𑀯𑀺𑀢𑀸 𑀯𑀸 𑀪𑀸𑀯𑁂𑀦𑁆𑀢𑀺 𑀯𑀸 𑀪𑀸𑀯𑀺𑀲𑁆𑀲𑀦𑁆𑀢𑀺 𑀯𑀸…𑀧𑁂… 𑀲𑀩𑁆𑀩𑁂 𑀢𑁂 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸, 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀓𑀸𑀬𑀲𑀓𑁆𑀔𑀻, 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸.

𑀬𑁂 𑀳𑀺 𑀓𑁂𑀘𑀺 𑀅𑀩𑁆𑀬𑀸𑀧𑀸𑀤𑀁… 𑀆𑀮𑁄𑀓𑀲𑀜𑁆𑀜𑀁… 𑀅𑀯𑀺𑀓𑁆𑀔𑁂𑀧𑀁… 𑀬𑁂 𑀳𑀺 𑀓𑁂𑀘𑀺 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀦𑁆𑀢𑀺, 𑀲𑀫𑀼𑀤𑀬𑀁 𑀧𑀚𑀳𑀦𑁆𑀢𑀺, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸, 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀓𑀸𑀬𑀲𑀓𑁆𑀔𑀻, 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸.

𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀳𑁄𑀢𑀺? 𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺? 𑀘𑀢𑀽𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀳𑁄𑀢𑀺. 𑀘𑀢𑀽𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑀁 𑀧𑀝𑀺𑀯𑀺𑀚𑁆𑀛𑀢𑀺, 𑀲𑀫𑀼𑀤𑀬𑀲𑀘𑁆𑀘𑀁 𑀧𑀳𑀸𑀦𑀧𑀝𑀺𑀯𑁂𑀥𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀦𑀺𑀭𑁄𑀥𑀲𑀘𑁆𑀘𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀫𑀕𑁆𑀕𑀲𑀘𑁆𑀘𑀁 𑀪𑀸𑀯𑀦𑀸𑀧𑀝𑀺𑀯𑁂𑀥𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀇𑀫𑁂𑀳𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀳𑁄𑀢𑀺. 𑀇𑀫𑁂𑀳𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀓𑀸𑀬𑀲𑀓𑁆𑀔𑀻, 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄.

𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀳𑁄𑀢𑀺? 𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺? 𑀦𑀯𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀳𑁄𑀢𑀺. 𑀦𑀯𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑀁 𑀧𑀝𑀺𑀯𑀺𑀚𑁆𑀛𑀢𑀺…𑀧𑁂… 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁄 𑀘 𑀦𑀺𑀭𑁄𑀥𑀲𑁆𑀲. 𑀇𑀫𑁂𑀳𑀺 𑀦𑀯𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀳𑁄𑀢𑀺. 𑀇𑀫𑁂𑀳𑀺 𑀦𑀯𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀓𑀸𑀬𑀲𑀓𑁆𑀔𑀻, 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄.

𑁨𑁨𑁭. 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀓𑀢𑀫𑁂 𑀥𑀫𑁆𑀫𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺? 𑀓𑀣𑀁 𑀲𑀫𑁆𑀫𑀸𑀤𑀲𑁆𑀲𑀦𑀁 𑀳𑁄𑀢𑀺? 𑀓𑀣𑀁 𑀢𑀤𑀦𑁆𑀯𑀬𑁂𑀦 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀢𑁄 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺? 𑀓𑀢𑁆𑀣 𑀓𑀗𑁆𑀔𑀸 𑀧𑀳𑀻𑀬𑀢𑀺? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀓𑀢𑀫𑁂 𑀥𑀫𑁆𑀫𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺? 𑀓𑀣𑀁 𑀲𑀫𑁆𑀫𑀸𑀤𑀲𑁆𑀲𑀦𑀁 𑀳𑁄𑀢𑀺? 𑀓𑀣𑀁 𑀢𑀤𑀦𑁆𑀯𑀬𑁂𑀦 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀢𑁄 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺? 𑀓𑀢𑁆𑀣 𑀓𑀗𑁆𑀔𑀸 𑀧𑀳𑀻𑀬𑀢𑀺? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀓𑀢𑀫𑁂 𑀥𑀫𑁆𑀫𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺? 𑀓𑀣𑀁 𑀲𑀫𑁆𑀫𑀸𑀤𑀲𑁆𑀲𑀦𑀁 𑀳𑁄𑀢𑀺? 𑀓𑀣𑀁 𑀢𑀤𑀦𑁆𑀯𑀬𑁂𑀦 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀢𑁄 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺? 𑀓𑀢𑁆𑀣 𑀓𑀗𑁆𑀔𑀸 𑀧𑀳𑀻𑀬𑀢𑀺?

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦𑀺𑀫𑀺𑀢𑁆𑀢𑀁 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺; 𑀢𑁂𑀦 𑀯𑀼𑀘𑁆𑀘𑀢𑀺 𑁋 𑀲𑀫𑁆𑀫𑀸𑀤𑀲𑁆𑀲𑀦𑀁. 𑀏𑀯𑀁 𑀢𑀤𑀦𑁆𑀯𑀬𑁂𑀦 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀢𑁄 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀏𑀢𑁆𑀣 𑀓𑀗𑁆𑀔𑀸 𑀧𑀳𑀻𑀬𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀧𑀯𑀢𑁆𑀢𑀁 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺; 𑀢𑁂𑀦 𑀯𑀼𑀘𑁆𑀘𑀢𑀺 𑁋 𑀲𑀫𑁆𑀫𑀸𑀤𑀲𑁆𑀲𑀦𑀁. 𑀏𑀯𑀁 𑀢𑀤𑀦𑁆𑀯𑀬𑁂𑀦 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀢𑁄 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀏𑀢𑁆𑀣 𑀓𑀗𑁆𑀔𑀸 𑀧𑀳𑀻𑀬𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦𑀺𑀫𑀺𑀢𑁆𑀢𑀜𑁆𑀘 𑀧𑀯𑀢𑁆𑀢𑀜𑁆𑀘 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺; 𑀢𑁂𑀦 𑀯𑀼𑀘𑁆𑀘𑀢𑀺 𑁋 𑀲𑀫𑁆𑀫𑀸𑀤𑀲𑁆𑀲𑀦𑀁. 𑀏𑀯𑀁 𑀢𑀤𑀦𑁆𑀯𑀬𑁂𑀦 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀢𑁄 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀏𑀢𑁆𑀣 𑀓𑀗𑁆𑀔𑀸 𑀧𑀳𑀻𑀬𑀢𑀺.

𑀬𑀜𑁆𑀘 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀬𑀜𑁆𑀘 𑀲𑀫𑁆𑀫𑀸𑀤𑀲𑁆𑀲𑀦𑀁 𑀬𑀸 𑀘 𑀓𑀗𑁆𑀔𑀸𑀯𑀺𑀢𑀭𑀡𑀸, 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘, 𑀉𑀤𑀸𑀳𑀼 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺? 𑀬𑀜𑁆𑀘 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀬𑀜𑁆𑀘 𑀲𑀫𑁆𑀫𑀸𑀤𑀲𑁆𑀲𑀦𑀁 𑀬𑀸 𑀘 𑀓𑀗𑁆𑀔𑀸𑀯𑀺𑀢𑀭𑀡𑀸, 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀪𑀬𑀢𑁄 𑀉𑀧𑀝𑁆𑀞𑀸𑀢𑀺? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀪𑀬𑀢𑁄 𑀉𑀧𑀝𑁆𑀞𑀸𑀢𑀺? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀪𑀬𑀢𑁄 𑀉𑀧𑀝𑁆𑀞𑀸𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀦𑀺𑀫𑀺𑀢𑁆𑀢𑀁 𑀪𑀬𑀢𑁄 𑀉𑀧𑀝𑁆𑀞𑀸𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀯𑀢𑁆𑀢𑀁 𑀪𑀬𑀢𑁄 𑀉𑀧𑀝𑁆𑀞𑀸𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀦𑀺𑀫𑀺𑀢𑁆𑀢𑀜𑁆𑀘 𑀧𑀯𑀢𑁆𑀢𑀜𑁆𑀘 𑀪𑀬𑀢𑁄 𑀉𑀧𑀝𑁆𑀞𑀸𑀢𑀺.

𑀬𑀸 𑀘 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀬𑀜𑁆𑀘 𑀆𑀤𑀻𑀦𑀯𑁂 𑀜𑀸𑀡𑀁 𑀬𑀸 𑀘 𑀦𑀺𑀩𑁆𑀩𑀺𑀤𑀸, 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘, 𑀉𑀤𑀸𑀳𑀼 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺? 𑀬𑀸 𑀘 𑀪𑀬𑀢𑀼𑀧𑀝𑁆𑀞𑀸𑀦𑁂 𑀧𑀜𑁆𑀜𑀸 𑀬𑀜𑁆𑀘 𑀆𑀤𑀻𑀦𑀯𑁂 𑀜𑀸𑀡𑀁 𑀬𑀸 𑀘 𑀦𑀺𑀩𑁆𑀩𑀺𑀤𑀸, 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁.

𑀬𑀸 𑀘 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀬𑀸 𑀘 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸, 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘, 𑀉𑀤𑀸𑀳𑀼 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺? 𑀬𑀸 𑀘 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀬𑀸 𑀘 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸, 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀧𑀝𑀺𑀲𑀗𑁆𑀔𑀸 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀧𑀝𑀺𑀲𑀗𑁆𑀔𑀸 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀁 𑀧𑀝𑀺𑀲𑀗𑁆𑀔𑀸 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀦𑀺𑀫𑀺𑀢𑁆𑀢𑀁 𑀧𑀝𑀺𑀲𑀗𑁆𑀔𑀸 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀯𑀢𑁆𑀢𑀁 𑀧𑀝𑀺𑀲𑀗𑁆𑀔𑀸 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀦𑀺𑀫𑀺𑀢𑁆𑀢𑀜𑁆𑀘 𑀧𑀯𑀢𑁆𑀢𑀜𑁆𑀘 𑀧𑀝𑀺𑀲𑀗𑁆𑀔𑀸 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀸 𑀘 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸 𑀬𑀸 𑀘 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸 𑀬𑀸 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸, 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘, 𑀉𑀤𑀸𑀳𑀼 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺? 𑀬𑀸 𑀘 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸 𑀬𑀸 𑀘 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸 𑀬𑀸 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸, 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀼𑀢𑁄 𑀘𑀺𑀢𑁆𑀢𑀁 𑀯𑀼𑀝𑁆𑀞𑀸𑀢𑀺, 𑀓𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀼𑀢𑁄 𑀘𑀺𑀢𑁆𑀢𑀁 𑀯𑀼𑀝𑁆𑀞𑀸𑀢𑀺, 𑀓𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀓𑀼𑀢𑁄 𑀘𑀺𑀢𑁆𑀢𑀁 𑀯𑀼𑀝𑁆𑀞𑀸𑀢𑀺, 𑀓𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀦𑀺𑀫𑀺𑀢𑁆𑀢𑀸 𑀘𑀺𑀢𑁆𑀢𑀁 𑀯𑀼𑀝𑁆𑀞𑀸𑀢𑀺, 𑀅𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀯𑀢𑁆𑀢𑀸 𑀘𑀺𑀢𑁆𑀢𑀁 𑀯𑀼𑀝𑁆𑀞𑀸𑀢𑀺, 𑀅𑀧𑁆𑀧𑀯𑀢𑁆𑀢𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀦𑀺𑀫𑀺𑀢𑁆𑀢𑀸 𑀘 𑀧𑀯𑀢𑁆𑀢𑀸 𑀘 𑀘𑀺𑀢𑁆𑀢𑀁 𑀯𑀼𑀝𑁆𑀞𑀸𑀢𑀺, 𑀅𑀦𑀺𑀫𑀺𑀢𑁆𑀢𑁂 𑀅𑀧𑁆𑀧𑀯𑀢𑁆𑀢𑁂 𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 [𑀦𑀺𑀭𑁄𑀥𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 (𑀲𑀻.)] 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺.

𑀬𑀸 𑀘 𑀩𑀳𑀺𑀤𑁆𑀥𑀸𑀯𑀼𑀝𑁆𑀞𑀸𑀦𑀯𑀺𑀯𑀝𑁆𑀝𑀦𑁂 𑀧𑀜𑁆𑀜𑀸 𑀬𑁂 𑀘 𑀕𑁄𑀢𑁆𑀭𑀪𑀽 𑀥𑀫𑁆𑀫𑀸, 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘, 𑀉𑀤𑀸𑀳𑀼 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺? 𑀬𑀸 𑀘 𑀩𑀳𑀺𑀤𑁆𑀥𑀸𑀯𑀼𑀝𑁆𑀞𑀸𑀦𑀯𑀺𑀯𑀝𑁆𑀝𑀦𑁂 𑀧𑀜𑁆𑀜𑀸 𑀬𑁂 𑀘 𑀕𑁄𑀢𑁆𑀭𑀪𑀽 𑀥𑀫𑁆𑀫𑀸, 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀓𑀢𑀫𑁂𑀦 𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀢𑀺? 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀓𑀢𑀫𑁂𑀦 𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀢𑀺? 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀓𑀢𑀫𑁂𑀦 𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀢𑀺. 𑀬𑀸 𑀘 𑀤𑀼𑀪𑀢𑁄𑀯𑀼𑀝𑁆𑀞𑀸𑀦𑀯𑀺𑀯𑀝𑁆𑀝𑀦𑁂 𑀧𑀜𑁆𑀜𑀸 𑀬𑀜𑁆𑀘 𑀫𑀕𑁆𑀕𑁂 𑀜𑀸𑀡𑀁, 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘, 𑀉𑀤𑀸𑀳𑀼 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺? 𑀬𑀸 𑀘 𑀤𑀼𑀪𑀢𑁄𑀯𑀼𑀝𑁆𑀞𑀸𑀦𑀯𑀺𑀯𑀝𑁆𑀝𑀦𑁂 𑀧𑀜𑁆𑀜𑀸 𑀬𑀜𑁆𑀘 𑀫𑀕𑁆𑀕𑁂 𑀜𑀸𑀡𑀁, 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁.

𑁨𑁨𑁮. 𑀓𑀢𑀺𑀳𑀸𑀓𑀸𑀭𑁂𑀳𑀺 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀦𑀸𑀦𑀸𑀓𑁆𑀔𑀡𑁂 [𑀦𑀸𑀦𑀸𑀔𑀡𑁂 (𑀲𑁆𑀬𑀸. 𑀓.)] 𑀳𑁄𑀦𑁆𑀢𑀺? 𑀓𑀢𑀺𑀳𑀸𑀓𑀸𑀭𑁂𑀳𑀺 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀏𑀓𑀓𑁆𑀔𑀡𑁂 𑀳𑁄𑀦𑁆𑀢𑀺? 𑀘𑀢𑀽𑀳𑀸𑀓𑀸𑀭𑁂𑀳𑀺 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀦𑀸𑀦𑀸𑀓𑁆𑀔𑀡𑁂 𑀳𑁄𑀦𑁆𑀢𑀺. 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀏𑀓𑀓𑁆𑀔𑀡𑁂 𑀳𑁄𑀦𑁆𑀢𑀺.

𑀓𑀢𑀫𑁂𑀳𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀦𑀸𑀦𑀸𑀓𑁆𑀔𑀡𑁂 𑀳𑁄𑀦𑁆𑀢𑀺? 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦, 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦, 𑀅𑀪𑀺𑀦𑀻𑀳𑀸𑀭𑀝𑁆𑀞𑁂𑀦, 𑀦𑀺𑀬𑁆𑀬𑀸𑀦𑀝𑁆𑀞𑁂𑀦. 𑀓𑀣𑀁 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀦𑀸𑀦𑀸𑀓𑁆𑀔𑀡𑁂 𑀳𑁄𑀦𑁆𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺, 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄 𑀆𑀥𑀺𑀧𑀢𑁂𑀬𑁆𑀬𑁄 𑀳𑁄𑀢𑀺. 𑀏𑀯𑀁 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀦𑀸𑀦𑀸𑀓𑁆𑀔𑀡𑁂 𑀳𑁄𑀦𑁆𑀢𑀺.

𑀓𑀣𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀦𑀸𑀦𑀸𑀓𑁆𑀔𑀡𑁂 𑀳𑁄𑀦𑁆𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀺, 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀺, 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀺. 𑀏𑀯𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀦𑀸𑀦𑀸𑀓𑁆𑀔𑀡𑁂 𑀳𑁄𑀦𑁆𑀢𑀺.

𑀓𑀣𑀁 𑀅𑀪𑀺𑀦𑀻𑀳𑀸𑀭𑀝𑁆𑀞𑁂𑀦 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀦𑀸𑀦𑀸𑀓𑁆𑀔𑀡𑁂 𑀳𑁄𑀦𑁆𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺, 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺, 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺. 𑀏𑀯𑀁 𑀅𑀪𑀺𑀦𑀻𑀳𑀸𑀭𑀝𑁆𑀞𑁂𑀦 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀦𑀸𑀦𑀸𑀓𑁆𑀔𑀡𑁂 𑀳𑁄𑀦𑁆𑀢𑀺.

𑀓𑀣𑀁 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀦𑀸𑀦𑀸𑀓𑁆𑀔𑀡𑁂 𑀳𑁄𑀦𑁆𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀦𑀺𑀬𑁆𑀬𑀸𑀢𑀺, 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀦𑀺𑀬𑁆𑀬𑀸𑀢𑀺, 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀲𑁆𑀲 𑀯𑀲𑁂𑀦 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀦𑀺𑀬𑁆𑀬𑀸𑀢𑀺. 𑀏𑀯𑀁 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀦𑀸𑀦𑀸𑀓𑁆𑀔𑀡𑁂 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀦𑀸𑀦𑀸𑀓𑁆𑀔𑀡𑁂 𑀳𑁄𑀦𑁆𑀢𑀺.

𑀓𑀢𑀫𑁂𑀳𑀺 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀏𑀓𑀓𑁆𑀔𑀡𑁂 𑀳𑁄𑀦𑁆𑀢𑀺? 𑀲𑀫𑁄𑀥𑀸𑀦𑀝𑁆𑀞𑁂𑀦, 𑀅𑀥𑀺𑀕𑀫𑀦𑀝𑁆𑀞𑁂𑀦, 𑀧𑀝𑀺𑀮𑀸𑀪𑀝𑁆𑀞𑁂𑀦 𑀧𑀝𑀺𑀯𑁂𑀥𑀝𑁆𑀞𑁂𑀦, 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁂𑀦, 𑀨𑀲𑁆𑀲𑀦𑀝𑁆𑀞𑁂𑀦, 𑀅𑀪𑀺𑀲𑀫𑀬𑀝𑁆𑀞𑁂𑀦. 𑀓𑀣𑀁 𑀲𑀫𑁄𑀥𑀸𑀦𑀝𑁆𑀞𑁂𑀦 𑀅𑀥𑀺𑀕𑀫𑀦𑀝𑁆𑀞𑁂𑀦 𑀧𑀝𑀺𑀮𑀸𑀪𑀝𑁆𑀞𑁂𑀦 𑀧𑀝𑀺𑀯𑁂𑀥𑀝𑁆𑀞𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁂𑀦 𑀨𑀲𑁆𑀲𑀦𑀝𑁆𑀞𑁂𑀦 𑀅𑀪𑀺𑀲𑀫𑀬𑀝𑁆𑀞𑁂𑀦 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀏𑀓𑀓𑁆𑀔𑀡𑁂 𑀳𑁄𑀦𑁆𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀬𑀢𑁄 𑀫𑀼𑀘𑁆𑀘𑀢𑀺, 𑀢𑀢𑁆𑀣 𑀦 𑀧𑀡𑀺𑀤𑀳𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀬𑀢𑁆𑀣 𑀦 𑀧𑀡𑀺𑀤𑀳𑀢𑀺, 𑀢𑁂𑀦 𑀲𑀼𑀜𑁆𑀜𑁄𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀬𑁂𑀦 𑀲𑀼𑀜𑁆𑀜𑁄, 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀅𑀦𑀺𑀫𑀺𑀢𑁆𑀢𑁄𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀏𑀯𑀁 𑀲𑀫𑁄𑀥𑀸𑀦𑀝𑁆𑀞𑁂𑀦 𑀅𑀥𑀺𑀕𑀫𑀦𑀝𑁆𑀞𑁂𑀦 𑀧𑀝𑀺𑀮𑀸𑀪𑀝𑁆𑀞𑁂𑀦 𑀧𑀝𑀺𑀯𑁂𑀥𑀝𑁆𑀞𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁂𑀦 𑀨𑀲𑁆𑀲𑀦𑀝𑁆𑀞𑁂𑀦 𑀅𑀪𑀺𑀲𑀫𑀬𑀝𑁆𑀞𑁂𑀦 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀏𑀓𑀓𑁆𑀔𑀡𑁂 𑀳𑁄𑀦𑁆𑀢𑀺.

𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀧𑀡𑀺𑀥𑀺𑀬𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀬𑀢𑁆𑀣 𑀦 𑀧𑀡𑀺𑀤𑀳𑀢𑀺, 𑀢𑁂𑀦 𑀲𑀼𑀜𑁆𑀜𑁄𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀬𑁂𑀦 𑀲𑀼𑀜𑁆𑀜𑁄, 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀅𑀦𑀺𑀫𑀺𑀢𑁆𑀢𑁄𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀬𑁂𑀦 𑀦𑀺𑀫𑀺𑀢𑁆𑀢𑁂𑀦 𑀅𑀦𑀺𑀫𑀺𑀢𑁆𑀢𑁄, 𑀢𑀢𑁆𑀣 𑀦 𑀧𑀡𑀺𑀤𑀳𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀏𑀯𑀁 𑀲𑀫𑁄𑀥𑀸𑀦𑀝𑁆𑀞𑁂𑀦 𑀅𑀥𑀺𑀕𑀫𑀦𑀝𑁆𑀞𑁂𑀦 𑀧𑀝𑀺𑀮𑀸𑀪𑀝𑁆𑀞𑁂𑀦 𑀧𑀝𑀺𑀯𑁂𑀥𑀝𑁆𑀞𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁂𑀦 𑀨𑀲𑁆𑀲𑀦𑀝𑁆𑀞𑁂𑀦 𑀅𑀪𑀺𑀲𑀫𑀬𑀝𑁆𑀞𑁂𑀦 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀏𑀓𑀓𑁆𑀔𑀡𑁂 𑀳𑁄𑀦𑁆𑀢𑀺.

𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀅𑀪𑀺𑀦𑀺𑀯𑁂𑀲𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀬𑁂𑀦 𑀲𑀼𑀜𑁆𑀜𑁄, 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀅𑀦𑀺𑀫𑀺𑀢𑁆𑀢𑁄𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀬𑁂𑀦 𑀦𑀺𑀫𑀺𑀢𑁆𑀢𑁂𑀦 𑀅𑀦𑀺𑀫𑀺𑀢𑁆𑀢𑁄, 𑀢𑀢𑁆𑀣 𑀦 𑀧𑀡𑀺𑀤𑀳𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀬𑀢𑁆𑀣 𑀦 𑀧𑀡𑀺𑀤𑀳𑀢𑀺, 𑀢𑁂𑀦 𑀲𑀼𑀜𑁆𑀜𑁄𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀏𑀯𑀁 𑀲𑀫𑁄𑀥𑀸𑀦𑀝𑁆𑀞𑁂𑀦 𑀅𑀥𑀺𑀕𑀫𑀦𑀝𑁆𑀞𑁂𑀦 𑀧𑀝𑀺𑀮𑀸𑀪𑀝𑁆𑀞𑁂𑀦 𑀧𑀝𑀺𑀯𑁂𑀥𑀝𑁆𑀞𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁂𑀦 𑀨𑀲𑁆𑀲𑀦𑀝𑁆𑀞𑁂𑀦 𑀅𑀪𑀺𑀲𑀫𑀬𑀝𑁆𑀞𑁂𑀦 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀏𑀓𑀓𑁆𑀔𑀡𑁂 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀢𑀬𑁄 𑀯𑀺𑀫𑁄𑀓𑁆𑀔𑀸 𑀏𑀓𑀓𑁆𑀔𑀡𑁂 𑀳𑁄𑀦𑁆𑀢𑀺.

𑁨𑁨𑁯. 𑀅𑀢𑁆𑀣𑀺 𑀯𑀺𑀫𑁄𑀓𑁆𑀔𑁄, 𑀅𑀢𑁆𑀣𑀺 𑀫𑀼𑀔𑀁, 𑀅𑀢𑁆𑀣𑀺 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀅𑀢𑁆𑀣𑀺 𑀯𑀺𑀫𑁄𑀓𑁆𑀔𑀧𑀘𑁆𑀘𑀦𑀻𑀓𑀁, 𑀅𑀢𑁆𑀣𑀺 𑀯𑀺𑀫𑁄𑀓𑁆𑀔𑀸𑀦𑀼𑀮𑁄𑀫𑀁, 𑀅𑀢𑁆𑀣𑀺 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁄, 𑀅𑀢𑁆𑀣𑀺 𑀯𑀺𑀫𑁄𑀓𑁆𑀔𑀪𑀸𑀯𑀦𑀸, 𑀅𑀢𑁆𑀣𑀺 𑀯𑀺𑀫𑁄𑀓𑁆𑀔𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺.

𑀓𑀢𑀫𑁄 𑀯𑀺𑀫𑁄𑀓𑁆𑀔𑁄? 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄, 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄, 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀓𑀢𑀫𑁄 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀅𑀪𑀺𑀦𑀺𑀯𑁂𑀲𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀼𑀔𑀢𑁄 𑀅𑀪𑀺𑀦𑀺𑀯𑁂𑀲𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀢𑁆𑀢𑀢𑁄 𑀅𑀪𑀺𑀦𑀺𑀯𑁂𑀲𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀦𑁆𑀤𑀺𑀬𑀸 𑀅𑀪𑀺𑀦𑀺𑀯𑁂𑀲𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀭𑀸𑀕𑀢𑁄 𑀅𑀪𑀺𑀦𑀺𑀯𑁂𑀲𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀫𑀼𑀤𑀬𑀢𑁄 𑀅𑀪𑀺𑀦𑀺𑀯𑁂𑀲𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀆𑀤𑀸𑀦𑀢𑁄 𑀅𑀪𑀺𑀦𑀺𑀯𑁂𑀲𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀫𑀺𑀢𑁆𑀢𑀢𑁄 𑀅𑀪𑀺𑀦𑀺𑀯𑁂𑀲𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀧𑀡𑀺𑀥𑀺𑀬𑀸 𑀅𑀪𑀺𑀦𑀺𑀯𑁂𑀲𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀩𑁆𑀩𑀸𑀪𑀺𑀦𑀺𑀯𑁂𑀲𑁂𑀳𑀺 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄.

𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀅𑀪𑀺𑀦𑀺𑀯𑁂𑀲𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄…𑀧𑁂… 𑀭𑀽𑀧𑁂 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀩𑁆𑀩𑀸𑀪𑀺𑀦𑀺𑀯𑁂𑀲𑁂𑀳𑀺 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂… 𑀘𑀓𑁆𑀔𑀼𑀲𑁆𑀫𑀺𑀁…𑀧𑁂… 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀅𑀪𑀺𑀦𑀺𑀯𑁂𑀲𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄…𑀧𑁂… 𑀚𑀭𑀸𑀫𑀭𑀡𑁂 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀩𑁆𑀩𑀸𑀪𑀺𑀦𑀺𑀯𑁂𑀲𑁂𑀳𑀺 𑀫𑀼𑀘𑁆𑀘𑀢𑀻𑀢𑀺 𑁋 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀬𑀁 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀼𑀔𑀢𑁄 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀢𑁆𑀢𑀢𑁄 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀦𑁆𑀤𑀺𑀬𑀸 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀭𑀸𑀕𑀢𑁄 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀫𑀼𑀤𑀬𑀢𑁄 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀆𑀤𑀸𑀦𑀢𑁄 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀧𑀡𑀺𑀥𑀺𑀬𑀸 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄.

𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄 …𑀧𑁂… 𑀭𑀽𑀧𑁂 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀭𑀽𑀧𑁂 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀧𑀡𑀺𑀥𑀺𑀬𑀸 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀭𑀽𑀧𑁂 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂… 𑀘𑀓𑁆𑀔𑀼𑀲𑁆𑀫𑀺𑀁…𑀧𑁂… 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄…𑀧𑁂… 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀚𑀭𑀸𑀫𑀭𑀡𑁂 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀧𑀡𑀺𑀥𑀺𑀬𑀸 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀚𑀭𑀸𑀫𑀭𑀡𑁂 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀦𑀺𑀫𑀺𑀢𑁆𑀢𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀬𑀁 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄.

𑀓𑀢𑀫𑁄 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀧𑀡𑀺𑀥𑀺𑀬𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀼𑀔𑀢𑁄 𑀧𑀡𑀺𑀥𑀺𑀬𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀢𑁆𑀢𑀢𑁄 𑀧𑀡𑀺𑀥𑀺𑀬𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀦𑁆𑀤𑀺𑀬𑀸 𑀧𑀡𑀺𑀥𑀺𑀬𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀭𑀸𑀕𑀢𑁄 𑀧𑀡𑀺𑀥𑀺𑀬𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀫𑀼𑀤𑀬𑀢𑁄 𑀧𑀡𑀺𑀥𑀺𑀬𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀆𑀤𑀸𑀦𑀢𑁄 𑀧𑀡𑀺𑀥𑀺𑀬𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀫𑀺𑀢𑁆𑀢𑀢𑁄 𑀧𑀡𑀺𑀥𑀺𑀬𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀩𑁆𑀩𑀧𑀡𑀺𑀥𑀻𑀳𑀺 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀧𑀡𑀺𑀥𑀺𑀬𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄.

𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀧𑀡𑀺𑀥𑀺𑀬𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄…𑀧𑁂… 𑀭𑀽𑀧𑁂 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀩𑁆𑀩𑀧𑀡𑀺𑀥𑀻𑀳𑀺 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀭𑀽𑀧𑁂 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀧𑀡𑀺𑀥𑀺𑀬𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂… 𑀘𑀓𑁆𑀔𑀼𑀲𑁆𑀫𑀺𑀁…𑀧𑁂… 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀘𑁆𑀘𑀢𑁄 𑀧𑀡𑀺𑀥𑀺𑀬𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄…𑀧𑁂… 𑀚𑀭𑀸𑀫𑀭𑀡𑁂 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀲𑀩𑁆𑀩𑀧𑀡𑀺𑀥𑀻𑀳𑀺 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀚𑀭𑀸𑀫𑀭𑀡𑁂 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀁 𑀅𑀪𑀺𑀦𑀺𑀯𑁂𑀲𑀢𑁄 𑀧𑀡𑀺𑀥𑀺𑀬𑀸 𑀫𑀼𑀘𑁆𑀘𑀢𑀻𑀢𑀺 𑁋 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀬𑀁 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀬𑀁 𑀯𑀺𑀫𑁄𑀓𑁆𑀔𑁄.

𑁨𑁩𑁦. 𑀓𑀢𑀫𑀁 𑀫𑀼𑀔𑀁? 𑀬𑁂 𑀢𑀢𑁆𑀣 𑀚𑀸𑀢𑀸 𑀅𑀦𑀯𑀚𑁆𑀚𑀸 𑀓𑀼𑀲𑀮𑀸 𑀩𑁄𑀥𑀺𑀧𑀓𑁆𑀔𑀺𑀬𑀸𑀥𑀫𑁆𑀫𑀸, 𑀇𑀤𑀁 𑀫𑀼𑀔𑀁.

𑀓𑀢𑀫𑀁 𑀯𑀺𑀫𑁄𑀓𑁆𑀔𑀫𑀼𑀔𑀁? 𑀬𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀁 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁, 𑀇𑀤𑀁 𑀯𑀺𑀫𑁄𑀓𑁆𑀔𑀫𑀼𑀔𑀁. 𑀯𑀺𑀫𑁄𑀓𑁆𑀔𑀜𑁆𑀘 𑀫𑀼𑀔𑀜𑁆𑀘 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀇𑀤𑀁 𑀯𑀺𑀫𑁄𑀓𑁆𑀔𑀫𑀼𑀔𑀁.

𑀓𑀢𑀫𑀁 𑀯𑀺𑀫𑁄𑀓𑁆𑀔𑀧𑀘𑁆𑀘𑀦𑀻𑀓𑀁? 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀯𑀺𑀫𑁄𑀓𑁆𑀔𑀧𑀘𑁆𑀘𑀦𑀻𑀓𑀸𑀦𑀺, 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀯𑀺𑀫𑁄𑀓𑁆𑀔𑀧𑀘𑁆𑀘𑀦𑀻𑀓𑀸𑀦𑀺, 𑀲𑀩𑁆𑀩𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀯𑀺𑀫𑁄𑀓𑁆𑀔𑀧𑀘𑁆𑀘𑀦𑀻𑀓𑀸, 𑀇𑀤𑀁 𑀯𑀺𑀫𑁄𑀓𑁆𑀔𑀧𑀘𑁆𑀘𑀦𑀻𑀓𑀁.

𑀓𑀢𑀫𑀁 𑀯𑀺𑀫𑁄𑀓𑁆𑀔𑀸𑀦𑀼𑀮𑁄𑀫𑀁? 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀯𑀺𑀫𑁄𑀓𑁆𑀔𑀸𑀦𑀼𑀮𑁄𑀫𑀸𑀦𑀺, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀯𑀺𑀫𑁄𑀓𑁆𑀔𑀸𑀦𑀼𑀮𑁄𑀫𑀸𑀦𑀺, 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀯𑀺𑀫𑁄𑀓𑁆𑀔𑀸𑀦𑀼𑀮𑁄𑀫𑀸, 𑀇𑀤𑀁 𑀯𑀺𑀫𑁄𑀓𑁆𑀔𑀸𑀦𑀼𑀮𑁄𑀫𑀁.

𑀓𑀢𑀫𑁄 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁄? 𑀲𑀜𑁆𑀜𑀸𑀯𑀺𑀯𑀝𑁆𑀝𑁄, 𑀘𑁂𑀢𑁄𑀯𑀺𑀯𑀝𑁆𑀝𑁄, 𑀘𑀺𑀢𑁆𑀢𑀯𑀺𑀯𑀝𑁆𑀝𑁄, 𑀜𑀸𑀡𑀯𑀺𑀯𑀝𑁆𑀝𑁄, 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁄, 𑀲𑀘𑁆𑀘𑀯𑀺𑀯𑀝𑁆𑀝𑁄. 𑀲𑀜𑁆𑀚𑀸𑀦𑀦𑁆𑀢𑁄 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀲𑀜𑁆𑀜𑀸𑀯𑀺𑀯𑀝𑁆𑀝𑁄. 𑀘𑁂𑀢𑀬𑀦𑁆𑀢𑁄 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀘𑁂𑀢𑁄𑀯𑀺𑀯𑀝𑁆𑀝𑁄. 𑀯𑀺𑀚𑀸𑀦𑀦𑁆𑀢𑁄 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀘𑀺𑀢𑁆𑀢𑀯𑀺𑀯𑀝𑁆𑀝𑁄. 𑀜𑀸𑀡𑀁 𑀓𑀭𑁄𑀦𑁆𑀢𑁄 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀜𑀸𑀡𑀯𑀺𑀯𑀝𑁆𑀝𑁄. 𑀯𑁄𑀲𑀚𑁆𑀚𑀦𑁆𑀢𑁄 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁄. 𑀢𑀣𑀝𑁆𑀞𑁂𑀦 𑀯𑀺𑀯𑀝𑁆𑀝𑀢𑀻𑀢𑀺 𑁋 𑀲𑀘𑁆𑀘𑀯𑀺𑀯𑀝𑁆𑀝𑁄.

𑀬𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀢𑀢𑁆𑀣 𑀘𑁂𑀢𑁄𑀯𑀺𑀯𑀝𑁆𑀝𑁄, 𑀬𑀢𑁆𑀣 𑀘𑁂𑀢𑁄𑀯𑀺𑀯𑀝𑁆𑀝𑁄 𑀢𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄, 𑀬𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄 𑀢𑀢𑁆𑀣 𑀘𑀺𑀢𑁆𑀢𑀯𑀺𑀯𑀝𑁆𑀝𑁄, 𑀬𑀢𑁆𑀣 𑀘𑀺𑀢𑁆𑀢𑀯𑀺𑀯𑀝𑁆𑀝𑁄 𑀢𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄. 𑀬𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄 𑀘𑀺𑀢𑁆𑀢𑀯𑀺𑀯𑀝𑁆𑀝𑁄 𑀢𑀢𑁆𑀣 𑀜𑀸𑀡𑀯𑀺𑀯𑀝𑁆𑀝𑁄, 𑀬𑀢𑁆𑀣 𑀜𑀸𑀡𑀯𑀺𑀯𑀝𑁆𑀝𑁄 𑀢𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄 𑀘𑀺𑀢𑁆𑀢𑀯𑀺𑀯𑀝𑁆𑀝𑁄. 𑀬𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄 𑀘𑀺𑀢𑁆𑀢𑀯𑀺𑀯𑀝𑁆𑀝𑁄 𑀜𑀸𑀡𑀯𑀺𑀯𑀝𑁆𑀝𑁄 𑀢𑀢𑁆𑀣 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁄, 𑀬𑀢𑁆𑀣 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁄 𑀢𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄 𑀘𑀺𑀢𑁆𑀢𑀯𑀺𑀯𑀝𑁆𑀝𑁄 𑀜𑀸𑀡𑀯𑀺𑀯𑀝𑁆𑀝𑁄. 𑀬𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄 𑀘𑀺𑀢𑁆𑀢𑀯𑀺𑀯𑀝𑁆𑀝𑁄 𑀜𑀸𑀡𑀯𑀺𑀯𑀝𑁆𑀝𑁄 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁄 𑀢𑀢𑁆𑀣 𑀲𑀘𑁆𑀘𑀯𑀺𑀯𑀝𑁆𑀝𑁄, 𑀬𑀢𑁆𑀣 𑀲𑀘𑁆𑀘𑀯𑀺𑀯𑀝𑁆𑀝𑁄 𑀢𑀢𑁆𑀣 𑀲𑀜𑁆𑀜𑀸𑀯𑀺𑀯𑀝𑁆𑀝𑁄 𑀘𑁂𑀢𑁄𑀯𑀺𑀯𑀝𑁆𑀝𑁄 𑀘𑀺𑀢𑁆𑀢𑀯𑀺𑀯𑀝𑁆𑀝𑁄 𑀜𑀸𑀡𑀯𑀺𑀯𑀝𑁆𑀝𑁄 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁄. 𑀅𑀬𑀁 𑀯𑀺𑀫𑁄𑀓𑁆𑀔𑀯𑀺𑀯𑀝𑁆𑀝𑁄.

𑀓𑀢𑀫𑀸 𑀯𑀺𑀫𑁄𑀓𑁆𑀔𑀪𑀸𑀯𑀦𑀸? 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫𑀁, 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫𑀁, 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫𑀁, 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫𑀁, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫𑀁, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫𑀁, 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫𑀁, 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫𑀁, 𑀅𑀬𑀁 𑀯𑀺𑀫𑁄𑀓𑁆𑀔𑀪𑀸𑀯𑀦𑀸.

𑀓𑀢𑀫𑀸 𑀯𑀺𑀫𑁄𑀓𑁆𑀔𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺? 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀮𑀸𑀪𑁄 𑀯𑀸 𑀯𑀺𑀧𑀸𑀓𑁄 𑀯𑀸, 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀮𑀸𑀪𑁄 𑀯𑀸 𑀯𑀺𑀧𑀸𑀓𑁄 𑀯𑀸, 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲…𑀧𑁂… 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀧𑀝𑀺𑀮𑀸𑀪𑁄 𑀯𑀸 𑀯𑀺𑀧𑀸𑀓𑁄 𑀯𑀸, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀁, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀲𑀓𑀤𑀸𑀕𑀸𑀫𑀺𑀨𑀮𑀁, 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀅𑀦𑀸𑀕𑀸𑀫𑀺𑀨𑀮𑀁, 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀅𑀭𑀳𑀢𑁆𑀢𑀨𑀮𑀁, 𑀅𑀬𑀁 𑀯𑀺𑀫𑁄𑀓𑁆𑀔𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻𑀢𑀺.

𑀢𑀢𑀺𑀬𑀪𑀸𑀡𑀯𑀸𑀭𑁄.

𑀯𑀺𑀫𑁄𑀓𑁆𑀔𑀓𑀣𑀸 𑀦𑀺𑀝𑁆𑀞𑀺𑀢𑀸.