𑁭𑁧. 𑀫𑀳𑀸𑀓𑀭𑀼𑀡𑀸𑀜𑀸𑀡𑀦𑀺𑀤𑁆𑀤𑁂𑀲𑁄

𑁧𑁧𑁭. 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀬𑀸 𑀜𑀸𑀡𑀁? 𑀩𑀳𑀼𑀓𑁂𑀳𑀺 𑀆𑀓𑀸𑀭𑁂𑀳𑀺 𑀧𑀲𑁆𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸 𑀑𑀓𑁆𑀓𑀫𑀢𑀺. 𑀆𑀤𑀺𑀢𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸 𑀑𑀓𑁆𑀓𑀫𑀢𑀺. 𑀉𑀬𑁆𑀬𑀼𑀢𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸 𑀑𑀓𑁆𑀓𑀫𑀢𑀺. 𑀧𑀬𑀸𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸 𑀑𑀓𑁆𑀓𑀫𑀢𑀺. 𑀓𑀼𑀫𑁆𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 [𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 (𑀲𑁆𑀬𑀸.)] 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸 𑀑𑀓𑁆𑀓𑀫𑀢𑀺. 𑀉𑀧𑀦𑀻𑀬𑀢𑀺 𑀮𑁄𑀓𑁄 𑀅𑀤𑁆𑀥𑀼𑀯𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸 𑀑𑀓𑁆𑀓𑀫𑀢𑀺. 𑀅𑀢𑀸𑀡𑁄 [𑀅𑀢𑁆𑀢𑀸𑀡𑁄 (𑀲𑁆𑀬𑀸.)] 𑀮𑁄𑀓𑁄 𑀅𑀦𑀪𑀺𑀲𑁆𑀲𑀭𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸 𑀑𑀓𑁆𑀓𑀫𑀢𑀺. 𑀅𑀲𑁆𑀲𑀓𑁄 𑀮𑁄𑀓𑁄, 𑀲𑀩𑁆𑀩𑀁 𑀧𑀳𑀸𑀬 𑀕𑀫𑀦𑀻𑀬𑀦𑁆𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸 𑀑𑀓𑁆𑀓𑀫𑀢𑀺. 𑀊𑀦𑁄 𑀮𑁄𑀓𑁄 𑀅𑀢𑀻𑀢𑁄 𑀢𑀡𑁆𑀳𑀸𑀤𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸 𑀑𑀓𑁆𑀓𑀫𑀢𑀺. 𑀅𑀢𑀸𑀬𑀦𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀅𑀮𑁂𑀡𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁 …𑀧𑁂… 𑀅𑀲𑀭𑀡𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀅𑀲𑀭𑀡𑀻𑀪𑀽𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂….

𑀉𑀤𑁆𑀥𑀢𑁄 𑀮𑁄𑀓𑁄 𑀅𑀯𑀽𑀧𑀲𑀦𑁆𑀢𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀲𑀲𑀮𑁆𑀮𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄, 𑀯𑀺𑀤𑁆𑀥𑁄 𑀧𑀼𑀣𑀼𑀲𑀮𑁆𑀮𑁂𑀳𑀺; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀲𑀮𑁆𑀮𑀸𑀦𑀁 𑀉𑀤𑁆𑀥𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀸𑀯𑀭𑀡𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀅𑀡𑁆𑀟𑀪𑀽𑀢𑁄 𑀓𑀺𑀮𑁂𑀲𑀧𑀜𑁆𑀚𑀭𑀧𑀓𑁆𑀔𑀺𑀢𑁆𑀢𑁄; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀆𑀮𑁄𑀓𑀁 𑀤𑀲𑁆𑀲𑁂𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀅𑀯𑀺𑀚𑁆𑀚𑀸𑀕𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀅𑀡𑁆𑀟𑀪𑀽𑀢𑁄 𑀧𑀭𑀺𑀬𑁄𑀦𑀤𑁆𑀥𑁄 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑁄 [𑀢𑀦𑁆𑀢𑀸𑀓𑀼𑀮𑀚𑀸𑀢𑁄 (𑀲𑁆𑀬𑀸.)] 𑀓𑀼𑀮𑀸𑀕𑀡𑁆𑀟𑀺𑀓𑀚𑀸𑀢𑁄 [𑀕𑀼𑀴𑀸𑀕𑀼𑀡𑁆𑀞𑀺𑀓𑀚𑀸𑀢𑁄 (𑀲𑁆𑀬𑀸.), 𑀕𑀼𑀮𑀸𑀕𑀼𑀡𑁆𑀟𑀺𑀓𑀚𑀸𑀢𑁄 (𑀓. 𑀲𑀻. 𑀅𑀝𑁆𑀞.) 𑀤𑀻. 𑀦𑀺. 𑁨.𑁯𑁫 𑀧𑀲𑁆𑀲𑀺𑀢𑀩𑁆𑀩𑀸] 𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑁄 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀻𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀅𑀯𑀺𑀚𑁆𑀚𑀸𑀯𑀺𑀲𑀤𑁄𑀲𑀲𑀁𑀮𑀺𑀢𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀓𑀺𑀮𑁂𑀲𑀓𑀮𑀮𑀻𑀪𑀽𑀢𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀭𑀸𑀕𑀤𑁄𑀲𑀫𑁄𑀳𑀚𑀝𑀸𑀚𑀝𑀺𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀚𑀝𑀁 𑀯𑀺𑀚𑀝𑁂𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂….

𑀢𑀡𑁆𑀳𑀸𑀲𑀗𑁆𑀖𑀸𑀝𑀧𑀝𑀺𑀫𑀼𑀓𑁆𑀓𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀢𑀡𑁆𑀳𑀸𑀚𑀸𑀮𑁂𑀦 𑀑𑀢𑁆𑀣𑀝𑁄 [𑀑𑀢𑁆𑀣𑀢𑁄 (𑀓.)] 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀢𑀡𑁆𑀳𑀸𑀲𑁄𑀢𑁂𑀦 𑀯𑀼𑀬𑁆𑀳𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀢𑀡𑁆𑀳𑀸𑀲𑀜𑁆𑀜𑁄𑀚𑀦𑁂𑀦 𑀲𑀜𑁆𑀜𑀼𑀢𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀢𑀡𑁆𑀳𑀸𑀦𑀼𑀲𑀬𑁂𑀦 𑀅𑀦𑀼𑀲𑀝𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀢𑀡𑁆𑀳𑀸𑀲𑀦𑁆𑀢𑀸𑀧𑁂𑀦 𑀲𑀦𑁆𑀢𑀧𑁆𑀧𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀢𑀡𑁆𑀳𑀸𑀧𑀭𑀺𑀴𑀸𑀳𑁂𑀦 𑀧𑀭𑀺𑀟𑀬𑁆𑀳𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂….

𑀤𑀺𑀝𑁆𑀞𑀺𑀲𑀗𑁆𑀖𑀸𑀝𑀧𑀝𑀺𑀫𑀼𑀓𑁆𑀓𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀤𑀺𑀝𑁆𑀞𑀺𑀚𑀸𑀮𑁂𑀦 𑀑𑀢𑁆𑀣𑀝𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀤𑀺𑀝𑁆𑀞𑀺𑀲𑁄𑀢𑁂𑀦 𑀯𑀼𑀬𑁆𑀳𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀤𑀺𑀝𑁆𑀞𑀺𑀲𑀜𑁆𑀜𑁄𑀚𑀦𑁂𑀦 𑀲𑀜𑁆𑀜𑀼𑀢𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀤𑀺𑀝𑁆𑀞𑀸𑀦𑀼𑀲𑀬𑁂𑀦 𑀅𑀦𑀼𑀲𑀝𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀤𑀺𑀝𑁆𑀞𑀺𑀲𑀦𑁆𑀢𑀸𑀧𑁂𑀦 𑀲𑀦𑁆𑀢𑀧𑁆𑀧𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀤𑀺𑀝𑁆𑀞𑀺𑀧𑀭𑀺𑀴𑀸𑀳𑁂𑀦 𑀧𑀭𑀺𑀟𑀬𑁆𑀳𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂….

𑀚𑀸𑀢𑀺𑀬𑀸 𑀅𑀦𑀼𑀕𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀚𑀭𑀸𑀬 𑀅𑀦𑀼𑀲𑀝𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁 …𑀧𑁂… 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀤𑀼𑀓𑁆𑀔𑁂 𑀧𑀢𑀺𑀝𑁆𑀞𑀺𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂….

𑀢𑀡𑁆𑀳𑀸𑀬 𑀉𑀟𑁆𑀟𑀺𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀚𑀭𑀸𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀫𑀘𑁆𑀘𑀼𑀧𑀸𑀲𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀫𑀳𑀸𑀩𑀦𑁆𑀥𑀦𑀩𑀦𑁆𑀥𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑁋 𑀭𑀸𑀕𑀩𑀦𑁆𑀥𑀦𑁂𑀦 𑀤𑁄𑀲𑀩𑀦𑁆𑀥𑀦𑁂𑀦 𑀫𑁄𑀳𑀩𑀦𑁆𑀥𑀦𑁂𑀦 𑀫𑀸𑀦𑀩𑀦𑁆𑀥𑀦𑁂𑀦 𑀤𑀺𑀝𑁆𑀞𑀺𑀩𑀦𑁆𑀥𑀦𑁂𑀦 𑀓𑀺𑀮𑁂𑀲𑀩𑀦𑁆𑀥𑀦𑁂𑀦 𑀤𑀼𑀘𑁆𑀘𑀭𑀺𑀢𑀩𑀦𑁆𑀥𑀦𑁂𑀦; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀩𑀦𑁆𑀥𑀦𑀁 𑀫𑁄𑀘𑁂𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀫𑀳𑀸𑀲𑀫𑁆𑀩𑀸𑀥𑀧𑁆𑀧𑀝𑀺𑀧𑀦𑁆𑀦𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀑𑀓𑀸𑀲𑀁 𑀤𑀲𑁆𑀲𑁂𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁… 𑀫𑀳𑀸𑀧𑀮𑀺𑀩𑁄𑀥𑁂𑀦 𑀧𑀮𑀺𑀩𑀼𑀤𑁆𑀥𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀧𑀮𑀺𑀩𑁄𑀥𑀁 𑀙𑁂𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀫𑀳𑀸𑀧𑀧𑀸𑀢𑁂 𑀧𑀢𑀺𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀧𑀧𑀸𑀢𑀸 𑀉𑀤𑁆𑀥𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀫𑀳𑀸𑀓𑀦𑁆𑀢𑀸𑀭𑀧𑁆𑀧𑀝𑀺𑀧𑀦𑁆𑀦𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀫𑀳𑀸𑀲𑀁𑀲𑀸𑀭𑀧𑁆𑀧𑀝𑀺𑀧𑀦𑁆𑀦𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀲𑀁𑀲𑀸𑀭𑀸 𑀫𑁄𑀘𑁂𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀫𑀳𑀸𑀯𑀺𑀤𑀼𑀕𑁆𑀕𑁂 𑀲𑀫𑁆𑀧𑀭𑀺𑀯𑀢𑁆𑀢𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀯𑀺𑀤𑀼𑀕𑁆𑀕𑀸 𑀉𑀤𑁆𑀥𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀫𑀳𑀸𑀧𑀮𑀺𑀧𑁂 [𑀫𑀳𑀸𑀧𑀮𑁆𑀮𑁂𑀧𑁂 (𑀲𑁆𑀬𑀸.)] 𑀧𑀮𑀺𑀧𑀦𑁆𑀦𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀧𑀮𑀺𑀧𑀸 𑀉𑀤𑁆𑀥𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂….

𑀅𑀩𑁆𑀪𑀸𑀳𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀆𑀤𑀺𑀢𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑁋 𑀭𑀸𑀕𑀕𑁆𑀕𑀺𑀦𑀸 𑀤𑁄𑀲𑀕𑁆𑀕𑀺𑀦𑀸 𑀫𑁄𑀳𑀕𑁆𑀕𑀺𑀦𑀸 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀦𑀺𑀩𑁆𑀩𑀸𑀧𑁂𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀉𑀦𑁆𑀦𑀻𑀢𑀓𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀳𑀜𑁆𑀜𑀢𑀺 𑀦𑀺𑀘𑁆𑀘𑀫𑀢𑀸𑀡𑁄 𑀧𑀢𑁆𑀢𑀤𑀡𑁆𑀟𑁄 𑀢𑀓𑁆𑀓𑀭𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀯𑀚𑁆𑀚𑀩𑀦𑁆𑀥𑀦𑀩𑀤𑁆𑀥𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀆𑀖𑀸𑀢𑀦𑀧𑀘𑁆𑀘𑀼𑀧𑀝𑁆𑀞𑀺𑀢𑁄; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀩𑀦𑁆𑀥𑀦𑀁 𑀫𑁄𑀘𑁂𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀅𑀦𑀸𑀣𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀧𑀭𑀫𑀓𑀸𑀭𑀼𑀜𑁆𑀜𑀧𑁆𑀧𑀢𑁆𑀢𑁄; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀢𑀸𑀬𑁂𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀤𑀼𑀓𑁆𑀔𑀸𑀪𑀺𑀢𑀼𑀦𑁆𑀦𑁄 [𑀤𑀼𑀓𑁆𑀔𑀸𑀪𑀺𑀢𑀼𑀡𑁆𑀡𑁄 (𑀓.)] 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀘𑀺𑀭𑀭𑀢𑁆𑀢𑀁 𑀧𑀻𑀴𑀺𑀢𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀕𑀥𑀺𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀦𑀺𑀘𑁆𑀘𑀁 𑀧𑀺𑀧𑀸𑀲𑀺𑀢𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂….

𑀅𑀦𑁆𑀥𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀅𑀘𑀓𑁆𑀔𑀼𑀓𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀳𑀢𑀦𑁂𑀢𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀅𑀧𑀭𑀺𑀡𑀸𑀬𑀓𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀯𑀺𑀧𑀣𑀧𑀓𑁆𑀔𑀦𑁆𑀤𑁄 [𑀯𑀺𑀧𑀣𑀁 𑀧𑀓𑁆𑀔𑀦𑁆𑀢𑁄 (𑀲𑁆𑀬𑀸.)] 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀅𑀜𑁆𑀚𑀲𑀸𑀧𑀭𑀤𑁆𑀥𑁄; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀅𑀭𑀺𑀬𑀧𑀣𑀁 𑀆𑀦𑁂𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀫𑀳𑁄𑀖𑀧𑀓𑁆𑀔𑀦𑁆𑀤𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄; 𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀑𑀖𑀸 𑀉𑀤𑁆𑀥𑀢𑀸, 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂….

𑁧𑁧𑁮. 𑀤𑁆𑀯𑀻𑀳𑀺 𑀤𑀺𑀝𑁆𑀞𑀺𑀕𑀢𑁂𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀢𑀻𑀳𑀺 𑀤𑀼𑀘𑁆𑀘𑀭𑀺𑀢𑁂𑀳𑀺 𑀯𑀺𑀧𑁆𑀧𑀝𑀺𑀧𑀦𑁆𑀦𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀬𑀼𑀢𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀘𑀢𑀼𑀬𑁄𑀕𑀬𑁄𑀚𑀺𑀢𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀘𑀢𑀽𑀳𑀺 𑀕𑀦𑁆𑀣𑁂𑀳𑀺 [𑀕𑀡𑁆𑀞𑁂𑀳𑀺 (𑀲𑁆𑀬𑀸.)] 𑀕𑀦𑁆𑀣𑀺𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀉𑀧𑀸𑀤𑀺𑀬𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀧𑀜𑁆𑀘𑀕𑀢𑀺𑀲𑀫𑀸𑀭𑀼𑀴𑁆𑀳𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀭𑀚𑁆𑀚𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀑𑀢𑁆𑀣𑀝𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀙𑀳𑀺 𑀯𑀺𑀯𑀸𑀤𑀫𑀽𑀮𑁂𑀳𑀺 𑀯𑀺𑀯𑀤𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀙𑀳𑀺 𑀢𑀡𑁆𑀳𑀸𑀓𑀸𑀬𑁂𑀳𑀺 𑀭𑀚𑁆𑀚𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀙𑀳𑀺 𑀤𑀺𑀝𑁆𑀞𑀺𑀕𑀢𑁂𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁 …𑀧𑁂… 𑀲𑀢𑁆𑀢𑀳𑀺 𑀅𑀦𑀼𑀲𑀬𑁂𑀳𑀺 𑀅𑀦𑀼𑀲𑀝𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀲𑀢𑁆𑀢𑀳𑀺 𑀲𑀜𑁆𑀜𑁄𑀚𑀦𑁂𑀳𑀺 𑀲𑀜𑁆𑀜𑀼𑀢𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀲𑀢𑁆𑀢𑀳𑀺 𑀫𑀸𑀦𑁂𑀳𑀺 𑀉𑀦𑁆𑀦𑀢𑁄 [𑀉𑀡𑁆𑀡𑀢𑁄 (𑀲𑁆𑀬𑀸. 𑀓.)] 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀲𑀫𑁆𑀧𑀭𑀺𑀯𑀢𑁆𑀢𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀅𑀝𑁆𑀞𑀳𑀺 𑀫𑀺𑀘𑁆𑀙𑀢𑁆𑀢𑁂𑀳𑀺 𑀦𑀺𑀬𑁆𑀬𑀸𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀅𑀝𑁆𑀞𑀳𑀺 𑀧𑀼𑀭𑀺𑀲𑀤𑁄𑀲𑁂𑀳𑀺 𑀤𑀼𑀲𑁆𑀲𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀦𑀯𑀳𑀺 𑀆𑀖𑀸𑀢𑀯𑀢𑁆𑀣𑀽𑀳𑀺 𑀆𑀖𑀸𑀢𑀺𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁 …𑀧𑁂… 𑀦𑀯𑀯𑀺𑀥𑀫𑀸𑀦𑁂𑀳𑀺 𑀉𑀦𑁆𑀦𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀦𑀯𑀳𑀺 𑀢𑀡𑁆𑀳𑀸𑀫𑀽𑀮𑀓𑁂𑀳𑀺 𑀥𑀫𑁆𑀫𑁂𑀳𑀺 𑀭𑀚𑁆𑀚𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀤𑀲𑀳𑀺 𑀓𑀺𑀮𑁂𑀲𑀯𑀢𑁆𑀣𑀽𑀳𑀺 𑀓𑀺𑀮𑀺𑀲𑁆𑀲𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀤𑀲𑀳𑀺 𑀆𑀖𑀸𑀢𑀯𑀢𑁆𑀣𑀽𑀳𑀺 𑀆𑀖𑀸𑀢𑀺𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀤𑀲𑀳𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀤𑀲𑀳𑀺 𑀲𑀜𑁆𑀜𑁄𑀚𑀦𑁂𑀳𑀺 𑀲𑀜𑁆𑀜𑀼𑀢𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀤𑀲𑀳𑀺 𑀫𑀺𑀘𑁆𑀙𑀢𑁆𑀢𑁂𑀳𑀺 𑀦𑀺𑀬𑁆𑀬𑀸𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀤𑀲𑀯𑀢𑁆𑀣𑀼𑀓𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀤𑀲𑀯𑀢𑁆𑀣𑀼𑀓𑀸𑀬 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁…𑀧𑁂… 𑀅𑀝𑁆𑀞𑀲𑀢𑀢𑀡𑁆𑀳𑀸𑀧𑀧𑀜𑁆𑀘𑀲𑀢𑁂𑀳𑀺 𑀧𑀧𑀜𑁆𑀘𑀺𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸 𑀑𑀓𑁆𑀓𑀫𑀢𑀺. 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑁂𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸 𑀑𑀓𑁆𑀓𑀫𑀢𑀺.

𑀅𑀳𑀜𑁆𑀘𑀫𑁆𑀳𑀺 𑀢𑀺𑀡𑁆𑀡𑁄, 𑀮𑁄𑀓𑁄 𑀘 𑀅𑀢𑀺𑀡𑁆𑀡𑁄 𑀅𑀳𑀁 𑀘𑀫𑁆𑀳𑀺 𑀫𑀼𑀢𑁆𑀢𑁄, 𑀮𑁄𑀓𑁄 𑀘 𑀅𑀫𑀼𑀢𑁆𑀢𑁄; 𑀅𑀳𑀜𑁆𑀘𑀫𑁆𑀳𑀺 𑀤𑀦𑁆𑀢𑁄, 𑀮𑁄𑀓𑁄 𑀘 𑀅𑀤𑀦𑁆𑀢𑁄; 𑀅𑀳𑀁 𑀘𑀫𑁆𑀳𑀺 𑀲𑀦𑁆𑀢𑁄, 𑀮𑁄𑀓𑁄 𑀘 𑀅𑀲𑀦𑁆𑀢𑁄; 𑀅𑀳𑀁 𑀘𑀫𑁆𑀳𑀺 𑀅𑀲𑁆𑀲𑀢𑁆𑀣𑁄, 𑀮𑁄𑀓𑁄 𑀘 𑀅𑀦𑀲𑁆𑀲𑀢𑁆𑀣𑁄; 𑀅𑀳𑀁 𑀘𑀫𑁆𑀳𑀺 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀮𑁄𑀓𑁄 𑀘 𑀅𑀧𑀭𑀺𑀦𑀺𑀩𑁆𑀩𑀼𑀢𑁄; 𑀧𑀳𑁄𑀫𑀺 𑀔𑁆𑀯𑀸𑀳𑀁 𑀢𑀺𑀡𑁆𑀡𑁄 𑀢𑀸𑀭𑁂𑀢𑀼𑀁, 𑀫𑀼𑀢𑁆𑀢𑁄 𑀫𑁄𑀘𑁂𑀢𑀼𑀁, 𑀤𑀦𑁆𑀢𑁄 𑀤𑀫𑁂𑀢𑀼𑀁, 𑀲𑀦𑁆𑀢𑁄 𑀲𑀫𑁂𑀢𑀼𑀁, 𑀅𑀲𑁆𑀲𑀢𑁆𑀣𑁄 𑀅𑀲𑁆𑀲𑀸𑀲𑁂𑀢𑀼𑀁, 𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀭𑁂 𑀘 𑀧𑀭𑀺𑀦𑀺𑀩𑁆𑀩𑀸𑀧𑁂𑀢𑀼𑀦𑁆𑀢𑀺 𑁋 𑀧𑀲𑁆𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸 𑀑𑀓𑁆𑀓𑀫𑀢𑀺. 𑀇𑀤𑀁 𑀢𑀣𑀸𑀕𑀢𑀲𑁆𑀲 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀬𑀸 𑀜𑀸𑀡𑀁.

𑀫𑀳𑀸𑀓𑀭𑀼𑀡𑀸𑀜𑀸𑀡𑀦𑀺𑀤𑁆𑀤𑁂𑀲𑁄 𑀏𑀓𑀲𑀢𑁆𑀢𑀢𑀺𑀫𑁄.