𑁧𑁭. 𑀘𑀭𑀺𑀬𑀸𑀦𑀸𑀦𑀢𑁆𑀢𑀜𑀸𑀡𑀦𑀺𑀤𑁆𑀤𑁂𑀲𑁄

𑁬𑁮. 𑀓𑀣𑀁 𑀘𑀭𑀺𑀬𑀸𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀘𑀭𑀺𑀬𑀸𑀦𑀸𑀦𑀢𑁆𑀢𑁂 𑀜𑀸𑀡𑀁? 𑀘𑀭𑀺𑀬𑀸𑀢𑀺 𑀢𑀺𑀲𑁆𑀲𑁄 𑀘𑀭𑀺𑀬𑀸𑀬𑁄 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸, 𑀅𑀜𑁆𑀜𑀸𑀡𑀘𑀭𑀺𑀬𑀸, 𑀜𑀸𑀡𑀘𑀭𑀺𑀬𑀸.

𑀓𑀢𑀫𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸? 𑀤𑀲𑁆𑀲𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀭𑀽𑀧𑁂𑀲𑀼, 𑀤𑀲𑁆𑀲𑀦𑀝𑁆𑀞𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀭𑀽𑀧𑁂𑀲𑀼, 𑀤𑀺𑀝𑁆𑀞𑀢𑁆𑀢𑀸 𑀅𑀪𑀺𑀦𑀺𑀭𑁄𑀧𑀦𑀸 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 [𑀅𑀪𑀺𑀦𑀺𑀭𑁄𑀧𑀦𑀯𑀺𑀧𑀸𑀓𑀫𑀦𑁄𑀥𑀸𑀢𑀼 (𑀲𑁆𑀬𑀸.)] 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀭𑀽𑀧𑁂𑀲𑀼, 𑀅𑀪𑀺𑀦𑀺𑀭𑁄𑀧𑀺𑀢𑀢𑁆𑀢𑀸 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀭𑀽𑀧𑁂𑀲𑀼. 𑀲𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀲𑀤𑁆𑀤𑁂𑀲𑀼, 𑀲𑀯𑀦𑀢𑁆𑀣𑁄 𑀲𑁄𑀢𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀲𑀤𑁆𑀤𑁂𑀲𑀼, 𑀲𑀼𑀢𑀢𑁆𑀢𑀸 𑀅𑀪𑀺𑀦𑀺𑀭𑁄𑀧𑀦𑀸 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀲𑀤𑁆𑀤𑁂𑀲𑀼, 𑀅𑀪𑀺𑀦𑀺𑀭𑁄𑀧𑀺𑀢𑀢𑁆𑀢𑀸 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀲𑀤𑁆𑀤𑁂𑀲𑀼. 𑀖𑀸𑀬𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀕𑀦𑁆𑀥𑁂𑀲𑀼, 𑀖𑀸𑀬𑀦𑀝𑁆𑀞𑁄 [𑀖𑀸𑀬𑀦𑀢𑁆𑀣𑁄 (𑀲𑁆𑀬𑀸. 𑀓.)] 𑀖𑀸𑀦𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀕𑀦𑁆𑀥𑁂𑀲𑀼, 𑀖𑀸𑀬𑀺𑀢𑀢𑁆𑀢𑀸 𑀅𑀪𑀺𑀦𑀺𑀭𑁄𑀧𑀦𑀸 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀕𑀦𑁆𑀥𑁂𑀲𑀼, 𑀅𑀪𑀺𑀦𑀺𑀭𑁄𑀧𑀺𑀢𑀢𑁆𑀢𑀸 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀕𑀦𑁆𑀥𑁂𑀲𑀼. 𑀲𑀸𑀬𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀭𑀲𑁂𑀲𑀼, 𑀲𑀸𑀬𑀦𑀝𑁆𑀞𑁄 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀭𑀲𑁂𑀲𑀼, 𑀲𑀸𑀬𑀺𑀢𑀢𑁆𑀢𑀸 𑀅𑀪𑀺𑀦𑀺𑀭𑁄𑀧𑀦𑀸 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀭𑀲𑁂𑀲𑀼, 𑀅𑀪𑀺𑀦𑀺𑀭𑁄𑀧𑀺𑀢𑀢𑁆𑀢𑀸 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀭𑀲𑁂𑀲𑀼. 𑀨𑀼𑀲𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀨𑁄𑀝𑁆𑀞𑀩𑁆𑀩𑁂𑀲𑀼, 𑀨𑀼𑀲𑀦𑀝𑁆𑀞𑁄 𑀓𑀸𑀬𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀨𑁄𑀝𑁆𑀞𑀩𑁆𑀩𑁂𑀲𑀼, 𑀨𑀼𑀝𑁆𑀞𑀢𑁆𑀢𑀸 𑀅𑀪𑀺𑀦𑀺𑀭𑁄𑀧𑀦𑀸 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀨𑁄𑀝𑁆𑀞𑀩𑁆𑀩𑁂𑀲𑀼, 𑀅𑀪𑀺𑀦𑀺𑀭𑁄𑀧𑀺𑀢𑀢𑁆𑀢𑀸 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀨𑁄𑀝𑁆𑀞𑀩𑁆𑀩𑁂𑀲𑀼. 𑀯𑀺𑀚𑀸𑀦𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀥𑀫𑁆𑀫𑁂𑀲𑀼, 𑀯𑀺𑀚𑀸𑀦𑀦𑀝𑁆𑀞𑁄 𑀫𑀦𑁄𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀥𑀫𑁆𑀫𑁂𑀲𑀼, 𑀯𑀺𑀜𑁆𑀜𑀸𑀢𑀢𑁆𑀢𑀸 𑀅𑀪𑀺𑀦𑀺𑀭𑁄𑀧𑀦𑀸 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀥𑀫𑁆𑀫𑁂𑀲𑀼, 𑀅𑀪𑀺𑀦𑀺𑀭𑁄𑀧𑀺𑀢𑀢𑁆𑀢𑀸 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀥𑀫𑁆𑀫𑁂𑀲𑀼.

𑁬𑁯. 𑀯𑀺𑀜𑁆𑀜𑀸𑀡𑀘𑀭𑀺𑀬𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀘𑀭𑀺𑀬𑀸? 𑀦𑀻𑀭𑀸𑀕𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀦𑀺𑀤𑁆𑀤𑁄𑀲𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀦𑀺𑀫𑁆𑀫𑁄𑀳𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀦𑀺𑀫𑁆𑀫𑀸𑀦𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀦𑀺𑀤𑁆𑀤𑀺𑀝𑁆𑀞𑀺 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸 𑀦𑀺𑀉𑀤𑁆𑀥𑀘𑁆𑀘𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀦𑀸𑀦𑀼𑀲𑀬𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀭𑀸𑀕𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀤𑁄𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀫𑁄𑀳𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀫𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀉𑀤𑁆𑀥𑀘𑁆𑀘𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀅𑀦𑀼𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀓𑀼𑀲𑀮𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀅𑀓𑀼𑀲𑀮𑁂𑀳𑀺 𑀓𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀲𑀸𑀯𑀚𑁆𑀚𑁂𑀳𑀺 𑀓𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀅𑀦𑀯𑀚𑁆𑀚𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀓𑀡𑁆𑀳𑁂𑀳𑀺 𑀓𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀲𑀼𑀓𑁆𑀓𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀲𑀼𑀔𑀼𑀤𑁆𑀭𑀬𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀤𑀼𑀓𑁆𑀔𑀼𑀤𑁆𑀭𑀬𑁂𑀳𑀺 𑀓𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀲𑀼𑀔𑀯𑀺𑀧𑀸𑀓𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀤𑀼𑀓𑁆𑀔𑀯𑀺𑀧𑀸𑀓𑁂𑀳𑀺 𑀓𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀯𑀺𑀜𑁆𑀜𑀸𑀢𑁂 𑀘𑀭𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀯𑀺𑀜𑁆𑀜𑀸𑀡𑀲𑁆𑀲 𑀏𑀯𑀭𑀽𑀧𑀸 𑀘𑀭𑀺𑀬𑀸 𑀳𑁄𑀢𑀻𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀧𑀓𑀢𑀺𑀧𑀭𑀺𑀲𑀼𑀤𑁆𑀥𑀫𑀺𑀤𑀁 𑀘𑀺𑀢𑁆𑀢𑀁 𑀦𑀺𑀓𑁆𑀓𑀺𑀮𑁂𑀲𑀝𑁆𑀞𑁂𑀦𑀸𑀢𑀺 𑁋 𑀯𑀺𑀜𑁆𑀜𑀸𑀡𑀘𑀭𑀺𑀬𑀸. 𑀅𑀬𑀁 𑀯𑀺𑀜𑁆𑀜𑀸𑀡𑀘𑀭𑀺𑀬𑀸.

𑀓𑀢𑀫𑀸 𑀅𑀜𑁆𑀜𑀸𑀡𑀘𑀭𑀺𑀬𑀸? 𑀫𑀦𑀸𑀧𑀺𑀬𑁂𑀲𑀼 𑀭𑀽𑀧𑁂𑀲𑀼 𑀭𑀸𑀕𑀲𑁆𑀲 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀭𑀸𑀕𑀲𑁆𑀲 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀅𑀫𑀦𑀸𑀧𑀺𑀬𑁂𑀲𑀼 𑀭𑀽𑀧𑁂𑀲𑀼 𑀤𑁄𑀲𑀲𑁆𑀲 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀤𑁄𑀲𑀲𑁆𑀲 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀢𑀤𑀼𑀪𑀬𑁂𑀦 𑀅𑀲𑀫𑀧𑁂𑀓𑁆𑀔𑀦𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀫𑁄𑀳𑀲𑁆𑀲 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀫𑁄𑀳𑀲𑁆𑀲 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀯𑀺𑀦𑀺𑀩𑀦𑁆𑀥𑀲𑁆𑀲 𑀫𑀸𑀦𑀲𑁆𑀲 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀫𑀸𑀦𑀲𑁆𑀲 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀧𑀭𑀸𑀫𑀝𑁆𑀞𑀸𑀬 𑀤𑀺𑀝𑁆𑀞𑀺𑀬𑀸 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀤𑀺𑀝𑁆𑀞𑀺𑀬𑀸 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀯𑀺𑀓𑁆𑀔𑁂𑀧𑀕𑀢𑀲𑁆𑀲 𑀉𑀤𑁆𑀥𑀘𑁆𑀘𑀲𑁆𑀲 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀉𑀤𑁆𑀥𑀘𑁆𑀘𑀲𑁆𑀲 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀅𑀦𑀺𑀝𑁆𑀞𑀗𑁆𑀕𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀯𑀺𑀘𑀺𑀓𑀺𑀘𑁆𑀙𑀸𑀬 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀣𑀸𑀫𑀕𑀢𑀲𑁆𑀲 𑀅𑀦𑀼𑀲𑀬𑀲𑁆𑀲 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀅𑀦𑀼𑀲𑀬𑀲𑁆𑀲 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸.

𑀫𑀦𑀸𑀧𑀺𑀬𑁂𑀲𑀼 𑀲𑀤𑁆𑀤𑁂𑀲𑀼…𑀧𑁂… 𑀫𑀦𑀸𑀧𑀺𑀬𑁂𑀲𑀼 𑀕𑀦𑁆𑀥𑁂𑀲𑀼…𑀧𑁂… 𑀫𑀦𑀸𑀧𑀺𑀬𑁂𑀲𑀼 𑀭𑀲𑁂𑀲𑀼…𑀧𑁂… 𑀫𑀦𑀸𑀧𑀺𑀬𑁂𑀲𑀼 𑀨𑁄𑀝𑁆𑀞𑀩𑁆𑀩𑁂𑀲𑀼…𑀧𑁂… 𑀫𑀦𑀸𑀧𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀭𑀸𑀕𑀲𑁆𑀲 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀭𑀸𑀕𑀲𑁆𑀲 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀅𑀫𑀦𑀸𑀧𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀤𑁄𑀲𑀲𑁆𑀲 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀤𑁄𑀲𑀲𑁆𑀲 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀢𑀤𑀼𑀪𑀬𑁂𑀦 𑀅𑀲𑀫𑀧𑁂𑀓𑁆𑀔𑀦𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀫𑁄𑀳𑀲𑁆𑀲 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀫𑁄𑀳𑀲𑁆𑀲 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀯𑀺𑀦𑀺𑀩𑀦𑁆𑀥𑀲𑁆𑀲 𑀫𑀸𑀦𑀲𑁆𑀲 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀫𑀸𑀦𑀲𑁆𑀲 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀧𑀭𑀸𑀫𑀝𑁆𑀞𑀸𑀬 𑀤𑀺𑀝𑁆𑀞𑀺𑀬𑀸 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀤𑀺𑀝𑁆𑀞𑀺𑀬𑀸 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀯𑀺𑀓𑁆𑀔𑁂𑀧𑀕𑀢𑀲𑁆𑀲 𑀉𑀤𑁆𑀥𑀘𑁆𑀘𑀲𑁆𑀲 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀉𑀤𑁆𑀥𑀘𑁆𑀘𑀲𑁆𑀲 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸; 𑀅𑀦𑀺𑀝𑁆𑀞𑀗𑁆𑀕𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀯𑀺𑀘𑀺𑀓𑀺𑀘𑁆𑀙𑀸𑀬 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀣𑀸𑀫𑀕𑀢𑀲𑁆𑀲 𑀅𑀦𑀼𑀲𑀬𑀲𑁆𑀲 𑀚𑀯𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀅𑀦𑀼𑀲𑀬𑀲𑁆𑀲 𑀚𑀯𑀦𑀸 𑀅𑀜𑁆𑀜𑀸𑀡𑀘𑀭𑀺𑀬𑀸.

𑁭𑁦. 𑀅𑀜𑁆𑀜𑀸𑀡𑀘𑀭𑀺𑀬𑀸𑀢𑀺 𑀓𑁂𑀦𑀝𑁆𑀞𑁂𑀦 𑀅𑀜𑁆𑀜𑀸𑀡𑀘𑀭𑀺𑀬𑀸? 𑀲𑀭𑀸𑀕𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀲𑀤𑁄𑀲𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀲𑀫𑁄𑀳𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀲𑀫𑀸𑀦𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀲𑀤𑀺𑀝𑁆𑀞𑀺 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀲𑀉𑀤𑁆𑀥𑀘𑁆𑀘𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀲𑀯𑀺𑀘𑀺𑀓𑀺𑀘𑁆𑀙𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀲𑀸𑀦𑀼𑀲𑀬𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀤𑁄𑀲𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀫𑁄𑀳𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀫𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀅𑀦𑀼𑀲𑀬𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀓𑀼𑀲𑀮𑁂𑀳𑀺 𑀓𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀅𑀓𑀼𑀲𑀮𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀲𑀸𑀯𑀚𑁆𑀚𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀅𑀦𑀯𑀚𑁆𑀚𑁂𑀳𑀺 𑀓𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀓𑀡𑁆𑀳𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀲𑀼𑀓𑁆𑀓𑁂𑀳𑀺 𑀓𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀲𑀼𑀔𑀼𑀤𑁆𑀭𑀬𑁂𑀳𑀺 𑀓𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀤𑀼𑀓𑁆𑀔𑀼𑀤𑁆𑀭𑀬𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀲𑀼𑀔𑀯𑀺𑀧𑀸𑀓𑁂𑀳𑀺 𑀓𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀤𑀼𑀓𑁆𑀔𑀯𑀺𑀧𑀸𑀓𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀅𑀜𑁆𑀜𑀸𑀢𑁂 𑀘𑀭𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀅𑀜𑁆𑀜𑀸𑀡𑀲𑁆𑀲 𑀏𑀯𑀭𑀽𑀧𑀸 𑀘𑀭𑀺𑀬𑀸 𑀳𑁄𑀢𑀻𑀢𑀺 𑁋 𑀅𑀜𑁆𑀜𑀸𑀡𑀘𑀭𑀺𑀬𑀸. 𑀅𑀬𑀁 𑀅𑀜𑁆𑀜𑀸𑀡𑀘𑀭𑀺𑀬𑀸.

𑁭𑁧. 𑀓𑀢𑀫𑀸 𑀜𑀸𑀡𑀘𑀭𑀺𑀬𑀸? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀜𑀸𑀡𑀘𑀭𑀺𑀬𑀸. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀜𑀸𑀡𑀘𑀭𑀺𑀬𑀸. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀜𑀸𑀡𑀘𑀭𑀺𑀬𑀸. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬…𑀧𑁂… 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬… 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬… 𑀔𑀬𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬… 𑀯𑀬𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬… 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬… 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬… 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬… 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬… 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬… 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀢𑁆𑀣𑀸𑀬… 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬… 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀢𑁆𑀣𑀸𑀬 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸; 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸 𑀜𑀸𑀡𑀘𑀭𑀺𑀬𑀸. 𑀯𑀺𑀯𑀝𑁆𑀝𑀦𑀸𑀦𑀼𑀧𑀲𑁆𑀲𑀦𑀸 𑀜𑀸𑀡𑀘𑀭𑀺𑀬𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀜𑀸𑀡𑀘𑀭𑀺𑀬𑀸. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀺 𑀜𑀸𑀡𑀘𑀭𑀺𑀬𑀸. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀜𑀸𑀡𑀘𑀭𑀺𑀬𑀸. 𑀲𑀓𑀤𑀸𑀕𑀸𑀫𑀺𑀨𑀮𑀲𑀫𑀸𑀧𑀢𑁆𑀢𑀺 𑀜𑀸𑀡𑀘𑀭𑀺𑀬𑀸. 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀜𑀸𑀡𑀘𑀭𑀺𑀬𑀸. 𑀅𑀦𑀸𑀕𑀸𑀫𑀺𑀨𑀮𑀲𑀫𑀸𑀧𑀢𑁆𑀢𑀺 𑀜𑀸𑀡𑀘𑀭𑀺𑀬𑀸. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀜𑀸𑀡𑀘𑀭𑀺𑀬𑀸. 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺 𑀜𑀸𑀡𑀘𑀭𑀺𑀬𑀸.

𑀜𑀸𑀡𑀘𑀭𑀺𑀬𑀸𑀢𑀺 𑀓𑁂𑀦𑀝𑁆𑀞𑁂𑀦 𑀜𑀸𑀡𑀘𑀭𑀺𑀬𑀸? 𑀦𑀻𑀭𑀸𑀕𑀸 𑀘𑀭𑀢𑀻𑀢𑀺 𑁋 𑀜𑀸𑀡𑀘𑀭𑀺𑀬𑀸. 𑀦𑀺𑀤𑁆𑀤𑁄𑀲𑀸 𑀘𑀭𑀢𑀻𑀢𑀺 𑁋 𑀜𑀸𑀡𑀘𑀭𑀺𑀬𑀸…𑀧𑁂… 𑀦𑀸𑀦𑀼𑀲𑀬𑀸 𑀘𑀭𑀢𑀻𑀢𑀺 𑁋 𑀜𑀸𑀡𑀘𑀭𑀺𑀬𑀸. 𑀭𑀸𑀕𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀜𑀸𑀡𑀘𑀭𑀺𑀬𑀸. 𑀤𑁄𑀲𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀜𑀸𑀡𑀘𑀭𑀺𑀬𑀸. 𑀫𑁄𑀳𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀜𑀸𑀡𑀘𑀭𑀺𑀬𑀸. 𑀫𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸…𑀧𑁂… 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸… 𑀉𑀤𑁆𑀥𑀘𑁆𑀘𑀯𑀺𑀧𑁆𑀧𑀬𑀼𑀢𑁆𑀢𑀸… 𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀧𑁆𑀧𑀬𑀼𑀢𑁆𑀢𑀸… 𑀅𑀦𑀼𑀲𑀬𑀯𑀺𑀧𑁆𑀧𑀬𑀼𑀢𑁆𑀢𑀸… 𑀓𑀼𑀲𑀮𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸… 𑀅𑀓𑀼𑀲𑀮𑁂𑀳𑀺 𑀓𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸… 𑀲𑀸𑀯𑀚𑁆𑀚𑁂𑀳𑀺 𑀓𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸… 𑀅𑀦𑀯𑀚𑁆𑀚𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸… 𑀓𑀡𑁆𑀳𑁂𑀳𑀺 𑀓𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸… 𑀲𑀼𑀓𑁆𑀓𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸… 𑀲𑀼𑀔𑀼𑀤𑁆𑀭𑀬𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸… 𑀤𑀼𑀓𑁆𑀔𑀼𑀤𑁆𑀭𑀬𑁂𑀳𑀺 𑀓𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸… 𑀲𑀼𑀔𑀯𑀺𑀧𑀸𑀓𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀜𑀸𑀡𑀘𑀭𑀺𑀬𑀸. 𑀤𑀼𑀓𑁆𑀔𑀯𑀺𑀧𑀸𑀓𑁂𑀳𑀺 𑀓𑀫𑁆𑀫𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑀭𑀢𑀻𑀢𑀺 𑁋 𑀜𑀸𑀡𑀘𑀭𑀺𑀬𑀸. 𑀜𑀸𑀢𑁂 𑀘𑀭𑀢𑀻𑀢𑀺 𑁋 𑀜𑀸𑀡𑀘𑀭𑀺𑀬𑀸. 𑀜𑀸𑀡𑀲𑁆𑀲 𑀏𑀯𑀭𑀽𑀧𑀸 𑀘𑀭𑀺𑀬𑀸 𑀳𑁄𑀢𑀻𑀢𑀺 𑁋 𑀜𑀸𑀡𑀘𑀭𑀺𑀬𑀸. 𑀅𑀬𑀁 𑀜𑀸𑀡𑀘𑀭𑀺𑀬𑀸. 𑀅𑀜𑁆𑀜𑀸 𑀯𑀺𑀜𑁆𑀜𑀸𑀡𑀘𑀭𑀺𑀬𑀸, 𑀅𑀜𑁆𑀜𑀸 𑀅𑀜𑁆𑀜𑀸𑀡𑀘𑀭𑀺𑀬𑀸, 𑀅𑀜𑁆𑀜𑀸 𑀜𑀸𑀡𑀘𑀭𑀺𑀬𑀸𑀢𑀺. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀘𑀭𑀺𑀬𑀸𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀘𑀭𑀺𑀬𑀸𑀦𑀸𑀦𑀢𑁆𑀢𑁂 𑀜𑀸𑀡𑀁’’.

𑀘𑀭𑀺𑀬𑀸𑀦𑀸𑀦𑀢𑁆𑀢𑀜𑀸𑀡𑀦𑀺𑀤𑁆𑀤𑁂𑀲𑁄 𑀲𑀢𑁆𑀢𑀭𑀲𑀫𑁄.