𑁬. 𑀲𑀼𑀢𑁆𑀢𑀢𑁆𑀣𑀲𑀫𑀼𑀘𑁆𑀘𑀬𑀪𑀽𑀫𑀺

𑁬𑁦. 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀸𑀲𑀦𑀁 𑀢𑀺𑀯𑀺𑀥𑁂𑀦 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀔𑀦𑁆𑀥𑁂𑀲𑀼 𑀥𑀸𑀢𑀽𑀲𑀼 𑀆𑀬𑀢𑀦𑁂𑀲𑀼 𑀘. 𑀢𑀢𑁆𑀣 𑀧𑀜𑁆𑀘𑀓𑁆𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄 𑀬𑀸𑀯 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀤𑀲 𑀭𑀽𑀧𑀆𑀬𑀢𑀦𑀸𑀦𑀺 𑀘𑀓𑁆𑀔𑀼 𑀭𑀽𑀧𑀸 𑀘 𑀬𑀸𑀯 𑀓𑀸𑀬𑁄 𑀨𑁄𑀝𑁆𑀞𑀩𑁆𑀩𑀸 𑀘, 𑀅𑀬𑀁 𑀭𑀽𑀧𑀓𑁆𑀔𑀦𑁆𑀥𑁄. 𑀢𑀢𑁆𑀣 𑀙 𑀯𑁂𑀤𑀦𑀸𑀓𑀸𑀬𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀬𑀸𑀯 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀅𑀬𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄. 𑀢𑀢𑁆𑀣 𑀙 𑀲𑀜𑁆𑀜𑀸𑀓𑀸𑀬𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀭𑀽𑀧𑀲𑀜𑁆𑀜𑀸 𑀬𑀸𑀯 𑀥𑀫𑁆𑀫𑀲𑀜𑁆𑀜𑀸 𑀇𑀫𑁂 𑀙 𑀲𑀜𑁆𑀜𑀸𑀓𑀸𑀬𑀸, 𑀅𑀬𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑁄. 𑀢𑀢𑁆𑀣 𑀙 𑀘𑁂𑀢𑀦𑀸𑀓𑀸𑀬𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀭𑀽𑀧𑀲𑀜𑁆𑀘𑁂𑀢𑀦𑀸 𑀬𑀸𑀯 𑀥𑀫𑁆𑀫𑀲𑀜𑁆𑀘𑁂𑀢𑀦𑀸 𑀇𑀫𑁂 𑀙 𑀘𑁂𑀢𑀦𑀸𑀓𑀸𑀬𑀸, 𑀅𑀬𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄. 𑀢𑀢𑁆𑀣 𑀙 𑀯𑀺𑀜𑁆𑀜𑀸𑀡𑀓𑀸𑀬𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀬𑀸𑀯 𑀫𑀦𑁄𑀯𑀺𑀜𑁆𑀜𑀸𑀡𑀁 𑀇𑀫𑁂 𑀙 𑀯𑀺𑀜𑁆𑀜𑀸𑀡𑀓𑀸𑀬𑀸, 𑀅𑀬𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄. 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸.

𑀢𑁂𑀲𑀁 𑀓𑀸 𑀧𑀭𑀺𑀜𑁆𑀜𑀸? 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀲𑀜𑁆𑀜𑀸 𑀅𑀦𑀢𑁆𑀢𑀸𑀢𑀺 𑀏𑀲𑀸 𑀏𑀢𑁂𑀲𑀁 𑀧𑀭𑀺𑀜𑁆𑀜𑀸. 𑀢𑀢𑁆𑀣 𑀓𑀢𑀫𑁄 𑀔𑀦𑁆𑀥𑀢𑁆𑀣𑁄? 𑀲𑀫𑀽𑀳𑀢𑁆𑀣𑁄 𑀔𑀦𑁆𑀥𑀢𑁆𑀣𑁄, 𑀧𑀼𑀜𑁆𑀚𑀢𑁆𑀣𑁄 𑀔𑀦𑁆𑀥𑀢𑁆𑀣𑁄, 𑀭𑀸𑀲𑀢𑁆𑀣𑁄 𑀔𑀦𑁆𑀥𑀢𑁆𑀣𑁄. 𑀢𑀁 𑀬𑀣𑀸 𑀤𑀩𑁆𑀩𑀓𑁆𑀔𑀦𑁆𑀥𑁄 𑀯𑀦𑀓𑁆𑀔𑀦𑁆𑀥𑁄 𑀤𑀸𑀭𑀼𑀓𑁆𑀔𑀦𑁆𑀥𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀉𑀤𑀓𑀓𑁆𑀔𑀦𑁆𑀥𑁄 𑀯𑀸𑀬𑀼𑀓𑁆𑀔𑀦𑁆𑀥𑁄 𑀇𑀢𑀺 𑀏𑀯𑀁 𑀔𑀦𑁆𑀥𑁂𑀲𑀼 𑀲𑀩𑁆𑀩𑀲𑀗𑁆𑀕𑀳𑁄𑀯 𑀏𑀯𑀁 𑀔𑀦𑁆𑀥𑀢𑁆𑀣𑁄.

𑀢𑀢𑁆𑀣 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀘𑀓𑁆𑀔𑀼𑀥𑀸𑀢𑀼 𑀭𑀽𑀧𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼…𑀧𑁂… 𑀫𑀦𑁄𑀥𑀸𑀢𑀼 𑀥𑀫𑁆𑀫𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀏𑀢𑀸𑀬𑁄 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄. 𑀢𑀸𑀲𑀁 𑀧𑀭𑀺𑀜𑁆𑀜𑀸 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀲𑀜𑁆𑀜𑀸 𑀅𑀦𑀢𑁆𑀢𑀸𑀢𑀺 𑀏𑀲𑀸 𑀏𑀢𑀸𑀲𑀁 𑀧𑀭𑀺𑀜𑁆𑀜𑀸. 𑀢𑀢𑁆𑀣 𑀓𑁄 𑀥𑀸𑀢𑀼𑀅𑀢𑁆𑀣𑁄? 𑀯𑀼𑀘𑁆𑀘𑀢𑁂 𑀅𑀯𑀬𑀯𑀢𑁆𑀣𑁄 𑀥𑀸𑀢𑀼𑀅𑀢𑁆𑀣𑁄. 𑀅𑀯𑀬𑀯𑁄𑀢𑀺 𑀘𑀓𑁆𑀔𑀼 𑀦𑁄 𑀧𑀲𑀸𑀤𑁄 𑀘𑀓𑁆𑀔𑀼𑀥𑀸𑀢𑀼. 𑀏𑀯𑀁 𑀧𑀜𑁆𑀘𑀲𑀼 𑀥𑀸𑀢𑀽𑀲𑀼 𑀧𑀼𑀦 𑀭𑀸𑀕𑀯𑀯𑀘𑁆𑀙𑁂𑀤𑀢𑁆𑀣𑁄 𑀥𑀸𑀢𑀼𑀅𑀢𑁆𑀣𑁄. 𑀯𑀯𑀘𑁆𑀙𑀺𑀦𑁆𑀦𑀸 𑀳𑀺 𑀘𑀓𑁆𑀔𑀼𑀥𑀸𑀢𑀼. 𑀏𑀯𑀁 𑀧𑀜𑁆𑀘𑀲𑀼 𑀧𑀼𑀦𑀭𑀸𑀳 𑀏𑀓𑀦𑁆𑀢𑀺𑀧𑀓𑀢𑁆𑀬𑀢𑁆𑀣𑁂𑀦 𑀥𑀸𑀢𑀼𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑁂. 𑀢𑀁 𑀬𑀣𑀸, 𑀧𑀓𑀢𑀺𑀬𑀸 𑀅𑀬𑀁 𑀧𑀼𑀭𑀺𑀲𑁄 𑀧𑀺𑀢𑁆𑀢𑀺𑀓𑁄 𑀲𑁂𑀫𑁆𑀳𑀺𑀓𑁄 𑀯𑀸𑀢𑀺𑀓𑁄 𑀲𑀦𑁆𑀦𑀺𑀧𑀸𑀢𑀺𑀓𑁄𑀢𑀺 𑀏𑀯𑀁 𑀧𑀓𑀢𑀺𑀘𑀓𑁆𑀔𑀼𑀥𑀸𑀢𑀼 𑀤𑀲𑀦𑁆𑀦𑀁 𑀧𑀺𑀬𑀸 𑀘 𑀲𑀩𑁆𑀩𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼…𑀧𑁂… 𑀯𑀺𑀲𑀪𑀸𑀕𑀢𑁆𑀣𑁄 𑀥𑀸𑀢𑀼𑀅𑀢𑁆𑀣𑁄.

𑀢𑀢𑁆𑀣 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀓𑀢𑀫𑀸𑀦𑀺? 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀙 𑀩𑀸𑀳𑀺𑀭𑀸𑀦𑀺. 𑀘𑀓𑁆𑀔𑀸𑀬𑀢𑀦𑀁 𑀬𑀸𑀯 𑀫𑀦𑀸𑀬𑀢𑀦𑀦𑁆𑀢𑀺 𑀅𑀚𑁆𑀛𑀢𑁆𑀢𑀺𑀓𑀁, 𑀭𑀽𑀧𑀸𑀬𑀢𑀦𑀁 𑀬𑀸𑀯 𑀥𑀫𑁆𑀫𑀸𑀬𑀢𑀦𑀦𑁆𑀢𑀺 𑀩𑀸𑀳𑀺𑀭𑀁. 𑀏𑀢𑀸𑀦𑀺 𑀤𑁆𑀯𑀸𑀤𑀲 𑀆𑀬𑀢𑀦𑀸𑀦𑀺. 𑀏𑀢𑁂𑀲𑀁 𑀓𑀸 𑀧𑀭𑀺𑀜𑁆𑀜𑀸? 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀲𑀜𑁆𑀜𑀸 𑀅𑀦𑀢𑁆𑀢𑀸𑀢𑀺, 𑀏𑀲𑀸 𑀏𑀢𑁂𑀲𑀁 𑀧𑀭𑀺𑀜𑁆𑀜𑀸. 𑀅𑀧𑀺 𑀘 𑀤𑁆𑀯𑀺𑀥𑀸 𑀧𑀭𑀺𑀜𑁆𑀜𑀸 𑀜𑀸𑀢𑀧𑀭𑀺𑀜𑁆𑀜𑀸 𑀘 𑀧𑀳𑀸𑀦𑀧𑀭𑀺𑀜𑁆𑀜𑀸 𑀘. 𑀢𑀢𑁆𑀣 𑀜𑀸𑀢𑀧𑀭𑀺𑀜𑁆𑀜𑀸 𑀦𑀸𑀫 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀲𑀜𑁆𑀜𑀸 𑀅𑀦𑀢𑁆𑀢𑀸𑀢𑀺, 𑀏𑀲𑀸 𑀜𑀸𑀢𑀧𑀭𑀺𑀜𑁆𑀜𑀸. 𑀧𑀳𑀸𑀦𑀧𑀭𑀺𑀜𑁆𑀜𑀸 𑀧𑀦 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀸, 𑀏𑀲𑀸 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀢𑀢𑁆𑀣 𑀓𑀢𑀫𑁄 𑀆𑀬𑀢𑀦𑀢𑁆𑀣𑁄? 𑀯𑀼𑀘𑁆𑀘𑀢𑁂 𑀆𑀓𑀸𑀭𑀢𑁆𑀣𑁄 𑀆𑀬𑀢𑀦𑀢𑁆𑀣𑁄. 𑀬𑀣𑀸 𑀲𑀼𑀯𑀡𑁆𑀡𑀸𑀓𑀭𑁄 𑀤𑀼𑀩𑁆𑀩𑀡𑁆𑀡𑀸𑀓𑀭𑁄, 𑀬𑀣𑀸 𑀤𑁆𑀯𑀻𑀳𑀺 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀢𑁂 𑀢𑁂 𑀕𑀸𑀯𑀸 𑀉𑀢𑁆𑀢𑀺𑀝𑁆𑀞𑀦𑁆𑀢𑀺. 𑀏𑀯𑀁 𑀏𑀢𑁂𑀳𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀕𑀸𑀯𑀸 𑀉𑀢𑁆𑀢𑀺𑀝𑁆𑀞𑀦𑁆𑀢𑀺 𑀓𑀫𑁆𑀫𑀓𑀺𑀮𑁂𑀲𑀸 𑀤𑀼𑀓𑁆𑀔𑀥𑀫𑁆𑀫𑀸 𑀘. 𑀧𑀼𑀦𑀭𑀸𑀳 𑀆𑀬𑀤𑀸𑀦𑀢𑁆𑀣𑁄 𑀆𑀬𑀢𑀦𑀢𑁆𑀣𑁄. 𑀬𑀣𑀸 𑀭𑀜𑁆𑀜𑁄 𑀆𑀬𑀤𑀸𑀦𑁂𑀳𑀺 𑀆𑀬𑁄 𑀪𑀯𑀢𑀺, 𑀏𑀯𑀁 𑀆𑀬𑀤𑀸𑀦𑀢𑁆𑀣𑁄 𑀆𑀬𑀢𑀦𑀢𑁆𑀣𑁄.

𑁬𑁧. 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀦𑀺𑀭𑁄𑀥𑁄 𑀫𑀕𑁆𑀕𑁄 𑀘. 𑀤𑀼𑀓𑁆𑀔𑀁 𑀬𑀣𑀸 𑀲𑀫𑀸𑀲𑁂𑀦 𑀥𑀫𑁆𑀫𑀸𑀘𑀭𑀺𑀬𑀁 𑀫𑀸𑀦𑀲𑀜𑁆𑀘, 𑀲𑀫𑀼𑀤𑀬𑁄 𑀲𑀫𑀸𑀲𑁂𑀦 𑀅𑀯𑀺𑀚𑁆𑀚𑀸 𑀘 𑀢𑀡𑁆𑀳𑀸 𑀘, 𑀦𑀺𑀭𑁄𑀥𑁄 𑀲𑀫𑀸𑀲𑁂𑀦 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘, 𑀫𑀕𑁆𑀕𑁄 𑀲𑀫𑀸𑀲𑁂𑀦 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘.

𑀢𑀢𑁆𑀣 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀓𑀸 𑀥𑀫𑁆𑀫𑀸 𑀓𑀢𑀫𑁂? 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀸𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀏𑀯𑀫𑁂𑀢𑁂 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀓𑀸 𑀥𑀫𑁆𑀫𑀸. 𑀬𑁂 𑀥𑀫𑁆𑀫𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀁 𑀘 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺, 𑀲𑁄 𑀫𑀕𑁆𑀕𑁄 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀲𑀫𑁆𑀫𑀧𑁆𑀧𑀥𑀸𑀦𑀁…𑀧𑁂… 𑀇𑀤𑁆𑀥𑀺𑀧𑀸𑀤𑀁…𑀧𑁂… 𑀇𑀦𑁆𑀤𑁆𑀭𑀺𑀬𑀸𑀦𑀺…𑀧𑁂… 𑀩𑀮𑀸𑀦𑀺…𑀧𑁂… 𑀢𑀢𑁆𑀣 𑀓𑁄 𑀇𑀦𑁆𑀤𑁆𑀭𑀺𑀬𑀢𑁆𑀣𑁄? 𑀇𑀦𑁆𑀤𑀢𑁆𑀣𑁄 𑀇𑀦𑁆𑀤𑁆𑀭𑀺𑀬𑀢𑁆𑀣𑁄, 𑀆𑀥𑀺𑀧𑀢𑁂𑀬𑁆𑀬𑀢𑁆𑀣𑁄 𑀇𑀦𑁆𑀤𑁆𑀭𑀺𑀬𑀢𑁆𑀣𑁄, 𑀧𑀲𑀸𑀤𑀢𑁆𑀣𑁄 𑀇𑀦𑁆𑀤𑁆𑀭𑀺𑀬𑀢𑁆𑀣𑁄, 𑀅𑀲𑀸𑀥𑀸𑀭𑀡𑀁 𑀓𑀲𑁆𑀲 𑀓𑀺𑀭𑀺𑀬𑀢𑁆𑀣𑁄 𑀇𑀦𑁆𑀤𑁆𑀭𑀺𑀬𑀢𑁆𑀣𑁄 𑀅𑀦𑀯𑀧𑀭𑀺𑀬𑀢𑁆𑀣𑁄 𑀩𑀮𑀢𑁆𑀣𑁄, 𑀣𑀸𑀫𑀢𑁆𑀣𑁄 𑀩𑀮𑀢𑁆𑀣𑁄, 𑀉𑀧𑀸𑀤𑀸𑀬𑀢𑁆𑀣𑁄 𑀩𑀮𑀢𑁆𑀣𑁄, 𑀉𑀧𑀢𑁆𑀣𑀫𑁆𑀪𑀦𑀢𑁆𑀣𑁄 𑀩𑀮𑀢𑁆𑀣𑁄.

𑀢𑀢𑁆𑀣 𑀓𑀢𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀬𑀸𑀯 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀢𑀢𑁆𑀣 𑀓𑀢𑀫𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄? 𑀲𑀫𑁆𑀫𑀸𑀤𑀺𑀝𑁆𑀞𑀺 𑀬𑀸𑀯 𑀲𑀫𑁆𑀫𑀸𑀲𑀫𑀸𑀥𑀺. 𑀢𑀢𑁆𑀣 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀔𑀦𑁆𑀥𑁄 𑀲𑀻𑀮𑀓𑁆𑀔𑀦𑁆𑀥𑁄 𑀘 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀘 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀘. 𑀢𑀢𑁆𑀣 𑀬𑀸 𑀘 𑀲𑀫𑁆𑀫𑀸𑀯𑀸𑀘𑀸 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀬𑁄 𑀘 𑀲𑀫𑁆𑀫𑀸𑀆𑀚𑀻𑀯𑁄, 𑀅𑀬𑀁 𑀲𑀻𑀮𑀓𑁆𑀔𑀦𑁆𑀥𑁄. 𑀬𑀸 𑀘 𑀲𑀫𑁆𑀫𑀸𑀲𑀢𑀺 𑀬𑁄 𑀘 𑀲𑀫𑁆𑀫𑀸𑀯𑀸𑀬𑀸𑀫𑁄 𑀬𑁄 𑀘 𑀲𑀫𑁆𑀫𑀸𑀲𑀫𑀸𑀥𑀺, 𑀅𑀬𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑁄. 𑀬𑁄 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀬𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀬𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀏𑀯𑀁 𑀢𑀸𑀬𑁄 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸. 𑀏𑀯𑀁 𑀢𑀻𑀳𑀸𑀓𑀸𑀭𑁂𑀳𑀺 𑀤𑀲 𑀧𑀤𑀸𑀦𑀺…𑀧𑁂….

𑀢𑀢𑁆𑀣 𑀬𑁄𑀕𑀸𑀯𑀘𑀭𑁄 𑀲𑀻𑀮𑀓𑁆𑀔𑀦𑁆𑀥𑁂 𑀞𑀺𑀢𑁄 𑀤𑁄𑀲𑀁 𑀅𑀓𑀼𑀲𑀮𑀁 𑀦 𑀉𑀧𑀸𑀤𑀺𑀬𑀢𑀺, 𑀤𑁄𑀲𑀸𑀦𑀼𑀲𑀬𑀁 𑀲𑀫𑀽𑀳𑀦𑀢𑀺, 𑀤𑁄𑀲𑀲𑀮𑁆𑀮𑀁 𑀉𑀤𑁆𑀥𑀭𑀢𑀺, 𑀤𑀼𑀓𑁆𑀔𑀯𑁂𑀤𑀦𑀁 𑀧𑀭𑀺𑀚𑀸𑀦𑀸𑀢𑀺, 𑀓𑀸𑀫𑀥𑀸𑀢𑀼𑀁 𑀲𑀫𑀢𑀺𑀓𑁆𑀓𑀫𑀢𑀺. 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀞𑀺𑀢𑁄 𑀮𑁄𑀪𑀁 𑀅𑀓𑀼𑀲𑀮𑀁 𑀦 𑀉𑀧𑀸𑀤𑀺𑀬𑀢𑀺, 𑀭𑀸𑀕𑀸𑀦𑀼𑀲𑀬𑀁 𑀲𑀫𑀽𑀳𑀦𑀢𑀺, 𑀮𑁄𑀪𑀲𑀮𑁆𑀮𑀁 𑀉𑀤𑁆𑀥𑀭𑀢𑀺, 𑀲𑀼𑀔𑀯𑁂𑀤𑀦𑀁 𑀧𑀭𑀺𑀚𑀸𑀦𑀸𑀢𑀺, 𑀭𑀽𑀧𑀥𑀸𑀢𑀼𑀁 𑀲𑀫𑀢𑀺𑀓𑁆𑀓𑀫𑀢𑀺. 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀞𑀺𑀢𑁄 𑀫𑁄𑀳𑀁 𑀅𑀓𑀼𑀲𑀮𑀁 𑀦 𑀉𑀧𑀸𑀤𑀺𑀬𑀢𑀺, 𑀅𑀯𑀺𑀚𑁆𑀚𑀸𑀦𑀼𑀲𑀬𑀁 𑀲𑀫𑀽𑀳𑀦𑀢𑀺, 𑀫𑁄𑀳𑀲𑀮𑁆𑀮𑀁 𑀤𑀺𑀝𑁆𑀞𑀺𑀲𑀮𑁆𑀮𑀜𑁆𑀘 𑀉𑀤𑁆𑀥𑀭𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀁 𑀧𑀭𑀺𑀚𑀸𑀦𑀸𑀢𑀺, 𑀅𑀭𑀽𑀧𑀥𑀸𑀢𑀼𑀁 𑀲𑀫𑀢𑀺𑀓𑁆𑀓𑀫𑀢𑀺. 𑀇𑀢𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀦 𑀉𑀧𑀸𑀤𑀺𑀬𑀢𑀺, 𑀘𑀢𑁆𑀢𑀸𑀭𑀺 𑀲𑀮𑁆𑀮𑀸𑀦𑀺 𑀉𑀤𑁆𑀥𑀭𑀢𑀺, 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀧𑀭𑀺𑀚𑀸𑀦𑀸𑀢𑀺, 𑀢𑁂𑀥𑀸𑀢𑀼𑀓𑀁 𑀲𑀫𑀢𑀺𑀓𑁆𑀓𑀫𑀢𑀺.

𑁬𑁨. 𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸? 𑀬𑀁 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦 𑀬𑀣𑀸 𑀲𑁄 𑀧𑀸𑀡𑀲𑀚𑁆𑀚𑁂𑀲𑀼 𑀓𑀣𑀁𑀓𑀣𑀸 𑀓𑀸𑀢𑀩𑁆𑀩𑀁. 𑀢𑀢𑁆𑀣 𑀓𑀢𑀫𑀁 𑀯𑀺𑀜𑁆𑀜𑀸𑀡𑀁? 𑀙 𑀯𑀺𑀜𑁆𑀜𑀸𑀡𑀓𑀸𑀬𑀸 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀨𑀲𑁆𑀲𑁄 𑀫𑀦𑀲𑀺𑀓𑀸𑀭𑁄, 𑀇𑀤𑀁 𑀦𑀸𑀫𑀁. 𑀢𑀢𑁆𑀣 𑀓𑀢𑀫𑀁 𑀭𑀽𑀧𑀁? 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧𑀲𑁆𑀲 𑀧𑀜𑁆𑀜𑀢𑁆𑀢𑀺𑀁. 𑀇𑀢𑀺 𑀧𑀼𑀭𑀺𑀫𑀓𑀜𑁆𑀘 𑀦𑀸𑀫𑀁 𑀇𑀤𑀜𑁆𑀘 𑀭𑀽𑀧𑀁 𑀢𑀤𑀼𑀪𑀬𑀁 𑀦𑀸𑀫𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀙𑀴𑀸𑀬𑀢𑀦𑀦𑁆𑀢𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀘𑀓𑁆𑀔𑀼 𑀅𑀚𑁆𑀛𑀢𑁆𑀢𑀺𑀓𑀁 𑀆𑀬𑀢𑀦𑀁 𑀬𑀸𑀯 𑀫𑀦𑁄 𑀅𑀚𑁆𑀛𑀢𑁆𑀢𑀺𑀓𑀁 𑀆𑀬𑀢𑀦𑀁. 𑀨𑀲𑁆𑀲𑁄𑀢𑀺 𑀙 𑀨𑀲𑁆𑀲𑀓𑀸𑀬𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀬𑀸𑀯 𑀫𑀦𑁄𑀲𑀫𑁆𑀨𑀲𑁆𑀲𑁄𑀢𑀺 𑀨𑀲𑁆𑀲𑁄. 𑀙 𑀯𑁂𑀤𑀦𑀸𑀓𑀸𑀬𑀸 𑀯𑁂𑀤𑀦𑀸. 𑀢𑀡𑁆𑀳𑀸𑀢𑀺 𑀙 𑀢𑀡𑁆𑀳𑀸𑀓𑀸𑀬𑀸 𑀢𑀡𑁆𑀳𑀸. 𑀉𑀧𑀸𑀤𑀸𑀦𑀦𑁆𑀢𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀓𑀸𑀫𑀼𑀧𑀸𑀤𑀸𑀦𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 𑀉𑀧𑀸𑀤𑀸𑀦𑀁. 𑀪𑀯𑁄𑀢𑀺 𑀢𑀬𑁄 𑀪𑀯𑀸 𑀓𑀸𑀫𑀪𑀯𑁄 𑀭𑀽𑀧𑀪𑀯𑁄 𑀅𑀭𑀽𑀧𑀪𑀯𑁄. 𑀢𑀢𑁆𑀣 𑀓𑀢𑀫𑀸 𑀚𑀸𑀢𑀺? 𑀬𑀸 𑀧𑀞𑀫𑀁 𑀔𑀦𑁆𑀥𑀸𑀦𑀁 𑀧𑀞𑀫𑀁 𑀥𑀸𑀢𑀽𑀦𑀁 𑀧𑀞𑀫𑀁 𑀆𑀬𑀢𑀦𑀸𑀦𑀁 𑀉𑀧𑁆𑀧𑀢𑁆𑀢𑀺 𑀚𑀸𑀢𑀺 𑀲𑀜𑁆𑀚𑀸𑀢𑀺 𑀑𑀓𑁆𑀓𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄, 𑀅𑀬𑀁 𑀚𑀸𑀢𑀺. 𑀢𑀢𑁆𑀣 𑀓𑀢𑀫𑀸 𑀚𑀭𑀸? 𑀚𑀭𑀸 𑀦𑀸𑀫 𑀬𑀁 𑀢𑀁 𑀔𑀡𑁆𑀟𑀺𑀘𑁆𑀘𑀁 𑀧𑀸𑀮𑀺𑀘𑁆𑀘𑀁 𑀯𑀮𑀺𑀢𑁆𑀢𑀘𑀢𑀸 𑀧𑀯𑀺𑀯𑀺𑀢𑁆𑀢𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀯𑀺𑀯𑀡𑁆𑀡𑀢𑀁 𑀪𑀕𑁆𑀕𑁄 𑀢𑀁 𑀚𑀭𑀸 𑀳𑀻𑀬𑀦𑀸 𑀧𑀳𑀻𑀬𑀦𑀸 𑀆𑀬𑀼𑀦𑁄 𑀳𑀸𑀦𑀺 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀪𑁂𑀤𑁄 𑀉𑀧𑀦𑀸𑀳𑁄 𑀧𑀭𑀺𑀧𑀸𑀓𑁄, 𑀅𑀬𑀁 𑀚𑀭𑀸. 𑀢𑀢𑁆𑀣 𑀓𑀢𑀫𑀁 𑀫𑀭𑀡𑀁? 𑀫𑀭𑀡𑀁 𑀦𑀸𑀫 𑀬𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀢𑁆𑀢𑀦𑀺𑀓𑀸𑀬𑁂 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀘𑀼𑀢𑀺 𑀘𑀯𑀦𑀢𑀸 𑀫𑀭𑀡𑀁 𑀓𑀸𑀮𑀗𑁆𑀓𑀺𑀭𑀺𑀬𑀸 𑀉𑀤𑁆𑀥𑀼𑀫𑀸𑀢𑀓𑀸𑀦𑀁 𑀪𑁂𑀤𑁄 𑀓𑀸𑀬𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑁄, 𑀇𑀤𑀁 𑀫𑀭𑀡𑀁. 𑀇𑀢𑀺 𑀧𑀼𑀭𑀺𑀫𑀺𑀓𑀸 𑀘 𑀚𑀭𑀸 𑀇𑀤𑀜𑁆𑀘 𑀫𑀭𑀡𑀁 𑀢𑀤𑀼𑀪𑀬𑀁 𑀚𑀭𑀸𑀫𑀭𑀡𑀁.

𑀢𑀢𑁆𑀣 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸 𑀬𑀣𑀸𑀪𑀽𑀢𑀁 𑀅𑀧𑁆𑀧𑀚𑀸𑀦𑀦𑀮𑀓𑁆𑀔𑀡𑀸 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀤𑀝𑁆𑀞𑀸𑀦𑀁 𑀳. 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀸 𑀲𑀗𑁆𑀔𑀸𑀭𑀸, 𑀉𑀧𑀘𑀬𑀧𑀼𑀦𑀩𑁆𑀪𑀯𑀸𑀪𑀺𑀭𑁄𑀧𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀢𑁂 𑀯𑀺𑀜𑁆𑀜𑀸𑀡𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀯𑀢𑁆𑀣𑀼 𑀲𑀯𑀺𑀜𑁆𑀜𑀢𑁆𑀢𑀺𑀮𑀓𑁆𑀔𑀡𑀁 𑀯𑀺𑀜𑁆𑀜𑀸𑀡𑀁, 𑀢𑀁 𑀦𑀸𑀫𑀭𑀽𑀧𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀦𑁂𑀓𑀲𑀦𑁆𑀦𑀺𑀲𑁆𑀲𑀬𑀮𑀓𑁆𑀔𑀡𑀁 𑀦𑀸𑀫𑀭𑀽𑀧𑀁, 𑀢𑀁 𑀲𑀴𑀸𑀬𑀢𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀇𑀦𑁆𑀤𑁆𑀭𑀺𑀬𑀯𑀯𑀢𑁆𑀣𑀸𑀧𑀦𑀮𑀓𑁆𑀔𑀡𑀁 𑀲𑀴𑀸𑀬𑀢𑀦𑀁, 𑀢𑀁 𑀨𑀲𑁆𑀲𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀦𑁆𑀦𑀺𑀧𑀸𑀢𑀮𑀓𑁆𑀔𑀡𑁄 𑀨𑀲𑁆𑀲𑁄, 𑀲𑁄 𑀯𑁂𑀤𑀦𑀸𑀬 𑀧𑀤𑀝𑁆𑀞𑀸𑀦𑀁. 𑀅𑀦𑀼𑀪𑀯𑀦𑀮𑀓𑁆𑀔𑀡𑀸 𑀯𑁂𑀤𑀦𑀸, 𑀲𑀸 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀁. 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑀸 𑀢𑀡𑁆𑀳𑀸, 𑀲𑀸 𑀉𑀧𑀸𑀤𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀆𑀤𑀸𑀦𑀧𑀭𑀺𑀳𑀦𑀦𑀮𑀓𑁆𑀔𑀡𑀁 𑀉𑀧𑀸𑀤𑀸𑀦𑀁, 𑀢𑀁 𑀪𑀯𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀦𑀸𑀦𑀸𑀕𑀢𑀺𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄 𑀪𑀯𑁄, 𑀲𑁄 𑀚𑀸𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑀮𑀓𑁆𑀔𑀡𑀸 𑀚𑀸𑀢𑀺, 𑀲𑀸 𑀚𑀭𑀸𑀬 𑀧𑀤𑀝𑁆𑀞𑀸𑀦𑀁. 𑀉𑀧𑀦𑀬𑀧𑀭𑀺𑀧𑀸𑀓𑀮𑀓𑁆𑀔𑀡𑀸 𑀚𑀭𑀸, 𑀲𑀸 𑀫𑀭𑀡𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀆𑀬𑀼𑀓𑁆𑀔𑀬𑀚𑀻𑀯𑀺𑀢𑀉𑀧𑀭𑁄𑀥𑀮𑀓𑁆𑀔𑀡𑀁 𑀫𑀭𑀡𑀁, 𑀢𑀁 𑀤𑀼𑀓𑁆𑀔𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀓𑀸𑀬𑀲𑀫𑁆𑀧𑀻𑀴𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀁, 𑀢𑀁 𑀤𑁄𑀫𑀦𑀲𑁆𑀲𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀘𑀺𑀢𑁆𑀢𑀲𑀫𑁆𑀧𑀻𑀴𑀦𑀮𑀓𑁆𑀔𑀡𑀁 𑀤𑁄𑀫𑀦𑀲𑁆𑀲𑀁, 𑀢𑀁 𑀲𑁄𑀓𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑁄𑀘𑀦𑀮𑀓𑁆𑀔𑀡𑁄 𑀲𑁄𑀓𑁄, 𑀲𑁄 𑀧𑀭𑀺𑀤𑁂𑀯𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀯𑀘𑀻𑀦𑀺𑀘𑁆𑀙𑀸𑀭𑀡𑀮𑀓𑁆𑀔𑀡𑁄 𑀧𑀭𑀺𑀤𑁂𑀯𑁄, 𑀲𑁄 𑀉𑀧𑀸𑀬𑀸𑀲𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑁂 𑀆𑀬𑀸𑀲𑀸 𑀢𑁂 𑀉𑀧𑀸𑀬𑀸𑀲𑀸.

𑀦𑀯 𑀧𑀤𑀸𑀦𑀺 𑀬𑀢𑁆𑀣 𑀲𑀩𑁆𑀩𑁄 𑀅𑀓𑀼𑀲𑀮𑀧𑀓𑁆𑀔𑁄 𑀲𑀗𑁆𑀕𑀳𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀢𑀺. 𑀓𑀢𑀫𑀸𑀦𑀺 𑀦𑀯 𑀧𑀤𑀸𑀦𑀺? 𑀤𑁆𑀯𑁂 𑀫𑀽𑀮𑀓𑀺𑀮𑁂𑀲𑀸, 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺, 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸. 𑀢𑀢𑁆𑀣 𑀤𑁆𑀯𑁂 𑀫𑀽𑀮𑀓𑀺𑀮𑁂𑀲𑀸 𑀅𑀯𑀺𑀚𑁆𑀚𑀸 𑀘 𑀪𑀯𑀢𑀡𑁆𑀳𑀸 𑀘, 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀘. 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 [𑀅. 𑀦𑀺. 𑁪.𑁪𑁯] 𑁋 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄, ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄, ‘‘𑀅𑀦𑀢𑁆𑀢𑀦𑀺 𑀅𑀢𑁆𑀢𑀸’’𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄, ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄.

𑁬𑁩. 𑀢𑀢𑁆𑀣 𑀅𑀯𑀺𑀚𑁆𑀚𑀸 𑀦𑀸𑀫 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀬𑀣𑀸𑀪𑀽𑀢𑀁 𑀅𑀜𑁆𑀜𑀸𑀡𑀁, 𑀅𑀬𑀁 𑀅𑀯𑀺𑀚𑁆𑀚𑀸. 𑀪𑀯𑀢𑀡𑁆𑀳𑀸 𑀦𑀸𑀫 𑀬𑁄 𑀪𑀯𑁂𑀲𑀼 𑀭𑀸𑀕𑁄 𑀲𑀸𑀭𑀸𑀕𑁄 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀧𑀢𑁆𑀣𑀦𑀸 𑀦𑀦𑁆𑀤𑀻 𑀅𑀚𑁆𑀛𑁄𑀲𑀸𑀦𑀁 𑀅𑀧𑀭𑀺𑀘𑁆𑀘𑀸𑀕𑁄, 𑀅𑀬𑀁 𑀪𑀯𑀢𑀡𑁆𑀳𑀸.

𑀢𑀢𑁆𑀣 𑀓𑀢𑀫𑁄 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁?

𑀮𑁄𑀪𑁄 𑀦𑀸𑀫 𑀲𑁄 𑀢𑁂𑀲𑀼 𑀢𑁂𑀲𑀼 𑀧𑀭𑀯𑀢𑁆𑀣𑀽𑀲𑀼 𑀧𑀭𑀤𑀩𑁆𑀩𑁂𑀲𑀼 𑀧𑀭𑀝𑁆𑀞𑀸𑀦𑁂𑀲𑀼 𑀧𑀭𑀲𑀸𑀧𑀢𑁂𑀬𑁆𑀬𑁂𑀲𑀼 𑀧𑀭𑀧𑀭𑀺𑀕𑁆𑀕𑀳𑀺𑀢𑁂𑀲𑀼 𑀮𑁄𑀪𑁄 𑀮𑀼𑀩𑁆𑀪𑀦𑀸 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀧𑀢𑁆𑀣𑀦𑀸 𑀦𑀦𑁆𑀤𑀻 𑀅𑀚𑁆𑀛𑁄𑀲𑀸𑀦𑀁 𑀅𑀧𑀭𑀺𑀘𑁆𑀘𑀸𑀕𑁄, 𑀅𑀬𑀁 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀓𑀲𑁆𑀲𑁂𑀢𑀁 𑀫𑀽𑀮𑀁? 𑀮𑁄𑀪𑁄 𑀮𑁄𑀪𑀚𑀲𑁆𑀲 𑀅𑀓𑀼𑀲𑀮𑀲𑁆𑀲 𑀓𑀸𑀬𑀓𑀫𑁆𑀫𑀲𑁆𑀲 𑀯𑀘𑀻𑀓𑀫𑁆𑀫𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀘, 𑀢𑀣𑀸 𑀬𑀣𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀫𑀽𑀮𑀁.

𑀢𑀢𑁆𑀣 𑀓𑀢𑀫𑁄 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁?

𑀲𑁄 𑀲𑀢𑁆𑀢𑁂𑀲𑀼 𑀆𑀖𑀸𑀢𑁄 𑀅𑀓𑁆𑀔𑀦𑁆𑀢𑀺 𑀅𑀧𑁆𑀧𑀘𑁆𑀘𑀬𑁄 𑀩𑁆𑀬𑀸𑀧𑀸𑀤𑁄 𑀧𑀤𑁄𑀲𑁄 𑀅𑀦𑀢𑁆𑀣𑀓𑀸𑀫𑀢𑀸 𑀘𑁂𑀢𑀲𑁄 𑀧𑀝𑀺𑀖𑀸𑀢𑁄, 𑀅𑀬𑀁 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁.

𑀓𑀲𑁆𑀲𑁂𑀢𑀁 𑀫𑀽𑀮𑀁?

𑀤𑁄𑀲𑀚𑀲𑁆𑀲 𑀓𑀸𑀬𑀓𑀫𑁆𑀫𑀲𑁆𑀲 𑀯𑀘𑀻𑀓𑀫𑁆𑀫𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀫𑀽𑀮𑀁.

𑀢𑀢𑁆𑀣 𑀓𑀢𑀫𑁄 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁?

𑀬𑀁 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀅𑀦𑀪𑀺𑀲𑀫𑀬𑁄 𑀅𑀲𑀫𑁆𑀧𑀚𑁆𑀚𑀕𑁆𑀕𑀸𑀳𑁄 𑀅𑀧𑁆𑀧𑀝𑀺𑀯𑁂𑀥𑁄 𑀫𑁄𑀳𑁄 𑀫𑀼𑀬𑁆𑀳𑀦𑀸 𑀲𑀫𑁆𑀫𑁄𑀳𑁄 𑀲𑀫𑁆𑀫𑀼𑀬𑁆𑀳𑀦𑀸 𑀅𑀯𑀺𑀚𑁆𑀚𑀸 𑀢𑀫𑁄 𑀅𑀦𑁆𑀥𑀓𑀸𑀭𑁄 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀙𑀤𑀦𑀁 𑀅𑀘𑁆𑀙𑀤𑀦𑀁 [𑀅𑀯𑁂𑀘𑁆𑀙𑀤𑀦𑀁 (𑀧𑀻. 𑀓.)] 𑀅𑀧𑀲𑀘𑁆𑀙𑀸𑀕𑀫𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁, 𑀅𑀬𑀁 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁.

𑀓𑀲𑁆𑀲𑁂𑀢𑀁 𑀫𑀽𑀮𑀁?

𑀫𑁄𑀳𑀚𑀲𑁆𑀲 𑀅𑀓𑀼𑀲𑀮𑀲𑁆𑀲 𑀓𑀸𑀬𑀓𑀫𑁆𑀫𑀲𑁆𑀲 𑀯𑀘𑀻𑀓𑀫𑁆𑀫𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀫𑀽𑀮𑀁.

𑀢𑀢𑁆𑀣 𑀯𑀺𑀧𑀮𑁆𑀮𑀸𑀲𑀸 𑀚𑀸𑀦𑀺𑀢𑀩𑁆𑀩𑀸, 𑀯𑀺𑀧𑀮𑁆𑀮𑀸𑀲𑀸𑀦𑀁 𑀯𑀢𑁆𑀣𑀼 𑀚𑀸𑀦𑀺𑀢𑀩𑁆𑀩𑀁. 𑀬𑀁 𑀯𑀺𑀧𑀮𑁆𑀮𑀸𑀲𑀁 𑀲𑀺𑀬𑀸, 𑀢𑀁 𑀚𑀸𑀦𑀺𑀢𑀩𑁆𑀩𑀁. 𑀢𑀢𑁆𑀣 𑀏𑀓𑁄 𑀯𑀺𑀧𑀮𑁆𑀮𑀸𑀲𑁄 𑀢𑀻𑀡𑀺 𑀯𑀺𑀧𑀮𑁆𑀮𑀸𑀲𑀸𑀦𑀺 𑀘𑀢𑁆𑀢𑀸𑀭𑀺 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀽𑀦𑀺. 𑀓𑀢𑀫𑁄 𑀏𑀓𑁄 𑀯𑀺𑀧𑀮𑁆𑀮𑀸𑀲𑁄 𑀘, 𑀬𑁂𑀦 𑀧𑀝𑀺𑀧𑀓𑁆𑀔𑁂𑀦 𑀯𑀺𑀧𑀮𑁆𑀮𑀸𑀲𑀺𑀢𑀁 𑀕𑀡𑁆𑀳𑀸𑀢𑀺?

‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺, ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺, ‘‘𑀅𑀦𑀢𑁆𑀢𑀦𑀺 𑀅𑀢𑁆𑀢𑀸’’𑀢𑀺, ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺, 𑀅𑀬𑀁 𑀏𑀓𑁄 𑀯𑀺𑀧𑀮𑁆𑀮𑀸𑀲𑁄.

𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀽𑀦𑀺?

𑀓𑀸𑀬𑁄 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀥𑀫𑁆𑀫𑀸 𑀘. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀽𑀦𑀺.

𑀓𑀢𑀫𑀸𑀦𑀺 𑀢𑀻𑀡𑀺 𑀯𑀺𑀧𑀮𑁆𑀮𑀸𑀲𑀸𑀦𑀺?

𑀲𑀜𑁆𑀜𑀸 𑀘𑀺𑀢𑁆𑀢𑀁 𑀤𑀺𑀝𑁆𑀞𑀺 𑀘. 𑀇𑀫𑀸𑀦𑀺 𑀢𑀻𑀡𑀺 𑀯𑀺𑀧𑀮𑁆𑀮𑀸𑀲𑀸𑀦𑀺.

𑀢𑀢𑁆𑀣 𑀫𑀦𑀸𑀧𑀺𑀓𑁂 𑀯𑀢𑁆𑀣𑀼𑀫𑁆𑀳𑀺 𑀇𑀦𑁆𑀤𑁆𑀭𑀺𑀬𑀯𑀢𑁆𑀣𑁂 𑀯𑀡𑁆𑀡𑀸𑀬𑀢𑀦𑁂 𑀯𑀸 𑀬𑁄 𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀸𑀳𑁄, 𑀅𑀬𑀁 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄. 𑀢𑀢𑁆𑀣 𑀯𑀺𑀧𑀭𑀻𑀢𑀘𑀺𑀢𑁆𑀢𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀲𑀢𑀺 𑀯𑀺𑀜𑁆𑀜𑀢𑁆𑀢𑀺, 𑀅𑀬𑀁 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄. 𑀢𑀢𑁆𑀣 𑀯𑀺𑀧𑀭𑀻𑀢𑀘𑀺𑀢𑁆𑀢𑀲𑁆𑀲 𑀢𑀫𑁆𑀳𑀺 𑀭𑀽𑀧𑁂 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀬𑀸 𑀔𑀦𑁆𑀢𑀺 𑀭𑀼𑀘𑀺 𑀉𑀧𑁂𑀓𑁆𑀔𑀦𑀸 𑀦𑀺𑀘𑁆𑀙𑀬𑁄 𑀤𑀺𑀝𑁆𑀞𑀺 𑀦𑀺𑀤𑀲𑁆𑀲𑀦𑀁 𑀲𑀦𑁆𑀢𑀻𑀭𑀡𑀸, 𑀅𑀬𑀁 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄. 𑀢𑀢𑁆𑀣 𑀯𑀢𑁆𑀣𑀼𑀪𑁂𑀤𑁂𑀦 𑀓𑀸𑀬𑁂𑀲𑀼 𑀤𑁆𑀯𑀸𑀤𑀲 𑀯𑀺𑀧𑀮𑁆𑀮𑀸𑀲𑀸 𑀪𑀯𑀦𑁆𑀢𑀺. 𑀢𑀬𑁄 𑀓𑀸𑀬𑁂 𑀢𑀬𑁄 𑀯𑁂𑀤𑀦𑀸𑀬 𑀢𑀬𑁄 𑀘𑀺𑀢𑁆𑀢𑁂 𑀢𑀬𑁄 𑀥𑀫𑁆𑀫𑁂, 𑀘𑀢𑁆𑀢𑀸𑀭𑁄 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀸 𑀘𑀢𑁆𑀢𑀸𑀭𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑀸, 𑀆𑀬𑀢𑀦𑀽𑀧𑀘𑀬𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀜𑁆𑀜𑀸𑀲𑀫𑀗𑁆𑀕𑀺𑀲𑁆𑀲 𑀭𑀽𑀧𑁂𑀲𑀼 𑀤𑁆𑀯𑀸𑀤𑀲 𑀯𑀺𑀧𑀮𑁆𑀮𑀸𑀲𑀸 𑀬𑀸𑀯 𑀫𑀦𑁄 𑀲𑀜𑁆𑀜𑀸𑀲𑀫𑀗𑁆𑀕𑀺𑀲𑁆𑀲, 𑀥𑀫𑁆𑀫𑁂𑀲𑀼 𑀤𑁆𑀯𑀸𑀤𑀲 𑀯𑀺𑀧𑀮𑁆𑀮𑀸𑀲𑀸 𑀙 𑀤𑁆𑀯𑀸𑀤𑀲𑀓𑀸 𑀘𑀢𑁆𑀢𑀸𑀭𑀺 𑀯𑀺𑀧𑀮𑁆𑀮𑀸𑀲𑀸 𑀪𑀯𑀦𑁆𑀢𑀺. 𑀆𑀭𑀫𑁆𑀫𑀡𑀦𑀸𑀦𑀢𑁆𑀢𑀢𑁄 𑀳𑀺 𑀅𑀧𑀭𑀺𑀫𑀺𑀢𑀲𑀗𑁆𑀔𑁂𑀬𑁆𑀬𑀸𑀦𑀁 𑀲𑀢𑁆𑀢𑀸𑀦𑀁 [𑀅𑀢𑁆𑀢𑀸𑀦𑀁 (𑀓.)] 𑀅𑀧𑀭𑀺𑀫𑀺𑀢𑀫𑀲𑀗𑁆𑀔𑁂𑀬𑁆𑀬𑀸 𑀯𑀺𑀧𑀮𑁆𑀮𑀸𑀲𑀸 𑀪𑀯𑀦𑁆𑀢𑀺 𑀳𑀻𑀦𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀢𑀸𑀬.

𑁬𑁪. 𑀢𑀢𑁆𑀣 𑀧𑀜𑁆𑀘𑀓𑁆𑀔𑀦𑁆𑀥𑀸 𑀘𑀢𑁆𑀢𑀸𑀭𑀺 𑀅𑀢𑁆𑀢𑀪𑀸𑀯𑀯𑀢𑁆𑀣𑀽𑀦𑀺 𑀪𑀯𑀦𑁆𑀢𑀺. 𑀬𑁄 𑀭𑀽𑀧𑀓𑁆𑀔𑀦𑁆𑀥𑁄, 𑀲𑁄 𑀓𑀸𑀬𑁄 𑀅𑀢𑁆𑀢𑀪𑀸𑀯𑀯𑀢𑁆𑀣𑀼. 𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑁄 𑀯𑁂𑀤𑀦𑀸 𑀅𑀢𑁆𑀢𑀪𑀸𑀯𑀯𑀢𑁆𑀣𑀼. 𑀬𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀘, 𑀢𑁂 𑀥𑀫𑁆𑀫𑀸 𑀅𑀢𑁆𑀢𑀪𑀸𑀯𑀯𑀢𑁆𑀣𑀼. 𑀬𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀲𑁄 𑀘𑀺𑀢𑁆𑀢𑀁 𑀅𑀢𑁆𑀢𑀪𑀸𑀯𑀯𑀢𑁆𑀣𑀼. 𑀇𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸 𑀘𑀢𑁆𑀢𑀸𑀭𑀺 𑀅𑀢𑁆𑀢𑀪𑀸𑀯𑀯𑀢𑁆𑀣𑀽𑀦𑀺. 𑀢𑀢𑁆𑀣 𑀓𑀸𑀬𑁂 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀪𑀯𑀢𑀺. 𑀏𑀯𑀁 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀘 𑀅𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀪𑀯𑀢𑀺. 𑀢𑀢𑁆𑀣 𑀘𑀢𑀼𑀦𑁆𑀦𑀁 𑀯𑀺𑀧𑀮𑁆𑀮𑀸𑀲𑀸𑀦𑀁 𑀲𑀫𑀼𑀕𑁆𑀖𑀸𑀢𑀦𑀢𑁆𑀣𑀁 𑀪𑀕𑀯𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀤𑁂𑀲𑁂𑀢𑀺 𑀧𑀜𑁆𑀜𑀧𑁂𑀢𑀺 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑁄 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀏𑀯𑀁 𑀯𑁂𑀤𑀦𑀸𑀲𑀼, 𑀘𑀺𑀢𑁆𑀢𑁂, 𑀥𑀫𑁆𑀫𑁂𑀲𑀼 𑀘 𑀓𑀸𑀢𑀩𑁆𑀩𑀁.

𑀢𑀢𑁆𑀣 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸 𑀅𑀧𑁆𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀅𑀯𑀺𑀚𑁆𑀚𑀸, 𑀢𑀲𑁆𑀲𑀸 𑀯𑀺𑀧𑀮𑁆𑀮𑀸𑀲𑀧𑀤𑀝𑁆𑀞𑀸𑀦𑀁. 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑀸 𑀢𑀡𑁆𑀳𑀸, 𑀢𑀲𑁆𑀲𑀸 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀁 𑀧𑀤𑀝𑁆𑀞𑀸𑀦𑀁. 𑀅𑀢𑁆𑀢𑀸𑀲𑀬𑀯𑀜𑁆𑀘𑀦𑀸𑀮𑀓𑁆𑀔𑀡𑁄 𑀮𑁄𑀪𑁄, 𑀢𑀲𑁆𑀲 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀤𑀝𑁆𑀞𑀸𑀦𑀁. 𑀇𑀥 𑀯𑀺𑀯𑀸𑀤𑀮𑀓𑁆𑀔𑀡𑁄 𑀤𑁄𑀲𑁄, 𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑁄 𑀧𑀤𑀝𑁆𑀞𑀸𑀦𑀁. 𑀯𑀢𑁆𑀣𑀼𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀮𑀓𑁆𑀔𑀡𑁄 𑀫𑁄𑀳𑁄, 𑀢𑀲𑁆𑀲 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺 𑀧𑀤𑀝𑁆𑀞𑀸𑀦𑀁. 𑀲𑀗𑁆𑀔𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀯𑀺𑀦𑀸𑀲𑀕𑁆𑀕𑀳𑀡𑀮𑀓𑁆𑀔𑀡𑀸 𑀦𑀺𑀘𑁆𑀘𑀲𑀜𑁆𑀜𑀸, 𑀢𑀲𑁆𑀲𑀸 𑀲𑀩𑁆𑀩𑀲𑀗𑁆𑀔𑀸𑀭𑀸 𑀧𑀤𑀝𑁆𑀞𑀸𑀦𑀁. 𑀲𑀸𑀲𑀯𑀨𑀲𑁆𑀲𑁄𑀧𑀕𑀫𑀦𑀮𑀓𑁆𑀔𑀡𑀸 𑀲𑀼𑀔𑀲𑀜𑁆𑀜𑀸, 𑀢𑀲𑁆𑀲𑀸 𑀫𑀫𑀗𑁆𑀓𑀸𑀭𑁄 𑀧𑀤𑀝𑁆𑀞𑀸𑀦𑀁. 𑀥𑀫𑁆𑀫𑁂𑀲𑀼 𑀉𑀧𑀕𑀫𑀦𑀮𑀓𑁆𑀔𑀡𑀸 𑀅𑀢𑁆𑀢𑀲𑀜𑁆𑀜𑀸, 𑀢𑀲𑁆𑀲𑀸 𑀅𑀳𑀗𑁆𑀓𑀸𑀭𑁄 𑀧𑀤𑀝𑁆𑀞𑀸𑀦𑀁. 𑀯𑀡𑁆𑀡𑀲𑀗𑁆𑀕𑀳𑀡𑀮𑀓𑁆𑀔𑀡𑀸 𑀲𑀼𑀪𑀲𑀜𑁆𑀜𑀸, 𑀢𑀲𑁆𑀲𑀸 𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑁄 𑀧𑀤𑀝𑁆𑀞𑀸𑀦𑀁. 𑀏𑀢𑁂𑀳𑀺 𑀦𑀯𑀳𑀺 𑀧𑀤𑁂𑀳𑀺 𑀉𑀤𑁆𑀤𑀺𑀝𑁆𑀞𑁂𑀳𑀺 𑀲𑀩𑁆𑀩𑁄 𑀅𑀓𑀼𑀲𑀮𑀧𑀓𑁆𑀔𑁄 𑀦𑀺𑀤𑁆𑀤𑀺𑀝𑁆𑀞𑁄 𑀪𑀯𑀢𑀺, 𑀲𑁄 𑀘 𑀔𑁄 𑀩𑀳𑀼𑀲𑁆𑀲𑀼𑀢𑁂𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁 𑀦𑁄 𑀅𑀧𑁆𑀧𑀲𑁆𑀲𑀼𑀢𑁂𑀦, 𑀧𑀜𑁆𑀜𑀯𑀢𑀸 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦, 𑀬𑀼𑀢𑁆𑀢𑁂𑀦 𑀦𑁄 𑀅𑀬𑀼𑀢𑁆𑀢𑁂𑀦.

𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺 𑀬𑀢𑁆𑀣 𑀲𑀩𑁆𑀩𑁄 𑀓𑀼𑀲𑀮𑀧𑀓𑁆𑀔𑁄 𑀲𑀗𑁆𑀕𑀳𑁄 𑀲𑀫𑁄𑀲𑀭𑀡𑀁 𑀕𑀘𑁆𑀙𑀦𑁆𑀢𑀺. 𑀓𑀢𑀫𑀸𑀦𑀺 𑀦𑀯 𑀧𑀤𑀸𑀦𑀺? 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀅𑀦𑀺𑀘𑁆𑀘𑀲𑀜𑁆𑀜𑀸 𑀤𑀼𑀓𑁆𑀔𑀲𑀜𑁆𑀜𑀸 𑀅𑀦𑀢𑁆𑀢𑀲𑀜𑁆𑀜𑀸 𑀅𑀲𑀼𑀪𑀲𑀜𑁆𑀜𑀸 𑀘.

𑀢𑀢𑁆𑀣 𑀓𑀢𑀫𑁄 𑀲𑀫𑀣𑁄? 𑀬𑀸 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀲𑀡𑁆𑀞𑀺𑀢𑀺 𑀅𑀯𑀝𑁆𑀞𑀺𑀢𑀺 𑀞𑀸𑀦𑀁 𑀧𑀝𑁆𑀞𑀸𑀦𑀁 𑀉𑀧𑀝𑁆𑀞𑀸𑀦𑀁 𑀲𑀫𑀸𑀥𑀺 𑀲𑀫𑀸𑀥𑀸𑀦𑀁 𑀅𑀯𑀺𑀓𑁆𑀔𑁂𑀧𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀯𑀽𑀧𑀲𑀫𑁄 𑀫𑀸𑀦𑀲𑁄 𑀏𑀓𑀕𑁆𑀕𑀁 𑀘𑀺𑀢𑁆𑀢𑀲𑁆𑀲, 𑀅𑀬𑀁 𑀲𑀫𑀣𑁄.

𑀢𑀢𑁆𑀣 𑀓𑀢𑀫𑀸 𑀯𑀺𑀧𑀲𑁆𑀲𑀦𑀸? 𑀔𑀦𑁆𑀥𑁂𑀲𑀼 𑀯𑀸 𑀥𑀸𑀢𑀽𑀲𑀼 𑀯𑀸 𑀆𑀬𑀢𑀦𑁂𑀲𑀼 𑀯𑀸 𑀦𑀸𑀫𑀭𑀽𑀧𑁂𑀲𑀼 𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼 𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀤𑀼𑀓𑁆𑀔𑁂𑀲𑀼 𑀯𑀸 𑀲𑀫𑀼𑀤𑀬𑁂𑀲𑀼 𑀯𑀸 𑀦𑀺𑀭𑁄𑀥𑁂 𑀯𑀸 𑀫𑀕𑁆𑀕𑁂 𑀯𑀸 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀲𑀸𑀯𑀚𑁆𑀚𑀅𑀦𑀯𑀚𑁆𑀚𑁂𑀲𑀼 𑀯𑀸 𑀓𑀡𑁆𑀳𑀲𑀼𑀓𑁆𑀓𑁂𑀲𑀼 𑀯𑀸 𑀲𑁂𑀯𑀺𑀢𑀩𑁆𑀩𑀅𑀲𑁂𑀯𑀺𑀢𑀩𑁆𑀩𑁂𑀲𑀼 𑀯𑀸 𑀲𑁄 𑀬𑀣𑀸𑀪𑀽𑀢𑀁 𑀯𑀺𑀘𑀬𑁄 𑀧𑀯𑀺𑀘𑀬𑁄 𑀯𑀻𑀫𑀁𑀲𑀸 𑀧𑀭𑀯𑀻𑀫𑀁𑀲𑀸 𑀕𑀸𑀳𑀦𑀸 𑀅𑀕𑁆𑀕𑀸𑀳𑀦𑀸 𑀧𑀭𑀺𑀕𑁆𑀕𑀸𑀳𑀦𑀸 𑀘𑀺𑀢𑁆𑀢𑁂𑀦 𑀧𑀭𑀺𑀘𑀺𑀢𑀦𑀸 𑀢𑀼𑀮𑀦𑀸 𑀉𑀧𑀧𑀭𑀺𑀓𑁆𑀔𑀸 𑀜𑀸𑀡𑀁 𑀯𑀺𑀚𑁆𑀚𑀸 𑀯𑀸 𑀘𑀓𑁆𑀔𑀼 𑀩𑀼𑀤𑁆𑀥𑀺 𑀫𑁂𑀥𑀸 𑀧𑀜𑁆𑀜𑀸 𑀑𑀪𑀸𑀲𑁄 𑀆𑀮𑁄𑀓𑁄 𑀆𑀪𑀸 𑀧𑀪𑀸 𑀔𑀕𑁆𑀕𑁄 𑀦𑀸𑀭𑀸𑀘𑁄 [𑀦𑀸𑀭𑀚𑁆𑀚𑁄 (𑀧𑀻. 𑀓.)] 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀕𑁆𑀕𑀗𑁆𑀕𑀁, 𑀅𑀬𑀁 𑀯𑀺𑀧𑀲𑁆𑀲𑀦𑀸. 𑀢𑁂𑀦𑁂𑀲𑀸 𑀯𑀺𑀧𑀲𑁆𑀲𑀦𑀸 𑀇𑀢𑀺 𑀯𑀼𑀘𑁆𑀘𑀢𑀺 𑀯𑀺𑀯𑀺𑀥𑀸 𑀯𑀸 𑀏𑀲𑀸 𑀯𑀺𑀧𑀲𑁆𑀲𑀦𑀸𑀢𑀺, 𑀢𑀲𑁆𑀫𑀸 𑀏𑀲𑀸 𑀯𑀺𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀤𑁆𑀯𑀺𑀥𑀸 𑀘𑁂𑀲𑀸 𑀳𑀺 𑀯𑀺𑀧𑀲𑁆𑀲𑀦𑀸 𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑀺, 𑀤𑁆𑀯𑀺𑀥𑀸 𑀇𑀫𑀸𑀬 𑀧𑀲𑁆𑀲𑀢𑀺 𑀲𑀼𑀪𑀜𑁆𑀘 𑀅𑀲𑀼𑀪𑀜𑁆𑀘 𑀓𑀡𑁆𑀳𑀜𑁆𑀘 𑀲𑀼𑀓𑁆𑀓𑀜𑁆𑀘 𑀲𑁂𑀯𑀺𑀢𑀩𑁆𑀩𑀜𑁆𑀘 𑀅𑀲𑁂𑀯𑀺𑀢𑀩𑁆𑀩𑀜𑁆𑀘 𑀓𑀫𑁆𑀫𑀜𑁆𑀘 𑀯𑀺𑀧𑀸𑀓𑀜𑁆𑀘 𑀩𑀦𑁆𑀥𑀜𑁆𑀘 𑀯𑀺𑀫𑁄𑀓𑁆𑀔𑀜𑁆𑀘 𑀆𑀘𑀬𑀜𑁆𑀘 𑀅𑀧𑀘𑀬𑀜𑁆𑀘 𑀧𑀯𑀢𑁆𑀢𑀺𑀜𑁆𑀘 𑀦𑀺𑀯𑀢𑁆𑀢𑀺𑀜𑁆𑀘 𑀲𑀁𑀓𑀺𑀮𑁂𑀲𑀜𑁆𑀘 𑀯𑁄𑀤𑀸𑀦𑀜𑁆𑀘, 𑀏𑀯𑀁 𑀯𑀺𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀯𑀺𑀇𑀢𑀺 𑀉𑀧𑀲𑀕𑁆𑀕𑁄 𑀧𑀲𑁆𑀲𑀦𑀸𑀢𑀺 𑀅𑀢𑁆𑀣𑁄 𑀢𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑁂, 𑀅𑀬𑀁 𑀯𑀺𑀧𑀲𑁆𑀲𑀦𑀸.

𑁬𑁫. 𑀢𑀢𑁆𑀣 𑀤𑁆𑀯𑁂 𑀭𑁄𑀕𑀸 𑀲𑀢𑁆𑀢𑀸𑀦𑀁 𑀅𑀯𑀺𑀚𑁆𑀚𑀸 𑀘 𑀪𑀯𑀢𑀡𑁆𑀳𑀸 𑀘, 𑀏𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀭𑁄𑀕𑀸𑀦𑀁 𑀦𑀺𑀖𑀸𑀢𑀸𑀬 𑀪𑀕𑀯𑀢𑀸 𑀤𑁆𑀯𑁂 𑀪𑁂𑀲𑀚𑁆𑀚𑀸𑀦𑀺 𑀯𑀼𑀢𑁆𑀢𑀸𑀦𑀺 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘. 𑀇𑀫𑀸𑀦𑀺 𑀤𑁆𑀯𑁂 𑀪𑁂𑀲𑀚𑁆𑀚𑀸𑀦𑀺 𑀧𑀝𑀺𑀲𑁂𑀯𑁂𑀦𑁆𑀢𑁄 𑀤𑁆𑀯𑁂 𑀅𑀭𑁄𑀕𑁂 𑀲𑀘𑁆𑀙𑀺𑀓𑀭𑁄𑀢𑀺 𑀭𑀸𑀕𑀯𑀺𑀭𑀸𑀕𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀜𑁆𑀘 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁. 𑀢𑀢𑁆𑀣 𑀢𑀡𑁆𑀳𑀸𑀭𑁄𑀕𑀲𑁆𑀲 𑀲𑀫𑀣𑁄 𑀪𑁂𑀲𑀚𑁆𑀚𑀁, 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀭𑁄𑀕𑀁. 𑀅𑀯𑀺𑀚𑁆𑀚𑀸𑀭𑁄𑀕𑀲𑁆𑀲 𑀯𑀺𑀧𑀲𑁆𑀲𑀦𑀸𑀪𑁂𑀲𑀚𑁆𑀚𑀁 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀅𑀭𑁄𑀕𑀁. 𑀏𑀯𑀜𑁆𑀳𑀺 𑀪𑀕𑀯𑀸 𑀘𑀸𑀳, ‘‘𑀤𑁆𑀯𑁂 𑀥𑀫𑁆𑀫𑀸 𑀧𑀭𑀺𑀜𑁆𑀜𑁂𑀬𑁆𑀬𑀸 [𑀧𑀲𑁆𑀲 𑀤𑀻. 𑀦𑀺. 𑁩.𑁩𑁫𑁨] 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀤𑁆𑀯𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸 𑀅𑀯𑀺𑀚𑁆𑀚𑀸 𑀘 𑀪𑀯𑀢𑀡𑁆𑀳𑀸 𑀘, 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘, 𑀤𑁆𑀯𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘𑀸’’𑀢𑀺. 𑀢𑀢𑁆𑀣 𑀲𑀫𑀣𑀁 𑀪𑀸𑀯𑁂𑀦𑁆𑀢𑁄 𑀭𑀽𑀧𑀁 𑀧𑀭𑀺𑀚𑀸𑀦𑀸𑀢𑀺, 𑀭𑀽𑀧𑀁 𑀧𑀭𑀺𑀚𑀸𑀦𑀦𑁆𑀢𑁄 𑀢𑀡𑁆𑀳𑀁 𑀧𑀚𑀳𑀢𑀺, 𑀢𑀡𑁆𑀳𑀁 𑀧𑀚𑀳𑀦𑁆𑀢𑁄 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀦𑀸𑀫𑀁 𑀧𑀭𑀺𑀚𑀸𑀦𑀸𑀢𑀺, 𑀦𑀸𑀫𑀁 𑀧𑀭𑀺𑀚𑀸𑀦𑀦𑁆𑀢𑁄 𑀅𑀯𑀺𑀚𑁆𑀚𑀁 𑀧𑀚𑀳𑀢𑀺, 𑀅𑀯𑀺𑀚𑁆𑀚𑀁 𑀧𑀚𑀳𑀦𑁆𑀢𑁄 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀬𑀤𑀸 𑀪𑀺𑀓𑁆𑀔𑀼𑀦𑁄 𑀤𑁆𑀯𑁂 𑀥𑀫𑁆𑀫𑀸 𑀧𑀭𑀺𑀜𑁆𑀜𑀸𑀢𑀸 𑀪𑀯𑀦𑁆𑀢𑀺 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀢𑀣𑀸𑀲𑁆𑀲 𑀤𑁆𑀯𑁂 𑀥𑀫𑁆𑀫𑀸 𑀧𑀳𑀻𑀦𑀸 𑀪𑀯𑀦𑁆𑀢𑀺 𑀅𑀯𑀺𑀚𑁆𑀚𑀸 𑀘 𑀪𑀯𑀢𑀡𑁆𑀳𑀸 𑀘. 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀺𑀢𑀸 𑀪𑀯𑀦𑁆𑀢𑀺 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘, 𑀤𑁆𑀯𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸 𑀪𑀯𑀦𑁆𑀢𑀺 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘. 𑀏𑀢𑁆𑀢𑀸𑀯𑀢𑀸 𑀪𑀺𑀓𑁆𑀔𑀼 𑀓𑀢𑀓𑀺𑀘𑁆𑀘𑁄 𑀪𑀯𑀢𑀺. 𑀏𑀲𑀸 𑀲𑁄𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀢𑀲𑁆𑀲 𑀆𑀬𑀼𑀧𑀭𑀺𑀬𑀸𑀤𑀸𑀦𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀭𑁄𑀥𑀸 𑀇𑀤𑀜𑁆𑀘 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀺, 𑀅𑀜𑁆𑀜𑀜𑁆𑀘 𑀤𑀼𑀓𑁆𑀔𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀬𑁄 𑀇𑀫𑁂𑀲𑀁 𑀔𑀦𑁆𑀥𑀸𑀦𑀁 𑀥𑀸𑀢𑀼𑀆𑀬𑀢𑀦𑀸𑀦𑀁 𑀦𑀺𑀭𑁄𑀥𑁄 𑀯𑀽𑀧𑀲𑀫𑁄 𑀅𑀜𑁆𑀜𑁂𑀲𑀜𑁆𑀘 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀁 𑀅𑀧𑁆𑀧𑀝𑀺𑀲𑀦𑁆𑀥𑀺 𑀅𑀧𑀸𑀢𑀼𑀪𑀸𑀯𑁄, 𑀅𑀬𑀁 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼.

𑀢𑀢𑁆𑀣 𑀓𑀢𑀫𑀁 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁? 𑀬𑀁𑀥𑀸𑀢𑀼𑀓𑁄 𑀅𑀮𑁄𑀪𑁄 𑀅𑀮𑀼𑀩𑁆𑀪𑀦𑀸 𑀅𑀮𑀼𑀩𑁆𑀪𑀺𑀢𑀢𑁆𑀢𑀁 𑀅𑀦𑀺𑀘𑁆𑀙𑀸 𑀅𑀧𑀢𑁆𑀣𑀦𑀸 𑀅𑀓𑀦𑁆𑀢𑀸 𑀅𑀦𑀚𑁆𑀛𑁄𑀲𑀸𑀦𑀁. 𑀅𑀬𑀁 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁. 𑀓𑀲𑁆𑀲𑁂𑀢𑀁 𑀫𑀽𑀮𑀁? 𑀅𑀮𑁄𑀪𑀚𑀲𑁆𑀲 𑀓𑀼𑀲𑀮𑀲𑁆𑀲 𑀓𑀸𑀬𑀓𑀫𑁆𑀫𑀲𑁆𑀲 𑀯𑀘𑀻𑀓𑀫𑁆𑀫𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀫𑀽𑀮𑀁. 𑀅𑀣 𑀯𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀓𑀼𑀲𑀮𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀢𑀺𑀡𑁆𑀡𑀁 𑀫𑀕𑁆𑀕𑀗𑁆𑀕𑀸𑀦𑀁 𑀫𑀽𑀮𑀁. 𑀓𑀢𑀫𑁂𑀲𑀁 𑀢𑀺𑀡𑁆𑀡𑀁, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀘 𑀇𑀫𑁂𑀲𑀁 𑀫𑀽𑀮𑀦𑁆𑀢𑀺, 𑀢𑀲𑁆𑀫𑀸 𑀓𑀼𑀲𑀮𑀫𑀽𑀮𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀓𑀢𑀫𑀁 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁? 𑀬𑀸 𑀲𑀢𑁆𑀢𑁂𑀲𑀼 𑀯𑀸 𑀲𑀗𑁆𑀔𑀸𑀭𑁂𑀲𑀼 𑀯𑀸 𑀅𑀦𑀖𑀸𑀢𑁄 𑀅𑀧𑁆𑀧𑀝𑀺𑀖𑀸𑀢𑁄 𑀅𑀩𑁆𑀬𑀸𑀧𑀢𑁆𑀢𑀺 𑀅𑀩𑁆𑀬𑀸𑀧𑀸𑀤𑁄 𑀅𑀤𑁄𑀲𑁄 𑀫𑁂𑀢𑁆𑀢𑀸 𑀫𑁂𑀢𑁆𑀢𑀸𑀬𑀦𑀸 𑀅𑀢𑁆𑀣𑀓𑀸𑀫𑀢𑀸 𑀳𑀺𑀢𑀓𑀸𑀫𑀢𑀸 𑀘𑁂𑀢𑀲𑁄 𑀧𑀲𑀸𑀤𑁄, 𑀅𑀬𑀁 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁. 𑀓𑀲𑁆𑀲𑁂𑀢𑀁 𑀫𑀽𑀮𑀁? 𑀅𑀤𑁄𑀲𑀚𑀲𑁆𑀲 𑀓𑀼𑀲𑀮𑀲𑁆𑀲 𑀓𑀸𑀬𑀓𑀫𑁆𑀫𑀲𑁆𑀲 𑀯𑀘𑀻𑀓𑀫𑁆𑀫𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀫𑀽𑀮𑀁. 𑀅𑀣 𑀯𑀸 𑀢𑀺𑀡𑁆𑀡𑀁 𑀫𑀕𑁆𑀕𑀗𑁆𑀕𑀸𑀦𑀁 𑀫𑀽𑀮𑀁. 𑀓𑀢𑀫𑁂𑀲𑀁 𑀢𑀺𑀡𑁆𑀡𑀁? 𑀲𑀫𑁆𑀫𑀸𑀯𑀸𑀘𑀸𑀬 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀲𑀫𑁆𑀫𑀸𑀆𑀚𑀻𑀯𑀲𑁆𑀲 𑀘 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀫𑀕𑁆𑀕𑀗𑁆𑀕𑀸𑀦𑀁 𑀫𑀽𑀮𑀁, 𑀢𑀲𑁆𑀫𑀸 𑀓𑀼𑀲𑀮𑀫𑀽𑀮𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀓𑀢𑀫𑀁 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁? 𑀬𑀁 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀬𑀣𑀸𑀪𑀽𑀢𑀁 𑀜𑀸𑀡𑀤𑀲𑁆𑀲𑀦𑀁 𑀅𑀪𑀺𑀲𑀫𑀬𑁄 𑀲𑀫𑁆𑀫𑀸 𑀘 𑀧𑀘𑁆𑀘𑀸𑀕𑀫𑁄 𑀧𑀝𑀺𑀯𑁂𑀥𑁄 𑀅𑀫𑁄𑀳𑁄 𑀅𑀲𑀫𑁆𑀫𑀼𑀬𑁆𑀳𑀦𑀸 𑀅𑀲𑀫𑁆𑀫𑁄𑀳𑁄 𑀯𑀺𑀚𑁆𑀚𑀸𑀧𑀓𑀸𑀲𑁄 𑀆𑀮𑁄𑀓𑁄 𑀅𑀦𑀸𑀯𑀭𑀡𑀁 𑀲𑁂𑀓𑁆𑀔𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁, 𑀅𑀬𑀁 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁. 𑀓𑀲𑁆𑀲𑁂𑀢𑀁 𑀫𑀽𑀮𑀁? 𑀅𑀫𑁄𑀳𑀚𑀲𑁆𑀲 𑀓𑀼𑀲𑀮𑀲𑁆𑀲 𑀓𑀸𑀬𑀓𑀫𑁆𑀫𑀲𑁆𑀲 𑀯𑀘𑀻𑀓𑀫𑁆𑀫𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀫𑀽𑀮𑀁. 𑀅𑀣 𑀯𑀸 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀗𑁆𑀕𑀸𑀦𑀁 𑀏𑀢𑀁 𑀫𑀽𑀮𑀁. 𑀓𑀢𑀫𑁂𑀲𑀁 𑀤𑁆𑀯𑀺𑀦𑁆𑀦𑀁? 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘 𑀲𑀫𑁆𑀫𑀸𑀲𑀢𑀺𑀬𑀸 𑀘 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀗𑁆𑀕𑀸𑀦𑀁 𑀫𑀽𑀮𑀁, 𑀢𑀲𑁆𑀫𑀸 𑀓𑀼𑀲𑀮𑀫𑀽𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀇𑀫𑁂𑀲𑀁 𑀢𑀻𑀳𑀺 𑀓𑀼𑀲𑀮𑀫𑀽𑀮𑁂𑀳𑀺 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀬𑁄𑀚𑁂𑀢𑀩𑁆𑀩𑁄.

𑁬𑁬. 𑀢𑀢𑁆𑀣 𑀓𑀢𑀫𑀸 𑀅𑀦𑀺𑀘𑁆𑀘𑀲𑀜𑁆𑀜𑀸? ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄’’𑀢𑀺 𑀘 𑀬𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀯𑀯𑀢𑁆𑀣𑀧𑀦𑀸 𑀉𑀕𑁆𑀕𑀸𑀳𑁄, 𑀅𑀬𑀁 𑀅𑀦𑀺𑀘𑁆𑀘𑀲𑀜𑁆𑀜𑀸. 𑀢𑀲𑁆𑀲𑀸 𑀓𑁄 𑀦𑀺𑀲𑁆𑀲𑀦𑁆𑀤𑁄? 𑀅𑀦𑀺𑀘𑁆𑀘𑀲𑀜𑁆𑀜𑀸𑀬 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀅𑀝𑁆𑀞𑀲𑀼 𑀮𑁄𑀓𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀦𑀸𑀦𑀼𑀲𑀦𑁆𑀥𑀢𑀺 𑀦 𑀲𑀦𑁆𑀥𑀢𑀺 𑀦 𑀲𑀡𑁆𑀞𑀳𑀢𑀺, 𑀉𑀧𑁂𑀓𑁆𑀔𑀸 𑀯𑀸 𑀧𑀝𑀺𑀓𑁆𑀓𑀽𑀮𑀢𑀸 𑀯𑀸 𑀲𑀡𑁆𑀞𑀳𑀢𑀺, 𑀅𑀬𑀫𑀲𑁆𑀲𑀸 𑀦𑀺𑀲𑁆𑀲𑀦𑁆𑀤𑁄.

𑀢𑀢𑁆𑀣 𑀓𑀢𑀫𑀸 𑀤𑀼𑀓𑁆𑀔𑀲𑀜𑁆𑀜𑀸? ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀬𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀯𑀯𑀢𑁆𑀣𑀧𑀦𑀸 𑀉𑀕𑁆𑀕𑀸𑀳𑁄, 𑀅𑀬𑀁 𑀤𑀼𑀓𑁆𑀔𑀲𑀜𑁆𑀜𑀸. 𑀢𑀲𑁆𑀲𑀸 𑀓𑁄 𑀦𑀺𑀲𑁆𑀲𑀦𑁆𑀤𑁄? 𑀤𑀼𑀓𑁆𑀔𑀲𑀜𑁆𑀜𑀸𑀬 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀆𑀮𑀲𑁆𑀲𑁂 𑀲𑀁𑀧𑀫𑀸𑀤𑁂 𑀯𑀺𑀫𑁆𑀳𑀬𑁂 𑀘 𑀘𑀺𑀢𑁆𑀢𑀁 𑀦𑀸𑀦𑀼𑀲𑀦𑁆𑀥𑀢𑀺 𑀦 𑀲𑀦𑁆𑀥𑀢𑀺 𑀦 𑀲𑀡𑁆𑀞𑀳𑀢𑀺, 𑀉𑀧𑁂𑀓𑁆𑀔𑀸 𑀯𑀸 𑀧𑀝𑀺𑀓𑁆𑀓𑀽𑀮𑀢𑀸 𑀯𑀸 𑀲𑀡𑁆𑀞𑀳𑀢𑀺, 𑀅𑀬𑀫𑀲𑁆𑀲𑀸 𑀦𑀺𑀲𑁆𑀲𑀦𑁆𑀤𑁄.

𑀢𑀢𑁆𑀣 𑀓𑀢𑀫𑀸 𑀅𑀦𑀢𑁆𑀢𑀲𑀜𑁆𑀜𑀸? ‘‘𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀢𑁆𑀢𑀸’’𑀢𑀺 𑀬𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀯𑀯𑀢𑁆𑀣𑀧𑀦𑀸 𑀉𑀕𑁆𑀕𑀸𑀳𑁄, 𑀅𑀬𑀁 𑀅𑀦𑀢𑁆𑀢𑀲𑀜𑁆𑀜𑀸. 𑀢𑀲𑁆𑀲𑀸 𑀓𑁄 𑀦𑀺𑀲𑁆𑀲𑀦𑁆𑀤𑁄, 𑀅𑀦𑀢𑁆𑀢𑀲𑀜𑁆𑀜𑀸𑀬 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀅𑀳𑀗𑁆𑀓𑀸𑀭𑁄 𑀘𑀺𑀢𑁆𑀢𑀁 𑀦𑀸𑀦𑀼𑀲𑀦𑁆𑀥𑀢𑀺 𑀦 𑀲𑀦𑁆𑀥𑀢𑀺, 𑀫𑀫𑀗𑁆𑀓𑀸𑀭𑁄 𑀦 𑀲𑀡𑁆𑀞𑀳𑀢𑀺, 𑀉𑀧𑁂𑀓𑁆𑀔𑀸 𑀯𑀸 𑀧𑀝𑀺𑀓𑁆𑀓𑀽𑀮𑀢𑀸 𑀯𑀸 𑀲𑀡𑁆𑀞𑀳𑀢𑀺, 𑀅𑀬𑀫𑀲𑁆𑀲𑀸 𑀦𑀺𑀲𑁆𑀲𑀦𑁆𑀤𑁄.

𑀢𑀢𑁆𑀣 𑀓𑀢𑀫𑀸 𑀅𑀲𑀼𑀪𑀲𑀜𑁆𑀜𑀸? ‘‘𑀲𑀢𑁆𑀢 𑀲𑀗𑁆𑀔𑀸𑀭𑀸 𑀅𑀲𑀼𑀪𑀸’’𑀢𑀺 𑀬𑀸 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀸 𑀯𑀯𑀢𑁆𑀣𑀧𑀦𑀸 𑀉𑀕𑁆𑀕𑀸𑀳𑁄, 𑀅𑀬𑀁 𑀅𑀲𑀼𑀪𑀲𑀜𑁆𑀜𑀸. 𑀢𑀲𑁆𑀲𑀸 𑀓𑁄 𑀦𑀺𑀲𑁆𑀲𑀦𑁆𑀤𑁄? 𑀅𑀲𑀼𑀪𑀲𑀜𑁆𑀜𑀸𑀬 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀲𑀼𑀪𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀦𑀸𑀦𑀼𑀲𑀦𑁆𑀥𑀢𑀺 𑀦 𑀲𑀦𑁆𑀥𑀢𑀺 𑀦 𑀲𑀡𑁆𑀞𑀳𑀢𑀺, 𑀉𑀧𑁂𑀓𑁆𑀔𑀸 𑀯𑀸 𑀧𑀝𑀺𑀓𑁆𑀓𑀽𑀮𑀢𑀸 𑀯𑀸 𑀲𑀡𑁆𑀞𑀳𑀢𑀺, 𑀅𑀬𑀫𑀲𑁆𑀲𑀸 𑀦𑀺𑀲𑁆𑀲𑀦𑁆𑀤𑁄.

𑀢𑀢𑁆𑀣 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀧𑀭𑀺𑀜𑁆𑀜𑀸 𑀪𑀕𑀯𑀢𑀸 𑀤𑁂𑀲𑀺𑀢𑀸, 𑀬𑁄 𑀢𑀢𑁆𑀣 𑀅𑀲𑀼𑀪𑀲𑀜𑁆𑀜𑀸 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀧𑀭𑀺𑀜𑁆𑀜𑀢𑁆𑀢𑀁, 𑀤𑀼𑀓𑁆𑀔𑀲𑀜𑁆𑀜𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀧𑀭𑀺𑀜𑁆𑀜𑀢𑁆𑀢𑀁, 𑀅𑀦𑀢𑁆𑀢𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀧𑀭𑀺𑀜𑁆𑀜𑀢𑁆𑀢𑀁, 𑀅𑀦𑀺𑀘𑁆𑀘𑀲𑀜𑁆𑀜𑀸 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀧𑀭𑀺𑀜𑁆𑀜𑀢𑁆𑀢𑀁. 𑀢𑀢𑁆𑀣 𑀲𑀫𑀣𑁂𑀦 𑀢𑀡𑁆𑀳𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀯𑀺𑀧𑀲𑁆𑀲𑀦𑀸 𑀅𑀯𑀺𑀚𑁆𑀚𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀅𑀤𑁄𑀲𑁂𑀦 𑀤𑁄𑀲𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀅𑀫𑁄𑀳𑁂𑀦 𑀫𑁄𑀳𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀅𑀦𑀺𑀘𑁆𑀘𑀲𑀜𑁆𑀜𑀸𑀬 𑀦𑀺𑀘𑁆𑀘𑀲𑀜𑁆𑀜𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀤𑀼𑀓𑁆𑀔𑀲𑀜𑁆𑀜𑀸𑀬 𑀲𑀼𑀔𑀲𑀜𑁆𑀜𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀅𑀦𑀢𑁆𑀢𑀲𑀜𑁆𑀜𑀸𑀬 𑀅𑀢𑁆𑀢𑀲𑀜𑁆𑀜𑀁 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀅𑀲𑀼𑀪𑀲𑀜𑁆𑀜𑀸𑀬 𑀲𑀼𑀪𑀲𑀜𑁆𑀜𑀁 𑀲𑀫𑀼𑀕𑁆𑀖𑀸𑀢𑁂𑀢𑀺.

𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀧𑀝𑀺𑀲𑀁𑀳𑀭𑀡𑀮𑀓𑁆𑀔𑀡𑁄 𑀲𑀫𑀣𑁄, 𑀢𑀲𑁆𑀲 𑀛𑀸𑀦𑀸𑀦𑀺 𑀧𑀤𑀝𑁆𑀞𑀸𑀦𑀁. 𑀲𑀩𑁆𑀩𑀥𑀫𑁆𑀫𑀁 𑀬𑀣𑀸𑀪𑀽𑀢𑀁 𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀯𑀺𑀧𑀲𑁆𑀲𑀦𑀸, 𑀢𑀲𑁆𑀲𑀸 𑀲𑀩𑁆𑀩𑀦𑁂𑀬𑁆𑀬𑀁 𑀧𑀤𑀝𑁆𑀞𑀸𑀦𑀁. 𑀇𑀘𑁆𑀙𑀸𑀧𑀝𑀺𑀲𑀁𑀳𑀭𑀡𑀮𑀓𑁆𑀔𑀡𑁄 𑀅𑀮𑁄𑀪𑁄, 𑀢𑀲𑁆𑀲 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻 𑀧𑀤𑀝𑁆𑀞𑀸𑀦𑀁. 𑀅𑀩𑁆𑀬𑀸𑀧𑀸𑀤𑀮𑀓𑁆𑀔𑀡𑁄 𑀅𑀤𑁄𑀲𑁄, 𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀧𑀤𑀝𑁆𑀞𑀸𑀦𑀁. 𑀯𑀢𑁆𑀣𑀼𑀅𑀧𑁆𑀧𑀝𑀺𑀳𑀢𑀮𑀓𑁆𑀔𑀡𑁄 𑀅𑀫𑁄𑀳𑁄, 𑀢𑀲𑁆𑀲 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀧𑀤𑀝𑁆𑀞𑀸𑀦𑀁. 𑀲𑀗𑁆𑀔𑀢𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀦𑀸𑀲𑀕𑁆𑀕𑀳𑀡𑀮𑀓𑁆𑀔𑀡𑀸 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀢𑀲𑁆𑀲𑀸 𑀉𑀤𑀬𑀩𑁆𑀩𑀬𑁄 𑀧𑀤𑀝𑁆𑀞𑀸𑀦𑀁. 𑀲𑀸𑀲𑀯𑀨𑀲𑁆𑀲𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸 𑀤𑀼𑀓𑁆𑀔𑀲𑀜𑁆𑀜𑀸, 𑀢𑀲𑁆𑀲𑀸 𑀯𑁂𑀤𑀦𑀸 𑀧𑀤𑀝𑁆𑀞𑀸𑀦𑀁. 𑀲𑀩𑁆𑀩𑀥𑀫𑁆𑀫𑀅𑀦𑀼𑀧𑀕𑀫𑀦𑀮𑀓𑁆𑀔𑀡𑀸 𑀅𑀦𑀢𑁆𑀢𑀲𑀜𑁆𑀜𑀸, 𑀢𑀲𑁆𑀲𑀸 𑀥𑀫𑁆𑀫𑀲𑀜𑁆𑀜𑀸 𑀧𑀤𑀝𑁆𑀞𑀸𑀦𑀁. 𑀯𑀺𑀦𑀻𑀮𑀓𑀯𑀺𑀧𑀼𑀩𑁆𑀩𑀓𑀉𑀤𑁆𑀥𑀼𑀫𑀸𑀢𑀓𑀲𑀫𑀼𑀕𑁆𑀕𑀳𑀡𑀮𑀓𑁆𑀔𑀡𑀸 𑀅𑀲𑀼𑀪𑀲𑀜𑁆𑀜𑀸, 𑀢𑀲𑁆𑀲𑀸 𑀦𑀺𑀩𑁆𑀩𑀺𑀤𑀸 𑀧𑀤𑀝𑁆𑀞𑀸𑀦𑀁. 𑀇𑀫𑁂𑀲𑀼 𑀦𑀯𑀲𑀼 𑀧𑀤𑁂𑀲𑀼 𑀉𑀧𑀤𑀺𑀝𑁆𑀞𑁂𑀲𑀼 𑀲𑀩𑁆𑀩𑁄 𑀓𑀼𑀲𑀮𑀧𑀓𑁆𑀔𑁄 𑀉𑀧𑀤𑀺𑀝𑁆𑀞𑁄 𑀪𑀯𑀢𑀺, 𑀲𑁄 𑀘 𑀩𑀳𑀼𑀲𑁆𑀲𑀼𑀢𑁂𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁 𑀦𑁄 𑀅𑀧𑁆𑀧𑀲𑁆𑀲𑀼𑀢𑁂𑀦, 𑀧𑀜𑁆𑀜𑀯𑀢𑀸 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦, 𑀬𑀼𑀢𑁆𑀢𑁂𑀦 𑀦𑁄 𑀅𑀬𑀼𑀢𑁆𑀢𑁂𑀦𑀸𑀢𑀺.

𑁬𑁭. 𑀢𑀢𑁆𑀣 𑀦𑀺𑀘𑁆𑀘𑀲𑀜𑁆𑀜𑀸𑀥𑀺𑀫𑀼𑀢𑁆𑀢𑀲𑁆𑀲 𑀅𑀧𑀭𑀸𑀧𑀭𑀁 𑀘𑀺𑀢𑁆𑀢𑀁 𑀧𑀡𑀸𑀫𑁂𑀦𑁆𑀢𑁄 𑀲𑀢𑀺𑀫𑀧𑀘𑁆𑀘𑀯𑁂𑀓𑁆𑀔𑀢𑁄 𑀅𑀦𑀺𑀘𑁆𑀘𑀲𑀜𑁆𑀜𑀸 𑀦 𑀉𑀧𑀝𑁆𑀞𑀸𑀢𑀺, 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀲𑀼𑀔𑀲𑁆𑀲𑀸𑀤𑀸𑀥𑀺𑀫𑀼𑀢𑁆𑀢𑀲𑁆𑀲 𑀇𑀭𑀺𑀬𑀸𑀧𑀣𑀲𑁆𑀲 𑀅𑀕𑀢𑀺𑀫𑀧𑀘𑁆𑀘𑀯𑁂𑀓𑁆𑀔𑀢𑁄 𑀤𑀼𑀓𑁆𑀔𑀲𑀜𑁆𑀜𑀸 𑀦 𑀉𑀧𑀝𑁆𑀞𑀸𑀢𑀺, 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑁂𑀲𑀼 𑀅𑀢𑁆𑀢𑀸𑀥𑀺𑀫𑀼𑀢𑁆𑀢𑀲𑁆𑀲 𑀦𑀸𑀦𑀸𑀥𑀸𑀢𑀼𑀅𑀦𑁂𑀓𑀥𑀸𑀢𑀼𑀯𑀺𑀦𑀺𑀩𑁆𑀪𑁄𑀕𑀫𑀧𑀘𑁆𑀘𑀯𑁂𑀓𑁆𑀔𑀢𑁄 𑀅𑀦𑀢𑁆𑀢𑀲𑀜𑁆𑀜𑀸 𑀦 𑀉𑀧𑀝𑁆𑀞𑀸𑀢𑀺, 𑀯𑀡𑁆𑀡𑀲𑀡𑁆𑀞𑀸𑀦𑀸𑀪𑀺𑀭𑀢𑀲𑁆𑀲 𑀓𑀸𑀬𑁂 𑀲𑀼𑀪𑀸𑀥𑀺𑀫𑀼𑀢𑁆𑀢𑀲𑁆𑀲 𑀘 𑀯𑀺𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀅𑀲𑀼𑀪𑀲𑀜𑁆𑀜𑀸 𑀦 𑀉𑀧𑀝𑁆𑀞𑀸𑀢𑀺.

𑀅𑀯𑀺𑀧𑁆𑀧𑀝𑀺𑀲𑀸𑀭𑀮𑀓𑁆𑀔𑀡𑀸 𑀲𑀤𑁆𑀥𑀸, 𑀲𑀤𑁆𑀤𑀳𑀦𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀧𑀤𑀝𑁆𑀞𑀸𑀦𑀁. 𑀏𑀯𑀜𑁆𑀳𑀺 𑀯𑀼𑀢𑁆𑀢𑀁 𑀪𑀕𑀯𑀢𑀸 [𑀧𑀲𑁆𑀲 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂] 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀪𑀺𑀓𑁆𑀔𑀯𑁂, 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀁, 𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀼 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑀲𑀽𑀭𑀸𑀅𑀧𑀝𑀺𑀓𑁆𑀔𑁂𑀧𑀦𑀮𑀓𑁆𑀔𑀡𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀪𑁄 𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀢𑀲𑁆𑀲 𑀅𑀢𑀻𑀢𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀧𑀤𑀝𑁆𑀞𑀸𑀦𑀁. 𑀬𑀣𑀸 𑀯𑀼𑀢𑁆𑀢𑀁 𑀪𑀕𑀯𑀢𑀸 [𑀧𑀲𑁆𑀲 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂] 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀁, 𑀘𑀢𑀽𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼.

𑀲𑀢𑀺 𑀲𑀭𑀡𑀮𑀓𑁆𑀔𑀡𑀸, 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀢𑀲𑁆𑀲 𑀅𑀢𑀻𑀢𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀧𑀤𑀝𑁆𑀞𑀸𑀦𑀁. 𑀬𑀣𑀸 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀲𑀢𑀺𑀦𑁆𑀤𑁆𑀭𑀺𑀬𑀁 𑀪𑀺𑀓𑁆𑀔𑀯𑁂, 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀁, 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼.

𑀏𑀓𑀕𑁆𑀕𑀮𑀓𑁆𑀔𑀡𑁄 𑀲𑀫𑀸𑀥𑀺, 𑀅𑀯𑀺𑀓𑁆𑀔𑁂𑀧𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀜𑀸𑀡𑀸𑀦𑀺 𑀧𑀤𑀝𑁆𑀞𑀸𑀦𑀁. 𑀬𑀣𑀸 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀁, 𑀘𑀢𑀽𑀲𑀼 𑀛𑀸𑀦𑁂𑀲𑀼.

𑀧𑀚𑀸𑀦𑀦𑀮𑀓𑁆𑀔𑀡𑀸 𑀧𑀜𑁆𑀜𑀸, 𑀪𑀽𑀢𑀢𑁆𑀣𑀲𑀦𑁆𑀢𑀻𑀭𑀡𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀤𑀝𑁆𑀞𑀸𑀦𑀁. 𑀬𑀣𑀸 𑀯𑀼𑀢𑁆𑀢𑀁 𑀪𑀕𑀯𑀢𑀸 [𑀧𑀲𑁆𑀲 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂] 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀓𑀼𑀳𑀺𑀁 𑀤𑀝𑁆𑀞𑀩𑁆𑀩𑀁, 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼.

𑀘𑀢𑁆𑀢𑀸𑀭𑀺 𑀘𑀓𑁆𑀓𑀸𑀦𑀺 [𑀧𑀲𑁆𑀲 𑀅. 𑀦𑀺. 𑁪.𑁩𑁧] 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀘𑀓𑁆𑀓𑀁, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀘𑀓𑁆𑀓𑀁, 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀁 𑀘𑀓𑁆𑀓𑀁, 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀢𑀸 𑀘𑀓𑁆𑀓𑀁. 𑀢𑀢𑁆𑀣 𑀅𑀭𑀺𑀬𑀲𑀦𑁆𑀦𑀺𑀲𑁆𑀲𑀬𑀮𑀓𑁆𑀔𑀡𑁄 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄, 𑀲𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀭𑀺𑀬𑀲𑀦𑁆𑀦𑀺𑀲𑁆𑀲𑀬𑀮𑀓𑁆𑀔𑀡𑁄 𑀲𑀧𑁆𑀧𑀼𑀭𑀺𑀲𑁆𑀲𑀽𑀧𑀦𑀺𑀲𑁆𑀲𑀬𑁄, 𑀲𑁄 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀮𑀓𑁆𑀔𑀡𑀁 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀁, 𑀢𑀁 𑀧𑀼𑀜𑁆𑀜𑀸𑀦𑀁 𑀧𑀤𑀝𑁆𑀞𑀸𑀦𑀁. 𑀓𑀼𑀲𑀮𑀥𑀫𑁆𑀫𑁄𑀧𑀘𑀬𑀮𑀓𑁆𑀔𑀡𑀁 𑀧𑀼𑀜𑁆𑀜𑀁, 𑀢𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀧𑀤𑀝𑁆𑀞𑀸𑀦𑀁.

𑀏𑀓𑀸𑀤𑀲𑀲𑀻𑀮𑀫𑀽𑀮𑀓𑀸 𑀥𑀫𑁆𑀫𑀸 𑀲𑀻𑀮𑀯𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀪𑀯𑀢𑀺…𑀧𑁂… 𑀲𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 ‘‘𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀧𑀚𑀸𑀦𑀦𑀸. 𑀢𑀢𑁆𑀣 𑀯𑁂𑀭𑀫𑀡𑀺𑀮𑀓𑁆𑀔𑀡𑀁 𑀲𑀻𑀮𑀁, 𑀢𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀦 𑀅𑀢𑁆𑀢𑀸𑀦𑀼𑀯𑀸𑀤𑀮𑀓𑁆𑀔𑀡𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, 𑀲𑁄 𑀧𑀸𑀫𑁄𑀚𑁆𑀚𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀪𑀺𑀧𑁆𑀧𑀫𑁄𑀤𑀦𑀮𑀓𑁆𑀔𑀡𑀁 𑀧𑀸𑀫𑁄𑀚𑁆𑀚𑀁, 𑀢𑀁 𑀧𑀻𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀅𑀢𑁆𑀢𑀫𑀦𑀮𑀓𑁆𑀔𑀡𑀸 𑀧𑀻𑀢𑀺, 𑀲𑀸 𑀧𑀲𑁆𑀲𑀤𑁆𑀥𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀓𑀫𑁆𑀫𑀦𑀺𑀬𑀮𑀓𑁆𑀔𑀡𑀸 𑀧𑀲𑁆𑀲𑀤𑁆𑀥𑀺, 𑀲𑀸 𑀲𑀼𑀔𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀩𑁆𑀬𑀸𑀧𑀸𑀤𑀮𑀓𑁆𑀔𑀡𑀁 𑀲𑀼𑀔𑀁, 𑀢𑀁 𑀲𑀫𑀸𑀥𑀺𑀦𑁄 𑀧𑀤𑀝𑁆𑀞𑀸𑀦𑀁. 𑀅𑀯𑀺𑀓𑁆𑀔𑁂𑀧𑀦𑀮𑀓𑁆𑀔𑀡𑁄 𑀲𑀫𑀸𑀥𑀺, 𑀲𑁄 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀯𑀺𑀧𑀭𑀻𑀢𑀲𑀦𑁆𑀢𑀻𑀭𑀡𑀮𑀓𑁆𑀔𑀡𑀸 𑀧𑀜𑁆𑀜𑀸, 𑀲𑀸 𑀦𑀺𑀩𑁆𑀩𑀺𑀤𑀸𑀬 𑀧𑀤𑀝𑁆𑀞𑀸𑀦𑀁 𑀅𑀦𑀸𑀮𑀬𑀦𑀮𑀓𑁆𑀔𑀡𑀸 𑀦𑀺𑀩𑁆𑀩𑀺𑀤𑀸, 𑀲𑀸 𑀯𑀺𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀲𑀁𑀓𑀺𑀮𑁂𑀲𑀮𑀓𑁆𑀔𑀡𑁄 𑀯𑀺𑀭𑀸𑀕𑁄, 𑀲𑁄 𑀯𑀺𑀫𑀼𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀅𑀓𑀼𑀲𑀮𑀥𑀫𑁆𑀫𑀯𑀺𑀯𑁂𑀓𑀮𑀓𑁆𑀔𑀡𑀸 𑀯𑀺𑀫𑀼𑀢𑁆𑀢𑀺, 𑀲𑀸 𑀯𑀺𑀫𑀼𑀢𑁆𑀢𑀺𑀦𑁄 𑀯𑁄𑀤𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁.

𑁬𑁮. 𑀘𑀢𑀲𑁆𑀲𑁄 𑀅𑀭𑀺𑀬𑀪𑀽𑀫𑀺𑀬𑁄 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺. 𑀢𑀢𑁆𑀣 𑀬𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀏𑀲𑀸 𑀤𑀲𑁆𑀲𑀦𑀪𑀽𑀫𑀺. 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘 𑀲𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀺𑀢𑁆𑀯𑀸 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀇𑀤𑀁 𑀢𑀦𑀼𑀓𑀸𑀫𑀭𑀸𑀕𑀲𑁆𑀲 𑀧𑀤𑀝𑁆𑀞𑀸𑀦𑀁 𑀩𑁆𑀬𑀸𑀧𑀸𑀤𑀸𑀦𑀁. 𑀲𑀓𑀤𑀸𑀕𑀸𑀫𑀺𑀨𑀮𑀜𑁆𑀘 𑀲𑀡𑁆𑀳𑀁 𑀯𑀺𑀭𑀚𑁆𑀚𑀢𑀺, 𑀅𑀬𑀁 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀅𑀦𑀸𑀕𑀸𑀫𑀺𑀨𑀮𑀜𑁆𑀘 𑀬𑀁 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺, 𑀅𑀬𑀁 𑀓𑀢𑀸𑀪𑀽𑀫𑀺. 𑀅𑀭𑀳𑀢𑁆𑀢𑀜𑁆𑀘 𑀲𑀸𑀫𑀜𑁆𑀜𑀨𑀮𑀸𑀦𑀻𑀢𑀺 𑀓𑁄 𑀯𑀘𑀦𑀢𑁆𑀣𑁄, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀸𑀫𑀜𑁆𑀜𑀁, 𑀢𑀲𑁆𑀲𑁂𑀢𑀸𑀦𑀺 𑀨𑀮𑀸𑀦𑀺 𑀲𑀸𑀫𑀜𑁆𑀜𑀨𑀮𑀸𑀦𑀻𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀲𑁆𑀲 𑀩𑁆𑀭𑀳𑁆𑀫𑀜𑁆𑀜𑀨𑀮𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑁂? 𑀩𑁆𑀭𑀳𑁆𑀫𑀜𑁆𑀜𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀢𑀲𑁆𑀲 𑀢𑀸𑀦𑀺 𑀨𑀮𑀸𑀦𑀻𑀢𑀺 𑀩𑁆𑀭𑀳𑁆𑀫𑀜𑁆𑀜𑀨𑀮𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑁂.

𑀢𑀢𑁆𑀣 𑀲𑁄𑀢𑀸𑀧𑀦𑁆𑀦𑁄 𑀓𑀣𑀁 𑀳𑁄𑀢𑀺? 𑀲𑀳 𑀲𑀘𑁆𑀘𑀸𑀪𑀺𑀲𑀫𑀬𑀸 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀘, 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸 𑀧𑀭𑀺𑀓𑁆𑀔𑀬𑀸 𑀅𑀭𑀺𑀬𑀲𑀸𑀯𑀓𑁄 𑀳𑁄𑀢𑀺 𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀬𑀸𑀯 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺.

𑀢𑀢𑁆𑀣 𑀓𑀢𑀫𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺? 𑀅𑀲𑁆𑀲𑀼𑀢𑀯𑀸 𑀩𑀸𑀮𑁄 𑀧𑀼𑀣𑀼𑀚𑁆𑀚𑀦𑁄 𑀬𑀸𑀯 𑀅𑀭𑀺𑀬𑀥𑀫𑁆𑀫𑁂 𑀅𑀓𑁄𑀯𑀺𑀤𑁄, 𑀲𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀬𑀸𑀯 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀅𑀢𑁆𑀢𑀸𑀦𑀁, 𑀲𑁄 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀢𑁆𑀢𑀕𑁆𑀕𑀸𑀳𑁄 𑀯𑀸 𑀅𑀢𑁆𑀢𑀦𑀺𑀬𑀕𑁆𑀕𑀸𑀳𑁄 𑀯𑀸 𑀏𑀲𑁄𑀳𑀫𑀲𑁆𑀫𑀺 𑀏𑀓𑀲𑁆𑀫𑀺𑀁 𑀯𑀲𑀯𑀢𑁆𑀢𑀺𑀓𑁄 [𑀅𑀯𑀢𑁆𑀢𑀺𑀢𑁄 (𑀧𑀻. 𑀓.)] 𑀧𑀓𑁆𑀔𑀺𑀢𑁆𑀢𑁄 𑀅𑀦𑀼𑀕𑁆𑀕𑀳𑁄 𑀅𑀦𑀼𑀲𑀬𑀦𑁆𑀢𑁄 𑀅𑀗𑁆𑀕𑀫𑀗𑁆𑀕𑀦𑁆𑀢𑀺 𑀧𑀭𑀢𑀺. 𑀬𑀸 𑀢𑀣𑀸𑀪𑀽𑀢𑀲𑁆𑀲 𑀔𑀦𑁆𑀢𑀺 𑀭𑀼𑀘𑀺 𑀧𑁂𑀓𑁆𑀔𑀦𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁄 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀬𑀦𑀸 𑀅𑀪𑀺𑀧𑁆𑀧𑀲𑀦𑁆𑀦𑀸, 𑀅𑀬𑀁 𑀯𑀼𑀘𑁆𑀘𑀢𑁂 𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀢𑀺.

𑀢𑀢𑁆𑀣 𑀧𑀜𑁆𑀘 𑀤𑀺𑀝𑁆𑀞𑀺𑀬𑁄 𑀉𑀘𑁆𑀙𑁂𑀤𑀁 𑀪𑀚𑀦𑁆𑀢𑀺. 𑀓𑀢𑀫𑀸𑀬𑁄 𑀧𑀜𑁆𑀘? 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀸𑀯 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀇𑀫𑀸𑀬𑁄 𑀧𑀜𑁆𑀘 𑀉𑀘𑁆𑀙𑁂𑀤𑀁 𑀪𑀚𑀦𑁆𑀢𑀺, 𑀅𑀯𑀲𑁂𑀲𑀸𑀬𑁄 𑀧𑀦𑁆𑀦𑀭𑀲 𑀲𑀲𑁆𑀲𑀢𑀁 𑀪𑀚𑀦𑁆𑀢𑀺. 𑀇𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑀳𑀸𑀦𑀸 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀳𑀻𑀬𑀦𑁆𑀢𑀺. 𑀧𑀳𑀸𑀦𑀸 𑀉𑀘𑁆𑀙𑁂𑀤𑀁 𑀲𑀲𑁆𑀲𑀢𑀜𑁆𑀘 𑀦 𑀪𑀚𑀢𑀺. 𑀇𑀢𑀺 𑀉𑀘𑁆𑀙𑁂𑀤𑀲𑀲𑁆𑀲𑀢𑀧𑁆𑀧𑀳𑀸𑀦𑀸 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦 𑀓𑀺𑀜𑁆𑀘𑀺 𑀤𑀺𑀝𑁆𑀞𑀺𑀕𑀢𑀁 𑀪𑀯𑀢𑀺, 𑀅𑀜𑁆𑀜𑀸 𑀯𑀸 𑀮𑁄𑀓𑀼𑀢𑁆𑀢𑀭𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸. 𑀓𑀣𑀁 𑀧𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀦 𑀪𑀯𑀢𑀺? 𑀇𑀥 𑀅𑀭𑀺𑀬𑀲𑀸𑀯𑀓𑁄 𑀲𑀼𑀢𑀯𑀸 𑀳𑁄𑀢𑀺, 𑀲𑀩𑁆𑀩𑁄 𑀲𑀼𑀓𑁆𑀓𑀧𑀓𑁆𑀔𑁄 𑀓𑀸𑀢𑀩𑁆𑀩𑁄, 𑀬𑀸𑀯 𑀅𑀭𑀺𑀬𑀥𑀫𑁆𑀫𑁂𑀲𑀼 𑀓𑁄𑀯𑀺𑀤𑁄 𑀭𑀽𑀧𑀁 𑀅𑀦𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀸𑀯 𑀯𑀺𑀜𑁆𑀜𑀸𑀡𑀁…𑀧𑁂… 𑀏𑀯𑀫𑀲𑁆𑀲 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀦 𑀪𑀯𑀢𑀺.

𑀓𑀣𑀁 𑀯𑀺𑀘𑀺𑀓𑀺𑀘𑁆𑀙𑀸 𑀦 𑀪𑀯𑀢𑀺? 𑀇𑀥 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀦 𑀓𑀗𑁆𑀔𑀢𑀺, 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺 𑀅𑀪𑀺𑀧𑁆𑀧𑀲𑀻𑀤𑀢𑀺, 𑀇𑀢𑀺𑀧𑀺 𑀲𑁄 𑀪𑀕𑀯𑀸𑀢𑀺 𑀲𑀩𑁆𑀩𑀁. 𑀥𑀫𑁆𑀫𑁂 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺 𑀲𑀩𑁆𑀩𑀁. 𑀬𑀸𑀯 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀦𑁆𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀆𑀓𑀗𑁆𑀔𑀺𑀬𑁂𑀦 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀲𑀗𑁆𑀖𑁂 𑀦 𑀓𑀗𑁆𑀔𑀢𑀺…𑀧𑁂… 𑀬𑀸𑀯 𑀧𑀽𑀚𑀸 𑀤𑁂𑀯𑀸𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀜𑁆𑀘𑀸𑀢𑀺, 𑀇𑀫𑀺𑀦𑀸 𑀢𑀢𑀺𑀬𑁂𑀦 𑀆𑀓𑀗𑁆𑀔𑀺𑀬𑁂𑀦 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸𑀢𑀺 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺 𑀅𑀥𑀺𑀫𑀼𑀘𑁆𑀘𑀢𑀺 𑀅𑀪𑀺𑀧𑁆𑀧𑀲𑀻𑀤𑀢𑀺. 𑀢𑀡𑁆𑀳𑀸 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺. 𑀢𑀡𑁆𑀳𑀸𑀦𑀺𑀭𑁄𑀥𑀸 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺. 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀦 𑀓𑀗𑁆𑀔𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺 𑀅𑀥𑀺𑀫𑀼𑀘𑁆𑀘𑀢𑀺 𑀅𑀪𑀺𑀧𑁆𑀧𑀲𑀻𑀤𑀢𑀺. 𑀬𑀸𑀯 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸 𑀤𑀼𑀓𑁆𑀔𑁂 𑀯𑀸 𑀲𑀫𑀼𑀤𑀬𑁂 𑀯𑀸 𑀦𑀺𑀭𑁄𑀥𑁂 𑀯𑀸 𑀫𑀕𑁆𑀕𑁂 𑀯𑀸 𑀓𑀗𑁆𑀔𑀸𑀬𑀦𑀸 𑀯𑀺𑀫𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀤𑁆𑀯𑁂𑀥𑀸𑀧𑀣𑀸 𑀆𑀲𑀧𑁆𑀧𑀦𑀸 [𑀅𑀧𑁆𑀧𑀦𑀸 (𑀧𑀻. 𑀓.) 𑀥. 𑀲. 𑁧𑁦𑁦𑁮 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀧𑀲𑁆𑀲𑀺𑀢𑀩𑁆𑀩𑀁] 𑀧𑀭𑀺𑀲𑀧𑁆𑀧𑀦𑀸 𑀅𑀦𑀯𑀝𑁆𑀞𑀸𑀦𑀁 𑀅𑀥𑀺𑀝𑁆𑀞𑀸𑀕𑀫𑀦𑀁 [𑀅𑀦𑀺𑀝𑁆𑀞𑀸𑀕𑀫𑀦𑀁 (𑀓.)] 𑀅𑀦𑁂𑀓𑀁𑀲𑁄 𑀅𑀦𑁂𑀓𑀁𑀲𑀺𑀓𑀢𑀸, 𑀢𑁂 𑀢𑀲𑁆𑀲 𑀧𑀳𑀻𑀦𑀸 𑀪𑀯𑀦𑁆𑀢𑀺 𑀧𑀡𑀼𑀦𑁆𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸.

𑁬𑁯. 𑀢𑀢𑁆𑀣 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀤𑁆𑀯𑀺𑀥𑀸 𑁋 𑀲𑀻𑀮𑀲𑁆𑀲 𑀯𑀸 𑀲𑀼𑀤𑁆𑀥𑀲𑁆𑀲 𑀯𑀸. 𑀢𑀢𑁆𑀣 𑀲𑀻𑀮𑀲𑁆𑀲 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸 𑀢𑀢𑁆𑀣 𑀓𑀧𑁄𑀢𑀧𑀸𑀤𑀸𑀳𑀺 𑀅𑀘𑁆𑀙𑀭𑀸𑀳𑀺 𑀲𑀤𑁆𑀥𑀺𑀁 𑀓𑀻𑀴𑀺𑀲𑁆𑀲𑀸𑀫𑀺 𑀭𑀫𑀺𑀲𑁆𑀲𑀸𑀫𑀺 𑀧𑀭𑀺𑀘𑀭𑀺𑀲𑁆𑀲𑀸𑀫𑀻𑀢𑀺. 𑀬𑀣𑀸𑀪𑀽𑀢𑀤𑀲𑁆𑀲𑀦𑀦𑁆𑀢𑀺 𑀭𑀼𑀘𑀺𑀯𑀺𑀫𑀼𑀢𑁆𑀢𑀺 𑀭𑀸𑀕𑁄 𑀭𑀸𑀕𑀧𑀭𑀺𑀯𑀢𑁆𑀢𑀓𑀸 𑀤𑀺𑀝𑁆𑀞𑀺𑀭𑀽𑀧𑀦𑀸 𑀧𑀲𑁆𑀲𑀦𑀸 𑀅𑀲𑀦𑁆𑀢𑀼𑀲𑁆𑀲𑀺𑀢𑀲𑁆𑀲 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄. 𑀢𑀢𑁆𑀣 𑀓𑀢𑀫𑁄 𑀲𑀼𑀤𑁆𑀥𑀲𑁆𑀲 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄? 𑀇𑀥𑁂𑀓𑀘𑁆𑀘𑁄 𑀲𑀻𑀮𑀁 𑀧𑀭𑀸𑀫𑀲𑀢𑀺, 𑀲𑀻𑀮𑁂𑀦 𑀲𑀼𑀚𑁆𑀛𑀢𑀺, 𑀲𑀻𑀮𑁂𑀦 𑀦𑀻𑀬𑀢𑀺, 𑀲𑀻𑀮𑁂𑀦 𑀫𑀼𑀘𑁆𑀘𑀢𑀺, 𑀲𑀼𑀔𑀁 𑀯𑀻𑀢𑀺𑀓𑁆𑀓𑀫𑀢𑀺, 𑀤𑀼𑀓𑁆𑀔𑀁 𑀯𑀻𑀢𑀺𑀓𑁆𑀓𑀫𑀢𑀺, 𑀲𑀼𑀔𑀤𑀼𑀓𑁆𑀔𑀁 𑀯𑀻𑀢𑀺𑀓𑁆𑀓𑀫𑀢𑀺 𑀅𑀦𑀼𑀧𑀸𑀧𑀼𑀡𑀸𑀢𑀺 𑀉𑀧𑀭𑀺𑀫𑁂𑀦. 𑀢𑀤𑀼𑀪𑀬𑀁 𑀲𑀻𑀮𑀯𑀢𑀁 𑀧𑀭𑀸𑀫𑀲𑀢𑀺 𑀢𑀤𑀼𑀪𑀬𑁂𑀦 𑀲𑀻𑀮𑀯𑀢𑁂𑀦 𑀲𑀼𑀚𑁆𑀛𑀦𑁆𑀢𑀺 𑀫𑀼𑀘𑁆𑀘𑀦𑁆𑀢𑀺 𑀦𑀻𑀬𑀦𑁆𑀢𑀺, 𑀲𑀼𑀔𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀺, 𑀤𑀼𑀓𑁆𑀔𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀺, 𑀲𑀼𑀔𑀤𑀼𑀓𑁆𑀔𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀺, 𑀅𑀦𑀼𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀯𑀺𑀲𑀼𑀘𑀺𑀓𑀭𑀁 𑀥𑀫𑁆𑀫𑀁 𑀅𑀯𑀺𑀫𑀼𑀢𑁆𑀢𑀺𑀓𑀭𑀁 𑀥𑀫𑁆𑀫𑀁 𑀯𑀺𑀲𑀼𑀘𑀺𑀢𑁄 𑀯𑀺𑀫𑀼𑀢𑁆𑀢𑀺𑀢𑁄 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑀲𑁆𑀲 𑀬𑀸 𑀢𑀣𑀸𑀪𑀽𑀢𑀲𑁆𑀲 𑀔𑀦𑁆𑀢𑀺 𑀭𑀼𑀘𑀺 𑀫𑀼𑀢𑁆𑀢𑀺 𑀧𑁂𑀓𑁆𑀔𑀦𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁄 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀬𑀦𑀸 𑀧𑀲𑁆𑀲𑀦𑀸, 𑀅𑀬𑀁 𑀲𑀼𑀤𑁆𑀥𑀲𑁆𑀲 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄. 𑀏𑀢𑁂 𑀉𑀪𑁄 𑀧𑀭𑀸𑀫𑀸𑀲𑀸 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀳𑀻𑀦𑀸 𑀪𑀯𑀦𑁆𑀢𑀺 𑀬𑀸𑀯 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀲𑁄 𑀲𑀻𑀮𑀯𑀸 𑀪𑀯𑀢𑀺 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀓𑁆𑀔𑀡𑁆𑀟𑁂𑀳𑀺 𑀬𑀸𑀯 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁂𑀳𑀺. 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀪𑀯𑀢𑀺 𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄, 𑀲𑀩𑁆𑀩𑀁.

𑀲𑀳𑀲𑀘𑁆𑀘𑀸𑀪𑀺𑀲𑀫𑀬𑀸, 𑀇𑀢𑀺 𑀓𑁄 𑀯𑀘𑀦𑀢𑁆𑀣𑁄? 𑀘𑀢𑁆𑀢𑀸𑀭𑁄 𑀅𑀪𑀺𑀲𑀫𑀬𑀸, 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁄 𑀧𑀳𑀸𑀦𑀸𑀪𑀺𑀲𑀫𑀬𑁄 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁄 𑀪𑀸𑀯𑀦𑀸𑀪𑀺𑀲𑀫𑀬𑁄.

𑀢𑀢𑁆𑀣 𑀅𑀭𑀺𑀬𑀲𑀸𑀯𑀓𑁄 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺, 𑀲𑀫𑀼𑀤𑀬𑀁 𑀧𑀳𑀸𑀦𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺, 𑀫𑀕𑁆𑀕𑀁 𑀪𑀸𑀯𑀦𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺. 𑀓𑀺𑀁 𑀓𑀸𑀭𑀡𑀁? 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁄, 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀸𑀪𑀺𑀲𑀫𑀬𑁄, 𑀦𑀺𑀭𑁄𑀥𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁄, 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀪𑀺𑀲𑀫𑀬𑁄. 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀓𑀣𑀁 𑀅𑀪𑀺𑀲𑀫𑁂𑀢𑀺? 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑁂𑀢𑁆𑀯𑀸 𑀧𑀜𑁆𑀘𑀓𑁆𑀔𑀦𑁆𑀥𑁂 𑀤𑀼𑀓𑁆𑀔𑀢𑁄 𑀧𑀲𑁆𑀲𑀢𑀺. 𑀢𑀢𑁆𑀣 𑀬𑁄 𑀉𑀧𑀦𑀺𑀩𑀦𑁆𑀥𑁄, 𑀅𑀬𑀁 𑀲𑀫𑀣𑁄. 𑀬𑀸 𑀧𑀭𑀺𑀬𑁄𑀕𑀸𑀳𑀦𑀸, 𑀅𑀬𑀁 𑀯𑀺𑀧𑀲𑁆𑀲𑀦𑀸. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀤𑀼𑀓𑁆𑀔𑀸𑀢𑀺 𑀧𑀲𑁆𑀲𑀢𑁄 𑀬𑁄 𑀧𑀜𑁆𑀘𑀓𑁆𑀔𑀦𑁆𑀥𑁂𑀲𑀼 𑀆𑀮𑀬𑁄 𑀦𑀺𑀓𑀦𑁆𑀢𑀺 𑀉𑀧𑀕𑀫𑀦𑀁 𑀅𑀚𑁆𑀛𑁄𑀲𑀸𑀦𑀸 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀧𑀡𑀺𑀥𑀺 𑀧𑀢𑁆𑀣𑀦𑀸 𑀧𑀳𑀻𑀬𑀢𑀺. 𑀢𑀢𑁆𑀣 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀁. 𑀬𑁄 𑀢𑀢𑁆𑀣 𑀆𑀮𑀬𑁄 𑀦𑀺𑀓𑀦𑁆𑀢𑀺 𑀉𑀧𑀕𑀫𑀦𑀁 𑀅𑀚𑁆𑀛𑁄𑀲𑀸𑀦𑀁 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀧𑀡𑀺𑀥𑀺 𑀧𑀢𑁆𑀣𑀦𑀸, 𑀅𑀬𑀁 𑀲𑀫𑀼𑀤𑀬𑁄. 𑀬𑀁 𑀢𑀲𑁆𑀲 𑀧𑀳𑀸𑀦𑀁, 𑀲𑁄 𑀦𑀺𑀭𑁄𑀥𑁄 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀘 𑀫𑀕𑁆𑀕𑁄, 𑀏𑀯𑀁 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀏𑀓𑀓𑀸𑀮𑁂 𑀏𑀓𑀓𑁆𑀔𑀡𑁂 𑀏𑀓𑀘𑀺𑀢𑁆𑀢𑁂 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀅𑀪𑀺𑀲𑀫𑀬𑁄 𑀪𑀯𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑀳𑀲𑀘𑁆𑀘𑀸𑀪𑀺𑀲𑀫𑀬𑀸 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀻’’𑀢𑀺.

𑁭𑁦. 𑀢𑀢𑁆𑀣 𑀲𑀫𑀣𑀯𑀺𑀧𑀲𑁆𑀲𑀦𑀸 𑀬𑀼𑀕𑀦𑀤𑁆𑀥𑀸 𑀯𑀢𑁆𑀢𑀫𑀸𑀦𑀸 𑀏𑀓𑀓𑀸𑀮𑁂 𑀏𑀓𑀓𑁆𑀔𑀡𑁂 𑀏𑀓𑀘𑀺𑀢𑁆𑀢𑁂 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺, 𑀬𑀸𑀯 𑀫𑀕𑁆𑀕𑀁 𑀪𑀸𑀯𑀦𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺. 𑀓𑀺𑀁 𑀓𑀸𑀭𑀡𑀸? 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁄, 𑀬𑀸𑀯 𑀫𑀕𑁆𑀕𑀁 𑀪𑀸𑀯𑀦𑀸𑀪𑀺𑀲𑀫𑀬𑁄. 𑀏𑀯𑀁 𑀤𑀺𑀝𑁆𑀞𑀦𑁆𑀢𑁄 𑀬𑀣𑀸 𑀦𑀸𑀯𑀸 𑀚𑀮𑀁 𑀕𑀘𑁆𑀙𑀦𑁆𑀢𑀻 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀧𑀸𑀭𑀺𑀫𑀁 𑀢𑀻𑀭𑀁 𑀧𑀸𑀧𑁂𑀢𑀺, 𑀑𑀭𑀺𑀫𑀁 𑀢𑀻𑀭𑀁 𑀚𑀳𑀢𑀺, 𑀪𑀸𑀭𑀁 𑀯𑀳𑀢𑀺, 𑀲𑁄𑀢𑀁 𑀙𑀺𑀦𑁆𑀤𑀢𑀺; 𑀏𑀯𑀫𑁂𑀯 𑀲𑀫𑀣𑀯𑀺𑀧𑀲𑁆𑀲𑀦𑀸 𑀬𑀼𑀕𑀦𑀤𑁆𑀥𑀸 𑀯𑀢𑁆𑀢𑀫𑀸𑀦𑀸 𑀏𑀓𑀓𑀸𑀮𑁂 𑀏𑀓𑀓𑁆𑀔𑀡𑁂 𑀏𑀓𑀘𑀺𑀢𑁆𑀢𑁂 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺, 𑀬𑀸𑀯 𑀫𑀕𑁆𑀕𑀁 𑀪𑀸𑀯𑀦𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺. 𑀬𑀣𑀸 𑀯𑀸 𑀲𑀽𑀭𑀺𑀬𑁄 𑀉𑀤𑀬𑀦𑁆𑀢𑁄 𑀏𑀓𑀓𑀸𑀮𑁂 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺, 𑀆𑀮𑁄𑀓𑀁 𑀧𑀸𑀢𑀼𑀓𑀭𑁄𑀢𑀺, 𑀭𑀽𑀧𑀁 𑀦𑀺𑀤𑀲𑁆𑀲𑀻𑀬𑀢𑀺, 𑀲𑀻𑀢𑀁 𑀧𑀭𑀺𑀬𑀸𑀤𑀺𑀬𑀢𑀺; 𑀏𑀯𑀫𑁂𑀯 𑀲𑀫𑀣𑀯𑀺𑀧𑀲𑁆𑀲𑀦𑀸 𑀬𑀼𑀕𑀦𑀤𑁆𑀥𑀸 𑀯𑀢𑁆𑀢𑀫𑀸𑀦𑀸 𑀏𑀓𑀓𑀸𑀮𑁂…𑀧𑁂… 𑀬𑀣𑀸 𑀧𑀤𑀻𑀧𑁄 𑀚𑀮𑀦𑁆𑀢𑁄 𑀏𑀓𑀓𑀸𑀮𑁂 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺, 𑀆𑀮𑁄𑀓𑀁 𑀧𑀸𑀢𑀼𑀓𑀭𑁄𑀢𑀺, 𑀭𑀽𑀧𑀁 𑀦𑀺𑀤𑀲𑁆𑀲𑀻𑀬𑀢𑀺, 𑀉𑀧𑀸𑀤𑀸𑀦𑀁 𑀧𑀭𑀺𑀬𑀸𑀤𑀺𑀬𑀢𑀺; 𑀏𑀯𑀫𑁂𑀯 𑀲𑀫𑀣𑀯𑀺𑀧𑀲𑁆𑀲𑀦𑀸 𑀬𑀼𑀕𑀦𑀤𑁆𑀥𑀸 𑀯𑀢𑁆𑀢𑀫𑀸𑀦𑀸 𑀏𑀓𑀓𑀸𑀮𑁂…𑀧𑁂….

𑀬𑀤𑀸 𑀅𑀭𑀺𑀬𑀲𑀸𑀯𑀓𑁄 𑀲𑁄𑀢𑀸𑀧𑀦𑁆𑀦𑁄 𑀪𑀯𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀬𑀸𑀯 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀤𑀲𑁆𑀲𑀦𑀪𑀽𑀫𑀺. 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀞𑀺𑀢𑁄 𑀉𑀢𑁆𑀢𑀭𑀺 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀬𑀼𑀕𑀦𑀤𑁆𑀥𑀸 𑀯𑀢𑁆𑀢𑀫𑀸𑀦𑀸 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀧𑀳𑀸𑀦𑀸 𑀅𑀭𑀺𑀬𑀲𑀸𑀯𑀓𑁄 𑀳𑁄𑀢𑀺. 𑀲𑀓𑀤𑀸𑀕𑀸𑀫𑀺 𑀧𑀭𑀺𑀦𑀺𑀝𑁆𑀞𑀺𑀢𑀢𑁆𑀢𑀸 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀢𑀦𑀼𑀪𑀽𑀫𑀺.

𑀲𑀓𑀤𑀸𑀕𑀸𑀫𑀺𑀨𑀮𑀜𑁆𑀘 𑀬𑁄 𑀲𑀓𑀤𑀸𑀕𑀸𑀫𑀺𑀨𑀮𑁂 𑀞𑀺𑀢𑁄 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑁂 𑀲𑀸𑀦𑀼𑀲𑀬𑁂 𑀅𑀦𑀯𑀲𑁂𑀲𑀁 𑀧𑀚𑀳𑀢𑀺, 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑁂𑀲𑀼 𑀅𑀦𑀯𑀲𑁂𑀲𑀁 𑀧𑀳𑀻𑀦𑁂𑀲𑀼 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺 𑀪𑀯𑀦𑁆𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀯𑀺𑀘𑀺𑀓𑀺𑀘𑁆𑀙𑀸 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄 𑀘, 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸 [𑀧𑀳𑀸𑀦𑀸𑀬 (𑀧𑀻. 𑀓.)] 𑀅𑀭𑀺𑀬𑀲𑀸𑀯𑀓𑁄 𑀳𑁄𑀢𑀺 𑀅𑀦𑀸𑀕𑀸𑀫𑀻 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸, 𑀅𑀬𑀁 𑀯𑀻𑀢𑀭𑀸𑀕𑀪𑀽𑀫𑀺.

𑀅𑀦𑀸𑀕𑀸𑀫𑀺𑀨𑀮𑀜𑁆𑀘 𑀅𑀦𑀸𑀕𑀸𑀫𑀺𑀨𑀮𑁂 𑀞𑀺𑀢𑁄 𑀉𑀢𑁆𑀢𑀭𑀺 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑁄 𑀧𑀜𑁆𑀘 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀚𑀳𑀢𑀺 𑀭𑀽𑀧𑀭𑀸𑀕𑀅𑀭𑀽𑀧𑀭𑀸𑀕𑀫𑀸𑀦𑀉𑀤𑁆𑀥𑀘𑁆𑀘𑀅𑀯𑀺𑀚𑁆𑀚𑀜𑁆𑀘. 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸 𑀅𑀭𑀺𑀬𑀲𑀸𑀯𑀓𑁄 𑀅𑀭𑀳𑀸 𑀪𑀯𑀢𑀺, 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀲𑀫𑁆𑀫𑀤𑀜𑁆𑀜𑀸 [𑀲𑀫𑁆𑀧𑀚𑀜𑁆𑀜𑁄 (𑀧𑀻. 𑀓.)] 𑀯𑀺𑀫𑀼𑀢𑁆𑀢𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄, 𑀅𑀬𑀁 𑀓𑀢𑀸𑀪𑀽𑀫𑀺.

𑀅𑀭𑀳𑀦𑁆𑀢𑁄𑀯 𑀅𑀬𑀁 𑀲𑁄𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀢𑀲𑁆𑀲 𑀆𑀬𑀼𑀓𑁆𑀔𑀬𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀧𑀭𑁄𑀥𑀸 𑀇𑀤𑀜𑁆𑀘 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀺, 𑀅𑀜𑁆𑀜𑀜𑁆𑀘 𑀤𑀼𑀓𑁆𑀔𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀬𑁄 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀺𑀭𑁄𑀥𑁄 𑀯𑀽𑀧𑀲𑀫𑁄, 𑀅𑀜𑁆𑀜𑀲𑁆𑀲 𑀘 𑀅𑀧𑀸𑀢𑀼𑀪𑀸𑀯𑁄, 𑀅𑀬𑀁 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀇𑀫𑀸 𑀤𑁆𑀯𑁂 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑁄. 𑀇𑀢𑀺 𑀲𑀘𑁆𑀘𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀲𑀘𑁆𑀘𑀸𑀪𑀺𑀲𑀫𑀬𑁄 𑀯𑀼𑀢𑁆𑀢𑁄, 𑀓𑀺𑀮𑁂𑀲𑀯𑀯𑀢𑁆𑀣𑀸𑀦𑀁 𑀯𑀼𑀢𑁆𑀢𑀁, 𑀧𑀳𑀸𑀦𑀁 𑀯𑀼𑀢𑁆𑀢𑀁, 𑀪𑀽𑀫𑀺𑀬𑁄 𑀯𑀼𑀢𑁆𑀢𑀸, 𑀨𑀮𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑁄 𑀯𑀼𑀢𑁆𑀢𑀸. 𑀏𑀯𑀫𑀺𑀫𑁂𑀲𑀼 𑀯𑀼𑀢𑁆𑀢𑁂𑀲𑀼 𑀲𑀩𑁆𑀩𑀩𑁄𑀥𑀺 𑀯𑀼𑀢𑁆𑀢𑀸 𑀪𑀯𑀢𑀺. 𑀏𑀢𑁆𑀣 𑀬𑁄𑀕𑁄 𑀓𑀭𑀡𑀻𑀬𑁄.

𑁭𑁧. 𑀢𑀢𑁆𑀣 𑀓𑀢𑀫𑀸𑀬𑁄 𑀦𑀯 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀬𑁄? 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀘𑀢𑀲𑁆𑀲𑁄 𑀘 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀘. 𑀢𑀢𑁆𑀣 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀓𑀢𑀫𑀸𑀦𑀺? 𑀇𑀥, 𑀪𑀺𑀓𑁆𑀔𑀯𑁂, [𑀧𑀲𑁆𑀲 𑀤𑀻𑀖𑀦𑀺𑀓𑀸𑀬𑁂] 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀓𑀢𑀫𑀸 𑀘𑀢𑁆𑀢𑀸𑀭𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄? 𑀯𑀺𑀭𑀸𑀕𑀺𑀦𑁄 𑀯𑀢 𑀯𑀢𑁆𑀢𑀩𑁆𑀩𑁄, 𑀬𑀸𑀯 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀸. 𑀇𑀫𑀸𑀬𑁄 𑀦𑀯 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀬𑁄.

𑀢𑀢𑁆𑀣 𑀓𑀢𑀫𑀁 𑀧𑀞𑀫𑀁 𑀛𑀸𑀦𑀁? 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀬𑀼𑀢𑁆𑀢𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁? 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺. 𑀢𑀢𑁆𑀣 𑀓𑀢𑀫𑀸𑀦𑀺 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺? 𑀓𑀸𑀫𑀘𑁆𑀙𑀦𑁆𑀤𑁄𑀢𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄. 𑀢𑀢𑁆𑀣 𑀓𑀢𑀫𑁄 𑀓𑀸𑀫𑀘𑁆𑀙𑀦𑁆𑀤𑁄? 𑀬𑁄 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑁄 𑀧𑁂𑀫𑀁 𑀦𑀺𑀓𑀦𑁆𑀢𑀺 𑀅𑀚𑁆𑀛𑁄𑀲𑀸𑀦𑀁 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀧𑀢𑁆𑀣𑀦𑀸 𑀅𑀧𑀭𑀺𑀘𑁆𑀘𑀸𑀕𑁄 𑀅𑀦𑀼𑀲𑀬𑁄 𑀧𑀭𑀺𑀬𑀼𑀝𑁆𑀞𑀸𑀦𑀁, 𑀅𑀬𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁. 𑀢𑀢𑁆𑀣 𑀓𑀢𑀫𑀁 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁? 𑀬𑁄 𑀲𑀢𑁆𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀘 𑀆𑀖𑀸𑀢𑁄…𑀧𑁂… 𑀬𑀣𑀸 𑀤𑁄𑀲𑁂 𑀢𑀣𑀸 𑀦𑀺𑀑𑀝𑁆𑀞𑀸𑀦𑀸, 𑀅𑀬𑀁 𑀩𑁆𑀬𑀸𑀧𑀸𑀤𑁄 𑀦𑀻𑀯𑀭𑀡𑀁. 𑀢𑀢𑁆𑀣 𑀓𑀢𑀫𑀁 𑀫𑀺𑀤𑁆𑀥𑀁? 𑀬𑀸 𑀘𑀺𑀢𑁆𑀢𑀲𑁆𑀲 𑀚𑀴𑀢𑀸 𑀘𑀺𑀢𑁆𑀢𑀲𑁆𑀲 𑀕𑀭𑀼𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀅𑀓𑀫𑁆𑀫𑀦𑀻𑀬𑀢𑀸 𑀘𑀺𑀢𑁆𑀢𑀲𑁆𑀲 𑀦𑀺𑀓𑁆𑀔𑁂𑀧𑁄 𑀦𑀺𑀤𑁆𑀤𑀸𑀬𑀦𑀸 𑀧𑀘𑀮𑀺𑀓𑀢𑀸 𑀧𑀘𑀮𑀸𑀬𑀦𑀸 𑀧𑀘𑀮𑀸𑀬𑀦𑀁, 𑀇𑀤𑀁 𑀫𑀺𑀤𑁆𑀥𑀁. 𑀢𑀢𑁆𑀣 𑀓𑀢𑀫𑀁 𑀣𑀺𑀦𑀁 [𑀣𑀻𑀦𑀁 (𑀧𑀻.)]? 𑀬𑀸 𑀓𑀸𑀬𑀲𑁆𑀲 𑀣𑀺𑀦𑀢𑀸 𑀚𑀴𑀢𑀸 𑀓𑀸𑀬𑀲𑁆𑀲 𑀕𑀭𑀼𑀢𑁆𑀢𑀸 𑀓𑀸𑀬𑀲𑁆𑀲 𑀅𑀧𑁆𑀧𑀲𑁆𑀲𑀤𑁆𑀥𑀺, 𑀇𑀤𑀁 𑀣𑀺𑀦𑀁. 𑀇𑀢𑀺 𑀇𑀤𑀜𑁆𑀘 𑀣𑀺𑀦𑀁 𑀧𑀼𑀭𑀺𑀫𑀓𑀜𑁆𑀘 𑀫𑀺𑀤𑁆𑀥𑀁 𑀢𑀤𑀼𑀪𑀬𑀁 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀓𑀢𑀫𑀁 𑀉𑀤𑁆𑀥𑀘𑁆𑀘𑀁? 𑀬𑁄 𑀅𑀯𑀽𑀧𑀲𑀫𑁄 𑀘𑀺𑀢𑁆𑀢𑀲𑁆𑀲, 𑀇𑀤𑀁 𑀉𑀤𑁆𑀥𑀘𑁆𑀘𑀁. 𑀢𑀢𑁆𑀣 𑀓𑀢𑀫𑀁 𑀓𑀼𑀓𑁆𑀓𑀼𑀘𑁆𑀘𑀁? 𑀬𑁄 𑀘𑁂𑀢𑀲𑁄 𑀯𑀺𑀮𑁂𑀔𑁄 𑀅𑀮𑀜𑁆𑀘𑀦𑀸 𑀯𑀺𑀮𑀜𑁆𑀘𑀦𑀸 𑀳𑀤𑀬𑀮𑁂𑀔𑁄 𑀯𑀺𑀧𑁆𑀧𑀝𑀺𑀲𑀸𑀭𑁄, 𑀇𑀤𑀁 𑀓𑀼𑀓𑁆𑀓𑀼𑀘𑁆𑀘𑀁. 𑀇𑀢𑀺 𑀇𑀤𑀜𑁆𑀘 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀭𑀺𑀫𑀓𑀜𑁆𑀘 𑀉𑀤𑁆𑀥𑀘𑁆𑀘𑀁 𑀢𑀤𑀼𑀪𑀬𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀓𑀢𑀫𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁? 𑀬𑁄 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸…𑀧𑁂… 𑀅𑀬𑀁 𑀯𑀺𑀘𑀺𑀓𑀺𑀘𑁆𑀙𑀸. 𑀅𑀧𑀺 𑀘 𑀔𑁄 𑀧𑀦 𑀧𑀜𑁆𑀘 𑀯𑀺𑀘𑀺𑀓𑀺𑀘𑁆𑀙𑀸𑀬𑁄 𑀲𑀫𑀦𑀦𑁆𑀢𑀭𑀸𑀬𑀺𑀓𑀸 𑀤𑁂𑀲𑀦𑁆𑀢𑀭𑀸𑀬𑀺𑀓𑀸 𑀲𑀫𑀸𑀧𑀢𑁆𑀢𑀦𑁆𑀢𑀭𑀸𑀬𑀺𑀓𑀸 𑀫𑀕𑁆𑀕𑀦𑁆𑀢𑀭𑀸𑀬𑀺𑀓𑀸 𑀲𑀕𑁆𑀕𑀦𑁆𑀢𑀭𑀸𑀬𑀺𑀓𑀸, 𑀇𑀫𑀸𑀬𑁄 𑀧𑀜𑁆𑀘 𑀯𑀺𑀘𑀺𑀓𑀺𑀘𑁆𑀙𑀸𑀬𑁄. 𑀇𑀥 𑀧𑀦 𑀲𑀫𑀸𑀧𑀢𑁆𑀢𑀦𑁆𑀢𑀭𑀸𑀬𑀺𑀓𑀸 𑀯𑀺𑀘𑀺𑀓𑀺𑀘𑁆𑀙𑀸 𑀅𑀥𑀺𑀧𑁆𑀧𑁂𑀢𑀸. 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑀸.

𑀢𑀢𑁆𑀣 𑀦𑀻𑀯𑀭𑀡𑀸𑀦𑀻𑀢𑀺 𑀓𑁄 𑀯𑀘𑀦𑀢𑁆𑀣𑁄, 𑀓𑀼𑀢𑁄 𑀦𑀺𑀯𑀸𑀭𑀬𑀦𑁆𑀢𑀻𑀢𑀺? 𑀲𑀩𑁆𑀩𑀢𑁄 𑀓𑀼𑀲𑀮𑀧𑀓𑁆𑀔𑀺𑀓𑀸 𑀦𑀺𑀯𑀸𑀭𑀬𑀦𑁆𑀢𑀺. 𑀓𑀣𑀁 [𑀓𑀺𑀁 𑀓𑀁 (𑀧𑀻. 𑀓.)] 𑀦𑀺𑀯𑀸𑀭𑀬𑀦𑁆𑀢𑀺? 𑀓𑀸𑀫𑀘𑁆𑀙𑀦𑁆𑀤𑁄 𑀅𑀲𑀼𑀪𑀢𑁄 𑀦𑀺𑀯𑀸𑀭𑀬𑀢𑀺, 𑀩𑁆𑀬𑀸𑀧𑀸𑀤𑁄 𑀫𑁂𑀢𑁆𑀢𑀸𑀬 [𑀫𑁂𑀢𑁆𑀢𑀢𑁄 (𑀧𑀻.)] 𑀦𑀺𑀯𑀸𑀭𑀬𑀢𑀺, 𑀣𑀺𑀦𑀁 𑀧𑀲𑁆𑀲𑀤𑁆𑀥𑀺𑀢𑁄 𑀦𑀺𑀯𑀸𑀭𑀬𑀢𑀺, 𑀫𑀺𑀤𑁆𑀥𑀁 𑀯𑀻𑀭𑀺𑀬𑀸𑀭𑀫𑁆𑀪𑀢𑁄 𑀦𑀺𑀯𑀸𑀭𑀬𑀢𑀺, 𑀉𑀤𑁆𑀥𑀘𑁆𑀘𑀁 𑀲𑀫𑀣𑀢𑁄 𑀦𑀺𑀯𑀸𑀭𑀬𑀢𑀺, 𑀓𑀼𑀓𑁆𑀓𑀼𑀘𑁆𑀘𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁄 𑀦𑀺𑀯𑀸𑀭𑀬𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀧𑀜𑁆𑀜𑀸𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀢𑁄 𑀦𑀺𑀯𑀸𑀭𑀬𑀢𑀺.

𑀅𑀧𑀭𑁄 𑀧𑀭𑀺𑀬𑀸𑀬𑁄. 𑀓𑀸𑀫𑀘𑁆𑀙𑀦𑁆𑀤𑁄 𑀅𑀮𑁄𑀪𑀢𑁄 𑀓𑀼𑀲𑀮𑀫𑀽𑀮𑀢𑁄 𑀦𑀺𑀯𑀸𑀭𑀬𑀢𑀺, 𑀩𑁆𑀬𑀸𑀧𑀸𑀤𑁄 𑀅𑀤𑁄𑀲𑀢𑁄 𑀦𑀺𑀯𑀸𑀭𑀬𑀢𑀺, 𑀣𑀺𑀦𑀫𑀺𑀤𑁆𑀥𑀁 𑀲𑀫𑀸𑀥𑀺𑀢𑁄 𑀦𑀺𑀯𑀸𑀭𑀬𑀢𑀺, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀦𑀺𑀯𑀸𑀭𑀬𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀅𑀫𑁄𑀳𑀢𑁄 𑀓𑀼𑀲𑀮𑀫𑀽𑀮𑀢𑁄 𑀦𑀺𑀯𑀸𑀭𑀬𑀢𑀺.

𑀅𑀧𑀭𑁄 𑀧𑀭𑀺𑀬𑀸𑀬𑁄. 𑀢𑀬𑁄 𑀯𑀺𑀳𑀸𑀭𑀸 𑀤𑀺𑀩𑁆𑀩𑀯𑀺𑀳𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁄 𑀅𑀭𑀺𑀬𑀯𑀺𑀳𑀸𑀭𑁄. 𑀤𑀺𑀩𑁆𑀩𑀯𑀺𑀳𑀸𑀭𑁄 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺, 𑀩𑁆𑀭𑀳𑁆𑀫𑀯𑀺𑀳𑀸𑀭𑁄 𑀘𑀢𑁆𑀢𑀸𑀭𑀺 𑀅𑀧𑁆𑀧𑀫𑀸𑀡𑀸𑀦𑀺, 𑀅𑀭𑀺𑀬𑀯𑀺𑀳𑀸𑀭𑁄 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀓𑀸𑀫𑀘𑁆𑀙𑀦𑁆𑀤𑁄 𑀉𑀤𑁆𑀥𑀘𑁆𑀘𑀁 𑀓𑀼𑀓𑁆𑀓𑀼𑀘𑁆𑀘𑀜𑁆𑀘 𑀤𑀺𑀩𑁆𑀩𑀯𑀺𑀳𑀸𑀭𑀁 𑀦𑀺𑀯𑀸𑀭𑀬𑀢𑀺, 𑀩𑁆𑀬𑀸𑀧𑀸𑀤𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀁 𑀦𑀺𑀯𑀸𑀭𑀬𑀢𑀺, 𑀣𑀺𑀦𑀫𑀺𑀤𑁆𑀥𑀁 𑀯𑀺𑀘𑀺𑀓𑀺𑀘𑁆𑀙𑀸 𑀘 𑀅𑀭𑀺𑀬𑀯𑀺𑀳𑀸𑀭𑀁 𑀦𑀺𑀯𑀸𑀭𑀬𑀢𑀺.

𑀅𑀧𑀭𑁄 𑀧𑀭𑀺𑀬𑀸𑀬𑁄. 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀜𑁆𑀘 𑀲𑀫𑀣𑀁 𑀦𑀺𑀯𑀸𑀭𑀬𑀦𑁆𑀢𑀺, 𑀣𑀺𑀦𑀫𑀺𑀤𑁆𑀥𑀁 𑀯𑀺𑀘𑀺𑀓𑀺𑀘𑁆𑀙𑀸 𑀘 𑀯𑀺𑀧𑀲𑁆𑀲𑀦𑀁 𑀦𑀺𑀯𑀸𑀭𑀬𑀦𑁆𑀢𑀺, 𑀅𑀢𑁄 𑀦𑀻𑀯𑀭𑀡𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑁂. 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁 𑀧𑀞𑀫𑀁 𑀛𑀸𑀦𑀁.

𑀓𑀢𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀁 𑀧𑀞𑀫𑀁 𑀛𑀸𑀦𑀁? 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀧𑀻𑀢𑀺𑀬𑀸 𑀲𑀼𑀔𑁂𑀦 𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀘. 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀅𑀗𑁆𑀕𑀸𑀦𑀁 𑀉𑀧𑁆𑀧𑀸𑀤𑀧𑀝𑀺𑀮𑀸𑀪𑀲𑀫𑀦𑁆𑀦𑀸𑀕𑀫𑁄 𑀲𑀘𑁆𑀙𑀺𑀓𑀺𑀭𑀺𑀬𑀁 𑀧𑀞𑀫𑀁 𑀛𑀸𑀦𑀁 𑀧𑀝𑀺𑀮𑀤𑁆𑀥𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀭𑀢𑀻𑀢𑀺, 𑀢𑁂𑀦 𑀯𑀼𑀘𑁆𑀘𑀢𑁂 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀤𑀺𑀩𑁆𑀩𑁂𑀦 𑀯𑀺𑀳𑀸𑀭𑁂𑀦.

𑀢𑀢𑁆𑀣 𑀤𑀼𑀢𑀺𑀬𑀁 𑀛𑀸𑀦𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀧𑀻𑀢𑀺𑀲𑀼𑀔𑁂𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑁂𑀦 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺.

𑀢𑀢𑁆𑀣 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀢𑀢𑀺𑀬𑀁 𑀛𑀸𑀦𑀁 𑀲𑀢𑀺𑀬𑀸 𑀲𑀫𑁆𑀧𑀚𑀜𑁆𑀜𑁂 𑀲𑀼𑀔𑁂𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀉𑀧𑁂𑀓𑁆𑀔𑀸𑀬 𑀇𑀫𑀸𑀦𑀺 𑀧𑀜𑁆𑀘𑀗𑁆𑀕𑀸𑀦𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺.

𑀢𑀢𑁆𑀣 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁂𑀓𑁆𑀔𑀸𑀬 𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘, 𑀇𑀫𑁂𑀳𑀺 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁. 𑀇𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀅𑀗𑁆𑀕𑀸𑀦𑀁 𑀉𑀧𑁆𑀧𑀸𑀤𑁄 𑀧𑀝𑀺𑀮𑀸𑀪𑁄 𑀲𑀫𑀦𑁆𑀦𑀸𑀕𑀫𑁄 𑀲𑀘𑁆𑀙𑀺𑀓𑀺𑀭𑀺𑀬𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀧𑀝𑀺𑀮𑀤𑁆𑀥𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀤𑀺𑀩𑁆𑀩𑁂𑀦 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀻𑀢𑀺.

𑀢𑀢𑁆𑀣 𑀓𑀢𑀫𑁄 𑀅𑀦𑀺𑀘𑁆𑀘𑀝𑁆𑀞𑁄? 𑀧𑀻𑀴𑀦𑀝𑁆𑀞𑁄 𑀅𑀦𑀺𑀘𑁆𑀘𑀝𑁆𑀞𑁄 𑀧𑀪𑀗𑁆𑀕𑀝𑁆𑀞𑁄 𑀲𑀫𑁆𑀧𑀸𑀧𑀦𑀝𑁆𑀞𑁄 𑀯𑀺𑀯𑁂𑀓𑀝𑁆𑀞𑁄 𑀅𑀦𑀺𑀘𑁆𑀘𑀝𑁆𑀞𑁄, 𑀅𑀬𑀁 𑀅𑀦𑀺𑀘𑁆𑀘𑀝𑁆𑀞𑁄.

𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀝𑁆𑀞𑁄? 𑀧𑀻𑀴𑀦𑀝𑁆𑀞𑁄 𑀤𑀼𑀓𑁆𑀔𑀝𑁆𑀞𑁄 𑀲𑀫𑁆𑀧𑀻𑀴𑀦𑀝𑁆𑀞𑁄 𑀲𑀁𑀯𑁂𑀕𑀝𑁆𑀞𑁄 𑀩𑁆𑀬𑀸𑀥𑀺𑀦𑀝𑁆𑀞𑁄, 𑀅𑀬𑀁 𑀤𑀼𑀓𑁆𑀔𑀝𑁆𑀞𑁄.

𑀢𑀢𑁆𑀣 𑀓𑀢𑀫𑁄 𑀲𑀼𑀜𑁆𑀜𑀝𑁆𑀞𑁄? 𑀅𑀦𑀼𑀧𑀮𑀺𑀢𑁆𑀢𑁄 𑀲𑀼𑀜𑁆𑀜𑀝𑁆𑀞𑁄, 𑀅𑀲𑀫𑁆𑀪𑀸𑀚𑀦𑀝𑁆𑀞𑁄 𑀕𑀢𑀧𑀝𑁆𑀞𑁄 [𑀅𑀧𑁆𑀧𑀝𑁆𑀞𑁄 (𑀧𑀻.)] 𑀯𑀺𑀯𑀝𑁆𑀝𑀝𑁆𑀞𑁄, 𑀅𑀬𑀁 𑀲𑀼𑀜𑁆𑀜𑀝𑁆𑀞𑁄.

𑀢𑀢𑁆𑀣 𑀓𑀢𑀫𑁄 𑀅𑀦𑀢𑁆𑀢𑀝𑁆𑀞𑁄? 𑀅𑀦𑀺𑀲𑁆𑀲𑀭𑀺𑀬𑀝𑁆𑀞𑁄 𑀅𑀦𑀢𑁆𑀢𑀝𑁆𑀞𑁄, 𑀅𑀯𑀲𑀯𑀢𑁆𑀢𑀦𑀝𑁆𑀞𑁄, 𑀅𑀓𑀸𑀫𑀓𑀸𑀭𑀺𑀝𑁆𑀞𑁄 𑀧𑀭𑀺𑀯𑀺𑀤𑀝𑁆𑀞𑁄, 𑀅𑀬𑀁 𑀅𑀦𑀢𑁆𑀢𑀝𑁆𑀞𑁄𑀢𑀺.

𑀲𑀼𑀢𑁆𑀢𑀢𑁆𑀣𑀲𑀫𑀼𑀘𑁆𑀘𑀬𑁄 𑀦𑀸𑀫 𑀲𑀁𑀯𑀢𑁆𑀢𑀺𑀲𑀦𑁆𑀢𑀺𑀓𑀸 𑀧𑁂𑀝𑀓𑀪𑀽𑀫𑀺 𑀲𑀫𑀢𑁆𑀢𑀸.