𑁨. 𑀲𑀸𑀲𑀦𑀧𑀝𑁆𑀞𑀸𑀦𑀤𑀼𑀢𑀺𑀬𑀪𑀽𑀫𑀺

𑁧𑁩. 𑀢𑀢𑁆𑀣 𑀓𑀢𑀫𑀁 𑀲𑀸𑀲𑀦𑀧𑁆𑀧𑀝𑁆𑀞𑀸𑀦𑀁? 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀯𑀸𑀲𑀦𑀸 𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘, 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘. 𑀆𑀡𑀢𑁆𑀢𑀺, 𑀨𑀮𑀁, 𑀉𑀧𑀸𑀬𑁄, 𑀆𑀡𑀢𑁆𑀢𑀺 𑀘 𑀨𑀮𑀜𑁆𑀘, 𑀨𑀮𑀜𑁆𑀘 𑀉𑀧𑀸𑀬𑁄 𑀘, 𑀆𑀡𑀢𑁆𑀢𑀺 𑀘 𑀨𑀮𑀜𑁆𑀘 𑀉𑀧𑀸𑀬𑁄 𑀘. 𑀅𑀲𑁆𑀲𑀸𑀤𑁄, 𑀆𑀤𑀻𑀦𑀯𑁄, 𑀦𑀺𑀲𑁆𑀲𑀭𑀡𑀁, 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘, 𑀅𑀲𑁆𑀲𑀸𑀤𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘, 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘, 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘. 𑀮𑁄𑀓𑀺𑀓𑀁, 𑀮𑁄𑀓𑀼𑀢𑁆𑀢𑀭𑀁, 𑀮𑁄𑀓𑀺𑀓𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘. 𑀓𑀫𑁆𑀫𑀁, 𑀯𑀺𑀧𑀸𑀓𑁄, 𑀓𑀫𑁆𑀫𑀜𑁆𑀘 𑀯𑀺𑀧𑀸𑀓𑁄 𑀘. 𑀦𑀺𑀤𑁆𑀤𑀺𑀝𑁆𑀞𑀁, 𑀅𑀦𑀺𑀤𑁆𑀤𑀺𑀝𑁆𑀞𑀁, 𑀦𑀺𑀤𑁆𑀤𑀺𑀝𑁆𑀞𑀜𑁆𑀘 𑀅𑀦𑀺𑀤𑁆𑀤𑀺𑀝𑁆𑀞𑀜𑁆𑀘. 𑀜𑀸𑀡𑀁, 𑀜𑁂𑀬𑁆𑀬𑀁, 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘. 𑀤𑀲𑁆𑀲𑀦𑀁, 𑀪𑀸𑀯𑀦𑀸, 𑀤𑀲𑁆𑀲𑀦𑀜𑁆𑀘 𑀪𑀸𑀯𑀦𑀸 𑀘. 𑀯𑀺𑀧𑀸𑀓𑀓𑀫𑁆𑀫𑀁, 𑀦 𑀯𑀺𑀧𑀸𑀓𑀓𑀫𑁆𑀫𑀁, 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀓𑀫𑁆𑀫𑀁. 𑀲𑀓𑀯𑀘𑀦𑀁, 𑀧𑀭𑀯𑀘𑀦𑀁, 𑀲𑀓𑀯𑀘𑀦𑀜𑁆𑀘 𑀧𑀭𑀯𑀘𑀦𑀜𑁆𑀘. 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁, 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁, 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀜𑁆𑀘 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀜𑁆𑀘. 𑀣𑀯𑁄, 𑀲𑀓𑀯𑀘𑀦𑀸𑀥𑀺𑀝𑁆𑀞𑀸𑀦𑀁, 𑀧𑀭𑀯𑀘𑀦𑀸𑀥𑀺𑀝𑁆𑀞𑀸𑀦𑀁, 𑀲𑀓𑀯𑀘𑀦𑀸𑀥𑀺𑀝𑁆𑀞𑀸𑀦𑀜𑁆𑀘 𑀧𑀭𑀯𑀘𑀦𑀸𑀥𑀺𑀝𑁆𑀞𑀸𑀦𑀜𑁆𑀘. 𑀓𑀺𑀭𑀺𑀬𑀁, 𑀨𑀮𑀁, 𑀓𑀺𑀭𑀺𑀬𑀜𑁆𑀘 𑀨𑀮𑀜𑁆𑀘. 𑀅𑀦𑀼𑀜𑁆𑀜𑀸𑀢𑀁, 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀅𑀦𑀼𑀜𑁆𑀜𑀸𑀢𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘. 𑀇𑀫𑀸𑀦𑀺 𑀙 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺.

𑁧𑁪. 𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁?

𑀓𑀸𑀫𑀦𑁆𑀥𑀸 𑀚𑀸𑀮𑀲𑀜𑁆𑀙𑀦𑁆𑀦𑀸, 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸;

𑀧𑀫𑀢𑁆𑀢𑀩𑀦𑁆𑀥𑀼𑀦𑀸 𑀩𑀤𑁆𑀥𑀸, 𑀫𑀘𑁆𑀙𑀸𑀯 𑀓𑀼𑀫𑀺𑀦𑀸𑀫𑀼𑀔𑁂;

𑀚𑀭𑀸𑀫𑀭𑀡𑀫𑀦𑁆𑀯𑁂𑀦𑁆𑀢𑀺, 𑀯𑀘𑁆𑀙𑁄 𑀔𑀻𑀭𑀧𑀓𑁄𑀯 [𑀔𑀻𑀭𑀽𑀧𑀓𑁄𑀯 (𑀓.) 𑀧𑀲𑁆𑀲 𑀉𑀤𑀸. 𑁬𑁪] 𑀫𑀸𑀢𑀭𑀁.

𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀦𑀻𑀯𑀭𑀡𑀸.

𑀢𑀢𑁆𑀣 𑀓𑀢𑀫𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁?

𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸;

𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻.

𑀲𑀁𑀬𑀼𑀢𑁆𑀢𑀓𑁂 𑀲𑀼𑀢𑁆𑀢𑀁.

𑀫𑀳𑀸𑀦𑀸𑀫𑀲𑁆𑀲 𑀲𑀓𑁆𑀓𑀲𑁆𑀲 𑀇𑀤𑀁 𑀪𑀕𑀯𑀸 𑀲𑀓𑁆𑀬𑀸𑀦𑀁 𑀓𑀧𑀺𑀮𑀯𑀢𑁆𑀣𑀼𑀫𑁆𑀳𑀺 𑀦𑀕𑀭𑁂 𑀦𑀬𑀯𑀺𑀢𑁆𑀣𑀸𑀭𑁂𑀦 𑀲𑀤𑁆𑀥𑀸𑀲𑀻𑀮𑀧𑀭𑀺𑀪𑀸𑀯𑀺𑀢𑀁 𑀲𑀼𑀢𑁆𑀢𑀁 𑀪𑀸𑀯𑀜𑁆𑀜𑁂𑀦 𑀧𑀭𑀺𑀪𑀸𑀯𑀺𑀢𑀁 𑀢𑀁 𑀦𑀸𑀫 𑀧𑀘𑁆𑀙𑀺𑀫𑁂 𑀓𑀸𑀮𑁂.

𑀢𑀢𑁆𑀣 𑀓𑀢𑀫𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁?

𑀉𑀤𑁆𑀥𑀁 𑀅𑀥𑁄 [𑀉𑀤𑀸. 𑁬𑁧] 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀅𑀬𑀁 𑀅𑀳𑀲𑁆𑀫𑀻𑀢𑀺 𑀅𑀦𑀸𑀦𑀼𑀧𑀲𑁆𑀲𑀻;

𑀏𑀯𑀁 𑀯𑀺𑀫𑀼𑀢𑁆𑀢𑁄 𑀉𑀤𑀢𑀸𑀭𑀺 𑀑𑀖𑀁, 𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀅𑀧𑀼𑀦𑀩𑁆𑀪𑀯𑀸𑀬.

𑀲𑀻𑀮𑀸𑀦𑀺 𑀦𑀼 𑀔𑁄 𑀪𑀯𑀦𑁆𑀢𑀺 𑀓𑀺𑀫𑀢𑁆𑀣𑀺𑀬𑀸𑀦𑀺 𑀆𑀦𑀦𑁆𑀤𑁄 𑀧𑀼𑀘𑁆𑀙𑀢𑀺 𑀲𑀢𑁆𑀣𑀸𑀭𑀁.

𑀢𑀢𑁆𑀣 𑀓𑀢𑀫𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁?

‘‘𑀬𑀲𑁆𑀲 𑀲𑁂𑀮𑀽𑀧𑀫𑀁 𑀘𑀺𑀢𑁆𑀢𑀁, 𑀞𑀺𑀢𑀁 𑀦𑀸𑀦𑀼𑀧𑀓𑀫𑁆𑀧𑀢𑀺;

𑀯𑀺𑀭𑀢𑁆𑀢𑀁 𑀭𑀚𑀦𑀻𑀬𑁂𑀲𑀼, 𑀓𑁄𑀧𑀦𑁂𑀬𑁆𑀬𑁂 [𑀓𑁄𑀧𑀦𑀻𑀬𑁂 (𑀓.) 𑀧𑀲𑁆𑀲 𑀉𑀤𑀸. 𑁩𑁪] 𑀦 𑀓𑀼𑀧𑁆𑀧𑀢𑀺;

𑀬𑀲𑁆𑀲𑁂𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀓𑀼𑀢𑁄 𑀢𑀁 𑀤𑀼𑀓𑁆𑀔𑀫𑁂𑀲𑁆𑀲𑀢𑀻’’𑀢𑀺.

𑀲𑀸𑀭𑀺𑀧𑀼𑀢𑁆𑀢𑁄 𑀦𑀸𑀫 𑀪𑀕𑀯𑀸 𑀣𑁂𑀭𑀜𑁆𑀜𑀢𑀭𑁄 𑀲𑁄 𑀫𑀁 𑀆𑀲𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚 𑀘𑀸𑀭𑀺𑀓𑀁 𑀧𑀓𑁆𑀓𑀫𑀢𑀺, 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀩𑁆𑀬𑀸𑀓𑀭𑀡𑀁 𑀓𑀸𑀢𑀩𑁆𑀩𑀁. 𑀬𑀲𑁆𑀲 𑀦𑀽𑀦 𑀪𑀕𑀯𑀸 𑀓𑀸𑀬𑀕𑀢𑀸 𑀲𑀢𑀺 𑀅𑀪𑀸𑀯𑀺𑀢𑀸 𑀅𑀲𑁆𑀲 𑀅𑀩𑀳𑀼𑀮𑀻𑀓𑀢𑀸 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀁.

𑁧𑁫. 𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘?

𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀺 [𑀉𑀤𑀸. 𑁪𑁫], 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀺;

𑀢𑀲𑁆𑀫𑀸 𑀙𑀦𑁆𑀦𑀁 𑀯𑀺𑀯𑀭𑁂𑀣, 𑀏𑀯𑀁 𑀢𑀁 𑀦𑀸𑀢𑀺𑀯𑀲𑁆𑀲𑀢𑀺.

𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀲𑀁𑀓𑀺𑀮𑁂𑀲𑁄. 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀻𑀢𑀺 𑀯𑀸𑀲𑀦𑀸. 𑀢𑀫𑁄 𑀢𑀫𑀧𑀭𑀸𑀬𑀦𑁄𑀢𑀺 𑀯𑀺𑀢𑁆𑀣𑀸𑀭𑁂𑀦. 𑀢𑀢𑁆𑀣 𑀬𑁄 𑀘 𑀢𑀫𑁄 𑀬𑁄 𑀘 𑀢𑀫𑀧𑀭𑀸𑀬𑀦𑁄, 𑀅𑀬𑀁 𑀲𑀁𑀓𑀺𑀮𑁂𑀲𑁄. 𑀬𑁄 𑀘 𑀚𑁄𑀢𑀺 𑀬𑁄 𑀘 𑀚𑁄𑀢𑀺𑀧𑀭𑀸𑀬𑀦𑁄, 𑀅𑀬𑀁 𑀯𑀸𑀲𑀦𑀸.

𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁?

𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀬𑀤𑀸𑀬𑀲𑀁 𑀤𑀸𑀭𑀼𑀚𑀧𑀩𑁆𑀩𑀚𑀜𑁆𑀘 [𑀤𑀸𑀭𑀼𑀚𑀁 𑀧𑀩𑁆𑀩𑀚𑀜𑁆𑀘 (𑀧𑀻.) 𑀥. 𑀧. 𑁩𑁪𑁫; 𑀲𑀁. 𑀦𑀺. 𑁧.𑁧𑁨𑁧];

𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸.

𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀬𑀤𑀸 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸, 𑀅𑀬𑀁 𑀲𑀁𑀓𑀺𑀮𑁂𑀲𑁄. 𑀏𑀢𑀫𑁆𑀧𑀺 𑀙𑁂𑀢𑁆𑀯𑀸 𑀧𑀭𑀺𑀩𑁆𑀩𑀚𑀦𑁆𑀢𑀺 𑀥𑀻𑀭𑀸 𑀅𑀦𑀧𑁂𑀓𑁆𑀔𑀺𑀦𑁄 𑀲𑀩𑁆𑀩𑀓𑀸𑀫𑁂 𑀧𑀳𑀸𑀬𑀸𑀢𑀺, 𑀅𑀬𑀁 𑀦𑀺𑀩𑁆𑀩𑁂𑀥𑁄. 𑀬𑀁 𑀘𑁂𑀢𑀬𑀺𑀢𑀁 𑀧𑀓𑀧𑁆𑀧𑀺𑀢𑀁 𑀬𑀸 𑀘 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀺. 𑀇𑀫𑁂𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀲𑀁𑀓𑀺𑀮𑁂𑀲𑁄. 𑀧𑀘𑁆𑀙𑀺𑀫𑀓𑁂𑀳𑀺 𑀘𑀢𑀽𑀳𑀺 𑀦𑀺𑀩𑁆𑀩𑁂𑀥𑁄.

𑀢𑀢𑁆𑀣 𑀓𑀢𑀫𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁?

𑀅𑀬𑀁 𑀮𑁄𑀓𑁄 𑀲𑀦𑁆𑀢𑀸𑀧𑀚𑀸𑀢𑁄, 𑀨𑀲𑁆𑀲𑀧𑀭𑁂𑀢𑁄 𑀭𑁄𑀕𑀁 [𑀭𑁄𑀤𑀁 (𑀧𑀻.) 𑀧𑀲𑁆𑀲 𑀉𑀤𑀸. 𑁩𑁦] 𑀯𑀤𑀢𑀺 𑀅𑀢𑁆𑀢𑀢𑁄;

𑀬𑁂𑀦 𑀬𑁂𑀦 𑀳𑀺 𑀫𑀜𑁆𑀜𑀦𑁆𑀢𑀺, 𑀢𑀢𑁄 𑀢𑀁 𑀳𑁄𑀢𑀺 𑀅𑀜𑁆𑀜𑀣𑀸.

𑀅𑀜𑁆𑀜𑀣𑀸𑀪𑀸𑀯𑀻 𑀪𑀯𑀲𑀢𑁆𑀢𑁄 𑀮𑁄𑀓𑁄, 𑀪𑀯𑀧𑀭𑁂𑀢𑁄 𑀪𑀯𑀫𑁂𑀯𑀸𑀪𑀺𑀦𑀦𑁆𑀤𑀢𑀺;

𑀬𑀤𑀪𑀺𑀦𑀦𑁆𑀤𑀢𑀺 𑀢𑀁 𑀪𑀬𑀁, 𑀬𑀲𑁆𑀲 𑀪𑀸𑀬𑀢𑀺 𑀢𑀁 𑀤𑀼𑀓𑁆𑀔𑀁;

𑀪𑀯𑀯𑀺𑀧𑁆𑀧𑀳𑀸𑀦𑀸𑀬 𑀔𑁄 𑀧𑀦𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺.

𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀪𑀯𑁂𑀦 𑀪𑀯𑀲𑁆𑀲 𑀯𑀺𑀧𑁆𑀧𑀫𑁄𑀓𑁆𑀔𑀫𑀸𑀳𑀁𑀲𑀼, 𑀲𑀩𑁆𑀩𑁂𑀢𑁂 ‘‘𑀅𑀯𑀺𑀧𑁆𑀧𑀫𑀼𑀢𑁆𑀢𑀸 𑀪𑀯𑀲𑁆𑀫𑀸’’𑀢𑀺 𑀯𑀤𑀸𑀫𑀺. 𑀬𑁂 𑀯𑀸 𑀧𑀦 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀯𑀺𑀪𑀯𑁂𑀦 𑀪𑀯𑀲𑁆𑀲 𑀦𑀺𑀲𑁆𑀲𑀭𑀡𑀫𑀸𑀳𑀁𑀲𑀼, 𑀲𑀩𑁆𑀩𑁂𑀢𑁂 ‘‘𑀅𑀦𑀺𑀲𑁆𑀲𑀝𑀸 𑀪𑀯𑀲𑁆𑀫𑀸’’𑀢𑀺 𑀯𑀤𑀸𑀫𑀺. 𑀉𑀧𑀥𑀺𑀁 𑀳𑀺 𑀧𑀝𑀺𑀘𑁆𑀘 𑀤𑀼𑀓𑁆𑀔𑀫𑀺𑀤𑀁 𑀲𑀫𑁆𑀪𑁄𑀢𑀺, 𑀲𑀩𑁆𑀩𑀼𑀧𑀸𑀤𑀸𑀦𑀓𑁆𑀔𑀬𑀸 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄, 𑀮𑁄𑀓𑀫𑀺𑀫𑀁 𑀧𑀲𑁆𑀲, 𑀧𑀼𑀣𑀽 𑀅𑀯𑀺𑀚𑁆𑀚𑀸𑀬 𑀧𑀭𑁂𑀢𑀸 𑀪𑀽𑀢𑀸 𑀪𑀽𑀢𑀭𑀢𑀸 𑀪𑀯𑀸 𑀅𑀧𑀭𑀺𑀫𑀼𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺 𑀪𑀯𑀸 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀣𑀢𑀸𑀬 𑀲𑀩𑁆𑀩𑁂𑀢𑁂 𑀪𑀯𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺.

‘‘𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁, 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄;

𑀪𑀯𑀢𑀡𑁆𑀳𑀸 𑀧𑀳𑀻𑀬𑀢𑀺, 𑀯𑀺𑀪𑀯𑀁 𑀦𑀸𑀪𑀺𑀦𑀦𑁆𑀤𑀢𑀺;

𑀲𑀩𑁆𑀩𑀲𑁄 𑀢𑀡𑁆𑀳𑀸𑀦𑀁 𑀔𑀬𑀸, 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁.

‘‘𑀢𑀲𑁆𑀲 𑀦𑀺𑀩𑁆𑀩𑀼𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀅𑀦𑀼𑀧𑀸𑀤𑀸 𑀧𑀼𑀦𑀩𑁆𑀪𑀯𑁄 𑀦 𑀳𑁄𑀢𑀺;

𑀅𑀪𑀺𑀪𑀽𑀢𑁄 𑀫𑀸𑀭𑁄 𑀯𑀺𑀚𑀺𑀢𑀲𑀗𑁆𑀕𑀸𑀫𑁄, 𑀉𑀧𑁂𑀘𑁆𑀘𑀕𑀸 𑀲𑀩𑁆𑀩𑀪𑀯𑀸𑀦𑀺 𑀢𑀸𑀤𑀻’’𑀢𑀺.

𑀅𑀬𑀁 𑀮𑁄𑀓𑁄 𑀲𑀦𑁆𑀢𑀸𑀧𑀚𑀸𑀢𑁄 𑀬𑀸𑀯 𑀤𑀼𑀓𑁆𑀔𑀦𑁆𑀢𑀺 𑀬𑀁 𑀢𑀡𑁆𑀳𑀸 𑀲𑀁𑀓𑀺𑀮𑁂𑀲𑁄.

𑀬𑀁 𑀧𑀼𑀦𑀕𑁆𑀕𑀳𑀡𑀁 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀪𑀯𑁂𑀦 𑀪𑀯𑀲𑁆𑀲 𑀯𑀺𑀫𑁄𑀓𑁆𑀔𑀫𑀸𑀳𑀁𑀲𑀼, 𑀲𑀩𑁆𑀩𑁂𑀢𑁂 ‘‘𑀅𑀯𑀺𑀫𑀼𑀢𑁆𑀢𑀸 𑀪𑀯𑀲𑁆𑀫𑀸’’𑀢𑀺 𑀯𑀤𑀸𑀫𑀺. 𑀬𑁂 𑀯𑀸 𑀧𑀦 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀯𑀺𑀪𑀯𑁂𑀦 𑀪𑀯𑀲𑁆𑀲 𑀦𑀺𑀲𑁆𑀲𑀭𑀡𑀫𑀸𑀳𑀁𑀲𑀼 ‘‘𑀅𑀦𑀺𑀲𑁆𑀲𑀝𑀸 𑀪𑀯𑀲𑁆𑀫𑀸’’𑀢𑀺 𑀯𑀤𑀸𑀫𑀺. 𑀅𑀬𑀁 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄, 𑀢𑀁 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀘 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀘, 𑀉𑀪𑀬𑀫𑁂𑀢𑀁 𑀲𑀁𑀓𑀺𑀮𑁂𑀲𑁄. 𑀬𑀁 𑀧𑀼𑀦𑀕𑁆𑀕𑀳𑀡𑀁 𑀪𑀯𑀯𑀺𑀧𑁆𑀧𑀳𑀸𑀦𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺, 𑀬𑀸𑀯 𑀲𑀩𑁆𑀩𑀲𑁄 𑀉𑀧𑀸𑀤𑀸𑀦𑀓𑁆𑀔𑀬𑀸 𑀲𑀫𑁆𑀪𑀯𑀸, 𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁. 𑀢𑀲𑁆𑀲 𑀦𑀺𑀩𑁆𑀩𑀼𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯 𑀉𑀧𑀘𑁆𑀘𑀕𑀸 𑀲𑀩𑁆𑀩𑀪𑀯𑀸𑀦𑀺 𑀢𑀸𑀤𑀻𑀢𑀺 𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁. 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀅𑀦𑀼𑀲𑁄𑀢𑀕𑀸𑀫𑀻 𑀲𑀁𑀓𑀺𑀮𑁂𑀲𑁄 𑀞𑀺𑀢𑀢𑁆𑀢𑁄 𑀘 𑀧𑀝𑀺𑀲𑁄𑀢𑀕𑀸𑀫𑀻 𑀘 𑀦𑀺𑀩𑁆𑀩𑁂𑀥𑁄. 𑀣𑀮𑁂 𑀢𑀺𑀝𑁆𑀞𑀢𑀻𑀢𑀺 𑀅𑀲𑁂𑀓𑁆𑀔𑀪𑀽𑀫𑀺.

𑁧𑁬. 𑀢𑀢𑁆𑀣 𑀓𑀢𑀫𑀁 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁?

‘‘𑀤𑀤𑀢𑁄 [𑀉𑀤𑀸. 𑁭𑁫; 𑀤𑀻. 𑀦𑀺. 𑁨.𑁧𑁯𑁭] 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀺;

𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀁, 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲𑀦𑀺𑀩𑁆𑀩𑀼𑀢𑁄’’𑀢𑀺.

‘‘𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺, 𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀻’’𑀢𑀺 𑀯𑀸𑀲𑀦𑀸. ‘‘𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀁, 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲𑀦𑀺𑀩𑁆𑀩𑀼𑀢𑁄’’𑀢𑀺 𑀦𑀺𑀩𑁆𑀩𑁂𑀥𑁄.

𑀲𑁄𑀢𑀸𑀦𑀼𑀕𑀢𑁂𑀲𑀼 𑀥𑀫𑁆𑀫𑁂𑀲𑀼 𑀯𑀘𑀲𑀸 𑀧𑀭𑀺𑀘𑀺𑀢𑁂𑀲𑀼 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑁂𑀲𑀼 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑁂𑀲𑀼 𑀧𑀜𑁆𑀘𑀸𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸. 𑀇𑀥𑁂𑀓𑀘𑁆𑀘𑀲𑁆𑀲 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀸 𑀳𑁄𑀦𑁆𑀢𑀺 𑀥𑀸𑀢𑀸 𑀅𑀧𑀫𑀼𑀝𑁆𑀞𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀲𑁄 𑀬𑀼𑀜𑁆𑀚𑀦𑁆𑀢𑁄 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀯𑀺𑀲𑁂𑀲𑀁 𑀧𑀧𑁆𑀧𑁄𑀢𑀺. 𑀦𑁄 𑀘𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀯𑀺𑀲𑁂𑀲𑀁 𑀧𑀧𑁆𑀧𑁄𑀢𑀺, 𑀕𑀺𑀮𑀸𑀦𑁄 𑀧𑀧𑁆𑀧𑁄𑀢𑀺. 𑀦𑁄 𑀘𑁂 𑀕𑀺𑀮𑀸𑀦𑁄 𑀧𑀧𑁆𑀧𑁄𑀢𑀺, 𑀫𑀭𑀡𑀓𑀸𑀮𑀲𑀫𑀬𑁂 𑀧𑀧𑁆𑀧𑁄𑀢𑀺. 𑀦𑁄 𑀘𑁂 𑀫𑀭𑀡𑀓𑀸𑀮𑀲𑀫𑀬𑁂 𑀧𑀧𑁆𑀧𑁄𑀢𑀺, 𑀤𑁂𑀯𑀪𑀽𑀢𑁄 𑀧𑀸𑀧𑀼𑀡𑀸𑀢𑀺. 𑀦𑁄 𑀘𑁂 𑀤𑁂𑀯𑀪𑀽𑀢𑁄 𑀧𑀸𑀧𑀼𑀡𑀸𑀢𑀺, 𑀢𑁂𑀦 𑀥𑀫𑁆𑀫𑀭𑀸𑀕𑁂𑀦 𑀢𑀸𑀬 𑀥𑀫𑁆𑀫𑀦𑀦𑁆𑀤𑀺𑀬𑀸 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺.

𑀢𑀢𑁆𑀣𑀸𑀬𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀦𑀺𑀩𑁆𑀩𑁂𑀥𑁄. 𑀬𑀁 𑀲𑀫𑁆𑀧𑀭𑀸𑀬𑁂 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀯𑀸𑀲𑀦𑀸. 𑀇𑀫𑀸𑀦𑀺 𑀲𑁄𑀴𑀲 𑀲𑀼𑀢𑁆𑀢𑀸𑀦𑀺 𑀲𑀩𑁆𑀩𑀲𑀸𑀲𑀦𑀁 𑀅𑀢𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑀺. 𑀇𑀫𑁂𑀳𑀺 𑀲𑁄𑀴𑀲𑀳𑀺 𑀲𑀼𑀢𑁆𑀢𑁂𑀳𑀺 𑀦𑀯𑀯𑀺𑀥𑁄 𑀲𑀼𑀢𑁆𑀢𑀦𑁆𑀢𑁄 𑀯𑀺𑀪𑀢𑁆𑀢𑁄 𑀪𑀯𑀢𑀺. 𑀲𑁄 𑀘 𑀧𑀜𑁆𑀜𑀯𑀢𑁄 𑀦𑁄 𑀤𑀼𑀧𑁆𑀧𑀜𑁆𑀜𑀲𑁆𑀲, 𑀬𑀼𑀢𑁆𑀢𑀲𑁆𑀲 𑀦𑁄 𑀅𑀬𑀼𑀢𑁆𑀢𑀲𑁆𑀲, 𑀅𑀓𑀫𑁆𑀫𑀲𑁆𑀲 𑀯𑀺𑀳𑀸𑀭𑀺𑀲𑁆𑀲 𑀧𑀓𑀢𑀺𑀬𑀸 𑀮𑁄𑀓𑁂 𑀲𑀁𑀓𑀺𑀮𑁂𑀲𑁄 𑀘𑀭𑀢𑀺. 𑀲𑁄 𑀲𑀁𑀓𑀺𑀮𑁂𑀲𑁄 𑀢𑀺𑀯𑀺𑀥𑁄 𑁋 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄. 𑀢𑀢𑁄 𑀲𑀁𑀓𑀺𑀮𑁂𑀲𑀢𑁄 𑀉𑀝𑁆𑀞𑀳𑀦𑁆𑀢𑁄 𑀲𑀁𑀓𑀺𑀮𑁂𑀲𑁄 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀳𑀢𑀺, 𑀮𑁄𑀓𑀺𑀬𑁂𑀲𑀼 𑀧𑀢𑀺𑀝𑁆𑀞𑀳𑀢𑀻𑀢𑀺. 𑀢𑀢𑁆𑀣𑀸𑀓𑀼𑀲𑀮𑁄 𑀤𑀺𑀝𑁆𑀞𑀢𑁄 𑀲𑀘𑁂 𑀢𑀁 𑀲𑀻𑀮𑀜𑁆𑀘 𑀤𑀺𑀝𑁆𑀞𑀺𑀜𑁆𑀘 𑀧𑀭𑀸𑀫𑀲𑀢𑀺, 𑀢𑀲𑁆𑀲 𑀲𑁄 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀳𑁄𑀢𑀺. 𑀲𑀘𑁂 𑀧𑀦𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀁 [𑀪𑀯𑀺𑀲𑁆𑀲𑀸𑀫𑀺 (𑀧𑀻.)] 𑀤𑁂𑀯𑀜𑁆𑀜𑀢𑀭𑁄 𑀯𑀸’’𑀢𑀺 𑀬𑀲𑁆𑀲 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀏𑀢𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀪𑀯𑀢𑀺. 𑀲𑀘𑁂 𑀧𑀦 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁄 𑀅𑀧𑀭𑀸𑀫𑀝𑁆𑀞𑀲𑁆𑀲 𑀳𑀺 𑀲𑀻𑀮𑀯𑀢𑀁 𑀳𑁄𑀢𑀺, 𑀢𑀲𑁆𑀲 𑀢𑀁 𑀲𑀻𑀮𑀯𑀢𑁄 𑀬𑁄𑀦𑀺𑀲𑁄 𑀕𑀳𑀺𑀢𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑀁 𑀚𑀦𑁂𑀢𑀺 𑀬𑀸𑀯 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁, 𑀢𑀜𑁆𑀘 𑀢𑀲𑁆𑀲 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀓𑀸𑀮𑀗𑁆𑀓𑀢𑀲𑁆𑀲 𑀯𑀸 𑀢𑀫𑁆𑀳𑀺𑀬𑁂𑀯 𑀯𑀸 𑀧𑀦 𑀅𑀧𑀭𑀸𑀧𑀭𑀺𑀬𑀸𑀬𑁂𑀦 𑀯𑀸, 𑀅𑀜𑁆𑀜𑁂𑀲𑀼 𑀔𑀦𑁆𑀥𑁂𑀲𑀼 𑀏𑀯𑀁 𑀲𑀼𑀢𑀁 ‘‘𑀲𑀼𑀘𑀭𑀺𑀢𑀁 𑀯𑀸𑀲𑀦𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀲𑀻𑀮𑁂𑀲𑀼 𑀞𑀺𑀢𑀲𑁆𑀲 𑀯𑀺𑀦𑀻𑀯𑀭𑀡𑀁 𑀘𑀺𑀢𑁆𑀢𑀁, 𑀢𑀁 𑀢𑀢𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀸𑀬 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀲𑁄 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺; 𑀬𑀤𑀺 𑀯𑀸 𑀲𑀸𑀲𑀦𑀦𑁆𑀢𑀭𑁂, 𑀅𑀘𑁆𑀘𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀬𑀤𑀺 𑀯𑀸 𑀏𑀓𑀸𑀲𑀦𑁂 𑀙 𑀅𑀪𑀺𑀜𑁆𑀜𑁂. 𑀢𑀢𑁆𑀣 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀅𑀭𑀺𑀬𑀥𑀫𑁆𑀫𑁂 𑀧𑀸𑀧𑀼𑀡𑀦𑁆𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻 𑀘 𑀥𑀫𑁆𑀫𑀸𑀦𑀼𑀲𑀸𑀭𑀻 𑀘. 𑀢𑀢𑁆𑀣 𑀥𑀫𑁆𑀫𑀸𑀦𑀼𑀲𑀸𑀭𑀻 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀲𑀤𑁆𑀥𑀸𑀦𑀼𑀲𑀸𑀭𑀻 𑀦𑁂𑀬𑁆𑀬𑁄. 𑀢𑀢𑁆𑀣 𑀉𑀕𑁆𑀖𑀝𑀺𑀢𑀜𑁆𑀜𑀽 𑀤𑀼𑀯𑀺𑀥𑁄 𑁋 𑀓𑁄𑀘𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀓𑁄𑀘𑀺 𑀫𑀼𑀤𑀺𑀦𑁆𑀤𑁆𑀭𑀺𑀬𑁄. 𑀢𑀢𑁆𑀣 𑀦𑁂𑀬𑁆𑀬𑁄𑀧𑀺 𑀤𑀼𑀯𑀺𑀥𑁄 𑁋 𑀓𑁄𑀘𑀺 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀓𑁄𑀘𑀺 𑀫𑀼𑀤𑀺𑀦𑁆𑀤𑁆𑀭𑀺𑀬𑁄. 𑀢𑀢𑁆𑀣 𑀬𑁄 𑀘 𑀉𑀕𑁆𑀖𑀝𑀺𑀢𑀜𑁆𑀜𑀽 𑀫𑀼𑀤𑀺𑀦𑁆𑀤𑁆𑀭𑀺𑀬𑁄, 𑀬𑁄 𑀘 𑀦𑁂𑀬𑁆𑀬𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄, 𑀇𑀫𑁂 𑀧𑀼𑀕𑁆𑀕𑀮𑀸 𑀅𑀲𑀫𑀺𑀦𑁆𑀤𑁆𑀭𑀺𑀬𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀇𑀫𑁂 𑀧𑀼𑀕𑁆𑀕𑀮𑀸 𑀲𑀫𑀺𑀦𑁆𑀤𑁆𑀭𑀺𑀬𑀸 𑀧𑀭𑀺𑀳𑀸𑀬𑀦𑁆𑀢𑀺 𑀘 𑀉𑀕𑁆𑀖𑀝𑀺𑀢𑀜𑁆𑀜𑀼𑀢𑁄, 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀦𑁂𑀬𑁆𑀬𑀢𑁄, 𑀇𑀫𑁂 𑀫𑀚𑁆𑀛𑀺𑀫𑀸 𑀪𑀽𑀫𑀺𑀕𑀢𑀸 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀳𑁄𑀢𑀺. 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸.

𑁧𑁭. 𑀢𑀢𑁆𑀣 𑀘𑀢𑀼𑀢𑁆𑀣𑀸 𑀧𑀦 𑀧𑀜𑁆𑀘𑀫𑀸 𑀉𑀕𑁆𑀖𑀝𑀺𑀢𑀜𑁆𑀜𑀽 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀦𑁂𑀬𑁆𑀬𑁄 𑀘, 𑀢𑀢𑁆𑀣 𑀉𑀕𑁆𑀖𑀝𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀝𑀺𑀮𑀪𑀺𑀢𑁆𑀯𑀸 𑀤𑀲𑁆𑀲𑀦𑀪𑀽𑀫𑀺𑀬𑀁 𑀞𑀺𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘 𑀧𑀸𑀧𑀼𑀡𑀸𑀢𑀺, 𑀏𑀓𑀩𑀻𑀚𑀻 𑀳𑁄𑀢𑀺 𑀧𑀞𑀫𑁄 𑀲𑁄𑀢𑀸𑀧𑀦𑁆𑀦𑁄. 𑀢𑀢𑁆𑀣 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀝𑀺𑀮𑀪𑀺𑀢𑁆𑀯𑀸 𑀤𑀲𑁆𑀲𑀦𑀪𑀽𑀫𑀺𑀬𑀁 𑀞𑀺𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘 𑀧𑀸𑀧𑀼𑀡𑀸𑀢𑀺, 𑀓𑁄𑀮𑀁𑀓𑁄𑀮𑁄 𑀘 𑀳𑁄𑀢𑀺 𑀤𑀼𑀢𑀺𑀬𑁄 𑀲𑁄𑀢𑀸𑀧𑀦𑁆𑀦𑁄. 𑀢𑀢𑁆𑀣 𑀦𑁂𑀬𑁆𑀬𑁄 𑀧𑀼𑀕𑁆𑀕𑀮𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀝𑀺𑀮𑀪𑀺𑀢𑁆𑀯𑀸 𑀤𑀲𑁆𑀲𑀦𑀪𑀽𑀫𑀺𑀬𑀁 𑀞𑀺𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘 𑀧𑀸𑀧𑀼𑀡𑀸𑀢𑀺, 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀘 𑀳𑁄𑀢𑀺, 𑀅𑀬𑀁 𑀢𑀢𑀺𑀬𑁄 𑀲𑁄𑀢𑀸𑀧𑀦𑁆𑀦𑁄. 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸 𑀇𑀦𑁆𑀤𑁆𑀭𑀺𑀬𑀯𑁂𑀫𑀢𑁆𑀢𑀢𑀸𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀞𑀺𑀢𑀸.

𑀉𑀕𑁆𑀖𑀝𑀺𑀢𑀜𑁆𑀜𑀽 𑀏𑀓𑀩𑀻𑀚𑀻 𑀳𑁄𑀢𑀺, 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀓𑁄𑀮𑀁𑀓𑁄𑀮𑁄 𑀳𑁄𑀢𑀺, 𑀦𑁂𑀬𑁆𑀬𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀳𑁄𑀢𑀺. 𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁. 𑀲𑀘𑁂 𑀧𑀦 𑀢𑀤𑀼𑀢𑁆𑀢𑀭𑀺 𑀯𑀸𑀬𑀫𑀢𑀺, 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺. 𑀢𑀢𑁆𑀣 𑀉𑀕𑁆𑀖𑀝𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀬𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄, 𑀢𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺 𑁋 𑀅𑀦𑀸𑀕𑀸𑀫𑀺𑀨𑀮𑀁 𑀧𑀸𑀧𑀼𑀡𑀺𑀢𑁆𑀯𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀘 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀘. 𑀢𑀢𑁆𑀣 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀬𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄, 𑀢𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺 𑁋 𑀅𑀦𑀸𑀕𑀸𑀫𑀺𑀨𑀮𑀁 𑀧𑀸𑀧𑀼𑀡𑀦𑁆𑀢𑀺 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀘 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀘. 𑀢𑀢𑁆𑀣 𑀦𑁂𑀬𑁆𑀬𑁄 𑀅𑀦𑀸𑀕𑀸𑀫𑀺𑀨𑀮𑀁 𑀧𑀸𑀧𑀼𑀡𑀦𑁆𑀢𑁄 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀳𑁄𑀢𑀺, 𑀉𑀕𑁆𑀖𑀝𑀺𑀢𑀜𑁆𑀜𑀽 𑀘 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀘, 𑀇𑀦𑁆𑀤𑁆𑀭𑀺𑀬𑀦𑀸𑀦𑀢𑁆𑀢𑁂𑀦 𑀉𑀕𑁆𑀖𑀝𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀉𑀕𑁆𑀖𑀝𑀺𑀢𑀜𑁆𑀜𑀽 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀳𑁄𑀢𑀺. 𑀉𑀕𑁆𑀖𑀝𑀺𑀢𑀜𑁆𑀜𑀽 𑀘 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀘 𑀇𑀦𑁆𑀤𑁆𑀭𑀺𑀬𑀦𑀸𑀦𑀢𑁆𑀢𑁂𑀦 𑀉𑀕𑁆𑀖𑀝𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀉𑀕𑁆𑀖𑀝𑀺𑀢𑀜𑁆𑀜𑀽 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀦𑁂𑀬𑁆𑀬𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀦𑁂𑀬𑁆𑀬𑁄 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀳𑁄𑀢𑀺. 𑀇𑀢𑀺 𑀧𑀜𑁆𑀘 𑀅𑀦𑀸𑀕𑀸𑀫𑀺𑀦𑁄, 𑀙𑀝𑁆𑀞𑁄 𑀲𑀓𑀤𑀸𑀕𑀸𑀫𑀻, 𑀢𑀬𑁄 𑀘 𑀲𑁄𑀢𑀸𑀧𑀦𑁆𑀦𑀸𑀢𑀺 𑀇𑀫𑁂 𑀦𑀯 𑀲𑁂𑀓𑁆𑀔𑀸.

𑀢𑀢𑁆𑀣 𑀉𑀕𑁆𑀖𑀝𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑁄 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀘. 𑀢𑀢𑁆𑀣 𑀉𑀕𑁆𑀖𑀝𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑁄 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺, 𑀞𑀺𑀢𑀓𑀧𑁆𑀧𑀻 [𑀞𑀺𑀢𑀓𑀧𑁆𑀧𑀺 (𑀧𑀻. 𑀓.) 𑀧𑀲𑁆𑀲 𑀧𑀼. 𑀧. 𑁧𑁭] 𑀘 𑀧𑀝𑀺𑀯𑁂𑀥𑀦𑀪𑀸𑀯𑁄 𑀧𑀼𑀕𑁆𑀕𑀮𑁄 𑀘 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀲𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑁄 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺 𑀘𑁂𑀢𑀦𑀸𑀪𑀩𑁆𑀩𑁄 𑀘 𑀭𑀓𑁆𑀔𑀡𑀸𑀪𑀩𑁆𑀩𑁄 𑀘. 𑀢𑀢𑁆𑀣 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑁄 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺, 𑀲𑀘𑁂 𑀘𑁂𑀢𑁂𑀢𑀺 𑀦 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀦𑁄 𑀘𑁂 𑀘𑁂𑀢𑁂𑀢𑀺 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺. 𑀲𑀘𑁂 𑀅𑀦𑀼𑀭𑀓𑁆𑀔𑀢𑀺 𑀦 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀦𑁄 𑀘𑁂 𑀅𑀦𑀼𑀭𑀓𑁆𑀔𑀢𑀺 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺. 𑀢𑀢𑁆𑀣 𑀦𑁂𑀬𑁆𑀬𑁄 𑀧𑀼𑀕𑁆𑀕𑀮𑁄 𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀧𑀭𑀺𑀳𑀸𑀦𑀥𑀫𑁆𑀫𑁄 𑀳𑁄𑀢𑀺 𑀓𑀫𑁆𑀫𑀦𑀺𑀬𑀢𑁄 𑀯𑀸 𑀲𑀫𑀲𑀻𑀲𑀺 𑀯𑀸, 𑀇𑀫𑁂 𑀦𑀯 𑀅𑀭𑀳𑀦𑁆𑀢𑁄 𑀇𑀤𑀁 𑀘𑀢𑀼𑀩𑁆𑀩𑀺𑀥𑀁 𑀲𑀼𑀢𑁆𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁. 𑀇𑀫𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀢𑀣𑀸𑀕𑀢𑀲𑁆𑀲 𑀤𑀲𑀯𑀺𑀥𑀁 𑀩𑀮𑀁 𑀧𑀯𑀢𑁆𑀢𑀢𑀺.

𑁧𑁮. 𑀓𑀢𑀫𑀁 𑀤𑀲𑀯𑀺𑀥𑀁? 𑀇𑀥 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀢𑁂 𑀥𑀫𑁆𑀫𑀘𑀓𑁆𑀓𑁂 𑀫𑀳𑁂𑀲𑀓𑁆𑀔𑀸 𑀤𑁂𑀯𑀧𑀼𑀢𑁆𑀢𑀸 𑀬𑀸𑀘𑀦𑀸𑀬 𑀅𑀪𑀺𑀬𑀸𑀢𑀸 [𑀅𑀢𑀺𑀬𑀸𑀢𑀸 (𑀧𑀻. 𑀓.)] 𑀳𑁄𑀦𑁆𑀢𑀺 ‘‘𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫’’𑀦𑁆𑀢𑀺. 𑀲𑁄 𑀅𑀦𑀼𑀢𑁆𑀢𑀭𑁂𑀦 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲𑀸𑀲𑀺 𑀲𑀢𑁆𑀢𑀸𑀦𑀁 𑀢𑀬𑁄 𑀭𑀸𑀲𑀻𑀦𑀁 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀅𑀦𑀺𑀬𑀢𑁄. 𑀢𑀢𑁆𑀣 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀭𑀸𑀲𑀺 𑀫𑀺𑀘𑁆𑀙𑀸𑀲𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀅𑀲𑀢𑁆𑀣𑀼𑀓𑁄 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀲𑀫𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀢𑀢𑁆𑀣 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀭𑀸𑀲𑀺 𑀅𑀭𑀺𑀬𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀅𑀦𑀭𑀺𑀬𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀢𑀢𑁆𑀣 𑀅𑀦𑀺𑀬𑀢𑁄 𑀭𑀸𑀲𑀺 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀫𑀸𑀦𑀁 𑀲𑀫𑁆𑀫𑀢𑁆𑀢𑀦𑀺𑀬𑀢𑀭𑀸𑀲𑀺𑀁 𑀕𑀫𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀫𑀺𑀘𑁆𑀙𑀸𑀧𑀝𑀺𑀧𑀚𑁆𑀚𑀫𑀸𑀦𑁄 𑀲𑀫𑁆𑀫𑀢𑁆𑀢𑀦𑀺𑀬𑀢𑀭𑀸𑀲𑀺𑀁 𑀕𑀫𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀫𑀸𑀦𑀁 𑀲𑀫𑁆𑀫𑀢𑁆𑀢𑀦𑀺𑀬𑀢𑀭𑀸𑀲𑀺𑀁 𑀕𑀫𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀫𑀺𑀘𑁆𑀙𑀸𑀧𑀝𑀺𑀧𑀚𑁆𑀚𑀫𑀸𑀦𑀁 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀭𑀸𑀲𑀺𑀁 𑀕𑀫𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀇𑀫𑁂 𑀢𑀬𑁄 𑀅𑀦𑀼𑀢𑁆𑀢𑀭𑁂𑀦 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀯𑁄𑀮𑁄𑀓𑁂𑀦𑁆𑀢𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑁂 𑀲𑀢𑁄 𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀏𑀢𑁆𑀢𑀯𑀢𑀸 𑀫𑀁 𑀓𑁄𑀘𑀺 𑀲𑀳𑀥𑀫𑁆𑀫𑁂𑀦 𑀧𑀝𑀺𑀘𑁄𑀤𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀯𑀻𑀢𑀭𑀸𑀕𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 𑀅𑀔𑀻𑀡𑀸𑀲𑀯𑀢𑀸𑀬 𑀲𑀳𑀥𑀫𑁆𑀫𑁂𑀦 𑀓𑁄𑀘𑀺 𑀧𑀝𑀺𑀘𑁄𑀤𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑀢𑁄 𑀧𑀦 𑀇𑀫𑀲𑁆𑀲 𑀅𑀦𑀺𑀬𑀢𑀲𑁆𑀲 𑀭𑀸𑀲𑀺𑀲𑁆𑀲 𑀥𑀫𑁆𑀫𑀤𑁂𑀲𑀦𑀸, 𑀲𑀸 𑀦 𑀤𑀺𑀲𑁆𑀲𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀢𑀣𑀸 𑀑𑀯𑀤𑀺𑀢𑁄 𑀬𑀁 𑀧𑀦 𑀫𑁂 𑀅𑀦𑀺𑀬𑀢𑀭𑀸𑀲𑀺 𑀲𑀸𑀯𑀓𑁄 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀁 𑀦 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁧𑁯. 𑀬𑀁 𑀔𑁄 𑀫𑀼𑀦𑀺 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀦𑀸𑀦𑀸𑀦𑀺𑀭𑀼𑀢𑁆𑀢𑀺𑀬𑁄 𑀤𑁂𑀯𑀦𑀸𑀕𑀬𑀓𑁆𑀔𑀸𑀦𑀁 𑀤𑀫𑁂𑀢𑀺 𑀥𑀫𑁆𑀫𑁂 𑀯𑀯𑀢𑁆𑀣𑀸𑀦𑁂𑀦 𑀯𑀢𑁆𑀯𑀸 𑀓𑀸𑀭𑀡𑀢𑁄 𑀅𑀜𑁆𑀜𑀁 𑀧𑀸𑀭𑀁 𑀕𑀫𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀬𑀢𑁄 𑀧𑀦𑀺𑀫𑀸 𑀦𑀺𑀭𑀼𑀢𑁆𑀢𑀺𑀢𑁄 𑀲𑀢𑁆𑀢 𑀲𑀢𑁆𑀢 𑀦𑀺𑀭𑀼𑀢𑁆𑀢𑀺𑀬𑁄 𑀦𑀸𑀪𑀺𑀲𑀫𑁆𑀪𑀼𑀦𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸. 𑀦𑀺𑀭𑀼𑀢𑁆𑀢𑀺 𑀔𑁄 𑀧𑀦 𑀅𑀪𑀺𑀲𑀫𑀕𑁆𑀕𑀭𑀢𑀸𑀦𑀁 𑀲𑀸𑀯𑀓𑀸𑀦𑀁 𑀢𑀫𑀢𑁆𑀣𑀫𑀯𑀺𑀜𑁆𑀜𑀸𑀧𑀬𑁂𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀫𑀳𑁂𑀲𑀓𑁆𑀔𑀸 𑀤𑁂𑀯𑀧𑀼𑀢𑁆𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑁂 𑀧𑀼𑀘𑁆𑀙𑀺𑀁𑀲𑀼. 𑀓𑀸𑀬𑀺𑀓𑁂𑀦 𑀯𑀸 𑀫𑀸𑀦𑀲𑀺𑀓𑁂𑀦 𑀯𑀸 𑀧𑀭𑀺𑀧𑀻𑀴𑀺𑀢𑀲𑁆𑀲 𑀳𑀢𑁆𑀣𑀓𑀼𑀡𑀻𑀢𑀺 𑀯𑀸 𑀧𑀸𑀤𑁂 𑀯𑀸 𑀔𑀜𑁆𑀚𑁂 𑀤𑀦𑁆𑀥𑀲𑁆𑀲 [𑀤𑀦𑁆𑀢𑀲𑁆𑀲 (𑀧𑀻. 𑀓.)] 𑀲𑁄 𑀅𑀢𑁆𑀣𑁄 𑀦 𑀧𑀭𑀺𑀪𑀸𑀚𑀺𑀬𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀬𑀫𑁆𑀳𑀺 𑀢𑀁 𑀢𑁂𑀲𑀁 𑀳𑁄𑀢𑀺 𑀢𑀫𑁆𑀳𑀺 𑀅𑀲𑀦𑁆𑀢𑀁 𑀪𑀯𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑀁 𑀳𑀺 𑀦𑀸𑀲𑀁 𑀢𑁂𑀲𑀁 𑀦 𑀪𑀯𑀢𑀺, 𑀢𑀫𑁆𑀳𑀺 𑀦𑀸𑀲𑀁 𑀢𑁂𑀲𑀁 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀏𑀯𑀁 𑀲𑀫𑀼𑀤𑀬𑀲𑁆𑀲 𑀦𑀺𑀭𑁄𑀥𑀸𑀬 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸. 𑀫𑀸𑀭𑁄 𑀯𑀸 𑀇𑀦𑁆𑀤𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀢𑀣𑀸𑀕𑀢𑁄 𑀯𑀸 𑀘𑀓𑁆𑀓𑀯𑀢𑁆𑀢𑀻 𑀯𑀸 𑀲𑁄 𑀯𑀢 𑀦𑀸𑀫 𑀫𑀸𑀢𑀼𑀕𑀸𑀫𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀭𑀺𑀲𑁄 𑀅𑀲𑁆𑀲 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀯𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀇𑀢𑀺𑀲𑁆𑀲 𑀏𑀯𑀭𑀽𑀧𑀁 𑀩𑀮𑀁 𑀏𑀯𑀭𑀽𑀧𑀁 𑀜𑀸𑀡𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀁 𑀧𑀞𑀫𑀁 𑀢𑀣𑀸𑀕𑀢𑀩𑀮𑀁 𑀢𑀁 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁. 𑀢𑀻𑀳𑀺 𑀭𑀸𑀲𑀻𑀳𑀺 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑁂𑀳𑀺 𑀘𑀢𑀽𑀳𑀺 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀧𑀯𑀢𑁆𑀢𑀺𑀬𑀁 𑀦𑀺𑀯𑀢𑁆𑀢𑀺𑀬𑀁 𑀪𑀸𑀕𑀺𑀬𑀜𑁆𑀘. 𑀓𑀼𑀲𑀮𑀁 𑀓𑀼𑀲𑀮𑀯𑀺𑀧𑀸𑀓𑁂𑀲𑀼 𑀘 𑀉𑀧𑀧𑀚𑁆𑀚𑀢𑀺 𑀬𑀜𑁆𑀘 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁. 𑀇𑀤𑀁 𑀧𑀞𑀫𑀁 𑀩𑀮𑀁 𑀢𑀣𑀸𑀕𑀢𑁄 𑀏𑀯𑀁 𑀚𑀸𑀦𑀸𑀢𑀺.

𑀬𑁂𑀲𑀁 𑀧𑀦 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀦𑀸𑀬𑀁 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻𑀬𑁂𑀯𑀸𑀬𑀁 𑀧𑀝𑀺𑀧𑀤𑀸. 𑀢𑀢𑁆𑀣 𑀲𑀺𑀬𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀏𑀲𑀸𑀧𑀺 𑀦 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀲𑀓𑁆𑀓𑀸𑀬𑀲𑀫𑀼𑀤𑀬𑀕𑀸𑀫𑀺𑀦𑀻𑀬𑁂𑀯𑀸𑀬𑀁 𑀧𑀝𑀺𑀧𑀤𑀸 𑀳𑁄𑀢𑀼, 𑀅𑀬𑀁 𑀢𑀢𑁆𑀣 𑀢𑀢𑁆𑀣 𑀧𑀝𑀺𑀧𑀢𑁆𑀢𑀺𑀬𑀸 𑀞𑀺𑀢𑁄 𑀕𑀘𑁆𑀙𑀢𑀺 𑀦𑀺𑀩𑁆𑀩𑀸𑀦𑀁, 𑀕𑀘𑁆𑀙𑀢𑀺 𑀅𑀧𑀸𑀬𑀁, 𑀕𑀘𑁆𑀙𑀢𑀺 𑀤𑁂𑀯𑀫𑀦𑀼𑀲𑁆𑀲𑀲𑁆𑀲. 𑀬𑀁 𑀬𑀁 𑀯𑀸 𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑁂𑀬𑁆𑀬 𑀲𑀩𑁆𑀩𑀢𑁆𑀣 𑀕𑀘𑁆𑀙𑁂𑀬𑁆𑀬, 𑀅𑀬𑀁 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀬𑀁 𑀏𑀢𑁆𑀣 𑀜𑀸𑀡𑀁 𑀬𑀣𑀸𑀪𑀽𑀢𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀜𑀸𑀡𑀁 𑀤𑀼𑀢𑀺𑀬𑀁 𑀢𑀣𑀸𑀕𑀢𑀩𑀮𑀁.

𑀲𑀸 𑀔𑁄 𑀧𑀦𑀸𑀬𑀁 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀦𑀸𑀦𑀸𑀥𑀺𑀫𑀼𑀢𑁆𑀢𑀸 𑀓𑁂𑀘𑀺 𑀓𑀸𑀫𑁂𑀲𑀼 𑀓𑁂𑀘𑀺 𑀤𑀼𑀓𑁆𑀓𑀭𑀓𑀸𑀭𑀺𑀬𑀁 𑀓𑁂𑀘𑀺 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀓𑁂𑀘𑀺 𑀲𑀁𑀲𑀸𑀭𑁂𑀦 𑀲𑀼𑀤𑁆𑀥𑀺𑀁 𑀧𑀘𑁆𑀘𑁂𑀦𑁆𑀢𑀺 𑀓𑁂𑀘𑀺 𑀅𑀦𑀚𑁆𑀚𑀸𑀪𑀸𑀯𑀦𑀸𑀢𑀺. 𑀢𑁂𑀦 𑀢𑁂𑀦 𑀘𑀭𑀺𑀢𑁂𑀦 𑀯𑀺𑀦𑀺𑀩𑀦𑁆𑀥𑀸𑀦𑀁 𑀲𑀢𑁆𑀢𑀸𑀦𑀁 𑀬𑀁 𑀜𑀸𑀡𑀁 𑀬𑀣𑀸𑀪𑀽𑀢𑀁 𑀦𑀸𑀦𑀸𑀕𑀢𑀁 𑀮𑁄𑀓𑀲𑁆𑀲 𑀅𑀦𑁂𑀓𑀸𑀥𑀺𑀫𑀼𑀢𑁆𑀢𑀕𑀢𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀇𑀤𑀁 𑀢𑀢𑀺𑀬𑀁 𑀢𑀣𑀸𑀕𑀢𑀩𑀮𑀁.

𑀢𑀢𑁆𑀣 𑀲𑀢𑁆𑀢𑀸𑀦𑀁 𑀅𑀥𑀺𑀫𑀼𑀢𑁆𑀢𑀸 𑀪𑀯𑀦𑁆𑀢𑀺 𑀆𑀲𑁂𑀯𑀦𑁆𑀢𑀺 𑀪𑀸𑀯𑁂𑀦𑁆𑀢𑀺 𑀩𑀳𑀼𑀮𑀻𑀓𑀭𑁄𑀦𑁆𑀢𑀺. 𑀢𑁂𑀲𑀁 𑀓𑀫𑁆𑀫𑀼𑀧𑀲𑀬𑀸𑀦𑀁 𑀢𑀤𑀸𑀥𑀺𑀫𑀼𑀢𑁆𑀢𑀸𑀦𑀁. 𑀲𑀸 𑀘𑁂𑀯 𑀥𑀸𑀢𑀼 𑀲𑀁𑀯𑀳𑀢𑀺. 𑀓𑀢𑀭𑀸 𑀧𑀦𑁂𑀲𑀸 𑀥𑀸𑀢𑀼 𑀦𑁂𑀓𑁆𑀔𑀫𑁆𑀫𑀥𑀸𑀢𑀼 𑀩𑀮𑀥𑀸𑀢𑀼 𑀓𑀸𑀘𑀺 𑀲𑀫𑁆𑀧𑀢𑁆𑀢𑀺 𑀓𑀸𑀘𑀺 𑀫𑀺𑀘𑁆𑀙𑀢𑁆𑀢𑀜𑁆𑀘 𑀥𑀸𑀢𑀼 𑀅𑀥𑀺𑀫𑀼𑀢𑁆𑀢𑀸 𑀪𑀯𑀦𑁆𑀢𑀺. 𑀅𑀜𑁆𑀜𑀢𑀭𑀸 𑀉𑀢𑁆𑀢𑀭𑀺 𑀦 𑀲𑀫𑀦𑀼𑀧𑀲𑁆𑀲𑀦𑁆𑀢𑀺. 𑀢𑁂 𑀢𑀤𑁂𑀯𑀝𑁆𑀞𑀸𑀦𑀁 𑀫𑀬𑀸 𑀚𑀭𑀸𑀫𑀭𑀡𑀲𑁆𑀲 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀦𑁆𑀢𑀺 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺. 𑀬𑀣𑀸 𑀪𑀕𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀪𑀸𑀲𑀺𑀢𑀁. 𑀬𑀁 𑀢𑀢𑁆𑀣 𑀬𑀣𑀸𑀪𑀽𑀢𑀁 𑀜𑀸𑀡𑀁. 𑀇𑀤𑀁 𑀯𑀼𑀘𑁆𑀘𑀢𑀺 𑀘𑀢𑀼𑀢𑁆𑀣𑀁 𑀢𑀣𑀸𑀕𑀢𑀩𑀮𑀁.

𑀢𑀢𑁆𑀣 𑀬𑀁𑀬𑁂𑀯 𑀥𑀸𑀢𑀼 [𑀬𑀁 𑀬𑀤𑁂𑀯 𑀥𑀸𑀢𑀼𑀁 (𑀓.)] 𑀲𑁂𑀝𑁆𑀞𑀦𑁆𑀢𑀺 𑀢𑀁 𑀢𑀁 𑀓𑀸𑀬𑁂𑀦 𑀘 𑀯𑀸𑀘𑀸𑀬 𑀘 𑀆𑀭𑀫𑁆𑀪𑀦𑁆𑀢𑀺 𑀘𑁂𑀢𑀲𑀺𑀓𑁄. 𑀆𑀭𑀫𑁆𑀪𑁄 𑀘𑁂𑀢𑀦𑀸 𑀓𑀫𑁆𑀫𑀁 𑀓𑀸𑀬𑀺𑀓𑀸 𑀯𑀸𑀘𑀲𑀺𑀓𑀸 𑀆𑀭𑀫𑁆𑀪𑁄 𑀘𑁂𑀢𑀲𑀺𑀓𑀢𑁆𑀢𑀸 𑀓𑀫𑁆𑀫𑀦𑁆𑀢𑀭𑀁 𑀢𑀣𑀸𑀕𑀢𑁄 𑀏𑀯𑀁 𑀧𑀚𑀸𑀦𑀸𑀢𑀺 ‘‘𑀇𑀫𑀺𑀦𑀸 𑀲𑀢𑁆𑀢𑁂𑀦 𑀏𑀯𑀁 𑀥𑀸𑀢𑀼𑀓𑁂𑀦 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀢𑀁, 𑀢𑀁 𑀅𑀢𑀻𑀢𑀫𑀤𑁆𑀥𑀸𑀦𑀁 𑀇𑀫𑀺𑀦𑀸 𑀳𑁂𑀢𑀼𑀦𑀸 𑀢𑀲𑁆𑀲 𑀏𑀯𑀭𑀽𑀧𑁄 𑀯𑀺𑀧𑀸𑀓𑁄 𑀯𑀺𑀧𑀘𑁆𑀘𑀢𑀺 𑀏𑀢𑀭𑀳𑀺 𑀯𑀺𑀧𑀘𑁆𑀘𑀺𑀲𑁆𑀲𑀢𑀺 𑀯𑀸 𑀅𑀦𑀸𑀕𑀢𑀫𑀤𑁆𑀥𑀸𑀦’’𑀦𑁆𑀢𑀺. 𑀏𑀯𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀤𑁆𑀥𑀸𑀦𑀁 𑀧𑀚𑀸𑀦𑀸𑀢𑀺 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀏𑀯𑀁𑀥𑀸𑀢𑀼𑀓𑁄 𑀇𑀤𑀁 𑀓𑀫𑁆𑀫𑀁 𑀓𑀭𑁄𑀢𑀺’’. 𑀢𑀡𑁆𑀳𑀸𑀬 𑀘 𑀤𑀺𑀝𑁆𑀞𑀺𑀬𑀸 𑀘 𑀇𑀫𑀺𑀦𑀸 𑀳𑁂𑀢𑀼𑀦𑀸 𑀦 𑀢𑀲𑁆𑀲 𑀯𑀺𑀧𑀸𑀓𑁄 𑀤𑀺𑀝𑁆𑀞𑁂𑀬𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀉𑀧𑀧𑀚𑁆𑀚𑁂 𑀯𑀸’’𑀢𑀺 𑀅𑀧𑀭𑀫𑁆𑀳𑀺 𑀯𑀸 𑀧𑀭𑀺𑀬𑀸𑀬𑁂 𑀏𑀯𑀁 𑀧𑀚𑀸𑀦𑀸𑀢𑀺 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀢𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀇𑀫𑀺𑀦𑀸 𑀳𑁂𑀢𑀼𑀦𑀸 𑀢𑀲𑁆𑀲 𑀏𑀯𑀭𑀽𑀧𑁄 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀇𑀫𑀺𑀦𑀸 𑀳𑁂𑀢𑀼𑀦𑀸 𑀬𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀁 𑀆𑀬𑀢𑀺𑀁 𑀘 𑀲𑀼𑀔𑀯𑀺𑀧𑀸𑀓𑀁’’ …𑀧𑁂… 𑀇𑀢𑀺 𑀅𑀬𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀯𑀺𑀧𑀸𑀓𑀯𑁂𑀫𑀢𑁆𑀢𑀢𑀁 𑀧𑀚𑀸𑀦𑀸𑀢𑀺 𑀉𑀘𑁆𑀘𑀸𑀯𑀘𑀸 𑀳𑀻𑀦𑀧𑀡𑀻𑀢𑀢𑀸, 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀫𑁆𑀫𑀯𑀺𑀧𑀸𑀓𑀜𑀸𑀡𑀁 𑀧𑀜𑁆𑀘𑀫𑀁 𑀢𑀣𑀸𑀕𑀢𑀩𑀮𑀁.

𑀢𑀣𑀸 𑀲𑀢𑁆𑀢𑀸 𑀬𑀁 𑀯𑀸 𑀓𑀫𑁆𑀫𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀦𑁆𑀢𑀸 𑀢𑀢𑁆𑀣 𑀏𑀯𑀁 𑀧𑀚𑀸𑀦𑀸𑀢𑀺 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀫𑁆𑀫𑀸𑀥𑀺𑀫𑀼𑀢𑁆𑀢𑀲𑁆𑀲 𑀭𑀸𑀕𑀘𑀭𑀺𑀢𑀲𑁆𑀲 𑀦𑁂𑀓𑁆𑀔𑀫𑁆𑀫𑀥𑀸𑀢𑀽𑀦𑀁 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀲 𑀭𑀸𑀕𑀸𑀦𑀼𑀕𑀢𑁂 𑀲𑀼𑀜𑁆𑀜𑀫𑀸𑀦𑀲𑁆𑀲 𑀧𑀞𑀫𑀁 𑀛𑀸𑀦𑀁 𑀲𑀁𑀓𑀺𑀮𑀺𑀲𑁆𑀲𑀢𑀺, 𑀲𑀘𑁂 𑀧𑀼𑀦 𑀉𑀢𑁆𑀢𑀭𑀺 𑀯𑀸𑀬𑀸𑀫𑀢𑁄 𑀛𑀸𑀦𑀯𑁄𑀤𑀸𑀦𑀕𑀢𑁂 𑀫𑀸𑀦𑀲𑁂 𑀯𑀺𑀲𑁂𑀲𑀪𑀸𑀕𑀺𑀬𑀁 𑀧𑀝𑀺𑀧𑀤𑀁 𑀅𑀦𑀼𑀬𑀼𑀜𑁆𑀚𑀺𑀬𑀢𑀺. 𑀢𑀲𑁆𑀲 𑀳𑀺 𑀛𑀸𑀦𑀪𑀸𑀕𑀺𑀬𑀁𑀬𑁂𑀯 𑀧𑀞𑀫𑀚𑁆𑀛𑀸𑀦𑁂 𑀞𑀺𑀢𑀲𑁆𑀲 𑀤𑀼𑀢𑀺𑀬𑀁 𑀛𑀸𑀦𑀁 𑀯𑁄𑀤𑀸𑀦𑀁 𑀕𑀘𑁆𑀙𑀢𑀺, 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀲𑀸 𑀧𑀻𑀢𑀺 𑀅𑀯𑀺𑀲𑁂𑀲𑀪𑀸𑀕𑀺𑀬𑀁 𑀢𑀢𑀺𑀬𑀁 𑀛𑀸𑀦𑀁 𑀆𑀤𑀺𑀲𑁆𑀲 𑀢𑀺𑀝𑁆𑀞𑀢𑀺. 𑀲𑀘𑁂 𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀣𑀸𑀕𑀢𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀯𑁄𑀤𑀸𑀦𑀁 𑀕𑀘𑁆𑀙𑀢𑀺𑀬𑁂𑀯, 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀳𑀸𑀦𑀪𑀸𑀕𑀺𑀬𑀸 𑀥𑀫𑁆𑀫𑀸, 𑀢𑁂 𑀘 𑀥𑀫𑁆𑀫𑀸 𑀬𑀢𑁆𑀣 𑀧𑀚𑀸𑀬𑀦𑁆𑀢𑀺 𑀬𑁂𑀳𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀯𑁄𑀤𑀸𑀦𑀁 𑀤𑀺𑀲𑁆𑀲𑀢𑀺. 𑀏𑀯𑀁 𑀅𑀚𑁆𑀛𑀸𑀲𑀬𑀲𑀫𑀸𑀧𑀢𑁆𑀢𑀺𑀬𑀸 𑀬𑀸 𑀘𑀢𑀲𑁆𑀲𑁄 𑀲𑀫𑀸𑀧𑀢𑁆𑀢𑀺𑀬𑁄 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀅𑀝𑁆𑀞 𑀯𑀺𑀫𑁄𑀓𑁆𑀔𑀛𑀸𑀦𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀯𑀺𑀫𑁄𑀓𑁆𑀔𑀸𑀢𑀺. 𑀅𑀝𑁆𑀞 𑀘 𑀯𑀺𑀫𑁄𑀓𑁆𑀔𑀸 𑀢𑀻𑀡𑀺 𑀘 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺. 𑀲𑀫𑀸𑀥𑀻𑀢𑀺 𑀘𑀢𑁆𑀢𑀸𑀭𑁄 𑀲𑀫𑀸𑀥𑀻 𑁋 𑀙𑀦𑁆𑀤𑀲𑀫𑀸𑀥𑀺 𑀯𑀻𑀭𑀺𑀬𑀲𑀫𑀸𑀥𑀺 𑀘𑀺𑀢𑁆𑀢𑀲𑀫𑀸𑀥𑀺 𑀯𑀻𑀫𑀁𑀲𑀸𑀲𑀫𑀸𑀥𑀻𑀢𑀺. 𑀲𑀫𑀸𑀧𑀢𑁆𑀢𑀺𑀬𑁄 𑀘𑀢𑀲𑁆𑀲𑁄 𑀅𑀚𑁆𑀛𑀸𑀲𑀬𑀲𑀫𑀸𑀧𑀢𑁆𑀢𑀺𑀬𑁄 𑀇𑀢𑀺 𑀇𑀫𑁂𑀲𑀁 𑀛𑀸𑀦𑀸𑀦𑀁 𑀯𑀺𑀫𑁄𑀓𑁆𑀔𑀲𑀫𑀸𑀧𑀢𑁆𑀢𑀻𑀢𑀺 𑀏𑀯𑀭𑀽𑀧𑁄 𑀲𑀁𑀓𑀺𑀮𑁂𑀲𑁄 𑀭𑀸𑀕𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀏𑀯𑀁 𑀤𑁄𑀲𑀘𑀭𑀺𑀢𑀲𑁆𑀲. 𑀫𑁄𑀳𑀘𑀭𑀺𑀢𑀲𑁆𑀲. 𑀭𑀸𑀕𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀯𑀭𑀽𑀧𑀁 𑀯𑁄𑀤𑀸𑀦𑀁 𑀇𑀢𑀺 𑀬𑀁 𑀏𑀢𑁆𑀣 𑀜𑀸𑀡𑀁 𑀬𑀣𑀸𑀪𑀽𑀢𑀁 𑀅𑀲𑀸𑀥𑀸𑀭𑀡𑀁 𑀲𑀩𑁆𑀩𑀲𑀢𑁆𑀢𑁂𑀳𑀺. 𑀇𑀤𑀁 𑀯𑀼𑀘𑁆𑀘𑀢𑀺 𑀙𑀝𑁆𑀞𑀁 𑀢𑀣𑀸𑀕𑀢𑀩𑀮𑀁.

𑀢𑀢𑁆𑀣 𑀢𑀣𑀸𑀕𑀢𑁄 𑀏𑀯𑀁 𑀧𑀚𑀸𑀦𑀸𑀢𑀺 𑀮𑁄𑀓𑀺𑀓𑀸 𑀥𑀫𑁆𑀫𑀸 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸 𑀪𑀸𑀯𑀦𑀸𑀪𑀸𑀕𑀺𑀬𑀁 𑀇𑀦𑁆𑀤𑁆𑀭𑀺𑀬𑀁 𑀦𑀸𑀫𑀁 𑀮𑀪𑀦𑁆𑀢𑀺. 𑀆𑀥𑀺𑀧𑀢𑁂𑀬𑁆𑀬𑀪𑀽𑀫𑀺𑀁 𑀉𑀧𑀸𑀤𑀸𑀬 𑀩𑀮𑀁 𑀦𑀸𑀫𑀁 𑀮𑀪𑀦𑁆𑀢𑀺 𑀣𑀸𑀫𑀕𑀢𑀁 𑀫𑀦𑁄 𑀫𑀦𑀺𑀦𑁆𑀤𑁆𑀭𑀺𑀬𑀁 𑀢𑀁 𑀉𑀧𑀸𑀤𑀸𑀬. 𑀯𑀻𑀭𑀺𑀬𑀁 𑀦𑀸𑀫𑀁 𑀮𑀪𑀦𑁆𑀢𑀺 𑀆𑀭𑀫𑁆𑀪𑀥𑀸𑀢𑀼𑀁 𑀉𑀧𑀸𑀤𑀸𑀬. 𑀇𑀢𑀺𑀲𑁆𑀲 𑀤𑁂𑀯 𑀏𑀯𑀭𑀽𑀧𑀁 𑀜𑀸𑀡𑀁 𑀇𑀫𑁂𑀳𑀺 𑀘 𑀥𑀫𑁆𑀫𑁂𑀳𑀺 𑀇𑀫𑁂 𑀧𑀼𑀕𑁆𑀕𑀮𑀸 𑀲𑀫𑀦𑁆𑀦𑀸𑀕𑀢𑀸𑀢𑀺𑀧𑀺 𑀥𑀫𑁆𑀫𑀤𑁂𑀲𑀦𑀁 𑀅𑀓𑀸𑀲𑀺. 𑀆𑀓𑀸𑀭𑀢𑁄 𑀘 𑀯𑁄𑀓𑀸𑀭𑀢𑁄 𑀘 𑀆𑀲𑀬𑀚𑁆𑀛𑀸𑀲𑀬𑀲𑁆𑀲 𑀅𑀥𑀺𑀫𑀼𑀢𑁆𑀢𑀺𑀲𑀫𑀦𑁆𑀦𑀸𑀕𑀢𑀸𑀦𑀁. 𑀇𑀤𑀁 𑀯𑀼𑀘𑁆𑀘𑀢𑀺 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀩𑀮𑀯𑀻𑀭𑀺𑀬𑀯𑁂𑀫𑀢𑁆𑀢𑀢𑀁 𑀜𑀸𑀡𑀁 𑀲𑀢𑁆𑀢𑀫𑀁 𑀢𑀣𑀸𑀕𑀢𑀩𑀮𑀁.

𑀢𑀢𑁆𑀣 𑀘 𑀢𑀣𑀸𑀕𑀢𑁄 𑀮𑁄𑀓𑀸𑀤𑀻𑀲𑀼 𑀘 𑀪𑀽𑀫𑀻𑀲𑀼 𑀲𑀁𑀬𑁄𑀚𑀦𑀸𑀦𑀜𑁆𑀘 𑀲𑁂𑀓𑁆𑀔𑀸𑀦𑀁 𑀤𑁆𑀯𑀻𑀳𑀺 𑀩𑀮𑁂𑀳𑀺 𑀕𑀢𑀺𑀁 𑀧𑀚𑀸𑀦𑀸𑀢𑀺, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀬𑀸 𑀅𑀢𑀻𑀢𑁂 𑀲𑀁𑀲𑀸𑀭𑁂 𑀏𑀢𑀭𑀳𑀺 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀘𑀼𑀢𑀽𑀧𑀧𑀸𑀢𑀁 𑀇𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀩𑀮𑀸𑀦𑀺 𑀤𑀺𑀩𑁆𑀩𑀘𑀓𑁆𑀔𑀼𑀢𑁄 𑀅𑀪𑀺𑀦𑀻𑀳𑀺𑀢𑀸𑀦𑀺. 𑀲𑁄 𑀅𑀢𑀻𑀢𑀫𑀤𑁆𑀥𑀸𑀦𑀁 𑀤𑀺𑀩𑁆𑀩𑀲𑁆𑀲 𑀘𑀓𑁆𑀔𑀼𑀦𑁄 𑀕𑁄𑀘𑀭𑁄 𑀲𑁄 𑀏𑀢𑀭𑀳𑀺 𑀲𑀢𑀺 𑀕𑁄𑀘𑀭𑁄 𑀇𑀢𑀺 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀁 𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀅𑀦𑁂𑀓𑀯𑀺𑀥𑀁 𑀦𑀸𑀦𑀧𑁆𑀧𑀓𑀸𑀭𑀓𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀤𑁆𑀥𑀸𑀦𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀇𑀫𑀸𑀦𑀺 𑀤𑁆𑀯𑁂 𑀢𑀣𑀸𑀕𑀢𑀩𑀮𑀸𑀦𑀺, 𑀅𑀝𑁆𑀞𑀫𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑁄, 𑀦𑀯𑀫𑀁 𑀤𑀺𑀩𑁆𑀩𑀘𑀓𑁆𑀔𑀼.

𑀧𑀼𑀦 𑀘𑀧𑀭𑀁 𑀢𑀣𑀸𑀕𑀢𑁄 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀛𑀸𑀦𑀁 𑀯𑁄𑀤𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀧𑀚𑀸𑀦𑀸𑀢𑀺 𑀅𑀬𑀁 𑀧𑀼𑀕𑁆𑀕𑀮𑁄 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀇𑀢𑀺 𑀅𑀢𑁆𑀢𑀦𑁄 𑀘 𑀆𑀲𑀯𑀸𑀦𑀁 𑀔𑀬𑀁 𑀜𑀸𑀡𑀁 𑀤𑀺𑀝𑁆𑀞𑁂𑀓𑀝𑁆𑀞𑀸𑀦𑀁 𑀘𑀢𑀼𑀪𑀽𑀫𑀺𑀫𑀼𑀧𑀸𑀤𑀸𑀬 𑀬𑀸𑀯 𑀦𑀯𑀦𑁆𑀦𑀁 𑀅𑀭𑀳𑀦𑁆𑀢𑀸𑀦𑀁 𑀆𑀲𑀯𑀓𑁆𑀔𑀬𑁄 𑀑𑀥𑀺𑀲𑁄 𑀲𑁂𑀓𑁆𑀔𑀸𑀦𑀁 𑀅𑀦𑁄𑀥𑀺𑀲𑁄 𑀅𑀭𑀳𑀦𑁆𑀢𑀸𑀦𑀁. 𑀢𑀢𑁆𑀣 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀤𑁆𑀯𑀻𑀳𑀺 𑀆𑀲𑀯𑁂𑀳𑀺 𑀅𑀦𑀸𑀲𑀯𑀸 𑀓𑀸𑀫𑀸𑀲𑀯𑁂𑀦 𑀘 𑀪𑀯𑀸𑀲𑀯𑁂𑀦 𑀘, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀤𑁆𑀯𑀻𑀳𑀺 𑀆𑀲𑀯𑁂𑀳𑀺 𑀅𑀦𑀸𑀲𑀯𑀸 𑀤𑀺𑀝𑁆𑀞𑀸𑀲𑀯𑁂𑀦 𑀘 𑀅𑀯𑀺𑀚𑁆𑀚𑀸𑀲𑀯𑁂𑀦 𑀘, 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀁 𑀯𑀺𑀫𑀼𑀢𑁆𑀢𑀻𑀦𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀆𑀲𑀯𑀓𑁆𑀔𑀬𑁂 𑀜𑀸𑀡𑀁. 𑀤𑀲𑀫𑀁 𑀢𑀣𑀸𑀕𑀢𑀩𑀮𑀁.

𑁨𑁦. 𑀇𑀫𑁂𑀲𑀼 𑀤𑀲𑀲𑀼 𑀩𑀮𑁂𑀲𑀼 𑀞𑀺𑀢𑁄 𑀢𑀣𑀸𑀕𑀢𑁄 𑀧𑀜𑁆𑀘𑀯𑀺𑀥𑀁 𑀲𑀸𑀲𑀦𑀁 𑀤𑁂𑀲𑁂𑀢𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀤𑀲𑁆𑀲𑀦𑀪𑀸𑀕𑀺𑀬𑀁 𑀪𑀸𑀯𑀦𑀸𑀪𑀸𑀕𑀺𑀬𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁. 𑀢𑀢𑁆𑀣 𑀬𑁄 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄, 𑀇𑀫𑀲𑁆𑀲 𑀅𑀮𑁄𑀪𑁄 𑀦𑀺𑀲𑁆𑀲𑀭𑀡𑀁. 𑀬𑁄 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄, 𑀇𑀫𑀲𑁆𑀲 𑀅𑀫𑁄𑀳𑁄 𑀦𑀺𑀲𑁆𑀲𑀭𑀡𑀁. 𑀬𑁄 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄, 𑀇𑀫𑀲𑁆𑀲 𑀢𑀻𑀡𑀺 𑀓𑀼𑀲𑀮𑀸𑀦𑀺 𑀦𑀺𑀲𑁆𑀲𑀭𑀡𑀁. 𑀓𑀺𑀁 𑀦𑀺𑀤𑀸𑀦𑀁? 𑀢𑀻𑀡𑀺 𑀇𑀫𑀸𑀦𑀺 [𑀢𑀻𑀡𑀺 𑀳𑀺 𑀇𑀫𑀸𑀦𑀺 (𑀧𑀻.)] 𑀫𑀦𑁄𑀤𑀼𑀘𑁆𑀘𑀭𑀺𑀢𑀸𑀦𑀺 𑁋 𑀅𑀪𑀺𑀚𑁆𑀛𑀸 𑀩𑁆𑀬𑀸𑀧𑀸𑀤𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀢𑀢𑁆𑀣 𑀅𑀪𑀺𑀚𑁆𑀛𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀓𑀫𑁆𑀫𑀁 𑀉𑀧𑀝𑁆𑀞𑀧𑁂𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀁 𑀲𑀩𑁆𑀩𑀜𑁆𑀘 𑀢𑀤𑀼𑀧𑀦𑀺𑀩𑁆𑀩𑀤𑁆𑀥𑀁 𑀯𑀸𑀘𑀸𑀓𑀫𑁆𑀫𑀁 𑀉𑀧𑀝𑁆𑀞𑀧𑁂𑀢𑀺, 𑀫𑀼𑀲𑀸𑀯𑀸𑀤𑀜𑁆𑀘 𑀲𑀩𑁆𑀩𑀯𑀺𑀢𑀣𑀁 𑀲𑀩𑁆𑀩𑀁 𑀯𑀸𑀘𑀫𑀪𑀸𑀯𑀁 𑀲𑀩𑁆𑀩𑀫𑀓𑁆𑀔𑀁 𑀧𑀮𑀸𑀲𑀁 𑀅𑀪𑀺𑀚𑁆𑀛𑀸 𑀅𑀓𑀼𑀲𑀮𑀫𑀽𑀮𑀦𑁆𑀢𑀺, 𑀲𑀼𑀘𑀭𑀺𑀢𑁂 𑀲𑀼𑀘𑀭𑀺𑀢𑀁 𑀫𑀼𑀲𑀸𑀯𑀸𑀤𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀅𑀪𑀺𑀚𑁆𑀛𑀸𑀬 𑀘𑁂𑀢𑀦𑀸, 𑀢𑀢𑁆𑀣 𑀩𑁆𑀬𑀸𑀧𑀸𑀤𑁄 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀓𑀫𑁆𑀫𑀁 𑀉𑀧𑀝𑁆𑀞𑀧𑁂𑀢𑀺, 𑀧𑀸𑀡𑀸𑀢𑀺𑀧𑀸𑀢𑀁 𑀲𑀩𑁆𑀩𑀜𑁆𑀘 𑀫𑁂𑀢𑀁 𑀆𑀓𑀟𑁆𑀠𑀦𑀁 𑀧𑀭𑀺𑀓𑀟𑁆𑀠𑀦𑀁 𑀦𑀺𑀩𑁆𑀩𑀤𑁆𑀥𑀁 𑀭𑁄𑀘𑀦𑀁 𑀯𑀸𑀘𑀸𑀓𑀫𑁆𑀫𑀁 𑀉𑀧𑀝𑁆𑀞𑀧𑁂𑀢𑀺, 𑀧𑀺𑀲𑀼𑀡𑀯𑀸𑀘𑀁 𑀨𑀭𑀼𑀲𑀯𑀸𑀘𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀫𑀦𑁄𑀤𑀼𑀘𑁆𑀘𑀭𑀺𑀢𑀜𑁆𑀘 𑀅𑀪𑀺𑀚𑁆𑀛𑀁 𑀩𑁆𑀬𑀸𑀧𑀸𑀤𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀬𑁄𑀚𑁂𑀢𑀺, 𑀢𑀲𑁆𑀲 𑀬𑁄 𑀓𑁄𑀘𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘𑀸𑀕𑁄 𑀭𑀸𑀕𑀚𑁄 𑀯𑀸 𑀤𑁄𑀲𑀚𑁄 𑀯𑀸 𑀲𑀩𑁆𑀩𑀲𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀫𑁆𑀪𑀽𑀢𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀉𑀧𑀝𑁆𑀞𑀧𑁂𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀯𑀘𑀻𑀓𑀫𑁆𑀫𑀁 𑀉𑀧𑀝𑁆𑀞𑀧𑁂𑀢𑀺 𑀲𑀫𑁆𑀨𑀧𑁆𑀧𑀮𑀸𑀧𑀁. 𑀇𑀫𑀸𑀦𑀺 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀅𑀓𑀼𑀲𑀮𑀫𑀽𑀮𑀸𑀦𑀺.

𑀬𑀸 𑀅𑀪𑀺𑀚𑁆𑀛𑀸, 𑀲𑁄 𑀮𑁄𑀪𑁄. 𑀬𑁄 𑀩𑁆𑀬𑀸𑀧𑀸𑀤𑁄, 𑀲𑁄 𑀤𑁄𑀲𑁄. 𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀲𑁄 𑀫𑁄𑀳𑁄. 𑀢𑀸𑀦𑀺 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀸𑀦𑀺 𑀉𑀧𑀝𑁆𑀞𑀧𑁂𑀦𑁆𑀢𑀺. 𑀢𑁂𑀲𑀼 𑀕𑀳𑀺𑀢𑁂𑀲𑀼 𑀢𑀻𑀲𑀼 𑀅𑀓𑀼𑀲𑀮𑀫𑀽𑀮𑁂𑀲𑀼 𑀤𑀲𑀯𑀺𑀥𑀁 𑀅𑀓𑀼𑀲𑀮𑀫𑀽𑀮𑀁 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀢𑀲𑁆𑀲 𑀢𑀺𑀯𑀺𑀥𑀲𑁆𑀲 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀲𑁆𑀲 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁 𑀦𑀺𑀲𑁆𑀲𑀭𑀡𑀁. 𑀢𑀢𑁆𑀣 𑀬𑁄 𑀩𑀳𑀼𑀲𑀺𑀢𑁄 𑀦𑀺𑀤𑁆𑀤𑁂𑀲𑁄 𑀬𑀣𑀸 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄𑀧𑀺, 𑀢𑀢𑁆𑀣 𑀅𑀲𑀺𑀢𑀼𑀁 𑀏𑀢𑁆𑀣 𑀮𑁄𑀪𑁄 𑀉𑀲𑁆𑀲𑀤𑁄 𑀢𑁂𑀦 𑀓𑀸𑀭𑀡𑁂𑀦 𑀢𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀮𑁄𑀪𑁄 𑀧𑀜𑁆𑀜𑀧𑀺𑀬𑀢𑀺. 𑀢𑀢𑁆𑀣𑀸𑀬𑀁 𑀫𑁄𑀳𑁄 𑀅𑀓𑀼𑀲𑀮𑀁 𑀫𑁄𑀳𑁄 𑀅𑀬𑀁 𑀅𑀯𑀺𑀚𑁆𑀚𑀸, 𑀲𑀸 𑀘𑀢𑀼𑀩𑁆𑀩𑀺𑀥𑀸 𑀭𑀽𑀧𑁂 𑀅𑀪𑀺𑀦𑀺𑀯𑀺𑀝𑁆𑀞𑀸, 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀯𑀺𑀚𑁆𑀚𑀸𑀕𑀢𑁄 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀢𑀢𑁆𑀣 𑀓𑀢𑀫𑀁 𑀧𑀤𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀉𑀘𑁆𑀙𑁂𑀤𑀁 𑀯𑀤𑀢𑀺 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑀦𑀢𑁆𑀣𑀺𑀓𑀤𑀺𑀝𑁆𑀞𑀺 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀤𑀺𑀝𑁆𑀞𑀺 𑀘 𑀅𑀜𑁆𑀜𑁄 𑀘 𑀓𑀭𑁄𑀢𑀺, 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑀺𑀬𑀢𑀺. 𑀧𑀘𑁆𑀙𑀺𑀫𑀲𑀝𑁆𑀞𑀺𑀓𑀧𑁆𑀧𑀸𑀦𑀁 𑀢𑀻𑀡𑀺 𑀧𑀤𑀸𑀦𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀲𑀲𑁆𑀲𑀢𑀁 𑀪𑀚𑀦𑁆𑀢𑀺 ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑀅𑀓𑀺𑀭𑀺𑀬𑀜𑁆𑀘 𑀢𑀁 𑀤𑀼𑀓𑁆𑀔𑀫𑀺𑀘𑁆𑀙𑀢𑁄 𑀅𑀳𑁂𑀢𑀼𑀓𑀸 𑀘 𑀧𑀢𑀦𑁆𑀢𑀺 𑀅𑀦𑀚𑁆𑀛𑀸𑀪𑀸𑀯𑁄 𑀘 𑀓𑀫𑁆𑀫𑀸𑀦𑀁 𑀲𑀩𑁆𑀩𑀜𑁆𑀘 𑀫𑀸𑀦𑀬𑀺 [𑀫𑀸𑀦𑀢𑀺 (𑀧𑀻.)]. 𑀢𑀢𑁆𑀣 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀲𑀁𑀲𑀸𑀭𑁂𑀦 𑀲𑀼𑀤𑁆𑀥𑀺 𑀆𑀚𑀻𑀯𑀓𑀸 𑀙𑀴𑀸𑀲𑀻𑀢𑀺 𑀧𑀜𑁆𑀜𑀧𑁂𑀦𑁆𑀢𑀺. 𑀬𑀣𑀸𑀭𑀽𑀧𑁂 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀘𑀢𑀼𑀯𑀢𑁆𑀣𑀼𑀓𑀸, 𑀏𑀯𑀁 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀲𑀲𑁆𑀲𑀢𑀁 𑀪𑀚𑀢𑀺. 𑀅𑀜𑁆𑀜𑀸𑀚𑀻𑀯𑀓𑀸 𑀘 𑀲𑀲𑁆𑀲𑀢𑀯𑀸𑀤𑀺𑀓𑁂 𑀘 𑀲𑀻𑀮𑀩𑁆𑀩𑀢𑀁 𑀪𑀚𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀇𑀫𑀺𑀦𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑁄 𑀯𑀸 𑀤𑁂𑀯𑀜𑁆𑀜𑀢𑀭𑁄 𑀯𑀸, 𑀅𑀬𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄. 𑀢𑀢𑁆𑀣 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀲𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀫𑀺𑀢𑀺 𑀢𑀁 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦𑀸𑀪𑀺𑀧𑁆𑀧𑀲𑀻𑀤𑀢𑀺 𑀧𑀼𑀩𑁆𑀩𑀦𑁆𑀢𑁂 𑀅𑀧𑀭𑀦𑁆𑀢𑁂 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂…𑀧𑁂… 𑀇𑀢𑀺 𑀯𑀸𑀲𑀦𑀸𑀪𑀸𑀕𑀺𑀬𑁂𑀲𑀼 𑀞𑀺𑀢𑀲𑁆𑀲 𑀅𑀬𑀁 𑀉𑀧𑀓𑁆𑀓𑀺𑀮𑁂𑀲𑁄.

𑁨𑁧. 𑀢𑀢𑁆𑀣 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑁂𑀦 𑀲𑀩𑁆𑀩𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀁 𑀧𑀚𑀳𑀢𑀺, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀦 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀢𑀺, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑁂𑀦 𑀘𑀺𑀢𑁆𑀢𑀁 𑀏𑀓𑁄𑀤𑀺 𑀓𑀭𑁄𑀢𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑁂𑀦 𑀆𑀭𑀪𑀢𑀺. 𑀲𑁄 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀤𑁆𑀥𑀸𑀦𑀼𑀲𑀸𑀭𑀻 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂 𑀦𑀺𑀭𑀢𑁄 𑀅𑀦𑀦𑁆𑀢𑀭𑀺𑀬𑀁 𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀢𑀺. 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀼𑀤𑁆𑀥𑁂𑀳𑀺 𑀥𑀫𑁆𑀫𑀸𑀦𑀼𑀲𑀸𑀭𑀻 𑀅𑀧𑁆𑀧𑀘𑁆𑀘𑀬𑀢𑀸𑀬 𑀅𑀦𑀦𑁆𑀢𑀭𑀺𑀬𑀁 𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀢𑀺. 𑀲𑁄 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀲𑀘𑁆𑀘𑀸𑀦𑀺 𑀇𑀤𑀁 𑀤𑀲𑁆𑀲𑀦𑀪𑀸𑀕𑀺𑀬𑀁 𑀲𑀼𑀢𑁆𑀢𑀁. 𑀢𑀲𑁆𑀲 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀸𑀦𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀳𑀻𑀦𑀸𑀦𑀺 𑀤𑁆𑀯𑁂 𑀧𑀼𑀕𑁆𑀕𑀮𑀓𑀢𑀸𑀦𑀺. 𑀢𑀢𑁆𑀣 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀪𑀸𑀯𑀦𑀸𑀧𑀳𑀸𑀢𑀩𑁆𑀩𑀸𑀦𑀺 𑀉𑀧𑀭𑀺𑀓𑁆𑀔𑀺𑀢𑁆𑀢𑀸𑀦𑀺 𑀙 𑀪𑀯𑁂 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀢𑀢𑁆𑀣 𑀢𑁂𑀲𑀼 𑀅𑀪𑀺𑀚𑁆𑀛𑀸𑀬 𑀘 𑀩𑁆𑀬𑀸𑀧𑀸𑀤𑁂𑀲𑀼 𑀢𑀦𑀼𑀓𑀢𑁂𑀲𑀼 𑀙 𑀪𑀯𑀸 𑀧𑀭𑀺𑀓𑁆𑀔𑀬𑀸 𑀫𑀭𑀺𑀬𑀸𑀤𑀁 𑀕𑀘𑁆𑀙𑀦𑁆𑀢𑀺, 𑀤𑁆𑀯𑁂 𑀪𑀯𑀸 𑀅𑀯𑀲𑀺𑀝𑁆𑀞𑀸. 𑀢𑀲𑁆𑀲 𑀅𑀪𑀺𑀚𑁆𑀛𑀸 𑀘 𑀩𑁆𑀬𑀸𑀧𑀸𑀤𑁄 𑀘 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀏𑀓𑁄 𑀪𑀯𑁄 𑀅𑀯𑀲𑀺𑀝𑁆𑀞𑁄 𑀳𑁄𑀢𑀺. 𑀲𑁄 𑀘 𑀫𑀸𑀦𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀓𑀺𑀜𑁆𑀘𑀸𑀧𑀺 𑀏𑀢𑁆𑀣 𑀅𑀜𑁆𑀜𑁂𑀧𑀺 𑀘𑀢𑁆𑀢𑀸𑀭𑁄 𑀓𑀺𑀮𑁂𑀲𑀸 𑀭𑀽𑀧𑀭𑀸𑀕𑁄 𑀪𑀯𑀭𑀸𑀕𑁄 𑀅𑀯𑀺𑀚𑁆𑀚𑀸 𑀉𑀤𑁆𑀥𑀘𑁆𑀘𑀁 𑀓𑁂𑀢𑀼𑀲𑁆𑀫𑀺𑀫𑀸𑀦𑀪𑀽𑀢𑀸 𑀦𑀧𑁆𑀧𑀝𑀺𑀩𑀮𑀸 𑀅𑀲𑁆𑀫𑀺𑀫𑀸𑀦𑀁 𑀯𑀺𑀦𑀺𑀯𑀢𑁆𑀢𑁂𑀢𑀼𑀁, 𑀲𑀩𑁆𑀩𑁂𑀧𑀺 𑀢𑁂 𑀅𑀲𑁆𑀫𑀺𑀫𑀸𑀦𑀲𑁆𑀲 𑀧𑀳𑀸𑀦𑀁 𑀆𑀭𑀪𑀢𑁂. 𑀔𑀻𑀡𑁂𑀲𑀼 𑀦 𑀘 𑀢𑁂𑀲𑀼 𑀇𑀤𑀫𑀼𑀢𑁆𑀢𑀭𑀺𑀤𑀲𑁆𑀲𑀦𑀪𑀽𑀫𑀺𑀬𑀁 𑀧𑀜𑁆𑀘𑀲𑀼 𑀲𑁂𑀓𑁆𑀔𑀧𑀼𑀕𑁆𑀕𑀮𑁂𑀲𑀼 𑀢𑀻𑀲𑀼 𑀘 𑀧𑀝𑀺𑀧𑁆𑀧𑀦𑁆𑀦𑀓𑁂𑀲𑀼 𑀤𑁆𑀯𑀻𑀲𑀼 𑀘 𑀨𑀮𑀝𑁆𑀞𑁂𑀲𑀼 𑀪𑀸𑀯𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁. 𑀢𑀤𑀼𑀢𑁆𑀢𑀭𑀺 𑀅𑀲𑁂𑀓𑁆𑀔𑀪𑀸𑀕𑀺𑀬𑀲𑀼𑀢𑁆𑀢𑀁, 𑀓𑀢𑁆𑀣𑀘𑀺 𑀪𑀽𑀫𑀺 𑀦𑀺𑀧𑀻𑀴𑀺𑀬𑀢𑀺. 𑀇𑀤𑀜𑁆𑀘 𑀧𑀜𑁆𑀘𑀫𑀁 𑀲𑀼𑀢𑁆𑀢𑀁. 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀤𑁂𑀲𑀺𑀢𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑁂𑀓𑁆𑀔𑀲𑁆𑀲 𑀅𑀲𑁂𑀓𑁆𑀔𑀲𑁆𑀲 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀯𑀸𑀲𑀦𑀸𑀪𑀸𑀕𑀺𑀬𑀁. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀤𑀲𑁆𑀲𑀦𑀪𑀸𑀕𑀺𑀬𑀁. 𑀪𑀸𑀯𑀦𑀸𑀪𑀸𑀕𑀺𑀬𑀁 𑀧𑀜𑁆𑀘𑀦𑁆𑀦𑀁 𑀲𑁂𑀓𑁆𑀔𑀸𑀦𑀁. 𑀬𑀁 𑀧𑀞𑀫𑀦𑀺𑀤𑁆𑀤𑀺𑀝𑁆𑀞𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀩𑁆𑀩𑁂𑀲𑀁 𑀅𑀭𑀳𑀦𑁆𑀢𑀸𑀦𑀁. 𑀲𑀸 𑀧𑀦 𑀧𑀜𑁆𑀘𑀯𑀺𑀥𑀸 𑀲𑀢𑁆𑀢𑀯𑀻𑀲𑀆𑀓𑀸𑀭𑁂 [𑀲𑀢𑁆𑀢𑀯𑀻𑀲𑀁 𑀆𑀓𑀸𑀭𑁂 (𑀧𑀻.)] 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀏𑀢𑁂𑀲𑀼 𑀢𑀲𑁆𑀲 𑀕𑀢𑀻𑀦𑀁 𑀢𑀢𑁄 𑀉𑀢𑁆𑀢𑀭𑀺. 𑀢𑀜𑁆𑀘 𑀔𑁄 𑀲𑀗𑁆𑀔𑁂𑀧𑁂𑀦 𑀧𑀜𑁆𑀜𑀸𑀲𑀸𑀬 𑀆𑀓𑀸𑀭𑁂𑀳𑀺 𑀲𑀫𑁆𑀧𑀢𑀢𑀺, 𑀬𑁂 𑀧𑀜𑁆𑀜𑀸𑀲 𑀆𑀓𑀸𑀭𑀸 𑀲𑀸𑀲𑀦𑁂 𑀦𑀺𑀤𑁆𑀤𑀺𑀝𑁆𑀞𑀸, 𑀢𑁂 𑀲𑀗𑁆𑀔𑀺𑀧𑀺𑀬𑀦𑁆𑀢𑀸 𑀤𑀲𑀳𑀺 𑀆𑀓𑀸𑀭𑁂𑀳𑀺 𑀧𑀢𑀦𑁆𑀢𑀺. 𑀬𑁂 𑀅𑀭𑀺𑀬𑀲𑀘𑁆𑀘𑀁 𑀦𑀺𑀓𑁆𑀔𑁂𑀧𑁂𑀦 𑀞𑀺𑀢𑁂 𑀲𑀗𑁆𑀔𑀺𑀧𑀺𑀬𑀢𑁆𑀢𑀸 𑀅𑀝𑁆𑀞𑀲𑀼 𑀆𑀓𑀸𑀭𑁂𑀲𑀼 𑀧𑀢𑀦𑁆𑀢𑀺. 𑀘𑀢𑀽𑀲𑀼 𑀘 𑀲𑀸𑀥𑀸𑀭𑀡𑁂𑀲𑀼 𑀲𑀼𑀢𑁆𑀢𑁂𑀲𑀼 𑀬𑀸 𑀳𑀸𑀭𑀲𑀫𑁆𑀧𑀸𑀢𑀲𑁆𑀲 𑀪𑀽𑀫𑀺, 𑀢𑁂 𑀲𑀗𑁆𑀔𑀺𑀧𑀺𑀬𑀦𑁆𑀢𑀸 𑀧𑀜𑁆𑀘𑀲𑀼 𑀲𑀼𑀢𑁆𑀢𑁂𑀲𑀼 𑀧𑀢𑀦𑁆𑀢𑀺. 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑁂 𑀯𑀸𑀲𑀦𑀸𑀪𑀸𑀕𑀺𑀬𑁂 𑀪𑀸𑀯𑀦𑀸𑀪𑀸𑀕𑀺𑀬𑁂 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂 𑀅𑀲𑁂𑀓𑁆𑀔𑀪𑀸𑀕𑀺𑀬𑁂 𑀘. 𑀢𑁂 𑀲𑀗𑁆𑀔𑀺𑀧𑀺𑀬𑀦𑁆𑀢𑀸 𑀘𑀢𑀽𑀲𑀼 𑀲𑀼𑀢𑁆𑀢𑁂𑀲𑀼 𑀧𑀢𑀦𑁆𑀢𑀺. 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑁂 𑀯𑀸𑀲𑀦𑀸𑀪𑀸𑀕𑀺𑀬𑁂 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂 𑀅𑀲𑁂𑀓𑁆𑀔𑀪𑀸𑀕𑀺𑀬𑁂 𑀘. 𑀢𑁂 𑀲𑀗𑁆𑀔𑀺𑀧𑀺𑀬𑀫𑀸𑀦𑀸 𑀢𑀻𑀲𑀼 𑀲𑀼𑀢𑁆𑀢𑁂𑀲𑀼 𑀧𑀢𑀦𑁆𑀢𑀺, 𑀧𑀼𑀣𑀼𑀚𑁆𑀚𑀦𑀪𑀸𑀕𑀺𑀬𑁂 𑀲𑁂𑀓𑁆𑀔𑀪𑀸𑀕𑀺𑀬𑁂 𑀅𑀲𑁂𑀓𑁆𑀔𑀪𑀸𑀕𑀺𑀬𑁂 𑀘. 𑀢𑁂 𑀲𑀗𑁆𑀔𑀺𑀧𑀺𑀬𑀦𑁆𑀢𑀸 𑀤𑁆𑀯𑀻𑀲𑀼 𑀲𑀼𑀢𑁆𑀢𑁂𑀲𑀼 𑀧𑀢𑀦𑁆𑀢𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂 𑀘 𑀧𑀼𑀩𑁆𑀩𑀬𑁄𑀕𑀪𑀸𑀕𑀺𑀬𑁂 𑀘. 𑀬𑀣𑀸 𑀯𑀼𑀢𑁆𑀢𑀁 𑀪𑀕𑀯𑀢𑀸 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑀸 𑀢𑀣𑀸𑀕𑀢𑀸 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁…𑀧𑁂… 𑀲𑀢𑁆𑀣𑀸 𑀧𑀼𑀩𑁆𑀩𑀬𑁄𑀕𑀲𑀫𑀦𑁆𑀦𑀸𑀕𑀢𑁂 𑀅𑀧𑁆𑀧𑀓𑀲𑀺𑀭𑁂𑀦 𑀫𑀜𑁆𑀜𑀫𑀸𑀦𑀸 𑀯𑀲𑀺𑀬𑀦𑁆𑀢𑀺 𑀧𑀼𑀩𑁆𑀩𑀬𑁄𑀕𑀸 𑀘 𑀪𑀯𑀺𑀲𑁆𑀲𑀦𑁆𑀢𑀺 𑀲𑀦𑁆𑀢𑀸𑀦𑀁 𑀫𑀜𑁆𑀜𑀫𑀸𑀦𑀸𑀥𑀭𑀸𑀬. 𑀢𑀢𑁆𑀣 𑀧𑀜𑁆𑀜𑀸𑀯𑁂𑀫𑀢𑁆𑀢𑀢𑀁 𑀅𑀢𑁆𑀢𑀦𑁄 𑀲𑀫𑀦𑀼𑀧𑀲𑁆𑀲𑀫𑀸𑀦𑁂𑀦 𑀅𑀝𑁆𑀞𑀯𑀺𑀥𑁂 𑀲𑀼𑀢𑁆𑀢𑀲𑀗𑁆𑀔𑁂𑀧𑁂, 𑀬𑀢𑁆𑀣 𑀬𑀢𑁆𑀣 𑀲𑀓𑁆𑀓𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀢𑀢𑁆𑀣 𑀬𑁄𑀚𑁂𑀢𑁆𑀯𑀸 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀦 𑀳𑀺 𑀲𑀢𑀺 𑀯𑁂𑀤𑀦𑀸 𑀫𑀦𑁄 𑀥𑀸𑀭𑁂𑀢𑁆𑀯𑀸 𑀲𑀓𑁆𑀓𑀸 𑀬𑁂𑀦 𑀓𑁂𑀦𑀘𑀺 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑁄 𑀬𑀣𑀸𑀪𑀽𑀢𑀁 𑀦𑀺𑀤𑁆𑀤𑀺𑀲𑀺𑀢𑀼𑀁.

𑀢𑀢𑁆𑀣 𑀧𑀼𑀭𑀺𑀫𑀓𑀸𑀦𑀁 𑀲𑀼𑀢𑁆𑀢𑀸𑀦𑀁 𑀇𑀫𑀸 𑀉𑀤𑁆𑀤𑀸𑀦𑀕𑀸𑀣𑀸

𑀓𑀸𑀫𑀦𑁆𑀥𑀸 𑀚𑀸𑀮𑀲𑀜𑁆𑀙𑀦𑁆𑀦𑀸, 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀘;

𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀳𑀸𑀦𑀸𑀫𑁄 𑀘 𑀲𑀸𑀓𑀺𑀬𑁄.

𑀉𑀤𑁆𑀥𑀁 𑀅𑀥𑁄 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀬𑀜𑁆𑀘 𑀲𑀻𑀮𑀓𑀺𑀫𑀢𑁆𑀣𑀺𑀬𑀸;

𑀬𑀲𑁆𑀲 𑀲𑁂𑀮𑀽𑀧𑀫𑀁 𑀘𑀺𑀢𑁆𑀢𑀁, 𑀉𑀧𑀢𑀺𑀲𑁆𑀲 𑀧𑀼𑀘𑁆𑀙𑀸𑀤𑀺𑀓𑀸.

𑀬𑀲𑁆𑀲 𑀓𑀸𑀬𑀕𑀢𑀸𑀲𑀢𑀺, 𑀙𑀦𑁆𑀦𑀁 𑀢𑀫𑁄𑀧𑀭𑀸𑀬𑀡𑁄;

𑀦 𑀢𑀁 𑀤𑀴𑁆𑀳𑀁 𑀘𑁂𑀢𑀲𑀺𑀓𑀁, 𑀅𑀬𑀁 𑀮𑁄𑀓𑁄𑀢𑀺𑀆𑀤𑀺𑀓𑀁.

𑀘𑀢𑁆𑀢𑀸𑀭𑁄 𑀘𑁂𑀯 𑀧𑀼𑀕𑁆𑀕𑀮𑀸, 𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀺𑀢𑀁;

𑀲𑁄𑀢𑀸𑀦𑀼𑀕𑀢𑀥𑀫𑁆𑀫𑁂𑀲𑀼, 𑀇𑀫𑀸 𑀢𑁂𑀲𑀁 𑀉𑀤𑁆𑀤𑀸𑀦𑀕𑀸𑀣𑀸.

𑁨𑁨. 𑀢𑀢𑁆𑀣 𑀓𑀢𑀫𑀸 𑀆𑀡𑀢𑁆𑀢𑀺?

𑀲𑀘𑁂 𑀪𑀸𑀬𑀣 [𑀉𑀤𑀸. 𑁪𑁪] 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀯𑁄 𑀤𑀼𑀓𑁆𑀔𑀫𑀧𑁆𑀧𑀺𑀬𑀁;

𑀫𑀸𑀓𑀢𑁆𑀣 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄.

‘‘𑀅𑀢𑀻𑀢𑁂, 𑀭𑀸𑀥, 𑀭𑀽𑀧𑁂 𑀅𑀦𑀧𑁂𑀓𑁆𑀔𑁄 𑀳𑁄𑀳𑀻’’𑀢𑀺 𑀯𑀺𑀢𑁆𑀣𑀸𑀭𑁂𑀦 𑀓𑀸𑀢𑀩𑁆𑀩𑀸. ‘‘𑀲𑀻𑀮𑀯𑀦𑁆𑀢𑁂𑀦, 𑀆𑀦𑀦𑁆𑀤, 𑀧𑀼𑀕𑁆𑀕𑀮𑁂𑀦 𑀲𑀤𑀸 𑀓𑀭𑀡𑀻𑀬𑀸 𑀓𑀺𑀦𑁆𑀢𑀺𑀫𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀅𑀲𑁆𑀲𑀸’’𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀆𑀡𑀢𑁆𑀢𑀺.

𑀢𑀢𑁆𑀣 𑀓𑀢𑀫𑀁 𑀨𑀮𑀁?

𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀙𑀢𑁆𑀢𑀁 𑀫𑀳𑀦𑁆𑀢𑀁 𑀬𑀣 𑀯𑀲𑁆𑀲𑀓𑀸𑀮𑁂;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻.

𑀇𑀤𑀁 𑀨𑀮𑀁.

𑀢𑀢𑁆𑀣 𑀓𑀢𑀫𑁄 𑀉𑀧𑀸𑀬𑁄?

‘‘𑀲𑀩𑁆𑀩𑁂 𑀥𑀫𑁆𑀫𑀸 [𑀥. 𑀧. 𑁨𑁭𑁯] 𑀅𑀦𑀢𑁆𑀢𑀸’’𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸.

‘‘𑀲𑀢𑁆𑀢𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀔𑁄, 𑀪𑀺𑀓𑁆𑀔𑀼, 𑀅𑀧𑀺 𑀳𑀺𑀫𑀯𑀦𑁆𑀢𑀁 𑀧𑀩𑁆𑀩𑀢𑀭𑀸𑀚𑀸𑀦𑀁 𑀘𑀸𑀮𑁂𑀬𑁆𑀬, 𑀓𑁄 𑀧𑀦 𑀯𑀸𑀤𑁄 𑀙𑀯𑀁 𑀅𑀯𑀺𑀚𑁆𑀚𑀁 𑀲𑀢𑁆𑀢𑀓𑁂𑀲𑀼’’ 𑀯𑁂𑀬𑁆𑀬𑀸𑀓𑀭𑀡𑀁 𑀓𑀸𑀢𑀩𑁆𑀩𑀁. 𑀅𑀬𑀁 𑀉𑀧𑀸𑀬𑁄.

𑀢𑀢𑁆𑀣 𑀓𑀢𑀫𑀸 𑀆𑀡𑀢𑁆𑀢𑀺 𑀘 𑀨𑀮𑀜𑁆𑀘?

𑀲𑀘𑁂 𑀪𑀸𑀬𑀣 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀯𑁄 𑀤𑀼𑀓𑁆𑀔𑀫𑀧𑁆𑀧𑀺𑀬𑀁;

𑀫𑀸𑀓𑀢𑁆𑀣 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄.

𑀲𑀘𑁂 𑀳𑀺 𑀧𑀸𑀧𑀓𑀁 𑀓𑀫𑁆𑀫𑀁, 𑀓𑀭𑁄𑀣 𑀯𑀸 𑀓𑀭𑀺𑀲𑁆𑀲𑀣;

𑀦 𑀯𑁄 𑀤𑀼𑀓𑁆𑀔𑀸 𑀧𑀫𑁄𑀓𑁆𑀔𑀸𑀢𑁆𑀣𑀺, 𑀉𑀧𑀘𑁆𑀘𑀸𑀧𑀺 𑀧𑀮𑀸𑀬𑀢𑀁 [𑀧𑀮𑀸𑀬𑀢𑁄 (𑀧𑀻.)].

𑀧𑀼𑀭𑀺𑀫𑀺𑀓𑀸𑀬 𑀕𑀸𑀣𑀸𑀬 𑀆𑀡𑀢𑁆𑀢𑀺 𑀧𑀘𑁆𑀙𑀺𑀫𑀺𑀓𑀸𑀬 𑀨𑀮𑀁. 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸 𑀬𑀸 𑀘 𑀘𑀺𑀢𑁆𑀢𑀪𑀸𑀯𑀦𑀸 𑀬𑀸 𑀘 𑀧𑀜𑁆𑀜𑀸𑀪𑀸𑀯𑀦𑀸 𑀬𑀸 𑀘 𑀆𑀡𑀢𑁆𑀢𑀺 𑀭𑀸𑀕𑀯𑀺𑀭𑀸𑀕𑀸 𑀘 𑀨𑀮𑀁.

𑀢𑀢𑁆𑀣 𑀓𑀢𑀫𑀁 𑀨𑀮𑀜𑁆𑀘 𑀉𑀧𑀸𑀬𑁄 𑀘?

𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 [𑀲𑀁. 𑀦𑀺. 𑁧.𑁨𑁩] 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀁;

𑀆𑀢𑀸𑀧𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝𑀁.

𑀧𑀼𑀭𑀺𑀫𑀺𑀓𑀸𑀬 𑀅𑀟𑁆𑀠𑀕𑀸𑀣𑀸𑀬 𑀉𑀧𑀸𑀬𑁄, 𑀧𑀘𑁆𑀙𑀺𑀫𑀺𑀓𑀸𑀬 𑀅𑀟𑁆𑀠𑀕𑀸𑀣𑀸𑀬 𑀨𑀮𑀁. 𑀦𑀦𑁆𑀤𑀺𑀬𑁄 [𑀦𑀦𑁆𑀤𑀺𑀓𑁄 (𑀧𑀻. 𑀓.)] 𑀲𑀓𑁆𑀓𑁄 𑀇𑀲𑀺𑀯𑀼𑀢𑁆𑀣𑀧𑀼𑀭𑀺𑀭𑀺𑀓𑀸𑀫𑀏𑀓𑀭𑀓𑁆𑀔𑁂 [𑀇𑀲𑀺𑀯𑀼𑀢𑁆𑀢… (𑀧𑀻.)] 𑀲𑀼𑀢𑁆𑀢𑀁 𑀫𑀽𑀮𑀢𑁄 𑀉𑀧𑀸𑀤𑀸𑀬 𑀬𑀸𑀯 𑀙𑀲𑀼 𑀥𑀫𑁆𑀫𑁂𑀲𑀼. 𑀉𑀢𑁆𑀢𑀭𑀺 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀬𑀸𑀘𑀬𑁄𑀕𑁄 [𑀬𑁄 𑀘 𑀬𑁄𑀕𑁄 (𑀧𑀻.)] 𑀓𑀭𑀡𑀻𑀬𑁄, 𑀅𑀬𑀁 𑀉𑀧𑀸𑀬𑁄. 𑀅𑀲𑀳𑀕𑀢𑀲𑁆𑀲 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀫𑀼𑀘𑁆𑀘𑀢𑀻𑀢𑀺. 𑀲𑀩𑁆𑀩𑀸𑀲𑀼 𑀙𑀲𑀼 𑀢𑀻𑀲𑀼. 𑀅𑀬𑀁 𑀉𑀧𑀸𑀬𑁄 𑀘 𑀨𑀮𑀜𑁆𑀘.

𑀢𑀢𑁆𑀣 𑀓𑀢𑀫𑀸 𑀆𑀡𑀢𑁆𑀢𑀺 𑀘 𑀨𑀮𑀜𑁆𑀘 𑀉𑀧𑀸𑀬𑁄 𑀘?

𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚 𑀲𑀤𑀸 𑀲𑀢𑁄;

𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀉𑀳𑀘𑁆𑀘 [𑀊𑀳𑀘𑁆𑀘 (𑀲𑀼. 𑀦𑀺. 𑁧𑁧𑁨𑁫)], 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸.

‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚𑀸’’𑀢𑀺 𑀆𑀡𑀢𑁆𑀢𑀺. ‘‘𑀲𑀤𑀸 𑀲𑀢𑁄’’𑀢𑀺 𑀉𑀧𑀸𑀬𑁄. ‘‘𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀉𑀳𑀘𑁆𑀘, 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸’’𑀢𑀺 𑀨𑀮𑀁. 𑀲𑀫𑀸𑀥𑀺𑀁, 𑀪𑀺𑀓𑁆𑀔𑀯𑁂, 𑀪𑀸𑀯𑁂𑀣, 𑀲𑀫𑀸𑀳𑀺𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀁 𑀧𑀲𑁆𑀲𑀁 𑀅𑀭𑀺𑀬𑀲𑀸𑀯𑀓𑁄 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸𑀧𑀺…𑀧𑁂… 𑀉𑀧𑀸𑀬𑀸𑀲𑁂𑀳𑀺𑀧𑀺 𑀇𑀥 𑀢𑀻𑀡𑀺𑀧𑀺’’.

𑁨𑁩. 𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄?

𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂𑀢𑀁 𑀲𑀫𑀺𑀚𑁆𑀛𑀢𑀺. 𑀅𑀬𑀁 𑀅𑀲𑁆𑀲𑀸𑀤𑁄.

‘‘𑀥𑀫𑁆𑀫𑀘𑀭𑀺𑀬𑀸 𑀲𑀫𑀘𑀭𑀺𑀬𑀸 𑀓𑀼𑀲𑀮𑀘𑀭𑀺𑀬𑀸 𑀳𑁂𑀢𑀽𑀳𑀺, 𑀩𑁆𑀭𑀸𑀳𑁆𑀫𑀡, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺’’. 𑀅𑀬𑀁 𑀅𑀲𑁆𑀲𑀸𑀤𑁄.

𑀢𑀢𑁆𑀣 𑀓𑀢𑀫𑁄 𑀆𑀤𑀻𑀦𑀯𑁄?

𑀓𑀸𑀫𑁂𑀲𑀼 𑀯𑁂 𑀳𑀜𑁆𑀜𑀢𑁂 𑀲𑀩𑁆𑀩𑀸 𑀫𑀼𑀘𑁆𑀘𑁂𑀯 𑁋 𑀅𑀬𑀁 𑀆𑀤𑀻𑀦𑀯𑁄. 𑀧𑀲𑁂𑀦𑀤𑀺𑀲𑀁𑀬𑀼𑀢𑁆𑀢𑀓𑁂 𑀲𑀼𑀢𑁆𑀢𑁂 𑀧𑀩𑁆𑀩𑀢𑁄𑀧𑀫𑀸 𑁋 𑀅𑀬𑀁 𑀆𑀤𑀻𑀦𑀯𑁄.

𑀢𑀢𑁆𑀣 𑀓𑀢𑀫𑀁 𑀦𑀺𑀲𑁆𑀲𑀭𑀡𑀁?

𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀺.

𑀲𑀁𑀬𑀼𑀢𑁆𑀢𑀓𑁂 𑀲𑀼𑀢𑁆𑀢𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀧𑀡𑁆𑀟𑀼𑀧𑀮𑀸𑀲𑁄 𑀲𑀦𑁆𑀦𑀺𑀧𑀮𑀸𑀲𑁄 𑁋 𑀇𑀤𑀁 𑀦𑀺𑀲𑁆𑀲𑀭𑀡𑀁.

𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘?

𑀬𑀸𑀦𑀺 [𑀚𑀸. 𑁧.𑁨.𑁧𑁪𑁪 𑀤𑀼𑀓𑀦𑀺𑀧𑀸𑀢𑁂] 𑀓𑀭𑁄𑀢𑀺 𑀧𑀼𑀭𑀺𑀲𑁄, 𑀢𑀸𑀦𑀺 𑀅𑀢𑁆𑀢𑀦𑀺 𑀧𑀲𑁆𑀲𑀢𑀺;

𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓𑀁.

𑀢𑀢𑁆𑀣 𑀬𑀁 𑀧𑀸𑀧𑀓𑀸𑀭𑀻 𑀧𑀘𑁆𑀘𑀦𑀼𑀪𑁄𑀢𑀺 𑀅𑀬𑀁 𑀅𑀲𑁆𑀲𑀸𑀤𑁄. 𑀮𑀸𑀪𑀸𑀮𑀸𑀪𑀅𑀝𑁆𑀞𑀓𑁂𑀲𑀼 𑀩𑁆𑀬𑀸𑀓𑀭𑀡𑀁, 𑀢𑀢𑁆𑀣 𑀅𑀮𑀸𑀪𑁄 𑀅𑀬𑀲𑁄 𑀦𑀺𑀦𑁆𑀤𑀸 𑀤𑀼𑀓𑁆𑀔𑀁, 𑀅𑀬𑀁 𑀆𑀤𑀻𑀦𑀯𑁄. 𑀮𑀸𑀪𑁄 𑀬𑀲𑁄 𑀲𑀼𑀔𑀁 𑀧𑀲𑀁𑀲𑀸, 𑀅𑀬𑀁 𑀅𑀲𑁆𑀲𑀸𑀤𑁄.

𑀢𑀢𑁆𑀣 𑀓𑀢𑀫𑀁 𑀅𑀲𑁆𑀲𑀸𑀤𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘?

‘‘𑀲𑀼𑀔𑁄 𑀯𑀺𑀧𑀸𑀓𑁄 𑀧𑀼𑀜𑁆𑀜𑀸𑀦𑀁, 𑀅𑀥𑀺𑀧𑁆𑀧𑀸𑀬𑁄 𑀘 𑀇𑀚𑁆𑀛𑀢𑀺;

𑀔𑀺𑀧𑁆𑀧𑀜𑁆𑀘 𑀧𑀭𑀫𑀁 𑀲𑀦𑁆𑀢𑀺𑀁, 𑀦𑀺𑀩𑁆𑀩𑀸𑀦𑀫𑀥𑀺𑀕𑀘𑁆𑀙𑀢𑀻’’𑀢𑀺.

𑀬𑁄 𑀘 𑀯𑀺𑀧𑀸𑀓𑁄 𑀧𑀼𑀜𑁆𑀜𑀸𑀦𑀁 𑀬𑀸 𑀘 𑀅𑀥𑀺𑀧𑁆𑀧𑀸𑀬𑀲𑁆𑀲 𑀇𑀚𑁆𑀛𑀦𑀸, 𑀅𑀬𑀁 𑀅𑀲𑁆𑀲𑀸𑀤𑁄. 𑀬𑀁 𑀔𑀺𑀧𑁆𑀧𑀜𑁆𑀘 𑀧𑀭𑀫𑀁 𑀲𑀦𑁆𑀢𑀺𑀁 𑀦𑀺𑀩𑁆𑀩𑀸𑀦𑀫𑀥𑀺𑀕𑀘𑁆𑀙𑀢𑀺, 𑀇𑀤𑀁 𑀦𑀺𑀲𑁆𑀲𑀭𑀡𑀁.

𑀩𑀸𑀢𑁆𑀢𑀺𑀁𑀲𑀸𑀬 𑀘𑁂𑀯 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂𑀬𑁂𑀯 𑀕𑀢𑀺𑀬𑁄 𑀳𑁄𑀦𑁆𑀢𑀺, 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻 𑀬𑀸𑀯 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀅𑀚𑁆𑀛𑀸𑀯𑀲𑀢𑀺 𑀅𑀬𑀁 𑀅𑀲𑁆𑀲𑀸𑀤𑁄. 𑀲𑀘𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺 𑀲𑀩𑁆𑀩𑁂𑀦 𑀑𑀖𑁂𑀦 [𑀑𑀲𑀥𑁂𑀦 (𑀧𑀻. 𑀓.)] 𑀦𑀺𑀲𑁆𑀲𑀭𑀡𑀁 𑀅𑀬𑀁 𑀅𑀲𑁆𑀲𑀸𑀤𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘.

𑀢𑀢𑁆𑀣 𑀓𑀢𑀫𑁄 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘?

𑀆𑀤𑀸𑀦𑀲𑁆𑀲 [𑀆𑀤𑀺𑀦𑁆𑀦𑀲𑁆𑀲 (𑀓.)] 𑀪𑀬𑀁 𑀜𑀢𑁆𑀯𑀸, 𑀚𑀸𑀢𑀺𑀫𑀭𑀡𑀲𑀫𑁆𑀪𑀯𑀁;

𑀅𑀦𑀸𑀤𑀸𑀢𑀼𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑀸.

𑀧𑀼𑀭𑀺𑀫𑀺𑀓𑀸𑀬 𑀅𑀟𑁆𑀠𑀕𑀸𑀣𑀸𑀬 𑀚𑀸𑀢𑀺𑀫𑀭𑀡𑀲𑀫𑁆𑀪𑀯𑁄 𑀆𑀤𑀻𑀦𑀯𑁄. 𑀅𑀦𑀸𑀤𑀸𑀢𑀼𑀁 𑀦𑀺𑀩𑁆𑀩𑀢𑁆𑀢𑀢𑀺 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑀸𑀢𑀺 𑀦𑀺𑀲𑁆𑀲𑀭𑀡𑀁.

𑀓𑀺𑀘𑁆𑀙𑀁 𑀯𑀢𑀸𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄 𑀬𑀫𑀺𑀤𑀁 𑀚𑀸𑀬𑀢𑁂 𑀘 𑀫𑀻𑀬𑀢𑁂 𑀘. 𑀬𑀸𑀯 𑀓𑀼𑀤𑀲𑁆𑀲𑀼𑀦𑀸𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑁄 𑀪𑀯𑀺𑀲𑁆𑀲𑀢𑀺 𑀧𑀭𑀢𑁄 𑀯𑀸𑀢𑀺 𑀏𑀢𑁆𑀣 𑀬𑀸 𑀉𑀧𑀭𑀺𑀓𑁆𑀔𑀸, 𑀅𑀬𑀁 𑀆𑀤𑀻𑀦𑀯𑁄. 𑀬𑁄 𑀕𑁂𑀥𑀁 𑀜𑀢𑁆𑀯𑀸 𑀅𑀪𑀺𑀦𑀺𑀓𑁆𑀔𑀫𑀢𑀺 𑀬𑀸𑀯 𑀧𑀼𑀭𑀸𑀡𑀓𑀸𑀬 𑀭𑀸𑀚𑀥𑀸𑀦𑀺𑀬𑀸, 𑀇𑀤𑀁 𑀦𑀺𑀲𑁆𑀲𑀭𑀡𑀁. 𑀅𑀬𑀁 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘.

𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘?

𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀯𑀺𑀯𑀺𑀥𑀸 [𑀫𑀥𑀼𑀭𑀸 (𑀣𑁂𑀭𑀕𑀸. 𑁭𑁮𑁭)] 𑀫𑀦𑁄𑀭𑀫𑀸, 𑀯𑀺𑀭𑀽𑀧𑀭𑀽𑀧𑁂𑀳𑀺 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢𑀁;

𑀢𑀲𑁆𑀫𑀸 𑀅𑀳𑀁 [𑀣𑁂𑀭𑀕𑀸. 𑁭𑁮𑁭] 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚, 𑀅𑀧𑀡𑁆𑀡𑀓𑀁 𑀲𑀸𑀫𑀜𑁆𑀜𑀫𑁂𑀯 𑀲𑁂𑀬𑁆𑀬𑁄.

𑀬𑀁 ‘‘𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀯𑀺𑀯𑀺𑀥𑀸 𑀫𑀦𑁄𑀭𑀫𑀸’’𑀢𑀺 𑀅𑀬𑀁 𑀅𑀲𑁆𑀲𑀸𑀤𑁄. 𑀬𑀁 ‘‘𑀯𑀺𑀭𑀽𑀧𑀭𑀽𑀧𑁂𑀳𑀺 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢’’𑀦𑁆𑀢𑀺 𑀅𑀬𑀁 𑀆𑀤𑀻𑀦𑀯𑁄. 𑀬𑀁 𑀅𑀳𑀁 𑀅𑀕𑀸𑀭𑀲𑁆𑀫𑀸 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚 𑀅𑀧𑀡𑁆𑀡𑀓𑀁 𑀲𑀸𑀫𑀜𑁆𑀜𑀫𑁂𑀯 𑀲𑁂𑀬𑁆𑀬𑁄𑀢𑀺 𑀇𑀤𑀁 𑀦𑀺𑀲𑁆𑀲𑀭𑀡𑀁.

𑀩𑀮𑀯𑀁 𑀩𑀸𑀮𑁄𑀧𑀫𑀲𑀼𑀢𑁆𑀢𑀁 𑀬𑀁 𑀆𑀲𑀸𑀬 𑀯𑀸 𑀯𑁂𑀤𑀦𑀻𑀬𑀁 𑀓𑀫𑁆𑀫𑀁 𑀕𑀸𑀳𑀢𑀺, 𑀢𑀣𑀸 𑀘𑁂𑀧𑀺 𑀬𑀁 𑀬𑀁 𑀧𑀸𑀧𑀓𑀫𑁆𑀫𑀁 𑀅𑀦𑀼𑀪𑁄𑀢𑀺, 𑀢𑀢𑁆𑀣 𑀤𑀼𑀓𑁆𑀔𑀯𑁂𑀤𑀦𑀻𑀬𑁂𑀦 𑀓𑀫𑁆𑀫𑁂𑀦 𑀅𑀪𑀸𑀯𑀺𑀢𑀓𑀸𑀬𑁂𑀦 𑀘 𑀬𑀸𑀯 𑀧𑀭𑀺𑀢𑁆𑀢𑀘𑁂𑀢𑀲𑁄 𑀘 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀺 𑀲𑀼𑀔𑀯𑁂𑀤𑀦𑀻𑀬𑁂𑀦 𑀓𑀫𑁆𑀫𑁂𑀦 𑀅𑀲𑁆𑀲𑀸𑀤𑁂𑀢𑀺. 𑀬𑀁 𑀧𑀼𑀭𑀸𑀲𑀤𑀺𑀲𑁄 𑀳𑁄𑀢𑀺. 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀧𑀜𑁆𑀜𑁄 𑀫𑀳𑀸𑀦𑀸𑀫𑁄 𑀅𑀧𑀭𑀺𑀢𑁆𑀢𑀘𑁂𑀢𑀲𑁄, 𑀇𑀤𑀁 𑀦𑀺𑀲𑁆𑀲𑀭𑀡𑀁.

𑁨𑁪. 𑀢𑀢𑁆𑀣 𑀓𑀢𑀫𑀁 𑀮𑁄𑀓𑀺𑀓𑀁 𑀲𑀼𑀢𑁆𑀢𑀁?

𑀦 𑀳𑀺 𑀧𑀸𑀧𑀁 𑀓𑀢𑀁 𑀓𑀫𑁆𑀫𑀁, 𑀲𑀚𑁆𑀚𑀼𑀔𑀻𑀭𑀁𑀯 𑀫𑀼𑀘𑁆𑀘𑀢𑀺;

𑀟𑀳𑀦𑁆𑀢𑀁 𑀩𑀸𑀮𑀫𑀦𑁆𑀯𑁂𑀢𑀺, 𑀪𑀲𑁆𑀫𑀘𑁆𑀙𑀦𑁆𑀦𑁄𑀯 [𑀪𑀲𑁆𑀫𑀸𑀙𑀦𑁆𑀦𑁄𑀯 (𑀓.) 𑀧𑀲𑁆𑀲 𑀥. 𑀧. 𑁭𑁧] 𑀧𑀸𑀯𑀓𑁄.

𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺, 𑀇𑀤𑀁 𑀮𑁄𑀓𑀺𑀓𑀁 𑀲𑀼𑀢𑁆𑀢𑀁.

𑀢𑀢𑁆𑀣 𑀓𑀢𑀫𑀁 𑀮𑁄𑀓𑀼𑀢𑁆𑀢𑀭𑀁 𑀲𑀼𑀢𑁆𑀢𑀁?

‘‘𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀣𑀗𑁆𑀕𑀢𑀸𑀦𑀺 [𑀲𑀫𑀣𑀁 𑀕𑀢𑀸𑀦𑀺 (𑀧𑀻.) 𑀧𑀲𑁆𑀲 𑀥. 𑀧. 𑁯𑁪], 𑀅𑀲𑁆𑀲𑀸 𑀬𑀣𑀸 𑀲𑀸𑀭𑀣𑀺𑀦𑀸 𑀲𑀼𑀤𑀦𑁆𑀢𑀸;

𑀧𑀳𑀻𑀦𑀫𑀸𑀦𑀲𑁆𑀲 𑀅𑀦𑀸𑀲𑀯𑀲𑁆𑀲, 𑀤𑁂𑀯𑀸𑀧𑀺 𑀢𑀲𑁆𑀲 𑀧𑀺𑀳𑀬𑀦𑁆𑀢𑀺 𑀢𑀸𑀤𑀺𑀦𑁄’’𑀢𑀺.

‘‘𑀅𑀭𑀺𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀫𑀸𑀥𑀺𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀇𑀤𑀁 𑀮𑁄𑀓𑀼𑀢𑁆𑀢𑀭𑀁 𑀲𑀼𑀢𑁆𑀢𑀁.

𑀢𑀢𑁆𑀣 𑀓𑀢𑀫𑀁 𑀮𑁄𑀓𑀺𑀓𑀁 𑀮𑁄𑀓𑀼𑀢𑁆𑀢𑀭𑀜𑁆𑀘 𑀲𑀼𑀢𑁆𑀢𑀁?

𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀤𑀬𑁆𑀳𑀫𑀸𑀦𑁄𑀯 𑀫𑀢𑁆𑀣𑀓𑁂;

𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂.

‘‘𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀤𑀬𑁆𑀳𑀫𑀸𑀦𑁄𑀯 𑀫𑀢𑁆𑀣𑀓𑁂’’𑀢𑀺 𑀮𑁄𑀓𑀺𑀓𑀁;

‘‘𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺 𑀮𑁄𑀓𑀼𑀢𑁆𑀢𑀭𑀁;

𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁂 𑀅𑀢𑁆𑀣𑀺 𑀙𑀦𑁆𑀤𑁄𑀢𑀺 𑀮𑁄𑀓𑀺𑀓𑀁. 𑀦𑀢𑁆𑀣𑀺 𑀙𑀦𑁆𑀤𑁄𑀢𑀺 𑀮𑁄𑀓𑀼𑀢𑁆𑀢𑀭𑀁 𑀲𑀼𑀢𑁆𑀢𑀁.

𑀢𑀢𑁆𑀣 𑀓𑀢𑀫𑀁 𑀓𑀫𑁆𑀫𑀁?

𑀬𑁄 𑀧𑀸𑀡𑀫𑀢𑀺𑀧𑀸𑀢𑁂𑀢𑀺, 𑀫𑀼𑀲𑀸𑀯𑀸𑀤𑀜𑁆𑀘 𑀪𑀸𑀲𑀢𑀺;

𑀮𑁄𑀓𑁂 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺 [𑀆𑀤𑀺𑀬𑀺 (𑀓.) 𑀧𑀲𑁆𑀲 𑀅. 𑀦𑀺. 𑁫.𑁧𑁭𑁪], 𑀧𑀭𑀤𑀸𑀭𑀜𑁆𑀘 𑀕𑀘𑁆𑀙𑀢𑀺.

𑀲𑀼𑀭𑀸𑀫𑁂𑀭𑀬𑀧𑀸𑀦𑀜𑁆𑀘, 𑀬𑁄 𑀦𑀭𑁄 𑀅𑀦𑀼𑀬𑀼𑀜𑁆𑀚𑀢𑀺;

𑀅𑀧𑁆𑀧𑀳𑀸𑀬 𑀧𑀜𑁆𑀘 𑀯𑁂𑀭𑀸𑀦𑀺, 𑀤𑀼𑀲𑁆𑀲𑀻𑀮𑁄 𑀇𑀢𑀺 𑀯𑀼𑀘𑁆𑀘𑀢𑀺.

𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀤𑀼𑀘𑁆𑀘𑀭𑀺𑀢𑀸𑀦𑀺. 𑀇𑀤𑀁 𑀓𑀫𑁆𑀫𑀁.

𑀢𑀢𑁆𑀣 𑀓𑀢𑀫𑁄 𑀯𑀺𑀧𑀸𑀓𑁄?