𑁧. 𑀓𑀸𑀫𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑁧. 𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀺;

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀺.

𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲𑀸𑀢𑀺 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘. 𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸? 𑀫𑀦𑀸𑀧𑀺𑀓𑀸 𑀭𑀽𑀧𑀸 𑀫𑀦𑀸𑀧𑀺𑀓𑀸 𑀲𑀤𑁆𑀤𑀸 𑀫𑀦𑀸𑀧𑀺𑀓𑀸 𑀕𑀦𑁆𑀥𑀸 𑀫𑀦𑀸𑀧𑀺𑀓𑀸 𑀭𑀲𑀸 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸; 𑀅𑀢𑁆𑀣𑀭𑀡𑀸 𑀧𑀸𑀯𑀼𑀭𑀡𑀸 [𑀧𑀸𑀧𑀼𑀭𑀡𑀸 (𑀲𑀻. 𑀲𑁆𑀬𑀸.)] 𑀤𑀸𑀲𑀺𑀤𑀸𑀲𑀸 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸 𑀔𑁂𑀢𑁆𑀢𑀁 𑀯𑀢𑁆𑀣𑀼 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀭𑀝𑁆𑀞𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘, 𑀬𑀁 𑀓𑀺𑀜𑁆𑀘𑀺 𑀭𑀚𑀦𑀻𑀬𑀁 𑀯𑀢𑁆𑀣𑀼 𑁋 𑀯𑀢𑁆𑀣𑀼𑀓𑀸𑀫𑀸.

𑀅𑀧𑀺 𑀘 𑀅𑀢𑀻𑀢𑀸 𑀓𑀸𑀫𑀸 𑀅𑀦𑀸𑀕𑀢𑀸 𑀓𑀸𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀓𑀸𑀫𑀸; 𑀅𑀚𑁆𑀛𑀢𑁆𑀢𑀸 𑀓𑀸𑀫𑀸 𑀩𑀳𑀺𑀤𑁆𑀥𑀸 𑀓𑀸𑀫𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀓𑀸𑀫𑀸; 𑀳𑀻𑀦𑀸 𑀓𑀸𑀫𑀸 𑀫𑀚𑁆𑀛𑀺𑀫𑀸 𑀓𑀸𑀫𑀸 𑀧𑀡𑀻𑀢𑀸 𑀓𑀸𑀫𑀸; 𑀆𑀧𑀸𑀬𑀺𑀓𑀸 𑀓𑀸𑀫𑀸 𑀫𑀸𑀦𑀼𑀲𑀺𑀓𑀸 𑀓𑀸𑀫𑀸 𑀤𑀺𑀩𑁆𑀩𑀸 𑀓𑀸𑀫𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀓𑀸𑀫𑀸; 𑀦𑀺𑀫𑁆𑀫𑀺𑀢𑀸 𑀓𑀸𑀫𑀸 𑀅𑀦𑀺𑀫𑁆𑀫𑀺𑀢𑀸 𑀓𑀸𑀫𑀸 𑀧𑀭𑀦𑀺𑀫𑁆𑀫𑀺𑀢𑀸 𑀓𑀸𑀫𑀸; 𑀧𑀭𑀺𑀕𑁆𑀕𑀳𑀺𑀢𑀸 𑀓𑀸𑀫𑀸, 𑀅𑀧𑀭𑀺𑀕𑁆𑀕𑀳𑀺𑀢𑀸 𑀓𑀸𑀫𑀸, 𑀫𑀫𑀸𑀬𑀺𑀢𑀸 𑀓𑀸𑀫𑀸, 𑀅𑀫𑀫𑀸𑀬𑀺𑀢𑀸 𑀓𑀸𑀫𑀸; 𑀲𑀩𑁆𑀩𑁂𑀧𑀺 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀅𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀢𑀡𑁆𑀳𑀸𑀯𑀢𑁆𑀣𑀼𑀓𑀸 𑀢𑀡𑁆𑀳𑀸𑀭𑀫𑁆𑀫𑀡𑀸 𑀓𑀸𑀫𑀦𑀻𑀬𑀝𑁆𑀞𑁂𑀦 𑀭𑀚𑀦𑀻𑀬𑀝𑁆𑀞𑁂𑀦 𑀫𑀤𑀦𑀻𑀬𑀝𑁆𑀞𑁂𑀦 𑀓𑀸𑀫𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸.

𑀓𑀢𑀫𑁂 𑀓𑀺𑀮𑁂𑀲𑀓𑀸𑀫𑀸? 𑀙𑀦𑁆𑀤𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄 𑀙𑀦𑁆𑀤𑀭𑀸𑀕𑁄 𑀓𑀸𑀫𑁄; 𑀲𑀗𑁆𑀓𑀧𑁆𑀧𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄 𑀲𑀗𑁆𑀓𑀧𑁆𑀧𑀭𑀸𑀕𑁄 𑀓𑀸𑀫𑁄; 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁.

‘‘𑀅𑀤𑁆𑀤𑀲𑀁 𑀓𑀸𑀫 𑀢𑁂 𑀫𑀽𑀮𑀁, 𑀲𑀗𑁆𑀓𑀧𑁆𑀧𑀸 𑀓𑀸𑀫 𑀚𑀸𑀬𑀲𑀺;

𑀦 𑀢𑀁 𑀲𑀗𑁆𑀓𑀧𑁆𑀧𑀬𑀺𑀲𑁆𑀲𑀸𑀫𑀺, 𑀏𑀯𑀁 𑀓𑀸𑀫 𑀦 𑀳𑁄𑀳𑀺𑀲𑀻’’𑀢𑀺 [𑀦 𑀳𑁂𑀳𑀺𑀲𑀻𑀢𑀺 (𑀲𑁆𑀬𑀸.)]. 𑁋

𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀓𑀸𑀫𑀬𑀫𑀸𑀦𑀲𑁆𑀲𑀸𑀢𑀺 𑀓𑀸𑀫𑀬𑀫𑀸𑀦𑀲𑁆𑀲 𑀇𑀘𑁆𑀙𑀫𑀸𑀦𑀲𑁆𑀲 𑀲𑀸𑀤𑀺𑀬𑀫𑀸𑀦𑀲𑁆𑀲 𑀧𑀢𑁆𑀣𑀬𑀫𑀸𑀦𑀲𑁆𑀲 𑀧𑀺𑀳𑀬𑀫𑀸𑀦𑀲𑁆𑀲 𑀅𑀪𑀺𑀚𑀧𑁆𑀧𑀫𑀸𑀦𑀲𑁆𑀲𑀸𑀢𑀺 𑁋 𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲.

𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀻𑀢𑀺. 𑀢𑀲𑁆𑀲 𑀘𑁂𑀢𑀺 𑀢𑀲𑁆𑀲 𑀔𑀢𑁆𑀢𑀺𑀬𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀯𑁂𑀲𑁆𑀲𑀲𑁆𑀲 𑀯𑀸 𑀲𑀼𑀤𑁆𑀤𑀲𑁆𑀲 𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀤𑁂𑀯𑀲𑁆𑀲 𑀯𑀸 𑀫𑀦𑀼𑀲𑁆𑀲𑀲𑁆𑀲 𑀯𑀸. 𑀢𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸 𑀯𑀼𑀘𑁆𑀘𑀦𑁆𑀢𑀺 𑁋 𑀫𑀦𑀸𑀧𑀺𑀓𑀸 𑀭𑀽𑀧𑀸 𑀫𑀦𑀸𑀧𑀺𑀓𑀸 𑀲𑀤𑁆𑀤𑀸 𑀫𑀦𑀸𑀧𑀺𑀓𑀸 𑀕𑀦𑁆𑀥𑀸 𑀫𑀦𑀸𑀧𑀺𑀓𑀸 𑀭𑀲𑀸 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸. 𑀲𑀫𑀺𑀚𑁆𑀛𑀢𑀻𑀢𑀺 𑀇𑀚𑁆𑀛𑀢𑀺 𑀲𑀫𑀺𑀚𑁆𑀛𑀢𑀺 𑀮𑀪𑀢𑀺 𑀧𑀝𑀺𑀮𑀪𑀢𑀺 𑀅𑀥𑀺𑀕𑀘𑁆𑀙𑀢𑀺 𑀯𑀺𑀦𑁆𑀤𑀢𑀻𑀢𑀺 𑁋 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀺.

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀻𑀢𑀺. 𑀅𑀤𑁆𑀥𑀸𑀢𑀺 𑀏𑀓𑀁𑀲𑀯𑀘𑀦𑀁 𑀦𑀺𑀲𑁆𑀲𑀁𑀲𑀬𑀯𑀘𑀦𑀁 𑀦𑀺𑀓𑁆𑀓𑀗𑁆𑀔𑀸𑀯𑀘𑀦𑀁 𑀅𑀤𑁆𑀯𑁂𑀚𑁆𑀛𑀯𑀘𑀦𑀁 𑀅𑀤𑁆𑀯𑁂𑀴𑁆𑀳𑀓𑀯𑀘𑀦𑀁 𑀦𑀺𑀬𑁄𑀕𑀯𑀘𑀦𑀁 𑀅𑀧𑀡𑁆𑀡𑀓𑀯𑀘𑀦𑀁 𑀅𑀯𑀢𑁆𑀣𑀸𑀧𑀦𑀯𑀘𑀦𑀫𑁂𑀢𑀁 𑁋 𑀅𑀤𑁆𑀥𑀸𑀢𑀺. 𑀧𑀻𑀢𑀻𑀢𑀺 𑀬𑀸 𑀧𑀜𑁆𑀘𑀓𑀸𑀫𑀕𑀼𑀡𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀧𑀻𑀢𑀺 𑀧𑀸𑀫𑀼𑀚𑁆𑀚𑀁 𑀆𑀫𑁄𑀤𑀦𑀸 𑀧𑀫𑁄𑀤𑀦𑀸 𑀳𑀸𑀲𑁄 𑀧𑀳𑀸𑀲𑁄 𑀯𑀺𑀢𑁆𑀢𑀺 𑀢𑀼𑀝𑁆𑀞𑀺 𑀑𑀤𑀕𑁆𑀬𑀁 𑀅𑀢𑁆𑀢𑀫𑀦𑀢𑀸 𑀅𑀪𑀺𑀨𑀭𑀡𑀢𑀸 𑀘𑀺𑀢𑁆𑀢𑀲𑁆𑀲. 𑀫𑀦𑁄𑀢𑀺 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀦𑁄. 𑀅𑀬𑀁 𑀫𑀦𑁄 𑀇𑀫𑀸𑀬 𑀧𑀻𑀢𑀺𑀬𑀸 𑀲𑀳𑀕𑀢𑁄 𑀳𑁄𑀢𑀺 𑀲𑀳𑀚𑀸𑀢𑁄 𑀲𑀁𑀲𑀝𑁆𑀞𑁄 𑀲𑀫𑁆𑀧𑀬𑀼𑀢𑁆𑀢𑁄 𑀏𑀓𑀼𑀧𑁆𑀧𑀸𑀤𑁄 𑀏𑀓𑀦𑀺𑀭𑁄𑀥𑁄 𑀏𑀓𑀯𑀢𑁆𑀣𑀼𑀓𑁄 𑀏𑀓𑀸𑀭𑀫𑁆𑀫𑀡𑁄. 𑀧𑀻𑀢𑀺𑀫𑀦𑁄 𑀳𑁄𑀢𑀻𑀢𑀺 𑀧𑀻𑀢𑀺𑀫𑀦𑁄 𑀳𑁄𑀢𑀺 𑀢𑀼𑀝𑁆𑀞𑀫𑀦𑁄 𑀳𑀝𑁆𑀞𑀫𑀦𑁄 𑀧𑀳𑀝𑁆𑀞𑀫𑀦𑁄 𑀅𑀢𑁆𑀢𑀫𑀦𑁄 𑀉𑀤𑀕𑁆𑀕𑀫𑀦𑁄 𑀫𑀼𑀤𑀺𑀢𑀫𑀦𑁄 𑀧𑀫𑁄𑀤𑀺𑀢𑀫𑀦𑁄 𑀳𑁄𑀢𑀻𑀢𑀺 𑁋 𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺.

𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀻𑀢𑀺. 𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀅𑀥𑀺𑀕𑀦𑁆𑀢𑁆𑀯𑀸 𑀯𑀺𑀦𑁆𑀤𑀺𑀢𑁆𑀯𑀸. 𑀫𑀘𑁆𑀘𑁄𑀢𑀺 𑀲𑀢𑁆𑀢𑁄 𑀦𑀭𑁄 𑀫𑀸𑀦𑀯𑁄 𑀧𑁄𑀲𑁄 𑀧𑀼𑀕𑁆𑀕𑀮𑁄 𑀚𑀻𑀯𑁄 𑀚𑀸𑀕𑀼 [𑀚𑀸𑀢𑀼 (𑀲𑁆𑀬𑀸.), 𑀚𑀕𑀼 (𑀓.)] 𑀚𑀦𑁆𑀢𑀼 𑀇𑀦𑁆𑀤𑀕𑀼 [𑀳𑀺𑀦𑁆𑀤𑀕𑀽 (𑀲𑀻. 𑀲𑁆𑀬𑀸.)] 𑀫𑀦𑀼𑀚𑁄. 𑀬𑀤𑀺𑀘𑁆𑀙𑀢𑀻𑀢𑀺 𑀬𑀁 𑀇𑀘𑁆𑀙𑀢𑀺 𑀬𑀁 𑀲𑀸𑀤𑀺𑀬𑀢𑀺 𑀬𑀁 𑀧𑀢𑁆𑀣𑁂𑀢𑀺 𑀬𑀁 𑀧𑀺𑀳𑁂𑀢𑀺 𑀬𑀁 𑀅𑀪𑀺𑀚𑀧𑁆𑀧𑀢𑀺, 𑀭𑀽𑀧𑀁 𑀯𑀸 𑀲𑀤𑁆𑀤𑀁 𑀯𑀸 𑀕𑀦𑁆𑀥𑀁 𑀯𑀸 𑀭𑀲𑀁 𑀯𑀸 𑀨𑁄𑀝𑁆𑀞𑀩𑁆𑀩𑀁 𑀯𑀸𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀺.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀺;

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀻’’𑀢𑀺.

𑁨. 𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲, 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀺.

𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲𑀸𑀢𑀺. 𑀢𑀲𑁆𑀲 𑀘𑁂𑀢𑀺 𑀢𑀲𑁆𑀲 𑀔𑀢𑁆𑀢𑀺𑀬𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀯𑁂𑀲𑁆𑀲𑀲𑁆𑀲 𑀯𑀸 𑀲𑀼𑀤𑁆𑀤𑀲𑁆𑀲 𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀤𑁂𑀯𑀲𑁆𑀲 𑀯𑀸 𑀫𑀦𑀼𑀲𑁆𑀲𑀲𑁆𑀲 𑀯𑀸. 𑀓𑀸𑀫𑀬𑀸𑀦𑀲𑁆𑀲𑀸𑀢𑀺 𑀓𑀸𑀫𑁂 𑀇𑀘𑁆𑀙𑀫𑀸𑀦𑀲𑁆𑀲 𑀲𑀸𑀤𑀺𑀬𑀫𑀸𑀦𑀲𑁆𑀲 𑀧𑀢𑁆𑀣𑀬𑀫𑀸𑀦𑀲𑁆𑀲 𑀧𑀺𑀳𑀬𑀫𑀸𑀦𑀲𑁆𑀲 𑀅𑀪𑀺𑀚𑀧𑁆𑀧𑀫𑀸𑀦𑀲𑁆𑀲. 𑀅𑀣 𑀯𑀸 𑀓𑀸𑀫𑀢𑀡𑁆𑀳𑀸𑀬 𑀬𑀸𑀬𑀢𑀺 𑀦𑀺𑀬𑁆𑀬𑀢𑀺 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀺. 𑀬𑀣𑀸 𑀳𑀢𑁆𑀣𑀺𑀬𑀸𑀦𑁂𑀦 𑀯𑀸 𑀅𑀲𑁆𑀲𑀬𑀸𑀦𑁂𑀦 𑀯𑀸 𑀕𑁄𑀬𑀸𑀦𑁂𑀦 𑀯𑀸 𑀅𑀚𑀬𑀸𑀦𑁂𑀦 𑀯𑀸 𑀫𑁂𑀡𑁆𑀟𑀬𑀸𑀦𑁂𑀦 𑀯𑀸 𑀑𑀝𑁆𑀞𑀬𑀸𑀦𑁂𑀦 𑀯𑀸 𑀔𑀭𑀬𑀸𑀦𑁂𑀦 𑀯𑀸 𑀬𑀸𑀬𑀢𑀺 𑀦𑀺𑀬𑁆𑀬𑀢𑀺 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀺; 𑀏𑀯𑀫𑁂𑀯𑀁 𑀓𑀸𑀫𑀢𑀡𑁆𑀳𑀸𑀬 𑀬𑀸𑀬𑀢𑀺 𑀦𑀺𑀬𑁆𑀬𑀢𑀺 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀻𑀢𑀺 𑁋 𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲.

𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄𑀢𑀺. 𑀙𑀦𑁆𑀤𑁄𑀢𑀺 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑀓𑀸𑀫𑁄𑀖𑁄 𑀓𑀸𑀫𑀬𑁄𑀕𑁄 𑀓𑀸𑀫𑀼𑀧𑀸𑀤𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁, 𑀢𑀲𑁆𑀲 𑀲𑁄 𑀓𑀸𑀫𑀘𑁆𑀙𑀦𑁆𑀤𑁄 𑀚𑀸𑀢𑁄 𑀳𑁄𑀢𑀺 𑀲𑀜𑁆𑀚𑀸𑀢𑁄 𑀦𑀺𑀩𑁆𑀩𑀢𑁆𑀢𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑁄 𑀧𑀸𑀢𑀼𑀪𑀽𑀢𑁄. 𑀚𑀦𑁆𑀢𑀼𑀦𑁄𑀢𑀺 𑀲𑀢𑁆𑀢𑀲𑁆𑀲 𑀦𑀭𑀲𑁆𑀲 𑀫𑀸𑀦𑀯𑀲𑁆𑀲 𑀧𑁄𑀲𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀚𑀻𑀯𑀲𑁆𑀲 𑀚𑀸𑀕𑀼𑀲𑁆𑀲 𑀚𑀦𑁆𑀢𑀼𑀲𑁆𑀲 𑀇𑀦𑁆𑀤𑀕𑀼𑀲𑁆𑀲 𑀫𑀦𑀼𑀚𑀲𑁆𑀲𑀸𑀢𑀺 𑁋 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄.

𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑁋 𑀢𑁂 𑀯𑀸 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑁄 𑀯𑀸 𑀓𑀸𑀫𑁂𑀳𑀺 𑀧𑀭𑀺𑀳𑀸𑀬𑀢𑀺. 𑀓𑀣𑀁 𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺? 𑀢𑀲𑁆𑀲 𑀢𑀺𑀝𑁆𑀞𑀦𑁆𑀢𑀲𑁆𑀲𑁂𑀯 𑀢𑁂 𑀪𑁄𑀕𑁂 𑀭𑀸𑀚𑀸𑀦𑁄 𑀯𑀸 𑀳𑀭𑀦𑁆𑀢𑀺, 𑀘𑁄𑀭𑀸 𑀯𑀸 𑀳𑀭𑀦𑁆𑀢𑀺, 𑀅𑀕𑁆𑀕𑀺 𑀯𑀸 𑀤𑀳𑀢𑀺, 𑀉𑀤𑀓𑀁 𑀯𑀸 𑀯𑀳𑀢𑀺, 𑀅𑀧𑁆𑀧𑀺𑀬𑀸 𑀯𑀸 𑀤𑀸𑀬𑀸𑀤𑀸 𑀳𑀭𑀦𑁆𑀢𑀺, 𑀦𑀺𑀳𑀺𑀢𑀁 𑀯𑀸 𑀦𑀸𑀥𑀺𑀕𑀘𑁆𑀙𑀢𑀺, 𑀤𑀼𑀧𑁆𑀧𑀬𑀼𑀢𑁆𑀢𑀸 𑀯𑀸 𑀓𑀫𑁆𑀫𑀦𑁆𑀢𑀸 𑀪𑀺𑀚𑁆𑀚𑀦𑁆𑀢𑀺, 𑀓𑀼𑀮𑁂 𑀯𑀸 𑀓𑀼𑀮𑀗𑁆𑀕𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀬𑁄 𑀢𑁂 𑀪𑁄𑀕𑁂 𑀯𑀺𑀓𑀺𑀭𑀢𑀺 𑀯𑀺𑀥𑀫𑀢𑀺 [𑀯𑀺𑀥𑀫𑁂𑀢𑀺 (𑀲𑁆𑀬𑀸.)] 𑀯𑀺𑀤𑁆𑀥𑀁𑀲𑁂𑀢𑀺 𑀅𑀦𑀺𑀘𑁆𑀘𑀢𑀸𑀬𑁂𑀯 𑀅𑀝𑁆𑀞𑀫𑀻. 𑀏𑀯𑀁 𑀢𑁂 𑀓𑀸𑀫𑀸 𑀳𑀸𑀬𑀦𑁆𑀢𑀺 𑀧𑀭𑀺𑀳𑀸𑀬𑀦𑁆𑀢𑀺 𑀧𑀭𑀺𑀥𑀁𑀲𑁂𑀦𑁆𑀢𑀺 𑀧𑀭𑀺𑀧𑀢𑀦𑁆𑀢𑀺 𑀅𑀦𑁆𑀢𑀭𑀥𑀸𑀬𑀦𑁆𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀦𑁆𑀢𑀺. 𑀓𑀣𑀁 𑀲𑁄 𑀓𑀸𑀫𑁂𑀳𑀺 𑀧𑀭𑀺𑀳𑀸𑀬𑀢𑀺? 𑀢𑀺𑀝𑁆𑀞𑀦𑁆𑀢𑁂𑀯 𑀢𑁂 𑀪𑁄𑀕𑁂 𑀲𑁄 𑀘𑀯𑀢𑀺 𑀫𑀭𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺. 𑀏𑀯𑀁 𑀲𑁄 𑀓𑀸𑀫𑁂𑀳𑀺 𑀳𑀸𑀬𑀢𑀺 𑀧𑀭𑀺𑀳𑀸𑀬𑀢𑀺 𑀧𑀭𑀺𑀥𑀁𑀲𑁂𑀢𑀺 𑀧𑀭𑀺𑀧𑀢𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺.

𑀘𑁄𑀭𑀸 𑀳𑀭𑀦𑁆𑀢𑀺 𑀭𑀸𑀚𑀸𑀦𑁄, 𑀅𑀕𑁆𑀕𑀺 𑀤𑀳𑀢𑀺 𑀦𑀲𑁆𑀲𑀢𑀺;

𑀅𑀣 𑀅𑀦𑁆𑀢𑁂𑀦 𑀚𑀳𑀢𑀺 [𑀅𑀣𑁄 𑀅𑀦𑁆𑀢𑁂𑀦 𑀳𑁂𑀢𑀺 (𑀲𑁆𑀬𑀸.), 𑀅𑀲𑀳𑀦𑁆𑀢𑁂𑀦 𑀤𑀳𑀢𑀺 (𑀓.)], 𑀲𑀭𑀻𑀭𑀁 𑀲𑀧𑀭𑀺𑀕𑁆𑀕𑀳𑀁;

𑀏𑀢𑀤𑀜𑁆𑀜𑀸𑀬 𑀫𑁂𑀥𑀸𑀯𑀻, 𑀪𑀼𑀜𑁆𑀚𑁂𑀣 𑀘 𑀤𑀤𑁂𑀣 𑀘.

𑀤𑀢𑁆𑀯𑀸 𑀘 𑀪𑀼𑀢𑁆𑀯𑀸 𑀘 𑀬𑀣𑀸𑀦𑀼𑀪𑀸𑀯𑀁, 𑀅𑀦𑀺𑀦𑁆𑀤𑀺𑀢𑁄 𑀲𑀕𑁆𑀕𑀫𑀼𑀧𑁂𑀢𑀺 𑀞𑀸𑀦𑀦𑁆𑀢𑀺, 𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺.

𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻𑀢𑀺. 𑀬𑀣𑀸 𑀅𑀬𑁄𑀫𑀬𑁂𑀦 𑀯𑀸 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄, 𑀅𑀝𑁆𑀞𑀺𑀫𑀬𑁂𑀦 𑀯𑀸 𑀲𑀮𑁆𑀮𑁂𑀦 𑀤𑀦𑁆𑀢𑀫𑀬𑁂𑀦 𑀯𑀸 𑀲𑀮𑁆𑀮𑁂𑀦 𑀯𑀺𑀲𑀸𑀡𑀫𑀬𑁂𑀦 𑀯𑀸 𑀲𑀮𑁆𑀮𑁂𑀦 𑀓𑀝𑁆𑀞𑀫𑀬𑁂𑀦 𑀯𑀸 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄 𑀭𑀼𑀧𑁆𑀧𑀢𑀺 𑀓𑀼𑀧𑁆𑀧𑀢𑀺 𑀖𑀝𑁆𑀝𑀻𑀬𑀢𑀺 𑀧𑀻𑀴𑀻𑀬𑀢𑀺, 𑀩𑁆𑀬𑀸𑀥𑀺𑀢𑁄 𑀤𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀺, 𑀏𑀯𑀫𑁂𑀯 𑀯𑀢𑁆𑀣𑀼𑀓𑀸𑀫𑀸𑀦𑀁 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸. 𑀲𑁄 𑀓𑀸𑀫𑀲𑀮𑁆𑀮𑁂𑀦 𑀘 𑀲𑁄𑀓𑀲𑀮𑁆𑀮𑁂𑀦 𑀘 𑀯𑀺𑀤𑁆𑀥𑁄, 𑀭𑀼𑀧𑁆𑀧𑀢𑀺 𑀓𑀼𑀧𑁆𑀧𑀢𑀺 𑀖𑀝𑁆𑀝𑀻𑀬𑀢𑀺 𑀧𑀻𑀴𑀻𑀬𑀢𑀺 𑀩𑁆𑀬𑀸𑀥𑀺𑀢𑁄 𑀤𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑁋 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀺.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲, 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻’’𑀢𑀺.

𑁩. 𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀺.

𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀻𑀢𑀺. 𑀬𑁄𑀢𑀺 𑀬𑁄 𑀬𑀸𑀤𑀺𑀲𑁄 𑀬𑀣𑀸𑀬𑀼𑀢𑁆𑀢𑁄 𑀬𑀣𑀸𑀯𑀺𑀳𑀺𑀢𑁄 𑀬𑀣𑀸𑀧𑀓𑀸𑀭𑁄 𑀬𑀁𑀞𑀸𑀦𑀧𑁆𑀧𑀢𑁆𑀢𑁄 𑀬𑀁𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀤𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸. 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀻𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀻𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺 𑁋 𑀯𑀺𑀓𑁆𑀔𑀫𑁆𑀪𑀦𑀢𑁄 𑀯𑀸 𑀲𑀫𑀼𑀘𑁆𑀙𑁂𑀤𑀢𑁄 𑀯𑀸. 𑀓𑀣𑀁 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺? ‘‘𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀅𑀧𑁆𑀧𑀲𑁆𑀲𑀸𑀤𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀫𑀁𑀲𑀧𑁂𑀲𑀽𑀧𑀫𑀸 𑀓𑀸𑀫𑀸 𑀩𑀳𑀼𑀲𑀸𑀥𑀸𑀭𑀡𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀢𑀺𑀡𑀼𑀓𑁆𑀓𑀽𑀧𑀫𑀸 𑀓𑀸𑀫𑀸 𑀅𑀦𑀼𑀤𑀳𑀦𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸 𑀫𑀳𑀸𑀧𑀭𑀺𑀴𑀸𑀳𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀬𑀸𑀘𑀺𑀢𑀓𑀽𑀧𑀫𑀸 𑀓𑀸𑀫𑀸 𑀢𑀸𑀯𑀓𑀸𑀮𑀺𑀓𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀭𑀼𑀓𑁆𑀔𑀨𑀮𑀽𑀧𑀫𑀸 𑀓𑀸𑀫𑀸 𑀲𑀫𑁆𑀪𑀜𑁆𑀚𑀦𑀧𑀭𑀺𑀪𑀜𑁆𑀚𑀦𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀅𑀲𑀺𑀲𑀽𑀦𑀽𑀧𑀫𑀸 𑀓𑀸𑀫𑀸 𑀅𑀥𑀺𑀓𑀼𑀝𑁆𑀝𑀦𑀝𑁆𑀞𑁂𑀦𑀸’’𑀢𑀺 [𑀅𑀥𑀺𑀓𑀦𑁆𑀢𑀦𑀝𑁆𑀞𑁂𑀦𑀸𑀢𑀺 (𑀲𑁆𑀬𑀸.)] 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀲𑀧𑁆𑀧𑀲𑀺𑀭𑀽𑀧𑀫𑀸 𑀓𑀸𑀫𑀸 𑀲𑀧𑁆𑀧𑀝𑀺𑀪𑀬𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, ‘‘𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑀸 𑀓𑀸𑀫𑀸 𑀫𑀳𑀸𑀪𑀺𑀢𑀸𑀧𑀦𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺.

𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺…𑀧𑁂… 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀲𑀻𑀮𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀘𑀸𑀕𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀤𑁂𑀯𑀢𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 [𑀆𑀦𑀸𑀧𑀸𑀦𑀲𑀢𑀺𑀁 (𑀲𑀻.)] 𑀪𑀸𑀯𑁂𑀦𑁆𑀢𑁄𑀧𑀺… 𑀫𑀭𑀡𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀓𑀸𑀬𑀕𑀢𑀸𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀉𑀧𑀲𑀫𑀸𑀦𑀼𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺.

𑀧𑀞𑀫𑀁 𑀛𑀸𑀦𑀁 𑀪𑀸𑀯𑁂𑀦𑁆𑀢𑁄𑀧𑀺 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀤𑀼𑀢𑀺𑀬𑀁 𑀛𑀸𑀦𑀁 𑀪𑀸𑀯𑁂𑀦𑁆𑀢𑁄𑀧𑀺…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺 … 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀦𑁆𑀢𑁄𑀧𑀺 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺. 𑀏𑀯𑀁 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺.

𑀓𑀣𑀁 𑀲𑀫𑀼𑀘𑁆𑀙𑁂𑀤𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄𑀧𑀺 𑀅𑀧𑀸𑀬𑀕𑀫𑀦𑀻𑀬𑁂 𑀓𑀸𑀫𑁂 𑀲𑀫𑀼𑀘𑁆𑀙𑁂𑀤𑀢𑁄 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄𑀧𑀺 𑀑𑀴𑀸𑀭𑀺𑀓𑁂 𑀓𑀸𑀫𑁂 𑀲𑀫𑀼𑀘𑁆𑀙𑁂𑀤𑀢𑁄 𑀧𑀭𑀺𑀯𑀚𑁆𑀚𑁂𑀢𑀺, 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄𑀧𑀺 𑀅𑀦𑀼𑀲𑀳𑀕𑀢𑁂 𑀓𑀸𑀫𑁂 𑀲𑀫𑀼𑀘𑁆𑀙𑁂𑀤𑀢𑁄 𑀧𑀭𑀺𑀯𑀚𑁆𑀚𑁂𑀢𑀺, 𑀅𑀭𑀳𑀢𑁆𑀢𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀲𑀫𑀼𑀘𑁆𑀙𑁂𑀤𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺. 𑀏𑀯𑀁 𑀲𑀫𑀼𑀘𑁆𑀙𑁂𑀤𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀻𑀢𑀺 𑁋 𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺.

𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄𑀢𑀺. 𑀲𑀧𑁆𑀧𑁄 𑀯𑀼𑀘𑁆𑀘𑀢𑀺 𑀅𑀳𑀺. 𑀓𑁂𑀦𑀝𑁆𑀞𑁂𑀦 𑀲𑀧𑁆𑀧𑁄? 𑀲𑀁𑀲𑀧𑁆𑀧𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀲𑀧𑁆𑀧𑁄; 𑀪𑀼𑀚𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀪𑀼𑀚𑀕𑁄; 𑀉𑀭𑁂𑀦 𑀕𑀘𑁆𑀙𑀢𑀻𑀢𑀺 𑀉𑀭𑀕𑁄; 𑀧𑀦𑁆𑀦𑀲𑀺𑀭𑁄 𑀕𑀘𑁆𑀙𑀢𑀻𑀢𑀺 𑀧𑀦𑁆𑀦𑀕𑁄; 𑀲𑀺𑀭𑁂𑀦 𑀲𑀼𑀧𑀢𑀻𑀢𑀺 [𑀲𑀧𑁆𑀧𑀢𑀻𑀢𑀺 (𑀓.)] 𑀲𑀭𑀻𑀲𑀧𑁄 [𑀲𑀺𑀭𑀺𑀁𑀲𑀧𑁄 (𑀲𑀻.)]; 𑀩𑀺𑀮𑁂 𑀲𑀬𑀢𑀻𑀢𑀺 𑀩𑀺𑀮𑀸𑀲𑀬𑁄; 𑀕𑀼𑀳𑀸𑀬𑀁 𑀲𑀬𑀢𑀻𑀢𑀺 𑀕𑀼𑀳𑀸𑀲𑀬𑁄; 𑀤𑀸𑀞𑀸 𑀢𑀲𑁆𑀲 𑀆𑀯𑀼𑀥𑁄𑀢𑀺 𑀤𑀸𑀞𑀸𑀯𑀼𑀥𑁄; 𑀯𑀺𑀲𑀁 𑀢𑀲𑁆𑀲 𑀖𑁄𑀭𑀦𑁆𑀢𑀺 𑀖𑁄𑀭𑀯𑀺𑀲𑁄; 𑀚𑀺𑀯𑁆𑀳𑀸 𑀢𑀲𑁆𑀲 𑀤𑀼𑀯𑀺𑀥𑀸𑀢𑀺 𑀤𑁆𑀯𑀺𑀚𑀺𑀯𑁆𑀳𑁄; 𑀤𑁆𑀯𑀻𑀳𑀺 𑀚𑀺𑀯𑁆𑀳𑀸𑀳𑀺 𑀭𑀲𑀁 𑀲𑀸𑀬𑀢𑀻𑀢𑀺 𑀤𑁆𑀯𑀺𑀭𑀲𑀜𑁆𑀜𑀽. 𑀬𑀣𑀸 𑀧𑀼𑀭𑀺𑀲𑁄 𑀚𑀻𑀯𑀺𑀢𑀼𑀓𑀸𑀫𑁄 𑀅𑀫𑀭𑀺𑀢𑀼𑀓𑀸𑀫𑁄 𑀲𑀼𑀔𑀓𑀸𑀫𑁄 𑀤𑀼𑀓𑁆𑀔𑀧𑀝𑀺𑀓𑁆𑀓𑀽𑀮𑁄 𑀧𑀸𑀤𑁂𑀦 𑀲𑀧𑁆𑀧𑀲𑀺𑀭𑀁 𑀯𑀚𑁆𑀚𑁂𑀬𑁆𑀬 𑀯𑀺𑀯𑀚𑁆𑀚𑁂𑀬𑁆𑀬 𑀧𑀭𑀺𑀯𑀚𑁆𑀚𑁂𑀬𑁆𑀬 𑀅𑀪𑀺𑀦𑀺𑀯𑀚𑁆𑀚𑁂𑀬𑁆𑀬; 𑀏𑀯𑀫𑁂𑀯 𑀲𑀼𑀔𑀓𑀸𑀫𑁄 𑀤𑀼𑀓𑁆𑀔𑀧𑀝𑀺𑀓𑁆𑀓𑀽𑀮𑁄 𑀓𑀸𑀫𑁂 𑀯𑀚𑁆𑀚𑁂𑀬𑁆𑀬 𑀯𑀺𑀯𑀚𑁆𑀚𑁂𑀬𑁆𑀬 𑀧𑀭𑀺𑀯𑀚𑁆𑀚𑁂𑀬𑁆𑀬 𑀅𑀪𑀺𑀦𑀺𑀯𑀚𑁆𑀚𑁂𑀬𑁆𑀬𑀸𑀢𑀺 𑁋 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄.

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀻𑀢𑀺. 𑀲𑁄𑀢𑀺 𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺. 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀅𑀦𑀼𑀦𑀬𑁄 𑀅𑀦𑀼𑀭𑁄𑀥𑁄 𑀦𑀦𑁆𑀤𑀻 𑀦𑀦𑁆𑀤𑀺𑀭𑀸𑀕𑁄, 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀅𑀚𑁆𑀛𑁄𑀲𑀸𑀦𑀁 𑀕𑁂𑀥𑁄 𑀧𑀮𑀺𑀕𑁂𑀥𑁄 [𑀧𑀴𑀺𑀕𑁂𑀥𑁄 (𑀲𑀻.)] 𑀲𑀗𑁆𑀕𑁄 𑀧𑀗𑁆𑀓𑁄, 𑀏𑀚𑀸 𑀫𑀸𑀬𑀸 𑀚𑀦𑀺𑀓𑀸 𑀲𑀜𑁆𑀚𑀦𑀦𑀻 𑀲𑀺𑀩𑁆𑀩𑀺𑀦𑀻 𑀚𑀸𑀮𑀺𑀦𑀻 𑀲𑀭𑀺𑀢𑀸 𑀯𑀺𑀲𑀢𑁆𑀢𑀺𑀓𑀸, 𑀲𑀼𑀢𑁆𑀢𑀁 𑀯𑀺𑀲𑀢𑀸 𑀆𑀬𑀽𑀳𑀺𑀦𑀻 [𑀆𑀬𑀽𑀳𑀦𑀻 (𑀲𑀻. 𑀲𑁆𑀬𑀸.)] 𑀤𑀼𑀢𑀺𑀬𑀸 𑀧𑀡𑀺𑀥𑀺 𑀪𑀯𑀦𑁂𑀢𑁆𑀢𑀺, 𑀯𑀦𑀁 𑀯𑀦𑀣𑁄 𑀲𑀦𑁆𑀥𑀯𑁄 𑀲𑁆𑀦𑁂𑀳𑁄 𑀅𑀧𑁂𑀓𑁆𑀔𑀸 𑀧𑀝𑀺𑀩𑀦𑁆𑀥𑀼, 𑀆𑀲𑀸 𑀆𑀲𑀻𑀲𑀦𑀸 𑀆𑀲𑀻𑀲𑀺𑀢𑀢𑁆𑀢𑀁, 𑀭𑀽𑀧𑀸𑀲𑀸 𑀲𑀤𑁆𑀤𑀸𑀲𑀸 𑀕𑀦𑁆𑀥𑀸𑀲𑀸 𑀭𑀲𑀸𑀲𑀸 𑀨𑁄𑀝𑁆𑀞𑀩𑁆𑀩𑀸𑀲𑀸, 𑀮𑀸𑀪𑀸𑀲𑀸 𑀚𑀦𑀸𑀲𑀸 𑀧𑀼𑀢𑁆𑀢𑀸𑀲𑀸 𑀚𑀻𑀯𑀺𑀢𑀸𑀲𑀸, 𑀚𑀧𑁆𑀧𑀸 𑀧𑀚𑀧𑁆𑀧𑀸 𑀅𑀪𑀺𑀚𑀧𑁆𑀧𑀸 𑀚𑀧𑁆𑀧𑀦𑀸 𑀚𑀧𑁆𑀧𑀺𑀢𑀢𑁆𑀢𑀁 𑀮𑁄𑀮𑀼𑀧𑁆𑀧𑀁 𑀮𑁄𑀮𑀼𑀧𑁆𑀧𑀸𑀬𑀦𑀸 𑀮𑁄𑀮𑀼𑀧𑁆𑀧𑀸𑀬𑀺𑀢𑀢𑁆𑀢𑀁 𑀧𑀼𑀘𑁆𑀙𑀜𑁆𑀚𑀺𑀓𑀢𑀸 𑀲𑀸𑀥𑀼𑀓𑀫𑁆𑀬𑀢𑀸, 𑀅𑀥𑀫𑁆𑀫𑀭𑀸𑀕𑁄 𑀯𑀺𑀲𑀫𑀮𑁄𑀪𑁄 𑀦𑀺𑀓𑀦𑁆𑀢𑀺 𑀦𑀺𑀓𑀸𑀫𑀦𑀸 𑀧𑀢𑁆𑀣𑀦𑀸 𑀧𑀺𑀳𑀦𑀸 𑀲𑀫𑁆𑀧𑀢𑁆𑀣𑀦𑀸, 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸, 𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸 𑀦𑀺𑀭𑁄𑀥𑀢𑀡𑁆𑀳𑀸, 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸, 𑀑𑀖𑁄 𑀬𑁄𑀕𑁄 𑀕𑀦𑁆𑀣𑁄 𑀉𑀧𑀸𑀤𑀸𑀦𑀁 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀙𑀤𑀦𑀁 𑀩𑀦𑁆𑀥𑀦𑀁, 𑀉𑀧𑀓𑁆𑀓𑀺𑀮𑁂𑀲𑁄 𑀅𑀦𑀼𑀲𑀬𑁄 𑀧𑀭𑀺𑀬𑀼𑀝𑁆𑀞𑀸𑀦𑀁 𑀮𑀢𑀸 𑀯𑁂𑀯𑀺𑀘𑁆𑀙𑀁, 𑀤𑀼𑀓𑁆𑀔𑀫𑀽𑀮𑀁 𑀤𑀼𑀓𑁆𑀔𑀦𑀺𑀤𑀸𑀦𑀁 𑀤𑀼𑀓𑁆𑀔𑀧𑁆𑀧𑀪𑀯𑁄 𑀫𑀸𑀭𑀧𑀸𑀲𑁄 𑀫𑀸𑀭𑀩𑀴𑀺𑀲𑀁 𑀫𑀸𑀭𑀯𑀺𑀲𑀬𑁄, 𑀢𑀡𑁆𑀳𑀸𑀦𑀤𑀻 𑀢𑀡𑁆𑀳𑀸𑀚𑀸𑀮𑀁 𑀢𑀡𑁆𑀳𑀸𑀕𑀤𑁆𑀤𑀼𑀮𑀁 𑀢𑀡𑁆𑀳𑀸𑀲𑀫𑀼𑀤𑁆𑀤𑁄 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁.

𑀯𑀺𑀲𑀢𑁆𑀢𑀺𑀓𑀸𑀢𑀺. 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸? 𑀯𑀺𑀲𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀸𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀝𑀸𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀓𑁆𑀓𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀁𑀳𑀭𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀁𑀯𑀸𑀤𑀺𑀓𑀸𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀫𑀽𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀨𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀧𑀭𑀺𑀪𑁄𑀕𑁄𑀢𑀺 𑀯𑀺𑀲𑀢𑁆𑀢𑀺𑀓𑀸; 𑀯𑀺𑀲𑀸𑀮𑀸 𑀯𑀸 𑀧𑀦 𑀲𑀸 𑀢𑀡𑁆𑀳𑀸 𑀭𑀽𑀧𑁂 𑀲𑀤𑁆𑀤𑁂 𑀕𑀦𑁆𑀥𑁂 𑀭𑀲𑁂 𑀨𑁄𑀝𑁆𑀞𑀩𑁆𑀩𑁂, 𑀓𑀼𑀮𑁂 𑀕𑀡𑁂 𑀆𑀯𑀸𑀲𑁂 𑀮𑀸𑀪𑁂 𑀬𑀲𑁂, 𑀧𑀲𑀁𑀲𑀸𑀬 𑀲𑀼𑀔𑁂 𑀘𑀻𑀯𑀭𑁂 𑀧𑀺𑀡𑁆𑀟𑀧𑀸𑀢𑁂 𑀲𑁂𑀦𑀸𑀲𑀦𑁂 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂, 𑀓𑀸𑀫𑀥𑀸𑀢𑀼𑀬𑀸 𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸, 𑀓𑀸𑀫𑀪𑀯𑁂 𑀭𑀽𑀧𑀪𑀯𑁂 𑀅𑀭𑀽𑀧𑀪𑀯𑁂, 𑀲𑀜𑁆𑀜𑀸𑀪𑀯𑁂 𑀅𑀲𑀜𑁆𑀜𑀸𑀪𑀯𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑁂, 𑀏𑀓𑀯𑁄𑀓𑀸𑀭𑀪𑀯𑁂 𑀘𑀢𑀼𑀯𑁄𑀓𑀸𑀭𑀪𑀯𑁂 𑀧𑀜𑁆𑀘𑀯𑁄𑀓𑀸𑀭𑀪𑀯𑁂, 𑀅𑀢𑀻𑀢𑁂 𑀅𑀦𑀸𑀕𑀢𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂, 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀝𑀸 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸.

𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂, 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄.

𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀅𑀲𑀢𑀺𑀧𑀭𑀺𑀯𑀚𑁆𑀚𑀦𑀸𑀬 𑀲𑀢𑁄, 𑀲𑀢𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀓𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀧𑀭𑀺𑀩𑀦𑁆𑀥𑀸𑀦𑀁 𑀥𑀫𑁆𑀫𑀸𑀦𑀁 𑀳𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀲𑀫𑁆𑀫𑀼𑀝𑁆𑀞𑀢𑁆𑀢𑀸 𑀲𑀢𑁄.

𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀬𑀸 𑀯𑀲𑀺𑀢𑀢𑁆𑀢𑀸 𑀲𑀢𑁄, 𑀲𑀢𑀺𑀬𑀸 𑀧𑀸𑀕𑀼𑀜𑁆𑀜𑀢𑀸𑀬 𑀲𑀢𑁄, 𑀲𑀢𑀺𑀬𑀸 𑀅𑀧𑀘𑁆𑀘𑁄𑀭𑁄𑀳𑀡𑀢𑀸𑀬 [𑀅𑀧𑀘𑁆𑀘𑁄𑀭𑁄𑀧𑀦𑀢𑀸𑀬 (𑀲𑀻.)] 𑀲𑀢𑁄.

𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀲𑀢𑁆𑀢𑀢𑁆𑀢𑀸 𑀲𑀢𑁄, 𑀲𑀦𑁆𑀢𑀢𑁆𑀢𑀸 𑀲𑀢𑁄, 𑀲𑀫𑀺𑀢𑀢𑁆𑀢𑀸 𑀲𑀢𑁄, 𑀲𑀦𑁆𑀢𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁄. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀲𑀻𑀮𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀘𑀸𑀕𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀤𑁂𑀯𑀢𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀲𑀢𑁄, 𑀫𑀭𑀡𑀲𑁆𑀲𑀢𑀺𑀬𑀸 𑀲𑀢𑁄, 𑀓𑀸𑀬𑀕𑀢𑀸𑀲𑀢𑀺𑀬𑀸 𑀲𑀢𑁄, 𑀉𑀧𑀲𑀫𑀸𑀦𑀼𑀲𑁆𑀲𑀢𑀺𑀬𑀸 𑀲𑀢𑁄. 𑀬𑀸 𑀲𑀢𑀺 𑀅𑀦𑀼𑀲𑁆𑀲𑀢𑀺 𑀧𑀝𑀺𑀲𑁆𑀲𑀢𑀺 𑀲𑀢𑀺 𑀲𑀭𑀡𑀢𑀸 𑀥𑀸𑀭𑀡𑀢𑀸 𑀅𑀧𑀺𑀮𑀸𑀧𑀦𑀢𑀸 𑀅𑀲𑀫𑁆𑀫𑀼𑀲𑁆𑀲𑀦𑀢𑀸 𑀲𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀩𑀮𑀁 𑀲𑀫𑁆𑀫𑀸𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀏𑀓𑀸𑀬𑀦𑀫𑀕𑁆𑀕𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀢𑀺. 𑀇𑀫𑀸𑀬 𑀲𑀢𑀺𑀬𑀸 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄.

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀻𑀢𑀺. 𑀮𑁄𑀓𑁂 𑀯𑀸 𑀲𑀸 𑀯𑀺𑀲𑀢𑁆𑀢𑀺𑀓𑀸, 𑀮𑁄𑀓𑁂 𑀯𑀸 𑀢𑀁 𑀯𑀺𑀲𑀢𑁆𑀢𑀺𑀓𑀁 𑀲𑀢𑁄 𑀢𑀭𑀢𑀺 𑀉𑀢𑁆𑀢𑀭𑀢𑀺 𑀧𑀢𑀭𑀢𑀺 𑀲𑀫𑀢𑀺𑀓𑁆𑀓𑀫𑀢𑀺 𑀯𑀻𑀢𑀺𑀯𑀢𑁆𑀢𑀢𑀻𑀢𑀺 𑁋 𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀺.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀻’’𑀢𑀺.

𑁪. 𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁 𑀯𑀸, 𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁;

𑀣𑀺𑀬𑁄 𑀩𑀦𑁆𑀥𑀽 𑀧𑀼𑀣𑀼 𑀓𑀸𑀫𑁂, 𑀬𑁄 𑀦𑀭𑁄 𑀅𑀦𑀼𑀕𑀺𑀚𑁆𑀛𑀢𑀺.

𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁 𑀯𑀸𑀢𑀺. 𑀔𑁂𑀢𑁆𑀢𑀦𑁆𑀢𑀺 𑀲𑀸𑀮𑀺𑀓𑁆𑀔𑁂𑀢𑁆𑀢𑀁 𑀯𑀻𑀳𑀺𑀓𑁆𑀔𑁂𑀢𑁆𑀢𑀁 𑀫𑀼𑀕𑁆𑀕𑀓𑁆𑀔𑁂𑀢𑁆𑀢𑀁 𑀫𑀸𑀲𑀓𑁆𑀔𑁂𑀢𑁆𑀢𑀁 𑀬𑀯𑀓𑁆𑀔𑁂𑀢𑁆𑀢𑀁 𑀕𑁄𑀥𑀼𑀫𑀓𑁆𑀔𑁂𑀢𑁆𑀢𑀁 𑀢𑀺𑀮𑀓𑁆𑀔𑁂𑀢𑁆𑀢𑀁. 𑀯𑀢𑁆𑀣𑀼𑀦𑁆𑀢𑀺 𑀖𑀭𑀯𑀢𑁆𑀣𑀼𑀁 𑀓𑁄𑀝𑁆𑀞𑀓𑀯𑀢𑁆𑀣𑀼𑀁 𑀧𑀼𑀭𑁂𑀯𑀢𑁆𑀣𑀼𑀁 𑀧𑀘𑁆𑀙𑀸𑀯𑀢𑁆𑀣𑀼𑀁 𑀆𑀭𑀸𑀫𑀯𑀢𑁆𑀣𑀼𑀁 𑀯𑀺𑀳𑀸𑀭𑀯𑀢𑁆𑀣𑀼𑀁. 𑀳𑀺𑀭𑀜𑁆𑀜𑀦𑁆𑀢𑀺 𑀳𑀺𑀭𑀜𑁆𑀜𑀁 𑀯𑀼𑀘𑁆𑀘𑀢𑀺 𑀓𑀳𑀸𑀧𑀡𑁄𑀢𑀺 𑁋 𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁 𑀯𑀸.

𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀦𑁆𑀢𑀺. 𑀕𑀯𑀦𑁆𑀢𑀺 𑀕𑀯𑀸 [𑀕𑀸𑀯𑁄 (𑀓.)] 𑀯𑀼𑀘𑁆𑀘𑀦𑁆𑀢𑀺. 𑀅𑀲𑁆𑀲𑀸𑀢𑀺 𑀧𑀲𑀼𑀓𑀸𑀤𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀤𑀸𑀲𑀸𑀢𑀺 𑀘𑀢𑁆𑀢𑀸𑀭𑁄 𑀤𑀸𑀲𑀸 𑁋 𑀅𑀦𑁆𑀢𑁄𑀚𑀸𑀢𑀓𑁄 𑀤𑀸𑀲𑁄, 𑀥𑀦𑀓𑁆𑀓𑀻𑀢𑀓𑁄 𑀤𑀸𑀲𑁄, 𑀲𑀸𑀫𑀁 𑀯𑀸 𑀤𑀸𑀲𑀩𑁆𑀬𑀁 𑀉𑀧𑁂𑀢𑀺, 𑀅𑀓𑀸𑀫𑀓𑁄 𑀯𑀸 𑀤𑀸𑀲𑀯𑀺𑀲𑀬𑀁 𑀉𑀧𑁂𑀢𑀺.

‘‘𑀆𑀫𑀸𑀬 𑀤𑀸𑀲𑀸𑀧𑀺 𑀪𑀯𑀦𑁆𑀢𑀺 𑀳𑁂𑀓𑁂, 𑀥𑀦𑁂𑀦 𑀓𑀻𑀢𑀸𑀧𑀺 𑀪𑀯𑀦𑁆𑀢𑀺 𑀤𑀸𑀲𑀸;

𑀲𑀸𑀫𑀜𑁆𑀘 𑀏𑀓𑁂 𑀉𑀧𑀬𑀦𑁆𑀢𑀺 𑀤𑀸𑀲𑁆𑀬𑀁, 𑀪𑀬𑀸𑀧𑀦𑀼𑀡𑁆𑀡𑀸𑀧𑀺 𑀪𑀯𑀦𑁆𑀢𑀺 𑀤𑀸𑀲𑀸’’𑀢𑀺.

𑀧𑀼𑀭𑀺𑀲𑀸𑀢𑀺 𑀢𑀬𑁄 𑀧𑀼𑀭𑀺𑀲𑀸 𑁋 𑀪𑀢𑀓𑀸, 𑀓𑀫𑁆𑀫𑀓𑀭𑀸, 𑀉𑀧𑀚𑀻𑀯𑀺𑀦𑁄𑀢𑀺 𑁋 𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁.

𑀣𑀺𑀬𑁄 𑀩𑀦𑁆𑀥𑀽 𑀧𑀼𑀣𑀼 𑀓𑀸𑀫𑁂𑀢𑀺. 𑀣𑀺𑀬𑁄𑀢𑀺 𑀇𑀢𑁆𑀣𑀺𑀧𑀭𑀺𑀕𑁆𑀕𑀳𑁄 𑀯𑀼𑀘𑁆𑀘𑀢𑀺. 𑀩𑀦𑁆𑀥𑀽𑀢𑀺 𑀘𑀢𑁆𑀢𑀸𑀭𑁄 𑀩𑀦𑁆𑀥𑀽 𑁋 𑀜𑀸𑀢𑀺𑀩𑀦𑁆𑀥𑀯𑀸𑀧𑀺 𑀩𑀦𑁆𑀥𑀼, 𑀕𑁄𑀢𑁆𑀢𑀩𑀦𑁆𑀥𑀯𑀸𑀧𑀺 𑀩𑀦𑁆𑀥𑀼, 𑀫𑀦𑁆𑀢𑀩𑀦𑁆𑀥𑀯𑀸𑀧𑀺 𑀩𑀦𑁆𑀥𑀼, 𑀲𑀺𑀧𑁆𑀧𑀩𑀦𑁆𑀥𑀯𑀸𑀧𑀺 𑀩𑀦𑁆𑀥𑀼. 𑀧𑀼𑀣𑀼 𑀓𑀸𑀫𑁂𑀢𑀺 𑀩𑀳𑀽 𑀓𑀸𑀫𑁂. 𑀏𑀢𑁂 𑀧𑀼𑀣𑀼 𑀓𑀸𑀫𑀸 𑀫𑀦𑀸𑀧𑀺𑀓𑀸 𑀭𑀽𑀧𑀸…𑀧𑁂… 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸𑀢𑀺 𑁋 𑀣𑀺𑀬𑁄 𑀩𑀦𑁆𑀥𑀽 𑀧𑀼𑀣𑀼 𑀓𑀸𑀫𑁂.

𑀬𑁄 𑀦𑀭𑁄 𑀅𑀦𑀼𑀕𑀺𑀚𑁆𑀛𑀢𑀻𑀢𑀺. 𑀬𑁄𑀢𑀺 𑀬𑁄 𑀬𑀸𑀤𑀺𑀲𑁄 𑀬𑀣𑀸𑀬𑀼𑀢𑁆𑀢𑁄 𑀬𑀣𑀸𑀯𑀺𑀳𑀺𑀢𑁄 𑀬𑀣𑀸𑀧𑀓𑀸𑀭𑁄 𑀬𑀁𑀞𑀸𑀦𑀧𑁆𑀧𑀢𑁆𑀢𑁄 𑀬𑀁𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀤𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸. 𑀦𑀭𑁄𑀢𑀺 𑀲𑀢𑁆𑀢𑁄 𑀦𑀭𑁄 𑀫𑀸𑀦𑀯𑁄 𑀧𑁄𑀲𑁄 𑀧𑀼𑀕𑁆𑀕𑀮𑁄 𑀚𑀻𑀯𑁄 𑀚𑀸𑀕𑀼 𑀚𑀦𑁆𑀢𑀼 𑀇𑀦𑁆𑀤𑀕𑀼 𑀫𑀦𑀼𑀚𑁄. 𑀅𑀦𑀼𑀕𑀺𑀚𑁆𑀛𑀢𑀻𑀢𑀺 𑀓𑀺𑀮𑁂𑀲𑀓𑀸𑀫𑁂𑀦 𑀯𑀢𑁆𑀣𑀼𑀓𑀸𑀫𑁂𑀲𑀼 𑀕𑀺𑀚𑁆𑀛𑀢𑀺 𑀅𑀦𑀼𑀕𑀺𑀚𑁆𑀛𑀢𑀺 𑀧𑀮𑀺𑀕𑀺𑀚𑁆𑀛𑀢𑀺 𑀧𑀮𑀺𑀩𑀚𑁆𑀛𑀢𑀻𑀢𑀺 𑁋 𑀬𑁄 𑀦𑀭𑁄 𑀅𑀦𑀼𑀕𑀺𑀚𑁆𑀛𑀢𑀺.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁 𑀯𑀸, 𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁;

𑀣𑀺𑀬𑁄 𑀩𑀦𑁆𑀥𑀽 𑀧𑀼𑀣𑀼 𑀓𑀸𑀫𑁂, 𑀬𑁄 𑀦𑀭𑁄 𑀅𑀦𑀼𑀕𑀺𑀚𑁆𑀛𑀢𑀻’’𑀢𑀺.

𑁫. 𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀺, 𑀫𑀤𑁆𑀤𑀦𑁆𑀢𑁂 𑀦𑀁 𑀧𑀭𑀺𑀲𑁆𑀲𑀬𑀸;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀦𑀸𑀯𑀁 𑀪𑀺𑀦𑁆𑀦𑀫𑀺𑀯𑁄𑀤𑀓𑀁.

𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀻𑀢𑀺. 𑀅𑀩𑀮𑀸𑀢𑀺 𑀅𑀩𑀮𑀸 𑀓𑀺𑀮𑁂𑀲𑀸 𑀤𑀼𑀩𑁆𑀩𑀮𑀸 𑀅𑀧𑁆𑀧𑀩𑀮𑀸 𑀅𑀧𑁆𑀧𑀣𑀸𑀫𑀓𑀸 𑀳𑀻𑀦𑀸 𑀦𑀺𑀳𑀻𑀦𑀸 ( ) [(𑀧𑀭𑀺𑀳𑀻𑀦𑀸) (𑀲𑀻. 𑀲𑁆𑀬𑀸.)] 𑀑𑀫𑀓𑀸 𑀮𑀸𑀫𑀓𑀸 𑀙𑀢𑀼𑀓𑁆𑀓𑀸 𑀧𑀭𑀺𑀢𑁆𑀢𑀸. 𑀢𑁂 𑀓𑀺𑀮𑁂𑀲𑀸 𑀢𑀁 𑀧𑀼𑀕𑁆𑀕𑀮𑀁 𑀲𑀳𑀦𑁆𑀢𑀺 𑀧𑀭𑀺𑀲𑀳𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑀺 𑀫𑀤𑁆𑀤𑀦𑁆𑀢𑀻𑀢𑀺, 𑀏𑀯𑀫𑁆𑀧𑀺 𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀺. 𑀅𑀣 𑀯𑀸, 𑀅𑀩𑀮𑀁 𑀧𑀼𑀕𑁆𑀕𑀮𑀁 𑀤𑀼𑀩𑁆𑀩𑀮𑀁 𑀅𑀧𑁆𑀧𑀩𑀮𑀁 𑀅𑀧𑁆𑀧𑀣𑀸𑀫𑀓𑀁 𑀳𑀻𑀦𑀁 𑀦𑀺𑀳𑀻𑀦𑀁 𑀑𑀫𑀓𑀁 𑀮𑀸𑀫𑀓𑀁 𑀙𑀢𑀼𑀓𑁆𑀓𑀁 𑀧𑀭𑀺𑀢𑁆𑀢𑀁, 𑀬𑀲𑁆𑀲 𑀦𑀢𑁆𑀣𑀺 𑀲𑀤𑁆𑀥𑀸𑀩𑀮𑀁 𑀯𑀻𑀭𑀺𑀬𑀩𑀮𑀁 𑀲𑀢𑀺𑀩𑀮𑀁 𑀲𑀫𑀸𑀥𑀺𑀩𑀮𑀁 𑀧𑀜𑁆𑀜𑀸𑀩𑀮𑀁 𑀳𑀺𑀭𑀺𑀩𑀮𑀁 𑀑𑀢𑁆𑀢𑀧𑁆𑀧𑀩𑀮𑀁. 𑀢𑁂 𑀓𑀺𑀮𑁂𑀲𑀸 𑀢𑀁 𑀧𑀼𑀕𑁆𑀕𑀮𑀁 𑀲𑀳𑀦𑁆𑀢𑀺 𑀧𑀭𑀺𑀲𑀳𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑀺 𑀫𑀤𑁆𑀤𑀦𑁆𑀢𑀻𑀢𑀺 𑁋 𑀏𑀯𑀫𑁆𑀧𑀺 𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀻𑀢𑀺.

𑀫𑀤𑁆𑀤𑀦𑁆𑀢𑁂 𑀦𑀁 𑀧𑀭𑀺𑀲𑁆𑀲𑀬𑀸𑀢𑀺. 𑀤𑁆𑀯𑁂 𑀧𑀭𑀺𑀲𑁆𑀲𑀬𑀸 𑁋 𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀘 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸 𑀘. 𑀓𑀢𑀫𑁂 𑀧𑀸𑀓𑀝𑀧𑀭𑀺𑀲𑁆𑀲𑀬𑀸? 𑀲𑀻𑀳𑀸 𑀩𑁆𑀬𑀕𑁆𑀖𑀸 𑀤𑀻𑀧𑀻 𑀅𑀘𑁆𑀙𑀸 𑀢𑀭𑀘𑁆𑀙𑀸 𑀓𑁄𑀓𑀸 𑀫𑀳𑀺𑀁𑀲𑀸 [𑀫𑀳𑀺𑀲𑀸 (𑀲𑀻. 𑀲𑁆𑀬𑀸.)] 𑀳𑀢𑁆𑀣𑀻 𑀅𑀳𑀺𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻, 𑀘𑁄𑀭𑀸 𑀯𑀸 𑀅𑀲𑁆𑀲𑀼 𑀫𑀸𑀦𑀯𑀸 𑀯𑀸 𑀓𑀢𑀓𑀫𑁆𑀫𑀸 𑀯𑀸 𑀅𑀓𑀢𑀓𑀫𑁆𑀫𑀸 𑀯𑀸, 𑀘𑀓𑁆𑀔𑀼𑀭𑁄𑀕𑁄 𑀲𑁄𑀢𑀭𑁄𑀕𑁄 𑀖𑀸𑀦𑀭𑁄𑀕𑁄 𑀚𑀺𑀯𑁆𑀳𑀸𑀭𑁄𑀕𑁄 𑀓𑀸𑀬𑀭𑁄𑀕𑁄 𑀲𑀻𑀲𑀭𑁄𑀕𑁄 𑀓𑀡𑁆𑀡𑀭𑁄𑀕𑁄 𑀫𑀼𑀔𑀭𑁄𑀕𑁄 𑀤𑀦𑁆𑀢𑀭𑁄𑀕𑁄, 𑀓𑀸𑀲𑁄 𑀲𑀸𑀲𑁄 𑀧𑀺𑀦𑀸𑀲𑁄 𑀟𑀸𑀳𑁄 𑀚𑀭𑁄, 𑀓𑀼𑀘𑁆𑀙𑀺𑀭𑁄𑀕𑁄 𑀫𑀼𑀘𑁆𑀙𑀸 𑀧𑀓𑁆𑀔𑀦𑁆𑀤𑀺𑀓𑀸 𑀲𑀽𑀮𑀸 𑀯𑀺𑀲𑀽𑀘𑀺𑀓𑀸, 𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀲𑁄𑀲𑁄 𑀅𑀧𑀫𑀸𑀭𑁄, 𑀤𑀤𑁆𑀤𑀼 𑀓𑀡𑁆𑀟𑀼 𑀓𑀘𑁆𑀙𑀼 𑀭𑀔𑀲𑀸 [𑀭𑀓𑁆𑀔𑀲𑀸 (𑀓.)] 𑀯𑀺𑀢𑀘𑁆𑀙𑀺𑀓𑀸 𑀮𑁄𑀳𑀺𑀢𑀧𑀺𑀢𑁆𑀢𑀁, 𑀫𑀥𑀼𑀫𑁂𑀳𑁄 𑀅𑀁𑀲𑀸 𑀧𑀺𑀴𑀓𑀸 𑀪𑀕𑀦𑁆𑀤𑀮𑀸, 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀯𑀸𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑀦𑁆𑀦𑀺𑀧𑀸𑀢𑀺𑀓𑀸 𑀆𑀩𑀸𑀥𑀸 𑀉𑀢𑀼𑀧𑀭𑀺𑀡𑀸𑀫𑀚𑀸 𑀆𑀩𑀸𑀥𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸 𑀆𑀩𑀸𑀥𑀸, 𑀑𑀧𑀓𑁆𑀓𑀫𑀺𑀓𑀸 𑀆𑀩𑀸𑀥𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀆𑀩𑀸𑀥𑀸, 𑀲𑀻𑀢𑀁 𑀉𑀡𑁆𑀳𑀁 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀉𑀘𑁆𑀘𑀸𑀭𑁄 𑀧𑀲𑁆𑀲𑀸𑀯𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸 𑀇𑀢𑀺 𑀯𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀸𑀓𑀝𑀧𑀭𑀺𑀲𑁆𑀲𑀬𑀸.

𑀓𑀢𑀫𑁂 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸? 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁, 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁, 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀓𑁄𑀥𑁄 𑀉𑀧𑀦𑀸𑀳𑁄 𑀫𑀓𑁆𑀔𑁄 𑀧𑀴𑀸𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁, 𑀫𑀸𑀬𑀸 𑀲𑀸𑀞𑁂𑀬𑁆𑀬𑀁 𑀣𑀫𑁆𑀪𑁄 𑀲𑀸𑀭𑀫𑁆𑀪𑁄 𑀫𑀸𑀦𑁄 𑀅𑀢𑀺𑀫𑀸𑀦𑁄 𑀫𑀤𑁄 𑀧𑀫𑀸𑀤𑁄, 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸 𑀲𑀩𑁆𑀩𑁂 𑀤𑀭𑀣𑀸 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸.

𑀧𑀭𑀺𑀲𑁆𑀲𑀬𑀸𑀢𑀺 𑀓𑁂𑀦𑀝𑁆𑀞𑁂𑀦 𑀧𑀭𑀺𑀲𑁆𑀲𑀬𑀸? 𑀧𑀭𑀺𑀲𑀳𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀢𑀢𑁆𑀭𑀸𑀲𑀬𑀸𑀢𑀺 𑀧𑀭𑀺𑀲𑁆𑀲𑀬𑀸. 𑀓𑀣𑀁 𑀧𑀭𑀺𑀲𑀳𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸? 𑀢𑁂 𑀧𑀭𑀺𑀲𑁆𑀲𑀬𑀸 𑀢𑀁 𑀧𑀼𑀕𑁆𑀕𑀮𑀁 𑀲𑀳𑀦𑁆𑀢𑀺 𑀧𑀭𑀺𑀲𑀳𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑀺 𑀫𑀤𑁆𑀤𑀦𑁆𑀢𑀺. 𑀏𑀯𑀁 𑀧𑀭𑀺𑀲𑀳𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸. 𑀓𑀣𑀁 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸? 𑀢𑁂 𑀧𑀭𑀺𑀲𑁆𑀲𑀬𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀸𑀬𑀸𑀬 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀫𑁆𑀫𑀸𑀧𑀝𑀺𑀧𑀤𑀸𑀬 𑀅𑀦𑀼𑀮𑁄𑀫𑀧𑀝𑀺𑀧𑀤𑀸𑀬 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀸𑀬 𑀅𑀯𑀺𑀭𑀼𑀤𑁆𑀥𑀧𑀝𑀺𑀧𑀤𑀸𑀬 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀸𑀬, 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀺𑀓𑀸𑀭𑀺𑀢𑀸𑀬 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀬 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀬, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀲𑁆𑀲 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲, 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲, 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲, 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑁋 𑀇𑀫𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀸𑀬𑀸𑀬 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀏𑀯𑀁 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀓𑀣𑀁 𑀢𑀢𑁆𑀭𑀸𑀲𑀬𑀸𑀢𑀺 𑀧𑀭𑀺𑀲𑁆𑀲𑀬𑀸? 𑀢𑀢𑁆𑀣𑁂𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀢𑁆𑀢𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸. 𑀬𑀣𑀸 𑀩𑀺𑀮𑁂 𑀩𑀺𑀮𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀤𑀓𑁂 𑀤𑀓𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀯𑀦𑁂 𑀯𑀦𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀭𑀼𑀓𑁆𑀔𑁂 𑀭𑀼𑀓𑁆𑀔𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀏𑀯𑀫𑁂𑀯 𑀢𑀢𑁆𑀣𑁂𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀢𑁆𑀢𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸. 𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀲𑀸𑀦𑁆𑀢𑁂𑀯𑀸𑀲𑀺𑀓𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀜𑁆𑀜𑁄𑀚𑀦𑀺𑀬𑀸, 𑀢𑁆𑀬𑀲𑁆𑀲 𑀅𑀦𑁆𑀢𑁄 𑀯𑀲𑀦𑁆𑀢𑀺 𑀅𑀦𑁆𑀯𑀸𑀲𑀯𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑁋 𑀢𑀲𑁆𑀫𑀸 𑀲𑀸𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂 𑀦𑀁 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑁋 𑀢𑀲𑁆𑀫𑀸 𑀲𑀸𑀘𑀭𑀺𑀬𑀓𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸, 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸, 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸, 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸, 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺 𑀬𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀜𑁆𑀜𑁄𑀚𑀦𑀺𑀬𑀸, 𑀢𑁆𑀬𑀲𑁆𑀲 𑀅𑀦𑁆𑀢𑁄 𑀯𑀲𑀦𑁆𑀢𑀺 𑀅𑀦𑁆𑀯𑀸𑀲𑀯𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑁋 𑀢𑀲𑁆𑀫𑀸 𑀲𑀸𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂 𑀦𑀁 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑁋 𑀢𑀲𑁆𑀫𑀸 𑀲𑀸𑀘𑀭𑀺𑀬𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀻’’𑀢𑀺. 𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑀸 𑁋 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸 𑀅𑀦𑁆𑀢𑀭𑀸𑀲𑀧𑀢𑁆𑀢𑀸 𑀅𑀦𑁆𑀢𑀭𑀸𑀯𑀥𑀓𑀸 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑀸. 𑀓𑀢𑀫𑁂 𑀢𑀬𑁄? 𑀮𑁄𑀪𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑀁 [𑀅𑀦𑁆𑀢𑀭𑀸𑀫𑀮𑁄 (𑀲𑁆𑀬𑀸.)] 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑁄 𑀅𑀦𑁆𑀢𑀭𑀸𑀲𑀧𑀢𑁆𑀢𑁄 𑀅𑀦𑁆𑀢𑀭𑀸𑀯𑀥𑀓𑁄 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑁄. 𑀤𑁄𑀲𑁄…𑀧𑁂… 𑀫𑁄𑀳𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑀁 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑁄 𑀅𑀦𑁆𑀢𑀭𑀸𑀲𑀧𑀢𑁆𑀢𑁄 𑀅𑀦𑁆𑀢𑀭𑀸𑀯𑀥𑀓𑁄 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀅𑀦𑁆𑀢𑀭𑀸𑀫𑀮𑀸 𑁋 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸 𑀅𑀦𑁆𑀢𑀭𑀸𑀲𑀧𑀢𑁆𑀢𑀸 𑀅𑀦𑁆𑀢𑀭𑀸𑀯𑀥𑀓𑀸 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑀸.

‘‘𑀅𑀦𑀢𑁆𑀣𑀚𑀦𑀦𑁄 𑀮𑁄𑀪𑁄, 𑀮𑁄𑀪𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

‘‘𑀮𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀮𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 [𑀅𑀦𑁆𑀥𑀢𑀫𑀁 (𑀲𑁆𑀬𑀸. 𑀓.)] 𑀢𑀤𑀸 𑀳𑁄𑀢𑀺, 𑀬𑀁 𑀮𑁄𑀪𑁄 𑀲𑀳𑀢𑁂 𑀦𑀭𑀁.

‘‘𑀅𑀦𑀢𑁆𑀣𑀚𑀦𑀦𑁄 𑀤𑁄𑀲𑁄, 𑀤𑁄𑀲𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

‘‘𑀓𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀓𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀤𑁄𑀲𑁄 𑀲𑀳𑀢𑁂 𑀦𑀭𑀁.

‘‘𑀅𑀦𑀢𑁆𑀣𑀚𑀦𑀦𑁄 𑀫𑁄𑀳𑁄, 𑀫𑁄𑀳𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

‘‘𑀫𑀽𑀴𑁆𑀳𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀫𑀽𑀴𑁆𑀳𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀫𑁄𑀳𑁄 𑀲𑀳𑀢𑁂 𑀦𑀭’’𑀦𑁆𑀢𑀺.

𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀢𑀬𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀓𑀢𑀫𑁂 𑀢𑀬𑁄? 𑀮𑁄𑀪𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀤𑁄𑀲𑁄 𑀔𑁄, 𑀫𑀳𑀸𑀭𑀸𑀚…𑀧𑁂… 𑀫𑁄𑀳𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀢𑀬𑁄 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬.

‘‘𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘, 𑀧𑀼𑀭𑀺𑀲𑀁 𑀧𑀸𑀧𑀘𑁂𑀢𑀲𑀁;

𑀳𑀺𑀁𑀲𑀦𑁆𑀢𑀺 𑀅𑀢𑁆𑀢𑀲𑀫𑁆𑀪𑀽𑀢𑀸, 𑀢𑀘𑀲𑀸𑀭𑀁𑀯 𑀲𑀫𑁆𑀨𑀮’’𑀦𑁆𑀢𑀺.

𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.

𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀭𑀸𑀕𑁄 𑀘 𑀤𑁄𑀲𑁄 𑀘 𑀇𑀢𑁄𑀦𑀺𑀤𑀸𑀦𑀸, 𑀅𑀭𑀢𑀺 𑀭𑀢𑀺 𑀮𑁄𑀫𑀳𑀁𑀲𑁄 𑀇𑀢𑁄𑀚𑀸;

𑀇𑀢𑁄 𑀲𑀫𑀼𑀝𑁆𑀞𑀸𑀬 𑀫𑀦𑁄𑀯𑀺𑀢𑀓𑁆𑀓𑀸, 𑀓𑀼𑀫𑀸𑀭𑀓𑀸 𑀥𑀗𑁆𑀓𑀫𑀺𑀯𑁄𑀲𑁆𑀲𑀚𑀦𑁆𑀢𑀻’’𑀢𑀺 [𑀥𑀗𑁆𑀓𑀫𑀺𑀯𑁄𑀲𑁆𑀲𑀚𑁆𑀚𑀦𑁆𑀢𑀺 (𑀲𑁆𑀬𑀸.)].

𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸. 𑀫𑀤𑁆𑀤𑀦𑁆𑀢𑁂 𑀦𑀁 𑀧𑀭𑀺𑀲𑁆𑀲𑀬𑀸𑀢𑀺. 𑀢𑁂 𑀧𑀭𑀺𑀲𑁆𑀲𑀬𑀸 𑀢𑀁 𑀧𑀼𑀕𑁆𑀕𑀮𑀁 𑀲𑀳𑀦𑁆𑀢𑀺 𑀧𑀭𑀺𑀲𑀳𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑀺 𑀫𑀤𑁆𑀤𑀦𑁆𑀢𑀻𑀢𑀺 𑁋 𑀫𑀤𑁆𑀤𑀦𑁆𑀢𑁂 𑀦𑀁 𑀧𑀭𑀺𑀲𑁆𑀲𑀬𑀸.

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀻𑀢𑀺. 𑀢𑀢𑁄𑀢𑀺 𑀢𑀢𑁄 𑀢𑀢𑁄 𑀧𑀭𑀺𑀲𑁆𑀲𑀬𑀢𑁄 𑀢𑀁 𑀧𑀼𑀕𑁆𑀕𑀮𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀚𑀸𑀢𑀺𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀚𑀭𑀸𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀩𑁆𑀬𑀸𑀥𑀺𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀫𑀭𑀡𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀦𑁂𑀭𑀬𑀺𑀓𑀁 𑀤𑀼𑀓𑁆𑀔𑀁, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀁 𑀤𑀼𑀓𑁆𑀔𑀁, 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀫𑀸𑀦𑀼𑀲𑀺𑀓𑀁 𑀤𑀼𑀓𑁆𑀔𑀁… 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑀁 𑀤𑀼𑀓𑁆𑀔𑀁… 𑀕𑀩𑁆𑀪𑁂 𑀞𑀺𑀢𑀺𑀫𑀽𑀮𑀓𑀁 𑀤𑀼𑀓𑁆𑀔𑀁… 𑀕𑀩𑁆𑀪𑀸 𑀯𑀼𑀝𑁆𑀞𑀸𑀦𑀫𑀽𑀮𑀓𑀁 𑀤𑀼𑀓𑁆𑀔𑀁… 𑀚𑀸𑀢𑀲𑁆𑀲𑀽𑀧𑀦𑀺𑀩𑀦𑁆𑀥𑀓𑀁 𑀤𑀼𑀓𑁆𑀔𑀁… 𑀚𑀸𑀢𑀲𑁆𑀲 𑀧𑀭𑀸𑀥𑁂𑀬𑁆𑀬𑀓𑀁 𑀤𑀼𑀓𑁆𑀔𑀁… 𑀅𑀢𑁆𑀢𑀽𑀧𑀓𑁆𑀓𑀫𑀁 𑀤𑀼𑀓𑁆𑀔𑀁… 𑀧𑀭𑀽𑀧𑀓𑁆𑀓𑀫𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀤𑀼𑀓𑁆𑀔𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀲𑀗𑁆𑀔𑀸𑀭𑀤𑀼𑀓𑁆𑀔𑀁… 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁 … 𑀘𑀓𑁆𑀔𑀼𑀭𑁄𑀕𑁄 𑀲𑁄𑀢𑀭𑁄𑀕𑁄 𑀖𑀸𑀦𑀭𑁄𑀕𑁄 𑀚𑀺𑀯𑁆𑀳𑀸𑀭𑁄𑀕𑁄 𑀓𑀸𑀬𑀭𑁄𑀕𑁄 𑀲𑀻𑀲𑀭𑁄𑀕𑁄 𑀓𑀡𑁆𑀡𑀭𑁄𑀕𑁄 𑀫𑀼𑀔𑀭𑁄𑀕𑁄 𑀤𑀦𑁆𑀢𑀭𑁄𑀕𑁄, 𑀓𑀸𑀲𑁄 𑀲𑀸𑀲𑁄 𑀧𑀺𑀦𑀸𑀲𑁄 𑀟𑀸𑀳𑁄 𑀚𑀭𑁄, 𑀓𑀼𑀘𑁆𑀙𑀺𑀭𑁄𑀕𑁄 𑀫𑀼𑀘𑁆𑀙𑀸 𑀧𑀓𑁆𑀔𑀦𑁆𑀤𑀺𑀓𑀸 𑀲𑀽𑀮𑀸 𑀯𑀺𑀲𑀽𑀘𑀺𑀓𑀸, 𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀲𑁄𑀲𑁄 𑀅𑀧𑀫𑀸𑀭𑁄, 𑀤𑀤𑁆𑀤𑀼 𑀓𑀡𑁆𑀟𑀼 𑀓𑀘𑁆𑀙𑀼 𑀭𑀔𑀲𑀸 𑀯𑀺𑀢𑀘𑁆𑀙𑀺𑀓𑀸 𑀮𑁄𑀳𑀺𑀢𑀧𑀺𑀢𑁆𑀢𑀁, 𑀫𑀥𑀼𑀫𑁂𑀳𑁄 𑀅𑀁𑀲𑀸 𑀧𑀺𑀴𑀓𑀸 𑀪𑀕𑀦𑁆𑀤𑀮𑀸 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀯𑀸𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸 𑀲𑀦𑁆𑀦𑀺𑀧𑀸𑀢𑀺𑀓𑀸 𑀆𑀩𑀸𑀥𑀸 𑀉𑀢𑀼𑀧𑀭𑀺𑀡𑀸𑀫𑀚𑀸 𑀆𑀩𑀸𑀥𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑀸 𑀆𑀩𑀸𑀥𑀸, 𑀑𑀧𑀓𑁆𑀓𑀫𑀺𑀓𑀸 𑀆𑀩𑀸𑀥𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀆𑀩𑀸𑀥𑀸, 𑀲𑀻𑀢𑀁 𑀉𑀡𑁆𑀳𑀁 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀉𑀘𑁆𑀘𑀸𑀭𑁄 𑀧𑀲𑁆𑀲𑀸𑀯𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀤𑀼𑀓𑁆𑀔𑀁… 𑀫𑀸𑀢𑀼𑀫𑀭𑀡𑀁 𑀤𑀼𑀓𑁆𑀔𑀁… 𑀧𑀺𑀢𑀼𑀫𑀭𑀡𑀁 𑀤𑀼𑀓𑁆𑀔𑀁… 𑀪𑀸𑀢𑀼𑀫𑀭𑀡𑀁 𑀤𑀼𑀓𑁆𑀔𑀁… 𑀪𑀕𑀺𑀦𑀺𑀫𑀭𑀡𑀁 𑀤𑀼𑀓𑁆𑀔𑀁… 𑀧𑀼𑀢𑁆𑀢𑀫𑀭𑀡𑀁 𑀤𑀼𑀓𑁆𑀔𑀁… 𑀥𑀻𑀢𑀼𑀫𑀭𑀡𑀁 𑀤𑀼𑀓𑁆𑀔𑀁 … 𑀜𑀸𑀢𑀺𑀩𑁆𑀬𑀲𑀦𑀁 𑀤𑀼𑀓𑁆𑀔𑀁… 𑀪𑁄𑀕𑀩𑁆𑀬𑀲𑀦𑀁 𑀤𑀼𑀓𑁆𑀔𑀁… 𑀭𑁄𑀕𑀩𑁆𑀬𑀲𑀦𑀁 𑀤𑀼𑀓𑁆𑀔𑀁… 𑀲𑀻𑀮𑀩𑁆𑀬𑀲𑀦𑀁 𑀤𑀼𑀓𑁆𑀔𑀁… 𑀤𑀺𑀝𑁆𑀞𑀺𑀩𑁆𑀬𑀲𑀦𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀻𑀢𑀺 𑁋 𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺.

𑀦𑀸𑀯𑀁 𑀪𑀺𑀦𑁆𑀦𑀫𑀺𑀯𑁄𑀤𑀓𑀦𑁆𑀢𑀺. 𑀬𑀣𑀸 𑀪𑀺𑀦𑁆𑀦𑀁 𑀦𑀸𑀯𑀁 𑀤𑀓𑀫𑁂𑀲𑀺𑀁 [𑀉𑀤𑀓𑀤𑀸𑀬𑀺𑀢𑁄 (𑀲𑀻.), 𑀉𑀤𑀓𑀁 𑀅𑀦𑁆𑀯𑀸𑀬𑀺𑀓𑀁 (𑀲𑁆𑀬𑀸.)] 𑀢𑀢𑁄 𑀢𑀢𑁄 𑀉𑀤𑀓𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀧𑀼𑀭𑀢𑁄𑀧𑀺 𑀉𑀤𑀓𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀧𑀘𑁆𑀙𑀢𑁄𑀧𑀺… 𑀳𑁂𑀝𑁆𑀞𑀢𑁄𑀧𑀺… 𑀧𑀲𑁆𑀲𑀢𑁄𑀧𑀺 𑀉𑀤𑀓𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺; 𑀏𑀯𑀫𑁂𑀯 𑀢𑀢𑁄 𑀢𑀢𑁄 𑀧𑀭𑀺𑀲𑁆𑀲𑀬𑀢𑁄 𑀢𑀁 𑀧𑀼𑀕𑁆𑀕𑀮𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺, 𑀚𑀸𑀢𑀺𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀺…𑀧𑁂… 𑀤𑀺𑀝𑁆𑀞𑀺𑀩𑁆𑀬𑀲𑀦𑀁 𑀤𑀼𑀓𑁆𑀔𑀁 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀺 𑀅𑀦𑁆𑀯𑀸𑀬𑀺𑀓𑀁 𑀳𑁄𑀢𑀻𑀢𑀺 𑁋 𑀦𑀸𑀯𑀁 𑀪𑀺𑀦𑁆𑀦𑀫𑀺𑀯𑁄𑀤𑀓𑀁.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀺, 𑀫𑀤𑁆𑀤𑀦𑁆𑀢𑁂 𑀦𑀁 𑀧𑀭𑀺𑀲𑁆𑀲𑀬𑀸;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀦𑀸𑀯𑀁 𑀪𑀺𑀦𑁆𑀦𑀫𑀺𑀯𑁄𑀤𑀓’’𑀦𑁆𑀢𑀺.

𑁬. 𑀢𑀲𑁆𑀫𑀸 𑀚𑀦𑁆𑀢𑀼 𑀲𑀤𑀸 𑀲𑀢𑁄, 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂;

𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀁, 𑀦𑀸𑀯𑀁 𑀲𑀺𑀢𑁆𑀯𑀸𑀯 𑀧𑀸𑀭𑀕𑀽.

𑀢𑀲𑁆𑀫𑀸 𑀚𑀦𑁆𑀢𑀼 𑀲𑀤𑀸 𑀲𑀢𑁄𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀏𑀢𑀁 𑀆𑀤𑀻𑀦𑀯𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀓𑀸𑀫𑁂𑀲𑀽𑀢𑀺 𑁋 𑀢𑀲𑁆𑀫𑀸. 𑀚𑀦𑁆𑀢𑀽𑀢𑀺 𑀲𑀢𑁆𑀢𑁄 𑀦𑀭𑁄 𑀫𑀸𑀦𑀯𑁄 𑀧𑁄𑀲𑁄 𑀧𑀼𑀕𑁆𑀕𑀮𑁄 𑀚𑀻𑀯𑁄 𑀚𑀸𑀕𑀼 𑀚𑀦𑁆𑀢𑀼 𑀇𑀦𑁆𑀤𑀕𑀼 𑀫𑀦𑀼𑀚𑁄. 𑀲𑀤𑀸𑀢𑀺 𑀲𑀤𑀸 𑀲𑀩𑁆𑀩𑀤𑀸 𑀲𑀩𑁆𑀩𑀓𑀸𑀮𑀁 𑀦𑀺𑀘𑁆𑀘𑀓𑀸𑀮𑀁 𑀥𑀼𑀯𑀓𑀸𑀮𑀁 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀉𑀤𑀓𑀽𑀫𑀺𑀓𑀚𑀸𑀢𑀁 𑀅𑀯𑀻𑀘𑀺 𑀲𑀦𑁆𑀢𑀢𑀺 𑀲𑀳𑀺𑀢𑀁 𑀨𑀲𑁆𑀲𑀺𑀢𑀁 [𑀨𑀼𑀲𑀺𑀢𑀁 (𑀲𑀻. 𑀲𑁆𑀬𑀸.)], 𑀧𑀼𑀭𑁂𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀼𑀭𑀺𑀫𑀬𑀸𑀫𑀁 𑀫𑀚𑁆𑀛𑀺𑀫𑀬𑀸𑀫𑀁 𑀧𑀘𑁆𑀙𑀺𑀫𑀬𑀸𑀫𑀁, 𑀓𑀸𑀴𑁂 𑀚𑀼𑀡𑁆𑀳𑁂 𑀯𑀲𑁆𑀲𑁂 𑀳𑁂𑀫𑀦𑁆𑀢𑁂 𑀕𑀺𑀫𑁆𑀳𑁂, 𑀧𑀼𑀭𑀺𑀫𑁂 𑀯𑀬𑁄𑀔𑀦𑁆𑀥𑁂 𑀫𑀚𑁆𑀛𑀺𑀫𑁂 𑀯𑀬𑁄𑀔𑀦𑁆𑀥𑁂 𑀧𑀘𑁆𑀙𑀺𑀫𑁂 𑀯𑀬𑁄𑀔𑀦𑁆𑀥𑁂. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄, 𑀯𑁂𑀤𑀦𑀸𑀲𑀼… 𑀘𑀺𑀢𑁆𑀢𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄. 𑀅𑀧𑀭𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄𑀢𑀺 𑁋 𑀢𑀲𑁆𑀫𑀸 𑀚𑀦𑁆𑀢𑀼 𑀲𑀤𑀸 𑀲𑀢𑁄.

𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬 𑁋 𑀯𑀺𑀓𑁆𑀔𑀫𑁆𑀪𑀦𑀢𑁄 𑀯𑀸 𑀲𑀫𑀼𑀘𑁆𑀙𑁂𑀤𑀢𑁄 𑀯𑀸. 𑀓𑀣𑀁 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬? ‘‘𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸 𑀅𑀧𑁆𑀧𑀲𑁆𑀲𑀸𑀤𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬, ‘‘𑀫𑀁𑀲𑀧𑁂𑀲𑀽𑀧𑀫𑀸 𑀓𑀸𑀫𑀸 𑀩𑀳𑀼𑀲𑀸𑀥𑀸𑀭𑀡𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬, ‘‘𑀢𑀺𑀡𑀼𑀓𑁆𑀓𑀽𑀧𑀫𑀸 𑀓𑀸𑀫𑀸 𑀅𑀦𑀼𑀤𑀳𑀦𑀝𑁆𑀞𑁂𑀦𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬. 𑀏𑀯𑀁 𑀯𑀺𑀓𑁆𑀔𑀫𑁆𑀪𑀦𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬…𑀧𑁂… 𑀏𑀯𑀁 𑀲𑀫𑀼𑀘𑁆𑀙𑁂𑀤𑀢𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀬𑁆𑀬𑀸𑀢𑀺 𑁋 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂.

𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀦𑁆𑀢𑀺. 𑀢𑁂𑀢𑀺 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑀺𑀢𑁆𑀯𑀸; 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑀺𑀢𑁆𑀯𑀸; 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁…𑀧𑁂… 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁… 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁… 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑀺𑀢𑁆𑀯𑀸 𑀓𑀸𑀫𑁄𑀖𑀁 𑀪𑀯𑁄𑀖𑀁 𑀤𑀺𑀝𑁆𑀞𑁄𑀖𑀁 𑀅𑀯𑀺𑀚𑁆𑀚𑁄𑀖𑀁 𑀢𑀭𑁂𑀬𑁆𑀬 𑀉𑀢𑁆𑀢𑀭𑁂𑀬𑁆𑀬 𑀧𑀢𑀭𑁂𑀬𑁆𑀬 𑀲𑀫𑀢𑀺𑀓𑁆𑀓𑀫𑁂𑀬𑁆𑀬 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀁.

𑀦𑀸𑀯𑀁 𑀲𑀺𑀢𑁆𑀯𑀸𑀯 𑀧𑀸𑀭𑀕𑀽𑀢𑀺. 𑀬𑀣𑀸 𑀕𑀭𑀼𑀓𑀁 𑀦𑀸𑀯𑀁 𑀪𑀸𑀭𑀺𑀓𑀁 𑀉𑀤𑀓𑀁 𑀲𑀺𑀢𑁆𑀯𑀸 [𑀲𑀺𑀜𑁆𑀘𑀺𑀢𑁆𑀯𑀸 (𑀲𑀻. 𑀲𑁆𑀬𑀸.)] 𑀑𑀲𑀺𑀜𑁆𑀘𑀺𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸 𑀮𑀳𑀼𑀓𑀸𑀬 𑀦𑀸𑀯𑀸𑀬 𑀔𑀺𑀧𑁆𑀧𑀁 𑀮𑀳𑀼𑀁 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬; 𑀏𑀯𑀫𑁂𑀯 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑀺𑀢𑁆𑀯𑀸; 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁… 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁… 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁… 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁… 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑀺𑀢𑁆𑀯𑀸 𑀔𑀺𑀧𑁆𑀧𑀁 𑀮𑀳𑀼𑀁 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬. 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀧𑀸𑀭𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑁋 𑀧𑀸𑀭𑀁 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀧𑀸𑀭𑀁 𑀨𑀼𑀲𑁂𑀬𑁆𑀬, 𑀧𑀸𑀭𑀁 𑀲𑀘𑁆𑀙𑀺𑀓𑀭𑁂𑀬𑁆𑀬. 𑀧𑀸𑀭𑀕𑀽𑀢𑀺 𑀬𑁄𑀧𑀺 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑁄 𑀲𑁄𑀧𑀺 𑀧𑀸𑀭𑀕𑀽; 𑀬𑁄𑀧𑀺 𑀧𑀸𑀭𑀁 𑀕𑀘𑁆𑀙𑀢𑀺 𑀲𑁄𑀧𑀺 𑀧𑀸𑀭𑀕𑀽; 𑀬𑁄𑀧𑀺 𑀧𑀸𑀭𑀁 𑀕𑀢𑁄, 𑀲𑁄𑀧𑀺 𑀧𑀸𑀭𑀕𑀽.

𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀪𑀕𑀯𑀢𑀸 𑁋

𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑁄 𑀅𑀪𑀺𑀜𑁆𑀜𑀸𑀧𑀸𑀭𑀕𑀽 𑀧𑀭𑀺𑀜𑁆𑀜𑀸𑀧𑀸𑀭𑀕𑀽 𑀧𑀳𑀸𑀦𑀧𑀸𑀭𑀕𑀽 𑀪𑀸𑀯𑀦𑀸𑀧𑀸𑀭𑀕𑀽 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀸𑀭𑀕𑀽 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽. 𑀅𑀪𑀺𑀜𑁆𑀜𑀸𑀧𑀸𑀭𑀕𑀽 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀧𑀭𑀺𑀜𑁆𑀜𑀸𑀧𑀸𑀭𑀕𑀽 𑀲𑀩𑁆𑀩𑀤𑀼𑀓𑁆𑀔𑀸𑀦𑀁, 𑀧𑀳𑀸𑀦𑀧𑀸𑀭𑀕𑀽 𑀲𑀩𑁆𑀩𑀓𑀺𑀮𑁂𑀲𑀸𑀦𑀁, 𑀪𑀸𑀯𑀦𑀸𑀧𑀸𑀭𑀕𑀽 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀸𑀭𑀕𑀽 𑀦𑀺𑀭𑁄𑀥𑀲𑁆𑀲, 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽 𑀲𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀁. 𑀲𑁄 𑀯𑀲𑀺𑀧𑁆𑀧𑀢𑁆𑀢𑁄 𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀅𑀭𑀺𑀬𑀲𑁆𑀫𑀺𑀁 𑀲𑀻𑀮𑀲𑁆𑀫𑀺𑀁, 𑀯𑀲𑀺𑀧𑁆𑀧𑀢𑁆𑀢𑁄 𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀅𑀭𑀺𑀬𑀲𑁆𑀫𑀺𑀁 𑀲𑀫𑀸𑀥𑀺𑀲𑁆𑀫𑀺𑀁, 𑀯𑀲𑀺𑀧𑁆𑀧𑀢𑁆𑀢𑁄 𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀅𑀭𑀺𑀬𑀸𑀬 𑀧𑀜𑁆𑀜𑀸𑀬, 𑀯𑀲𑀺𑀧𑁆𑀧𑀢𑁆𑀢𑁄 𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀅𑀭𑀺𑀬𑀸𑀬 𑀯𑀺𑀫𑀼𑀢𑁆𑀢𑀺𑀬𑀸. 𑀲𑁄 𑀧𑀸𑀭𑀁 𑀕𑀢𑁄 𑀧𑀸𑀭𑀧𑁆𑀧𑀢𑁆𑀢𑁄 𑀅𑀦𑁆𑀢𑀕𑀢𑁄 𑀅𑀦𑁆𑀢𑀧𑁆𑀧𑀢𑁆𑀢𑁄 𑀓𑁄𑀝𑀺𑀕𑀢𑁄 𑀓𑁄𑀝𑀺𑀧𑁆𑀧𑀢𑁆𑀢𑁄 𑀧𑀭𑀺𑀬𑀦𑁆𑀢𑀕𑀢𑁄 𑀧𑀭𑀺𑀬𑀦𑁆𑀢𑀧𑁆𑀧𑀢𑁆𑀢𑁄 𑀯𑁄𑀲𑀸𑀦𑀕𑀢𑁄 𑀯𑁄𑀲𑀸𑀦𑀧𑁆𑀧𑀢𑁆𑀢𑁄 𑀢𑀸𑀡𑀕𑀢𑁄 𑀢𑀸𑀡𑀧𑁆𑀧𑀢𑁆𑀢𑁄 𑀮𑁂𑀡𑀕𑀢𑁄 𑀮𑁂𑀡𑀧𑁆𑀧𑀢𑁆𑀢𑁄 𑀲𑀭𑀡𑀕𑀢𑁄 𑀲𑀭𑀡𑀧𑁆𑀧𑀢𑁆𑀢𑁄 𑀅𑀪𑀬𑀕𑀢𑁄 𑀅𑀪𑀬𑀧𑁆𑀧𑀢𑁆𑀢𑁄 𑀅𑀘𑁆𑀘𑀼𑀢𑀕𑀢𑁄 𑀅𑀘𑁆𑀘𑀼𑀢𑀧𑁆𑀧𑀢𑁆𑀢𑁄 𑀅𑀫𑀢𑀕𑀢𑁄 𑀅𑀫𑀢𑀧𑁆𑀧𑀢𑁆𑀢𑁄 𑀦𑀺𑀩𑁆𑀩𑀸𑀦𑀕𑀢𑁄 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄. 𑀲𑁄 𑀯𑀼𑀝𑁆𑀞𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄 𑀕𑀢𑀤𑁆𑀥𑁄 𑀕𑀢𑀤𑀺𑀲𑁄 𑀕𑀢𑀓𑁄𑀝𑀺𑀓𑁄 𑀧𑀸𑀮𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄 𑀉𑀢𑁆𑀢𑀫𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀪𑀸𑀯𑀺𑀢𑀫𑀕𑁆𑀕𑁄 𑀧𑀳𑀻𑀦𑀓𑀺𑀮𑁂𑀲𑁄 𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁄, 𑀤𑀼𑀓𑁆𑀔𑀁 𑀢𑀲𑁆𑀲 𑀧𑀭𑀺𑀜𑁆𑀜𑀸𑀢𑀁, 𑀲𑀫𑀼𑀤𑀬𑁄 𑀧𑀳𑀻𑀦𑁄, 𑀫𑀕𑁆𑀕𑁄 𑀪𑀸𑀯𑀺𑀢𑁄, 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀢𑁄, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀜𑁆𑀜𑀸𑀢𑀁, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢𑀁, 𑀧𑀳𑀸𑀢𑀩𑁆𑀩𑀁 𑀧𑀳𑀻𑀦𑀁, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑀺𑀢𑀁, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁.

𑀲𑁄 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 𑀲𑀁𑀓𑀺𑀡𑁆𑀡𑀧𑀭𑀺𑀓𑁆𑀔𑁄 𑀅𑀩𑁆𑀩𑀼𑀴𑁆𑀳𑁂𑀲𑀺𑀓𑁄 𑀦𑀺𑀭𑀕𑁆𑀕𑀴𑁄 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁄 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀏𑀓𑀸𑀭𑀓𑁆𑀔𑁄 𑀘𑀢𑀼𑀭𑀸𑀧𑀲𑁆𑀲𑁂𑀦𑁄 𑀧𑀦𑀼𑀡𑁆𑀡𑀧𑀘𑁆𑀘𑁂𑀓𑀲𑀘𑁆𑀘𑁄 𑀲𑀫𑀯𑀬𑀲𑀝𑁆𑀞𑁂𑀲𑀦𑁄 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄 𑀧𑀲𑁆𑀲𑀤𑁆𑀥𑀓𑀸𑀬𑀲𑀗𑁆𑀔𑀸𑀭𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀲𑀼𑀯𑀺𑀫𑀼𑀢𑁆𑀢𑀧𑀜𑁆𑀜𑁄 𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑁆𑀧𑀢𑁆𑀢𑁄. 𑀲𑁄 𑀦𑁂𑀯𑀸𑀘𑀺𑀦𑀢𑀺 [𑀦𑁂𑀯 𑀆𑀘𑀺𑀦𑀸𑀢𑀺 (𑀲𑀻. 𑀲𑁆𑀬𑀸.)] 𑀦𑀸𑀧𑀘𑀺𑀦𑀢𑀺, 𑀅𑀧𑀘𑀺𑀦𑀺𑀢𑁆𑀯𑀸 𑀞𑀺𑀢𑁄. 𑀦𑁂𑀯 𑀧𑀚𑀳𑀢𑀺 𑀦 𑀉𑀧𑀸𑀤𑀺𑀬𑀢𑀺, 𑀧𑀚𑀳𑀺𑀢𑁆𑀯𑀸 𑀞𑀺𑀢𑁄. 𑀦𑁂𑀯 𑀲𑀁𑀲𑀺𑀩𑁆𑀩𑀢𑀺 [𑀦𑁂𑀯 𑀲𑀺𑀦𑁂𑀢𑀺 (𑀲𑀻.), 𑀦𑁂𑀯 𑀯𑀺𑀲𑀻𑀦𑁂𑀢𑀺 (𑀲𑁆𑀬𑀸.)] 𑀦 𑀉𑀲𑁆𑀲𑀺𑀦𑁂𑀢𑀺, 𑀯𑀺𑀲𑀺𑀦𑀺𑀢𑁆𑀯𑀸 𑀞𑀺𑀢𑁄. 𑀦𑁂𑀯 𑀯𑀺𑀥𑀽𑀧𑁂𑀢𑀺 𑀦 𑀲𑀦𑁆𑀥𑀽𑀧𑁂𑀢𑀺, 𑀯𑀺𑀥𑀽𑀧𑁂𑀢𑁆𑀯𑀸 𑀞𑀺𑀢𑁄. 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀞𑀺𑀢𑁄. 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦… 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦… 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦… 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀞𑀺𑀢𑁄. 𑀲𑀘𑁆𑀘𑀁 𑀲𑀫𑁆𑀧𑀝𑀺𑀧𑀸𑀤𑀺𑀬𑀺𑀢𑁆𑀯𑀸 𑀞𑀺𑀢𑁄. 𑀏𑀚𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄. 𑀓𑀺𑀮𑁂𑀲𑀕𑁆𑀕𑀺𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀞𑀺𑀢𑁄, 𑀅𑀧𑀭𑀺𑀕𑀫𑀦𑀢𑀸𑀬 𑀞𑀺𑀢𑁄, 𑀓𑀝𑀁 𑀲𑀫𑀸𑀤𑀸𑀬 𑀞𑀺𑀢𑁄, 𑀫𑀼𑀢𑁆𑀢𑀺𑀧𑀝𑀺𑀲𑁂𑀯𑀦𑀢𑀸𑀬 𑀞𑀺𑀢𑁄, 𑀫𑁂𑀢𑁆𑀢𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀓𑀭𑀼𑀡𑀸𑀬… 𑀫𑀼𑀤𑀺𑀢𑀸𑀬… 𑀉𑀧𑁂𑀓𑁆𑀔𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀅𑀘𑁆𑀘𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀅𑀓𑀫𑁆𑀫𑀬𑀢𑀸𑀬 [𑀅𑀢𑀫𑁆𑀫𑀬𑀢𑀸𑀬 (𑀲𑀻.), 𑀅𑀓𑀫𑁆𑀫𑀜𑁆𑀜𑀢𑀸𑀬 (𑀲𑁆𑀬𑀸.)] 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀯𑀺𑀫𑀼𑀢𑁆𑀢𑀢𑁆𑀢𑀸 𑀞𑀺𑀢𑁄, 𑀲𑀦𑁆𑀢𑀼𑀲𑁆𑀲𑀺𑀢𑀢𑁆𑀢𑀸 𑀞𑀺𑀢𑁄, 𑀔𑀦𑁆𑀥𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀥𑀸𑀢𑀼𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀆𑀬𑀢𑀦𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀕𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀉𑀧𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀧𑀝𑀺𑀲𑀦𑁆𑀥𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, (𑀪𑀯𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀲𑀁𑀲𑀸𑀭𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀯𑀝𑁆𑀝𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀅𑀦𑁆𑀢𑀺𑀫𑁂 𑀪𑀯𑁂 𑀞𑀺𑀢𑁄,) [( ) 𑀦𑀢𑁆𑀣𑀺 𑀲𑀻𑀳𑀴𑀧𑁄𑀢𑁆𑀣𑀓𑁂] 𑀅𑀦𑁆𑀢𑀺𑀫𑁂 𑀲𑀫𑀼𑀲𑁆𑀲𑀬𑁂 𑀞𑀺𑀢𑁄, 𑀅𑀦𑁆𑀢𑀺𑀫𑀤𑁂𑀳𑀥𑀭𑁄 𑀅𑀭𑀳𑀸.

‘‘𑀢𑀲𑁆𑀲𑀸𑀬𑀁 𑀧𑀘𑁆𑀙𑀺𑀫𑀓𑁄 𑀪𑀯𑁄, 𑀘𑀭𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄’’𑀢𑀺.

𑀦𑀸𑀯𑀁 𑀲𑀺𑀢𑁆𑀯𑀸𑀯 𑀧𑀸𑀭𑀕𑀽𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀢𑀲𑁆𑀫𑀸 𑀚𑀦𑁆𑀢𑀼 𑀲𑀤𑀸 𑀲𑀢𑁄, 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂;

𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀁, 𑀦𑀸𑀯𑀁 𑀲𑀺𑀢𑁆𑀯𑀸𑀯 𑀧𑀸𑀭𑀕𑀽’’𑀢𑀺.

𑀓𑀸𑀫𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀧𑀞𑀫𑁄.