𑁧𑁪. 𑀲𑀼𑀔𑀼𑀫𑀧𑀜𑁆𑀳𑁄

𑁧𑁪. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀓𑁆𑀓𑀸 𑀲𑀩𑁆𑀩𑀁 𑀲𑀼𑀔𑀼𑀫𑀁 𑀙𑀺𑀦𑁆𑀤𑀺𑀢𑀼’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀲𑀩𑁆𑀩𑀁 𑀲𑀼𑀔𑀼𑀫𑀁 𑀙𑀺𑀦𑁆𑀤𑀺𑀢𑀼’’𑀦𑁆𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀲𑀩𑁆𑀩𑀁 𑀲𑀼𑀔𑀼𑀫’’𑀦𑁆𑀢𑀺? ‘‘𑀥𑀫𑁆𑀫𑁄 𑀔𑁄, 𑀫𑀳𑀸𑀭𑀸𑀚, 𑀲𑀩𑁆𑀩𑀲𑀼𑀔𑀼𑀫𑁄, 𑀦 𑀔𑁄, 𑀫𑀳𑀸𑀭𑀸𑀚, 𑀥𑀫𑁆𑀫𑀸 𑀲𑀩𑁆𑀩𑁂 𑀲𑀼𑀔𑀼𑀫𑀸, ‘𑀲𑀼𑀔𑀼𑀫’𑀦𑁆𑀢𑀺 𑀯𑀸 ‘𑀣𑀽𑀮’𑀦𑁆𑀢𑀺 𑀯𑀸 𑀥𑀫𑁆𑀫𑀸𑀦𑀫𑁂𑀢𑀫𑀥𑀺𑀯𑀘𑀦𑀁. 𑀬𑀁 𑀓𑀺𑀜𑁆𑀘𑀺 𑀙𑀺𑀦𑁆𑀤𑀺𑀢𑀩𑁆𑀩𑀁, 𑀲𑀩𑁆𑀩𑀁 𑀢𑀁 𑀧𑀜𑁆𑀜𑀸𑀬 𑀙𑀺𑀦𑁆𑀤𑀢𑀺, 𑀦𑀢𑁆𑀣𑀺 𑀤𑀼𑀢𑀺𑀬𑀁 𑀧𑀜𑁆𑀜𑀸𑀬 𑀙𑁂𑀤𑀦’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀲𑀼𑀔𑀼𑀫𑀧𑀜𑁆𑀳𑁄 𑀘𑀼𑀤𑁆𑀤𑀲𑀫𑁄.