𑁪. 𑀪𑀕𑀯𑀢𑁄 𑀩𑁆𑀭𑀳𑁆𑀫𑀘𑀸𑀭𑀺𑀧𑀜𑁆𑀳𑁄

𑁪. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀪𑀕𑀯𑀸 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑁄 𑀩𑁆𑀭𑀳𑁆𑀫𑀼𑀦𑁄 𑀲𑀺𑀲𑁆𑀲𑁄’’𑀢𑀺? ‘‘𑀅𑀢𑁆𑀣𑀺 𑀧𑀦 𑀢𑁂, 𑀫𑀳𑀸𑀭𑀸𑀚, 𑀳𑀢𑁆𑀣𑀺𑀧𑀸𑀫𑁄𑀓𑁆𑀔𑁄’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑁄 𑀳𑀢𑁆𑀣𑀻 𑀓𑀤𑀸𑀘𑀺 𑀓𑀭𑀳𑀘𑀺 𑀓𑁄𑀜𑁆𑀘𑀦𑀸𑀤𑀁 𑀦𑀤𑀢𑀻𑀢𑀺? ‘‘𑀆𑀫, 𑀪𑀦𑁆𑀢𑁂, 𑀦𑀤𑀢𑀻’’𑀢𑀺 ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀲𑁄 𑀳𑀢𑁆𑀣𑀻 𑀓𑁄𑀜𑁆𑀘𑀲𑀓𑀼𑀡𑀲𑁆𑀲 𑀲𑀺𑀲𑁆𑀲𑁄’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦, 𑀫𑀳𑀸𑀭𑀸𑀚, 𑀩𑁆𑀭𑀳𑁆𑀫𑀸 𑀲𑀩𑀼𑀤𑁆𑀥𑀺𑀓𑁄 𑀅𑀩𑀼𑀤𑁆𑀥𑀺𑀓𑁄’’𑀢𑀺? ‘‘𑀲𑀩𑀼𑀤𑁆𑀥𑀺𑀓𑁄, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀩𑁆𑀭𑀳𑁆𑀫𑀸 𑀪𑀕𑀯𑀢𑁄 𑀲𑀺𑀲𑁆𑀲𑁄’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀪𑀕𑀯𑀢𑁄 𑀩𑁆𑀭𑀳𑁆𑀫𑀘𑀸𑀭𑀺𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.