𑁧. 𑀓𑀸𑀬𑀧𑀺𑀬𑀸𑀬𑀦𑀧𑀜𑁆𑀳𑁄

𑁧. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀺𑀬𑁄 𑀧𑀩𑁆𑀩𑀚𑀺𑀢𑀸𑀦𑀁 𑀓𑀸𑀬𑁄’’𑀢𑀺? ‘‘𑀦 𑀔𑁄, 𑀫𑀳𑀸𑀭𑀸𑀚, 𑀧𑀺𑀬𑁄 𑀧𑀩𑁆𑀩𑀚𑀺𑀢𑀸𑀦𑀁 𑀓𑀸𑀬𑁄’’𑀢𑀺. ‘‘𑀅𑀣 𑀓𑀺𑀲𑁆𑀲 𑀦𑀼 𑀔𑁄, 𑀪𑀦𑁆𑀢𑁂, 𑀓𑁂𑀮𑀸𑀬𑀣 𑀫𑀫𑀸𑀬𑀣𑀸’’𑀢𑀺? ‘‘𑀓𑀺𑀁 𑀧𑀦 𑀢𑁂, 𑀫𑀳𑀸𑀭𑀸𑀚, 𑀓𑀤𑀸𑀘𑀺 𑀓𑀭𑀳𑀘𑀺 𑀲𑀗𑁆𑀕𑀸𑀫𑀕𑀢𑀲𑁆𑀲 𑀓𑀡𑁆𑀟𑀧𑁆𑀧𑀳𑀸𑀭𑁄 𑀳𑁄𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀳𑁄𑀢𑀻’’𑀢𑀺. ‘‘𑀓𑀺𑀁𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑁄 𑀯𑀡𑁄 𑀆𑀮𑁂𑀧𑁂𑀦 𑀘 𑀆𑀮𑀺𑀫𑁆𑀧𑀻𑀬𑀢𑀺 𑀢𑁂𑀮𑁂𑀦 𑀘 𑀫𑀓𑁆𑀔𑀻𑀬𑀢𑀺 𑀲𑀼𑀔𑀼𑀫𑁂𑀦 𑀘 𑀘𑁄𑀴𑀧𑀝𑁆𑀝𑁂𑀦 𑀧𑀮𑀺𑀯𑁂𑀞𑀻𑀬𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀆𑀮𑁂𑀧𑁂𑀦 𑀘 𑀆𑀮𑀺𑀫𑁆𑀧𑀻𑀬𑀢𑀺 𑀢𑁂𑀮𑁂𑀦 𑀘 𑀫𑀓𑁆𑀔𑀻𑀬𑀢𑀺 𑀲𑀼𑀔𑀼𑀫𑁂𑀦 𑀘 𑀘𑁄𑀴𑀧𑀝𑁆𑀝𑁂𑀦 𑀧𑀮𑀺𑀯𑁂𑀞𑀻𑀬𑀢𑀻’’𑀢𑀺. ‘‘𑀓𑀺𑀁𑀦𑀼 𑀔𑁄, 𑀫𑀳𑀸𑀭𑀸𑀚, 𑀧𑀺𑀬𑁄 𑀢𑁂 𑀯𑀡𑁄, 𑀢𑁂𑀦 𑀆𑀮𑁂𑀧𑁂𑀦 𑀘 𑀆𑀮𑀺𑀫𑁆𑀧𑀻𑀬𑀢𑀺 𑀢𑁂𑀮𑁂𑀦 𑀘 𑀫𑀓𑁆𑀔𑀻𑀬𑀢𑀺 𑀲𑀼𑀔𑀼𑀫𑁂𑀦 𑀘 𑀘𑁄𑀴𑀧𑀝𑁆𑀝𑁂𑀦 𑀧𑀮𑀺𑀯𑁂𑀞𑀻𑀬𑀢𑀻’’𑀢𑀺? ‘‘𑀦 𑀫𑁂, 𑀪𑀦𑁆𑀢𑁂, 𑀧𑀺𑀬𑁄 𑀯𑀡𑁄, 𑀅𑀧𑀺 𑀘 𑀫𑀁𑀲𑀲𑁆𑀲 𑀭𑀼𑀳𑀦𑀢𑁆𑀣𑀸𑀬 𑀆𑀮𑁂𑀧𑁂𑀦 𑀘 𑀆𑀮𑀺𑀫𑁆𑀧𑀻𑀬𑀢𑀺 𑀢𑁂𑀮𑁂𑀦 𑀘 𑀫𑀓𑁆𑀔𑀻𑀬𑀢𑀺 𑀲𑀼𑀔𑀼𑀫𑁂𑀦 𑀘 𑀘𑁄𑀴𑀧𑀝𑁆𑀝𑁂𑀦 𑀧𑀮𑀺𑀯𑁂𑀞𑀻𑀬𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀧𑁆𑀧𑀺𑀬𑁄 𑀧𑀩𑁆𑀩𑀚𑀺𑀢𑀸𑀦𑀁 𑀓𑀸𑀬𑁄, 𑀅𑀣 𑀘 𑀧𑀩𑁆𑀩𑀚𑀺𑀢𑀸 𑀅𑀦𑀚𑁆𑀛𑁄𑀲𑀺𑀢𑀸 𑀓𑀸𑀬𑀁 𑀧𑀭𑀺𑀳𑀭𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬. 𑀅𑀧𑀺 𑀘 𑀔𑁄, 𑀫𑀳𑀸𑀭𑀸𑀚, 𑀯𑀡𑀽𑀧𑀫𑁄 𑀓𑀸𑀬𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀢𑁂𑀦 𑀧𑀩𑁆𑀩𑀚𑀺𑀢𑀸 𑀯𑀡𑀫𑀺𑀯 𑀓𑀸𑀬𑀁 𑀧𑀭𑀺𑀳𑀭𑀦𑁆𑀢𑀺 𑀅𑀦𑀚𑁆𑀛𑁄𑀲𑀺𑀢𑀸. 𑀪𑀸𑀲𑀺𑀢𑀫𑁆𑀧𑁂𑀢𑀁 𑀫𑀳𑀸𑀭𑀸𑀚 𑀪𑀕𑀯𑀢𑀸 𑁋

‘‘‘𑀅𑀮𑁆𑀮𑀘𑀫𑁆𑀫𑀧𑀝𑀺𑀘𑁆𑀙𑀦𑁆𑀦𑁄, 𑀦𑀯𑀤𑁆𑀯𑀸𑀭𑁄 𑀫𑀳𑀸𑀯𑀡𑁄;

𑀲𑀫𑀦𑁆𑀢𑀢𑁄 𑀧𑀕𑁆𑀖𑀭𑀢𑀺, 𑀅𑀲𑀼𑀘𑀺𑀧𑀽𑀢𑀺𑀕𑀦𑁆𑀥𑀺𑀬𑁄’’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀓𑀸𑀬𑀧𑀺𑀬𑀸𑀬𑀦𑀧𑀜𑁆𑀳𑁄 𑀧𑀞𑀫𑁄.