𑁫. 𑀅𑀲𑀗𑁆𑀓𑀫𑀦𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄

𑁫. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦 𑀘 𑀲𑀗𑁆𑀓𑀫𑀢𑀺 𑀧𑀝𑀺𑀲𑀦𑁆𑀤𑀳𑀢𑀺 𑀘𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀦 𑀘 𑀲𑀗𑁆𑀓𑀫𑀢𑀺 𑀧𑀝𑀺𑀲𑀦𑁆𑀤𑀳𑀢𑀺 𑀘𑀸’’𑀢𑀺. ‘‘𑀓𑀣𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦 𑀘 𑀲𑀗𑁆𑀓𑀫𑀢𑀺 𑀧𑀝𑀺𑀲𑀦𑁆𑀤𑀳𑀢𑀺 𑀘, 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀧𑀤𑀻𑀧𑀢𑁄 𑀧𑀤𑀻𑀧𑀁 𑀧𑀤𑀻𑀧𑁂𑀬𑁆𑀬, 𑀓𑀺𑀁𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀧𑀤𑀻𑀧𑁄 𑀧𑀤𑀻𑀧𑀫𑁆𑀳𑀸 𑀲𑀗𑁆𑀓𑀦𑁆𑀢𑁄’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦 𑀘 𑀲𑀗𑁆𑀓𑀫𑀢𑀺 𑀧𑀝𑀺𑀲𑀦𑁆𑀤𑀳𑀢𑀺 𑀘𑀸’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀅𑀪𑀺𑀚𑀸𑀦𑀸𑀲𑀺 𑀦𑀼, 𑀢𑁆𑀯𑀁 𑀫𑀳𑀸𑀭𑀸𑀚, 𑀤𑀳𑀭𑀓𑁄 𑀲𑀦𑁆𑀢𑁄 𑀲𑀺𑀮𑁄𑀓𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀓𑀺𑀜𑁆𑀘𑀺 𑀲𑀺𑀮𑁄𑀓𑀁 𑀕𑀳𑀺𑀢’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑁄 𑀲𑀺𑀮𑁄𑀓𑁄 𑀆𑀘𑀭𑀺𑀬𑀫𑁆𑀳𑀸 𑀲𑀗𑁆𑀓𑀦𑁆𑀢𑁄’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦 𑀘 𑀲𑀗𑁆𑀓𑀫𑀢𑀺 𑀧𑀝𑀺𑀲𑀦𑁆𑀤𑀳𑀢𑀺 𑀘𑀸𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀅𑀲𑀗𑁆𑀓𑀫𑀦𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄 𑀧𑀜𑁆𑀘𑀫𑁄.