𑁨. 𑀅𑀤𑁆𑀥𑀸𑀦𑀯𑀕𑁆𑀕𑁄

𑁧. 𑀥𑀫𑁆𑀫𑀲𑀦𑁆𑀢𑀢𑀺𑀧𑀜𑁆𑀳𑁄

𑁧. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀏𑀯 𑀲𑁄, 𑀉𑀤𑀸𑀳𑀼 𑀅𑀜𑁆𑀜𑁄’’𑀢𑀺? 𑀣𑁂𑀭𑁄 𑀆𑀳 ‘‘𑀦 𑀘 𑀲𑁄, 𑀦 𑀘 𑀅𑀜𑁆𑀜𑁄’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀬𑀤𑀸 𑀢𑁆𑀯𑀁 𑀤𑀳𑀭𑁄 𑀢𑀭𑀼𑀡𑁄 𑀫𑀦𑁆𑀤𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄 𑀅𑀳𑁄𑀲𑀺, 𑀲𑁄 𑀬𑁂𑀯 𑀢𑁆𑀯𑀁 𑀏𑀢𑀭𑀳𑀺 𑀫𑀳𑀦𑁆𑀢𑁄’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀅𑀜𑁆𑀜𑁄 𑀲𑁄 𑀤𑀳𑀭𑁄 𑀢𑀭𑀼𑀡𑁄 𑀫𑀦𑁆𑀤𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄 𑀅𑀳𑁄𑀲𑀺, 𑀅𑀜𑁆𑀜𑁄 𑀅𑀳𑀁 𑀏𑀢𑀭𑀳𑀺 𑀫𑀳𑀦𑁆𑀢𑁄’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀔𑁄, 𑀫𑀳𑀸𑀭𑀸𑀚, 𑀫𑀸𑀢𑀸𑀢𑀺𑀧𑀺 𑀦 𑀪𑀯𑀺𑀲𑁆𑀲𑀢𑀺, 𑀧𑀺𑀢𑀸𑀢𑀺𑀧𑀺 𑀦 𑀪𑀯𑀺𑀲𑁆𑀲𑀢𑀺, 𑀆𑀘𑀭𑀺𑀬𑁄𑀢𑀺𑀧𑀺 𑀦 𑀪𑀯𑀺𑀲𑁆𑀲𑀢𑀺, 𑀲𑀺𑀧𑁆𑀧𑀯𑀸𑀢𑀺𑀧𑀺 𑀦 𑀪𑀯𑀺𑀲𑁆𑀲𑀢𑀺, 𑀲𑀻𑀮𑀯𑀸𑀢𑀺𑀧𑀺 𑀦 𑀪𑀯𑀺𑀲𑁆𑀲𑀢𑀺, 𑀧𑀜𑁆𑀜𑀯𑀸𑀢𑀺𑀧𑀺 𑀦 𑀪𑀯𑀺𑀲𑁆𑀲𑀢𑀺. 𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀜𑁆𑀜𑀸 𑀏𑀯 𑀓𑀮𑀮𑀲𑁆𑀲 𑀫𑀸𑀢𑀸, 𑀅𑀜𑁆𑀜𑀸 𑀅𑀩𑁆𑀩𑀼𑀤𑀲𑁆𑀲 𑀫𑀸𑀢𑀸, 𑀅𑀜𑁆𑀜𑀸 𑀧𑁂𑀲𑀺𑀬𑀸 𑀫𑀸𑀢𑀸, 𑀅𑀜𑁆𑀜𑀸 𑀖𑀦𑀲𑁆𑀲 𑀫𑀸𑀢𑀸, 𑀅𑀜𑁆𑀜𑀸 𑀔𑀼𑀤𑁆𑀤𑀓𑀲𑁆𑀲 𑀫𑀸𑀢𑀸, 𑀅𑀜𑁆𑀜𑀸 𑀫𑀳𑀦𑁆𑀢𑀲𑁆𑀲 𑀫𑀸𑀢𑀸, 𑀅𑀜𑁆𑀜𑁄 𑀲𑀺𑀧𑁆𑀧𑀁 𑀲𑀺𑀓𑁆𑀔𑀢𑀺, 𑀅𑀜𑁆𑀜𑁄 𑀲𑀺𑀓𑁆𑀔𑀺𑀢𑁄 𑀪𑀯𑀢𑀺, 𑀅𑀜𑁆𑀜𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀅𑀜𑁆𑀜𑀲𑁆𑀲 𑀳𑀢𑁆𑀣𑀧𑀸𑀤𑀸 𑀙𑀺𑀚𑁆𑀚𑀦𑁆𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂. 𑀢𑁆𑀯𑀁 𑀧𑀦, 𑀪𑀦𑁆𑀢𑁂, 𑀏𑀯𑀁 𑀯𑀼𑀢𑁆𑀢𑁂 𑀓𑀺𑀁 𑀯𑀤𑁂𑀬𑁆𑀬𑀸𑀲𑀻’’𑀢𑀺? 𑀣𑁂𑀭𑁄 𑀆𑀳 ‘‘𑀅𑀳𑀜𑁆𑀜𑁂𑀯 𑀔𑁄, 𑀫𑀳𑀸𑀭𑀸𑀚, 𑀤𑀳𑀭𑁄 𑀅𑀳𑁄𑀲𑀺𑀁 𑀢𑀭𑀼𑀡𑁄 𑀫𑀦𑁆𑀤𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄, 𑀅𑀳𑀜𑁆𑀜𑁂𑀯 𑀏𑀢𑀭𑀳𑀺 𑀫𑀳𑀦𑁆𑀢𑁄, 𑀇𑀫𑀫𑁂𑀯 𑀓𑀸𑀬𑀁 𑀦𑀺𑀲𑁆𑀲𑀸𑀬 𑀲𑀩𑁆𑀩𑁂 𑀢𑁂 𑀏𑀓𑀲𑀗𑁆𑀕𑀳𑀺𑀢𑀸’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀧𑀤𑀻𑀧𑀁 𑀧𑀤𑀻𑀧𑁂𑀬𑁆𑀬, 𑀓𑀺𑀁 𑀲𑁄 𑀲𑀩𑁆𑀩𑀭𑀢𑁆𑀢𑀺𑀁 𑀧𑀤𑀻𑀧𑁂𑀬𑁆𑀬𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀲𑀩𑁆𑀩𑀭𑀢𑁆𑀢𑀺𑀁 𑀧𑀤𑀻𑀧𑁂𑀬𑁆𑀬𑀸’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀬𑀸 𑀧𑀼𑀭𑀺𑀫𑁂 𑀬𑀸𑀫𑁂 𑀅𑀘𑁆𑀘𑀺, 𑀲𑀸 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀅𑀘𑁆𑀘𑀻’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀬𑀸 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀅𑀘𑁆𑀘𑀺, 𑀲𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀅𑀘𑁆𑀘𑀻’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀜𑁆𑀜𑁄 𑀲𑁄 𑀅𑀳𑁄𑀲𑀺 𑀧𑀼𑀭𑀺𑀫𑁂 𑀬𑀸𑀫𑁂 𑀧𑀤𑀻𑀧𑁄, 𑀅𑀜𑁆𑀜𑁄 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀧𑀤𑀻𑀧𑁄, 𑀅𑀜𑁆𑀜𑁄 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀧𑀤𑀻𑀧𑁄’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂, 𑀢𑀁 𑀬𑁂𑀯 𑀦𑀺𑀲𑁆𑀲𑀸𑀬 𑀲𑀩𑁆𑀩𑀭𑀢𑁆𑀢𑀺𑀁 𑀧𑀤𑀻𑀧𑀺𑀢𑁄’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀥𑀫𑁆𑀫𑀲𑀦𑁆𑀢𑀢𑀺 𑀲𑀦𑁆𑀤𑀳𑀢𑀺, 𑀅𑀜𑁆𑀜𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑁄 𑀦𑀺𑀭𑀼𑀚𑁆𑀛𑀢𑀺, 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀯𑀺𑀬 𑀲𑀦𑁆𑀤𑀳𑀢𑀺, 𑀢𑁂𑀦 𑀦 𑀘 𑀲𑁄, 𑀦 𑀘 𑀅𑀜𑁆𑀜𑁄, 𑀧𑀼𑀭𑀺𑀫𑀯𑀺𑀜𑁆𑀜𑀸𑀡𑁂 𑀧𑀘𑁆𑀙𑀺𑀫𑀯𑀺𑀜𑁆𑀜𑀸𑀡𑀁 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀔𑀻𑀭𑀁 𑀤𑀼𑀬𑁆𑀳𑀫𑀸𑀦𑀁 𑀓𑀸𑀮𑀦𑁆𑀢𑀭𑁂𑀦 𑀤𑀥𑀺 𑀧𑀭𑀺𑀯𑀢𑁆𑀢𑁂𑀬𑁆𑀬, 𑀤𑀥𑀺𑀢𑁄 𑀦𑀯𑀦𑀻𑀢𑀁, 𑀦𑀯𑀦𑀻𑀢𑀢𑁄 𑀖𑀢𑀁 𑀧𑀭𑀺𑀯𑀢𑁆𑀢𑁂𑀬𑁆𑀬, 𑀬𑁄 𑀦𑀼 𑀔𑁄, 𑀫𑀳𑀸𑀭𑀸𑀚, 𑀏𑀯𑀁 𑀯𑀤𑁂𑀬𑁆𑀬 ‘𑀬𑀁 𑀬𑁂𑀯 𑀔𑀻𑀭𑀁 𑀢𑀁 𑀬𑁂𑀯 𑀤𑀥𑀺, 𑀬𑀁 𑀬𑁂𑀯 𑀤𑀥𑀺 𑀢𑀁 𑀬𑁂𑀯 𑀦𑀯𑀦𑀻𑀢𑀁, 𑀬𑀁 𑀬𑁂𑀯 𑀦𑀯𑀦𑀻𑀢𑀁 𑀢𑀁 𑀬𑁂𑀯 𑀖𑀢’𑀦𑁆𑀢𑀺, 𑀲𑀫𑁆𑀫𑀸 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂, 𑀢𑀁𑀬𑁂𑀯 𑀦𑀺𑀲𑁆𑀲𑀸𑀬 𑀲𑀫𑁆𑀪𑀽𑀢’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀥𑀫𑁆𑀫𑀲𑀦𑁆𑀢𑀢𑀺 𑀲𑀦𑁆𑀤𑀳𑀢𑀺, 𑀅𑀜𑁆𑀜𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑁄 𑀦𑀺𑀭𑀼𑀚𑁆𑀛𑀢𑀺, 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀯𑀺𑀬 𑀲𑀦𑁆𑀤𑀳𑀢𑀺, 𑀢𑁂𑀦 𑀦 𑀘 𑀲𑁄, 𑀦 𑀘 𑀅𑀜𑁆𑀜𑁄, 𑀧𑀼𑀭𑀺𑀫𑀯𑀺𑀜𑁆𑀜𑀸𑀡𑁂 𑀧𑀘𑁆𑀙𑀺𑀫𑀯𑀺𑀜𑁆𑀜𑀸𑀡𑀁 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀥𑀫𑁆𑀫𑀲𑀦𑁆𑀢𑀢𑀺𑀧𑀜𑁆𑀳𑁄 𑀧𑀞𑀫𑁄.

𑁨. 𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄

𑁨. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀦 𑀧𑀝𑀺𑀲𑀦𑁆𑀤𑀳𑀢𑀺, 𑀚𑀸𑀦𑀸𑀢𑀺 𑀲𑁄 ‘𑀦 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀻’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀬𑁄 𑀦 𑀧𑀝𑀺𑀲𑀦𑁆𑀤𑀳𑀢𑀺, 𑀚𑀸𑀦𑀸𑀢𑀺 𑀲𑁄 ‘𑀦 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀻’𑀢𑀺. ‘‘𑀓𑀣𑀁, 𑀪𑀦𑁆𑀢𑁂, 𑀚𑀸𑀦𑀸𑀢𑀻’’𑀢𑀺? ‘‘𑀬𑁄 𑀳𑁂𑀢𑀼 𑀬𑁄 𑀧𑀘𑁆𑀘𑀬𑁄, 𑀫𑀳𑀸𑀭𑀸𑀚, 𑀧𑀝𑀺𑀲𑀦𑁆𑀤𑀳𑀦𑀸𑀬, 𑀢𑀲𑁆𑀲 𑀳𑁂𑀢𑀼𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀉𑀧𑀭𑀫𑀸 𑀚𑀸𑀦𑀸𑀢𑀺 𑀲𑁄 ‘𑀦 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀻’’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀲𑁆𑀲𑀓𑁄 𑀕𑀳𑀧𑀢𑀺𑀓𑁄 𑀓𑀲𑀺𑀢𑁆𑀯𑀸 𑀘 𑀯𑀧𑀺𑀢𑁆𑀯𑀸 𑀘 𑀥𑀜𑁆𑀜𑀸𑀕𑀸𑀭𑀁 𑀧𑀭𑀺𑀧𑀽𑀭𑁂𑀬𑁆𑀬. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀦𑁂𑀯 𑀓𑀲𑁆𑀲𑁂𑀬𑁆𑀬 𑀦 𑀯𑀧𑁆𑀧𑁂𑀬𑁆𑀬, 𑀬𑀣𑀸𑀲𑀫𑁆𑀪𑀢𑀜𑁆𑀘 𑀥𑀜𑁆𑀜𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬 𑀯𑀸 𑀯𑀺𑀲𑀚𑁆𑀚𑁂𑀬𑁆𑀬 𑀯𑀸 𑀬𑀣𑀸 𑀧𑀘𑁆𑀘𑀬𑀁 𑀯𑀸 𑀓𑀭𑁂𑀬𑁆𑀬, 𑀚𑀸𑀦𑁂𑀬𑁆𑀬 𑀲𑁄, 𑀫𑀳𑀸𑀭𑀸𑀚, 𑀓𑀲𑁆𑀲𑀓𑁄 𑀕𑀳𑀧𑀢𑀺𑀓𑁄 ‘𑀦 𑀫𑁂 𑀥𑀜𑁆𑀜𑀸𑀕𑀸𑀭𑀁 𑀧𑀭𑀺𑀧𑀽𑀭𑁂𑀲𑁆𑀲𑀢𑀻’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀚𑀸𑀦𑁂𑀬𑁆𑀬𑀸’’𑀢𑀺. ‘‘𑀓𑀣𑀁 𑀚𑀸𑀦𑁂𑀬𑁆𑀬𑀸’’𑀢𑀺? ‘‘𑀬𑁄 𑀳𑁂𑀢𑀼 𑀬𑁄 𑀧𑀘𑁆𑀘𑀬𑁄 𑀥𑀜𑁆𑀜𑀸𑀕𑀸𑀭𑀲𑁆𑀲 𑀧𑀭𑀺𑀧𑀽𑀭𑀡𑀸𑀬, 𑀢𑀲𑁆𑀲 𑀳𑁂𑀢𑀼𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀉𑀧𑀭𑀫𑀸 𑀚𑀸𑀦𑀸𑀢𑀺 ‘𑀦 𑀫𑁂 𑀥𑀜𑁆𑀜𑀸𑀕𑀸𑀭𑀁 𑀧𑀭𑀺𑀧𑀽𑀭𑁂𑀲𑁆𑀲𑀢𑀻’’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀳𑁂𑀢𑀼 𑀬𑁄 𑀧𑀘𑁆𑀘𑀬𑁄 𑀧𑀝𑀺𑀲𑀦𑁆𑀤𑀳𑀦𑀸𑀬, 𑀢𑀲𑁆𑀲 𑀳𑁂𑀢𑀼𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀉𑀧𑀭𑀫𑀸 𑀚𑀸𑀦𑀸𑀢𑀺 𑀲𑁄 ‘𑀦 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀻’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀜𑀸𑀡𑀧𑀜𑁆𑀜𑀸𑀧𑀜𑁆𑀳𑁄

𑁩. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀲𑁆𑀲 𑀜𑀸𑀡𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀧𑀜𑁆𑀜𑀸 𑀉𑀧𑁆𑀧𑀦𑁆𑀦𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀬𑀲𑁆𑀲 𑀜𑀸𑀡𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀧𑀜𑁆𑀜𑀸 𑀉𑀧𑁆𑀧𑀦𑁆𑀦𑀸’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂, 𑀬𑀜𑁆𑀜𑁂𑀯 𑀜𑀸𑀡𑀁 𑀲𑀸 𑀬𑁂𑀯 𑀧𑀜𑁆𑀜𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀬𑀜𑁆𑀜𑁂𑀯 𑀜𑀸𑀡𑀁 𑀲𑀸 𑀬𑁂𑀯 𑀧𑀜𑁆𑀜𑀸’’𑀢𑀺. ‘‘𑀬𑀲𑁆𑀲 𑀧𑀦, 𑀪𑀦𑁆𑀢𑁂, 𑀢𑀜𑁆𑀜𑁂𑀯 𑀜𑀸𑀡𑀁 𑀲𑀸 𑀬𑁂𑀯 𑀧𑀜𑁆𑀜𑀸 𑀉𑀧𑁆𑀧𑀦𑁆𑀦𑀸, 𑀓𑀺𑀁 𑀲𑀫𑁆𑀫𑀼𑀬𑁆𑀳𑁂𑀬𑁆𑀬 𑀲𑁄, 𑀉𑀤𑀸𑀳𑀼 𑀦 𑀲𑀫𑁆𑀫𑀼𑀬𑁆𑀳𑁂𑀬𑁆𑀬𑀸’’𑀢𑀺? ‘‘𑀓𑀢𑁆𑀣𑀘𑀺, 𑀫𑀳𑀸𑀭𑀸𑀚, 𑀲𑀫𑁆𑀫𑀼𑀬𑁆𑀳𑁂𑀬𑁆𑀬, 𑀓𑀢𑁆𑀣𑀘𑀺 𑀦 𑀲𑀫𑁆𑀫𑀼𑀬𑁆𑀳𑁂𑀬𑁆𑀬𑀸’’𑀢𑀺. ‘‘𑀓𑀼𑀳𑀺𑀁, 𑀪𑀦𑁆𑀢𑁂, 𑀲𑀫𑁆𑀫𑀼𑀬𑁆𑀳𑁂𑀬𑁆𑀬𑀸’’𑀢𑀺? ‘‘𑀅𑀜𑁆𑀜𑀸𑀢𑀧𑀼𑀩𑁆𑀩𑁂𑀲𑀼 𑀯𑀸, 𑀫𑀳𑀸𑀭𑀸𑀚, 𑀲𑀺𑀧𑁆𑀧𑀝𑁆𑀞𑀸𑀦𑁂𑀲𑀼, 𑀅𑀕𑀢𑀧𑀼𑀩𑁆𑀩𑀸𑀬 𑀯𑀸 𑀤𑀺𑀲𑀸𑀬, 𑀅𑀲𑁆𑀲𑀼𑀢𑀧𑀼𑀩𑁆𑀩𑀸𑀬 𑀯𑀸 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀲𑀫𑁆𑀫𑀼𑀬𑁆𑀳𑁂𑀬𑁆𑀬𑀸’’𑀢𑀺. ‘‘𑀓𑀼𑀳𑀺𑀁 𑀦 𑀲𑀫𑁆𑀫𑀼𑀬𑁆𑀳𑁂𑀬𑁆𑀬𑀸’’𑀢𑀺? ‘‘𑀬𑀁 𑀔𑁄 𑀧𑀦, 𑀫𑀳𑀸𑀭𑀸𑀚, 𑀢𑀸𑀬 𑀧𑀜𑁆𑀜𑀸𑀬 𑀓𑀢𑀁 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸, 𑀢𑀳𑀺𑀁 𑀦 𑀲𑀫𑁆𑀫𑀼𑀬𑁆𑀳𑁂𑀬𑁆𑀬𑀸’’𑀢𑀺. ‘‘𑀫𑁄𑀳𑁄 𑀧𑀦𑀲𑁆𑀲, 𑀪𑀦𑁆𑀢𑁂, 𑀓𑀼𑀳𑀺𑀁 𑀕𑀘𑁆𑀙𑀢𑀻’’𑀢𑀺? ‘‘𑀫𑁄𑀳𑁄 𑀔𑁄, 𑀫𑀳𑀸𑀭𑀸𑀚, 𑀜𑀸𑀡𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀻’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀅𑀦𑁆𑀥𑀓𑀸𑀭𑀕𑁂𑀳𑁂 𑀧𑀤𑀻𑀧𑀁 𑀆𑀭𑁄𑀧𑁂𑀬𑁆𑀬, 𑀢𑀢𑁄 𑀅𑀦𑁆𑀥𑀓𑀸𑀭𑁄 𑀦𑀺𑀭𑀼𑀚𑁆𑀛𑁂𑀬𑁆𑀬, 𑀆𑀮𑁄𑀓𑁄 𑀧𑀸𑀢𑀼𑀪𑀯𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀜𑀸𑀡𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀫𑁄𑀳𑁄 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀻’’𑀢𑀺.

‘‘𑀧𑀜𑁆𑀜𑀸 𑀧𑀦, 𑀪𑀦𑁆𑀢𑁂, 𑀓𑀼𑀳𑀺𑀁 𑀕𑀘𑁆𑀙𑀢𑀻’’𑀢𑀺? ‘‘𑀧𑀜𑁆𑀜𑀸𑀧𑀺 𑀔𑁄, 𑀫𑀳𑀸𑀭𑀸𑀚, 𑀲𑀓𑀺𑀘𑁆𑀘𑀬𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀬𑀁 𑀧𑀦 𑀢𑀸𑀬 𑀧𑀜𑁆𑀜𑀸𑀬 𑀓𑀢𑀁 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸, 𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀧𑀦𑁂𑀢𑀁 𑀩𑁆𑀭𑀽𑀲𑀺 ‘𑀧𑀜𑁆𑀜𑀸 𑀲𑀓𑀺𑀘𑁆𑀘𑀬𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀬𑀁 𑀧𑀦 𑀢𑀸𑀬 𑀧𑀜𑁆𑀜𑀸𑀬 𑀓𑀢𑀁 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸, 𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻’𑀢𑀺, 𑀢𑀲𑁆𑀲 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀧𑀼𑀭𑀺𑀲𑁄 𑀭𑀢𑁆𑀢𑀺𑀁 𑀮𑁂𑀔𑀁 𑀧𑁂𑀲𑁂𑀢𑀼𑀓𑀸𑀫𑁄 𑀮𑁂𑀔𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀤𑀻𑀧𑀁 𑀆𑀭𑁄𑀧𑁂𑀢𑁆𑀯𑀸 𑀮𑁂𑀔𑀁 𑀮𑀺𑀔𑀸𑀧𑁂𑀬𑁆𑀬, 𑀮𑀺𑀔𑀺𑀢𑁂 𑀧𑀦 𑀮𑁂𑀔𑁂 𑀧𑀤𑀻𑀧𑀁 𑀯𑀺𑀚𑁆𑀛𑀸𑀧𑁂𑀬𑁆𑀬, 𑀯𑀺𑀚𑁆𑀛𑀸𑀧𑀺𑀢𑁂𑀧𑀺 𑀧𑀤𑀻𑀧𑁂 𑀮𑁂𑀔𑀁 𑀦 𑀯𑀺𑀦𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀜𑀸 𑀲𑀓𑀺𑀘𑁆𑀘𑀬𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀬𑀁 𑀧𑀦 𑀢𑀸𑀬 𑀧𑀜𑁆𑀜𑀸𑀬 𑀓𑀢𑀁 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸, 𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀢𑁆𑀣𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀫𑀦𑀼𑀲𑁆𑀲𑀸 𑀅𑀦𑀼𑀖𑀭𑀁 𑀧𑀜𑁆𑀘 𑀧𑀜𑁆𑀘 𑀉𑀤𑀓𑀖𑀝𑀓𑀸𑀦𑀺 𑀞𑀧𑁂𑀦𑁆𑀢𑀺 𑀆𑀮𑀺𑀫𑁆𑀧𑀦𑀁 𑀯𑀺𑀚𑁆𑀛𑀸𑀧𑁂𑀢𑀼𑀁, 𑀖𑀭𑁂 𑀧𑀤𑀺𑀢𑁆𑀢𑁂 𑀢𑀸𑀦𑀺 𑀧𑀜𑁆𑀘 𑀉𑀤𑀓𑀖𑀝𑀓𑀸𑀦𑀺 𑀖𑀭𑀲𑁆𑀲𑀽𑀧𑀭𑀺 𑀔𑀺𑀧𑀦𑁆𑀢𑀺, 𑀢𑀢𑁄 𑀅𑀕𑁆𑀕𑀺 𑀯𑀺𑀚𑁆𑀛𑀸𑀬𑀢𑀺, 𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀏𑀯𑀁 𑀳𑁄𑀢𑀺 ‘𑀧𑀼𑀦 𑀢𑁂𑀳𑀺 𑀖𑀝𑁂𑀳𑀺 𑀖𑀝𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀸’’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀅𑀮𑀁 𑀢𑁂𑀳𑀺 𑀖𑀝𑁂𑀳𑀺, 𑀓𑀺𑀁 𑀢𑁂𑀳𑀺 𑀖𑀝𑁂𑀳𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀜𑁆𑀘 𑀉𑀤𑀓𑀖𑀝𑀓𑀸𑀦𑀺, 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀬𑀣𑀸 𑀢𑁂 𑀫𑀦𑀼𑀲𑁆𑀲𑀸, 𑀏𑀯𑀁 𑀬𑁄𑀕𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀅𑀕𑁆𑀕𑀺, 𑀏𑀯𑀁 𑀓𑀺𑀮𑁂𑀲𑀸 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀧𑀜𑁆𑀘𑀳𑀺 𑀉𑀤𑀓𑀖𑀝𑀓𑁂𑀳𑀺 𑀅𑀕𑁆𑀕𑀺 𑀯𑀺𑀚𑁆𑀛𑀸𑀧𑀻𑀬𑀢𑀺, 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑁂𑀳𑀺 𑀓𑀺𑀮𑁂𑀲𑀸 𑀯𑀺𑀚𑁆𑀛𑀸𑀧𑀺𑀬𑀦𑁆𑀢𑀺, 𑀯𑀺𑀚𑁆𑀛𑀸𑀧𑀺𑀢𑀸𑀧𑀺 𑀓𑀺𑀮𑁂𑀲𑀸 𑀦 𑀧𑀼𑀦 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀜𑀸 𑀲𑀓𑀺𑀘𑁆𑀘𑀬𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀬𑀁 𑀧𑀦 𑀢𑀸𑀬 𑀧𑀜𑁆𑀜𑀸𑀬 𑀓𑀢𑀁 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸, 𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀯𑁂𑀚𑁆𑀚𑁄 𑀧𑀜𑁆𑀘𑀫𑀽𑀮𑀪𑁂𑀲𑀚𑁆𑀚𑀸𑀦𑀺 𑀕𑀳𑁂𑀢𑁆𑀯𑀸 𑀕𑀺𑀮𑀸𑀦𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀸𑀦𑀺 𑀧𑀜𑁆𑀘𑀫𑀽𑀮𑀪𑁂𑀲𑀚𑁆𑀚𑀸𑀦𑀺 𑀧𑀺𑀲𑀺𑀢𑁆𑀯𑀸 [𑀧𑀺𑀁𑀲𑀺𑀢𑁆𑀯𑀸 (𑀲𑀻. 𑀧𑀻.)] 𑀕𑀺𑀮𑀸𑀦𑀓𑀁 𑀧𑀸𑀬𑁂𑀬𑁆𑀬, 𑀢𑁂𑀳𑀺 𑀘 𑀤𑁄𑀲𑀸 𑀦𑀺𑀤𑁆𑀥𑀫𑁂𑀬𑁆𑀬𑀼𑀁, 𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀲𑁆𑀲 𑀯𑁂𑀚𑁆𑀚𑀲𑁆𑀲 𑀏𑀯𑀁 𑀳𑁄𑀢𑀺 ‘𑀧𑀼𑀦 𑀢𑁂𑀳𑀺 𑀧𑀜𑁆𑀘𑀫𑀽𑀮𑀪𑁂𑀲𑀚𑁆𑀚𑁂𑀳𑀺 𑀪𑁂𑀲𑀚𑁆𑀚𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀻’’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀅𑀮𑀁 𑀢𑁂𑀳𑀺 𑀧𑀜𑁆𑀘𑀫𑀽𑀮𑀪𑁂𑀲𑀚𑁆𑀚𑁂𑀳𑀺, 𑀓𑀺𑀁 𑀢𑁂𑀳𑀺 𑀧𑀜𑁆𑀘𑀫𑀽𑀮𑀪𑁂𑀲𑀚𑁆𑀚𑁂𑀳𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀜𑁆𑀘𑀫𑀽𑀮𑀪𑁂𑀲𑀚𑁆𑀚𑀸𑀦𑀺, 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀬𑀣𑀸 𑀯𑁂𑀚𑁆𑀚𑁄, 𑀏𑀯𑀁 𑀬𑁄𑀕𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀩𑁆𑀬𑀸𑀥𑀺, 𑀏𑀯𑀁 𑀓𑀺𑀮𑁂𑀲𑀸 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀩𑁆𑀬𑀸𑀥𑀺𑀢𑁄 𑀧𑀼𑀭𑀺𑀲𑁄, 𑀏𑀯𑀁 𑀧𑀼𑀣𑀼𑀚𑁆𑀚𑀦𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀧𑀜𑁆𑀘𑀫𑀽𑀮𑀪𑁂𑀲𑀚𑁆𑀚𑁂𑀳𑀺 𑀕𑀺𑀮𑀸𑀦𑀲𑁆𑀲 𑀤𑁄𑀲𑀸 𑀦𑀺𑀤𑁆𑀥𑀦𑁆𑀢𑀸, 𑀤𑁄𑀲𑁂 𑀦𑀺𑀤𑁆𑀥𑀦𑁆𑀢𑁂 𑀕𑀺𑀮𑀸𑀦𑁄 𑀅𑀭𑁄𑀕𑁄 𑀳𑁄𑀢𑀺, 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑁂𑀳𑀺 𑀓𑀺𑀮𑁂𑀲𑀸 𑀦𑀺𑀤𑁆𑀥𑀫𑀻𑀬𑀦𑁆𑀢𑀺, 𑀦𑀺𑀤𑁆𑀥𑀫𑀺𑀢𑀸 𑀘 𑀓𑀺𑀮𑁂𑀲𑀸 𑀦 𑀧𑀼𑀦 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀜𑀸 𑀲𑀓𑀺𑀘𑁆𑀘𑀬𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀬𑀁 𑀧𑀦 𑀢𑀸𑀬 𑀧𑀜𑁆𑀜𑀸𑀬 𑀓𑀢𑀁 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸, 𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀲𑀗𑁆𑀕𑀸𑀫𑀸𑀯𑀘𑀭𑁄 𑀬𑁄𑀥𑁄 𑀧𑀜𑁆𑀘 𑀓𑀡𑁆𑀟𑀸𑀦𑀺 𑀕𑀳𑁂𑀢𑁆𑀯𑀸 𑀲𑀗𑁆𑀕𑀸𑀫𑀁 𑀑𑀢𑀭𑁂𑀬𑁆𑀬 𑀧𑀭𑀲𑁂𑀦𑀁 𑀯𑀺𑀚𑁂𑀢𑀼𑀁, 𑀲𑁄 𑀲𑀗𑁆𑀕𑀸𑀫𑀕𑀢𑁄 𑀢𑀸𑀦𑀺 𑀧𑀜𑁆𑀘 𑀓𑀡𑁆𑀟𑀸𑀦𑀺 𑀔𑀺𑀧𑁂𑀬𑁆𑀬, 𑀢𑁂𑀳𑀺 𑀘 𑀧𑀭𑀲𑁂𑀦𑀸 𑀪𑀺𑀚𑁆𑀚𑁂𑀬𑁆𑀬, 𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀲𑁆𑀲 𑀲𑀗𑁆𑀕𑀸𑀫𑀸𑀯𑀘𑀭𑀲𑁆𑀲 𑀬𑁄𑀥𑀲𑁆𑀲 𑀏𑀯𑀁 𑀳𑁄𑀢𑀺 ‘𑀧𑀼𑀦 𑀢𑁂𑀳𑀺 𑀓𑀡𑁆𑀟𑁂𑀳𑀺 𑀓𑀡𑁆𑀟𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀻’’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀅𑀮𑀁 𑀢𑁂𑀳𑀺 𑀓𑀡𑁆𑀟𑁂𑀳𑀺, 𑀓𑀺𑀁 𑀢𑁂𑀳𑀺 𑀓𑀡𑁆𑀟𑁂𑀳𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀜𑁆𑀘 𑀓𑀡𑁆𑀟𑀸𑀦𑀺, 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀬𑀣𑀸, 𑀫𑀳𑀸𑀭𑀸𑀚, 𑀲𑀗𑁆𑀕𑀸𑀫𑀸𑀯𑀘𑀭𑁄 𑀬𑁄𑀥𑁄, 𑀏𑀯𑀁 𑀬𑁄𑀕𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀧𑀭𑀲𑁂𑀦𑀸, 𑀏𑀯𑀁 𑀓𑀺𑀮𑁂𑀲𑀸 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀧𑀜𑁆𑀘𑀳𑀺 𑀓𑀡𑁆𑀟𑁂𑀳𑀺 𑀧𑀭𑀲𑁂𑀦𑀸 𑀪𑀺𑀚𑁆𑀚𑀢𑀺, 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑁂𑀳𑀺 𑀓𑀺𑀮𑁂𑀲𑀸 𑀪𑀺𑀚𑁆𑀚𑀦𑁆𑀢𑀺, 𑀪𑀕𑁆𑀕𑀸 𑀘 𑀓𑀺𑀮𑁂𑀲𑀸 𑀦 𑀧𑀼𑀦 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀜𑀸 𑀲𑀓𑀺𑀘𑁆𑀘𑀬𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀬𑀁 𑀧𑀦 𑀢𑀸𑀬 𑀧𑀜𑁆𑀜𑀸𑀬 𑀓𑀢𑀁 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸, 𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀜𑀸𑀡𑀧𑀜𑁆𑀜𑀸𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀧𑀝𑀺𑀲𑀦𑁆𑀤𑀳𑀦𑀧𑀼𑀕𑁆𑀕𑀮𑀯𑁂𑀤𑀺𑀬𑀦𑀧𑀜𑁆𑀳𑁄

𑁪. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀦 𑀧𑀝𑀺𑀲𑀦𑁆𑀤𑀳𑀢𑀺, 𑀯𑁂𑀤𑁂𑀢𑀺 𑀲𑁄 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀯𑁂𑀤𑀦’’𑀦𑁆𑀢𑀺? 𑀣𑁂𑀭𑁄 𑀆𑀳 ‘‘𑀓𑀺𑀜𑁆𑀘𑀺 𑀯𑁂𑀤𑁂𑀢𑀺, 𑀓𑀺𑀜𑁆𑀘𑀺 𑀦 𑀯𑁂𑀤𑁂𑀢𑀻’’𑀢𑀺. ‘‘𑀓𑀺𑀁 𑀯𑁂𑀤𑁂𑀢𑀺, 𑀓𑀺𑀁 𑀦 𑀯𑁂𑀤𑁂𑀢𑀻’’𑀢𑀺? ‘‘𑀓𑀸𑀬𑀺𑀓𑀁, 𑀫𑀳𑀸𑀭𑀸𑀚, 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀘𑁂𑀢𑀲𑀺𑀓𑀁 𑀯𑁂𑀤𑀦𑀁 𑀦 𑀯𑁂𑀤𑁂𑀢𑀻’’𑀢𑀺. ‘‘𑀓𑀣𑀁, 𑀪𑀦𑁆𑀢𑁂, 𑀓𑀸𑀬𑀺𑀓𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀓𑀣𑀁 𑀘𑁂𑀢𑀲𑀺𑀓𑀁 𑀯𑁂𑀤𑀦𑀁 𑀦 𑀯𑁂𑀤𑁂𑀢𑀻’’𑀢𑀺? ‘‘𑀬𑁄 𑀳𑁂𑀢𑀼 𑀬𑁄 𑀧𑀘𑁆𑀘𑀬𑁄 𑀓𑀸𑀬𑀺𑀓𑀸𑀬 𑀤𑀼𑀓𑁆𑀔𑀯𑁂𑀤𑀦𑀸𑀬 𑀉𑀧𑁆𑀧𑀢𑁆𑀢𑀺𑀬𑀸, 𑀢𑀲𑁆𑀲 𑀳𑁂𑀢𑀼𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀅𑀦𑀼𑀧𑀭𑀫𑀸 𑀓𑀸𑀬𑀺𑀓𑀁 𑀤𑀼𑀓𑁆𑀔𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀬𑁄 𑀳𑁂𑀢𑀼 𑀬𑁄 𑀧𑀘𑁆𑀘𑀬𑁄 𑀘𑁂𑀢𑀲𑀺𑀓𑀸𑀬 𑀤𑀼𑀓𑁆𑀔𑀯𑁂𑀤𑀦𑀸𑀬 𑀉𑀧𑁆𑀧𑀢𑁆𑀢𑀺𑀬𑀸, 𑀢𑀲𑁆𑀲 𑀳𑁂𑀢𑀼𑀲𑁆𑀲 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀉𑀧𑀭𑀫𑀸 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀯𑁂𑀤𑀦𑀁 𑀦 𑀯𑁂𑀤𑁂𑀢𑀺. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑁋 ‘𑀲𑁄 𑀏𑀓𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺 𑀓𑀸𑀬𑀺𑀓𑀁 𑀦 𑀘𑁂𑀢𑀲𑀺𑀓’’’𑀦𑁆𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀓𑀲𑁆𑀫𑀸 𑀲𑁄 𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀻’’𑀢𑀺? ‘‘𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀅𑀭𑀳𑀢𑁄 𑀅𑀦𑀼𑀦𑀬𑁄 𑀯𑀸 𑀧𑀝𑀺𑀖𑁄 𑀯𑀸, 𑀦 𑀘 𑀅𑀭𑀳𑀦𑁆𑀢𑁄 𑀅𑀧𑀓𑁆𑀓𑀁 𑀧𑀸𑀢𑁂𑀦𑁆𑀢𑀺 𑀧𑀭𑀺𑀧𑀸𑀓𑀁 𑀆𑀕𑀫𑁂𑀦𑁆𑀢𑀺 𑀧𑀡𑁆𑀟𑀺𑀢𑀸. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀦𑀦𑁆𑀤𑀸𑀫𑀺 𑀚𑀻𑀯𑀺𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀦𑀺𑀩𑁆𑀩𑀺𑀲𑀁 𑀪𑀢𑀓𑁄 𑀬𑀣𑀸.

‘‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀦𑀦𑁆𑀤𑀸𑀫𑀺 𑀚𑀻𑀯𑀺𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄’’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺 [𑀧𑀲𑁆𑀲 𑀣𑁂𑀭𑀕𑀸. 𑁬𑁫𑁪].

𑀧𑀝𑀺𑀲𑀦𑁆𑀤𑀳𑀦𑀧𑀼𑀕𑁆𑀕𑀮𑀯𑁂𑀤𑀺𑀬𑀦𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀯𑁂𑀤𑀦𑀸𑀧𑀜𑁆𑀳𑁄

𑁫. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀼𑀔𑀸 𑀯𑁂𑀤𑀦𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸 𑀅𑀩𑁆𑀬𑀸𑀓𑀢𑀸 𑀯𑀸’’𑀢𑀺? ‘‘𑀲𑀺𑀬𑀸, 𑀫𑀳𑀸𑀭𑀸𑀚, 𑀓𑀼𑀲𑀮𑀸, 𑀲𑀺𑀬𑀸 𑀅𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸’’𑀢𑀺. ‘‘𑀬𑀤𑀺, 𑀪𑀦𑁆𑀢𑁂, 𑀓𑀼𑀲𑀮𑀸 𑀦 𑀤𑀼𑀓𑁆𑀔𑀸, 𑀬𑀤𑀺 𑀤𑀼𑀓𑁆𑀔𑀸 𑀦 𑀓𑀼𑀲𑀮𑀸, 𑀓𑀼𑀲𑀮𑀁 𑀤𑀼𑀓𑁆𑀔𑀦𑁆𑀢𑀺 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀇𑀥 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑁂 𑀢𑀢𑁆𑀢𑀁 𑀅𑀬𑁄𑀕𑀼𑀴𑀁 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀤𑀼𑀢𑀺𑀬𑁂 𑀳𑀢𑁆𑀣𑁂 𑀲𑀻𑀢𑀁 𑀳𑀺𑀫𑀧𑀺𑀡𑁆𑀟𑀁 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀉𑀪𑁄𑀧𑀺 𑀢𑁂 𑀤𑀳𑁂𑀬𑁆𑀬𑀼’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂, 𑀉𑀪𑁄𑀧𑀺 𑀢𑁂 𑀤𑀳𑁂𑀬𑁆𑀬𑀼’’𑀦𑁆𑀢𑀺. ‘‘𑀓𑀺𑀁 𑀦𑀼 𑀔𑁄, 𑀢𑁂 𑀫𑀳𑀸𑀭𑀸𑀚, 𑀉𑀪𑁄𑀧𑀺 𑀉𑀡𑁆𑀳𑀸’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦 𑀢𑁂, 𑀫𑀳𑀸𑀭𑀸𑀚, 𑀉𑀪𑁄𑀧𑀺 𑀲𑀻𑀢𑀮𑀸’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀆𑀚𑀸𑀦𑀸𑀳𑀺 𑀦𑀺𑀕𑁆𑀕𑀳𑀁 𑀬𑀤𑀺 𑀢𑀢𑁆𑀢𑀁 𑀤𑀳𑀢𑀺, 𑀦 𑀘 𑀢𑁂 𑀉𑀪𑁄𑀧𑀺 𑀉𑀡𑁆𑀳𑀸, 𑀢𑁂𑀦 𑀦𑀼𑀧𑁆𑀧𑀚𑁆𑀚𑀢𑀺. 𑀬𑀤𑀺 𑀲𑀻𑀢𑀮𑀁 𑀤𑀳𑀢𑀺, 𑀦 𑀘 𑀢𑁂 𑀉𑀪𑁄𑀧𑀺 𑀲𑀻𑀢𑀮𑀸, 𑀢𑁂𑀦 𑀦𑀼𑀧𑁆𑀧𑀚𑁆𑀚𑀢𑀺. 𑀓𑀺𑀲𑁆𑀲 𑀧𑀦 𑀢𑁂, 𑀫𑀳𑀸𑀭𑀸𑀚, 𑀉𑀪𑁄𑀧𑀺 𑀤𑀳𑀦𑁆𑀢𑀺, 𑀦 𑀘 𑀢𑁂 𑀉𑀪𑁄𑀧𑀺 𑀉𑀡𑁆𑀳𑀸, 𑀦 𑀘 𑀢𑁂 𑀉𑀪𑁄𑀧𑀺 𑀲𑀻𑀢𑀮𑀸? 𑀏𑀓𑀁 𑀉𑀡𑁆𑀳𑀁, 𑀏𑀓𑀁 𑀲𑀻𑀢𑀮𑀁, 𑀉𑀪𑁄𑀧𑀺 𑀢𑁂 𑀤𑀳𑀦𑁆𑀢𑀺, 𑀢𑁂𑀦 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺. ‘‘𑀦𑀸𑀳𑀁 𑀧𑀝𑀺𑀩𑀮𑁄 𑀢𑀬𑀸 𑀯𑀸𑀤𑀺𑀦𑀸 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀁, 𑀲𑀸𑀥𑀼 𑀅𑀢𑁆𑀣𑀁 𑀚𑀧𑁆𑀧𑁂𑀳𑀻’’𑀢𑀺. 𑀢𑀢𑁄 𑀣𑁂𑀭𑁄 𑀅𑀪𑀺𑀥𑀫𑁆𑀫𑀲𑀁𑀬𑀼𑀢𑁆𑀢𑀸𑀬 𑀓𑀣𑀸𑀬 𑀭𑀸𑀚𑀸𑀦𑀁 𑀫𑀺𑀮𑀺𑀦𑁆𑀤𑀁 𑀲𑀜𑁆𑀜𑀸𑀧𑁂𑀲𑀺 𑁋

‘‘𑀙𑀬𑀺𑀫𑀸𑀦𑀺, 𑀫𑀳𑀸𑀭𑀸𑀚, 𑀕𑁂𑀳𑀦𑀺𑀲𑁆𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺, 𑀙 𑀦𑁂𑀓𑁆𑀔𑀫𑁆𑀫𑀦𑀺𑀲𑁆𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺, 𑀙 𑀕𑁂𑀳𑀦𑀺𑀲𑁆𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺, 𑀙 𑀦𑁂𑀓𑁆𑀔𑀫𑁆𑀫𑀦𑀺𑀲𑁆𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺, 𑀙 𑀕𑁂𑀳𑀦𑀺𑀲𑁆𑀲𑀺𑀢𑀸 𑀉𑀧𑁂𑀓𑁆𑀔𑀸, 𑀙 𑀦𑁂𑀓𑁆𑀔𑀫𑁆𑀫𑀦𑀺𑀲𑁆𑀲𑀺𑀢𑀸 𑀉𑀧𑁂𑀓𑁆𑀔𑀸𑀢𑀺, 𑀇𑀫𑀸𑀦𑀺 𑀙 𑀙𑀓𑁆𑀓𑀸𑀦𑀺, 𑀅𑀢𑀻𑀢𑀸𑀧𑀺 𑀙𑀢𑁆𑀢𑀺𑀁𑀲𑀯𑀺𑀥𑀸 𑀯𑁂𑀤𑀦𑀸, 𑀅𑀦𑀸𑀕𑀢𑀸𑀧𑀺 𑀙𑀢𑁆𑀢𑀺𑀁𑀲𑀯𑀺𑀥𑀸 𑀯𑁂𑀤𑀦𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀧𑀺 𑀙𑀢𑁆𑀢𑀺𑀁𑀲𑀯𑀺𑀥𑀸 𑀯𑁂𑀤𑀦𑀸, 𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀜𑁆𑀜𑀼𑀳𑀺𑀢𑁆𑀯𑀸 𑀅𑀪𑀺𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀅𑀝𑁆𑀞𑀲𑀢𑀁 𑀯𑁂𑀤𑀦𑀸 𑀳𑁄𑀦𑁆𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀯𑁂𑀤𑀦𑀸𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀦𑀸𑀫𑀭𑀽𑀧𑀏𑀓𑀢𑁆𑀢𑀦𑀸𑀦𑀢𑁆𑀢𑀧𑀜𑁆𑀳𑁄

𑁬. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁄 𑀧𑀝𑀺𑀲𑀦𑁆𑀤𑀳𑀢𑀻’’𑀢𑀺? 𑀣𑁂𑀭𑁄 𑀆𑀳 ‘‘𑀦𑀸𑀫𑀭𑀽𑀧𑀁 𑀔𑁄, 𑀫𑀳𑀸𑀭𑀸𑀚, 𑀧𑀝𑀺𑀲𑀦𑁆𑀤𑀳𑀢𑀻’’𑀢𑀺. ‘‘𑀓𑀺𑀁 𑀇𑀫𑀁 𑀬𑁂𑀯 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀤𑀳𑀢𑀻’’𑀢𑀺? ‘‘𑀦 𑀔𑁄, 𑀫𑀳𑀸𑀭𑀸𑀚, 𑀇𑀫𑀁 𑀬𑁂𑀯 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀤𑀳𑀢𑀺, 𑀇𑀫𑀺𑀦𑀸 𑀧𑀦, 𑀫𑀳𑀸𑀭𑀸𑀚, 𑀦𑀸𑀫𑀭𑀽𑀧𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄𑀪𑀦𑀁 𑀯𑀸 𑀧𑀸𑀧𑀓𑀁 𑀯𑀸, 𑀢𑁂𑀦 𑀓𑀫𑁆𑀫𑁂𑀦 𑀅𑀜𑁆𑀜𑀁 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀤𑀳𑀢𑀻’’𑀢𑀺. ‘‘𑀬𑀤𑀺, 𑀪𑀦𑁆𑀢𑁂, 𑀦 𑀇𑀫𑀁 𑀬𑁂𑀯 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀤𑀳𑀢𑀺, 𑀦𑀦𑀼 𑀲𑁄 𑀫𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀺 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺? 𑀣𑁂𑀭𑁄 𑀆𑀳 ‘‘𑀬𑀤𑀺 𑀦 𑀧𑀝𑀺𑀲𑀦𑁆𑀤𑀳𑁂𑀬𑁆𑀬, 𑀫𑀼𑀢𑁆𑀢𑁄 𑀪𑀯𑁂𑀬𑁆𑀬 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀺. 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀭𑀸𑀚, 𑀧𑀝𑀺𑀲𑀦𑁆𑀤𑀳𑀢𑀺, 𑀢𑀲𑁆𑀫𑀸 𑀦 𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀅𑀜𑁆𑀜𑀢𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀫𑁆𑀩𑀁 𑀅𑀯𑀳𑀭𑁂𑀬𑁆𑀬, 𑀢𑀫𑁂𑀦𑀁 𑀅𑀫𑁆𑀩𑀲𑀸𑀫𑀺𑀓𑁄 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀬𑁆𑀬 ‘𑀇𑀫𑀺𑀦𑀸 𑀤𑁂𑀯 𑀧𑀼𑀭𑀺𑀲𑁂𑀦 𑀫𑀬𑁆𑀳𑀁 𑀅𑀫𑁆𑀩𑀸 𑀅𑀯𑀳𑀝𑀸’𑀢𑀺, 𑀲𑁄 𑀏𑀯𑀁 𑀯𑀤𑁂𑀬𑁆𑀬 ‘𑀦𑀸𑀳𑀁, 𑀤𑁂𑀯, 𑀇𑀫𑀲𑁆𑀲 𑀅𑀫𑁆𑀩𑁂 𑀅𑀯𑀳𑀭𑀸𑀫𑀺, 𑀅𑀜𑁆𑀜𑁂 𑀢𑁂 𑀅𑀫𑁆𑀩𑀸, 𑀬𑁂 𑀇𑀫𑀺𑀦𑀸 𑀭𑁄𑀧𑀺𑀢𑀸, 𑀅𑀜𑁆𑀜𑁂 𑀢𑁂 𑀅𑀫𑁆𑀩𑀸, 𑀬𑁂 𑀫𑀬𑀸 𑀅𑀯𑀳𑀝𑀸, 𑀦𑀸𑀳𑀁 𑀤𑀡𑁆𑀟𑀧𑁆𑀧𑀢𑁆𑀢𑁄’𑀢𑀺. 𑀓𑀺𑀁 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺? ‘‘𑀓𑀺𑀜𑁆𑀘𑀸𑀧𑀺 𑀲𑁄 𑀏𑀯𑀁 𑀯𑀤𑁂𑀬𑁆𑀬, 𑀧𑀼𑀭𑀺𑀫𑀁, 𑀪𑀦𑁆𑀢𑁂, 𑀅𑀫𑁆𑀩𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀧𑀘𑁆𑀙𑀺𑀫𑁂𑀦 𑀅𑀫𑁆𑀩𑁂𑀦 𑀲𑁄 𑀧𑀼𑀭𑀺𑀲𑁄 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀫𑀺𑀦𑀸 𑀦𑀸𑀫𑀭𑀽𑀧𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄𑀪𑀦𑀁 𑀯𑀸 𑀧𑀸𑀧𑀓𑀁 𑀯𑀸, 𑀢𑁂𑀦 𑀓𑀫𑁆𑀫𑁂𑀦 𑀅𑀜𑁆𑀜𑀁 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀤𑀳𑀢𑀺, 𑀢𑀲𑁆𑀫𑀸 𑀦 𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀅𑀜𑁆𑀜𑀢𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀸𑀮𑀺𑀁 𑀅𑀯𑀳𑀭𑁂𑀬𑁆𑀬…𑀧𑁂… 𑀉𑀘𑁆𑀙𑀼𑀁 𑀅𑀯𑀳𑀭𑁂𑀬𑁆𑀬…𑀧𑁂… 𑀬𑀣𑀸 𑀫𑀳𑀸𑀭𑀸𑀚 𑀓𑁄𑀘𑀺 𑀧𑀼𑀭𑀺𑀲𑁄 𑀳𑁂𑀫𑀦𑁆𑀢𑀓𑀸𑀮𑁂 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀯𑀺𑀲𑀺𑀩𑁆𑀩𑁂𑀢𑁆𑀯𑀸 [𑀯𑀺𑀲𑀻𑀯𑁂𑀢𑁆𑀯𑀸 (𑀲𑀻. 𑀧𑀻.)] 𑀅𑀯𑀺𑀚𑁆𑀛𑀸𑀧𑁂𑀢𑁆𑀯𑀸 𑀧𑀓𑁆𑀓𑀫𑁂𑀬𑁆𑀬, 𑀅𑀣 𑀔𑁄 𑀲𑁄 𑀅𑀕𑁆𑀕𑀺 𑀅𑀜𑁆𑀜𑀢𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀔𑁂𑀢𑁆𑀢𑀁 𑀟𑀳𑁂𑀬𑁆𑀬 [𑀉𑀧𑀟𑀳𑁂𑀬𑁆𑀬 (𑀓.)], 𑀢𑀫𑁂𑀦𑀁 𑀔𑁂𑀢𑁆𑀢𑀲𑀸𑀫𑀺𑀓𑁄 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀬𑁆𑀬 ‘𑀇𑀫𑀺𑀦𑀸, 𑀤𑁂𑀯, 𑀧𑀼𑀭𑀺𑀲𑁂𑀦 𑀫𑀬𑁆𑀳𑀁 𑀔𑁂𑀢𑁆𑀢𑀁 𑀤𑀟𑁆𑀠’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 ‘𑀦𑀸𑀳𑀁, 𑀤𑁂𑀯, 𑀇𑀫𑀲𑁆𑀲 𑀔𑁂𑀢𑁆𑀢𑀁 𑀛𑀸𑀧𑁂𑀫𑀺, 𑀅𑀜𑁆𑀜𑁄 𑀲𑁄 𑀅𑀕𑁆𑀕𑀺, 𑀬𑁄 𑀫𑀬𑀸 𑀅𑀯𑀺𑀚𑁆𑀛𑀸𑀧𑀺𑀢𑁄, 𑀅𑀜𑁆𑀜𑁄 𑀲𑁄 𑀅𑀕𑁆𑀕𑀺, 𑀬𑁂𑀦𑀺𑀫𑀲𑁆𑀲 𑀔𑁂𑀢𑁆𑀢𑀁 𑀤𑀟𑁆𑀠𑀁, 𑀦𑀸𑀳𑀁 𑀤𑀡𑁆𑀟𑀧𑁆𑀧𑀢𑁆𑀢𑁄’𑀢𑀺. 𑀓𑀺𑀁 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺? ‘‘𑀓𑀺𑀜𑁆𑀘𑀸𑀧𑀺 𑀲𑁄 𑀏𑀯𑀁 𑀯𑀤𑁂𑀬𑁆𑀬, 𑀧𑀼𑀭𑀺𑀫𑀁, 𑀪𑀦𑁆𑀢𑁂, 𑀅𑀕𑁆𑀕𑀺𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀧𑀘𑁆𑀙𑀺𑀫𑁂𑀦 𑀅𑀕𑁆𑀕𑀺𑀦𑀸 𑀲𑁄 𑀧𑀼𑀭𑀺𑀲𑁄 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀫𑀺𑀦𑀸 𑀦𑀸𑀫𑀭𑀽𑀧𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄𑀪𑀦𑀁 𑀯𑀸 𑀧𑀸𑀧𑀓𑀁 𑀯𑀸, 𑀢𑁂𑀦 𑀓𑀫𑁆𑀫𑁂𑀦 𑀅𑀜𑁆𑀜𑀁 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀤𑀳𑀢𑀺, 𑀢𑀲𑁆𑀫𑀸 𑀦 𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀧𑀤𑀻𑀧𑀁 𑀆𑀤𑀸𑀬 𑀧𑀸𑀲𑀸𑀤𑀁 𑀅𑀪𑀺𑀭𑀽𑀳𑀺𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬, 𑀧𑀤𑀻𑀧𑁄 𑀛𑀸𑀬𑀫𑀸𑀦𑁄 𑀢𑀺𑀡𑀁 𑀛𑀸𑀧𑁂𑀬𑁆𑀬, 𑀢𑀺𑀡𑀁 𑀛𑀸𑀬𑀫𑀸𑀦𑀁 𑀖𑀭𑀁 𑀛𑀸𑀧𑁂𑀬𑁆𑀬, 𑀖𑀭𑀁 𑀛𑀸𑀬𑀫𑀸𑀦𑀁 𑀕𑀸𑀫𑀁 𑀛𑀸𑀧𑁂𑀬𑁆𑀬, 𑀕𑀸𑀫𑀚𑀦𑁄 𑀢𑀁 𑀧𑀼𑀭𑀺𑀲𑀁 𑀕𑀳𑁂𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 ‘𑀓𑀺𑀲𑁆𑀲 𑀢𑁆𑀯𑀁, 𑀪𑁄 𑀧𑀼𑀭𑀺𑀲, 𑀕𑀸𑀫𑀁 𑀛𑀸𑀧𑁂𑀲𑀻’𑀢𑀺, 𑀲𑁄 𑀏𑀯𑀁 𑀯𑀤𑁂𑀬𑁆𑀬 ‘𑀦𑀸𑀳𑀁, 𑀪𑁄, 𑀕𑀸𑀫𑀁 𑀛𑀸𑀧𑁂𑀫𑀺, 𑀅𑀜𑁆𑀜𑁄 𑀲𑁄 𑀧𑀤𑀻𑀧𑀕𑁆𑀕𑀺, 𑀬𑀲𑁆𑀲𑀸𑀳𑀁 𑀆𑀮𑁄𑀓𑁂𑀦 𑀪𑀼𑀜𑁆𑀚𑀺𑀁, 𑀅𑀜𑁆𑀜𑁄 𑀲𑁄 𑀅𑀕𑁆𑀕𑀺, 𑀬𑁂𑀦 𑀕𑀸𑀫𑁄 𑀛𑀸𑀧𑀺𑀢𑁄’𑀢𑀺, 𑀢𑁂 𑀯𑀺𑀯𑀤𑀫𑀸𑀦𑀸 𑀢𑀯 𑀲𑀦𑁆𑀢𑀺𑀓𑁂 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀓𑀲𑁆𑀲 𑀢𑁆𑀯𑀁, 𑀫𑀳𑀸𑀭𑀸𑀚, 𑀅𑀝𑁆𑀝𑀁 [𑀅𑀢𑁆𑀣𑀁 (𑀲𑀻. 𑀧𑀻.)] 𑀥𑀸𑀭𑁂𑀬𑁆𑀬𑀸𑀲𑀻’’𑀢𑀺? ‘‘𑀕𑀸𑀫𑀚𑀦𑀲𑁆𑀲 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀓𑀺𑀜𑁆𑀘𑀸𑀧𑀺 𑀲𑁄 𑀏𑀯𑀁 𑀯𑀤𑁂𑀬𑁆𑀬, 𑀅𑀧𑀺 𑀘 𑀢𑀢𑁄 𑀏𑀯 𑀲𑁄 𑀅𑀕𑁆𑀕𑀺 𑀦𑀺𑀩𑁆𑀩𑀢𑁆𑀢𑁄’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀺𑀜𑁆𑀘𑀸𑀧𑀺 𑀅𑀜𑁆𑀜𑀁 𑀫𑀸𑀭𑀡𑀦𑁆𑀢𑀺𑀓𑀁 𑀦𑀸𑀫𑀭𑀽𑀧𑀁, 𑀅𑀜𑁆𑀜𑀁 𑀧𑀝𑀺𑀲𑀦𑁆𑀥𑀺𑀲𑁆𑀫𑀺𑀁 𑀦𑀸𑀫𑀭𑀽𑀧𑀁, 𑀅𑀧𑀺 𑀘 𑀢𑀢𑁄 𑀬𑁂𑀯 𑀢𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀲𑁆𑀫𑀸 𑀦 𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀤𑀳𑀭𑀺𑀁 𑀤𑀸𑀭𑀺𑀓𑀁 𑀯𑀸𑀭𑁂𑀢𑁆𑀯𑀸 𑀲𑀼𑀗𑁆𑀓𑀁 𑀤𑀢𑁆𑀯𑀸 𑀧𑀓𑁆𑀓𑀫𑁂𑀬𑁆𑀬. 𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀫𑀳𑀢𑀻 𑀅𑀲𑁆𑀲 𑀯𑀬𑀧𑁆𑀧𑀢𑁆𑀢𑀸, 𑀢𑀢𑁄 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀲𑀼𑀗𑁆𑀓𑀁 𑀤𑀢𑁆𑀯𑀸 𑀯𑀺𑀯𑀸𑀳𑀁 𑀓𑀭𑁂𑀬𑁆𑀬, 𑀇𑀢𑀭𑁄 𑀆𑀕𑀦𑁆𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 ‘𑀓𑀺𑀲𑁆𑀲 𑀧𑀦 𑀫𑁂 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀪𑀭𑀺𑀬𑀁 𑀦𑁂𑀲𑀻’𑀢𑀺? 𑀲𑁄 𑀏𑀯𑀁 𑀯𑀤𑁂𑀬𑁆𑀬 ‘𑀦𑀸𑀳𑀁 𑀢𑀯 𑀪𑀭𑀺𑀬𑀁 𑀦𑁂𑀫𑀺, 𑀅𑀜𑁆𑀜𑀸 𑀲𑀸 𑀤𑀸𑀭𑀺𑀓𑀸 𑀤𑀳𑀭𑀻 𑀢𑀭𑀼𑀡𑀻, 𑀬𑀸 𑀢𑀬𑀸 𑀯𑀸𑀭𑀺𑀢𑀸 𑀘 𑀤𑀺𑀦𑁆𑀦𑀲𑀼𑀗𑁆𑀓𑀸 𑀘, 𑀅𑀜𑁆𑀜𑀸𑀬𑀁 𑀤𑀸𑀭𑀺𑀓𑀸 𑀫𑀳𑀢𑀻 𑀯𑀬𑀧𑁆𑀧𑀢𑁆𑀢𑀸 𑀫𑀬𑀸 𑀯𑀸𑀭𑀺𑀢𑀸 𑀘 𑀤𑀺𑀦𑁆𑀦𑀲𑀼𑀗𑁆𑀓𑀸 𑀘𑀸’𑀢𑀺, 𑀢𑁂 𑀯𑀺𑀯𑀤𑀫𑀸𑀦𑀸 𑀢𑀯 𑀲𑀦𑁆𑀢𑀺𑀓𑁂 𑀆𑀕𑀘𑁆𑀙𑁂𑀬𑁆𑀬𑀼𑀁. 𑀓𑀲𑁆𑀲 𑀢𑁆𑀯𑀁, 𑀫𑀳𑀸𑀭𑀸𑀚, 𑀅𑀝𑁆𑀝𑀁 𑀥𑀸𑀭𑁂𑀬𑁆𑀬𑀸𑀲𑀻’’𑀢𑀺? ‘‘𑀧𑀼𑀭𑀺𑀫𑀲𑁆𑀲 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀓𑀺𑀜𑁆𑀘𑀸𑀧𑀺 𑀲𑁄 𑀏𑀯𑀁 𑀯𑀤𑁂𑀬𑁆𑀬, 𑀅𑀧𑀺 𑀘 𑀢𑀢𑁄 𑀬𑁂𑀯 𑀲𑀸 𑀫𑀳𑀢𑀻 𑀦𑀺𑀩𑁆𑀩𑀢𑁆𑀢𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀺𑀜𑁆𑀘𑀸𑀧𑀺 𑀅𑀜𑁆𑀜𑀁 𑀫𑀸𑀭𑀡𑀦𑁆𑀢𑀺𑀓𑀁 𑀦𑀸𑀫𑀭𑀽𑀧𑀁, 𑀅𑀜𑁆𑀜𑀁 𑀧𑀝𑀺𑀲𑀦𑁆𑀥𑀺𑀲𑁆𑀫𑀺𑀁 𑀦𑀸𑀫𑀭𑀽𑀧𑀁, 𑀅𑀧𑀺 𑀘 𑀢𑀢𑁄 𑀬𑁂𑀯 𑀢𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀲𑁆𑀫𑀸 𑀦𑀧𑀭𑀺𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀪𑀺𑀬𑁆𑀬𑁄 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀕𑁄𑀧𑀸𑀮𑀓𑀲𑁆𑀲 𑀳𑀢𑁆𑀣𑀢𑁄 𑀔𑀻𑀭𑀖𑀝𑀁 𑀓𑀺𑀡𑀺𑀢𑁆𑀯𑀸 𑀢𑀲𑁆𑀲𑁂𑀯 𑀳𑀢𑁆𑀣𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀫𑁂𑀬𑁆𑀬 ‘𑀲𑁆𑀯𑁂 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’𑀢𑀺, 𑀢𑀁 𑀅𑀧𑀭𑀚𑁆𑀚𑀼 𑀤𑀥𑀺 𑀲𑀫𑁆𑀧𑀚𑁆𑀚𑁂𑀬𑁆𑀬. 𑀲𑁄 𑀆𑀕𑀦𑁆𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 ‘𑀤𑁂𑀳𑀺 𑀫𑁂 𑀔𑀻𑀭𑀖𑀝’𑀦𑁆𑀢𑀺. 𑀲𑁄 𑀤𑀥𑀺𑀁 𑀤𑀲𑁆𑀲𑁂𑀬𑁆𑀬. 𑀇𑀢𑀭𑁄 𑀏𑀯𑀁 𑀯𑀤𑁂𑀬𑁆𑀬 ‘𑀦𑀸𑀳𑀁 𑀢𑀯 𑀳𑀢𑁆𑀣𑀢𑁄 𑀤𑀥𑀺𑀁 𑀓𑀺𑀡𑀸𑀫𑀺, 𑀤𑁂𑀳𑀺 𑀫𑁂 𑀔𑀻𑀭𑀖𑀝’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 ‘𑀅𑀚𑀸𑀦𑀢𑁄 𑀢𑁂 𑀔𑀻𑀭𑀁 𑀤𑀥𑀺𑀪𑀽𑀢’𑀦𑁆𑀢𑀺 𑀢𑁂 𑀯𑀺𑀯𑀤𑀫𑀸𑀦𑀸 𑀢𑀯 𑀲𑀦𑁆𑀢𑀺𑀓𑁂 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀓𑀲𑁆𑀲 𑀢𑁆𑀯𑀁 𑀫𑀳𑀸𑀭𑀸𑀚, 𑀅𑀝𑁆𑀝𑀁 𑀥𑀸𑀭𑁂𑀬𑁆𑀬𑀸𑀲𑀻’’𑀢𑀺? ‘‘𑀕𑁄𑀧𑀸𑀮𑀓𑀲𑁆𑀲 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀓𑀺𑀜𑁆𑀘𑀸𑀧𑀺 𑀲𑁄 𑀏𑀯𑀁 𑀯𑀤𑁂𑀬𑁆𑀬, 𑀅𑀧𑀺 𑀘 𑀢𑀢𑁄 𑀬𑁂𑀯 𑀢𑀁 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀺𑀜𑁆𑀘𑀸𑀧𑀺 𑀅𑀜𑁆𑀜𑀁 𑀫𑀸𑀭𑀡𑀦𑁆𑀢𑀺𑀓𑀁 𑀦𑀸𑀫𑀭𑀽𑀧𑀁, 𑀅𑀜𑁆𑀜𑀁 𑀧𑀝𑀺𑀲𑀦𑁆𑀥𑀺𑀲𑁆𑀫𑀺𑀁 𑀦𑀸𑀫𑀭𑀽𑀧𑀁, 𑀅𑀧𑀺 𑀘 𑀢𑀢𑁄 𑀬𑁂𑀯 𑀢𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀲𑁆𑀫𑀸 𑀦 𑀧𑀭𑀺𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀦𑀸𑀫𑀭𑀽𑀧𑀏𑀓𑀢𑁆𑀢𑀦𑀸𑀦𑀢𑁆𑀢𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀣𑁂𑀭𑀧𑀝𑀺𑀲𑀦𑁆𑀤𑀳𑀦𑀸𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄

𑁭. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑁆𑀯𑀁 𑀧𑀦 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀲𑀻’’𑀢𑀺? ‘‘𑀅𑀮𑀁, 𑀫𑀳𑀸𑀭𑀸𑀚, 𑀓𑀺𑀁 𑀢𑁂 𑀢𑁂𑀦 𑀧𑀼𑀘𑁆𑀙𑀺𑀢𑁂𑀦, 𑀦𑀦𑀼 𑀫𑀬𑀸 𑀧𑀝𑀺𑀓𑀘𑁆𑀘𑁂𑀯 𑀅𑀓𑁆𑀔𑀸𑀢𑀁 ‘𑀲𑀘𑁂, 𑀫𑀳𑀸𑀭𑀸𑀚, 𑀲𑀉𑀧𑀸𑀤𑀸𑀦𑁄 𑀪𑀯𑀺𑀲𑁆𑀲𑀸𑀫𑀺, 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀺, 𑀲𑀘𑁂 𑀅𑀦𑀼𑀧𑀸𑀤𑀸𑀦𑁄 𑀪𑀯𑀺𑀲𑁆𑀲𑀸𑀫𑀺, 𑀦 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀻’’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀭𑀜𑁆𑀜𑁄 𑀅𑀥𑀺𑀓𑀸𑀭𑀁 𑀓𑀭𑁂𑀬𑁆𑀬. 𑀭𑀸𑀚𑀸 𑀢𑀼𑀝𑁆𑀞𑁄 𑀅𑀥𑀺𑀓𑀸𑀭𑀁 𑀤𑀤𑁂𑀬𑁆𑀬, 𑀲𑁄 𑀢𑁂𑀦 𑀅𑀥𑀺𑀓𑀸𑀭𑁂𑀦 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀺𑀪𑀽𑀢𑁄 𑀧𑀭𑀺𑀘𑀭𑁂𑀬𑁆𑀬, 𑀲𑁄 𑀘𑁂 𑀚𑀦𑀲𑁆𑀲 𑀆𑀭𑁄𑀘𑁂𑀬𑁆𑀬 ‘𑀦 𑀫𑁂 𑀭𑀸𑀚𑀸 𑀓𑀺𑀜𑁆𑀘𑀺 𑀧𑀝𑀺𑀓𑀭𑁄𑀢𑀻’ 𑀢𑀺. 𑀓𑀺𑀁 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀬𑀼𑀢𑁆𑀢𑀓𑀸𑀭𑀻 𑀪𑀯𑁂𑀬𑁆𑀬𑀸’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀺𑀁 𑀢𑁂 𑀢𑁂𑀦 𑀧𑀼𑀘𑁆𑀙𑀺𑀢𑁂𑀦, 𑀦𑀦𑀼 𑀫𑀬𑀸 𑀧𑀝𑀺𑀓𑀘𑁆𑀘𑁂𑀯 𑀅𑀓𑁆𑀔𑀸𑀢𑀁 ‘𑀲𑀘𑁂 𑀲𑀉𑀧𑀸𑀤𑀸𑀦𑁄 𑀪𑀯𑀺𑀲𑁆𑀲𑀸𑀫𑀺, 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀺, 𑀲𑀘𑁂 𑀅𑀦𑀼𑀧𑀸𑀤𑀸𑀦𑁄 𑀪𑀯𑀺𑀲𑁆𑀲𑀸𑀫𑀺, 𑀦 𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀻’’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀣𑁂𑀭𑀧𑀝𑀺𑀲𑀦𑁆𑀤𑀳𑀦𑀸𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀦𑀸𑀫𑀭𑀽𑀧𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄

𑁮. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀧𑀦𑁂𑀢𑀁 𑀩𑁆𑀭𑀽𑀲𑀺 ‘𑀦𑀸𑀫𑀭𑀽𑀧’𑀦𑁆𑀢𑀺, 𑀢𑀢𑁆𑀣 𑀓𑀢𑀫𑀁 𑀦𑀸𑀫𑀁, 𑀓𑀢𑀫𑀁 𑀭𑀽𑀧’’𑀦𑁆𑀢𑀺. ‘‘𑀬𑀁 𑀢𑀢𑁆𑀣, 𑀫𑀳𑀸𑀭𑀸𑀚, 𑀑𑀴𑀸𑀭𑀺𑀓𑀁, 𑀏𑀢𑀁 𑀭𑀽𑀧𑀁, 𑀬𑁂 𑀢𑀢𑁆𑀣 𑀲𑀼𑀔𑀼𑀫𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀏𑀢𑀁 𑀦𑀸𑀫’’𑀦𑁆𑀢𑀺. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁂𑀦 𑀓𑀸𑀭𑀡𑁂𑀦 𑀦𑀸𑀫𑀁 𑀬𑁂𑀯 𑀦 𑀧𑀝𑀺𑀲𑀦𑁆𑀤𑀳𑀢𑀺, 𑀭𑀽𑀧𑀁 𑀬𑁂𑀯 𑀯𑀸’’𑀢𑀺? ‘‘𑀅𑀜𑁆𑀜𑀫𑀜𑁆𑀜𑀽𑀧𑀦𑀺𑀲𑁆𑀲𑀺𑀢𑀸, 𑀫𑀳𑀸𑀭𑀸𑀚, 𑀏𑀢𑁂 𑀥𑀫𑁆𑀫𑀸 𑀏𑀓𑀢𑁄𑀯 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀼𑀓𑁆𑀓𑀼𑀝𑀺𑀬𑀸 𑀓𑀮𑀮𑀁 𑀦 𑀪𑀯𑁂𑀬𑁆𑀬, 𑀅𑀡𑁆𑀟𑀫𑁆𑀧𑀺 𑀦 𑀪𑀯𑁂𑀬𑁆𑀬, 𑀬𑀜𑁆𑀘 𑀢𑀢𑁆𑀣 𑀓𑀮𑀮𑀁, 𑀬𑀜𑁆𑀘 𑀅𑀡𑁆𑀟𑀁, 𑀉𑀪𑁄𑀧𑁂𑀢𑁂 𑀅𑀜𑁆𑀜𑀫𑀜𑁆𑀜𑀽𑀧𑀦𑀺𑀲𑁆𑀲𑀺𑀢𑀸, 𑀏𑀓𑀢𑁄𑀯 𑀦𑁂𑀲𑀁 𑀉𑀧𑁆𑀧𑀢𑁆𑀢𑀺 𑀳𑁄𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀤𑀺 𑀢𑀢𑁆𑀣 𑀦𑀸𑀫𑀁 𑀦 𑀪𑀯𑁂𑀬𑁆𑀬, 𑀭𑀽𑀧𑀫𑁆𑀧𑀺 𑀦 𑀪𑀯𑁂𑀬𑁆𑀬, 𑀬𑀜𑁆𑀘𑁂𑀯 𑀢𑀢𑁆𑀣 𑀦𑀸𑀫𑀁, 𑀬𑀜𑁆𑀘𑁂𑀯 𑀭𑀽𑀧𑀁, 𑀉𑀪𑁄𑀧𑁂𑀢𑁂 𑀅𑀜𑁆𑀜𑀫𑀜𑁆𑀜𑀽𑀧𑀦𑀺𑀲𑁆𑀲𑀺𑀢𑀸, 𑀏𑀓𑀢𑁄𑀯 𑀦𑁂𑀲𑀁 𑀉𑀧𑁆𑀧𑀢𑁆𑀢𑀺 𑀳𑁄𑀢𑀺. 𑀏𑀯𑀫𑁂𑀢𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀦𑀸𑀫𑀭𑀽𑀧𑀧𑀝𑀺𑀲𑀦𑁆𑀤𑀳𑀦𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀅𑀤𑁆𑀥𑀸𑀦𑀧𑀜𑁆𑀳𑁄

𑁯. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀧𑀦𑁂𑀢𑀁 𑀩𑁆𑀭𑀽𑀲𑀺 ‘𑀤𑀻𑀖𑀫𑀤𑁆𑀥𑀸𑀦’𑀦𑁆𑀢𑀺, 𑀓𑀺𑀫𑁂𑀢𑀁 𑀅𑀤𑁆𑀥𑀸𑀦𑀁 𑀦𑀸𑀫𑀸’’𑀢𑀺? ‘‘𑀅𑀢𑀻𑀢𑁄, 𑀫𑀳𑀸𑀭𑀸𑀚, 𑀅𑀤𑁆𑀥𑀸, 𑀅𑀦𑀸𑀕𑀢𑁄 𑀅𑀤𑁆𑀥𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀲𑀩𑁆𑀩𑁂 𑀅𑀤𑁆𑀥𑀸 𑀅𑀢𑁆𑀣𑀻’’𑀢𑀺? ‘‘𑀓𑁄𑀘𑀺, 𑀫𑀳𑀸𑀭𑀸𑀚, 𑀅𑀤𑁆𑀥𑀸 𑀅𑀢𑁆𑀣𑀺, 𑀓𑁄𑀘𑀺 𑀦𑀢𑁆𑀣𑀻’’𑀢𑀺. ‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀅𑀢𑁆𑀣𑀺, 𑀓𑀢𑀫𑁄 𑀦𑀢𑁆𑀣𑀻’’𑀢𑀺? ‘‘𑀬𑁂 𑀢𑁂, 𑀫𑀳𑀸𑀭𑀸𑀚, 𑀲𑀗𑁆𑀔𑀸𑀭𑀸 𑀅𑀢𑀻𑀢𑀸 𑀯𑀺𑀕𑀢𑀸 𑀦𑀺𑀭𑀼𑀤𑁆𑀥𑀸 𑀯𑀺𑀧𑀭𑀺𑀡𑀢𑀸, 𑀲𑁄 𑀅𑀤𑁆𑀥𑀸 𑀦𑀢𑁆𑀣𑀺, 𑀬𑁂 𑀥𑀫𑁆𑀫𑀸 𑀯𑀺𑀧𑀸𑀓𑀸, 𑀬𑁂 𑀘 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀬𑁂 𑀘 𑀅𑀜𑁆𑀜𑀢𑁆𑀭 𑀧𑀝𑀺𑀲𑀦𑁆𑀥𑀺𑀁 𑀤𑁂𑀦𑁆𑀢𑀺, 𑀲𑁄 𑀅𑀤𑁆𑀥𑀸 𑀅𑀢𑁆𑀣𑀺. 𑀬𑁂 𑀲𑀢𑁆𑀢𑀸 𑀓𑀸𑀮𑀗𑁆𑀓𑀢𑀸 𑀅𑀜𑁆𑀜𑀢𑁆𑀭 𑀉𑀧𑁆𑀧𑀦𑁆𑀦𑀸, 𑀲𑁄 𑀘 𑀅𑀤𑁆𑀥𑀸 𑀅𑀢𑁆𑀣𑀺. 𑀬𑁂 𑀲𑀢𑁆𑀢𑀸 𑀓𑀸𑀮𑀗𑁆𑀓𑀢𑀸 𑀅𑀜𑁆𑀜𑀢𑁆𑀭 𑀅𑀦𑀼𑀧𑁆𑀧𑀦𑁆𑀦𑀸, 𑀲𑁄 𑀅𑀤𑁆𑀥𑀸 𑀦𑀢𑁆𑀣𑀺. 𑀬𑁂 𑀘 𑀲𑀢𑁆𑀢𑀸 𑀧𑀭𑀺𑀦𑀺𑀩𑁆𑀩𑀼𑀢𑀸, 𑀲𑁄 𑀘 𑀅𑀤𑁆𑀥𑀸 𑀦𑀢𑁆𑀣𑀺 𑀧𑀭𑀺𑀦𑀺𑀩𑁆𑀩𑀼𑀢𑀢𑁆𑀢𑀸’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀅𑀤𑁆𑀥𑀸𑀦𑀧𑀜𑁆𑀳𑁄 𑀦𑀯𑀫𑁄.

𑀅𑀤𑁆𑀥𑀸𑀦𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀦𑀯 𑀧𑀜𑁆𑀳𑀸.