𑁮. 𑀫𑀦𑀲𑀺𑀓𑀸𑀭𑀮𑀓𑁆𑀔𑀡𑀧𑀜𑁆𑀳𑁄

𑁮. 𑀭𑀸𑀚𑀸 𑀆𑀳 ‘‘𑀓𑀺𑀁𑀮𑀓𑁆𑀔𑀡𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀫𑀦𑀲𑀺𑀓𑀸𑀭𑁄, 𑀓𑀺𑀁𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺? ‘‘𑀊𑀳𑀦𑀮𑀓𑁆𑀔𑀡𑁄 𑀔𑁄, 𑀫𑀳𑀸𑀭𑀸𑀚, 𑀫𑀦𑀲𑀺𑀓𑀸𑀭𑁄, 𑀙𑁂𑀤𑀦𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺.

‘‘𑀓𑀣𑀁 𑀊𑀳𑀦𑀮𑀓𑁆𑀔𑀡𑁄 𑀫𑀦𑀲𑀺𑀓𑀸𑀭𑁄, 𑀓𑀣𑀁 𑀙𑁂𑀤𑀦𑀮𑀓𑁆𑀔𑀡𑀸 𑀧𑀜𑁆𑀜𑀸, 𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀚𑀸𑀦𑀸𑀲𑀺, 𑀢𑁆𑀯𑀁 𑀫𑀳𑀸𑀭𑀸𑀚, 𑀬𑀯𑀮𑀸𑀯𑀓𑁂’’𑀢𑀺. ‘‘𑀆𑀫, 𑀪𑀦𑁆𑀢𑁂, 𑀚𑀸𑀦𑀸𑀫𑀻’’𑀢𑀺. ‘‘𑀓𑀣𑀁, 𑀫𑀳𑀸𑀭𑀸𑀚, 𑀬𑀯𑀮𑀸𑀯𑀓𑀸 𑀬𑀯𑀁 𑀮𑀼𑀦𑀦𑁆𑀢𑀻’’𑀢𑀺? ‘‘𑀯𑀸𑀫𑁂𑀦, 𑀪𑀦𑁆𑀢𑁂, 𑀳𑀢𑁆𑀣𑁂𑀦 𑀬𑀯𑀓𑀮𑀸𑀧𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀤𑀸𑀢𑁆𑀢𑀁 𑀕𑀳𑁂𑀢𑁆𑀯𑀸 𑀤𑀸𑀢𑁆𑀢𑁂𑀦 𑀙𑀺𑀦𑁆𑀤𑀦𑁆𑀢𑀻’’𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀬𑀯𑀮𑀸𑀯𑀓𑁄 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀬𑀯𑀓𑀮𑀸𑀧𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀤𑀸𑀢𑁆𑀢𑀁 𑀕𑀳𑁂𑀢𑁆𑀯𑀸 𑀬𑀯𑀁 𑀙𑀺𑀦𑁆𑀤𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀸𑀯𑀘𑀭𑁄 𑀫𑀦𑀲𑀺𑀓𑀸𑀭𑁂𑀦 𑀫𑀸𑀦𑀲𑀁 𑀕𑀳𑁂𑀢𑁆𑀯𑀸 𑀧𑀜𑁆𑀜𑀸𑀬 𑀓𑀺𑀮𑁂𑀲𑁂 𑀙𑀺𑀦𑁆𑀤𑀢𑀺, 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀊𑀳𑀦𑀮𑀓𑁆𑀔𑀡𑁄 𑀫𑀦𑀲𑀺𑀓𑀸𑀭𑁄, 𑀏𑀯𑀁 𑀙𑁂𑀤𑀦𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀫𑀦𑀲𑀺𑀓𑀸𑀭𑀮𑀓𑁆𑀔𑀡𑀧𑀜𑁆𑀳𑁄 𑀅𑀝𑁆𑀞𑀫𑁄.