𑁧𑁫. 𑀧𑀜𑁆𑀜𑀸𑀮𑀓𑁆𑀔𑀡𑀧𑀜𑁆𑀳𑁄

𑁧𑁫. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺? ‘‘𑀧𑀼𑀩𑁆𑀩𑁂𑀯 𑀔𑁄, 𑀫𑀳𑀸𑀭𑀸𑀚, 𑀫𑀬𑀸 𑀯𑀼𑀢𑁆𑀢𑀁 ‘𑀙𑁂𑀤𑀦𑀮𑀓𑁆𑀔𑀡𑀸 𑀧𑀜𑁆𑀜𑀸’𑀢𑀺, 𑀅𑀧𑀺 𑀘 𑀑𑀪𑀸𑀲𑀦𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺. ‘‘𑀓𑀣𑀁, 𑀪𑀦𑁆𑀢𑁂, 𑀑𑀪𑀸𑀲𑀦𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺? ‘‘𑀧𑀜𑁆𑀜𑀸, 𑀫𑀳𑀸𑀭𑀸𑀚, 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑀺, 𑀯𑀺𑀚𑁆𑀚𑁄𑀪𑀸𑀲𑀁 𑀚𑀦𑁂𑀢𑀺, 𑀜𑀸𑀡𑀸𑀮𑁄𑀓𑀁 𑀯𑀺𑀤𑀁𑀲𑁂𑀢𑀺, 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀸𑀓𑀝𑀸𑀦𑀺 𑀓𑀭𑁄𑀢𑀺. 𑀢𑀢𑁄 𑀬𑁄𑀕𑀸𑀯𑀘𑀭𑁄 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀻’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀦𑁆𑀥𑀓𑀸𑀭𑁂 𑀕𑁂𑀳𑁂 𑀧𑀤𑀻𑀧𑀁 𑀧𑀯𑁂𑀲𑁂𑀬𑁆𑀬, 𑀧𑀯𑀺𑀝𑁆𑀞𑁄 𑀧𑀤𑀻𑀧𑁄 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑀺, 𑀑𑀪𑀸𑀲𑀁 𑀚𑀦𑁂𑀢𑀺, 𑀆𑀮𑁄𑀓𑀁 𑀯𑀺𑀤𑀁𑀲𑁂𑀢𑀺, 𑀭𑀽𑀧𑀸𑀦𑀺 𑀧𑀸𑀓𑀝𑀸𑀦𑀺 𑀓𑀭𑁄𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀜𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀢𑀺, 𑀯𑀺𑀚𑁆𑀚𑁄𑀪𑀸𑀲𑀁 𑀚𑀦𑁂𑀢𑀺, 𑀜𑀸𑀡𑀸𑀮𑁄𑀓𑀁 𑀯𑀺𑀤𑀁𑀲𑁂𑀢𑀺, 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀸𑀓𑀝𑀸𑀦𑀺 𑀓𑀭𑁄𑀢𑀺. 𑀢𑀢𑁄 𑀬𑁄𑀕𑀸𑀯𑀘𑀭𑁄 ‘𑀅𑀦𑀺𑀘𑁆𑀘’𑀦𑁆𑀢𑀺 𑀯𑀸 ‘𑀤𑀼𑀓𑁆𑀔’𑀦𑁆𑀢𑀺 𑀯𑀸 ‘𑀅𑀦𑀢𑁆𑀢𑀸’𑀢𑀺 𑀯𑀸 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀑𑀪𑀸𑀲𑀦𑀮𑀓𑁆𑀔𑀡𑀸 𑀧𑀜𑁆𑀜𑀸’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀧𑀜𑁆𑀜𑀸𑀮𑀓𑁆𑀔𑀡𑀧𑀜𑁆𑀳𑁄 𑀧𑀦𑁆𑀦𑀭𑀲𑀫𑁄.