𑁧. 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀬𑀸𑀕𑀲𑀼𑀢𑁆𑀢𑀁

𑁧𑁦𑁦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀅𑀳𑀫𑀲𑁆𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑁄 𑀬𑀸𑀘𑀬𑁄𑀕𑁄 𑀲𑀤𑀸 𑀧𑀬𑀢𑀧𑀸𑀡𑀺 [𑀧𑀬𑀢𑀧𑀸𑀡𑀻 (𑀲𑀻. 𑀲𑁆𑀬𑀸.)] 𑀅𑀦𑁆𑀢𑀺𑀫𑀤𑁂𑀳𑀥𑀭𑁄 𑀅𑀦𑀼𑀢𑁆𑀢𑀭𑁄 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄. 𑀢𑀲𑁆𑀲 𑀫𑁂 𑀢𑀼𑀫𑁆𑀳𑁂 𑀧𑀼𑀢𑁆𑀢𑀸 𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸 𑀥𑀫𑁆𑀫𑀚𑀸 𑀥𑀫𑁆𑀫𑀦𑀺𑀫𑁆𑀫𑀺𑀢𑀸 𑀥𑀫𑁆𑀫𑀤𑀸𑀬𑀸𑀤𑀸, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸.

‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀤𑀸𑀦𑀸𑀦𑀺 𑁋 𑀆𑀫𑀺𑀲𑀤𑀸𑀦𑀜𑁆𑀘 𑀥𑀫𑁆𑀫𑀤𑀸𑀦𑀜𑁆𑀘. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀤𑀸𑀦𑀸𑀦𑀁 𑀬𑀤𑀺𑀤𑀁 𑁋 𑀥𑀫𑁆𑀫𑀤𑀸𑀦𑀁.

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀲𑀁𑀯𑀺𑀪𑀸𑀕𑀸 𑁋 𑀆𑀫𑀺𑀲𑀲𑀁𑀯𑀺𑀪𑀸𑀕𑁄 𑀘 𑀥𑀫𑁆𑀫𑀲𑀁𑀯𑀺𑀪𑀸𑀕𑁄 𑀘. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀁𑀯𑀺𑀪𑀸𑀕𑀸𑀦𑀁 𑀬𑀤𑀺𑀤𑀁 𑁋 𑀥𑀫𑁆𑀫𑀲𑀁𑀯𑀺𑀪𑀸𑀕𑁄.

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑀼𑀕𑁆𑀕𑀳𑀸 𑁋 𑀆𑀫𑀺𑀲𑀸𑀦𑀼𑀕𑁆𑀕𑀳𑁄 𑀘 𑀥𑀫𑁆𑀫𑀸𑀦𑀼𑀕𑁆𑀕𑀳𑁄 𑀘. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀦𑀼𑀕𑁆𑀕𑀳𑀸𑀦𑀁 𑀬𑀤𑀺𑀤𑀁 𑁋 𑀥𑀫𑁆𑀫𑀸𑀦𑀼𑀕𑁆𑀕𑀳𑁄.

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀬𑀸𑀕𑀸 𑁋 𑀆𑀫𑀺𑀲𑀬𑀸𑀕𑁄 𑀘 𑀥𑀫𑁆𑀫𑀬𑀸𑀕𑁄 𑀘. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀬𑀸𑀕𑀸𑀦𑀁 𑀬𑀤𑀺𑀤𑀁 𑁋 𑀥𑀫𑁆𑀫𑀬𑀸𑀕𑁄’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀬𑁄 𑀥𑀫𑁆𑀫𑀬𑀸𑀕𑀁 𑀅𑀬𑀚𑀻 𑀅𑀫𑀘𑁆𑀙𑀭𑀻, 𑀢𑀣𑀸𑀕𑀢𑁄 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀻 [𑀲𑀩𑁆𑀩𑀲𑀢𑁆𑀢𑀸𑀦𑀼𑀓𑀫𑁆𑀧𑀻 (𑀲𑁆𑀬𑀸.) 𑀅𑀝𑁆𑀞𑀓𑀣𑀸𑀬𑀫𑁆𑀧𑀺];

𑀢𑀁 𑀢𑀸𑀤𑀺𑀲𑀁 𑀤𑁂𑀯𑀫𑀦𑀼𑀲𑁆𑀲𑀲𑁂𑀝𑁆𑀞𑀁, 𑀲𑀢𑁆𑀢𑀸 𑀦𑀫𑀲𑁆𑀲𑀦𑁆𑀢𑀺 𑀪𑀯𑀲𑁆𑀲 𑀧𑀸𑀭𑀕𑀼’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀧𑀞𑀫𑀁.