𑁯. 𑀧𑀞𑀫𑀭𑀸𑀕𑀲𑀼𑀢𑁆𑀢𑀁

𑁬𑁮. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀭𑀸𑀕𑁄 𑀅𑀧𑁆𑀧𑀳𑀻𑀦𑁄, 𑀤𑁄𑀲𑁄 𑀅𑀧𑁆𑀧𑀳𑀻𑀦𑁄, 𑀫𑁄𑀳𑁄 𑀅𑀧𑁆𑀧𑀳𑀻𑀦𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀩𑀤𑁆𑀥𑁄 [𑀩𑀦𑁆𑀤𑁄 (𑀩𑀳𑀽𑀲𑀼)] 𑀫𑀸𑀭𑀲𑁆𑀲 𑀧𑀝𑀺𑀫𑀼𑀓𑁆𑀓𑀲𑁆𑀲 𑀫𑀸𑀭𑀧𑀸𑀲𑁄 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 [𑀬𑀣𑀸 𑀓𑀸𑀫𑀓𑀭𑀡𑀻𑀬𑁄 𑀘 (𑀲𑀻. 𑀲𑁆𑀬𑀸. 𑀧𑀻. 𑀓.)] 𑀧𑀸𑀧𑀺𑀫𑀢𑁄’. 𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀭𑀸𑀕𑁄 𑀧𑀳𑀻𑀦𑁄, 𑀤𑁄𑀲𑁄 𑀧𑀳𑀻𑀦𑁄, 𑀫𑁄𑀳𑁄 𑀧𑀳𑀻𑀦𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀅𑀩𑀤𑁆𑀥𑁄 𑀫𑀸𑀭𑀲𑁆𑀲 𑀑𑀫𑀼𑀓𑁆𑀓𑀲𑁆𑀲 𑀫𑀸𑀭𑀧𑀸𑀲𑁄 𑀦 𑀬𑀣𑀸 𑀓𑀸𑀫𑀓𑀭𑀡𑀻𑀬𑁄 [𑀦 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀘 (𑀲𑁆𑀬𑀸.)] 𑀧𑀸𑀧𑀺𑀫𑀢𑁄’’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀬𑀲𑁆𑀲 𑀭𑀸𑀕𑁄 𑀘 𑀤𑁄𑀲𑁄 𑀘, 𑀅𑀯𑀺𑀚𑁆𑀚𑀸 𑀘 𑀯𑀺𑀭𑀸𑀚𑀺𑀢𑀸;

𑀢𑀁 𑀪𑀸𑀯𑀺𑀢𑀢𑁆𑀢𑀜𑁆𑀜𑀢𑀭𑀁, 𑀩𑁆𑀭𑀳𑁆𑀫𑀪𑀽𑀢𑀁 𑀢𑀣𑀸𑀕𑀢𑀁;

𑀩𑀼𑀤𑁆𑀥𑀁 𑀯𑁂𑀭𑀪𑀬𑀸𑀢𑀻𑀢𑀁, 𑀆𑀳𑀼 𑀲𑀩𑁆𑀩𑀧𑁆𑀧𑀳𑀸𑀬𑀺𑀦’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀦𑀯𑀫𑀁.