𑁫. 𑀧𑀞𑀫𑀏𑀲𑀦𑀸𑀲𑀼𑀢𑁆𑀢𑀁

𑁫𑁪. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀏𑀲𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀓𑀸𑀫𑁂𑀲𑀦𑀸, 𑀪𑀯𑁂𑀲𑀦𑀸, 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀏𑀲𑀦𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀲𑀫𑀸𑀳𑀺𑀢𑁄 𑀲𑀫𑁆𑀧𑀚𑀸𑀦𑁄, 𑀲𑀢𑁄 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀏𑀲𑀦𑀸 𑀘 𑀧𑀚𑀸𑀦𑀸𑀢𑀺, 𑀏𑀲𑀦𑀸𑀦𑀜𑁆𑀘 𑀲𑀫𑁆𑀪𑀯𑀁.

‘‘𑀬𑀢𑁆𑀣 𑀘𑁂𑀢𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀫𑀕𑁆𑀕𑀜𑁆𑀘 𑀔𑀬𑀕𑀸𑀫𑀺𑀦𑀁;

𑀏𑀲𑀦𑀸𑀦𑀁 𑀔𑀬𑀸 𑀪𑀺𑀓𑁆𑀔𑀼, 𑀦𑀺𑀘𑁆𑀙𑀸𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀧𑀜𑁆𑀘𑀫𑀁.