𑁨. 𑀥𑀸𑀢𑀼𑀲𑀼𑀢𑁆𑀢𑀁

𑁫𑁧. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀥𑀸𑀢𑀼𑀬𑁄. 𑀓𑀢𑀫𑀸 𑀢𑀺𑀲𑁆𑀲𑁄? 𑀭𑀽𑀧𑀥𑀸𑀢𑀼, 𑀅𑀭𑀽𑀧𑀥𑀸𑀢𑀼, 𑀦𑀺𑀭𑁄𑀥𑀥𑀸𑀢𑀼 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀭𑀽𑀧𑀥𑀸𑀢𑀼𑀁 [𑀭𑀽𑀧𑀥𑀸𑀢𑀼 (𑀲𑀩𑁆𑀩𑀢𑁆𑀣)] 𑀧𑀭𑀺𑀜𑁆𑀜𑀸𑀬, 𑀅𑀭𑀽𑀧𑁂𑀲𑀼 𑀅𑀲𑀡𑁆𑀞𑀺𑀢𑀸;

𑀦𑀺𑀭𑁄𑀥𑁂 𑀬𑁂 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀢𑁂 𑀚𑀦𑀸 𑀫𑀘𑁆𑀘𑀼𑀳𑀸𑀬𑀺𑀦𑁄.

‘‘𑀓𑀸𑀬𑁂𑀦 𑀅𑀫𑀢𑀁 𑀥𑀸𑀢𑀼𑀁, 𑀨𑀼𑀲𑀬𑀺𑀢𑁆𑀯𑀸 [𑀨𑀼𑀲𑁆𑀲𑀬𑀺𑀢𑁆𑀯𑀸 (𑀲𑁆𑀬𑀸.), 𑀨𑀲𑁆𑀲𑀬𑀺𑀢𑁆𑀯𑀸 (𑀧𑀻.)] 𑀦𑀺𑀭𑀽𑀧𑀥𑀺𑀁;

𑀉𑀧𑀥𑀺𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀁, 𑀲𑀘𑁆𑀙𑀺𑀓𑀢𑁆𑀯𑀸 𑀅𑀦𑀸𑀲𑀯𑁄;

𑀤𑁂𑀲𑁂𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀅𑀲𑁄𑀓𑀁 𑀯𑀺𑀭𑀚𑀁 𑀧𑀤’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑀼𑀢𑀺𑀬𑀁.