𑁬. 𑀤𑀸𑀦𑀲𑀼𑀢𑁆𑀢𑀁

𑁨𑁬. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀏𑀯𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀚𑀸𑀦𑁂𑀬𑁆𑀬𑀼𑀁 𑀤𑀸𑀦𑀲𑀁𑀯𑀺𑀪𑀸𑀕𑀲𑁆𑀲 𑀯𑀺𑀧𑀸𑀓𑀁 𑀬𑀣𑀸𑀳𑀁 𑀚𑀸𑀦𑀸𑀫𑀺, 𑀦 𑀅𑀤𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬𑀼𑀁, 𑀦 𑀘 𑀦𑁂𑀲𑀁 𑀫𑀘𑁆𑀙𑁂𑀭𑀫𑀮𑀁 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑁂𑀬𑁆𑀬. 𑀬𑁄𑀧𑀺 𑀦𑁂𑀲𑀁 𑀅𑀲𑁆𑀲 𑀘𑀭𑀺𑀫𑁄 𑀆𑀮𑁄𑀧𑁄 𑀘𑀭𑀺𑀫𑀁 𑀓𑀩𑀴𑀁, 𑀢𑀢𑁄𑀧𑀺 𑀦 𑀅𑀲𑀁𑀯𑀺𑀪𑀚𑀺𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬𑀼𑀁, 𑀲𑀘𑁂 𑀦𑁂𑀲𑀁 𑀧𑀝𑀺𑀕𑁆𑀕𑀸𑀳𑀓𑀸 𑀅𑀲𑁆𑀲𑀼. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀦 𑀏𑀯𑀁 𑀚𑀸𑀦𑀦𑁆𑀢𑀺 𑀤𑀸𑀦𑀲𑀁𑀯𑀺𑀪𑀸𑀕𑀲𑁆𑀲 𑀯𑀺𑀧𑀸𑀓𑀁 𑀬𑀣𑀸𑀳𑀁 𑀚𑀸𑀦𑀸𑀫𑀺, 𑀢𑀲𑁆𑀫𑀸 𑀅𑀤𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀫𑀘𑁆𑀙𑁂𑀭𑀫𑀮𑀜𑁆𑀘 𑀦𑁂𑀲𑀁 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀏𑀯𑀁 𑀘𑁂 𑀲𑀢𑁆𑀢𑀸 𑀚𑀸𑀦𑁂𑀬𑁆𑀬𑀼𑀁, 𑀬𑀣𑀸𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸;

𑀯𑀺𑀧𑀸𑀓𑀁 𑀲𑀁𑀯𑀺𑀪𑀸𑀕𑀲𑁆𑀲, 𑀬𑀣𑀸 𑀳𑁄𑀢𑀺 𑀫𑀳𑀧𑁆𑀨𑀮𑀁.

‘‘𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀫𑀮𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀤𑀚𑁆𑀚𑀼𑀁 𑀓𑀸𑀮𑁂𑀦 𑀅𑀭𑀺𑀬𑁂𑀲𑀼, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

‘‘𑀅𑀦𑁆𑀦𑀜𑁆𑀘 𑀤𑀢𑁆𑀯𑀸 [𑀤𑀢𑁆𑀯𑀸𑀦 (𑀲𑁆𑀬𑀸.)] 𑀩𑀳𑀼𑀦𑁄, 𑀤𑀓𑁆𑀔𑀺𑀡𑁂𑀬𑁆𑀬𑁂𑀲𑀼 𑀤𑀓𑁆𑀔𑀺𑀡𑀁;

𑀇𑀢𑁄 𑀘𑀼𑀢𑀸 𑀫𑀦𑀼𑀲𑁆𑀲𑀢𑁆𑀢𑀸, 𑀲𑀕𑁆𑀕𑀁 𑀕𑀘𑁆𑀙𑀦𑁆𑀢𑀺 𑀤𑀸𑀬𑀓𑀸.

‘‘𑀢𑁂 𑀘 𑀲𑀕𑁆𑀕𑀕𑀢𑀸 [𑀲𑀕𑁆𑀕𑀁 𑀕𑀢𑀸 (𑀲𑀻. 𑀧𑀻. 𑀓.)] 𑀢𑀢𑁆𑀣, 𑀫𑁄𑀤𑀦𑁆𑀢𑀺 𑀓𑀸𑀫𑀓𑀸𑀫𑀺𑀦𑁄;

𑀯𑀺𑀧𑀸𑀓𑀁 𑀲𑀁𑀯𑀺𑀪𑀸𑀕𑀲𑁆𑀲, 𑀅𑀦𑀼𑀪𑁄𑀦𑁆𑀢𑀺 𑀅𑀫𑀘𑁆𑀙𑀭𑀸’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀙𑀝𑁆𑀞𑀁.