𑁨𑁩. 𑀯𑁂𑀲𑁆𑀲𑀪𑀽𑀩𑀼𑀤𑁆𑀥𑀯𑀁𑀲𑁄

𑁧. 𑀢𑀢𑁆𑀣𑁂𑀯 𑀫𑀡𑁆𑀟𑀓𑀧𑁆𑀧𑀫𑁆𑀳𑀺, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀯𑁂𑀲𑁆𑀲𑀪𑀽 𑀦𑀸𑀫 𑀦𑀸𑀫𑁂𑀦, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄 [𑀲𑁄 𑀚𑀺𑀦𑁄 (𑀲𑁆𑀬𑀸. 𑀓𑀁. 𑀓.)].

𑁨. 𑀆𑀤𑀺𑀢𑁆𑀢𑀁 𑀯𑀢 𑀭𑀸𑀕𑀕𑁆𑀕𑀺, 𑀢𑀡𑁆𑀳𑀸𑀦𑀁 𑀯𑀺𑀚𑀺𑀢𑀁 𑀢𑀤𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁩. 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁂, 𑀯𑁂𑀲𑁆𑀲𑀪𑀽𑀮𑁄𑀓𑀦𑀸𑀬𑀓𑁂;

𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁪. 𑀧𑀓𑁆𑀓𑀦𑁆𑀢𑁂 𑀘𑀸𑀭𑀺𑀓𑀁 𑀭𑀝𑁆𑀞𑁂, 𑀮𑁄𑀓𑀚𑁂𑀝𑁆𑀞𑁂 𑀦𑀭𑀸𑀲𑀪𑁂;

𑀲𑀢𑁆𑀢𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁫. 𑀫𑀳𑀸𑀤𑀺𑀝𑁆𑀞𑀺𑀁 𑀯𑀺𑀦𑁄𑀤𑁂𑀦𑁆𑀢𑁄, 𑀧𑀸𑀝𑀺𑀳𑁂𑀭𑀁 𑀓𑀭𑁄𑀢𑀺 𑀲𑁄;

𑀲𑀫𑀸𑀕𑀢𑀸 𑀦𑀭𑀫𑀭𑀽, 𑀤𑀲𑀲𑀳𑀲𑁆𑀲𑀻 𑀲𑀤𑁂𑀯𑀓𑁂.

𑁬. 𑀫𑀳𑀸𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸, 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁;

𑀤𑁂𑀯𑀸 𑀘𑁂𑀯 𑀫𑀦𑀼𑀲𑁆𑀲𑀸 𑀘, 𑀩𑀼𑀚𑁆𑀛𑀭𑁂 𑀲𑀝𑁆𑀞𑀺𑀓𑁄𑀝𑀺𑀬𑁄.

𑁭. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀯𑁂𑀲𑁆𑀲𑀪𑀼𑀲𑁆𑀲 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁮. 𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄;

𑀲𑀢𑁆𑀢𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁯. 𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄;

𑀚𑀭𑀸𑀤𑀺𑀪𑀬𑀪𑀻𑀢𑀸𑀦𑀁, 𑀑𑀭𑀲𑀸𑀦𑀁 𑀫𑀳𑁂𑀲𑀺𑀦𑁄.

𑁧𑁦. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀲𑀼𑀤𑀲𑁆𑀲𑀦𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀯𑀻𑀭𑀁, 𑀤𑀸𑀦𑀁 𑀤𑀢𑁆𑀯𑀸 𑀫𑀳𑀸𑀭𑀳𑀁;

𑀅𑀦𑁆𑀦𑀧𑀸𑀦𑁂𑀦 𑀯𑀢𑁆𑀣𑁂𑀦, 𑀲𑀲𑀗𑁆𑀖𑀁 𑀚𑀺𑀦 𑀧𑀽𑀚𑀬𑀺𑀁.

𑁧𑁧. 𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀲𑀫𑀲𑁆𑀲, 𑀘𑀓𑁆𑀓𑀁 𑀯𑀢𑁆𑀢𑀺𑀢𑀫𑀼𑀢𑁆𑀢𑀫𑀁;

𑀲𑀼𑀢𑁆𑀯𑀸𑀦 𑀧𑀡𑀺𑀢𑀁 𑀥𑀫𑁆𑀫𑀁, 𑀧𑀩𑁆𑀩𑀚𑁆𑀚𑀫𑀪𑀺𑀭𑁄𑀘𑀬𑀺𑀁.

𑁧𑁨. 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑁄;

𑀧𑀩𑁆𑀩𑀚𑁆𑀚𑀁 𑀕𑀼𑀡𑀲𑀫𑁆𑀧𑀦𑁆𑀦𑀁, 𑀧𑀩𑁆𑀩𑀚𑀺𑀁 𑀚𑀺𑀦𑀲𑀦𑁆𑀢𑀺𑀓𑁂.

𑁧𑁩. 𑀆𑀘𑀸𑀭𑀕𑀼𑀡𑀲𑀫𑁆𑀧𑀦𑁆𑀦𑁄, 𑀯𑀢𑁆𑀢𑀲𑀻𑀮𑀲𑀫𑀸𑀳𑀺𑀢𑁄;

𑀲𑀩𑁆𑀩𑀜𑁆𑀜𑀼𑀢𑀁 𑀕𑀯𑁂𑀲𑀦𑁆𑀢𑁄, 𑀭𑀫𑀸𑀫𑀺 𑀚𑀺𑀦𑀲𑀸𑀲𑀦𑁂.

𑁧𑁪. 𑀲𑀤𑁆𑀥𑀸𑀧𑀻𑀢𑀺𑀁 𑀉𑀧𑀕𑀦𑁆𑀢𑁆𑀯𑀸, 𑀩𑀼𑀤𑁆𑀥𑀁 𑀯𑀦𑁆𑀤𑀸𑀫𑀺 𑀲𑀢𑁆𑀣𑀭𑀁;

𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺 𑀫𑀬𑁆𑀳𑀁, 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸.

𑁧𑁫. 𑀅𑀦𑀺𑀯𑀢𑁆𑀢𑀫𑀸𑀦𑀲𑀁 𑀜𑀢𑁆𑀯𑀸, 𑀲𑀫𑁆𑀩𑀼𑀤𑁆𑀥𑁄 𑀏𑀢𑀤𑀩𑁆𑀭𑀯𑀺;

‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁬. ‘‘𑀅𑀳𑀼 𑀓𑀧𑀺𑀮𑀯𑁆𑀳𑀬𑀸 𑀭𑀫𑁆𑀫𑀸…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁭. 𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁮. 𑀅𑀦𑁄𑀫𑀁 𑀦𑀸𑀫 𑀦𑀕𑀭𑀁, 𑀲𑀼𑀧𑁆𑀧𑀢𑀻𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀫𑀸𑀢𑀸 𑀬𑀲𑀯𑀢𑀻 𑀦𑀸𑀫, 𑀯𑁂𑀲𑁆𑀲𑀪𑀼𑀲𑁆𑀲 𑀫𑀳𑁂𑀲𑀺𑀦𑁄.

𑁧𑁯. 𑀙 𑀘 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀭𑀼𑀘𑀺 𑀲𑀼𑀭𑀼𑀘𑀺 𑀭𑀢𑀺𑀯𑀟𑁆𑀠𑀦𑁄, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁨𑁦. 𑀅𑀦𑀽𑀦𑀢𑀺𑀁𑀲𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀲𑀼𑀘𑀺𑀢𑁆𑀢𑀸 𑀦𑀸𑀫 𑀲𑀸 𑀦𑀸𑀭𑀻, 𑀲𑀼𑀧𑁆𑀧𑀩𑀼𑀤𑁆𑀥𑁄 𑀦𑀸𑀫 𑀅𑀢𑁆𑀭𑀚𑁄.

𑁨𑁧. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀲𑀺𑀯𑀺𑀓𑀸𑀬𑀸𑀪𑀺𑀦𑀺𑀓𑁆𑀔𑀫𑀺;

𑀙𑀫𑀸𑀲𑀁 𑀧𑀥𑀸𑀦𑀘𑀸𑀭𑀁, 𑀅𑀘𑀭𑀻 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁨𑁨. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀯𑁂𑀲𑁆𑀲𑀪𑀽𑀮𑁄𑀓𑀦𑀸𑀬𑀓𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀅𑀭𑀼𑀡𑀸𑀭𑀸𑀫𑁂 𑀦𑀭𑀼𑀢𑁆𑀢𑀫𑁄.

𑁨𑁩. 𑀲𑁄𑀡𑁄 𑀘 𑀉𑀢𑁆𑀢𑀭𑁄 𑀘𑁂𑀯, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀉𑀧𑀲𑀦𑁆𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀯𑁂𑀲𑁆𑀲𑀪𑀼𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁪. 𑀭𑀸𑀫𑀸 [𑀤𑀸𑀫𑀸 (𑀲𑀻.)] 𑀘𑁂𑀯 𑀲𑀫𑀸𑀮𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀫𑀳𑀸𑀲𑀸𑀮𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁫. 𑀲𑁄𑀢𑁆𑀣𑀺𑀓𑁄 𑀘𑁂𑀯 𑀭𑀫𑁆𑀪𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀕𑁄𑀢𑀫𑀻 𑀲𑀺𑀭𑀺𑀫𑀸 𑀘𑁂𑀯, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁬. 𑀲𑀝𑁆𑀞𑀺𑀭𑀢𑀦𑀫𑀼𑀩𑁆𑀩𑁂𑀥𑁄, 𑀳𑁂𑀫𑀬𑀽𑀧𑀲𑀫𑀽𑀧𑀫𑁄;

𑀓𑀸𑀬𑀸 𑀦𑀺𑀘𑁆𑀙𑀭𑀢𑀺 𑀭𑀲𑁆𑀫𑀺, 𑀭𑀢𑁆𑀢𑀺𑀁𑀯 𑀧𑀩𑁆𑀩𑀢𑁂 𑀲𑀺𑀔𑀻.

𑁨𑁭. 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁮. 𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑀺𑀓𑀁 𑀓𑀢𑁆𑀯𑀸, 𑀯𑀺𑀪𑀚𑀺𑀢𑁆𑀯𑀸 𑀫𑀳𑀸𑀚𑀦𑀁;

𑀥𑀫𑁆𑀫𑀦𑀸𑀯𑀁 𑀞𑀧𑁂𑀢𑁆𑀯𑀸𑀦, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁯. 𑀤𑀲𑁆𑀲𑀦𑁂𑀬𑁆𑀬𑀁 𑀲𑀩𑁆𑀩𑀚𑀦𑀁, 𑀯𑀺𑀳𑀸𑀭𑀁 𑀇𑀭𑀺𑀬𑀸𑀧𑀣𑀁;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸.

𑁩𑁦. 𑀯𑁂𑀲𑁆𑀲𑀪𑀽 𑀚𑀺𑀦𑀯𑀭𑁄 𑀲𑀢𑁆𑀣𑀸, 𑀔𑁂𑀫𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀥𑀸𑀢𑀼𑀯𑀺𑀢𑁆𑀣𑀸𑀭𑀺𑀓𑀁 𑀆𑀲𑀺, 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑀢𑁄𑀢𑀺.

𑀯𑁂𑀲𑁆𑀲𑀪𑀼𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀏𑀓𑀯𑀻𑀲𑀢𑀺𑀫𑁄.