𑁧. 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀅𑀦𑁂𑀚𑁄 𑀅𑀚𑀺𑀢𑀁 𑀚𑀬𑁄;

𑀲𑀢𑀲𑀳𑀲𑁆𑀲𑁂 𑀓𑀧𑁆𑀧𑀸𑀦𑀁, 𑀇𑀢𑁄 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

𑁨. ‘‘𑀯𑀻𑀭𑁄 𑀓𑀫𑀮𑀧𑀢𑁆𑀢𑀓𑁆𑀔𑁄, 𑀲𑀲𑀗𑁆𑀓𑀯𑀺𑀫𑀮𑀸𑀦𑀦𑁄;

𑀓𑀦𑀓𑀸𑀘𑀮𑀲𑀗𑁆𑀓𑀸𑀲𑁄 [𑀓𑀜𑁆𑀘𑀦𑀢𑀘𑀲𑀗𑁆𑀓𑀸𑀲𑁄 (𑀲𑁆𑀬𑀸.)], 𑀭𑀯𑀺𑀤𑀺𑀢𑁆𑀢𑀺𑀲𑀫𑀧𑁆𑀧𑀪𑁄.

𑁩. ‘‘𑀲𑀢𑁆𑀢𑀦𑁂𑀢𑁆𑀢𑀫𑀦𑁄𑀳𑀸𑀭𑀻, 𑀯𑀭𑀮𑀓𑁆𑀔𑀡𑀪𑀽𑀲𑀺𑀢𑁄;

𑀲𑀩𑁆𑀩𑀯𑀸𑀓𑁆𑀬𑀧𑀣𑀸𑀢𑀻𑀢𑁄, 𑀫𑀦𑀼𑀚𑀸𑀫𑀭𑀲𑀓𑁆𑀓𑀢𑁄.

𑁪. ‘‘𑀲𑀫𑁆𑀩𑀼𑀤𑁆𑀥𑁄 𑀩𑁄𑀥𑀬𑀁 𑀲𑀢𑁆𑀢𑁂, 𑀯𑀸𑀕𑀻𑀲𑁄 𑀫𑀥𑀼𑀭𑀲𑁆𑀲𑀭𑁄;

𑀓𑀭𑀼𑀡𑀸𑀦𑀺𑀩𑀦𑁆𑀥𑀲𑀦𑁆𑀢𑀸𑀦𑁄, 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄.

𑁫. ‘‘𑀤𑁂𑀲𑁂𑀢𑀺 𑀫𑀥𑀼𑀭𑀁 𑀥𑀫𑁆𑀫𑀁, 𑀘𑀢𑀼𑀲𑀘𑁆𑀘𑀽𑀧𑀲𑀁𑀳𑀺𑀢𑀁;

𑀦𑀺𑀫𑀼𑀕𑁆𑀕𑁂 𑀫𑁄𑀳𑀧𑀗𑁆𑀓𑀫𑁆𑀳𑀺, 𑀲𑀫𑀼𑀤𑁆𑀥𑀭𑀢𑀺 𑀧𑀸𑀡𑀺𑀦𑁂.

𑁬. ‘‘𑀢𑀤𑀸 𑀏𑀓𑀘𑀭𑁄 𑀳𑀼𑀢𑁆𑀯𑀸, 𑀢𑀸𑀧𑀲𑁄 𑀳𑀺𑀫𑀯𑀸𑀮𑀬𑁄;

𑀦𑀪𑀲𑀸 𑀫𑀸𑀦𑀼𑀲𑀁 𑀮𑁄𑀓𑀁, 𑀕𑀘𑁆𑀙𑀦𑁆𑀢𑁄 𑀚𑀺𑀦𑀫𑀤𑁆𑀤𑀲𑀁.

𑁭. ‘‘𑀉𑀧𑁂𑀘𑁆𑀘 𑀲𑀦𑁆𑀢𑀺𑀓𑀁 𑀢𑀲𑁆𑀲, 𑀅𑀲𑁆𑀲𑁄𑀲𑀺𑀁 𑀥𑀫𑁆𑀫𑀤𑁂𑀲𑀦𑀁;

𑀯𑀡𑁆𑀡𑀬𑀦𑁆𑀢𑀲𑁆𑀲 𑀯𑀻𑀭𑀲𑁆𑀲, 𑀲𑀸𑀯𑀓𑀲𑁆𑀲 𑀫𑀳𑀸𑀕𑀼𑀡𑀁.

𑁮. ‘‘𑀲𑀗𑁆𑀔𑀺𑀢𑁆𑀢𑁂𑀦 𑀫𑀬𑀸 𑀯𑀼𑀢𑁆𑀢𑀁, 𑀯𑀺𑀢𑁆𑀣𑀸𑀭𑁂𑀦 𑀧𑀓𑀸𑀲𑀬𑀁;

𑀧𑀭𑀺𑀲𑀁 𑀫𑀜𑁆𑀘 𑀢𑁄𑀲𑁂𑀢𑀺, 𑀬𑀣𑀸 𑀓𑀘𑁆𑀘𑀸𑀬𑀦𑁄 𑀅𑀬𑀁.

𑁯. ‘‘‘𑀦𑀸𑀳𑀁 𑀏𑀯𑀫𑀺𑀥𑁂𑀓𑀘𑁆𑀘𑀁 [𑀏𑀯𑀁𑀯𑀺𑀥𑀁 𑀓𑀜𑁆𑀘𑀺 (𑀲𑀻. 𑀧𑀻.)], 𑀅𑀜𑁆𑀜𑀁 𑀧𑀲𑁆𑀲𑀸𑀫𑀺 𑀲𑀸𑀯𑀓𑀁;

𑀢𑀲𑁆𑀫𑀸𑀢𑀤𑀕𑁆𑀕𑁂 [𑀢𑀲𑁆𑀫𑁂𑀢𑀤𑀕𑁆𑀕𑁂 (𑀲𑀻.)] 𑀏𑀲𑀕𑁆𑀕𑁄, 𑀏𑀯𑀁 𑀥𑀸𑀭𑁂𑀣 𑀪𑀺𑀓𑁆𑀔𑀯𑁄’.

𑁧𑁦. ‘‘𑀢𑀤𑀸𑀳𑀁 𑀯𑀺𑀫𑁆𑀳𑀺𑀢𑁄 𑀳𑀼𑀢𑁆𑀯𑀸, 𑀲𑀼𑀢𑁆𑀯𑀸 𑀯𑀸𑀓𑁆𑀬𑀁 𑀫𑀦𑁄𑀭𑀫𑀁;

𑀳𑀺𑀫𑀯𑀦𑁆𑀢𑀁 𑀕𑀫𑀺𑀢𑁆𑀯𑀸𑀦, 𑀆𑀳𑀺𑀢𑁆𑀯𑀸 [𑀆𑀳𑀢𑁆𑀯𑀸 (𑀲𑀻. 𑀧𑀻.)] 𑀧𑀼𑀧𑁆𑀨𑀲𑀜𑁆𑀘𑀬𑀁.

𑁧𑁧. ‘‘𑀧𑀽𑀚𑁂𑀢𑁆𑀯𑀸 𑀮𑁄𑀓𑀲𑀭𑀡𑀁, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁;

𑀢𑀤𑀸 𑀫𑀫𑀸𑀲𑀬𑀁 𑀜𑀢𑁆𑀯𑀸, 𑀩𑁆𑀬𑀸𑀓𑀸𑀲𑀺 𑀲 𑀭𑀡𑀜𑁆𑀚𑀳𑁄.

𑁧𑁨. ‘‘‘𑀧𑀲𑁆𑀲𑀣𑁂𑀢𑀁 𑀇𑀲𑀺𑀯𑀭𑀁, 𑀦𑀺𑀤𑁆𑀥𑀦𑁆𑀢𑀓𑀦𑀓𑀢𑁆𑀢𑀘𑀁;

𑀉𑀤𑁆𑀥𑀕𑁆𑀕𑀮𑁄𑀫𑀁 𑀧𑀻𑀡𑀁𑀲𑀁, 𑀅𑀘𑀮𑀁 𑀧𑀜𑁆𑀚𑀮𑀺𑀁 𑀞𑀺𑀢𑀁.

𑁧𑁩. ‘‘‘𑀳𑀸𑀲𑀁 𑀲𑀼𑀧𑀼𑀡𑁆𑀡𑀦𑀬𑀦𑀁, 𑀩𑀼𑀤𑁆𑀥𑀯𑀡𑁆𑀡𑀕𑀢𑀸𑀲𑀬𑀁;

𑀥𑀫𑁆𑀫𑀚𑀁 𑀉𑀕𑁆𑀕𑀳𑀤𑀬𑀁 [𑀥𑀫𑁆𑀫𑀁𑀯 𑀯𑀺𑀕𑁆𑀕𑀳𑀯𑀭𑀁 (𑀲𑀻.), 𑀥𑀫𑁆𑀫𑀧𑀝𑀺𑀕𑁆𑀕𑀳𑀯𑀭𑀁 (𑀧𑀻.)], 𑀅𑀫𑀢𑀸𑀲𑀺𑀢𑁆𑀢𑀲𑀦𑁆𑀦𑀺𑀪𑀁’.

𑁧𑁪. ‘‘𑀓𑀘𑁆𑀘𑀸𑀦𑀲𑁆𑀲 𑀕𑀼𑀡𑀁 𑀲𑀼𑀢𑁆𑀯𑀸, 𑀢𑀁 𑀞𑀸𑀦𑀁 𑀧𑀢𑁆𑀣𑀬𑀁 𑀞𑀺𑀢𑁄;

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀕𑁄𑀢𑀫𑀲𑁆𑀲 𑀫𑀳𑀸𑀫𑀼𑀦𑁂.

𑁧𑁫. ‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀓𑀘𑁆𑀘𑀸𑀦𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

𑁧𑁬. ‘‘𑀩𑀳𑀼𑀲𑁆𑀲𑀼𑀢𑁄 𑀫𑀳𑀸𑀜𑀸𑀡𑀻, 𑀅𑀥𑀺𑀧𑁆𑀧𑀸𑀬𑀯𑀺𑀤𑀽 𑀫𑀼𑀦𑁂;

𑀧𑀸𑀧𑀼𑀡𑀺𑀲𑁆𑀲𑀢𑀺 𑀢𑀁 𑀞𑀸𑀦𑀁, 𑀬𑀣𑀸𑀬𑀁 𑀩𑁆𑀬𑀸𑀓𑀢𑁄 𑀫𑀬𑀸.

𑁧𑁭. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁮. ‘‘𑀤𑀼𑀯𑁂 𑀪𑀯𑁂 𑀲𑀁𑀲𑀭𑀸𑀫𑀺, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀅𑀜𑁆𑀜𑀁 𑀕𑀢𑀺𑀁 𑀦 𑀕𑀘𑁆𑀙𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁯. ‘‘𑀤𑀼𑀯𑁂 𑀓𑀼𑀮𑁂 𑀧𑀚𑀸𑀬𑀸𑀫𑀺, 𑀔𑀢𑁆𑀢𑀺𑀬𑁂 𑀅𑀣 𑀩𑁆𑀭𑀸𑀳𑁆𑀫𑀡𑁂;

𑀦𑀻𑀘𑁂 𑀓𑀼𑀮𑁂 𑀦 𑀚𑀸𑀬𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁦. ‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑁄 𑀉𑀚𑁆𑀚𑁂𑀦𑀺𑀬𑀁 𑀧𑀼𑀭𑁂 [𑀚𑀸𑀢𑁄, 𑀉𑀚𑁆𑀚𑁂𑀦𑀺𑀬𑀁 𑀧𑀼𑀭𑁂 𑀭𑀫𑁂 (𑀲𑁆𑀬𑀸.)];

𑀧𑀚𑁆𑀚𑁄𑀢𑀲𑁆𑀲 𑀘 𑀘𑀡𑁆𑀟𑀲𑁆𑀲, 𑀧𑀼𑀭𑁄𑀳𑀺𑀢𑀤𑀺𑀚𑀸𑀥𑀺𑀦𑁄 [𑀧𑀼𑀭𑁄𑀳𑀺𑀢𑀤𑀺𑀚𑀸𑀢𑀺𑀦𑁄 (𑀲𑀻. 𑀧𑀻.)].

𑁨𑁧. ‘‘𑀧𑀼𑀢𑁆𑀢𑁄 𑀢𑀺𑀭𑀺𑀝𑀺𑀯𑀘𑁆𑀙𑀲𑁆𑀲 [𑀢𑀺𑀭𑀺𑀝𑀯𑀘𑁆𑀙𑀲𑁆𑀲 (𑀲𑀻.), 𑀢𑀺𑀧𑀺𑀢𑀺𑀯𑀘𑁆𑀙𑀲𑁆𑀲 (𑀲𑁆𑀬𑀸.)], 𑀦𑀺𑀧𑀼𑀡𑁄 𑀯𑁂𑀤𑀧𑀸𑀭𑀕𑀽;

𑀫𑀸𑀢𑀸 𑀘 𑀘𑀦𑁆𑀤𑀺𑀫𑀸 𑀦𑀸𑀫, 𑀓𑀘𑁆𑀘𑀸𑀦𑁄𑀳𑀁 𑀯𑀭𑀢𑁆𑀢𑀘𑁄.

𑁨𑁨. ‘‘𑀯𑀻𑀫𑀁𑀲𑀦𑀢𑁆𑀣𑀁 𑀩𑀼𑀤𑁆𑀥𑀲𑁆𑀲, 𑀪𑀽𑀫𑀺𑀧𑀸𑀮𑁂𑀦 𑀧𑁂𑀲𑀺𑀢𑁄;

𑀤𑀺𑀲𑁆𑀯𑀸 𑀫𑁄𑀓𑁆𑀔𑀧𑀼𑀭𑀤𑁆𑀯𑀸𑀭𑀁, 𑀦𑀸𑀬𑀓𑀁 𑀕𑀼𑀡𑀲𑀜𑁆𑀘𑀬𑀁.

𑁨𑁩. ‘‘𑀲𑀼𑀢𑁆𑀯𑀸 𑀘 𑀯𑀺𑀫𑀮𑀁 𑀯𑀸𑀓𑁆𑀬𑀁, 𑀕𑀢𑀺𑀧𑀗𑁆𑀓𑀯𑀺𑀲𑁄𑀲𑀦𑀁;

𑀧𑀸𑀧𑀼𑀡𑀺𑀁 𑀅𑀫𑀢𑀁 𑀲𑀦𑁆𑀢𑀁, 𑀲𑁂𑀲𑁂𑀳𑀺 𑀲𑀳 𑀲𑀢𑁆𑀢𑀳𑀺.

𑁨𑁪. ‘‘𑀅𑀥𑀺𑀧𑁆𑀧𑀸𑀬𑀯𑀺𑀤𑀽 𑀚𑀸𑀢𑁄, 𑀲𑀼𑀕𑀢𑀲𑁆𑀲 𑀫𑀳𑀸𑀫𑀢𑁂;

𑀞𑀧𑀺𑀢𑁄 𑀏𑀢𑀤𑀕𑁆𑀕𑁂 𑀘, 𑀲𑀼𑀲𑀫𑀺𑀤𑁆𑀥𑀫𑀦𑁄𑀭𑀣𑁄.

𑁨𑁫. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁬. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂; 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.