𑁮. 𑀩𑁄𑀥𑀺𑀲𑀫𑁆𑀫𑀚𑁆𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁮. ‘‘𑀅𑀳𑀁 𑀧𑀼𑀭𑁂 𑀩𑁄𑀥𑀺𑀧𑀢𑁆𑀢𑀁, 𑀉𑀚𑁆𑀛𑀺𑀢𑀁 𑀘𑁂𑀢𑀺𑀬𑀗𑁆𑀕𑀡𑁂;

𑀢𑀁 𑀕𑀳𑁂𑀢𑁆𑀯𑀸𑀦 𑀙𑀟𑁆𑀟𑁂𑀲𑀺𑀁, 𑀅𑀮𑀪𑀺𑀁 𑀯𑀻𑀲𑀢𑀻𑀕𑀼𑀡𑁂.

𑁪𑁯. ‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀢𑁂𑀚𑁂𑀦, 𑀲𑀁𑀲𑀭𑀦𑁆𑀢𑁄 𑀪𑀯𑀸𑀪𑀯𑁂;

𑀤𑀼𑀯𑁂 𑀪𑀯𑁂 𑀲𑀁𑀲𑀭𑀸𑀫𑀺, 𑀤𑁂𑀯𑀢𑁆𑀢𑁂 𑀘𑀸𑀧𑀺 𑀫𑀸𑀦𑀼𑀲𑁂.

𑁫𑁦. ‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀆𑀕𑀦𑁆𑀢𑁆𑀯𑀸 𑀫𑀸𑀦𑀼𑀲𑀁 𑀪𑀯𑀁;

𑀤𑀼𑀯𑁂 𑀓𑀼𑀮𑁂 𑀧𑀚𑀸𑀬𑀸𑀫𑀺, 𑀔𑀢𑁆𑀢𑀺𑀬𑁂 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑁂.

𑁫𑁧. ‘‘𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑁆𑀧𑀦𑁆𑀦𑁄, 𑀆𑀭𑁄𑀳𑀧𑀭𑀺𑀡𑀸𑀳𑀯𑀸;

𑀅𑀪𑀺𑀭𑀽𑀧𑁄 𑀲𑀼𑀘𑀺 𑀳𑁄𑀫𑀺, 𑀲𑀫𑁆𑀧𑀼𑀡𑁆𑀡𑀗𑁆𑀕𑁄 𑀅𑀦𑀽𑀦𑀓𑁄.

𑁫𑁨. ‘‘𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑁂 𑀯𑀸, 𑀚𑀸𑀢𑁄 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺;

𑀪𑀯𑁂 𑀲𑀼𑀯𑀡𑁆𑀡𑀯𑀡𑁆𑀡𑁄 𑀘, 𑀉𑀢𑁆𑀢𑀢𑁆𑀢𑀓𑀦𑀓𑀽𑀧𑀫𑁄.

𑁫𑁩. ‘‘𑀫𑀼𑀤𑀼𑀓𑀸 𑀫𑀤𑁆𑀤𑀯𑀸 𑀲𑁆𑀦𑀺𑀤𑁆𑀥𑀸 [𑀫𑀼𑀤𑀼 𑀫𑀤𑁆𑀤𑀯𑀸 𑀲𑀺𑀦𑀺𑀤𑁆𑀥𑀸 (𑀲𑁆𑀬𑀸.)], 𑀲𑀼𑀔𑀼𑀫𑀸 𑀲𑀼𑀓𑀼𑀫𑀸𑀭𑀺𑀓𑀸;

𑀙𑀯𑀺 𑀫𑁂 𑀲𑀩𑁆𑀩𑀤𑀸 𑀳𑁄𑀢𑀺, 𑀩𑁄𑀥𑀺𑀧𑀢𑁆𑀢𑁂 𑀲𑀼𑀙𑀟𑁆𑀟𑀺𑀢𑁂 [𑀲𑀼𑀙𑀟𑁆𑀟𑀺𑀦𑁂 (𑀲𑀻.)].

𑁫𑁪. ‘‘𑀬𑀢𑁄 𑀓𑀼𑀢𑁄𑀘𑀺 𑀕𑀢𑀻𑀲𑀼, 𑀲𑀭𑀻𑀭𑁂 𑀲𑀫𑀼𑀤𑀸𑀕𑀢𑁂;

𑀦 𑀮𑀺𑀫𑁆𑀧𑀢𑀺 𑀭𑀚𑁄𑀚𑀮𑁆𑀮𑀁, 𑀯𑀺𑀧𑀸𑀓𑁄 𑀧𑀢𑁆𑀢𑀙𑀟𑁆𑀟𑀺𑀢𑁂.

𑁫𑁫. ‘‘𑀉𑀡𑁆𑀳𑁂 𑀯𑀸𑀢𑀸𑀢𑀧𑁂 𑀢𑀲𑁆𑀲, 𑀅𑀕𑁆𑀕𑀺𑀢𑀸𑀧𑁂𑀦 𑀯𑀸 𑀧𑀦;

𑀕𑀢𑁆𑀢𑁂 𑀲𑁂𑀤𑀸 𑀦 𑀫𑀼𑀘𑁆𑀘𑀦𑁆𑀢𑀺, 𑀯𑀺𑀧𑀸𑀓𑁄 𑀧𑀢𑁆𑀢𑀙𑀟𑁆𑀟𑀺𑀢𑁂.

𑁫𑁬. ‘‘𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀘, 𑀢𑀺𑀮𑀓𑀸 𑀧𑀺𑀴𑀓𑀸 𑀢𑀣𑀸;

𑀦 𑀳𑁄𑀦𑁆𑀢𑀺 𑀓𑀸𑀬𑁂 𑀤𑀤𑁆𑀤𑀼 𑀘, 𑀯𑀺𑀧𑀸𑀓𑁄 𑀧𑀢𑁆𑀢𑀙𑀟𑁆𑀟𑀺𑀢𑁂.

𑁫𑁭. ‘‘𑀅𑀧𑀭𑀫𑁆𑀧𑀺 𑀕𑀼𑀡𑀁 𑀢𑀲𑁆𑀲, 𑀦𑀺𑀩𑁆𑀩𑀢𑁆𑀢𑀢𑀺 𑀪𑀯𑀸𑀪𑀯𑁂;

𑀭𑁄𑀕𑀸 𑀦 𑀳𑁄𑀦𑁆𑀢𑀺 𑀓𑀸𑀬𑀲𑁆𑀫𑀺𑀁, 𑀯𑀺𑀧𑀸𑀓𑁄 𑀧𑀢𑁆𑀢𑀙𑀟𑁆𑀟𑀺𑀢𑁂.

𑁫𑁮. ‘‘𑀅𑀧𑀭𑀫𑁆𑀧𑀺 𑀕𑀼𑀡𑀁 𑀢𑀲𑁆𑀲, 𑀦𑀺𑀩𑁆𑀩𑀢𑁆𑀢𑀢𑀺 𑀪𑀯𑀸𑀪𑀯𑁂;

𑀦 𑀳𑁄𑀢𑀺 𑀘𑀺𑀢𑁆𑀢𑀚𑀸 𑀧𑀻𑀴𑀸, 𑀯𑀺𑀧𑀸𑀓𑁄 𑀧𑀢𑁆𑀢𑀙𑀟𑁆𑀟𑀺𑀢𑁂.

𑁫𑁯. ‘‘𑀅𑀧𑀭𑀫𑁆𑀧𑀺 𑀕𑀼𑀡𑀁 𑀢𑀲𑁆𑀲, 𑀦𑀺𑀩𑁆𑀩𑀢𑁆𑀢𑀢𑀺 𑀪𑀯𑀸𑀪𑀯𑁂;

𑀅𑀫𑀺𑀢𑁆𑀢𑀸 𑀦 𑀪𑀯𑀦𑁆𑀢𑀲𑁆𑀲, 𑀯𑀺𑀧𑀸𑀓𑁄 𑀧𑀢𑁆𑀢𑀙𑀟𑁆𑀟𑀺𑀢𑁂.

𑁬𑁦. ‘‘𑀅𑀧𑀭𑀫𑁆𑀧𑀺 𑀕𑀼𑀡𑀁 𑀢𑀲𑁆𑀲, 𑀦𑀺𑀩𑁆𑀩𑀢𑁆𑀢𑀢𑀺 𑀪𑀯𑀸𑀪𑀯𑁂;

𑀅𑀦𑀽𑀦𑀪𑁄𑀕𑁄 𑀪𑀯𑀢𑀺, 𑀯𑀺𑀧𑀸𑀓𑁄 𑀧𑀢𑁆𑀢𑀙𑀟𑁆𑀟𑀺𑀢𑁂.

𑁬𑁧. ‘‘𑀅𑀧𑀭𑀫𑁆𑀧𑀺 𑀕𑀼𑀡𑀁 𑀢𑀲𑁆𑀲, 𑀦𑀺𑀩𑁆𑀩𑀢𑁆𑀢𑀢𑀺 𑀪𑀯𑀸𑀪𑀯𑁂;

𑀅𑀕𑁆𑀕𑀺𑀭𑀸𑀚𑀽𑀳𑀺 𑀘𑁄𑀭𑁂𑀳𑀺, 𑀦 𑀳𑁄𑀢𑀺 𑀉𑀤𑀓𑁂 𑀪𑀬𑀁.

𑁬𑁨. ‘‘𑀅𑀧𑀭𑀫𑁆𑀧𑀺 𑀕𑀼𑀡𑀁 𑀢𑀲𑁆𑀲, 𑀦𑀺𑀩𑁆𑀩𑀢𑁆𑀢𑀢𑀺 𑀪𑀯𑀸𑀪𑀯𑁂;

𑀤𑀸𑀲𑀺𑀤𑀸𑀲𑀸 𑀅𑀦𑀼𑀘𑀭𑀸, 𑀳𑁄𑀦𑁆𑀢𑀺 𑀘𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸.

𑁬𑁩. ‘‘𑀬𑀫𑁆𑀳𑀺 𑀆𑀬𑀼𑀧𑁆𑀧𑀫𑀸𑀡𑀫𑁆𑀳𑀺, 𑀚𑀸𑀬𑀢𑁂 𑀫𑀸𑀦𑀼𑀲𑁂 𑀪𑀯𑁂;

𑀢𑀢𑁄 𑀦 𑀳𑀸𑀬𑀢𑁂 𑀆𑀬𑀼, 𑀢𑀺𑀝𑁆𑀞𑀢𑁂 𑀬𑀸𑀯𑀢𑀸𑀬𑀼𑀓𑀁.

𑁬𑁪. ‘‘𑀅𑀩𑁆𑀪𑀦𑁆𑀢𑀭𑀸 𑀘 𑀩𑀸𑀳𑀺𑀭𑀸 [𑀩𑀳𑀺𑀘𑀭𑀸 (𑀲𑀻. 𑀧𑀻. 𑀓.)], 𑀦𑁂𑀕𑀫𑀸 𑀘 𑀲𑀭𑀝𑁆𑀞𑀓𑀸;

𑀦𑀼𑀬𑀼𑀢𑁆𑀢𑀸 𑀳𑁄𑀦𑁆𑀢𑀺 𑀲𑀩𑁆𑀩𑁂𑀧𑀺, 𑀯𑀼𑀤𑁆𑀥𑀺𑀓𑀸𑀫𑀸 𑀲𑀼𑀔𑀺𑀘𑁆𑀙𑀓𑀸.

𑁬𑁫. ‘‘𑀪𑁄𑀕𑀯𑀸 𑀬𑀲𑀯𑀸 𑀳𑁄𑀫𑀺, 𑀲𑀺𑀭𑀺𑀫𑀸 𑀜𑀸𑀢𑀺𑀧𑀓𑁆𑀔𑀯𑀸;

𑀅𑀧𑁂𑀢𑀪𑀬𑀲𑀦𑁆𑀢𑀸𑀲𑁄, 𑀪𑀯𑁂𑀳𑀁 𑀲𑀩𑁆𑀩𑀢𑁄 𑀪𑀯𑁂.

𑁬𑁬. ‘‘𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸, 𑀕𑀦𑁆𑀥𑀩𑁆𑀩𑀸 𑀬𑀓𑁆𑀔𑀭𑀓𑁆𑀔𑀲𑀸;

𑀲𑀩𑁆𑀩𑁂 𑀢𑁂 𑀧𑀭𑀺𑀭𑀓𑁆𑀔𑀦𑁆𑀢𑀺, 𑀪𑀯𑁂 𑀲𑀁𑀲𑀭𑀢𑁄 𑀲𑀤𑀸.

𑁬𑁭. ‘‘𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑁂 𑀘, 𑀅𑀦𑀼𑀪𑁄𑀢𑁆𑀯𑀸 𑀉𑀪𑁄 𑀬𑀲𑁂;

𑀅𑀯𑀲𑀸𑀦𑁂 𑀘 𑀦𑀺𑀩𑁆𑀩𑀸𑀦𑀁, 𑀲𑀺𑀯𑀁 𑀧𑀢𑁆𑀢𑁄 𑀅𑀦𑀼𑀢𑁆𑀢𑀭𑀁.

𑁬𑁮. ‘‘𑀲𑀫𑁆𑀩𑀼𑀤𑁆𑀥𑀫𑀼𑀤𑁆𑀤𑀺𑀲𑀺𑀢𑁆𑀯𑀸𑀦, 𑀩𑁄𑀥𑀺𑀁 𑀯𑀸 𑀢𑀲𑁆𑀲 𑀲𑀢𑁆𑀣𑀼𑀦𑁄;

𑀬𑁄 𑀧𑀼𑀜𑁆𑀜𑀁 𑀧𑀲𑀯𑁂 𑀧𑁄𑀲𑁄, 𑀢𑀲𑁆𑀲 𑀓𑀺𑀁 𑀦𑀸𑀫 𑀤𑀼𑀮𑁆𑀮𑀪𑀁.

𑁬𑁯. ‘‘𑀫𑀕𑁆𑀕𑁂 𑀨𑀮𑁂 𑀆𑀕𑀫𑁂 𑀘, 𑀛𑀸𑀦𑀸𑀪𑀺𑀜𑁆𑀜𑀸𑀕𑀼𑀡𑁂𑀲𑀼 𑀘;

𑀅𑀜𑁆𑀜𑁂𑀲𑀁 𑀅𑀥𑀺𑀓𑁄 𑀳𑀼𑀢𑁆𑀯𑀸, 𑀦𑀺𑀩𑁆𑀩𑀸𑀬𑀸𑀫𑀺 𑀅𑀦𑀸𑀲𑀯𑁄.

𑁭𑁦. ‘‘𑀧𑀼𑀭𑁂𑀳𑀁 𑀩𑁄𑀥𑀺𑀬𑀸 𑀧𑀢𑁆𑀢𑀁, 𑀙𑀟𑁆𑀟𑁂𑀢𑁆𑀯𑀸 𑀳𑀝𑁆𑀞𑀫𑀸𑀦𑀲𑁄;

𑀇𑀫𑁂𑀳𑀺 𑀯𑀻𑀲𑀢𑀗𑁆𑀕𑁂𑀳𑀺, 𑀲𑀫𑀗𑁆𑀕𑀻 𑀳𑁄𑀫𑀺 𑀲𑀩𑁆𑀩𑀤𑀸.

𑁭𑁧. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁨. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁭𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑁄𑀥𑀺𑀲𑀫𑁆𑀫𑀚𑁆𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑁄𑀥𑀺𑀲𑀫𑁆𑀫𑀚𑁆𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.