𑁧𑁦. 𑀲𑀼𑀕𑀦𑁆𑀥𑀢𑁆𑀣𑁂𑀭𑀅𑀧𑀤𑀸𑀦𑀁

𑁮𑁧. ‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦 [𑀦𑀸𑀫𑁂𑀦 (𑀲𑀩𑁆𑀩𑀢𑁆𑀣)], 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

𑁮𑁨. ‘‘𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑁄, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄;

𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀯𑀼𑀢𑁄, 𑀭𑀁𑀲𑀺𑀚𑀸𑀮𑀲𑀫𑁄𑀢𑁆𑀣𑀝𑁄 [𑀭𑀁𑀲𑀺𑀚𑀸𑀮𑀲𑀫𑁄𑀲𑀝𑁄 (𑀲𑀻. 𑀧𑀻.)].

𑁮𑁩. ‘‘𑀅𑀲𑁆𑀲𑀸𑀲𑁂𑀢𑀸 𑀬𑀣𑀸 𑀘𑀦𑁆𑀤𑁄, 𑀲𑀽𑀭𑀺𑀬𑁄𑀯 𑀧𑀪𑀗𑁆𑀓𑀭𑁄;

𑀦𑀺𑀩𑁆𑀩𑀸𑀧𑁂𑀢𑀸 𑀬𑀣𑀸 𑀫𑁂𑀖𑁄, 𑀲𑀸𑀕𑀭𑁄𑀯 𑀕𑀼𑀡𑀸𑀓𑀭𑁄.

𑁮𑁪. ‘‘𑀥𑀭𑀡𑀻𑀭𑀺𑀯 𑀲𑀻𑀮𑁂𑀦, 𑀳𑀺𑀫𑀯𑀸𑀯 𑀲𑀫𑀸𑀥𑀺𑀦𑀸;

𑀆𑀓𑀸𑀲𑁄 𑀯𑀺𑀬 𑀧𑀜𑁆𑀜𑀸𑀬, 𑀅𑀲𑀗𑁆𑀕𑁄 𑀅𑀦𑀺𑀮𑁄 𑀬𑀣𑀸.

𑁮𑁫. ‘‘𑀲 𑀓𑀤𑀸𑀘𑀺 𑀫𑀳𑀸𑀯𑀻𑀭𑁄, 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄;

𑀲𑀘𑁆𑀘𑀸𑀦𑀺 𑀲𑀫𑁆𑀧𑀓𑀸𑀲𑁂𑀢𑀺, 𑀉𑀤𑁆𑀥𑀭𑀦𑁆𑀢𑁄 𑀫𑀳𑀸𑀚𑀦𑀁.

𑁮𑁬. ‘‘𑀢𑀤𑀸 𑀳𑀺 𑀩𑀸𑀭𑀸𑀡𑀲𑀺𑀬𑀁, 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀫𑀳𑀸𑀬𑀲𑁄;

𑀆𑀲𑀳𑀁 𑀥𑀦𑀥𑀜𑁆𑀜𑀲𑁆𑀲 [𑀅𑀦𑀦𑁆𑀢𑀥𑀦𑀥𑀜𑁆𑀜𑀲𑁆𑀲 (𑀓.)], 𑀧𑀳𑀽𑀢𑀲𑁆𑀲 𑀩𑀳𑀽 𑀢𑀤𑀸.

𑁮𑁭. ‘‘𑀚𑀗𑁆𑀖𑀸𑀯𑀺𑀳𑀸𑀭𑀁 𑀯𑀺𑀘𑀭𑀁, 𑀫𑀺𑀕𑀤𑀸𑀬𑀫𑀼𑀧𑁂𑀘𑁆𑀘𑀳𑀁 [𑀫𑀼𑀧𑁂𑀲𑀳𑀁 (𑀓.)];

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀤𑁂𑀲𑁂𑀦𑁆𑀢𑀁 𑀅𑀫𑀢𑀁 𑀧𑀤𑀁.

𑁮𑁮. ‘‘𑀯𑀺𑀲𑀝𑁆𑀞𑀓𑀦𑁆𑀢𑀯𑀘𑀦𑀁, 𑀓𑀭𑀯𑀻𑀓𑀲𑀫𑀲𑁆𑀲𑀭𑀁;

𑀳𑀁𑀲𑀭𑀼𑀢𑁂𑀳𑀺 [𑀳𑀁𑀲𑀤𑀼𑀦𑁆𑀤𑀼𑀪𑀺 (𑀲𑁆𑀬𑀸. 𑀧𑀻.)] 𑀦𑀺𑀕𑁆𑀖𑁄𑀲𑀁, 𑀯𑀺𑀜𑁆𑀜𑀸𑀧𑁂𑀦𑁆𑀢𑀁 𑀫𑀳𑀸𑀚𑀦𑀁.

𑁮𑁯. ‘‘𑀤𑀺𑀲𑁆𑀯𑀸 𑀤𑁂𑀯𑀸𑀢𑀺𑀤𑁂𑀯𑀁 𑀢𑀁, 𑀲𑀼𑀢𑁆𑀯𑀸𑀯 𑀫𑀥𑀼𑀭𑀁 𑀕𑀺𑀭𑀁;

𑀧𑀳𑀸𑀬𑀦𑀧𑁆𑀧𑀓𑁂 𑀪𑁄𑀕𑁂, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁯𑁦. ‘‘𑀏𑀯𑀁 𑀧𑀩𑁆𑀩𑀚𑀺𑀢𑁄 𑀘𑀸𑀳𑀁, 𑀦 𑀘𑀺𑀭𑁂𑀦 𑀩𑀳𑀼𑀲𑁆𑀲𑀼𑀢𑁄;

𑀅𑀳𑁄𑀲𑀺𑀁 𑀥𑀫𑁆𑀫𑀓𑀣𑀺𑀓𑁄, 𑀯𑀺𑀘𑀺𑀢𑁆𑀢𑀧𑀝𑀺𑀪𑀸𑀡𑀯𑀸.

𑁯𑁧. ‘‘𑀫𑀳𑀸𑀧𑀭𑀺𑀲𑀫𑀚𑁆𑀛𑁂𑀳𑀁, 𑀳𑀝𑁆𑀞𑀘𑀺𑀢𑁆𑀢𑁄 𑀧𑀼𑀦𑀧𑁆𑀧𑀼𑀦𑀁;

𑀯𑀡𑁆𑀡𑀬𑀺𑀁 𑀳𑁂𑀫𑀯𑀡𑁆𑀡𑀲𑁆𑀲, 𑀯𑀡𑁆𑀡𑀁 𑀯𑀡𑁆𑀡𑀯𑀺𑀲𑀸𑀭𑀤𑁄.

𑁯𑁨. ‘‘𑀏𑀲 𑀔𑀻𑀡𑀸𑀲𑀯𑁄 𑀩𑀼𑀤𑁆𑀥𑁄, 𑀅𑀦𑀻𑀖𑁄 𑀙𑀺𑀦𑁆𑀦𑀲𑀁𑀲𑀬𑁄;

𑀲𑀩𑁆𑀩𑀓𑀫𑁆𑀫𑀓𑁆𑀔𑀬𑀁 𑀧𑀢𑁆𑀢𑁄, 𑀯𑀺𑀫𑀼𑀢𑁆𑀢𑁄𑀧𑀥𑀺𑀲𑀗𑁆𑀔𑀬𑁂.

𑁯𑁩. ‘‘𑀏𑀲 𑀲𑁄 𑀪𑀕𑀯𑀸 𑀩𑀼𑀤𑁆𑀥𑁄, 𑀏𑀲 𑀲𑀻𑀳𑁄 𑀅𑀦𑀼𑀢𑁆𑀢𑀭𑁄;

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀩𑁆𑀭𑀳𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀓𑁄.

𑁯𑁪. ‘‘𑀤𑀦𑁆𑀢𑁄 𑀤𑀫𑁂𑀢𑀸 𑀲𑀦𑁆𑀢𑁄 𑀘, 𑀲𑀫𑁂𑀢𑀸 𑀦𑀺𑀩𑁆𑀩𑀼𑀢𑁄 𑀇𑀲𑀺;

𑀦𑀺𑀩𑁆𑀩𑀸𑀧𑁂𑀢𑀸 𑀘 𑀅𑀲𑁆𑀲𑀢𑁆𑀣𑁄, 𑀅𑀲𑁆𑀲𑀸𑀲𑁂𑀢𑀸 𑀫𑀳𑀸𑀚𑀦𑀁.

𑁯𑁫. ‘‘𑀯𑀻𑀭𑁄 𑀲𑀽𑀭𑁄 𑀘 𑀯𑀺𑀓𑁆𑀓𑀦𑁆𑀢𑁄 [𑀥𑀻𑀭𑁄 𑀘 (𑀲𑀻. 𑀧𑀻.)], 𑀧𑀜𑁆𑀜𑁄 𑀓𑀸𑀭𑀼𑀡𑀺𑀓𑁄 𑀯𑀲𑀻;

𑀯𑀺𑀚𑀺𑀢𑀸𑀯𑀻 𑀘 𑀲 𑀚𑀺𑀦𑁄, 𑀅𑀧𑁆𑀧𑀕𑀩𑁆𑀩𑁄 𑀅𑀦𑀸𑀮𑀬𑁄.

𑁯𑁬. ‘‘𑀅𑀦𑁂𑀜𑁆𑀚𑁄 𑀅𑀘𑀮𑁄 𑀥𑀻𑀫𑀸, 𑀅𑀫𑁄𑀳𑁄 𑀅𑀲𑀫𑁄 𑀫𑀼𑀦𑀺;

𑀥𑁄𑀭𑀬𑁆𑀳𑁄 𑀉𑀲𑀪𑁄 𑀦𑀸𑀕𑁄, 𑀲𑀻𑀳𑁄 𑀲𑀓𑁆𑀓𑁄 𑀕𑀭𑀽𑀲𑀼𑀧𑀺.

𑁯𑁭. ‘‘𑀯𑀺𑀭𑀸𑀕𑁄 𑀯𑀺𑀫𑀮𑁄 𑀩𑁆𑀭𑀳𑁆𑀫𑀸, 𑀯𑀸𑀤𑀻 𑀲𑀽𑀭𑁄 𑀭𑀡𑀜𑁆𑀚𑀳𑁄;

𑀅𑀔𑀺𑀮𑁄 𑀘 𑀯𑀺𑀲𑀮𑁆𑀮𑁄 𑀘, 𑀅𑀲𑀫𑁄 𑀲𑀁𑀬𑀢𑁄 [𑀯𑀼𑀲𑀪𑁄 (𑀲𑁆𑀬𑀸.), 𑀧𑀬𑀢𑁄 (𑀧𑀻.)] 𑀲𑀼𑀘𑀺.

𑁯𑁮. ‘‘𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑁄 𑀦𑀸𑀣𑁄, 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑀓𑁄;

𑀬𑁄𑀥𑁄 𑀩𑀼𑀤𑁆𑀥𑁄 𑀲𑀼𑀢𑀸𑀲𑀼𑀢𑁄 [𑀲𑀼𑀢𑁄 𑀲𑀼𑀢𑁄 (𑀲𑀻. 𑀧𑀻.)], 𑀅𑀘𑀮𑁄 𑀫𑀼𑀤𑀺𑀢𑁄 𑀲𑀺𑀢𑁄 [𑀤𑀺𑀢𑁄 (𑀲𑀻.)].

𑁯𑁯. ‘‘𑀥𑀸𑀢𑀸 𑀥𑀢𑀸 𑀘 𑀲𑀦𑁆𑀢𑀺 𑀘, 𑀓𑀢𑁆𑀢𑀸 𑀦𑁂𑀢𑀸 𑀧𑀓𑀸𑀲𑀺𑀢𑀸;

𑀲𑀫𑁆𑀧𑀳𑀁𑀲𑀺𑀢𑀸 𑀪𑁂𑀢𑁆𑀢𑀸 𑀘, 𑀙𑁂𑀢𑁆𑀢𑀸 𑀲𑁄𑀢𑀸 𑀧𑀲𑀁𑀲𑀺𑀢𑀸.

𑁧𑁦𑁦. ‘‘𑀅𑀔𑀺𑀮𑁄 𑀘 𑀯𑀺𑀲𑀮𑁆𑀮𑁄 𑀘, 𑀅𑀦𑀻𑀖𑁄 𑀅𑀓𑀣𑀁𑀓𑀣𑀻;

𑀅𑀦𑁂𑀚𑁄 𑀯𑀺𑀭𑀚𑁄 𑀓𑀢𑁆𑀢𑀸, 𑀕𑀦𑁆𑀥𑀸 𑀯𑀢𑁆𑀢𑀸 𑀧𑀲𑀁𑀲𑀺𑀢𑀸.

𑁧𑁦𑁧. ‘‘𑀢𑀸𑀭𑁂𑀢𑀸 𑀅𑀢𑁆𑀣𑀓𑀸𑀭𑁂𑀢𑀸, 𑀓𑀸𑀭𑁂𑀢𑀸 𑀲𑀫𑁆𑀧𑀤𑀸𑀭𑀺𑀢𑀸;

𑀧𑀸𑀧𑁂𑀢𑀸 𑀲𑀳𑀺𑀢𑀸 𑀓𑀦𑁆𑀢𑀸, 𑀳𑀦𑁆𑀢𑀸 𑀆𑀢𑀸𑀧𑀻 𑀢𑀸𑀧𑀲𑁄 [𑀳𑀦𑁆𑀢𑀸, 𑀢𑀸𑀧𑀺𑀢𑀸 𑀘 𑀯𑀺𑀲𑁄𑀲𑀺𑀢𑀸 (𑀲𑁆𑀬𑀸.)].

𑁧𑁦𑁨. ‘‘𑀲𑀫𑀘𑀺𑀢𑁆𑀢𑁄 [𑀲𑀘𑁆𑀘𑀝𑁆𑀞𑀺𑀢𑁄 (𑀲𑁆𑀬𑀸.)] 𑀲𑀫𑀲𑀫𑁄, 𑀅𑀲𑀳𑀸𑀬𑁄 𑀤𑀬𑀸𑀮𑀬𑁄 [𑀤𑀬𑀸𑀲𑀬𑁄 (𑀲𑀻.)];

𑀅𑀘𑁆𑀙𑁂𑀭𑀲𑀢𑁆𑀢𑁄 [𑀅𑀘𑁆𑀙𑁂𑀭𑀫𑀦𑁆𑀢𑁄 (𑀲𑁆𑀬𑀸.)] 𑀅𑀓𑀼𑀳𑁄, 𑀓𑀢𑀸𑀯𑀻 𑀇𑀲𑀺𑀲𑀢𑁆𑀢𑀫𑁄.

𑁧𑁦𑁩. ‘‘𑀦𑀺𑀢𑁆𑀢𑀺𑀡𑁆𑀡𑀓𑀗𑁆𑀔𑁄 𑀦𑀺𑀫𑁆𑀫𑀸𑀦𑁄, 𑀅𑀧𑁆𑀧𑀫𑁂𑀬𑁆𑀬𑁄 𑀅𑀦𑀽𑀧𑀫𑁄;

𑀲𑀩𑁆𑀩𑀯𑀸𑀓𑁆𑀬𑀧𑀣𑀸𑀢𑀻𑀢𑁄, 𑀲𑀘𑁆𑀘 𑀦𑁂𑀬𑁆𑀬𑀦𑁆𑀢𑀕𑀽 [𑀲𑀩𑁆𑀩𑀦𑁂𑀬𑁆𑀬𑀦𑁆𑀢𑀺𑀓𑁄 (𑀲𑁆𑀬𑀸.)] 𑀚𑀺𑀦𑁄.

𑁧𑁦𑁪. ‘‘𑀲𑀢𑁆𑀢𑀲𑀸𑀭𑀯𑀭𑁂 [𑀲𑀢𑀭𑀁𑀲𑀻𑀯𑀭𑁂 (𑀲𑁆𑀬𑀸.)] 𑀢𑀲𑁆𑀫𑀺𑀁, 𑀧𑀲𑀸𑀤𑁄 𑀅𑀫𑀢𑀸𑀯𑀳𑁄;

𑀢𑀲𑁆𑀫𑀸 𑀩𑀼𑀤𑁆𑀥𑁂 𑀘 𑀥𑀫𑁆𑀫𑁂 𑀘, 𑀲𑀗𑁆𑀖𑁂 𑀲𑀤𑁆𑀥𑀸 𑀫𑀳𑀢𑁆𑀣𑀺𑀓𑀸 [𑀫𑀳𑀺𑀤𑁆𑀥𑀺𑀓𑀸 (𑀲𑀻. 𑀓.)].

𑁧𑁦𑁫. ‘‘𑀕𑀼𑀡𑁂𑀳𑀺 𑀏𑀯𑀫𑀸𑀤𑀻𑀳𑀺, 𑀢𑀺𑀮𑁄𑀓𑀲𑀭𑀡𑀼𑀢𑁆𑀢𑀫𑀁;

𑀯𑀡𑁆𑀡𑁂𑀦𑁆𑀢𑁄 𑀧𑀭𑀺𑀲𑀸𑀫𑀚𑁆𑀛𑁂, 𑀅𑀓𑀁 [𑀓𑀣𑀺𑀁 (𑀲𑁆𑀬𑀸.)] 𑀥𑀫𑁆𑀫𑀓𑀣𑀁 𑀅𑀳𑀁.

𑁧𑁦𑁬. ‘‘𑀢𑀢𑁄 𑀘𑀼𑀢𑀸𑀳𑀁 𑀢𑀼𑀲𑀺𑀢𑁂, 𑀅𑀦𑀼𑀪𑁄𑀢𑁆𑀯𑀸 𑀫𑀳𑀸𑀲𑀼𑀔𑀁;

𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑁂𑀲𑀼, 𑀚𑀸𑀢𑁄 𑀳𑁄𑀫𑀺 𑀲𑀼𑀕𑀦𑁆𑀥𑀺𑀓𑁄.

𑁧𑁦𑁭. ‘‘𑀦𑀺𑀲𑁆𑀲𑀸𑀲𑁄 𑀫𑀼𑀔𑀕𑀦𑁆𑀥𑁄 𑀘, 𑀤𑁂𑀳𑀕𑀦𑁆𑀥𑁄 𑀢𑀣𑁂𑀯 𑀫𑁂;

𑀲𑁂𑀤𑀕𑀦𑁆𑀥𑁄 𑀘 𑀲𑀢𑀢𑀁, 𑀲𑀩𑁆𑀩𑀕𑀦𑁆𑀥𑁄𑀯 𑀳𑁄𑀢𑀺 𑀫𑁂 [𑀲𑀩𑁆𑀩𑀕𑀦𑁆𑀥𑁄𑀢𑀺𑀲𑁂𑀢𑀺 𑀫𑁂 (𑀲𑀻. 𑀧𑀻.)].

𑁧𑁦𑁮. ‘‘𑀫𑀼𑀔𑀕𑀦𑁆𑀥𑁄 𑀲𑀤𑀸 𑀫𑀬𑁆𑀳𑀁, 𑀧𑀤𑀼𑀫𑀼𑀧𑁆𑀧𑀮𑀘𑀫𑁆𑀧𑀓𑁄;

𑀧𑀭𑀺𑀲𑀦𑁆𑀢𑁄 [𑀆𑀤𑀺𑀲𑀦𑁆𑀢𑁄 (𑀲𑀻.), 𑀅𑀢𑀺𑀓𑀦𑁆𑀢𑁄 (𑀲𑁆𑀬𑀸.), 𑀅𑀢𑀺𑀲𑀦𑁆𑀢𑁄 (𑀧𑀻.)] 𑀲𑀤𑀸 𑀯𑀸𑀢𑀺, 𑀲𑀭𑀻𑀭𑁄 𑀘 𑀢𑀣𑁂𑀯 𑀫𑁂.

𑁧𑁦𑁯. ‘‘𑀕𑀼𑀡𑀢𑁆𑀣𑀯𑀲𑁆𑀲 𑀲𑀩𑁆𑀩𑀦𑁆𑀢𑀁, 𑀨𑀮𑀁 𑀢𑀼 [𑀨𑀮𑀦𑁆𑀢𑀁 (𑀲𑁆𑀬𑀸.)] 𑀧𑀭𑀫𑀩𑁆𑀪𑀼𑀢𑀁;

𑀏𑀓𑀕𑁆𑀕𑀫𑀦𑀲𑀸 𑀲𑀩𑁆𑀩𑁂, 𑀯𑀡𑁆𑀡𑀬𑀺𑀲𑁆𑀲𑀁 [𑀪𑀸𑀲𑀺𑀢𑀲𑁆𑀲 (𑀲𑁆𑀬𑀸.)] 𑀲𑀼𑀡𑀸𑀣 𑀫𑁂.

𑁧𑁧𑁦. ‘‘𑀕𑀼𑀡𑀁 𑀩𑀼𑀤𑁆𑀥𑀲𑁆𑀲 𑀯𑀢𑁆𑀯𑀸𑀦, 𑀳𑀺𑀢𑀸𑀬 𑀘 𑀦 𑀲𑀤𑀺𑀲𑀁 [𑀳𑀺𑀢𑀸𑀬 𑀚𑀦𑀲𑀦𑁆𑀥𑀺𑀲𑀼 (𑀲𑀻. 𑀧𑀻.), 𑀳𑀺𑀢𑀸𑀬 𑀦𑀁 𑀲𑀼𑀔𑀸𑀯𑀳𑀁 (𑀲𑁆𑀬𑀸.)];

𑀲𑀼𑀔𑀺𑀢𑁄 [𑀲𑀼𑀘𑀺𑀢𑁆𑀢𑁄 (𑀲𑁆𑀬𑀸.)] 𑀳𑁄𑀫𑀺 𑀲𑀩𑁆𑀩𑀢𑁆𑀣, 𑀲𑀗𑁆𑀖𑁄 𑀯𑀻𑀭𑀲𑀫𑀸𑀬𑀼𑀢𑁄 [𑀲𑀭𑀤𑁆𑀥𑀦𑀺𑀲𑀫𑀸𑀬𑀼𑀢𑁄 (𑀲𑀻.)].

𑁧𑁧𑁧. ‘‘𑀬𑀲𑀲𑁆𑀲𑀻 𑀲𑀼𑀔𑀺𑀢𑁄 𑀓𑀦𑁆𑀢𑁄, 𑀚𑀼𑀢𑀺𑀫𑀸 𑀧𑀺𑀬𑀤𑀲𑁆𑀲𑀦𑁄;

𑀯𑀢𑁆𑀢𑀸 𑀅𑀧𑀭𑀺𑀪𑀽𑀢𑁄 𑀘, 𑀦𑀺𑀤𑁆𑀤𑁄𑀲𑁄 𑀧𑀜𑁆𑀜𑀯𑀸 𑀢𑀣𑀸.

𑁧𑁧𑁨. ‘‘𑀔𑀻𑀡𑁂 𑀆𑀬𑀼𑀲𑀺 [𑀧𑀸𑀲𑀼𑀲𑀺 (𑀲𑁆𑀬𑀸.)] 𑀦𑀺𑀩𑁆𑀩𑀸𑀦𑀁, 𑀲𑀼𑀮𑀪𑀁 𑀩𑀼𑀤𑁆𑀥𑀪𑀢𑁆𑀢𑀺𑀦𑁄;

𑀢𑁂𑀲𑀁 𑀳𑁂𑀢𑀼𑀁 𑀧𑀯𑀓𑁆𑀔𑀸𑀫𑀺, 𑀢𑀁 𑀲𑀼𑀡𑀸𑀣 𑀬𑀣𑀸𑀢𑀣𑀁.

𑁧𑁧𑁩. ‘‘𑀲𑀦𑁆𑀢𑀁 𑀬𑀲𑀁 𑀪𑀕𑀯𑀢𑁄, 𑀯𑀺𑀥𑀺𑀦𑀸 𑀅𑀪𑀺𑀯𑀸𑀤𑀬𑀁;

𑀢𑀢𑁆𑀣 𑀢𑀢𑁆𑀣𑀽𑀧𑀧𑀦𑁆𑀦𑁄𑀧𑀺 [𑀬𑀢𑁆𑀣 𑀢𑀢𑁆𑀣𑀽𑀧𑀧𑀦𑁆𑀦𑁄𑀧𑀺 (𑀲𑀻. 𑀧𑀻.)], 𑀬𑀲𑀲𑁆𑀲𑀻 𑀢𑁂𑀦 𑀳𑁄𑀫𑀳𑀁.

𑁧𑁧𑁪. ‘‘𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀁 𑀲𑀦𑁆𑀢𑀫𑀲𑀗𑁆𑀔𑀢𑀁;

𑀯𑀡𑁆𑀡𑀬𑀁 𑀲𑀼𑀔𑀤𑁄 𑀆𑀲𑀺𑀁, 𑀲𑀢𑁆𑀢𑀸𑀦𑀁 𑀲𑀼𑀔𑀺𑀢𑁄 𑀢𑀢𑁄.

𑁧𑁧𑁫. ‘‘𑀕𑀼𑀡𑀁 𑀯𑀤𑀦𑁆𑀢𑁄 𑀩𑀼𑀤𑁆𑀥𑀲𑁆𑀲, 𑀩𑀼𑀤𑁆𑀥𑀧𑀻𑀢𑀺𑀲𑀫𑀸𑀬𑀼𑀢𑁄;

𑀲𑀓𑀦𑁆𑀢𑀺𑀁 𑀧𑀭𑀓𑀦𑁆𑀢𑀺𑀜𑁆𑀘, 𑀚𑀦𑀬𑀺𑀁 𑀢𑁂𑀦 𑀓𑀦𑁆𑀢𑀺𑀫𑀸.

𑁧𑁧𑁬. ‘‘𑀚𑀺𑀦𑁄 𑀢𑁂 𑀢𑀺𑀢𑁆𑀣𑀺𑀓𑀸𑀓𑀺𑀡𑁆𑀡𑁂 [𑀚𑀦𑁄𑀖𑁂 𑀢𑀺𑀢𑁆𑀣𑀓𑀸𑀓𑀺𑀡𑁆𑀡𑁂 (𑀲𑀻. 𑀧𑀻.), 𑀚𑀺𑀦𑁄 𑀬𑁄 𑀢𑀺𑀢𑁆𑀣𑀺𑀓𑀸𑀢𑀺𑀡𑁆𑀡𑁄 (𑀲𑁆𑀬𑀸.)], 𑀅𑀪𑀺𑀪𑀼𑀬𑁆𑀬 𑀓𑀼𑀢𑀺𑀢𑁆𑀣𑀺𑀬𑁂;

𑀕𑀼𑀡𑀁 𑀯𑀤𑀦𑁆𑀢𑁄 𑀚𑁄𑀢𑁂𑀲𑀺𑀁 [𑀣𑁄𑀫𑁂𑀲𑀺𑀁 (𑀲𑁆𑀬𑀸.)], 𑀦𑀸𑀬𑀓𑀁 𑀚𑀼𑀢𑀺𑀫𑀸 𑀢𑀢𑁄.

𑁧𑁧𑁭. ‘‘𑀧𑀺𑀬𑀓𑀸𑀭𑀻 𑀚𑀦𑀲𑁆𑀲𑀸𑀧𑀺, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀕𑀼𑀡𑀁 𑀯𑀤𑀁;

𑀲𑀭𑀤𑁄𑀯 𑀲𑀲𑀗𑁆𑀓𑁄𑀳𑀁, 𑀢𑁂𑀦𑀸𑀲𑀺𑀁 𑀧𑀺𑀬𑀤𑀲𑁆𑀲𑀦𑁄.

𑁧𑁧𑁮. ‘‘𑀬𑀣𑀸𑀲𑀢𑁆𑀢𑀺𑀯𑀲𑁂𑀦𑀸𑀳𑀁, 𑀲𑀩𑁆𑀩𑀯𑀸𑀘𑀸𑀳𑀺 𑀲𑀦𑁆𑀣𑀯𑀺𑀁;

𑀲𑀼𑀕𑀢𑀁 𑀢𑁂𑀦 𑀯𑀸𑀕𑀺𑀲𑁄, 𑀯𑀺𑀘𑀺𑀢𑁆𑀢𑀧𑀝𑀺𑀪𑀸𑀦𑀯𑀸.

𑁧𑁧𑁯. ‘‘𑀬𑁂 𑀩𑀸𑀮𑀸 𑀯𑀺𑀫𑀢𑀺𑀁 𑀧𑀢𑁆𑀢𑀸, 𑀧𑀭𑀺𑀪𑁄𑀦𑁆𑀢𑀺 𑀫𑀳𑀸𑀫𑀼𑀦𑀺𑀁;

𑀦𑀺𑀕𑁆𑀕𑀳𑀺𑀁 𑀢𑁂 𑀲𑀤𑁆𑀥𑀫𑁆𑀫𑁂𑀦, 𑀧𑀭𑀺𑀪𑀽𑀢𑁄 𑀦 𑀢𑁂𑀦𑀳𑀁 [𑀧𑀭𑀺𑀪𑀽𑀢𑁂𑀦 𑀢𑁂𑀦𑀳𑀁 (𑀲𑁆𑀬𑀸.)].

𑁧𑁨𑁦. ‘‘𑀩𑀼𑀤𑁆𑀥𑀯𑀡𑁆𑀡𑁂𑀦 𑀲𑀢𑁆𑀢𑀸𑀦𑀁, 𑀓𑀺𑀮𑁂𑀲𑁂 𑀅𑀧𑀦𑁂𑀲𑀳𑀁;

𑀦𑀺𑀓𑁆𑀓𑀺𑀮𑁂𑀲𑀫𑀦𑁄 𑀳𑁄𑀫𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸.

𑁧𑁨𑁧. ‘‘𑀲𑁄𑀢𑀽𑀦𑀁 𑀯𑀼𑀤𑁆𑀥𑀺𑀫𑀚𑀦𑀺𑀁 [𑀩𑀼𑀤𑁆𑀥𑀺𑀫𑀚𑀦𑀺𑀁 (𑀲𑀻. 𑀧𑀻.)], 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀤𑁂𑀲𑀓𑁄;

𑀢𑁂𑀦𑀸𑀳𑀫𑀸𑀲𑀺𑀁 [𑀢𑁂𑀦𑀸𑀧𑀺 𑀘𑀸𑀲𑀺𑀁 (𑀲𑁆𑀬𑀸.)] 𑀲𑀧𑁆𑀧𑀜𑁆𑀜𑁄, 𑀦𑀺𑀧𑀼𑀡𑀢𑁆𑀣𑀯𑀺𑀧𑀲𑁆𑀲𑀓𑁄.

𑁧𑁨𑁨. ‘‘𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑁄, 𑀢𑀺𑀡𑁆𑀡𑀲𑀁𑀲𑀸𑀭𑀲𑀸𑀕𑀭𑁄;

𑀲𑀺𑀔𑀻𑀯 𑀅𑀦𑀼𑀧𑀸𑀤𑀸𑀦𑁄, 𑀧𑀸𑀧𑀼𑀡𑀺𑀲𑁆𑀲𑀸𑀫𑀺 𑀦𑀺𑀩𑁆𑀩𑀼𑀢𑀺𑀁.

𑁧𑁨𑁩. ‘‘𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑀲𑁆𑀫𑀺𑀁, 𑀬𑀫𑀳𑀁 𑀲𑀦𑁆𑀣𑀯𑀺𑀁 𑀚𑀺𑀦𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀯𑀡𑁆𑀡𑀲𑁆𑀲𑀺𑀤𑀁 𑀨𑀮𑀁.

𑁧𑁨𑁪. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁨𑁫. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁨𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀕𑀦𑁆𑀥𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀕𑀦𑁆𑀥𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀢𑀺𑀡𑀤𑀸𑀬𑀓𑀯𑀕𑁆𑀕𑁄 𑀢𑁂𑀧𑀜𑁆𑀜𑀸𑀲𑀫𑁄.