𑁮. 𑀧𑀼𑀮𑀺𑀦𑀣𑀽𑀧𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁭. ‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀬𑀫𑀓𑁄 𑀦𑀸𑀫 𑀧𑀩𑁆𑀩𑀢𑁄;

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸.

𑁫𑁮. ‘‘𑀦𑀸𑀭𑀤𑁄 𑀦𑀸𑀫 𑀦𑀸𑀫𑁂𑀦, 𑀚𑀝𑀺𑀮𑁄 𑀉𑀕𑁆𑀕𑀢𑀸𑀧𑀦𑁄;

𑀘𑀢𑀼𑀤𑁆𑀤𑀲𑀲𑀳𑀲𑁆𑀲𑀸𑀦𑀺, 𑀲𑀺𑀲𑁆𑀲𑀸 𑀧𑀭𑀺𑀘𑀭𑀦𑁆𑀢𑀺 𑀫𑀁.

𑁫𑁯. ‘‘𑀧𑀝𑀺𑀲𑀮𑁆𑀮𑀻𑀦𑀓𑁄 𑀲𑀦𑁆𑀢𑁄, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

‘𑀲𑀩𑁆𑀩𑁄 𑀚𑀦𑁄 𑀫𑀁 𑀧𑀽𑀚𑁂𑀢𑀺, 𑀦𑀸𑀳𑀁 𑀧𑀽𑀚𑁂𑀫𑀺 𑀓𑀺𑀜𑁆𑀘𑀦𑀁.

𑁬𑁦. ‘‘‘𑀦 𑀫𑁂 𑀑𑀯𑀸𑀤𑀓𑁄 𑀅𑀢𑁆𑀣𑀺, 𑀯𑀢𑁆𑀢𑀸 𑀓𑁄𑀘𑀺 𑀦 𑀯𑀺𑀚𑁆𑀚𑀢𑀺;

𑀅𑀦𑀸𑀘𑀭𑀺𑀬𑀼𑀧𑀚𑁆𑀛𑀸𑀬𑁄, 𑀯𑀦𑁂 𑀯𑀸𑀲𑀁 𑀉𑀧𑁂𑀫𑀳𑀁.

𑁬𑁧. ‘‘‘𑀉𑀧𑀸𑀲𑀫𑀸𑀦𑁄 𑀬𑀫𑀳𑀁, 𑀕𑀭𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑀳𑁂;

𑀲𑁄 𑀫𑁂 𑀆𑀘𑀭𑀺𑀬𑁄 𑀦𑀢𑁆𑀣𑀺, 𑀯𑀦𑀯𑀸𑀲𑁄 𑀦𑀺𑀭𑀢𑁆𑀣𑀓𑁄.

𑁬𑁨. ‘‘‘𑀆𑀬𑀸𑀕𑀁 𑀫𑁂 𑀕𑀯𑁂𑀲𑀺𑀲𑁆𑀲𑀁, 𑀕𑀭𑀼𑀁 𑀪𑀸𑀯𑀦𑀺𑀬𑀁 𑀢𑀣𑀸;

𑀲𑀸𑀯𑀲𑁆𑀲𑀬𑁄 𑀯𑀲𑀺𑀲𑁆𑀲𑀸𑀫𑀺, 𑀦 𑀓𑁄𑀘𑀺 𑀕𑀭𑀳𑀺𑀲𑁆𑀲𑀢𑀺’.

𑁬𑁩. ‘‘𑀉𑀢𑁆𑀢𑀸𑀦𑀓𑀽𑀮𑀸 𑀦𑀤𑀺𑀓𑀸, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸;

𑀲𑀁𑀲𑀼𑀤𑁆𑀥𑀧𑀼𑀮𑀺𑀦𑀸𑀓𑀺𑀡𑁆𑀡𑀸, 𑀅𑀯𑀺𑀤𑀽𑀭𑁂 𑀫𑀫𑀲𑁆𑀲𑀫𑀁.

𑁬𑁪. ‘‘𑀦𑀤𑀺𑀁 𑀅𑀫𑀭𑀺𑀓𑀁 𑀦𑀸𑀫, 𑀉𑀧𑀕𑀦𑁆𑀢𑁆𑀯𑀸𑀦𑀳𑀁 𑀢𑀤𑀸;

𑀲𑀁𑀯𑀟𑁆𑀠𑀬𑀺𑀢𑁆𑀯𑀸 𑀧𑀼𑀮𑀺𑀦𑀁, 𑀅𑀓𑀁 𑀧𑀼𑀮𑀺𑀦𑀘𑁂𑀢𑀺𑀬𑀁.

𑁬𑁫. ‘‘𑀬𑁂 𑀢𑁂 𑀅𑀳𑁂𑀲𑀼𑀁 𑀲𑀫𑁆𑀩𑀼𑀤𑁆𑀥𑀸, 𑀪𑀯𑀦𑁆𑀢𑀓𑀭𑀡𑀸 𑀫𑀼𑀦𑀻;

𑀢𑁂𑀲𑀁 𑀏𑀢𑀸𑀤𑀺𑀲𑁄 𑀣𑀽𑀧𑁄, 𑀢𑀁 𑀦𑀺𑀫𑀺𑀢𑁆𑀢𑀁 𑀓𑀭𑁄𑀫𑀳𑀁.

𑁬𑁬. ‘‘𑀓𑀭𑀺𑀢𑁆𑀯𑀸 𑀧𑀼𑀮𑀺𑀦𑀁 [𑀧𑀼𑀴𑀺𑀦𑁂 (𑀲𑀻. 𑀲𑁆𑀬𑀸. 𑀧𑀻.)] 𑀣𑀽𑀧𑀁, 𑀲𑁄𑀯𑀡𑁆𑀡𑀁 𑀫𑀸𑀧𑀬𑀺𑀁 𑀅𑀳𑀁;

𑀲𑁄𑀡𑁆𑀡𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀸𑀦𑀺, 𑀲𑀳𑀲𑁆𑀲𑁂 𑀢𑀻𑀡𑀺 𑀧𑀽𑀚𑀬𑀺𑀁.

𑁬𑁭. ‘‘𑀲𑀸𑀬𑀧𑀸𑀢𑀁 𑀦𑀫𑀲𑁆𑀲𑀸𑀫𑀺, 𑀯𑁂𑀤𑀚𑀸𑀢𑁄 𑀓𑀢𑀜𑁆𑀚𑀮𑀻;

𑀲𑀫𑁆𑀫𑀼𑀔𑀸 𑀯𑀺𑀬 𑀲𑀫𑁆𑀩𑀼𑀤𑁆𑀥𑀁, 𑀯𑀦𑁆𑀤𑀺𑀁 𑀧𑀼𑀮𑀺𑀦𑀘𑁂𑀢𑀺𑀬𑀁.

𑁬𑁮. ‘‘𑀬𑀤𑀸 𑀓𑀺𑀮𑁂𑀲𑀸 𑀚𑀸𑀬𑀦𑁆𑀢𑀺, 𑀯𑀺𑀢𑀓𑁆𑀓𑀸 𑀕𑁂𑀳𑀦𑀺𑀲𑁆𑀲𑀺𑀢𑀸;

𑀲𑀭𑀸𑀫𑀺 𑀲𑀼𑀓𑀢𑀁 𑀣𑀽𑀧𑀁, 𑀧𑀘𑁆𑀘𑀯𑁂𑀓𑁆𑀔𑀸𑀫𑀺 𑀢𑀸𑀯𑀤𑁂.

𑁬𑁯. ‘‘𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀁, 𑀲𑀢𑁆𑀣𑀯𑀸𑀳𑀁 𑀯𑀺𑀦𑀸𑀬𑀓𑀁;

𑀓𑀺𑀮𑁂𑀲𑁂 𑀲𑀁𑀯𑀲𑁂𑀬𑁆𑀬𑀸𑀲𑀺, 𑀦 𑀬𑀼𑀢𑁆𑀢𑀁 𑀢𑀯 𑀫𑀸𑀭𑀺𑀲.

𑁭𑁦. ‘‘𑀲𑀳 𑀆𑀯𑀚𑁆𑀚𑀺𑀢𑁂 𑀣𑀽𑀧𑁂, 𑀕𑀸𑀭𑀯𑀁 𑀳𑁄𑀢𑀺 𑀫𑁂 𑀢𑀤𑀸;

𑀓𑀼𑀯𑀺𑀢𑀓𑁆𑀓𑁂 𑀯𑀺𑀦𑁄𑀤𑁂𑀲𑀺𑀁, 𑀦𑀸𑀕𑁄 𑀢𑀼𑀢𑁆𑀢𑀝𑁆𑀝𑀺𑀢𑁄 𑀬𑀣𑀸.

𑁭𑁧. ‘‘𑀏𑀯𑀁 𑀯𑀺𑀳𑀭𑀫𑀸𑀦𑀁 𑀫𑀁, 𑀫𑀘𑁆𑀘𑀼𑀭𑀸𑀚𑀸𑀪𑀺𑀫𑀤𑁆𑀤𑀣;

𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀲𑀦𑁆𑀢𑁄, 𑀩𑁆𑀭𑀳𑁆𑀫𑀮𑁄𑀓𑀫𑀕𑀘𑁆𑀙𑀳𑀁.

𑁭𑁨. ‘‘𑀬𑀸𑀯𑀢𑀸𑀬𑀼𑀁 𑀯𑀲𑀺𑀢𑁆𑀯𑀸𑀦, 𑀢𑀺𑀤𑀺𑀯𑁂 [𑀢𑀺𑀤𑀲𑁂 (𑀲𑀻. 𑀧𑀻.)] 𑀉𑀧𑀧𑀚𑁆𑀚𑀳𑀁;

𑀅𑀲𑀻𑀢𑀺𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁.

𑁭𑁩. ‘‘𑀲𑀢𑀸𑀦𑀁 𑀢𑀻𑀡𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁭𑁪. ‘‘𑀲𑁄𑀡𑁆𑀡𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀸𑀦𑀁 [𑀢𑁂𑀲𑀁 𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀸𑀦𑀁 (𑀲𑀻.)], 𑀯𑀺𑀧𑀸𑀓𑀁 𑀅𑀦𑀼𑀪𑁄𑀫𑀳𑀁;

𑀥𑀸𑀢𑀻𑀲𑀢𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 [𑀫𑁂 (𑀓.)] 𑀪𑀯𑁂.

𑁭𑁫. ‘‘𑀣𑀽𑀧𑀲𑁆𑀲 𑀧𑀭𑀺𑀘𑀺𑀡𑁆𑀡𑀢𑁆𑀢𑀸, 𑀭𑀚𑁄𑀚𑀮𑁆𑀮𑀁 𑀦 𑀮𑀺𑀫𑁆𑀧𑀢𑀺;

𑀕𑀢𑁆𑀢𑁂 𑀲𑁂𑀤𑀸 𑀦 𑀫𑀼𑀘𑁆𑀘𑀦𑁆𑀢𑀺, 𑀲𑀼𑀧𑁆𑀧𑀪𑀸𑀲𑁄 𑀪𑀯𑀸𑀫𑀳𑀁.

𑁭𑁬. ‘‘𑀅𑀳𑁄 𑀫𑁂 𑀲𑀼𑀓𑀢𑁄 𑀣𑀽𑀧𑁄, 𑀲𑀼𑀤𑀺𑀝𑁆𑀞𑀸𑀫𑀭𑀺𑀓𑀸 𑀦𑀤𑀻;

𑀣𑀽𑀧𑀁 𑀓𑀢𑁆𑀯𑀸𑀦 𑀧𑀼𑀮𑀺𑀦𑀁, 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀧𑀤𑀁.

𑁭𑁭. ‘‘𑀓𑀼𑀲𑀮𑀁 𑀓𑀢𑁆𑀢𑀼𑀓𑀸𑀫𑁂𑀦, 𑀚𑀦𑁆𑀢𑀼𑀦𑀸 𑀲𑀸𑀭𑀕𑀸𑀳𑀺𑀦𑀸;

𑀦𑀢𑁆𑀣𑀺 𑀔𑁂𑀢𑁆𑀢𑀁 𑀅𑀔𑁂𑀢𑁆𑀢𑀁 𑀯𑀸, 𑀧𑀝𑀺𑀧𑀢𑁆𑀢𑀻𑀯 𑀲𑀸𑀥𑀓𑀸 [𑀲𑀸𑀭𑀺𑀓𑀸 (𑀧𑀻.), 𑀲𑀸𑀭𑀓𑀸 (𑀲𑁆𑀬𑀸.), 𑀲𑀸𑀭𑀢𑀸 (𑀓.)].

𑁭𑁮. ‘‘𑀬𑀣𑀸𑀧𑀺 𑀩𑀮𑀯𑀸 𑀧𑁄𑀲𑁄, 𑀅𑀡𑁆𑀡𑀯𑀁 𑀢𑀭𑀺𑀢𑀼𑀲𑁆𑀲𑀳𑁂;

𑀧𑀭𑀺𑀢𑁆𑀢𑀁 𑀓𑀝𑁆𑀞𑀫𑀸𑀤𑀸𑀬, 𑀧𑀓𑁆𑀔𑀦𑁆𑀤𑁂𑀬𑁆𑀬 𑀫𑀳𑀸𑀲𑀭𑀁.

𑁭𑁯. ‘‘𑀇𑀫𑀸𑀳𑀁 𑀓𑀝𑁆𑀞𑀁 𑀦𑀺𑀲𑁆𑀲𑀸𑀬, 𑀢𑀭𑀺𑀲𑁆𑀲𑀸𑀫𑀺 𑀫𑀳𑁄𑀤𑀥𑀺𑀁;

𑀉𑀲𑁆𑀲𑀸𑀳𑁂𑀦 𑀯𑀻𑀭𑀺𑀬𑁂𑀦, 𑀢𑀭𑁂𑀬𑁆𑀬 𑀉𑀤𑀥𑀺𑀁 𑀦𑀭𑁄.

𑁮𑁦. ‘‘𑀢𑀣𑁂𑀯 𑀫𑁂 𑀓𑀢𑀁 𑀓𑀫𑁆𑀫𑀁, 𑀧𑀭𑀺𑀢𑁆𑀢𑀁 𑀣𑁄𑀓𑀓𑀜𑁆𑀘 𑀬𑀁;

𑀢𑀁 𑀓𑀫𑁆𑀫𑀁 𑀉𑀧𑀦𑀺𑀲𑁆𑀲𑀸𑀬, 𑀲𑀁𑀲𑀸𑀭𑀁 𑀲𑀫𑀢𑀺𑀓𑁆𑀓𑀫𑀺𑀁.

𑁮𑁧. ‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑁂 𑀚𑀸𑀢𑁄, 𑀫𑀳𑀸𑀲𑀸𑀮𑁂 𑀲𑀼𑀅𑀟𑁆𑀠𑀓𑁂.

𑁮𑁨. ‘‘𑀲𑀤𑁆𑀥𑀸 𑀫𑀸𑀢𑀸 𑀧𑀺𑀢𑀸 𑀫𑀬𑁆𑀳𑀁, 𑀩𑀼𑀤𑁆𑀥𑀲𑁆𑀲 𑀲𑀭𑀡𑀁 𑀕𑀢𑀸;

𑀉𑀪𑁄 𑀤𑀺𑀝𑁆𑀞𑀧𑀤𑀸 𑀏𑀢𑁂, 𑀅𑀦𑀼𑀯𑀢𑁆𑀢𑀦𑁆𑀢𑀺 𑀲𑀸𑀲𑀦𑀁.

𑁮𑁩. ‘‘𑀩𑁄𑀥𑀺𑀧𑀧𑀝𑀺𑀓𑀁 𑀕𑀬𑁆𑀳, 𑀲𑁄𑀡𑁆𑀡𑀣𑀽𑀧𑀫𑀓𑀸𑀭𑀬𑀼𑀁;

𑀲𑀸𑀬𑀧𑀸𑀢𑀁 [𑀲𑀸𑀬𑀁 𑀧𑀸𑀢𑀁 (𑀲𑁆𑀬𑀸. 𑀓.)] 𑀦𑀫𑀲𑁆𑀲𑀦𑁆𑀢𑀺, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀸.

𑁮𑁪. ‘‘𑀉𑀧𑁄𑀲𑀣𑀫𑁆𑀳𑀺 𑀤𑀺𑀯𑀲𑁂, 𑀲𑁄𑀡𑁆𑀡𑀣𑀽𑀧𑀁 𑀯𑀺𑀦𑀻𑀳𑀭𑀼𑀁;

𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀓𑀺𑀢𑁆𑀢𑁂𑀦𑁆𑀢𑀸, 𑀢𑀺𑀬𑀸𑀫𑀁 𑀯𑀻𑀢𑀺𑀦𑀸𑀫𑀬𑀼𑀁.

𑁮𑁫. ‘‘𑀲𑀳 𑀤𑀺𑀲𑁆𑀯𑀸𑀦𑀳𑀁 [𑀧𑀲𑀸𑀤𑁂𑀢𑁆𑀯𑀸𑀦𑀳𑀁 (𑀓.)] 𑀣𑀽𑀧𑀁, 𑀲𑀭𑀺𑀁 𑀧𑀼𑀮𑀺𑀦𑀘𑁂𑀢𑀺𑀬𑀁;

𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑀤𑁆𑀯𑀸𑀯𑀻𑀲𑀢𑀺𑀫𑀁 𑀪𑀸𑀡𑀯𑀸𑀭𑀁.

𑁮𑁬. ‘‘𑀕𑀯𑁂𑀲𑀫𑀸𑀦𑁄 𑀢𑀁 𑀯𑀻𑀭𑀁, 𑀥𑀫𑁆𑀫𑀲𑁂𑀦𑀸𑀧𑀢𑀺𑀤𑁆𑀤𑀲𑀁;

𑀅𑀕𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑁮𑁭. ‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀉𑀧𑀲𑀫𑁆𑀧𑀸𑀤𑀬𑀻 𑀩𑀼𑀤𑁆𑀥𑁄, 𑀕𑀼𑀡𑀫𑀜𑁆𑀜𑀸𑀬 𑀘𑀓𑁆𑀔𑀼𑀫𑀸.

𑁮𑁮. ‘‘𑀤𑀸𑀭𑀓𑁂𑀦𑁂𑀯 𑀲𑀦𑁆𑀢𑁂𑀦, 𑀓𑀺𑀭𑀺𑀬𑀁 𑀦𑀺𑀝𑁆𑀞𑀺𑀢𑀁 𑀫𑀬𑀸;

𑀓𑀢𑀁 𑀫𑁂 𑀓𑀭𑀡𑀻𑀬𑀚𑁆𑀚, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

𑁮𑁯. ‘‘𑀲𑀩𑁆𑀩𑀯𑁂𑀭𑀪𑀬𑀸𑀢𑀻𑀢𑁄, 𑀲𑀩𑁆𑀩𑀲𑀗𑁆𑀕𑀸𑀢𑀺𑀕𑁄 [𑀲𑀩𑁆𑀩𑀲𑀗𑁆𑀓𑀸𑀢𑀺𑀢𑁄 (𑀓.)] 𑀇𑀲𑀺;

𑀲𑀸𑀯𑀓𑁄 𑀢𑁂 𑀫𑀳𑀸𑀯𑀻𑀭, 𑀲𑁄𑀡𑁆𑀡𑀣𑀽𑀧𑀲𑁆𑀲𑀺𑀤𑀁 𑀨𑀮𑀁.

𑁯𑁦. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁯𑁧. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁯𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀮𑀺𑀦𑀣𑀽𑀧𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀮𑀺𑀦𑀣𑀽𑀧𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.