𑁯. 𑀥𑀫𑁆𑀫𑀭𑀼𑀘𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁬𑁪. ‘‘𑀬𑀤𑀸 𑀤𑀻𑀧𑀗𑁆𑀓𑀭𑁄 𑀩𑀼𑀤𑁆𑀥𑁄, 𑀲𑀼𑀫𑁂𑀥𑀁 𑀩𑁆𑀬𑀸𑀓𑀭𑀻 𑀚𑀺𑀦𑁄;

‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁬𑁫. ‘‘‘𑀇𑀫𑀲𑁆𑀲 𑀚𑀦𑀺𑀓𑀸 𑀫𑀸𑀢𑀸, 𑀫𑀸𑀬𑀸 𑀦𑀸𑀫 𑀪𑀯𑀺𑀲𑁆𑀲𑀢𑀺;

𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫, 𑀅𑀬𑀁 𑀳𑁂𑀲𑁆𑀲𑀢𑀺 𑀕𑁄𑀢𑀫𑁄.

𑁧𑁬𑁬. ‘‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦, 𑀓𑀢𑁆𑀯𑀸 𑀤𑀼𑀓𑁆𑀓𑀭𑀓𑀸𑀭𑀺𑀓𑀁;

𑀅𑀲𑁆𑀲𑀢𑁆𑀣𑀫𑀽𑀮𑁂 𑀲𑀫𑁆𑀩𑀼𑀤𑁆𑀥𑁄, 𑀩𑀼𑀚𑁆𑀛𑀺𑀲𑁆𑀲𑀢𑀺 𑀫𑀳𑀸𑀬𑀲𑁄.

𑁧𑁬𑁭. ‘‘‘𑀉𑀧𑀢𑀺𑀲𑁆𑀲𑁄 𑀓𑁄𑀮𑀺𑀢𑁄 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀓𑀸;

𑀆𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦 [𑀆𑀦𑀦𑁆𑀤𑁄 𑀦𑀸𑀫𑀼𑀧𑀝𑁆𑀞𑀸𑀓𑁄 (𑀲𑁆𑀬𑀸.)], 𑀉𑀧𑀝𑁆𑀞𑀺𑀲𑁆𑀲𑀢𑀺𑀫𑀁 𑀚𑀺𑀦𑀁.

𑁧𑁬𑁮. ‘‘‘𑀔𑁂𑀫𑀸 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀺 𑀲𑀸𑀯𑀺𑀓𑀸;

𑀘𑀺𑀢𑁆𑀢𑁄 𑀆𑀴𑀯𑀓𑁄 𑀘𑁂𑀯, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀼𑀧𑀸𑀲𑀓𑀸.

𑁧𑁬𑁯. ‘‘‘𑀔𑀼𑀚𑁆𑀚𑀼𑀢𑁆𑀢𑀭𑀸 𑀦𑀦𑁆𑀤𑀫𑀸𑀢𑀸, 𑀅𑀕𑁆𑀕𑀸 𑀳𑁂𑀲𑁆𑀲𑀦𑁆𑀢𑀼𑀧𑀸𑀲𑀺𑀓𑀸;

𑀩𑁄𑀥𑀺 𑀇𑀫𑀲𑁆𑀲 𑀯𑀻𑀭𑀲𑁆𑀲, 𑀅𑀲𑁆𑀲𑀢𑁆𑀣𑁄𑀢𑀺 𑀧𑀯𑀼𑀘𑁆𑀘𑀢𑀺’.

𑁧𑁭𑁦. ‘‘𑀇𑀤𑀁 𑀲𑀼𑀢𑁆𑀯𑀸𑀦 𑀯𑀘𑀦𑀁, 𑀅𑀲𑀫𑀲𑁆𑀲 𑀫𑀳𑁂𑀲𑀺𑀦𑁄;

𑀆𑀫𑁄𑀤𑀺𑀢𑀸 𑀦𑀭𑀫𑀭𑀽, 𑀦𑀫𑀲𑁆𑀲𑀦𑁆𑀢𑀺 𑀓𑀢𑀜𑁆𑀚𑀮𑀻.

𑁧𑁭𑁧. ‘‘𑀢𑀤𑀸𑀳𑀁 𑀫𑀸𑀡𑀯𑁄 𑀆𑀲𑀺𑀁, 𑀫𑁂𑀖𑁄 𑀦𑀸𑀫 𑀲𑀼𑀲𑀺𑀓𑁆𑀔𑀺𑀢𑁄;

𑀲𑀼𑀢𑁆𑀯𑀸 𑀩𑁆𑀬𑀸𑀓𑀭𑀡𑀁 𑀲𑁂𑀝𑁆𑀞𑀁, 𑀲𑀼𑀫𑁂𑀥𑀲𑁆𑀲 𑀫𑀳𑀸𑀫𑀼𑀦𑁂.

𑁧𑁭𑁨. ‘‘𑀲𑀁𑀯𑀺𑀲𑀝𑁆𑀞𑁄 𑀪𑀯𑀺𑀢𑁆𑀯𑀸𑀦, 𑀲𑀼𑀫𑁂𑀥𑁂 𑀓𑀭𑀼𑀡𑀸𑀲𑀬𑁂 [𑀓𑀭𑀼𑀡𑀸𑀮𑀬𑁂 (𑀲𑁆𑀬𑀸.)];

𑀧𑀩𑁆𑀩𑀚𑀦𑁆𑀢𑀜𑁆𑀘 𑀢𑀁 𑀯𑀻𑀭𑀁, 𑀲𑀳𑀸𑀯 𑀅𑀦𑀼𑀧𑀩𑁆𑀩𑀚𑀺𑀁.

𑁧𑁭𑁩. ‘‘𑀲𑀁𑀯𑀼𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑁆𑀫𑀺𑀁, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀘 𑀧𑀜𑁆𑀘𑀲𑀼;

𑀲𑀼𑀤𑁆𑀥𑀸𑀚𑀻𑀯𑁄 𑀲𑀢𑁄 𑀯𑀻𑀭𑁄, 𑀚𑀺𑀦𑀲𑀸𑀲𑀦𑀓𑀸𑀭𑀓𑁄.

𑁧𑁭𑁪. ‘‘𑀏𑀯𑀁 𑀯𑀺𑀳𑀭𑀫𑀸𑀦𑁄𑀳𑀁, 𑀧𑀸𑀧𑀫𑀺𑀢𑁆𑀢𑁂𑀦 𑀓𑁂𑀦𑀘𑀺;

𑀦𑀺𑀬𑁄𑀚𑀺𑀢𑁄 𑀅𑀦𑀸𑀘𑀸𑀭𑁂, 𑀲𑀼𑀫𑀕𑁆𑀕𑀸 𑀧𑀭𑀺𑀥𑀁𑀲𑀺𑀢𑁄.

𑁧𑁭𑁫. ‘‘𑀯𑀺𑀢𑀓𑁆𑀓𑀯𑀲𑀺𑀓𑁄 𑀳𑀼𑀢𑁆𑀯𑀸, 𑀲𑀸𑀲𑀦𑀢𑁄 𑀅𑀧𑀓𑁆𑀓𑀫𑀺𑀁;

𑀧𑀘𑁆𑀙𑀸 𑀢𑁂𑀦 𑀓𑀼𑀫𑀺𑀢𑁆𑀢𑁂𑀦, 𑀧𑀬𑀼𑀢𑁆𑀢𑁄 𑀫𑀸𑀢𑀼𑀖𑀸𑀢𑀦𑀁.

𑁧𑁭𑁬. ‘‘𑀅𑀓𑀭𑀺𑀁 𑀆𑀦𑀦𑁆𑀢𑀭𑀺𑀬𑀁 [𑀅𑀓𑀭𑀺𑀁 𑀦𑀦𑁆𑀢𑀭𑀺𑀬𑀜𑁆𑀘 (𑀲𑁆𑀬𑀸. 𑀓.)], 𑀖𑀸𑀢𑀬𑀺𑀁 𑀤𑀼𑀝𑁆𑀞𑀫𑀸𑀦𑀲𑁄;

𑀢𑀢𑁄 𑀘𑀼𑀢𑁄 𑀫𑀳𑀸𑀯𑀻𑀘𑀺𑀁, 𑀉𑀧𑀧𑀦𑁆𑀦𑁄 𑀲𑀼𑀤𑀸𑀭𑀼𑀡𑀁.

𑁧𑁭𑁭. ‘‘𑀯𑀺𑀦𑀺𑀧𑀸𑀢𑀕𑀢𑁄 𑀲𑀦𑁆𑀢𑁄, 𑀲𑀁𑀲𑀭𑀺𑀁 𑀤𑀼𑀓𑁆𑀔𑀺𑀢𑁄 𑀘𑀺𑀭𑀁;

𑀦 𑀧𑀼𑀦𑁄 𑀅𑀤𑁆𑀤𑀲𑀁 𑀯𑀻𑀭𑀁, 𑀲𑀼𑀫𑁂𑀥𑀁 𑀦𑀭𑀧𑀼𑀗𑁆𑀕𑀯𑀁.

𑁧𑁭𑁮. ‘‘𑀅𑀲𑁆𑀫𑀺𑀁 𑀓𑀧𑁆𑀧𑁂 𑀲𑀫𑀼𑀤𑁆𑀤𑀫𑁆𑀳𑀺, 𑀫𑀘𑁆𑀙𑁄 𑀆𑀲𑀺𑀁 𑀢𑀺𑀫𑀺𑀗𑁆𑀕𑀮𑁄;

𑀤𑀺𑀲𑁆𑀯𑀸𑀳𑀁 𑀲𑀸𑀕𑀭𑁂 𑀦𑀸𑀯𑀁, 𑀕𑁄𑀘𑀭𑀢𑁆𑀣𑀫𑀼𑀧𑀸𑀕𑀫𑀺𑀁.

𑁧𑁭𑁯. ‘‘𑀤𑀺𑀲𑁆𑀯𑀸 𑀫𑀁 𑀯𑀸𑀡𑀺𑀚𑀸 𑀪𑀻𑀢𑀸, 𑀩𑀼𑀤𑁆𑀥𑀲𑁂𑀝𑁆𑀞𑀫𑀦𑀼𑀲𑁆𑀲𑀭𑀼𑀁;

𑀕𑁄𑀢𑀫𑁄𑀢𑀺 𑀫𑀳𑀸𑀖𑁄𑀲𑀁, 𑀲𑀼𑀢𑁆𑀯𑀸 𑀢𑁂𑀳𑀺 𑀉𑀤𑀻𑀭𑀺𑀢𑀁.

𑁧𑁮𑁦. ‘‘𑀧𑀼𑀩𑁆𑀩𑀲𑀜𑁆𑀜𑀁 𑀲𑀭𑀺𑀢𑁆𑀯𑀸𑀦, 𑀢𑀢𑁄 𑀓𑀸𑀮𑀗𑁆𑀓𑀢𑁄 𑀅𑀳𑀁;

𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑁂 𑀇𑀤𑁆𑀥𑁂, 𑀚𑀸𑀢𑁄 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑀁.

𑁧𑁮𑁧. ‘‘𑀆𑀲𑀺𑀁 𑀥𑀫𑁆𑀫𑀭𑀼𑀘𑀺 𑀦𑀸𑀫, 𑀲𑀩𑁆𑀩𑀧𑀸𑀧𑀚𑀺𑀕𑀼𑀘𑁆𑀙𑀓𑁄;

𑀤𑀺𑀲𑁆𑀯𑀸𑀳𑀁 𑀮𑁄𑀓𑀧𑀚𑁆𑀚𑁄𑀢𑀁, 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄.

𑁧𑁮𑁨. ‘‘𑀫𑀳𑀸𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀉𑀧𑁂𑀫𑀺 𑀩𑀼𑀤𑁆𑀥𑀁 𑀢𑀺𑀓𑁆𑀔𑀢𑁆𑀢𑀼𑀁, 𑀭𑀢𑁆𑀢𑀺𑀬𑀸 𑀤𑀺𑀯𑀲𑀲𑁆𑀲 𑀘.

𑁧𑁮𑁩. ‘‘𑀢𑀤𑀸 𑀤𑀺𑀲𑁆𑀯𑀸 𑀫𑀼𑀦𑀺 𑀆𑀳, 𑀘𑀺𑀭𑀁 𑀥𑀫𑁆𑀫𑀭𑀼𑀘𑀻𑀢𑀺 𑀫𑀁;

𑀢𑀢𑁄𑀳𑀁 𑀅𑀯𑀘𑀁 𑀩𑀼𑀤𑁆𑀥𑀁, 𑀧𑀼𑀩𑁆𑀩𑀓𑀫𑁆𑀫𑀧𑀪𑀸𑀯𑀺𑀢𑀁.

𑁧𑁮𑁪. ‘‘𑀲𑀼𑀘𑀺𑀭𑀁 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀁, 𑀧𑀢𑀺𑀧𑀼𑀩𑁆𑀩𑁂𑀦 𑀯𑀺𑀲𑀼𑀤𑁆𑀥𑀧𑀘𑁆𑀘𑀬𑀁;

𑀅𑀳𑀫𑀚𑁆𑀚𑀲𑀼𑀧𑁂𑀓𑁆𑀔𑀦𑀁 𑀯𑀢, 𑀢𑀯 𑀧𑀲𑁆𑀲𑀸𑀫𑀺 𑀦𑀺𑀭𑀼𑀧𑀫𑀁 𑀯𑀺𑀕𑁆𑀕𑀳𑀁 [𑀦𑀺𑀭𑀽𑀧𑀫𑀕𑁆𑀕𑀳𑀁 (𑀲𑀻.)].

𑁧𑁮𑁫. ‘‘𑀲𑀼𑀘𑀺𑀭𑀁 𑀯𑀺𑀳𑀢𑀢𑁆𑀢𑀫𑁄 𑀫𑀬𑀸, 𑀲𑀼𑀘𑀺𑀭𑀓𑁆𑀔𑁂𑀦 𑀦𑀤𑀻 𑀯𑀺𑀲𑁄𑀲𑀺𑀢𑀸;

𑀲𑀼𑀘𑀺𑀭𑀁 𑀅𑀫𑀮𑀁 𑀯𑀺𑀲𑁄𑀥𑀺𑀢𑀁, 𑀦𑀬𑀦𑀁 𑀜𑀸𑀡𑀫𑀬𑀁 𑀫𑀳𑀸𑀫𑀼𑀦𑁂.

𑁧𑁮𑁬. ‘‘𑀘𑀺𑀭𑀓𑀸𑀮𑀲𑀫𑀗𑁆𑀕𑀺𑀢𑁄 [𑀘𑀺𑀭𑀓𑀸𑀮𑀁 𑀲𑀫𑀸𑀕𑀢𑁄 (𑀧𑀻.)] 𑀢𑀬𑀸, 𑀅𑀯𑀺𑀦𑀝𑁆𑀞𑁄 𑀧𑀼𑀦𑀭𑀦𑁆𑀢𑀭𑀁 𑀘𑀺𑀭𑀁;

𑀧𑀼𑀦𑀭𑀚𑁆𑀚𑀲𑀫𑀸𑀕𑀢𑁄 𑀢𑀬𑀸, 𑀦 𑀳𑀺 𑀦𑀲𑁆𑀲𑀦𑁆𑀢𑀺 𑀓𑀢𑀸𑀦𑀺 𑀕𑁄𑀢𑀫.

𑁧𑁮𑁭. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁮𑁮. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁮𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀥𑀫𑁆𑀫𑀭𑀼𑀘𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀥𑀫𑁆𑀫𑀭𑀼𑀘𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.