𑁭. 𑀧𑀼𑀮𑀺𑀦𑀼𑀧𑁆𑀧𑀸𑀤𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁧𑁧. ‘‘𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀤𑁂𑀯𑀮𑁄 𑀦𑀸𑀫 𑀢𑀸𑀧𑀲𑁄;

𑀢𑀢𑁆𑀣 𑀫𑁂 𑀘𑀗𑁆𑀓𑀫𑁄 𑀆𑀲𑀺, 𑀅𑀫𑀦𑀼𑀲𑁆𑀲𑁂𑀳𑀺 𑀫𑀸𑀧𑀺𑀢𑁄.

𑁧𑁧𑁨. ‘‘𑀚𑀝𑀸𑀪𑀸𑀭𑁂𑀦 [𑀚𑀝𑀸𑀪𑀸𑀭𑀲𑁆𑀲 (𑀲𑁆𑀬𑀸. 𑀓.)] 𑀪𑀭𑀺𑀢𑁄, 𑀓𑀫𑀡𑁆𑀟𑀮𑀼𑀥𑀭𑁄 𑀲𑀤𑀸;

𑀉𑀢𑁆𑀢𑀫𑀢𑁆𑀣𑀁 𑀕𑀯𑁂𑀲𑀦𑁆𑀢𑁄, 𑀯𑀺𑀧𑀺𑀦𑀸 𑀦𑀺𑀓𑁆𑀔𑀫𑀺𑀁 𑀢𑀤𑀸.

𑁧𑁧𑁩. ‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀲𑀺𑀲𑁆𑀲𑀸 𑀫𑀬𑁆𑀳𑀁 𑀉𑀧𑀝𑁆𑀞𑀳𑀼𑀁;

𑀲𑀓𑀓𑀫𑁆𑀫𑀸𑀪𑀺𑀧𑀲𑀼𑀢𑀸, 𑀯𑀲𑀦𑁆𑀢𑀺 𑀯𑀺𑀧𑀺𑀦𑁂 𑀢𑀤𑀸.

𑁧𑁧𑁪. ‘‘𑀅𑀲𑁆𑀲𑀫𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀅𑀓𑀁 𑀧𑀼𑀮𑀺𑀦𑀘𑁂𑀢𑀺𑀬𑀁;

𑀦𑀸𑀦𑀸𑀧𑀼𑀧𑁆𑀨𑀁 𑀲𑀫𑀸𑀦𑁂𑀢𑁆𑀯𑀸, 𑀢𑀁 𑀘𑁂𑀢𑀺𑀬𑀫𑀧𑀽𑀚𑀬𑀺𑀁.

𑁧𑁧𑁫. ‘‘𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀅𑀲𑁆𑀲𑀫𑀁 𑀧𑀯𑀺𑀲𑀸𑀫𑀳𑀁;

𑀲𑀩𑁆𑀩𑁂 𑀲𑀺𑀲𑁆𑀲𑀸 𑀲𑀫𑀸𑀕𑀦𑁆𑀢𑁆𑀯𑀸, 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺𑀁𑀲𑀼 𑀫𑀁 [𑀏𑀢𑀫𑀢𑁆𑀣𑀫𑀧𑀼𑀘𑁆𑀙𑀼 𑀫𑀁 (𑀲𑀻.), 𑀏𑀢𑀫𑀢𑁆𑀢𑀁 𑀅𑀧𑀼𑀘𑁆𑀙𑀺𑀁𑀲𑀼 (𑀲𑁆𑀬𑀸. 𑀓.)].

𑁧𑁧𑁬. ‘‘‘𑀧𑀼𑀮𑀺𑀦𑁂𑀦 𑀓𑀢𑁄 𑀣𑀽𑀧𑁄 [𑀓𑀢𑁄 𑀣𑀽𑀧𑁂 (𑀲𑀻.)], 𑀬𑀁 𑀢𑁆𑀯𑀁 𑀤𑁂𑀯 [𑀤𑁂𑀯𑀁 (𑀲𑀻. 𑀧𑀻.)] 𑀫𑀲𑁆𑀲𑀢𑀺;

𑀫𑀬𑀫𑁆𑀧𑀺 𑀜𑀸𑀢𑀼𑀫𑀺𑀘𑁆𑀙𑀸𑀫, 𑀧𑀼𑀝𑁆𑀞𑁄 𑀆𑀘𑀺𑀓𑁆𑀔 𑀦𑁄 𑀢𑀼𑀯𑀁’.

𑁧𑁧𑁭. ‘‘‘𑀦𑀺𑀤𑁆𑀤𑀺𑀝𑁆𑀞𑀸 𑀦𑀼 [𑀦𑀺𑀤𑁆𑀤𑀺𑀝𑁆𑀞𑀸 𑀦𑁄 (𑀲𑀻. 𑀧𑀻.), 𑀤𑀺𑀝𑁆𑀞𑀸𑀦𑁄 𑀯𑁄 (𑀲𑁆𑀬𑀸.)] 𑀫𑀦𑁆𑀢𑀧𑀤𑁂, 𑀘𑀓𑁆𑀔𑀼𑀫𑀦𑁆𑀢𑁄 𑀫𑀳𑀸𑀬𑀲𑀸;

𑀢𑁂 𑀔𑁄 𑀅𑀳𑀁 𑀦𑀫𑀲𑁆𑀲𑀸𑀫𑀺, 𑀩𑀼𑀤𑁆𑀥𑀲𑁂𑀝𑁆𑀞𑁂 𑀫𑀳𑀸𑀬𑀲𑁂’.

𑁧𑁧𑁮. ‘‘‘𑀓𑀻𑀤𑀺𑀲𑀸 𑀢𑁂 𑀫𑀳𑀸𑀯𑀻𑀭𑀸, 𑀲𑀩𑁆𑀩𑀜𑁆𑀜𑀽 𑀮𑁄𑀓𑀦𑀸𑀬𑀓𑀸;

𑀓𑀣𑀁𑀯𑀡𑁆𑀡𑀸 𑀓𑀣𑀁𑀲𑀻𑀮𑀸, 𑀓𑀻𑀤𑀺𑀲𑀸 𑀢𑁂 𑀫𑀳𑀸𑀬𑀲𑀸’.

𑁧𑁧𑁯. ‘‘‘𑀩𑀸𑀢𑁆𑀢𑀺𑀁𑀲𑀮𑀓𑁆𑀔𑀡𑀸 𑀩𑀼𑀤𑁆𑀥𑀸, 𑀘𑀢𑁆𑀢𑀸𑀮𑀻𑀲𑀤𑀺𑀚𑀸𑀧𑀺 𑀘;

𑀦𑁂𑀢𑁆𑀢𑀸 𑀕𑁄𑀧𑀔𑀼𑀫𑀸 𑀢𑁂𑀲𑀁, 𑀚𑀺𑀜𑁆𑀚𑀼𑀓𑀸 𑀨𑀮𑀲𑀦𑁆𑀦𑀺𑀪𑀸.

𑁧𑁨𑁦. ‘‘‘𑀕𑀘𑁆𑀙𑀫𑀸𑀦𑀸 𑀘 𑀢𑁂 𑀩𑀼𑀤𑁆𑀥𑀸, 𑀬𑀼𑀕𑀫𑀢𑁆𑀢𑀜𑁆𑀘 𑀧𑁂𑀓𑁆𑀔𑀭𑁂;

𑀦 𑀢𑁂𑀲𑀁 𑀚𑀸𑀡𑀼 𑀦𑀤𑀢𑀺, 𑀲𑀦𑁆𑀥𑀺𑀲𑀤𑁆𑀤𑁄 𑀦 𑀲𑀼𑀬𑁆𑀬𑀢𑀺.

𑁧𑁨𑁧. ‘‘‘𑀕𑀘𑁆𑀙𑀫𑀸𑀦𑀸 𑀘 𑀲𑀼𑀕𑀢𑀸, 𑀉𑀤𑁆𑀥𑀭𑀦𑁆𑀢𑀸𑀯 𑀕𑀘𑁆𑀙𑀭𑁂;

𑀧𑀞𑀫𑀁 𑀤𑀓𑁆𑀔𑀺𑀡𑀁 𑀧𑀸𑀤𑀁, 𑀩𑀼𑀤𑁆𑀥𑀸𑀦𑀁 𑀏𑀲 𑀥𑀫𑁆𑀫𑀢𑀸.

𑁧𑁨𑁨. ‘‘‘𑀅𑀲𑀫𑁆𑀪𑀻𑀢𑀸 𑀘 𑀢𑁂 𑀩𑀼𑀤𑁆𑀥𑀸, 𑀫𑀺𑀕𑀭𑀸𑀚𑀸𑀯 𑀓𑁂𑀲𑀭𑀻;

𑀦𑁂𑀯𑀼𑀓𑁆𑀓𑀁𑀲𑁂𑀦𑁆𑀢𑀺 𑀅𑀢𑁆𑀢𑀸𑀦𑀁, 𑀦𑁄 𑀘 𑀯𑀫𑁆𑀪𑁂𑀦𑁆𑀢𑀺 𑀧𑀸𑀡𑀺𑀦𑀁.

𑁧𑁨𑁩. ‘‘‘𑀫𑀸𑀦𑀸𑀯𑀫𑀸𑀦𑀢𑁄 𑀫𑀼𑀢𑁆𑀢𑀸, 𑀲𑀫𑀸 𑀲𑀩𑁆𑀩𑁂𑀲𑀼 𑀧𑀸𑀡𑀺𑀲𑀼;

𑀅𑀦𑀢𑁆𑀢𑀼𑀓𑁆𑀓𑀁𑀲𑀓𑀸 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀸𑀦𑀁 𑀏𑀲 𑀥𑀫𑁆𑀫𑀢𑀸.

𑁧𑁨𑁪. ‘‘‘𑀉𑀧𑁆𑀧𑀚𑁆𑀚𑀦𑁆𑀢𑀸 𑀘 𑀲𑀫𑁆𑀩𑀼𑀤𑁆𑀥𑀸, 𑀆𑀮𑁄𑀓𑀁 𑀤𑀲𑁆𑀲𑀬𑀦𑁆𑀢𑀺 𑀢𑁂;

𑀙𑀧𑁆𑀧𑀓𑀸𑀭𑀁 𑀧𑀓𑀫𑁆𑀧𑁂𑀦𑁆𑀢𑀺, 𑀓𑁂𑀯𑀮𑀁 𑀯𑀲𑀼𑀥𑀁 𑀇𑀫𑀁.

𑁧𑁨𑁫. ‘‘‘𑀧𑀲𑁆𑀲𑀦𑁆𑀢𑀺 𑀦𑀺𑀭𑀬𑀜𑁆𑀘𑁂𑀢𑁂, 𑀦𑀺𑀩𑁆𑀩𑀸𑀢𑀺 𑀦𑀺𑀭𑀬𑁄 𑀢𑀤𑀸;

𑀧𑀯𑀲𑁆𑀲𑀢𑀺 𑀫𑀳𑀸𑀫𑁂𑀖𑁄, 𑀩𑀼𑀤𑁆𑀥𑀸𑀦𑀁 𑀏𑀲 𑀥𑀫𑁆𑀫𑀢𑀸.

𑁧𑁨𑁬. ‘‘‘𑀈𑀤𑀺𑀲𑀸 𑀢𑁂 𑀫𑀳𑀸𑀦𑀸𑀕𑀸, 𑀅𑀢𑀼𑀮𑀸 𑀘 [𑀢𑁂 (𑀲𑁆𑀬𑀸. 𑀓.)] 𑀫𑀳𑀸𑀬𑀲𑀸;

𑀯𑀡𑁆𑀡𑀢𑁄 𑀅𑀦𑀢𑀺𑀓𑁆𑀓𑀦𑁆𑀢𑀸, 𑀅𑀧𑁆𑀧𑀫𑁂𑀬𑁆𑀬𑀸 𑀢𑀣𑀸𑀕𑀢𑀸’.

𑁧𑁨𑁭. ‘‘‘𑀅𑀦𑀼𑀫𑁄𑀤𑀺𑀁𑀲𑀼 𑀫𑁂 𑀯𑀸𑀓𑁆𑀬𑀁, 𑀲𑀩𑁆𑀩𑁂 𑀲𑀺𑀲𑁆𑀲𑀸 𑀲𑀕𑀸𑀭𑀯𑀸;

𑀢𑀣𑀸 𑀘 𑀧𑀝𑀺𑀧𑀚𑁆𑀚𑀺𑀁𑀲𑀼, 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁’.

𑁧𑁨𑁮. ‘‘𑀧𑀝𑀺𑀧𑀽𑀚𑁂𑀦𑁆𑀢𑀺 𑀧𑀼𑀮𑀺𑀦𑀁, 𑀲𑀓𑀓𑀫𑁆𑀫𑀸𑀪𑀺𑀮𑀸𑀲𑀺𑀦𑁄;

𑀲𑀤𑁆𑀤𑀳𑀦𑁆𑀢𑀸 𑀫𑀫 𑀯𑀸𑀓𑁆𑀬𑀁, 𑀩𑀼𑀤𑁆𑀥𑀲𑀓𑁆𑀓𑀢𑀫𑀸𑀦𑀲𑀸 [𑀩𑀼𑀤𑁆𑀥𑀢𑁆𑀢𑀕𑀢𑀫𑀸𑀦𑀲𑀸 (𑀲𑀻. 𑀲𑁆𑀬𑀸. 𑀧𑀻.)].

𑁧𑁨𑁯. ‘‘𑀢𑀤𑀸 𑀘𑀯𑀺𑀢𑁆𑀯𑀸 𑀢𑀼𑀲𑀺𑀢𑀸, 𑀤𑁂𑀯𑀧𑀼𑀢𑁆𑀢𑁄 𑀫𑀳𑀸𑀬𑀲𑁄;

𑀉𑀧𑁆𑀧𑀚𑁆𑀚𑀺 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺, 𑀤𑀲𑀲𑀳𑀲𑁆𑀲𑀺 𑀓𑀫𑁆𑀧𑀣.

𑁧𑁩𑁦. ‘‘𑀅𑀲𑁆𑀲𑀫𑀲𑁆𑀲𑀸𑀯𑀺𑀤𑀽𑀭𑀫𑁆𑀳𑀺, 𑀘𑀗𑁆𑀓𑀫𑀫𑁆𑀳𑀺 𑀞𑀺𑀢𑁄 𑀅𑀳𑀁;

𑀲𑀩𑁆𑀩𑁂 𑀲𑀺𑀲𑁆𑀲𑀸 𑀲𑀫𑀸𑀕𑀦𑁆𑀢𑁆𑀯𑀸, 𑀆𑀕𑀘𑁆𑀙𑀼𑀁 𑀫𑀫 𑀲𑀦𑁆𑀢𑀺𑀓𑁂.

𑁧𑁩𑁧. ‘‘𑀉𑀲𑀪𑁄𑀯 𑀫𑀳𑀻 𑀦𑀤𑀢𑀺, 𑀫𑀺𑀕𑀭𑀸𑀚𑀸𑀯 𑀓𑀽𑀚𑀢𑀺;

𑀲𑀼𑀲𑀼𑀫𑀸𑀭𑁄𑀯 [𑀲𑀼𑀁𑀲𑀼𑀫𑀸𑀭𑁄𑀯 (𑀲𑀻. 𑀲𑁆𑀬𑀸. 𑀧𑀻.)] 𑀲𑀴𑀢𑀺, 𑀓𑀺𑀁 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺.

𑁧𑁩𑁨. ‘‘𑀬𑀁 𑀧𑀓𑀺𑀢𑁆𑀢𑁂𑀫𑀺 𑀲𑀫𑁆𑀩𑀼𑀤𑁆𑀥𑀁, 𑀲𑀺𑀓𑀢𑀸𑀣𑀽𑀧𑀲𑀦𑁆𑀢𑀺𑀓𑁂;

𑀲𑁄 𑀤𑀸𑀦𑀺 𑀪𑀕𑀯𑀸 𑀲𑀢𑁆𑀣𑀸, 𑀫𑀸𑀢𑀼𑀓𑀼𑀘𑁆𑀙𑀺𑀫𑀼𑀧𑀸𑀕𑀫𑀺.

𑁧𑁩𑁩. ‘‘𑀢𑁂𑀲𑀁 𑀥𑀫𑁆𑀫𑀓𑀣𑀁 𑀯𑀢𑁆𑀯𑀸, 𑀓𑀺𑀢𑁆𑀢𑀬𑀺𑀢𑁆𑀯𑀸 𑀫𑀳𑀸𑀫𑀼𑀦𑀺𑀁;

𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀓𑁂 𑀲𑀺𑀲𑁆𑀲𑁂, 𑀧𑀮𑁆𑀮𑀗𑁆𑀓𑀫𑀸𑀪𑀼𑀚𑀺𑀁 𑀅𑀳𑀁.

𑁧𑁩𑁪. ‘‘𑀩𑀮𑀜𑁆𑀘 𑀯𑀢 𑀫𑁂 𑀔𑀻𑀡𑀁, 𑀩𑁆𑀬𑀸𑀥𑀺𑀦𑀸 [𑀩𑁆𑀬𑀸𑀥𑀺𑀢𑁄 (𑀲𑀻. 𑀲𑁆𑀬𑀸. 𑀧𑀻. 𑀓.)] 𑀧𑀭𑀫𑁂𑀦 𑀢𑀁;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀲𑀭𑀺𑀢𑁆𑀯𑀸𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 [𑀓𑀸𑀮𑀓𑀢𑁄 (𑀲𑀻. 𑀧𑀻.)] 𑀅𑀳𑀁.

𑁧𑁩𑁫. ‘‘𑀲𑀩𑁆𑀩𑁂 𑀲𑀺𑀲𑁆𑀲𑀸 𑀲𑀫𑀸𑀕𑀦𑁆𑀢𑁆𑀯𑀸, 𑀅𑀓𑀁𑀲𑀼 𑀘𑀺𑀢𑀓𑀁 𑀢𑀤𑀸;

𑀓𑀴𑁂𑀯𑀭𑀜𑁆𑀘 𑀫𑁂 𑀕𑀬𑁆𑀳, 𑀘𑀺𑀢𑀓𑀁 𑀅𑀪𑀺𑀭𑁄𑀧𑀬𑀼𑀁.

𑁧𑁩𑁬. ‘‘𑀘𑀺𑀢𑀓𑀁 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀲𑀻𑀲𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑁄𑀓𑀲𑀮𑁆𑀮𑀧𑀭𑁂𑀢𑀸 𑀢𑁂, 𑀯𑀺𑀓𑁆𑀓𑀦𑁆𑀤𑀺𑀁𑀲𑀼 𑀲𑀫𑀸𑀕𑀢𑀸.

𑁧𑁩𑁭. ‘‘𑀢𑁂𑀲𑀁 𑀮𑀸𑀮𑀧𑁆𑀧𑀫𑀸𑀦𑀸𑀦𑀁, 𑀅𑀕𑀫𑀁 𑀘𑀺𑀢𑀓𑀁 𑀢𑀤𑀸;

‘𑀅𑀳𑀁 𑀆𑀘𑀭𑀺𑀬𑁄 𑀢𑀼𑀫𑁆𑀳𑀁, 𑀫𑀸 𑀲𑁄𑀘𑀺𑀢𑁆𑀣 𑀲𑀼𑀫𑁂𑀥𑀲𑀸.

𑁧𑁩𑁮. ‘‘‘𑀲𑀤𑀢𑁆𑀣𑁂 𑀯𑀸𑀬𑀫𑁂𑀬𑁆𑀬𑀸𑀣, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑀸;

𑀫𑀸 𑀯𑁄 𑀧𑀫𑀢𑁆𑀢𑀸 𑀅𑀳𑀼𑀢𑁆𑀣 [𑀅𑀳𑀼𑀯𑀢𑁆𑀣 (𑀲𑀻.)], 𑀔𑀡𑁄 𑀯𑁄 𑀧𑀝𑀺𑀧𑀸𑀤𑀺𑀢𑁄’.

𑁧𑁩𑁯. ‘‘𑀲𑀓𑁂 𑀲𑀺𑀲𑁆𑀲𑁂𑀦𑀼𑀲𑀸𑀲𑀺𑀢𑁆𑀯𑀸, 𑀤𑁂𑀯𑀮𑁄𑀓𑀁 𑀧𑀼𑀦𑀸𑀕𑀫𑀺𑀁;

𑀅𑀝𑁆𑀞𑀸𑀭𑀲 𑀘 𑀓𑀧𑁆𑀧𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀸𑀫𑀳𑀁.

𑁧𑁪𑁦. ‘‘𑀲𑀢𑀸𑀦𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀅𑀦𑁂𑀓𑀲𑀢𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁.

𑁧𑁪𑁧. ‘‘𑀅𑀯𑀲𑁂𑀲𑁂𑀲𑀼 𑀓𑀧𑁆𑀧𑁂𑀲𑀼, 𑀯𑁄𑀓𑀺𑀡𑁆𑀡𑁄 [𑀯𑁄𑀓𑀺𑀡𑁆𑀡𑀁 (𑀲𑀻. 𑀲𑁆𑀬𑀸. 𑀓.)] 𑀲𑀁𑀲𑀭𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀧𑁆𑀧𑀸𑀤𑀲𑁆𑀲 𑀇𑀤𑀁 𑀨𑀮𑀁 [𑀧𑀼𑀮𑀺𑀦𑀧𑀽𑀚𑀸𑀬𑀺𑀤𑀁 𑀨𑀮𑀁 (𑀲𑀻.)].

𑁧𑁪𑁨. ‘‘𑀬𑀣𑀸 𑀓𑁄𑀫𑀼𑀤𑀺𑀓𑁂 𑀫𑀸𑀲𑁂, 𑀩𑀳𑀽 𑀧𑀼𑀧𑁆𑀨𑀦𑁆𑀢𑀺 𑀧𑀸𑀤𑀧𑀸;

𑀢𑀣𑁂𑀯𑀸𑀳𑀫𑁆𑀧𑀺 𑀲𑀫𑀬𑁂, 𑀧𑀼𑀧𑁆𑀨𑀺𑀢𑁄𑀫𑁆𑀳𑀺 𑀫𑀳𑁂𑀲𑀺𑀦𑀸.

𑁧𑁪𑁩. ‘‘𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳𑀁, 𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀁;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁪𑁪. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀓𑀺𑀢𑁆𑀢𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀺𑀢𑁆𑀢𑀦𑀸𑀬 𑀇𑀤𑀁 𑀨𑀮𑀁.

𑁧𑁪𑁫. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁪𑁬. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁪𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀮𑀺𑀦𑀼𑀧𑁆𑀧𑀸𑀤𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀮𑀺𑀦𑀼𑀧𑁆𑀧𑀸𑀤𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.