𑁧. 𑀲𑀸𑀮𑀓𑀼𑀲𑀼𑀫𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺, 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁂;

𑀆𑀭𑁄𑀧𑀺𑀢𑀫𑁆𑀳𑀺 𑀘𑀺𑀢𑀓𑁂, 𑀲𑀸𑀮𑀧𑀼𑀧𑁆𑀨𑀫𑀧𑀽𑀚𑀬𑀺𑀁.

𑁨. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁 [𑀧𑀼𑀧𑁆𑀨𑀫𑀪𑀺𑀧𑀼𑀚𑀬𑀺𑀁 (𑀲𑁆𑀬𑀸.)];

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀘𑀺𑀢𑀧𑀽𑀚𑀸𑀬𑀺𑀤𑀁 [𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 (𑀲𑁆𑀬𑀸.)] 𑀨𑀮𑀁.

𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀸𑀮𑀓𑀼𑀲𑀼𑀫𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀸𑀮𑀓𑀼𑀲𑀼𑀫𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.