𑁪𑁪. 𑀏𑀓𑀯𑀺𑀳𑀸𑀭𑀺𑀯𑀕𑁆𑀕𑁄

𑁧. 𑀏𑀓𑀯𑀺𑀳𑀸𑀭𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

𑁨. ‘‘𑀦𑀺𑀧𑁆𑀧𑀧𑀜𑁆𑀘𑁄 𑀦𑀺𑀭𑀸𑀮𑀫𑁆𑀩𑁄, 𑀆𑀓𑀸𑀲𑀲𑀫𑀫𑀸𑀦𑀲𑁄;

𑀲𑀼𑀜𑁆𑀜𑀢𑀸𑀩𑀳𑀼𑀮𑁄 𑀢𑀸𑀤𑀻, 𑀅𑀦𑀺𑀫𑀺𑀢𑁆𑀢𑀭𑀢𑁄 𑀯𑀲𑀻.

𑁩. ‘‘𑀅𑀲𑀗𑁆𑀕𑀘𑀺𑀢𑁆𑀢𑁄 𑀦𑀺𑀓𑁆𑀮𑁂𑀲𑁄 [𑀦𑀺𑀮𑁆𑀮𑁂𑀧𑁄 (𑀲𑁆𑀬𑀸. 𑀓.)], 𑀅𑀲𑀁𑀲𑀝𑁆𑀞𑁄 𑀓𑀼𑀮𑁂 𑀕𑀡𑁂;

𑀫𑀳𑀸𑀓𑀸𑀭𑀼𑀡𑀺𑀓𑁄 𑀯𑀻𑀭𑁄, 𑀯𑀺𑀦𑀬𑁄𑀧𑀸𑀬𑀓𑁄𑀯𑀺𑀤𑁄.

𑁪. ‘‘𑀉𑀬𑁆𑀬𑀼𑀢𑁆𑀢𑁄 𑀧𑀭𑀓𑀺𑀘𑁆𑀘𑁂𑀲𑀼, 𑀯𑀺𑀦𑀬𑀦𑁆𑀢𑁄 𑀲𑀤𑁂𑀯𑀓𑁂;

𑀦𑀺𑀩𑁆𑀩𑀸𑀦𑀕𑀫𑀦𑀁 𑀫𑀕𑁆𑀕𑀁, 𑀕𑀢𑀺𑀁 𑀧𑀗𑁆𑀓𑀯𑀺𑀲𑁄𑀲𑀦𑀁.

𑁫. ‘‘𑀅𑀫𑀢𑀁 𑀧𑀭𑀫𑀲𑁆𑀲𑀸𑀤𑀁, 𑀚𑀭𑀸𑀫𑀘𑁆𑀘𑀼𑀦𑀺𑀯𑀸𑀭𑀡𑀁;

𑀫𑀳𑀸𑀧𑀭𑀺𑀲𑀫𑀚𑁆𑀛𑁂 𑀲𑁄, 𑀦𑀺𑀲𑀺𑀦𑁆𑀦𑁄 𑀮𑁄𑀓𑀢𑀸𑀭𑀓𑁄.

𑁬. ‘‘𑀓𑀭𑀯𑀻𑀓𑀭𑀼𑀢𑁄 [𑀓𑀭𑀯𑀻𑀓𑀭𑀼𑀤𑁄 (𑀲𑁆𑀬𑀸. 𑀧𑀻. 𑀓.)] 𑀦𑀸𑀣𑁄, 𑀩𑁆𑀭𑀳𑁆𑀫𑀖𑁄𑀲𑁄 𑀢𑀣𑀸𑀕𑀢𑁄;

𑀉𑀤𑁆𑀥𑀭𑀦𑁆𑀢𑁄 𑀫𑀳𑀸𑀤𑀼𑀕𑁆𑀕𑀸, 𑀯𑀺𑀧𑁆𑀧𑀦𑀝𑁆𑀞𑁂 𑀅𑀦𑀸𑀬𑀓𑁂.

𑁭. ‘‘𑀤𑁂𑀲𑁂𑀦𑁆𑀢𑁄 𑀯𑀺𑀭𑀚𑀁 𑀥𑀫𑁆𑀫𑀁, 𑀤𑀺𑀝𑁆𑀞𑁄 𑀫𑁂 𑀮𑁄𑀓𑀦𑀸𑀬𑀓𑁄;

𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁮. ‘‘𑀧𑀩𑁆𑀩𑀚𑀺𑀢𑁆𑀯𑀸 𑀢𑀤𑀸𑀧𑀸𑀳𑀁, 𑀘𑀺𑀦𑁆𑀢𑁂𑀦𑁆𑀢𑁄 𑀚𑀺𑀦𑀲𑀸𑀲𑀦𑀁;

𑀏𑀓𑀓𑁄𑀯 𑀯𑀦𑁂 𑀭𑀫𑁆𑀫𑁂, 𑀯𑀲𑀺𑀁 𑀲𑀁𑀲𑀕𑁆𑀕𑀧𑀻𑀴𑀺𑀢𑁄.

𑁯. ‘‘𑀲𑀓𑁆𑀓𑀸𑀬𑀯𑀽𑀧𑀓𑀸𑀲𑁄 𑀫𑁂, 𑀳𑁂𑀢𑀼𑀪𑀽𑀢𑁄 𑀫𑀫𑀸𑀪𑀯𑀻 [𑀫𑀫𑀸𑀕𑀫𑀻 (𑀲𑁆𑀬𑀸. 𑀧𑀻.)];

𑀫𑀦𑀲𑁄 𑀯𑀽𑀧𑀓𑀸𑀲𑀲𑁆𑀲, 𑀲𑀁𑀲𑀕𑁆𑀕𑀪𑀬𑀤𑀲𑁆𑀲𑀺𑀦𑁄.

𑁧𑁦. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁧. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀯𑀺𑀳𑀸𑀭𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀯𑀺𑀳𑀸𑀭𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀏𑀓𑀲𑀗𑁆𑀔𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁩. ‘‘𑀯𑀺𑀧𑀲𑁆𑀲𑀺𑀦𑁄 𑀪𑀕𑀯𑀢𑁄, 𑀫𑀳𑀸𑀩𑁄𑀥𑀺𑀫𑀳𑁄 𑀅𑀳𑀼;

𑀫𑀳𑀸𑀚𑀦𑀸 𑀲𑀫𑀸𑀕𑀫𑁆𑀫, 𑀧𑀽𑀚𑁂𑀦𑁆𑀢𑀺 𑀩𑁄𑀥𑀺𑀫𑀼𑀢𑁆𑀢𑀫𑀁.

𑁧𑁪. ‘‘𑀦 𑀳𑀺 𑀢𑀁 𑀑𑀭𑀓𑀁 𑀫𑀜𑁆𑀜𑁂, 𑀩𑀼𑀤𑁆𑀥𑀲𑁂𑀝𑁆𑀞𑁄 𑀪𑀯𑀺𑀲𑁆𑀲𑀢𑀺;

𑀬𑀲𑁆𑀲𑀸𑀬𑀁 𑀈𑀤𑀺𑀲𑀸 𑀩𑁄𑀥𑀺, 𑀧𑀽𑀚𑀦𑀻𑀬𑀸 [𑀈𑀤𑀺𑀲𑁄 𑀩𑁄𑀥𑀺, 𑀧𑀽𑀚𑀦𑀻𑀬𑁄 (𑀲𑁆𑀬𑀸.)] 𑀘 𑀲𑀢𑁆𑀣𑀼𑀦𑁄.

𑁧𑁫. ‘‘𑀢𑀢𑁄 𑀲𑀗𑁆𑀔𑀁 𑀕𑀳𑁂𑀢𑁆𑀯𑀸𑀦, 𑀩𑁄𑀥𑀺𑀭𑀼𑀓𑁆𑀔𑀫𑀼𑀧𑀝𑁆𑀞𑀳𑀺𑀁;

𑀥𑀫𑀦𑁆𑀢𑁄 𑀲𑀩𑁆𑀩𑀤𑀺𑀯𑀲𑀁, 𑀅𑀯𑀦𑁆𑀤𑀺𑀁 𑀩𑁄𑀥𑀺𑀫𑀼𑀢𑁆𑀢𑀫𑀁.

𑁧𑁬. ‘‘𑀆𑀲𑀦𑁆𑀦𑀓𑁂 𑀓𑀢𑀁 𑀓𑀫𑁆𑀫𑀁, 𑀤𑁂𑀯𑀮𑁄𑀓𑀁 𑀅𑀧𑀸𑀧𑀬𑀻;

𑀓𑀴𑁂𑀯𑀭𑀁 𑀫𑁂 𑀧𑀢𑀺𑀢𑀁, 𑀤𑁂𑀯𑀮𑁄𑀓𑁂 𑀭𑀫𑀸𑀫𑀳𑀁.

𑁧𑁭. ‘‘𑀲𑀝𑁆𑀞𑀺𑀢𑀼𑀭𑀺𑀬𑀲𑀳𑀲𑁆𑀲𑀸𑀦𑀺, 𑀢𑀼𑀝𑁆𑀞𑀳𑀝𑁆𑀞𑀸 𑀧𑀫𑁄𑀤𑀺𑀢𑀸;

𑀲𑀤𑀸 𑀫𑀬𑁆𑀳𑀁 𑀉𑀧𑀝𑁆𑀞𑀦𑁆𑀢𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁮. ‘‘𑀏𑀓𑀲𑀢𑁆𑀢𑀢𑀺𑀫𑁂 𑀓𑀧𑁆𑀧𑁂, 𑀭𑀸𑀚𑀸 𑀆𑀲𑀺𑀁 𑀲𑀼𑀤𑀲𑁆𑀲𑀦𑁄;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀚𑀫𑁆𑀩𑀼𑀫𑀡𑁆𑀟𑀲𑁆𑀲 𑀇𑀲𑁆𑀲𑀭𑁄.

𑁧𑁯. ‘‘𑀢𑀢𑁄 𑀅𑀗𑁆𑀕𑀲𑀢𑀸 𑀢𑀼𑀭𑀺𑀬𑀸 [𑀢𑀽𑀭𑀸 (𑀲𑀻. 𑀓.)], 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸;

𑀅𑀦𑀼𑀪𑁄𑀫𑀺 𑀲𑀓𑀁 𑀓𑀫𑁆𑀫𑀁, 𑀉𑀧𑀝𑁆𑀞𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁦. ‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑀲𑁆𑀲𑀸𑀧𑀺, 𑀯𑀚𑁆𑀚𑀭𑁂 𑀪𑁂𑀭𑀺𑀬𑁄 𑀲𑀤𑀸.

𑁨𑁧. ‘‘𑀉𑀧𑀝𑁆𑀞𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀅𑀦𑀼𑀪𑀼𑀢𑁆𑀯𑀸𑀦 𑀲𑀫𑁆𑀧𑀤𑀸;

𑀲𑀺𑀯𑀁 𑀲𑀼𑀔𑁂𑀫𑀁 𑀅𑀫𑀢𑀁, 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀧𑀤𑀁.

𑁨𑁨. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁪. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀲𑀗𑁆𑀔𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀲𑀗𑁆𑀔𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀧𑀸𑀝𑀺𑀳𑀻𑀭𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁬. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺, 𑀦𑀕𑀭𑀁 𑀧𑀸𑀯𑀺𑀲𑀻 𑀢𑀤𑀸.

𑁨𑁭. ‘‘𑀦𑀕𑀭𑀁 𑀧𑀯𑀺𑀲𑀦𑁆𑀢𑀲𑁆𑀲, 𑀉𑀧𑀲𑀦𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀭𑀢𑀦𑀸𑀦𑀺 𑀧𑀚𑁆𑀚𑁄𑀢𑀺𑀁𑀲𑀼 [𑀧𑀦𑀸𑀤𑀺𑀁𑀲𑀼 (𑀧𑀻.)], 𑀦𑀺𑀕𑁆𑀖𑁄𑀲𑁄 𑀆𑀲𑀺 𑀢𑀸𑀯𑀤𑁂.

𑁨𑁮. ‘‘𑀩𑀼𑀤𑁆𑀥𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀪𑁂𑀭𑀻 𑀯𑀚𑁆𑀚𑀼𑀫𑀖𑀝𑁆𑀝𑀺𑀢𑀸;

𑀲𑀬𑀁 𑀯𑀻𑀡𑀸 𑀧𑀯𑀚𑁆𑀚𑀦𑁆𑀢𑀺, 𑀩𑀼𑀤𑁆𑀥𑀲𑁆𑀲 𑀧𑀯𑀺𑀲𑀢𑁄 𑀧𑀼𑀭𑀁.

𑁨𑁯. ‘‘𑀩𑀼𑀤𑁆𑀥𑀲𑁂𑀝𑁆𑀞𑀁 𑀦𑀫𑀲𑁆𑀲𑀸𑀫𑀺 [𑀦 𑀧𑀲𑁆𑀲𑀸𑀫𑀺 (𑀲𑀻.)], 𑀧𑀤𑀼𑀫𑀼𑀢𑁆𑀢𑀭𑀫𑀳𑀸𑀫𑀼𑀦𑀺𑀁;

𑀧𑀸𑀝𑀺𑀳𑀻𑀭𑀜𑁆𑀘 𑀧𑀲𑁆𑀲𑀺𑀢𑁆𑀯𑀸, 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁩𑁦. ‘‘𑀅𑀳𑁄 𑀩𑀼𑀤𑁆𑀥𑁄 𑀅𑀳𑁄 𑀥𑀫𑁆𑀫𑁄, 𑀅𑀳𑁄 𑀦𑁄 𑀲𑀢𑁆𑀣𑀼𑀲𑀫𑁆𑀧𑀤𑀸;

𑀅𑀘𑁂𑀢𑀦𑀸𑀧𑀺 𑀢𑀼𑀭𑀺𑀬𑀸, 𑀲𑀬𑀫𑁂𑀯 𑀧𑀯𑀚𑁆𑀚𑀭𑁂.

𑁩𑁧. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁩𑁨. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁩. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀸𑀝𑀺𑀳𑀻𑀭𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀸𑀝𑀺𑀳𑀻𑀭𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀜𑀸𑀡𑀢𑁆𑀣𑀯𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁫. ‘‘𑀓𑀡𑀺𑀓𑀸𑀭𑀁𑀯 𑀚𑀮𑀺𑀢𑀁, 𑀤𑀻𑀧𑀭𑀼𑀓𑁆𑀔𑀁𑀯 𑀚𑁄𑀢𑀺𑀢𑀁;

𑀓𑀜𑁆𑀘𑀦𑀁𑀯 𑀯𑀺𑀭𑁄𑀘𑀦𑁆𑀢𑀁, 𑀅𑀤𑁆𑀤𑀲𑀁 𑀤𑁆𑀯𑀺𑀧𑀤𑀼𑀢𑁆𑀢𑀫𑀁.

𑁩𑁬. ‘‘𑀓𑀫𑀡𑁆𑀟𑀮𑀼𑀁 𑀞𑀧𑁂𑀢𑁆𑀯𑀸𑀦, 𑀯𑀸𑀓𑀘𑀻𑀭𑀜𑁆𑀘 𑀓𑀼𑀡𑁆𑀟𑀺𑀓𑀁;

𑀏𑀓𑀁𑀲𑀁 𑀅𑀚𑀺𑀦𑀁 𑀓𑀢𑁆𑀯𑀸, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀣𑀯𑀺𑀁 𑀅𑀳𑀁.

𑁩𑁭. ‘‘‘𑀢𑀫𑀦𑁆𑀥𑀓𑀸𑀭𑀁 𑀯𑀺𑀥𑀫𑀁, 𑀫𑁄𑀳𑀚𑀸𑀮𑀲𑀫𑀸𑀓𑀼𑀮𑀁;

𑀜𑀸𑀡𑀸𑀮𑁄𑀓𑀁 𑀤𑀲𑁆𑀲𑁂𑀢𑁆𑀯𑀸𑀦, 𑀦𑀺𑀢𑁆𑀢𑀺𑀡𑁆𑀡𑁄𑀲𑀺 𑀫𑀳𑀸𑀫𑀼𑀦𑀺.

𑁩𑁮. ‘‘‘𑀲𑀫𑀼𑀤𑁆𑀥𑀭𑀲𑀺𑀫𑀁 𑀮𑁄𑀓𑀁, 𑀲𑀩𑁆𑀩𑀸𑀯𑀦𑁆𑀢𑀫𑀦𑀼𑀢𑁆𑀢𑀭𑀁;

𑀜𑀸𑀡𑁂 𑀢𑁂 𑀉𑀧𑀫𑀸 𑀦𑀢𑁆𑀣𑀺, 𑀬𑀸𑀯𑀢𑀸𑀚𑀕𑀢𑁄𑀕𑀢𑀺 [𑀬𑀸𑀯𑀢𑀸 𑀘 𑀕𑀢𑁄𑀕𑀢𑀺 (𑀧𑀻. 𑀓.)].

𑁩𑁯. ‘‘‘𑀢𑁂𑀦 𑀜𑀸𑀡𑁂𑀦 𑀲𑀩𑁆𑀩𑀜𑁆𑀜𑀽, 𑀇𑀢𑀺 𑀩𑀼𑀤𑁆𑀥𑁄 𑀧𑀯𑀼𑀘𑁆𑀘𑀢𑀺;

𑀯𑀦𑁆𑀤𑀸𑀫𑀺 𑀢𑀁 𑀫𑀳𑀸𑀯𑀻𑀭𑀁, 𑀲𑀩𑁆𑀩𑀜𑁆𑀜𑀼𑀢𑀫𑀦𑀸𑀯𑀭𑀁’.

𑁪𑁦. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀣𑀯𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀜𑀸𑀡𑀢𑁆𑀣𑀯𑀸𑀬𑀺𑀤𑀁 𑀨𑀮𑀁;

𑁪𑁧. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄;

𑁪𑁨. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀜𑀸𑀡𑀢𑁆𑀣𑀯𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀜𑀸𑀡𑀢𑁆𑀣𑀯𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀉𑀘𑁆𑀙𑀼𑀔𑀡𑁆𑀟𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁪. ‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀤𑁆𑀯𑀸𑀭𑀧𑀸𑀮𑁄 𑀅𑀳𑁄𑀲𑀳𑀁;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀼𑀁.

𑁪𑁫. ‘‘𑀉𑀘𑁆𑀙𑀼𑀔𑀡𑁆𑀟𑀺𑀓𑀫𑀸𑀤𑀸𑀬, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄.

𑁪𑁬. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀉𑀘𑁆𑀙𑀼𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀘𑁆𑀙𑀼𑀔𑀡𑁆𑀟𑀲𑁆𑀲𑀺𑀤𑀁 𑀨𑀮𑀁.

𑁪𑁭. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁮. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀘𑁆𑀙𑀼𑀔𑀡𑁆𑀟𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀘𑁆𑀙𑀼𑀔𑀡𑁆𑀟𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀓𑀴𑀫𑁆𑀩𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁦. ‘‘𑀭𑁄𑀫𑀲𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀯𑀲𑀢𑁂 𑀧𑀩𑁆𑀩𑀢𑀦𑁆𑀢𑀭𑁂;

𑀓𑀴𑀫𑁆𑀩𑀁 𑀢𑀲𑁆𑀲 𑀧𑀸𑀤𑀸𑀲𑀺𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁫𑁧. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀴𑀫𑁆𑀩𑀲𑁆𑀲 𑀇𑀤𑀁 𑀨𑀮𑀁.

𑁫𑁨. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁩. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀴𑀫𑁆𑀩𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀴𑀫𑁆𑀩𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀅𑀫𑁆𑀩𑀸𑀝𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁫. ‘‘𑀯𑀺𑀧𑀺𑀦𑁂 𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀦, 𑀲𑀬𑀫𑁆𑀪𑀼𑀁 𑀅𑀧𑀭𑀸𑀚𑀺𑀢𑀁;

𑀅𑀫𑁆𑀩𑀸𑀝𑀓𑀁 𑀕𑀳𑁂𑀢𑁆𑀯𑀸𑀦, 𑀲𑀬𑀫𑁆𑀪𑀼𑀲𑁆𑀲 𑀅𑀤𑀸𑀲𑀳𑀁.

𑁫𑁬. ‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁭. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁮. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀫𑁆𑀩𑀸𑀝𑀓𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀫𑁆𑀩𑀸𑀝𑀓𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀳𑀭𑀻𑀢𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁦. ‘‘𑀳𑀭𑀻𑀢𑀓𑀁 𑀆𑀫𑀮𑀓𑀁, 𑀅𑀫𑁆𑀩𑀚𑀫𑁆𑀩𑀼𑀯𑀺𑀪𑀻𑀢𑀓𑀁;

𑀓𑁄𑀮𑀁 𑀪𑀮𑁆𑀮𑀸𑀢𑀓𑀁 𑀩𑀺𑀮𑁆𑀮𑀁, 𑀲𑀬𑀫𑁂𑀯 𑀳𑀭𑀸𑀫𑀳𑀁.

𑁬𑁧. ‘‘𑀤𑀺𑀲𑁆𑀯𑀸𑀦 𑀧𑀩𑁆𑀪𑀸𑀭𑀕𑀢𑀁, 𑀛𑀸𑀬𑀺𑀁 𑀛𑀸𑀦𑀭𑀢𑀁 𑀫𑀼𑀦𑀺𑀁;

𑀆𑀩𑀸𑀥𑁂𑀦 𑀆𑀧𑀻𑀴𑁂𑀦𑁆𑀢𑀁, 𑀅𑀤𑀼𑀢𑀻𑀬𑀁 𑀫𑀳𑀸𑀫𑀼𑀦𑀺𑀁.

𑁬𑁨. ‘‘𑀳𑀭𑀻𑀢𑀓𑀁 𑀕𑀳𑁂𑀢𑁆𑀯𑀸𑀦, 𑀲𑀬𑀫𑁆𑀪𑀼𑀲𑁆𑀲 𑀅𑀤𑀸𑀲𑀳𑀁;

𑀔𑀸𑀤𑀫𑀢𑁆𑀢𑀫𑁆𑀳𑀺 𑀪𑁂𑀲𑀚𑁆𑀚𑁂, 𑀩𑁆𑀬𑀸𑀥𑀺 𑀧𑀲𑁆𑀲𑀫𑁆𑀪𑀺 [𑀧𑀲𑁆𑀲𑀤𑁆𑀥𑀺 (𑀓.)] 𑀢𑀸𑀯𑀤𑁂.

𑁬𑁩. ‘‘𑀧𑀳𑀻𑀦𑀤𑀭𑀣𑁄 𑀩𑀼𑀤𑁆𑀥𑁄, 𑀅𑀦𑀼𑀫𑁄𑀤𑀫𑀓𑀸𑀲𑀺 𑀫𑁂;

‘𑀪𑁂𑀲𑀚𑁆𑀚𑀤𑀸𑀦𑁂𑀦𑀺𑀫𑀺𑀦𑀸, 𑀩𑁆𑀬𑀸𑀥𑀺𑀯𑀽𑀧𑀲𑀫𑁂𑀦 𑀘.

𑁬𑁪. ‘‘‘𑀤𑁂𑀯𑀪𑀽𑀢𑁄 𑀫𑀦𑀼𑀲𑁆𑀲𑁄 𑀯𑀸, 𑀚𑀸𑀢𑁄 𑀯𑀸 𑀅𑀜𑁆𑀜𑀚𑀸𑀢𑀺𑀬𑀸;

𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑁄 𑀳𑁄𑀢𑀼, 𑀫𑀸 𑀘 𑀢𑁂 𑀩𑁆𑀬𑀸𑀥𑀺𑀫𑀸𑀕𑀫𑀸’.

𑁬𑁫. ‘‘𑀇𑀤𑀁 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀥𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

𑁬𑁬. ‘‘𑀬𑀢𑁄 𑀳𑀭𑀻𑀢𑀓𑀁 𑀤𑀺𑀦𑁆𑀦𑀁, 𑀲𑀬𑀫𑁆𑀪𑀼𑀲𑁆𑀲 𑀫𑀳𑁂𑀲𑀺𑀦𑁄;

𑀇𑀫𑀁 𑀚𑀸𑀢𑀺𑀁 𑀉𑀧𑀸𑀤𑀸𑀬, 𑀩𑁆𑀬𑀸𑀥𑀺 𑀫𑁂 𑀦𑀼𑀧𑀧𑀚𑁆𑀚𑀣.

𑁬𑁭. ‘‘𑀅𑀬𑀁 𑀧𑀘𑁆𑀙𑀺𑀫𑀓𑁄 𑀫𑀬𑁆𑀳𑀁, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁮. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀪𑁂𑀲𑀚𑁆𑀚𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑁂𑀲𑀚𑁆𑀚𑀲𑁆𑀲 𑀇𑀤𑀁 𑀨𑀮𑀁.

𑁬𑁯. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁭𑁦. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.