𑁩. 𑀏𑀓𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁬. ‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀕𑁄𑀲𑀺𑀢𑁄 𑀦𑀸𑀫 𑀧𑀩𑁆𑀩𑀢𑁄;

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸.

𑁩𑁭. ‘‘𑀦𑀸𑀭𑀤𑁄 𑀦𑀸𑀫 𑀦𑀸𑀫𑁂𑀦, 𑀓𑀲𑁆𑀲𑀧𑁄 𑀇𑀢𑀺 𑀫𑀁 𑀯𑀺𑀤𑀽;

𑀲𑀼𑀤𑁆𑀥𑀺𑀫𑀕𑁆𑀕𑀁 𑀕𑀯𑁂𑀲𑀦𑁆𑀢𑁄, 𑀯𑀲𑀸𑀫𑀺 𑀕𑁄𑀲𑀺𑀢𑁂 𑀢𑀤𑀸.

𑁩𑁮. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀯𑀺𑀯𑁂𑀓𑀓𑀸𑀫𑁄 𑀲𑀫𑁆𑀩𑀼𑀤𑁆𑀥𑁄, 𑀅𑀕𑀜𑁆𑀙𑀺 𑀅𑀦𑀺𑀮𑀜𑁆𑀚𑀲𑀸.

𑁩𑁯. ‘‘𑀯𑀦𑀕𑁆𑀕𑁂 𑀕𑀘𑁆𑀙𑀫𑀸𑀦𑀲𑁆𑀲, 𑀤𑀺𑀲𑁆𑀯𑀸 𑀭𑀁𑀲𑀺𑀁 𑀫𑀳𑁂𑀲𑀺𑀦𑁄;

𑀓𑀝𑁆𑀞𑀫𑀜𑁆𑀘𑀁 𑀧𑀜𑁆𑀜𑀸𑀧𑁂𑀢𑁆𑀯𑀸, 𑀅𑀚𑀺𑀦𑀜𑁆𑀘 𑀅𑀧𑀢𑁆𑀣𑀭𑀺𑀁.

𑁪𑁦. ‘‘𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸𑀦, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑀺𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁪𑁧. ‘‘‘𑀲𑀮𑁆𑀮𑀓𑀢𑁆𑀢𑁄 𑀫𑀳𑀸𑀯𑀻𑀭, 𑀆𑀢𑀼𑀭𑀸𑀦𑀁 𑀢𑀺𑀓𑀺𑀘𑁆𑀙𑀓𑁄;

𑀫𑀫𑀁 𑀭𑁄𑀕𑀧𑀭𑁂𑀢𑀲𑁆𑀲 [𑀭𑀸𑀕… (𑀲𑁆𑀬𑀸.)], 𑀢𑀺𑀓𑀺𑀘𑁆𑀙𑀁 𑀤𑁂𑀳𑀺 𑀦𑀸𑀬𑀓.

𑁪𑁨. ‘‘‘𑀓𑀮𑁆𑀮𑀢𑁆𑀣𑀺𑀓𑀸 𑀬𑁂 𑀧𑀲𑁆𑀲𑀦𑁆𑀢𑀺, 𑀩𑀼𑀤𑁆𑀥𑀲𑁂𑀝𑁆𑀞 𑀢𑀼𑀯𑀁 𑀫𑀼𑀦𑁂;

𑀥𑀼𑀯𑀢𑁆𑀣𑀲𑀺𑀤𑁆𑀥𑀺𑀁 𑀧𑀧𑁆𑀧𑁄𑀦𑁆𑀢𑀺, 𑀏𑀢𑁂𑀲𑀁 𑀅𑀚𑀭𑁄 [𑀚𑀚𑁆𑀚𑀭𑁄 (𑀲𑀻. 𑀧𑀻. 𑀓.)] 𑀪𑀯𑁂.

𑁪𑁩. ‘‘‘𑀦 𑀫𑁂 𑀤𑁂𑀬𑁆𑀬𑀥𑀫𑁆𑀫𑁄 𑀅𑀢𑁆𑀣𑀺, 𑀧𑀯𑀢𑁆𑀢𑀨𑀮𑀪𑁄𑀚𑀺𑀳𑀁;

𑀇𑀤𑀁 𑀫𑁂 𑀆𑀲𑀦𑀁 𑀅𑀢𑁆𑀣𑀺 [𑀦 𑀫𑁂 𑀤𑁂𑀬𑁆𑀬𑀁 𑀢𑀯 𑀅𑀢𑁆𑀣𑀺 (𑀲𑀻. 𑀲𑁆𑀬𑀸.)], 𑀦𑀺𑀲𑀻𑀤 𑀓𑀝𑁆𑀞𑀫𑀜𑁆𑀘𑀓𑁂’.

𑁪𑁪. ‘‘𑀦𑀺𑀲𑀻𑀤𑀺 𑀢𑀢𑁆𑀣 𑀪𑀕𑀯𑀸, 𑀅𑀲𑀫𑁆𑀪𑀻𑀢𑁄𑀯 [𑀅𑀘𑁆𑀙𑀫𑁆𑀪𑀺𑀢𑁄𑀯 (𑀲𑁆𑀬𑀸. 𑀓.)] 𑀓𑁂𑀲𑀭𑀻;

𑀫𑀼𑀳𑀼𑀢𑁆𑀢𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁪𑁫. ‘‘‘𑀯𑀺𑀲𑀝𑁆𑀞𑁄 [𑀯𑀺𑀲𑁆𑀲𑀢𑁆𑀣𑁄 (𑀲𑀻. 𑀧𑀻), 𑀯𑀺𑀲𑁆𑀲𑀝𑁆𑀞𑁄 (𑀲𑁆𑀬𑀸. 𑀓.)] 𑀳𑁄𑀳𑀺 𑀫𑀸 𑀪𑀸𑀬𑀺, 𑀮𑀤𑁆𑀥𑁄 𑀚𑁄𑀢𑀺𑀭𑀲𑁄 𑀢𑀬𑀸;

𑀬𑀁 𑀢𑀼𑀬𑁆𑀳𑀁 𑀧𑀢𑁆𑀣𑀺𑀢𑀁 𑀲𑀩𑁆𑀩𑀁, 𑀧𑀭𑀺𑀧𑀽𑀭𑀺𑀲𑁆𑀲𑀢𑀺𑀦𑀸𑀕𑀢𑁂 [𑀧𑀭𑀺𑀧𑀽𑀭𑀺𑀲𑁆𑀲𑀢𑀸𑀲𑀦𑀁 (𑀲𑁆𑀬𑀸. 𑀓.)].

𑁪𑁬. ‘‘‘𑀦 𑀫𑁄𑀖𑀁 𑀢𑀁 𑀓𑀢𑀁 𑀢𑀼𑀬𑁆𑀳𑀁, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂;

𑀲𑀓𑁆𑀓𑀸 𑀉𑀤𑁆𑀥𑀭𑀺𑀢𑀼𑀁 𑀅𑀢𑁆𑀢𑀸, 𑀬𑀲𑁆𑀲 𑀘𑀺𑀢𑁆𑀢𑀁 𑀧𑀡𑀻𑀳𑀺𑀢𑀁 [𑀲𑀼𑀦𑀻𑀳𑀺𑀢𑀁 (𑀲𑁆𑀬𑀸.)].

𑁪𑁭. ‘‘‘𑀇𑀫𑀺𑀦𑀸𑀲𑀦𑀤𑀸𑀦𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺, 𑀯𑀺𑀦𑀺𑀧𑀸𑀢𑀁 𑀦 𑀕𑀘𑁆𑀙𑀲𑀺.

𑁪𑁮. ‘‘‘𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀲𑀺;

𑀅𑀲𑀻𑀢𑀺𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀲𑀺.

𑁪𑁯. ‘‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑁄 𑀳𑀼𑀢𑁆𑀯𑀸, 𑀲𑀁𑀲𑀸𑀭𑁂 𑀲𑀁𑀲𑀭𑀺𑀲𑁆𑀲𑀲𑀺’.

𑁫𑁦. ‘‘𑀇𑀤𑀁 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁄;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀯𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

𑁫𑁧. ‘‘𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀁, 𑀲𑀭𑀣𑀁 𑀲𑀦𑁆𑀤𑀫𑀸𑀦𑀺𑀓𑀁;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁨. ‘‘𑀓𑀸𑀦𑀦𑀁 𑀧𑀯𑀺𑀲𑀺𑀢𑁆𑀯𑀸𑀧𑀺, 𑀬𑀤𑀸 𑀇𑀘𑁆𑀙𑀸𑀫𑀺 𑀆𑀲𑀦𑀁;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀮𑁆𑀮𑀗𑁆𑀓𑁄 𑀉𑀧𑀢𑀺𑀝𑁆𑀞𑀢𑀺.

𑁫𑁩. ‘‘𑀯𑀸𑀭𑀺𑀫𑀚𑁆𑀛𑀕𑀢𑁄 𑀲𑀦𑁆𑀢𑁄, 𑀬𑀤𑀸 𑀇𑀘𑁆𑀙𑀸𑀫𑀺 𑀆𑀲𑀦𑀁;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀮𑁆𑀮𑀗𑁆𑀓𑁄 𑀉𑀧𑀢𑀺𑀝𑁆𑀞𑀢𑀺.

𑁫𑁪. ‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀧𑀮𑁆𑀮𑀗𑁆𑀓𑀲𑀢𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁫𑁫. ‘‘𑀤𑀼𑀯𑁂 𑀪𑀯𑁂 𑀲𑀁𑀲𑀭𑀸𑀫𑀺, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀤𑀼𑀯𑁂 𑀓𑀼𑀮𑁂 𑀧𑀚𑀸𑀬𑀸𑀫𑀺, 𑀔𑀢𑁆𑀢𑀺𑀬𑁂 𑀅𑀣 𑀩𑁆𑀭𑀸𑀳𑁆𑀫𑀡𑁂.

𑁫𑁬. ‘‘𑀏𑀓𑀸𑀲𑀦𑀁 𑀤𑀤𑀺𑀢𑁆𑀯𑀸𑀦, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂;

𑀥𑀫𑁆𑀫𑀧𑀮𑁆𑀮𑀗𑁆𑀓𑀫𑀸𑀤𑀸𑀬 [𑀥𑀫𑁆𑀫𑀧𑀮𑁆𑀮𑀗𑁆𑀓𑀫𑀜𑁆𑀜𑀸𑀬 (𑀲𑁆𑀬𑀸. 𑀓.)], 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁭. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁮. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁯. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀸𑀲𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.