𑁮. 𑀬𑀸𑀕𑀼𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁪𑁯. ‘‘𑀅𑀢𑀺𑀣𑀺𑀁 [𑀅𑀢𑀻𑀢𑀁 (𑀓.)] 𑀫𑁂 𑀕𑀳𑁂𑀢𑁆𑀯𑀸𑀦, 𑀅𑀕𑀘𑁆𑀙𑀺𑀁 𑀕𑀸𑀫𑀓𑀁 𑀢𑀤𑀸;

𑀲𑀫𑁆𑀧𑀼𑀡𑁆𑀡𑀦𑀤𑀺𑀓𑀁 𑀤𑀺𑀲𑁆𑀯𑀸, 𑀲𑀗𑁆𑀖𑀸𑀭𑀸𑀫𑀁 𑀉𑀧𑀸𑀕𑀫𑀺𑀁.

𑁧𑁫𑁦. ‘‘𑀆𑀭𑀜𑁆𑀜𑀓𑀸 𑀥𑀼𑀢𑀥𑀭𑀸, 𑀛𑀸𑀬𑀺𑀦𑁄 𑀮𑀽𑀔𑀘𑀻𑀯𑀭𑀸;

𑀯𑀺𑀯𑁂𑀓𑀸𑀪𑀺𑀭𑀢𑀸 𑀥𑀻𑀭𑀸, 𑀲𑀗𑁆𑀖𑀸𑀭𑀸𑀫𑁂 𑀯𑀲𑀦𑁆𑀢𑀺 𑀢𑁂.

𑁧𑁫𑁧. ‘‘𑀕𑀢𑀺 𑀢𑁂𑀲𑀁 𑀉𑀧𑀘𑁆𑀙𑀺𑀦𑁆𑀦𑀸, 𑀲𑀼𑀯𑀺𑀫𑀼𑀢𑁆𑀢𑀸𑀦 𑀢𑀸𑀤𑀺𑀦𑀁;

𑀧𑀺𑀡𑁆𑀟𑀸𑀬 𑀢𑁂 𑀦 𑀕𑀘𑁆𑀙𑀦𑁆𑀢𑀺, 𑀑𑀭𑀼𑀤𑁆𑀥𑀦𑀤𑀺𑀢𑀸𑀬 𑀳𑀺 [𑀑𑀭𑀼𑀤𑁆𑀥𑀦𑀤𑀺𑀓𑀸𑀬𑀢𑀺𑀁 (𑀲𑁆𑀬𑀸.)].

𑁧𑁫𑁨. ‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑁂𑀤𑀚𑀸𑀢𑁄 𑀓𑀢𑀜𑁆𑀚𑀮𑀻;

𑀢𑀡𑁆𑀟𑀼𑀮𑀁 𑀫𑁂 𑀕𑀳𑁂𑀢𑁆𑀯𑀸𑀦, 𑀬𑀸𑀕𑀼𑀤𑀸𑀦𑀁 𑀅𑀤𑀸𑀲𑀳𑀁.

𑁧𑁫𑁩. ‘‘𑀧𑀜𑁆𑀘𑀦𑁆𑀦𑀁 𑀬𑀸𑀕𑀼𑀁 𑀤𑀢𑁆𑀯𑀸𑀦, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺;

𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁧𑁫𑁪. ‘‘𑀫𑀡𑀺𑀫𑀬𑀜𑁆𑀘 𑀫𑁂 𑀩𑁆𑀬𑀫𑁆𑀳𑀁, 𑀦𑀺𑀩𑁆𑀩𑀢𑁆𑀢𑀺 𑀢𑀺𑀤𑀲𑁂 𑀕𑀡𑁂;

𑀦𑀸𑀭𑀻𑀕𑀡𑁂𑀳𑀺 𑀲𑀳𑀺𑀢𑁄, 𑀫𑁄𑀤𑀸𑀫𑀺 𑀩𑁆𑀬𑀫𑁆𑀳𑀫𑀼𑀢𑁆𑀢𑀫𑁂.

𑁧𑁫𑁫. ‘‘𑀢𑁂𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀘𑀓𑁆𑀓𑀯𑀢𑁆𑀢𑀻, 𑀫𑀳𑀸𑀭𑀚𑁆𑀚𑀫𑀓𑀸𑀭𑀬𑀺𑀁.

𑁧𑁫𑁬. ‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑁂 𑀯𑀸, 𑀅𑀦𑀼𑀪𑁄𑀢𑁆𑀯𑀸 𑀲𑀬𑀁 [𑀬𑀲𑀁 (𑀲𑁆𑀬𑀸.)] 𑀅𑀳𑀁.

𑁧𑁫𑁭. ‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀲𑀳 𑀑𑀭𑁄𑀧𑀺𑀢𑁂 𑀓𑁂𑀲𑁂, 𑀲𑀩𑁆𑀩𑀁 𑀲𑀫𑁆𑀧𑀝𑀺𑀯𑀺𑀚𑁆𑀛𑀳𑀁.

𑁧𑁫𑁮. ‘‘𑀔𑀬𑀢𑁄 𑀯𑀬𑀢𑁄 𑀘𑀸𑀧𑀺, 𑀲𑀫𑁆𑀫𑀲𑀦𑁆𑀢𑁄 𑀓𑀴𑁂𑀯𑀭𑀁;

𑀧𑀼𑀭𑁂 𑀲𑀺𑀓𑁆𑀔𑀸𑀧𑀤𑀸𑀤𑀸𑀦𑀸, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁫𑁯. ‘‘𑀲𑀼𑀤𑀺𑀦𑁆𑀦𑀁 𑀫𑁂 𑀤𑀸𑀦𑀯𑀭𑀁, 𑀯𑀸𑀡𑀺𑀚𑁆𑀚𑀁 𑀲𑀫𑁆𑀧𑀬𑁄𑀚𑀺𑀢𑀁;

𑀢𑁂𑀦𑁂𑀯 𑀬𑀸𑀕𑀼𑀤𑀸𑀦𑁂𑀦, 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀧𑀤𑀁.

𑁧𑁬𑁦. ‘‘𑀲𑁄𑀓𑀁 𑀧𑀭𑀺𑀤𑁆𑀤𑀯𑀁 𑀩𑁆𑀬𑀸𑀥𑀺𑀁, 𑀤𑀭𑀣𑀁 𑀘𑀺𑀢𑁆𑀢𑀢𑀸𑀧𑀦𑀁;

𑀦𑀸𑀪𑀺𑀚𑀸𑀦𑀸𑀫𑀺 𑀉𑀧𑁆𑀧𑀦𑁆𑀦𑀁, 𑀬𑀸𑀕𑀼𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁬𑁧. ‘‘𑀬𑀸𑀕𑀼𑀁 𑀲𑀗𑁆𑀖𑀲𑁆𑀲 𑀤𑀢𑁆𑀯𑀸𑀦, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂;

𑀧𑀜𑁆𑀘𑀸𑀦𑀺𑀲𑀁𑀲𑁂 𑀅𑀦𑀼𑀪𑁄𑀫𑀺, 𑀅𑀳𑁄 𑀬𑀸𑀕𑀼𑀲𑀼𑀬𑀺𑀝𑁆𑀞𑀢𑀸.

𑁧𑁬𑁨. ‘‘𑀅𑀩𑁆𑀬𑀸𑀥𑀺𑀢𑀸 𑀭𑀽𑀧𑀯𑀢𑀸, 𑀔𑀺𑀧𑁆𑀧𑀁 𑀥𑀫𑁆𑀫𑀦𑀺𑀲𑀦𑁆𑀢𑀺𑀢𑀸 [𑀦𑀺𑀩𑀼𑀚𑁆𑀛𑀺𑀢𑀸 (𑀲𑁆𑀬𑀸.)];

𑀮𑀸𑀪𑀺𑀢𑀸 𑀅𑀦𑁆𑀦𑀧𑀸𑀦𑀲𑁆𑀲, 𑀆𑀬𑀼 𑀧𑀜𑁆𑀘𑀫𑀓𑀁 𑀫𑀫.

𑁧𑁬𑁩. ‘‘𑀬𑁄 𑀓𑁄𑀘𑀺 𑀯𑁂𑀤𑀁 𑀚𑀦𑀬𑀁, 𑀲𑀗𑁆𑀖𑁂 𑀬𑀸𑀕𑀼𑀁 𑀤𑀤𑁂𑀬𑁆𑀬 𑀲𑁄;

𑀇𑀫𑀸𑀦𑀺 𑀧𑀜𑁆𑀘 𑀞𑀸𑀦𑀸𑀦𑀺, 𑀧𑀝𑀺𑀕𑀡𑁆𑀳𑁂𑀬𑁆𑀬 𑀧𑀡𑁆𑀟𑀺𑀢𑁄.

𑁧𑁬𑁪. ‘‘𑀓𑀭𑀡𑀻𑀬𑀁 𑀓𑀢𑀁 𑀲𑀩𑁆𑀩𑀁, 𑀪𑀯𑀸 𑀉𑀕𑁆𑀖𑀸𑀝𑀺𑀢𑀸 𑀫𑀬𑀸;

𑀲𑀩𑁆𑀩𑀸𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁧𑁬𑁫. ‘‘𑀲𑁄 𑀅𑀳𑀁 𑀯𑀺𑀘𑀭𑀺𑀲𑁆𑀲𑀸𑀫𑀺, 𑀕𑀸𑀫𑀸 𑀕𑀸𑀫𑀁 𑀧𑀼𑀭𑀸 𑀧𑀼𑀭𑀁;

𑀦𑀫𑀲𑁆𑀲𑀫𑀸𑀦𑁄 𑀲𑀫𑁆𑀩𑀼𑀤𑁆𑀥𑀁, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢𑀁.

𑁧𑁬𑁬. ‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀬𑀸𑀕𑀼𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁬𑁭. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁬𑁮. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁬𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀬𑀸𑀕𑀼𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀬𑀸𑀕𑀼𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.