𑁬. 𑀏𑀓𑀤𑀻𑀧𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁨𑁪. ‘‘𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀼𑀕𑀢𑁂, 𑀲𑀺𑀤𑁆𑀥𑀢𑁆𑀣𑁂 𑀮𑁄𑀓𑀦𑀸𑀬𑀓𑁂;

𑀲𑀤𑁂𑀯𑀫𑀸𑀦𑀼𑀲𑀸 𑀲𑀩𑁆𑀩𑁂, 𑀧𑀽𑀚𑁂𑀦𑁆𑀢𑀺 𑀤𑁆𑀯𑀺𑀧𑀤𑀼𑀢𑁆𑀢𑀫𑀁.

𑁧𑁨𑁫. ‘‘𑀆𑀭𑁄𑀧𑀺𑀢𑁂 𑀘 𑀘𑀺𑀢𑀓𑁂, 𑀲𑀺𑀤𑁆𑀥𑀢𑁆𑀣𑁂 𑀮𑁄𑀓𑀦𑀸𑀬𑀓𑁂;

𑀬𑀣𑀸𑀲𑀓𑁂𑀦 𑀣𑀸𑀫𑁂𑀦, 𑀘𑀺𑀢𑀁 𑀧𑀽𑀚𑁂𑀦𑁆𑀢𑀺 𑀲𑀢𑁆𑀣𑀼𑀦𑁄.

𑁧𑁨𑁬. ‘‘𑀅𑀯𑀺𑀤𑀽𑀭𑁂 𑀘𑀺𑀢𑀓𑀲𑁆𑀲, 𑀤𑀻𑀧𑀁 𑀉𑀚𑁆𑀚𑀸𑀮𑀬𑀺𑀁 𑀅𑀳𑀁;

𑀬𑀸𑀯 𑀉𑀤𑁂𑀢𑀺 𑀲𑀽𑀭𑀺𑀬𑁄, 𑀤𑀻𑀧𑀁 𑀫𑁂 𑀢𑀸𑀯 𑀉𑀚𑁆𑀚𑀮𑀺.

𑁧𑁨𑁭. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁧𑁨𑁮. ‘‘𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀏𑀓𑀤𑀻𑀧𑀻𑀢𑀺 𑀜𑀸𑀬𑀢𑀺;

𑀤𑀻𑀧𑀲𑀢𑀲𑀳𑀲𑁆𑀲𑀸𑀦𑀺, 𑀩𑁆𑀬𑀫𑁆𑀳𑁂 𑀧𑀚𑁆𑀚𑀮𑀭𑁂 𑀫𑀫.

𑁧𑁨𑁯. ‘‘𑀉𑀤𑀬𑀦𑁆𑀢𑁄𑀯 𑀲𑀽𑀭𑀺𑀬𑁄, 𑀤𑁂𑀳𑁄 𑀫𑁂 𑀚𑁄𑀢𑀢𑁂 𑀲𑀤𑀸;

𑀲𑀧𑁆𑀧𑀪𑀸𑀳𑀺 𑀲𑀭𑀻𑀭𑀲𑁆𑀲, 𑀆𑀮𑁄𑀓𑁄 𑀳𑁄𑀢𑀺 𑀫𑁂 𑀲𑀤𑀸.

𑁧𑁩𑁦. ‘‘𑀢𑀺𑀭𑁄𑀓𑀼𑀝𑁆𑀝𑀁 [𑀢𑀺𑀭𑁄𑀓𑀼𑀟𑁆𑀟𑀁 (𑀲𑀻. 𑀲𑁆𑀬𑀸. 𑀓.)] 𑀢𑀺𑀭𑁄𑀲𑁂𑀮𑀁, 𑀲𑀫𑀢𑀺𑀕𑁆𑀕𑀬𑁆𑀳 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺] 𑀧𑀩𑁆𑀩𑀢𑀁;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀧𑀲𑁆𑀲𑀸𑀫𑀺 𑀘𑀓𑁆𑀔𑀼𑀦𑀸 𑀅𑀳𑀁.

𑁧𑁩𑁧. ‘‘𑀲𑀢𑁆𑀢𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀮𑁄𑀓𑁂 𑀭𑀫𑀺𑀁 𑀅𑀳𑀁;

𑀏𑀓𑀢𑀺𑀁𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁.

𑁧𑁩𑁨. ‘‘𑀅𑀝𑁆𑀞𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁧𑁩𑁩. ‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀦𑀺𑀩𑁆𑀩𑀢𑁆𑀢𑀺𑀁 𑀫𑀸𑀢𑀼𑀓𑀼𑀘𑁆𑀙𑀺𑀬𑀁;

𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑀲𑁆𑀲𑀸𑀧𑀺, 𑀅𑀓𑁆𑀔𑀺 𑀫𑁂 𑀦 𑀦𑀺𑀫𑀻𑀮𑀢𑀺.

𑁧𑁩𑁪. ‘‘𑀚𑀸𑀢𑀺𑀬𑀸 𑀘𑀢𑀼𑀯𑀲𑁆𑀲𑁄𑀳𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀅𑀟𑁆𑀠𑀫𑀸𑀲𑁂 𑀅𑀲𑀫𑁆𑀧𑀢𑁆𑀢𑁂, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁩𑁫. ‘‘𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀲𑀺𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀲𑀩𑁆𑀩𑁂 𑀓𑀺𑀮𑁂𑀲𑀸 𑀲𑀜𑁆𑀙𑀺𑀦𑁆𑀦𑀸, 𑀏𑀓𑀤𑀻𑀧𑀲𑁆𑀲𑀺𑀤𑀁 𑀨𑀮𑀁.

𑁧𑁩𑁬. ‘‘𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀲𑁂𑀮𑀁, 𑀧𑀩𑁆𑀩𑀢𑀜𑁆𑀘𑀸𑀧𑀺 𑀓𑁂𑀯𑀮𑀁;

𑀲𑀫𑀢𑀺𑀓𑁆𑀓𑀫𑁆𑀫 [𑀲𑀩𑁆𑀩𑀢𑁆𑀣𑀧𑀻 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺] 𑀧𑀲𑁆𑀲𑀸𑀫𑀺, 𑀏𑀓𑀤𑀻𑀧𑀲𑁆𑀲𑀺𑀤𑀁 𑀨𑀮𑀁.

𑁧𑁩𑁭. ‘‘𑀯𑀺𑀲𑀫𑀸 𑀫𑁂 𑀲𑀫𑀸 𑀳𑁄𑀦𑁆𑀢𑀺, 𑀅𑀦𑁆𑀥𑀓𑀸𑀭𑁄 𑀦 𑀯𑀺𑀚𑁆𑀚𑀢𑀺;

𑀦𑀸𑀳𑀁 𑀧𑀲𑁆𑀲𑀸𑀫𑀺 𑀢𑀺𑀫𑀺𑀭𑀁, 𑀏𑀓𑀤𑀻𑀧𑀲𑁆𑀲𑀺𑀤𑀁 𑀨𑀮𑀁.

𑁧𑁩𑁮. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀻𑀧𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀏𑀓𑀤𑀻𑀧𑀲𑁆𑀲𑀺𑀤𑀁 𑀨𑀮𑀁.

𑁧𑁩𑁯. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁪𑁦. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁪𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀤𑀻𑀧𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀤𑀻𑀧𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.