𑁧𑁦. 𑀫𑀜𑁆𑀘𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁮𑁪. ‘‘𑀧𑀭𑀺𑀦𑀺𑀩𑁆𑀩𑀼𑀢𑁂 𑀓𑀸𑀭𑀼𑀡𑀺𑀓𑁂, 𑀲𑀺𑀤𑁆𑀥𑀢𑁆𑀣𑁂 𑀮𑁄𑀓𑀦𑀸𑀬𑀓𑁂;

𑀯𑀺𑀢𑁆𑀣𑀸𑀭𑀺𑀓𑁂 𑀧𑀸𑀯𑀘𑀦𑁂, 𑀤𑁂𑀯𑀫𑀸𑀦𑀼𑀲𑀲𑀓𑁆𑀓𑀢𑁂.

𑁧𑁮𑁫. ‘‘𑀘𑀡𑁆𑀟𑀸𑀮𑁄 𑀆𑀲𑀳𑀁 𑀢𑀢𑁆𑀣, 𑀆𑀲𑀦𑁆𑀤𑀺𑀧𑀻𑀞𑀓𑀸𑀭𑀓𑁄;

𑀢𑁂𑀦 𑀓𑀫𑁆𑀫𑁂𑀦 𑀚𑀻𑀯𑀸𑀫𑀺, 𑀢𑁂𑀦 𑀧𑁄𑀲𑁂𑀫𑀺 𑀤𑀸𑀭𑀓𑁂.

𑁧𑁮𑁬. ‘‘𑀆𑀲𑀦𑁆𑀤𑀺𑀁 𑀲𑀼𑀓𑀢𑀁 𑀓𑀢𑁆𑀯𑀸, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺;

𑀲𑀬𑀫𑁂𑀯𑀼𑀧𑀕𑀦𑁆𑀢𑁆𑀯𑀸𑀦, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀤𑀸𑀲𑀳𑀁.

𑁧𑁮𑁭. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁧𑁮𑁮. ‘‘𑀤𑁂𑀯𑀮𑁄𑀓𑀕𑀢𑁄 𑀲𑀦𑁆𑀢𑁄, 𑀫𑁄𑀤𑀸𑀫𑀺 𑀢𑀺𑀤𑀲𑁂 𑀕𑀡𑁂;

𑀲𑀬𑀦𑀸𑀦𑀺 𑀫𑀳𑀕𑁆𑀖𑀸𑀦𑀺, 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀬𑀤𑀺𑀘𑁆𑀙𑀓𑀁.

𑁧𑁮𑁯. ‘‘𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀅𑀲𑀻𑀢𑀺𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁.

𑁧𑁯𑁦. ‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀲𑀼𑀔𑀺𑀢𑁄 𑀬𑀲𑀯𑀸 𑀳𑁄𑀫𑀺, 𑀫𑀜𑁆𑀘𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁯𑁧. ‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀏𑀫𑀺 𑀘𑁂 𑀫𑀸𑀦𑀼𑀲𑀁 𑀪𑀯𑀁;

𑀫𑀳𑀸𑀭𑀳𑀸 𑀲𑀼𑀲𑀬𑀦𑀸, 𑀲𑀬𑀫𑁂𑀯 𑀪𑀯𑀦𑁆𑀢𑀺 𑀫𑁂.

𑁧𑁯𑁨. ‘‘𑀅𑀬𑀁 𑀧𑀘𑁆𑀙𑀺𑀫𑀓𑁄 𑀫𑀬𑁆𑀳𑀁, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀅𑀚𑁆𑀚𑀸𑀧𑀺 𑀲𑀬𑀦𑁂 𑀓𑀸𑀮𑁂 [𑀲𑀬𑀦𑀓𑀸𑀮𑁂 (𑀲𑁆𑀬𑀸.)], 𑀲𑀬𑀦𑀁 𑀉𑀧𑀢𑀺𑀝𑁆𑀞𑀢𑀺.

𑁧𑁯𑁩. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀫𑀜𑁆𑀘𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁯𑁪. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁯𑁫. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁯𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀜𑁆𑀘𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀜𑁆𑀘𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀪𑀤𑁆𑀤𑀸𑀮𑀺𑀯𑀕𑁆𑀕𑁄 𑀩𑀸𑀘𑀢𑁆𑀢𑀸𑀮𑀻𑀲𑀫𑁄.