𑁧. 𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀲𑀢𑁆𑀢𑀸𑀳𑀁 𑀧𑀝𑀺𑀲𑀮𑁆𑀮𑀻𑀦𑀁, 𑀲𑀬𑀫𑁆𑀪𑀼𑀁 𑀅𑀕𑁆𑀕𑀧𑀼𑀕𑁆𑀕𑀮𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀝𑁆𑀞𑀳𑀺𑀁.

𑁨. ‘‘𑀯𑀼𑀝𑁆𑀞𑀺𑀢𑀁 𑀓𑀸𑀮𑀫𑀜𑁆𑀜𑀸𑀬, 𑀧𑀤𑀼𑀫𑀼𑀢𑁆𑀢𑀭𑀁 𑀫𑀳𑀸𑀫𑀼𑀦𑀺𑀁;

𑀫𑀳𑀦𑁆𑀢𑀺𑀁 𑀓𑀤𑀮𑀻𑀓𑀡𑁆𑀡𑀺𑀁, 𑀕𑀳𑁂𑀢𑁆𑀯𑀸 𑀉𑀧𑀕𑀘𑁆𑀙𑀳𑀁.

𑁩. ‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 [𑀧𑀝𑀺𑀕𑁆𑀕𑀳𑁂𑀲𑀺 (𑀲𑁆𑀬𑀸. 𑀓.)] 𑀪𑀕𑀯𑀸, 𑀲𑀩𑁆𑀩𑀜𑁆𑀜𑀽 [𑀢𑀁 𑀨𑀮𑀁 (𑀲𑀻.)] 𑀮𑁄𑀓𑀦𑀸𑀬𑀓𑁄;

𑀫𑀫 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑁄, 𑀧𑀭𑀺𑀪𑀼𑀜𑁆𑀚𑀺 𑀫𑀳𑀸𑀫𑀼𑀦𑀺.

𑁪. ‘‘𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄, 𑀲𑀢𑁆𑀣𑀯𑀸𑀳𑁄 𑀅𑀦𑀼𑀢𑁆𑀢𑀭𑁄;

𑀲𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁫. ‘‘‘𑀬𑁂 𑀘 𑀲𑀦𑁆𑀢𑀺 𑀲𑀫𑀺𑀢𑀸𑀭𑁄 [𑀬𑁂 𑀯𑀲𑀦𑁆𑀢𑀺 𑀲𑀫𑁂𑀢𑀸𑀭𑁄 (𑀲𑀻.)], 𑀬𑀓𑁆𑀔𑀸 𑀇𑀫𑀫𑁆𑀳𑀺 𑀧𑀩𑁆𑀩𑀢𑁂;

𑀅𑀭𑀜𑁆𑀜𑁂 𑀪𑀽𑀢𑀪𑀩𑁆𑀬𑀸𑀦𑀺 [𑀪𑀽𑀢𑀕𑀡𑀸 𑀲𑀩𑁆𑀩𑁂 (𑀲𑁆𑀬𑀸.)], 𑀲𑀼𑀡𑀦𑁆𑀢𑀼 𑀯𑀘𑀦𑀁 𑀫𑀫’.

𑁬. ‘‘𑀬𑁄 𑀲𑁄 𑀩𑀼𑀤𑁆𑀥𑀁 𑀉𑀧𑀝𑁆𑀞𑀸𑀲𑀺, 𑀫𑀺𑀕𑀭𑀸𑀚𑀁𑀯 𑀓𑁂𑀲𑀭𑀺𑀁 [𑀫𑀺𑀕𑀭𑀸𑀚𑀸𑀯 𑀓𑁂𑀲𑀭𑀻 (𑀲𑀻.)];

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁭. ‘‘‘𑀏𑀓𑀸𑀤𑀲𑀜𑁆𑀘𑀓𑁆𑀔𑀢𑁆𑀢𑀼𑀁, 𑀲𑁄 [𑀲𑁄𑀬𑀫𑁂𑀓𑀸𑀤𑀲𑀓𑁆𑀔𑀢𑁆𑀢𑀼𑀁 (𑀲𑀻.)] 𑀤𑁂𑀯𑀭𑀸𑀚𑀸 𑀪𑀯𑀺𑀲𑁆𑀲𑀢𑀺;

𑀘𑀢𑀼𑀢𑀺𑀁𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁮. ‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁯. ‘‘‘𑀅𑀓𑁆𑀓𑁄𑀲𑀺𑀢𑁆𑀯𑀸𑀦 𑀲𑀫𑀡𑁂, 𑀲𑀻𑀮𑀯𑀦𑁆𑀢𑁂 𑀅𑀦𑀸𑀲𑀯𑁂;

𑀧𑀸𑀧𑀓𑀫𑁆𑀫𑀯𑀺𑀧𑀸𑀓𑁂𑀦, 𑀦𑀸𑀫𑀥𑁂𑀬𑁆𑀬𑀁 𑀮𑀪𑀺𑀲𑁆𑀲𑀢𑀺 [𑀪𑀯𑀺𑀲𑁆𑀲𑀢𑀺 (𑀓.)].

𑁧𑁦. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀓𑀼𑀡𑁆𑀟𑀥𑀸𑀦𑁄𑀢𑀺 𑀦𑀸𑀫𑁂𑀦, 𑀲𑀸𑀯𑀓𑁄 𑀲𑁄 𑀪𑀯𑀺𑀲𑁆𑀲𑀢𑀺’.

𑁧𑁧. ‘‘𑀧𑀯𑀺𑀯𑁂𑀓𑀫𑀦𑀼𑀬𑀼𑀢𑁆𑀢𑁄, 𑀛𑀸𑀬𑀻 𑀛𑀸𑀦𑀭𑀢𑁄 𑀅𑀳𑀁;

𑀢𑁄𑀲𑀬𑀺𑀢𑁆𑀯𑀸𑀦 𑀲𑀢𑁆𑀣𑀸𑀭𑀁, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁨. ‘‘𑀲𑀸𑀯𑀓𑁂𑀳𑀺 [𑀲𑀸𑀯𑀓𑀕𑁆𑀕𑁂𑀳𑀺 (𑀲𑀻.)] 𑀧𑀭𑀺𑀯𑀼𑀢𑁄, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀮𑀸𑀓𑀁 𑀕𑀸𑀳𑀬𑀻 𑀚𑀺𑀦𑁄.

𑁧𑁩. ‘‘𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸 𑀮𑁄𑀓𑀦𑀸𑀬𑀓𑀁;

𑀯𑀤𑀢𑀁 𑀯𑀭𑀲𑁆𑀲 𑀧𑀼𑀭𑀢𑁄, 𑀧𑀞𑀫𑀁 𑀅𑀕𑁆𑀕𑀳𑁂𑀲𑀳𑀁.

𑁧𑁪. ‘‘𑀢𑁂𑀦 𑀓𑀫𑁆𑀫𑁂𑀦 𑀪𑀕𑀯𑀸, 𑀤𑀲𑀲𑀳𑀲𑁆𑀲𑀻𑀓𑀫𑁆𑀧𑀓𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺 𑀫𑀁.

𑁧𑁫. ‘‘𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳𑀁, 𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀁;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁧𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀼𑀡𑁆𑀟𑀥𑀸𑀦𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.