𑁮. 𑀢𑀺𑀡𑀫𑀼𑀝𑁆𑀞𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁮. ‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀮𑀫𑁆𑀩𑀓𑁄 𑀦𑀸𑀫 𑀧𑀩𑁆𑀩𑀢𑁄;

𑀉𑀧𑀢𑀺𑀲𑁆𑀲𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀅𑀩𑁆𑀪𑁄𑀓𑀸𑀲𑀫𑁆𑀳𑀺 𑀘𑀗𑁆𑀓𑀫𑀺.

𑁪𑁯. ‘‘𑀫𑀺𑀕𑀮𑀼𑀤𑁆𑀤𑁄 𑀢𑀤𑀸 𑀆𑀲𑀺𑀁, 𑀅𑀭𑀜𑁆𑀜𑁂 𑀓𑀸𑀦𑀦𑁂 𑀅𑀳𑀁;

𑀤𑀺𑀲𑁆𑀯𑀸𑀦 𑀢𑀁 𑀤𑁂𑀯𑀤𑁂𑀯𑀁, 𑀲𑀬𑀫𑁆𑀪𑀼𑀁 𑀅𑀧𑀭𑀸𑀚𑀺𑀢𑀁.

𑁫𑁦. ‘‘𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑀺𑀢𑁆𑀢𑁂𑀦, 𑀢𑀤𑀸 𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀦𑀺𑀲𑀻𑀤𑀦𑀢𑁆𑀣𑀁 𑀩𑀼𑀤𑁆𑀥𑀲𑁆𑀲, 𑀢𑀺𑀡𑀫𑀼𑀝𑁆𑀞𑀺𑀫𑀤𑀸𑀲𑀳𑀁.

𑁫𑁧. ‘‘𑀤𑀢𑁆𑀯𑀸𑀦 𑀤𑁂𑀯𑀤𑁂𑀯𑀲𑁆𑀲, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀧𑀓𑁆𑀓𑀸𑀫𑀺𑀁 𑀉𑀢𑁆𑀢𑀭𑀸𑀫𑀼𑀔𑁄.

𑁫𑁨. ‘‘𑀅𑀘𑀺𑀭𑀁 𑀕𑀢𑀫𑀢𑁆𑀢𑀁 𑀫𑀁, 𑀫𑀺𑀕𑀭𑀸𑀚𑀸 𑀅𑀧𑁄𑀣𑀬𑀺 [𑀅𑀳𑁂𑀞𑀬𑀺 (𑀲𑀻. 𑀲𑁆𑀬𑀸.)];

𑀲𑀻𑀳𑁂𑀦 𑀧𑁄𑀣𑀺𑀢𑁄 [𑀧𑀸𑀢𑀺𑀢𑁄 (𑀲𑀻. 𑀲𑁆𑀬𑀸.)] 𑀲𑀦𑁆𑀢𑁄, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁.

𑁫𑁩. ‘‘𑀆𑀲𑀦𑁆𑀦𑁂 𑀫𑁂 𑀓𑀢𑀁 𑀓𑀫𑁆𑀫𑀁, 𑀩𑀼𑀤𑁆𑀥𑀲𑁂𑀝𑁆𑀞𑁂 𑀅𑀦𑀸𑀲𑀯𑁂;

𑀲𑀼𑀫𑀼𑀢𑁆𑀢𑁄 𑀲𑀭𑀯𑁂𑀕𑁄𑀯, 𑀤𑁂𑀯𑀮𑁄𑀓𑀁 𑀅𑀕𑀜𑁆𑀙𑀳𑀁.

𑁫𑁪. ‘‘𑀬𑀽𑀧𑁄 𑀢𑀢𑁆𑀣 𑀲𑀼𑀪𑁄 𑀆𑀲𑀺, 𑀧𑀼𑀜𑁆𑀜𑀓𑀫𑁆𑀫𑀸𑀪𑀺𑀦𑀺𑀫𑁆𑀫𑀺𑀢𑁄;

𑀲𑀳𑀲𑁆𑀲𑀓𑀡𑁆𑀟𑁄 𑀲𑀢𑀪𑁂𑀡𑁆𑀟𑀼, 𑀥𑀚𑀸𑀮𑀼 𑀳𑀭𑀺𑀢𑀸𑀫𑀬𑁄.

𑁫𑁫. ‘‘𑀧𑀪𑀸 𑀦𑀺𑀤𑁆𑀥𑀸𑀯𑀢𑁂 𑀢𑀲𑁆𑀲, 𑀲𑀢𑀭𑀁𑀲𑀻𑀯 𑀉𑀕𑁆𑀕𑀢𑁄;

𑀆𑀓𑀺𑀡𑁆𑀡𑁄 𑀤𑁂𑀯𑀓𑀜𑁆𑀜𑀸𑀳𑀺, 𑀆𑀫𑁄𑀤𑀺𑀁 𑀓𑀸𑀫𑀓𑀸𑀫𑀳𑀁.

𑁫𑁬. ‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀆𑀕𑀦𑁆𑀢𑁆𑀯𑀸𑀦 𑀫𑀦𑀼𑀲𑁆𑀲𑀢𑁆𑀢𑀁, 𑀧𑀢𑁆𑀢𑁄𑀫𑁆𑀳𑀺 𑀆𑀲𑀯𑀓𑁆𑀔𑀬𑀁.

𑁫𑁭. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀦𑀺𑀲𑀻𑀤𑀦𑀫𑀤𑀸𑀲𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀺𑀡𑀫𑀼𑀝𑁆𑀞𑀺𑀬𑀺𑀤𑀁 𑀨𑀮𑀁.

𑁫𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀡𑀫𑀼𑀝𑁆𑀞𑀺𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀡𑀫𑀼𑀝𑁆𑀞𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.