𑁧. 𑀏𑀓𑀧𑀤𑀼𑀫𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀪𑀯𑀸𑀪𑀯𑁂 𑀯𑀺𑀪𑀸𑀯𑁂𑀦𑁆𑀢𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨. ‘‘𑀳𑀁𑀲𑀭𑀸𑀚𑀸 𑀢𑀤𑀸 𑀳𑁄𑀫𑀺, 𑀤𑀺𑀚𑀸𑀦𑀁 𑀧𑀯𑀭𑁄 𑀅𑀳𑀁;

𑀚𑀸𑀢𑀲𑁆𑀲𑀭𑀁 𑀲𑀫𑁄𑀕𑀬𑁆𑀳, 𑀓𑀻𑀴𑀸𑀫𑀺 𑀳𑀁𑀲𑀓𑀻𑀴𑀺𑀢𑀁.

𑁩. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀚𑀸𑀢𑀲𑁆𑀲𑀭𑀲𑁆𑀲 𑀉𑀧𑀭𑀺, 𑀆𑀕𑀘𑁆𑀙𑀺 𑀢𑀸𑀯𑀤𑁂 𑀚𑀺𑀦𑁄.

𑁪. ‘‘𑀤𑀺𑀲𑁆𑀯𑀸𑀦𑀳𑀁 𑀤𑁂𑀯𑀤𑁂𑀯𑀁, 𑀲𑀬𑀫𑁆𑀪𑀼𑀁 𑀮𑁄𑀓𑀦𑀸𑀬𑀓𑀁;

𑀯𑀡𑁆𑀝𑁂 𑀙𑁂𑀢𑁆𑀯𑀸𑀦 𑀧𑀤𑀼𑀫𑀁, 𑀲𑀢𑀧𑀢𑁆𑀢𑀁 𑀫𑀦𑁄𑀭𑀫𑀁.

𑁫. ‘‘𑀫𑀼𑀔𑀢𑀼𑀡𑁆𑀟𑁂𑀦 𑀧𑀕𑁆𑀕𑀬𑁆𑀳, 𑀧𑀲𑀦𑁆𑀦𑁄 𑀮𑁄𑀓𑀦𑀸𑀬𑀓𑁂 [𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸 (𑀲𑁆𑀬𑀸.)];

𑀉𑀓𑁆𑀔𑀺𑀧𑀺𑀢𑁆𑀯𑀸𑀦 𑀕𑀕𑀡𑁂 [𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀮𑀸𑀝𑁂𑀦 (𑀓.)], 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀧𑀽𑀚𑀬𑀺𑀁.

𑁬. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀅𑀦𑁆𑀢𑀮𑀺𑀓𑁆𑀔𑁂 𑀞𑀺𑀢𑁄 𑀲𑀢𑁆𑀣𑀸, 𑀅𑀓𑀸 𑀫𑁂 𑀅𑀦𑀼𑀫𑁄𑀤𑀦𑀁.

𑁭. ‘‘‘𑀇𑀫𑀺𑀦𑀸 𑀏𑀓𑀧𑀤𑀼𑀫𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀯𑀺𑀦𑀺𑀧𑀸𑀢𑀁 𑀦 𑀕𑀘𑁆𑀙𑀲𑀺’.

𑁮. ‘‘𑀇𑀤𑀁 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁄;

𑀫𑀫 𑀓𑀫𑁆𑀫𑀁 𑀧𑀓𑀺𑀢𑁆𑀢𑁂𑀢𑁆𑀯𑀸, 𑀅𑀕𑀫𑀸 𑀬𑁂𑀦 𑀧𑀢𑁆𑀣𑀺𑀢𑀁.

𑁯. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀧𑀤𑀼𑀫𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀧𑀤𑀼𑀫𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.