𑁬. 𑀯𑀡𑁆𑀡𑀓𑀸𑀭𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁩. ‘‘𑀦𑀕𑀭𑁂 𑀅𑀭𑀼𑀡𑀯𑀢𑀺𑀬𑀸, 𑀯𑀡𑁆𑀡𑀓𑀸𑀭𑁄 𑀅𑀳𑀁 𑀢𑀤𑀸;

𑀘𑁂𑀢𑀺𑀬𑁂 𑀤𑀼𑀲𑁆𑀲𑀪𑀡𑁆𑀟𑀸𑀦𑀺, 𑀦𑀸𑀦𑀸𑀯𑀡𑁆𑀡𑀁 𑀭𑀚𑁂𑀲𑀳𑀁 [𑀭𑀚𑀺𑀁 𑀅𑀳𑀁 (𑀓.), 𑀭𑀚𑁂𑀫𑀳𑀁 (𑀲𑁆𑀬𑀸.)].

𑁨𑁪. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀯𑀡𑁆𑀡𑀁 𑀭𑀚𑀬𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀯𑀡𑁆𑀡𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁫. ‘‘𑀇𑀢𑁄 𑀢𑁂𑀯𑀻𑀲𑀢𑀺𑀓𑀧𑁆𑀧𑁂, 𑀯𑀡𑁆𑀡𑀲𑀫 [𑀘𑀦𑁆𑀤𑀼𑀧𑀫 (𑀲𑀻.), 𑀘𑀦𑁆𑀤𑀲𑀫 (𑀲𑁆𑀬𑀸.)] 𑀲𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁨𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑀡𑁆𑀡𑀓𑀸𑀭𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑀡𑁆𑀡𑀓𑀸𑀭𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.