𑁨. 𑀧𑀼𑀧𑁆𑀨𑀣𑀽𑀧𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦. ‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀓𑀼𑀓𑁆𑀓𑀼𑀭𑁄 𑀦𑀸𑀫 [𑀓𑀼𑀓𑁆𑀓𑀼𑀝𑁄 𑀦𑀸𑀫 (𑀲𑀻.)] 𑀧𑀩𑁆𑀩𑀢𑁄;

𑀯𑁂𑀫𑀚𑁆𑀛𑁂 𑀢𑀲𑁆𑀲 𑀯𑀲𑀢𑀺, 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽.

𑁧𑁧. ‘‘𑀧𑀜𑁆𑀘 𑀲𑀺𑀲𑁆𑀲𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸;

𑀧𑀼𑀩𑁆𑀩𑀼𑀝𑁆𑀞𑀸𑀬𑀻 𑀘 𑀢𑁂 𑀆𑀲𑀼𑀁, 𑀫𑀦𑁆𑀢𑁂𑀲𑀼 𑀘 𑀯𑀺𑀲𑀸𑀭𑀤𑀸.

𑁧𑁨. ‘‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀢𑀁 𑀯𑀺𑀚𑀸𑀦𑀸𑀣 𑀦𑁄 𑀪𑀯𑀁;

𑀅𑀲𑀻𑀢𑀺𑀩𑁆𑀬𑀜𑁆𑀚𑀦𑀸𑀦𑀲𑁆𑀲, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀸.

𑁧𑁩. ‘‘𑀩𑁆𑀬𑀸𑀫𑀧𑁆𑀧𑀪𑁄 𑀚𑀺𑀦𑀯𑀭𑁄, 𑀆𑀤𑀺𑀘𑁆𑀘𑁄𑀯 𑀯𑀺𑀭𑁄𑀘𑀢𑀺;

𑀲𑀺𑀲𑁆𑀲𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽.

𑁧𑁪. ‘‘𑀅𑀲𑁆𑀲𑀫𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀤𑀺𑀲𑀁 𑀧𑀼𑀘𑁆𑀙𑀢𑀺 𑀲𑀺𑀲𑁆𑀲𑀓𑁂 [𑀩𑁆𑀭𑀸𑀳𑁆𑀫𑀡𑁄 (𑀲𑁆𑀬𑀸.)];

𑀬𑀫𑁆𑀳𑀺 𑀤𑁂𑀲𑁂 𑀫𑀳𑀸𑀯𑀻𑀭𑁄, 𑀯𑀲𑀢𑀺 𑀮𑁄𑀓𑀦𑀸𑀬𑀓𑁄.

𑁧𑁫. ‘‘𑀢𑀸𑀳𑀁 𑀤𑀺𑀲𑀁 𑀦𑀫𑀲𑁆𑀲𑀺𑀲𑁆𑀲𑀁, 𑀚𑀺𑀦𑀁 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀁;

𑀉𑀤𑀕𑁆𑀕𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀧𑀽𑀚𑁂𑀲𑀺𑀁 𑀢𑀁 𑀢𑀣𑀸𑀕𑀢𑀁.

𑁧𑁬. ‘‘𑀏𑀣 𑀲𑀺𑀲𑁆𑀲𑀸 𑀕𑀫𑀺𑀲𑁆𑀲𑀸𑀫, 𑀤𑀓𑁆𑀔𑀺𑀲𑁆𑀲𑀸𑀫 𑀢𑀣𑀸𑀕𑀢𑀁;

𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀲𑁄𑀲𑁆𑀲𑀸𑀫 𑀚𑀺𑀦𑀲𑀸𑀲𑀦𑀁.

𑁧𑁭. ‘‘𑀏𑀓𑀸𑀳𑀁 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀩𑁆𑀬𑀸𑀥𑀺𑀁 𑀧𑀝𑀺𑀮𑀪𑀺𑀁 𑀅𑀳𑀁;

𑀩𑁆𑀬𑀸𑀥𑀺𑀦𑀸 𑀧𑀻𑀴𑀺𑀢𑁄 𑀲𑀦𑁆𑀢𑁄, 𑀲𑀸𑀮𑀁 𑀯𑀸𑀲𑀬𑀺𑀢𑀼𑀁 𑀕𑀫𑀺𑀁.

𑁧𑁮. ‘‘𑀲𑀩𑁆𑀩𑁂 𑀲𑀺𑀲𑁆𑀲𑁂 𑀲𑀫𑀸𑀦𑁂𑀢𑁆𑀯𑀸, 𑀅𑀧𑀼𑀘𑁆𑀙𑀺𑀁 𑀢𑁂 𑀢𑀣𑀸𑀕𑀢𑀁;

𑀓𑀻𑀤𑀺𑀲𑀁 𑀮𑁄𑀓𑀦𑀸𑀣𑀲𑁆𑀲, 𑀕𑀼𑀡𑀁 𑀧𑀭𑀫𑀩𑀼𑀤𑁆𑀥𑀺𑀦𑁄.

𑁧𑁯. ‘‘𑀢𑁂 𑀫𑁂 𑀧𑀼𑀝𑁆𑀞𑀸 𑀯𑀺𑀬𑀸𑀓𑀁𑀲𑀼, 𑀬𑀣𑀸 𑀤𑀲𑁆𑀲𑀸𑀯𑀺𑀦𑁄 𑀢𑀣𑀸;

𑀲𑀓𑁆𑀓𑀘𑁆𑀘𑀁 𑀩𑀼𑀤𑁆𑀥𑀲𑁂𑀝𑁆𑀞𑀁 𑀢𑀁, 𑀤𑁂𑀲𑁂𑀲𑀼𑀁 [𑀤𑀲𑁆𑀲𑁂𑀲𑀼𑀁 (𑀲𑀻. 𑀲𑁆𑀬𑀸.)] 𑀫𑀫 𑀲𑀫𑁆𑀫𑀼𑀔𑀸.

𑁨𑁦. ‘‘𑀢𑁂𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀧𑀼𑀧𑁆𑀨𑁂𑀳𑀺 𑀣𑀽𑀧𑀁 𑀓𑀢𑁆𑀯𑀸𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁.

𑁨𑁧. ‘‘𑀢𑁂 𑀫𑁂 𑀲𑀭𑀻𑀭𑀁 𑀛𑀸𑀧𑁂𑀢𑁆𑀯𑀸, 𑀅𑀕𑀫𑀼𑀁 𑀩𑀼𑀤𑁆𑀥𑀲𑀦𑁆𑀢𑀺𑀓𑀁;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀲𑀢𑁆𑀣𑀸𑀭𑀫𑀪𑀺𑀯𑀸𑀤𑀬𑀼𑀁.

𑁨𑁨. ‘‘𑀧𑀼𑀧𑁆𑀨𑁂𑀳𑀺 𑀣𑀽𑀧𑀁 𑀓𑀢𑁆𑀯𑀸𑀦, 𑀲𑀼𑀕𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀳𑀁.

𑁨𑁩. ‘‘𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀲𑁄𑀴𑀲 𑀔𑀢𑁆𑀢𑀺𑀬𑀸;

𑀦𑀸𑀫𑁂𑀦𑀕𑁆𑀕𑀺𑀲𑀫𑀸 𑀦𑀸𑀫, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁨𑁪. ‘‘𑀯𑀻𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀭𑀸𑀚𑀸𑀦𑁄 𑀘𑀓𑁆𑀓𑀯𑀢𑁆𑀢𑀺𑀦𑁄;

𑀖𑀢𑀸𑀲𑀦𑀲𑀦𑀸𑀫𑀸𑀯, 𑀅𑀝𑁆𑀞𑀢𑁆𑀢𑀺𑀁𑀲 𑀫𑀳𑀻𑀧𑀢𑀻.

𑁨𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀧𑁆𑀨𑀣𑀽𑀧𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀧𑁆𑀨𑀣𑀽𑀧𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.